Ṯaaginna.
1 Nyii kwɔrɔ kwǝni Bɔɔlɔs kwir khaḏaam kǝthi Allah, nǝ kaavɔr kǝthi Yǝcu Kwɔrɔstɔ. Lǝni lǝlliny-nǝ ethi mǝcci ṯǝmminǝ ṯǝthi lizi liccasi Allah-na, mindaŋ ǝnyji iili ki-ŋiɽaŋal-na ŋir rerrem ŋaari-ŋi ḏiin ṯǝri @allima, 2 ṯǝkkizǝ-thi kizǝn ṯǝthi ŋimiitha ŋǝṯi nannitha dok-dok. Allah witi wǝṯi kǝkki ŋǝluŋi mac, ŋimiitha ŋa ŋlgittathɔŋw-ŋi kerreny tuk, 3 mindaŋ mǝ tɔɔmɔr iila tɔvthanna, nɔŋw ruwǝzǝlɔ ki-ŋiɽaŋal-na ŋuuŋun. Ŋa ŋǝccicǝr-nyji wǝkilǝ, mindaŋ nǝnyji andasi waamir-yi wǝthi Allah wir Kwiglǝthǝ kwǝri.
4 Nyii kwɔlɔcca-ŋa ŋaaŋwɔ kwǝni Ṯiiṯus, kwir tɔr tiinyi rerrem ṯǝmminǝ-thi ṯǝthi kildɔŋw:
Ethi Allah wir Papa nǝ Kwɔrɔstɔ kwǝni Yǝcu kwir Kwiglǝthǝ kwǝri inḏǝthǝ ŋaaŋwɔ ne@ma-ŋwɔsi ŋiiɽǝnnǝ-ŋi.
Ŋothɽor ŋǝthi Ṯiiṯus Kiriiṯ-na.
5 Nyii kwɔṯayyaŋa-lɔ Kiriiṯ, mindaŋ ethi dandimatha ŋiɽaŋali ŋa ŋamɽaṯɔ ethisi ṯimmasi kworo, nǝ ethi alla lishiyuukha-nǝ lǝthi yǝniisǝ ki-muḏun-nǝ tatap, kaka-ṯǝ nilŋithinǝ-ŋǝsi-gwɔ, 6 ŋgwa kwiti kwǝthi lɔɔma-na leere mac, kwǝthi kwayɔ kwɔtɔpɔt, kwǝthi nyɔɔrɔ nyǝthi ṯǝmminǝ, nyiti nyǝṯir-nyii aarɔŋw nyiri lǝriyǝ mac, wala ethoro lɔdɔrllathɔ. 7 Kaka nɔvthannar-gwɔ ethi rǝ-iis rir wǝkiil wǝthi ŋothɽor ŋǝthi Allah ere ǝthi lɔɔma-na leere mac. Laazim ŋweere piŋi rogɽo ruuŋwun mac, wala ethi oble ṯɔgwor-na, wala ethi urlǝli, wala ethoro biḏin nǝ ŋweere kiirici gwuruushǝ mac. 8 Laakin ŋworo kwǝthi liirin-ŋǝ, kwǝṯisi amindindi ethisǝrri ŋisaaw, laazim ŋwɔ thee ṯɔgwori jiɽeem, kwirllalɔ, kwirllinǝlɔ ter, nǝ kwǝṯi mithǝ ṯɔgwori tetter. 9 Laazim ŋwɔsi mithǝ ŋa tetter ŋilŋithinǝrsi ŋǝṯi aaɽanni ṯa@liima, mindaŋ mɔŋwɔthi ŋɔma ŋundu tok ethisi ǝccǝ lithaathɔ @allima ṯa@liima ṯisaaw, nǝ ŋwɔsi baaŋaci kila ghalatha keeŋen kila lǝṯisi nee. 10 Kaka ninaanir-gwɔ luuru lǝṯi mǝmlithi lǝṯi andindasi ŋiɽaŋali ŋiti ŋǝthi yǝnǝ mac, lǝṯi kǝgiɽinyji lizi-lɔ, nǝr-ṯǝ aalaci kila lǝṯi unduni ŋwɔthrɔnya. 11 Laazim ǝrsi nǝni tugwup, kaka nǝṯiir-gwɔ urrǝthǝ dɔɔnɔŋw-na tatap ṯa@liim-thi kitha ṯiti ṯɔvthanna mac, ethi-thi aari @allima nǝ nɔŋworo tatap ṯinḏir-thi ethi-thi ǝgini gwuruushǝ domony. 12 Nǝ kwette kweeŋen kwǝthi Kiriiṯ-ŋwɔ kwir kwiɽii nɔŋwsi andasi ŋir rerrem nɔŋwaarɔŋw, “Ligriṯiiyiin lir-tǝ lǝluŋw ŋwɔɔmɔri tatap, lir haywaanaaṯ wigii, lir limoozo, lǝṯi naŋni ethi bii yaari yeeŋen dak.” 13 Shahaaḏa ŋgwɔ kwir rerrem. Ŋwɔṯaŋw kiɽaccasi tig-tig mindaŋ mǝrǝthi ṯǝmminǝ ṯir rerrem, 14 mindaŋ ǝreere mithǝ riŋeereŋwa kira rǝthi Yahuuḏ mac, nǝ waamira wǝthi lizigwunǝŋ domony kila lidirnathisa-lɔ ŋa ŋir rerrem. 15 Kwomne tatap kwǝṯi suuɽunnici lizi kila lǝṯi sɔɔɽi ki-rɔgwor-nɔ reeŋen; laakin ǝṯi kwomne ere kweere mac kwǝṯi sɔɔɽi ki-lizi kila luruuŋwɔnǝ, nǝ ŋaɽiny ŋeeŋen nǝ rɔgwor reeŋen ruuŋwunǝ tok. 16 Nǝ ǝṯir aarɔŋw, nyiiŋǝ lilŋithi Allah, laakin ŋothɽor reeŋen ŋǝṯirsi ǝrri ǝṯir ǝvrinni Allah. Kaka nɔrɔr-gwɔ lɔwǝzǝ, lǝṯi nyɔɔrɔthina, liti lɔvthanna dɔṯṯɔk ethisi ǝrri ŋeere ŋisaaw mac.
aza
ṯagna
1 nyi kwiri kweni buuluz, kwir kaḏaam keḏi Allah na kafur keḏi Yecu Kwruztu, na ŋɔḏɽor ŋinyi eni ŋu, eḏi zi kindeci ṯəmna kla limezi Allah ecena, na ṯilŋiiḏina tɔk ṯeḏi ŋirlalu ŋeṯi nii Allah-na, 2 ṯəkiza ṯi kizen ṯeḏi ŋimiiḏa ŋiaŋ ŋinḏi eḏi nannida dɔk, ŋinderṯa ŋimɔ ŋi Allah kitaḏa kerreny tuk—na eṯi Allah ere kəki ŋəluŋi ḏuṯ. 3 mindaŋ ma ŋwomur ila ŋwofḏana, nuŋw ruwezi ŋiɽaŋali lu ŋuŋun pɔrpɔr, ŋafur ŋi ŋimenyji Allah wir Kwigileḏa kweri inḏeḏa, amr yi wuŋwun. 4 nyi kwagne ŋaŋwu, ŋa kweni tiiṯaz, kwumorɔ rerem tor tinyi ki ṯəmna-na ṯutuput. eḏi ṯimeca ṯeḏi ŋimɽi nani ŋa gwu ŋiɽena ŋi ŋinḏi nani gwu Allah wir Papa, na Kwruztu kweni Yecu kwir Kwigileḏa kweri,
ṯica-na ṯeḏi lijowiṯ
5 nyi kwuṯazaŋa lu kezir weni keriiṯ eḏi ṯimazi ŋɔḏɽor kworɔ, ŋiti ŋimenyji ratiza mac, mindaŋ eḏi ica lijowiṯi-na leḏi yaniiza ezir nana were were, kaka andicaŋa zi gwu; 6 mer nani lere liti leḏi ŋiɽaŋali ŋere ŋiki mac; leḏi layu lere lere, nyor nyi nyeḏi ṯəmna, nyiti nyermiḏeḏizi lizi nana leḏi yəni lu mac, na nyiti nyiri lidurlaḏu tɔk mac. 7 kaka ofḏanar gwu eḏi kwijowiṯ kwere kwir wakiil wizaw weḏi Allah, ere eḏi ŋiɽaŋali-na ŋiki mac, ŋwu zi ere erri ŋere ṯugwor ṯi ṯuŋwun ṯimellini mac; ŋwere orɔ kwarriny mac; ŋwere ii kiɽcaŋi mac mindaŋ eḏorɔ kwirŋaza; ŋwere miidaḏa kwuruuza tɔk mac. 8 lakin kweṯamindi lirina, kweṯizamɽi ŋeni ŋizaw, kwiḏi tugwori, kwirlalu titir, kwirlinelu ter eḏi Kwruztu-na, kwir kweleny kweḏi rɔgwɽɔ ruŋwun. 9 lazim eḏuŋw miḏa teter ŋiɽaŋali ŋir rerem ilŋiiḏinerzi gwu, mindaŋ muŋw eḏi ŋuma eḏizilŋiiḏini liḏaḏu ṯaliima, na eḏi zi ofḏaḏa kla leṯi zi naŋni eḏi zi upupuḏaḏa lu ŋir rerem.
limuallim lir ŋidiny
10 kaka nanir gwu litezir lir lidurlaḏu, na kla rerec leṯi miḏa kuruu keḏi ṯuɽuna ŋwudrunya, leṯandindazi ŋiɽaŋali ŋir kwajal domony, na leṯikekeɽinji lizi lu tɔk, 11 ŋofḏana eḏi zi ṯinyini kla ŋiɽaŋali nana, kaka eṯir gwu urlili lizi lu leḏi duənuŋw kwere kwere ṯaliim ṯi ṯeŋen ṯiti ṯofḏana mac, ṯeṯir ṯi miidaḏa kwuruuza. 12 na kwete kweŋen wuɽe-wuɽeny kwir kwiɽi, aruŋw: lizi leḏi keriiṯŋw leṯorɔ ləluŋ dɔk dɔk, na liri ludur kaka kwɔmne kwedi yaɽi-na; liri limozɔ tɔk, leṯinaŋni eḏi bii yari yeŋen domony. 13 na ŋiɽaŋal ŋu orɔ rerem, ṯaŋwu, ezi kiɽaci ŋuma ŋi mindaŋ mer eni lifirli ki ṯəmna-na, 14 na er ere ketize əḏya weḏi yahuuḏ yey mac, ya amra weḏi lizi kla lidirnaḏizelu ŋa ŋeni rerem tɔk mac.
15 kwɔmne tatap kwuzuɽu-na ki yey-na yeḏi lizi lizuɽu-na; na kla likiyaḏa lu, liti leḏi ṯəmna mac, eṯi kwɔmne ere kwere mac kwuzuɽu-na ki yey-na yeŋen, kaka eni gwu fikra kweŋen kwikiyaḏa lu, rugwor ri-na reŋen tɔk. 16 eṯir ari runyu ri reŋen ŋwu: nyiŋa lilŋiiḏi Allah, lakin ŋa ŋeṯizerri eṯir ŋi nyindini ŋunduŋwu, kaka urir gwu lizi liki cilcil, lizi lir lidurlaḏu, ner ere ofḏani mac ki ŋɔḏɽor-na ŋere ŋizaw.