Yǝcu mɔŋgwɔ diiɽǝ ki-ŋirany-na.
(Maṯṯa 28:1-8Mɔrgus 16:1-8Luuga 24:1-12)1 Na mǝ ŋɔrpana oro tuttuk kwǝthi Laamin lǝthi Lahaḏ, nǝ Mǝryǝm Majḏaliiyyǝ iila ki-thimaamɔ naaɽathi-tǝ kinnǝ kirim, mindaŋ nɔŋweese kiɽibini kimǝ dimmini ṯimaamɔ kworo. 2 Ŋwɔṯaŋw nɔŋw avri nɔŋweele naanɔ-gwɔ Sim@aan Bɔṯrɔs-ŋǝ ṯilmiiz-thi ṯithaathɔ ṯǝṯi Yǝcu amɽi nɔŋwsǝccǝŋw, “Limǝ dimmǝ Kweelenyi ki-thimaamɔ-na, ninyeere elŋece ǝzir wɔmǝr-gwɔ kittasa mac.”
3 E-ta nǝ Bɔṯrɔs-ŋǝ ṯilmiiz-thi ṯithaathɔ ruuthǝ etheele ki-thimaamɔ 4 Nǝr avri ndǝndǝk, laakin nǝ ṯilmiiz ṯithaathɔ ǝthi ŋwunyaŋ nɔŋw arṯitha Bɔṯrɔs-ŋwɔ mindaŋ nɔŋw ɔppathi kerreny ki-thimaamɔ. 5 Mɔŋw irralɔ nɔŋweese kǝfǝnǝ kinaanɔ kinaŋw, laakin nɔŋweere ǝnḏi mac. 6 E-ta mǝ Sim@aan Bɔṯrɔs ɔppatha, kwaathan nɔŋw ǝnḏi ki-thimaamɔ-na. Nɔŋweese kǝfǝnǝ kinaŋw-lɔ, 7 nǝ minḏiil kwɔkǝkicǝr Yǝcu-ŋw kinda kwɔnaanalɔ ter kwaaɽinna dɔŋw-na. 8 E-ta nǝmǝ ṯilmiiz kitha ṯɔppathɔ ki-thimaamɔ kerreny ǝnḏi tok, nɔŋweese mindaŋ nɔŋw ǝmmini. 9 Kaka niti nilŋithirsi-gwɔ kinnǝni mac ŋa ŋaari-ŋi Kiṯaab Kirllinǝlɔ ter ŋwɔ, laazim ŋwɔ diiɽǝ ki-ŋiɽany-na. 10 E-ta na ṯalaamiiz ele nǝr aaɽitha dɔɔnɔ kweeŋen.
Yǝcu mɔŋgwɔ ruwǝnnici Mǝryǝm Majḏaliiyyǝ-ŋwlɔ.
(Maṯṯa 28:9-10Mɔrgus 16:9-11)11 Laakin Mǝryǝm-tǝ, nɔŋw rillaci ṯimaamɔwa-lɔ kwaarathina, nǝ kinaŋw naarɔŋw, nɔŋw irralɔ nɔŋw buuŋwɔthǝ ṯimaamɔwa-na; 12 nɔŋweese limeleka ndǝn liginna yirethi yifiithɔ per-per, linaanalɔ kǝzir winḏirɔ-gwɔ aŋnalɔ wǝthi Yǝcu, kwette kinda nǝ kwɔthaathɔ ki-ŋwaara. 13 Nǝrǝccǝŋw, “Kwaaw kwaalɔ, aatha kwǝricǝ-ŋǝ?” Nɔŋwsǝccǝŋw, “Kaka mǝr-gwɔ dimmǝ Kweelenyi kwiinyi, mindaŋ ninyeere elŋece ǝzir wǝmǝr-gwɔ kittasi mac.” 14 Nǝ mɔŋwsi andasi ŋɔ tǝ, nɔŋw ɔrllalɔ nɔŋweese Yǝcu-ŋwɔ, laakin nɔŋweere elŋe mac ethaarɔŋw Yǝcu kwiri, 15 nǝ Yǝcu ǝccǝŋw, “Kwaaw kwaalɔ, aatha kwaarathi-ŋa? Ǝyǝ kwɔrɔ kwɔnaŋna-ŋa?” Nɔŋw kittatha nɔŋwaarɔŋw kwɔr kwǝthi jineene kwiri mindaŋ nɔŋwɔccǝŋw, “Yaa sǝyyiḏ moro kwɔmǝ dimmǝ kǝzir weere tǝ, nyandaci ǝzir wɔgittaŋa-gwɔ mindaŋ nyeele nyii dimmǝ.” 16 Nǝ Yǝcu ǝccǝŋw, “Mǝryǝm!” Nɔŋw ɔrllatha naana mindaŋ nɔŋwɔccǝŋw ŋiyahuuḏǝ-ŋwɔ, “Rabbuunii!” ŋǝniŋw, “Yaa Mɔ@allim.” 17 Nǝ Yǝcu ǝccǝŋw, “Ǝṯi-nyii mɔmmɔ naana mac, kaka niti mǝnyii dallɔ kinnǝ naanɔ-gwɔ Papa mac; laakin nḏi kǝniny naanɔ-gwɔ liyǝŋgǝri ǝsi ǝccǝŋw kwaarɔŋw, Nyii-ŋgwɔ kwallɔ naanɔ-gwɔ Papa kwiinyi nɔŋworo Papa kwaalɔ tok, nɔŋworo Allah wiinyi, nǝ Allah waalɔ tok.” 18 Nǝ Mǝryǝm Majḏaliiyyǝ ele nɔŋwɔccǝ ṯalaamiiza-ŋw, “Nyii kwɔmǝ iisa Kweelenyi.” E-ta nɔŋwsi-mǝ andaci ŋiɽaŋali ŋa ŋandica-ŋwsi.
Yǝcu mɔŋgwɔ ruwǝnnici ṯalaamiiza-lɔ ṯuuŋwun.
(Maṯṯa 28:16-20Mɔrgus 16:14-18Luuga 24:36-49)19 Nǝ mǝ kilkǝlu oro kǝthi laamin lǝthi Lahaḏ, nǝ ṯalaamiiz aaɽathi dɔŋw ŋwobaab-tǝ ŋwɔlǝŋthinna, lithiinya Yahuuḏǝ, nǝ Yǝcu iila mindaŋ nɔŋw rilli kelgeny-na keeŋen nɔŋwsǝccǝŋw, “Ŋaaŋa kila lisaawa”. 20 Mɔŋwsi andasi ŋɔ tǝ, nɔŋwsi baaŋaci rii ruuŋwun nǝ ṯuɽumǝ ṯuuŋwun tok. Mindaŋ nǝ ṯalaamiiz aamina beṯṯen mǝr-ŋweese Kweelenyi. 21 Nǝsi Yǝcu ǝccǝŋw kwokwony, “Ŋaaŋa kila lisaawa. Kaka nɔɔsa-nyii-gwɔ Papa, ŋǝsi ɔɔsi nyii tok.” 22 Mɔŋwsi andasi ŋɔ tǝ, nɔŋwsi uṯǝthǝ wǝŋ naana mindaŋ nɔŋwsǝccǝŋw, “Mǝṯṯir Ṯigɽimǝ Ṯirllinǝlɔ ter. 23 Mǝ fivrici kweere ŋikiyaŋi, ǝṯir fivrinni; nǝ maseere fivrici mac tǝ, ǝṯir-tǝ nannitha.”
Yǝcu-ŋǝ Ṯɔɔma-gi.
24 Nǝ Ṯɔɔma kwir kwette kwǝthi ṯalaamiiz ṯir wrii-kwuɽǝn kwǝṯir ǝccǝ Ṯɔɔŋwɔr ere naani ŋundu-ŋǝli mac, kinaŋw mǝ Yǝcu iila. 25 E-ta nǝ ṯalaamiiz andaci narǝccǝŋw, “Nyiiŋǝ limǝ-mi ese Kweelenyi.” Laakin nɔŋwsǝccǝŋw, “Minyeere ese ruu rǝthi relme mac ki-yerge-na yuuŋwun mindaŋ minyeere ethi ǝnyji taamin ki-ruu-nǝ mac, nǝ ethi ǝnyji ṯii ṯiinyi ki-ṯuɽumǝ-lǝ ṯuuŋwun tok mac, nyeere ǝmmini ḏuṯ.”
26 Mǝ ŋwaamin dɔvokwɔppa ere, nǝ ṯalaamiiz ṯuuŋwun naani kiininy ki-yiŋna-na, e-ta nǝ Ṯɔɔma naani tok ŋundu-ŋǝli. Nǝ ŋwɔbaab naani ŋwɔlǝŋthinnǝ, laakin nǝ Yǝcu iila nɔŋw rilli kelgeny-na keeŋen nɔŋwsǝccǝŋw, “Ŋaaŋa kila lisaawa.” 27 E-ta nɔŋwɔccǝ Ṯɔɔma-ŋwɔ, “Kitta laamin lɔɔŋwa kɔnɔŋw, nǝ ese rii riinyi; nǝ alla ṯii-na ṯɔɔŋwa, mindaŋ a kette ki-ṯuɽumǝ tiinyi; ǝṯeere oro rɔgwor-na riɽǝ-riɽǝn mac, ǝti kǝniny ǝmmini.” 28 Nǝ Ṯɔɔma ǝŋnici nɔŋwɔccǝŋw, “Kweeieny kwiinyi, Allah wiinyi!” 29 Nǝ Yǝcu ǝccǝŋw, “A kwɔmǝ ǝmmini kaka mǝnyii-gwɔ ese-a? Ethi kila ɔrtanni liti liisa mac, laakin nǝrtǝ ǝmmini.”
Karath kǝthi kiṯaab.
30 Nǝ Yǝcu ǝrri ŋilima ŋittǝzir kiyǝnǝ yǝthi ṯalaamiiz ṯuuŋwun, ŋiti ŋɔlɔɔthɔna kiṯaab-na ŋgɔ mac. 31 Laakin nǝr lothone ŋɔ mindaŋ mǝ ǝmmini ethaarɔŋw, Yǝcu kwɔrɔ Kwɔrɔstɔ, kwir Tɔr tǝthi Allah, mindaŋ mǝ ǝmminici ŋunduŋw-tǝ, ǝthi ŋimiitha-na yiriny-yi yuuŋwun.
aza 20
ṯimamu muŋw nani domony
1 ma lamin orɔ liŋna leḏi uzbuwa wir ter, na maryam majdaliiya ila ki ṯimamu ŋurpana tutuk, kezir wir berle berle, nuŋw eze kiɽbini kimɔṯertiɽini ṯimamu kworɔ. 2 ṯaŋwu nuŋw afri, nuŋw ele nani gwu zimaan buṯruz-ŋa meḏgen gi kwedi Yecu, kwamɽaŋw, nuŋw zi eca ŋwu: limɔ dimi Kwelenyi ki ṯimamu-na, nenyi ere elŋece ezir mac wumer gwu kiṯazi. 3 na ṯa buṯruz-ŋa ruḏeni meḏgen gi kwuḏaḏu ner ele ki ṯimamu. 4 ner afri nden tɔk; nuŋw ṯamḏu ŋgwa buṯruzŋw nana, nuŋw ila ki ṯimamu kerreny. 5 nuŋw irralu, nuŋw izazi-na, nuŋw inḏa yireṯi yimri-na yinanalu, nuŋw ere enḏi keni mac. 6 na zimaan buṯruz ila tɔk, kwukwaḏaḏu, nuŋw enḏi ki rimamu-na, nuŋw inḏa yireṯi yimri-na yinanalu, 7 na kireti tɔk, kikəkizer kinda, kiti kinani yiret yi duŋw mac; kinanalu ter, kaɽina duŋw. 8 ta na meḏgen kwuḏaḏu, ŋgwa kwupaḏu ki ṯimamu kerreny, enḏi tɔk, nuŋw eze, nuŋw emni; 9 kaka ṯimḏirzi gwu kinna, ŋuluḏina, ŋaruŋw: kwindi eḏi diɽi ŋiɽany-na. 10 taŋwu na limeḏgen aɽi kiṯay duənu.
Yecu muŋw gwu ruwenizi maryamŋw lu
11 maryam ta, nuŋw rillazi ṯimamu lu par, kwaraḏina; mindaŋ aruŋw gwu, nuŋw irralu eḏi izazi ṯimamu-na, 12 nuŋw eze limaleyka nden likinna yireṯi yifiiḏu pərpər, linaniza ezir lu wumer gwu inḏiri aŋna lu weḏi Yecu, kwete kinda, na kwete kuṯu. 13 ner eca ŋwu: kwaw kwalu, aḏa kwaraḏiŋa? nuŋw zi eca ŋwu: limɔdima Kwelenyi kwinyi kiṯay, nenyi ere elŋece ezir mac wumer gwu kiṯazi. 14 muŋw zi andaci ŋu, nuŋw orlalu, nuŋw eze Yecuŋw kwurillu, nuŋwere elŋe mac eḏari: Yecu kwiri. 15 na Yecu eca ŋwu: kwaw kwalu, aḏa kwaraḏiŋa? eya kwiri kwicaŋa? kaka aruŋw gwu ŋwu, kwor kwir ŋgwu kweḏi jineyna, nuŋw eca ŋwu: kwor kwalu, ma dimi kezir were, andicanyi ezir wumɔ gwu kete, enyi dima. 16 na Yecu dimici yiriny, nuŋw eca: maryam, nuŋw orlalu, nuŋw eca, kandiza gi keḏi yahuuḏ, ŋwu: rabboni (ŋeni muallim). 17 na Yecu eca ŋwu: eti nyi dugwuɽa nana mac, kaka iti menyi gwu kinna allu nani gwu Papa kwinyi mac. inḏi ṯa nani gwu lieŋgeri linyi, ezi eca ŋwu: Yecu kwaru ŋwa: nyi kwallu nani gwu Papa kwinyi, kwir Papa kwalu tɔk, nani gwu Allah winyi, wir Allah walu tɔk. 18 na maryam majdaliiya ele nuŋw andaci limeḏgen, nuŋw zi eca ŋwu: nyi kwumeze Kwelenyi, nuŋw zi andaci ŋiɽaŋali tɔk, ŋimɔŋw zi andaci.
Yecu muŋw gwu ruwenizi limeḏgen lu
19 na kirakalu ŋgwa, ki lamin liŋna leḏi uzbuwa, na limeḏgen rayḏi duŋw, na yogwur leŋḏeni, kaka ṯinyar gwu yahuuḏa; nezi Yecu enḏiḏa, nuŋw rilli keligeny-na, nuŋw zi eca ŋwu: edi ŋiɽena nani dangal-na. 20 muŋw zi andazi ŋu, nuŋw zi baŋaci yerge tɔk, ṯuɽma tɔk. na limeḏgen nyeŋlena beṯen mer gwu eze Kwelenyi. 21 nezi Yecu eca ŋwu kwokwony: a kla fa ta lizawi a? kaka menyi gwu Papa uza, ṯaŋwu ŋazi uzi nyi tɔk. 22 muŋw zi andaci ŋu, nuŋw zi ṯiŋaḏa wəŋ nana, nuŋw zi eca ŋwu: afar Ṯigɽima tirlinelu ter. 23 ma fifrici kwere ŋikyaŋi, eṯir fifrini; mezi efrici kwere eṯir ṯa nani.
Yecu muŋw gwu ruwenizi tuma lu
24 na tuma, kwirir li kla wri-kwuɽen, kwecer tuŋwur, ere nani ŋunduŋali mac, ki lomur lime li Yecu ila. 25 na limeḏgen liḏaḏu eca ŋwu: nyiŋa limeze Kwelenyi, nuŋw zi eca ŋwu: menyi ere eze ru reḏi relme mac ki yerge-na yuŋwun, eḏi gwu enji lamin linyi kezir weḏi relme, na menyi ere enji ṯii tinyi ki ṯuɽma ṯuŋwun tɔk mac, enyjere emni ḏuṯ.
26 ma ŋwamin dufɔkwupa ere, na limeḏgen nani kwokwony kiininy, na tuma nani ŋunduŋali tɔk. na Yecu ila, leŋḏini gwu yogwur, nuŋw zi rillaza lu keligeny-na, nuŋw zi eca ŋwu: a kla fa ta lizawi a? 27 ta nuŋw andaci tumaŋw, nuŋw eca ŋwu: ilaṯi lamin li lɔŋwa, enyi li mummici yerge-na yinyi: ila ṯii ṯi ṯɔŋwa tɔk, enji ki ṯuɽma-na. eṯi dima mac, emna ṯa keni. 28 na tuma eŋnici, nuŋw eca ŋwu: Kweleny kwinyi, kwir Allah winyi tɔk. 29 na Yecu eca ŋwu: a kweḏi ṯəmna menyi gwu eze, a? lortani kla leḏi ṯəmna, liti limenyeze yey yi mac.
ŋiɽaŋal ŋupa ŋedi injiil
30 na Yecu erri ŋilima ŋiḏaḏu ŋuru ki yey-na yeḏi limeḏgen luŋwun, ŋiti ŋimerzi lɔ kiṯam-na ŋgu mac. 31 lakin ŋimerzi lɔ ŋu mindaŋ ma eḏi ṯəmna eḏi ṯi aruŋw: Yecu kwiri Kwruztu, kwir Tor teḏi Allah; mindaŋ, ṯəmna ṯi kḏu, a ma eḏi ŋimiida ŋiaŋ yiriny yi yuŋwun.