Yǝcu mɔŋgwɔ rilli kiyǝnǝ yǝthi Biilaaṯɔs.
(Maṯṯa 27:1-2, Maṯṯa 11-14Mɔrgus 15:1-5Yuhanna 18:28-38)1 E-ta nǝ lɔdɔŋw kila tatap diiɽi nǝr mɔlɔ Yǝcu-ŋw nǝrgeele kiyǝnǝ yǝthi Biilaaṯɔs, 2 nǝr-gwɔ aari ibṯǝḏi ethi ǝnyji-nyji nda naana nǝraarɔŋw, “Nyiiŋǝ likaṯṯisa kwɔɔrɔ-ŋgwɔ kwɔkwaza lizi lǝri, nɔŋwsi andaci etheere inḏǝthǝ Imbraaṯɔɔra ṯɔlba mac, mindaŋ nɔŋw ruusi rogɽo ruuŋwun Kwɔrɔstɔ kwir mǝlik.”
3 Nǝ Biilaaṯɔs uṯicǝlɔ nɔŋwɔccǝŋw, “A kwɔrɔ mǝlik kwǝthi Yahuuḏa?” Nǝ Yǝcu ǝŋnici nɔŋwɔccǝŋw, “A kwaami andasiŋw.”
4 E-ta nǝ Biilaaṯɔs ǝccǝ rɔ-asa rǝthi kahana-ŋw lɔdɔŋw-li, “Nyii kwende kwɔmǝ kaṯṯaci kwɔɔrɔ-ŋgwɔ sǝbǝbǝ kweere kwigii kwǝthi-gwɔ ruusi ŋunduŋw kaṯṯi.” 5 Laakin nǝrmǝ kǝniny tuurǝthǝlɔ tur rerrec nǝraarɔŋw, “Kwaari ibṯǝḏi ṯa@liim-thi ṯuuŋwun, nɔŋw ɔkkwazi lizi ethi diiɽi ŋǝryǝ-ŋi Yahuuḏiiyyǝ-ŋwɔ naana tatap. Nɔŋwaara ibṯǝḏi Jǝliil-ŋgi mindaŋ kwɔmǝ ɔppatha kɔnɔŋw kirem kimaara.”
Yǝcu mɔŋgwɔ rilli kiyǝnǝ yǝthi Hiiruuḏus.
6 Mǝsi Biilaaṯɔs neŋne ŋɔ nɔŋwaarɔŋw, “Kwɔr-ŋgwɔ kwaani oro Kwɔjǝliilǝ?” 7 Nǝ mɔŋwsi elŋe ethaarɔŋw Yǝcu kwɔnanni kǝzir wɔnaanɔ ki-rii-nǝ rǝthi Hiiruuḏus, nɔŋw ṯiŋacci Hiiruuḏus-ŋwɔ kaka a-naani-ŋgwɔ Urshaliim ki-lɔɔmɔr-la ṯǝ kila. 8 Nǝ Hiiruuḏus aamina beṯṯen mɔŋgweese Yǝcu-ŋw, kaka niŋna-ŋgwɔ ŋiɽaŋali ŋǝni ŋundu, mindaŋ nɔŋw naŋnalɔ beṯṯen kinaŋw tuk etheese ŋunduŋw. Nɔŋw kittatha ethi iisacci Yǝcu-ŋwɔ ŋilima ŋeere. 9 Ṯaŋw nǝ Hiiruuḏus uṯici Yǝcu-ŋwlɔ ŋiɽaŋal-ŋilɔ ŋuuru, laakin nǝ Yǝcu ere ǝŋnici ḏuṯ. 10 Nǝ rɔ-asa rǝthi kahana-ŋǝ mɔ@alllmiin-ŋǝli kwǝthi Sherii@a dɔŋgwatha keṯṯɔk nǝr allasi Yǝcu-ŋw ŋiɽaŋali naana, ŋifirlli-ŋifirlli. 11 Nǝ Hiiruuḏus-ŋǝ jesh-gi kwuuŋwun ǝwɽǝ yǝy-lɔ, nǝr ǝrrǝlɔŋw kathiri; mindaŋ nǝr ɔɽacci kwɔɔvana kwiccaw kwiithɔ naana, e-ta nɔŋw-mǝ ɔɽiccǝ Biilaaṯɔs-ŋwɔ. 12 Nǝ ki-laamin-lǝ ṯǝ kila, nǝ Hiiruuḏus-ŋǝ ammithi Biilaaṯɔs-gi, kaka nɔrɔr-gwɔ ṯuwǝn kerreny.
Yǝcu mǝr-gwɔ ǝccǝ haakima ŋiɽany-ŋi.
(Maṯṯa 27:15-26Mɔrgus 15:6-15Yuhanna 18:39—19:16)13 Nǝ Biilaaṯɔs ɔrnɔṯa rɔ-asa rǝthi kahana dɔŋw leeleny-li nǝ lizi tok. 14 Nɔŋwsǝccǝŋw, “Ŋaaŋa lɔmɔlca-nyii kwɔɔrɔ-ŋgwɔ naarɔŋw kwɔmɔmlɔttathi lizi ki-thaay ṯigii. Nǝ ŋgwɔ-pa kwɔmǝ-nyii ṯǝcci kiyǝnǝ yaalɔ mindaŋ ninyeere inḏaci ŋiɽaŋalii ŋeere ŋigii mac ŋa ŋallisa-ŋǝsi naana. 15 Nǝ Hiiruuḏus tok nɔŋweere inḏaca ŋiɽaŋali ŋeere mac, kaka mɔŋgwɔ ǝɽiccǝ nyuŋw ŋunduŋw. Ṯaŋw nǝ kwomne ere kweere mac kwɔgii kwǝrrǝ kwɔr-ŋgwɔ kwǝthi-gwɔ iɽinyatha. 16 Ŋwɔṯaŋw ethiny ippi souṯ-gi mindaŋ nyii ṯiŋatha kithaay ŋweele.” [ 17 Nǝ ki-@iiḏ-nǝ ǝṯisi Biilaaṯɔs kǝdici musjuunǝ kwette kwǝṯir naŋni ŋundu-ŋǝ.]
18 Nǝ lɔdɔŋw tatap attasi kwɔɔla nǝraarɔŋw, “Iɽinyithi ŋundu-ŋwɔ! Nyji kǝdicǝ Baaraabaas-ŋwɔ!” 19 Baaraabaas-tǝ nɔŋworo kwette wɔgittar ki-sijin-nǝ ŋiɽaŋal-ŋi ŋɔkkasaŋw-ŋi lizi ŋǝriyǝ naana, nǝ ḏimmi tigittaŋw tɔk ki-mǝḏiinǝ-nǝ.
20 Nǝ kaka a-naŋna-gwɔ Biilaaṯɔs ethi kǝdu Yǝcu-ŋw, nɔŋwsi tuurǝccǝlɔ kwokwony. 21 Laakin nǝr ǝŋnici kwɔɔlagi-na nǝrǝccǝŋw, “Ṯigrǝthu ŋunduŋwɔ ki-ŋwuuɽi-lɔ! Ṯigrǝthu ŋunduŋwɔ ki-ŋwuuɽi-lǝ!”
22 Nǝsi Biilaaṯɔs andaci kwokwony ki-taamin-la tir ṯɔɽol nɔŋwsǝccǝŋw, “Laakin kaṯṯi kindǝr kǝndu kǝrrǝŋw? Kwende kwɔmǝ-nyii inḏaci kwomne kweere kwigii kwǝthi-gwɔ iɽinyatha! Kwǝnyii ippi sɔuṯ-gi mindaŋ nyi-mǝ kǝdu ŋweele.”
23 Laakin nǝr-mǝ mithithi kwɔɔla rerrec ŋɔmmaŋi ethi ɽeenye Yǝcu-ŋwɔ ki-ŋwuuɽi-lǝ, mindaŋ nǝr ɔvthasi kenyjer-gi. 24 Mindaŋ nǝ Biilaaṯɔs alla waamira wǝni ŋiɽany ŋǝthi Yǝcu kaka-ṯǝ ŋa ŋinaŋnarsi. 25 Nɔŋw kǝdu kwɔɔrɔ-ŋgwa kwɔnaŋnar, ŋgwa kwɔgittar ki-sijin-nǝ ŋiɽaŋal-ŋi ŋɔkkasaŋw-ŋi lizi ŋǝriyǝ naana, nǝ ŋigittaŋw-gi ḏimmiya tok, e-ta nɔŋwsi-mǝ inḏǝthǝ Yǝcu-ŋwɔ ethisi ǝrrici ŋirga ŋinaŋnarsi.
Yǝcu mǝr-gwɔ ṯigrǝthǝ ki-ŋwuuɽi-lǝ ŋwɔɽɔmɔthalɔ.
(Maṯṯa 27:32-44Mɔrgus 15:21-32Yuhanna 19:17-27)26 Nǝ mǝr mɔlɔ Yǝcu-ŋwɔ, mindaŋ mǝrgeele, nǝr biɽithi kwɔr-ŋǝli kwette kithaay kwǝthi Gayrwaan-ŋwɔ kwǝni Sim@aan kwɔnaanɔ kwuthǝr nɔŋw-mǝ aaɽa. Nǝr mithǝ nǝr uvuni ŋwuuɽ ŋwɔɽɔmɔthalɔ nɔŋw-ŋi rɔɔmi Yǝcu-ŋw kuṯṯunǝ.
27 Nǝ lɔdɔŋw lɔppa lǝthi lizi rɔɔmi ŋunduŋw; nǝ ki-lɔdɔŋw-na kila nǝ laaw naani lokwo laarɔ kwɔɔla kwaarathir nǝ lɔppɔna tok 28 Laakin nǝ Yǝcu ɔrllalɔ nɔŋwsǝccǝŋw, “Laaw lǝthi Urshaliim-ŋwɔ! Ǝṯir-nyii aarathi mac, aarathir kǝniny rogɽo raalɔ nǝ nyɔɔrɔ nyaalɔ tok. 29 Kaka ninḏi-gwɔ ŋwaamin ethiila mindaŋ a lizi aarɔŋw, ‘Athrɔ aatha kwɔsaathɔ-gwɔ laaw bakhatha kila liti lǝthi nyɔɔrɔ mac, liti lilŋiṯṯi nyɔɔrɔ mac, wala ethisi iiɽi’. 30 Lɔɔmɔr lindǝr-ṯǝ kila linḏi-li lizi ethǝccǝ yaayinɔ-ŋw, ‘Iidǝthǝr-nyji-gwɔlǝ’ nǝ ǝrǝccǝ ŋwundǝri-ŋw, ‘Kwuɽubǝthir-nyjǝlɔ!’ 31 Mǝ kwomne kwɔrtɔtɔŋw kwigiina ṯiga-ṯiga ǝrnini ŋiɽaŋal tǝ ŋaami naanɔŋw rac, e-ta ŋinḏi ethi rotto tha mǝr ǝrnini ŋigii?”
32 Nǝ lɔr naani ndǝn ligii limɔlthursi ethisi ɽeenye Yǝcu-ŋǝli. 33 Mǝr ɔppatha kǝzir wǝni, “Kɔrkɔny,” nǝr ṯigrǝthǝ Yǝcu-ŋwɔ ki-ŋwuuɽi-lǝ kinanaŋw, nǝ ndǝn ligii tok, kwette ki-thii tǝthi mɔni, nǝ kwɔthaathɔ ki-thii ṯǝthi ŋǝgwur. 34 Nǝ Yǝcu aarɔŋw, “Papa, fivricǝsi; kaka niti nilŋithirsi-gwɔ mac ŋa ŋǝrrǝrsi.” 35 Nǝ lizi rilli kinaŋw liccaca, rɔ-asa-ri rǝthi Yahuuḏ, nǝr ǝrrǝlɔŋw kathri, nǝraaroŋw, “Lǝṯi-ŋwsi-pǝ kilǝthi lithaathɔ; ethiŋw-mbǝ kilǝthi rogɽo ruuŋwun mɔŋworo Kwɔrɔstɔ kwǝthi Allah ŋgwa kwicca-ŋwna!”
36 Naaɽi nǝ jesh ǝrrǝlɔŋw tok kathri; nǝr dɔŋgwatha naanɔ-ŋgwɔ keṯṯok nǝr inḏǝthǝ khalla, 37 e-ta nǝrǝccǝŋw, “Moro Mǝlik kwǝthi Yahuuḏ, kilǝthǝ-ti rogɽo rɔɔŋwa!”
38 Nǝ ŋiɽaŋal lothone kindala luuŋwun ŋǝniŋw, “Mǝlik kwǝthi Yahuuḏ kwir-ŋgwɔ.”
39 Nǝ kwette kwǝthi kila ligii kwallisar-sili kinaŋw, ollo ŋunduŋw nɔŋwɔccǝŋw, “A kwiti kwɔrɔ Kwɔrɔstɔ mac-a? Nǝ kilǝthǝ-mbǝ rogɽo rɔɔŋwa, nǝ nyuŋwsi tok!”
40 Nǝ ŋgwa kwɔthaathɔ ǝrmici ŋunduŋw nɔŋwɔccǝŋw, “A kwiti kwithiinya Allah mac-a? A kwaava-pa hɔkwɔma wir kaka waavaŋw. 41 Nǝ wǝri nɔŋwaami eleŋw ŋiɽaŋal-ŋi ŋɔ ŋǝrricǝr-nyji, nǝreele dap-dap kwomne-gi kwǝrrǝndi; laakin ŋundu-tǝ, ŋende ŋeere ŋǝrrǝ-ŋwsi ŋigii.” 42 E-ta nɔŋwɔccǝ Yǝcu-ŋwɔ, “Yǝcu ṯiŋaayinany mǝ aaɽa kwɔmǝ rɔɔtha Mǝlik.”
43 Nǝ Yǝcu ǝccǝŋw, “Nyii kwɔŋa ǝccǝ wa@ḏa rerrem, aŋwɔnɔ-ṯǝ a-naani nyii-gi ki Fǝrḏɔɔs-na.”
Ŋiɽany ŋǝthi Yǝcu.
(Maṯṯa 27:45-56Mɔrgus 15:33-41Yuhanna 19:28-30)44 Mǝ saa@ oro wrii-kwuɽǝn kwǝthi kaaŋwɔn-naŋw, nǝ aaŋwɔn ere ṯiŋatha fɔɔrilɔ mac, nǝ kirim karbatha bǝlǝḏǝ naana tatap mindaŋ nǝ saa@ oro ṯɔɽɔl kwǝthi kirakalɔ-ŋw; 45 e-ta nǝ siṯaar kwɔnaanɔ ki Heikal-na uɽǝnninǝ kwuɽǝn. 46 Nǝ Yǝcu ɔvɔna ŋɔmmaŋi nɔŋwaarɔŋw, “Papa! nyii kwɔŋǝ kettice ṯigɽimǝ ṯiinyi ki-rii-na rɔɔŋwa!” Mɔŋwsi andasi ŋɔ tǝ, nɔŋw fuuri ṯigɽimǝ.
47 Mǝ gaa-iḏ ese ŋiɽaŋali ŋa ŋǝrrinǝ, nɔŋw ɔrtatha Allah nɔŋwaarɔŋw, “Kwɔr-ŋgwɔ kwɔsɔɔɽɔ-mi rerrem kwiti kwǝthi lɔɔma-na leere ḏuṯ!” 48 Nǝ lɔdɔŋw tatap liraayithɔ kinaŋw ethi iccaci, mǝrseese ŋǝrrinǝ, nǝr aaɽitha dɔɔnɔ-na lippithi lɔrdɔm leeŋen ŋarriny. 49 Kila tatap lilŋithi Yǝcu-ŋw wɔɽe-wɔɽeny, nǝ laaw tok kila lirɔɔmɔ ŋunduŋw Jǝliil tuk, nǝr rilli kinǝŋgwu tuk licca kwomne ŋgwɔ.
Yǝcu mǝr-gwɔ aanitha.
(Maṯṯa 27:57-61Mɔrgus 15:42-47Yuhanna 19:38-42)50 Nǝ kwɔr naani kwette kwǝni Yuusuf kwǝthi mǝḏiinǝ kwǝni Raama kwǝthi Yahuuḏiiyyǝ-ŋw; nɔŋworo kwujǝwuṯ kwǝthi mǝjlǝs, kwisaaw nǝ kwirllalɔ tok, 51 ǝṯɔŋweere ǝmmini ŋiɽaŋali nǝ ŋothɽor ŋeeŋen mac, nɔŋwɔni kwǝkkicǝ Ŋeelenyi kizǝn ŋǝthi Allah. 52 Nɔŋweele naanɔ-gwɔ Biilaaṯɔs nɔŋw uṯicǝlɔ aŋna-yi wǝthi Yǝcu. 53 Mindaŋ nɔŋw dappisa aŋnalɔ, e-ta nɔŋw ippǝsi kǝfǝnǝ naana, mindaŋ nɔŋw ǝnyji ki-thimaamɔ-na ṯukwurṯur ki-liiɽi-na lɔnḏɔ, ṯiti ṯimǝr-gwɔ aanitha kinnǝ kwizi kweere mac. 54 Nǝ laamin kila tǝ nɔŋworo lǝthi ogwom-lɔ limǝ-li Sǝbiṯ aadithi ethi aari ibṯǝḏi.
55 Nǝ laaw kila lirɔɔmɔ Yǝcu-ŋwlɔ Jǝliil tuk, ele Yuusuf-ŋǝli, mindaŋ nǝreese ṯimaamɔwa nǝ aŋna tok wɔgitittar aŋgwɔrɔ. 56 E-ta nǝr aaɽitha dɔɔnɔ nǝr lagiza kwɔthɽɔla-na, nǝ fithni tok kwaami wǝŋ kwǝthi aŋna wuuŋwun, mindaŋ mǝ Sǝbiṯ oro tǝ, nǝr kaṯṯɔ wǝŋ ŋiɽaŋal-ŋi ŋǝthi waamir.
aza 23
Yecu muŋw nani ki yey-na yeḏi bilaaṯuz, kwir muḏiir kwuruḏi ruumiya
1 ṯaŋwu, ner diɽela tatap duŋw ner muloce bilaaṯuzŋw. 2 ner naŋni eḏi rarmaḏa, ner eca ŋwu: nyiŋa liminḏa kworu ŋgwu kworlice lizi leri rugwori, kweṯinyji ṯinyini eḏinḏeḏa kwelenyi kweni gezar ṯulba, kwaruŋw, nyi kwiri kweni Kwruztu, kwir Kweleny. 3 na bilaaṯuz uṯizelu nuŋw eca ŋwu: a kwiri manja Kweleny kweḏi yahuuḏ a? nuŋw eŋnici nuŋw eca ŋwu: a kwami andazuŋw. 4 na bilaaṯuz andaci lelenyi leḏi yiziiz, ŋwuduŋw ŋi, nuŋw zi eca ŋwu: nyi kwende kwinḏaca kworu ŋgwu kaṯiya kere. 5 ner ermiḏeḏa-na ner eca ŋwu: ṯilŋiiḏina ṯuŋwun ṯeṯ ugwumini lizi leḏi yahuḏiiyaŋw tatap; kerreny nuŋw zi andaci leḏi jaliilŋw, na kirem keni, kezir wu tɔk.
Yecu muŋw nani ki yey-na yeḏi hiruuḏuz
6 na bilaaṯuz neŋne mer eca, jaliil, ta, nuŋw zi uṯizelu nuŋw zi eca ŋwu: kwor ŋgwu kwiri kwete kweḏi jaliilŋw a? 7 mer andaci mer eca ŋwu: kwiri kweḏi ŋeleny ŋeḏi hiruuḏuz-ŋa, nuŋw ṯiŋa nani gwu hiruuḏuz, kaka nanuŋw gwu urzaliim ki lomur ta kla. 8 ma hiruuḏuz eze Yecuŋw ta, nuŋw amina beṯen, kaka eṯuŋw gwu naŋnini eḏinḏa, niŋnaŋw gwu ŋiɽaŋali ŋitezir ŋeṯir zi andaci ŋeni ŋundu, akuŋw gwu kizen tɔk eḏ izaci yilima yere yeṯuŋw zi erri. 9 ŋwu ṯa, nuŋw utizi ŋiɽaŋal ŋi lu ŋitezir. na Yecu nani ṯirṯir. 10 na leleny leḏi yiziiz rilli keṯɔk, na lor leṯizilŋiiḏini kuruu-na, ner rarmaḏa tuctuc. 11 na hiruuḏuz-ŋa ruze luŋw orṯa yi wuŋwun; ner erri ŋidiny ner oɽaci yireṯi yizaw beten, nuŋw eɽizi bilaaṯuzŋw. 12 kerreny ta, na bilaaṯuz-ŋa luweḏizana hiruuḏuz gi, ta ner ta amiḏi ki lomur la ṯa kla.
bilaaṯuz-ŋa Yecu gi na barabbaaz tɔk
13 na bilaaṯuz raza lelenyi ledi yiziiz duŋw lijowiṯ li, lizi li rac. 14 nuŋw zi eca ŋwu: a limulocanyi kworu ŋgwu, kweti gi aru ŋwu, kweṯorlilici lizi rugwori; menyi dedricelu ki yey-na yalu ta, na kwende kwumer inḏaci ŋiɽaŋali ŋere ŋiki ŋari ŋa ŋi, kweṯerri ŋwu ŋwu. 15 nezi hiruuḏuz ere inḏa tɔk mac, kaka eɽicaŋw gwu nyuŋwuzi. nuŋw ere erri ŋiɽaŋali ŋere mac eḏi ŋi iɽinyaḏa. 16 ŋwu ṯa ŋwu, kwenyipii zɔṯ gi ta, nyi ṯa efrici. 17 kaka ki iid-na, eṯir əkizi muḏiira kizen eḏi zi ruca mabuuza kwete, kweṯirnaŋni.
18 lakin ner miḏiḏi kwola tuc, ner eca ŋwu: mulḏi kworu ŋgwu kiṯay, enyji kedica barabbaazŋw. 19 kwunderṯa kwukitar ki zijin-na, kaka kitaŋw gwu ḏimya biḏin gi, ki meḏiina-na. 20 nezi bilaaṯuz andaci kwokwony, naŋnaŋw gwu eḏefrici Yecuŋw. 21 ner miḏiḏi kwola, ner eca ŋwu: ṯigreḏi ŋwuɽi la ŋwuɽmɔḏalu a gwu eɽenye. 22 nuŋw zi uṯizelu kwokwony, na nyamin orɔ-na ṯɔɽɔl, nuŋw zi nyi eca ŋwu: aḏa kwerruŋw kwiki? nyi kwende kwinḏa kwɔmne kwere kwiki kweḏi gi iɽinyaḏa. kwenyipii ta, nyi ṯa efrici. 23 lakin ner upina ŋumma ŋi ŋumma ŋi, naŋnar gwu ŋunduŋwu eḏay ki ŋwuɽi la ŋwuɽmḏalu. ner ofiḏaḏa kwurna gi. 24 nezi bilaaṯuz ellici amra eḏi zi erri kaka ŋinaŋnarzi. 25 nuŋw kedi kworu kwukitar ki zijin kaka kitaŋw gwu ḏimya biḏin gi, kwuṯizergelu. lakin nuŋw zi emnizi eḏizerrizi Yecuŋw ŋir kaka ŋinaŋnar zi.
Yecu ki ṯay ṯinḏi kezir weni kurkony ya kalfari
26 limulḏu ŋwi ki ṯay la, ner miḏa kworu kwete kweni zimaan, kweḏi ezir weni geyrawaan kwuṯaŋa wuḏeri, ner allaci ŋunduŋwu ŋwuɽi ŋwumalliḏina eḏizapi, nuŋw ŋi kwaḏiḏa Yecuŋw. 27 na lizi luru kwakiḏalu ŋwuduŋw, law li-na, lari kwola ŋwunda ŋwunda. 28 lakin nezi Yecu orlaḏa nana, nuŋw zi eca ŋwu: nyira nyeḏi urzaliimŋw, eṯir nyi ariḏi mac; ariḏir rɔgwɽɔ ralu, ariḏir nyoru nyalu keni. 29 izarṯi, ŋwamin ŋwa ŋwinḏi ŋwer ŋi eca lorumi ŋwu: a leni lamina, yari yi tɔk yiti yilŋiidi mac, na yədu yiti yiɽe tɔk mac. 30 er naŋni eḏeca yayinu ŋwu: acizarnyjelu; eḏeca ŋwunderi ŋwu: kwuɽbeḏrinyjelu. 31 kaka mer zi errici kwaɽi kwigla ŋwu, er ma errici kwaɽi kwunḏu aḏa?
Yecu ki ŋwuɽi la ŋwuɽmɔḏalu
32 ner mulɔ lizi nden tɔk liki rugwori Yecu ŋali, eḏi li ele eḏi zi eɽenye. 33 mindaŋ mer miḏaḏi kezir weni kurkony, ner zi gwu ṯigreḏa ki ŋwuɽi la ŋwuɽmɔḏalu; kla liki ner zi kəmi ki yəni, kwete ki ṯii ṯeḏi mini, na kwete ki ṯii ṯeḏi ŋogwur. 34 na Yecu eca ṯernyin ŋwu: Papa, iɽnyacazelu, kaka ṯimḏir gwu ŋiɽaŋali ŋerrer zi. ner kanni yireṯi yuŋwun, ner yi ṯuɽi. 35 na lizi rilli eḏ icaci; lakin na lijowiṯ erre luŋw, laruŋw: eṯi zi kwizimini ŋgwu kileḏi lir ter; eḏuŋw emba kileḏini, muŋw orɔ Kwruztu kweḏi Allah, kwicaŋw-na. 36 na orṯa erre luŋw tɔk, ner ila nanuŋw gwu eḏi ṯiŋaci ŋaw ŋola. 37 ner eca ŋwu: ma orɔ Kweleny kweḏi yahuuḏ, kileḏi ṯi rɔgwɽɔ rɔŋwa. 38 na ŋiɽaŋal lɔḏine kindala ŋeni ŋwu: kwunderṯa ŋgwu kwir Kweleny kweḏi yahuuḏ.
39 na kwete kwiki ṯugwori, kwallinarli ŋwuɽi la, ermici Yecuŋw, nuŋw eca ŋwu: a ti kwiru Kwruztu manya? kileḏe rɔgwɽɔ rɔŋwa na nyuŋwuzi tɔk. 40 na kwuḏaḏu kirnyaḏa, nuŋw eca ŋwu: a kwiti kwuṯinya Allah manya? a kwiri pa ŋgwu kwunanir ki hukm-na wutuput. 41 a kwamindi emba nani nyiŋa ki hukm-na, kaka afindi gwu ujra wir kaka weŋgindafi, ŋiɽaŋal ŋi ŋimindi zi erri. na kwor ŋgwu, nuŋw ere erri kwɔmne kwere kwiki mac. 42 nuŋw eca ŋwu: Yecu, kiḏayinanyi ma ila ŋuma ŋi ŋeḏi ŋeleny ŋɔŋa. 43 nuŋw eca ŋwu: nyi kwecaŋa ma ŋwa rerem, a kwindi nani aŋwunu kezir-na wizaw nden tɔk.
ŋiɽany ŋeḏi Yecu
44 na zaa orɔ kaka wri-kwuɽen kaŋwuna, na kirim aɽaḏi kezir tatap ndɔm ndɔm mindaŋ ma zaa orɔ ṯɔɽɔl kirakalu, 45 na fori kweḏi aŋwun ay; na kireṯ keḏi heykal diɽaŋinina. 46 na Yecu ofna ŋuma ŋi, nuŋw aru ŋwu: Papa, nyi kwɔŋa ketice ṯigɽima ṯinyi ki rii-na rɔŋwa. muŋw zi andazi ṯa ŋu, muŋw alani wəŋ. 47 ma rayiiz weḏi orṯa ruɽi-ṯuḏni inḏa ŋiɽaŋali ŋimɔ rɔtɔ ŋwu, nuŋw ortaḏa Allah nuŋw aru ŋwu: kwor ŋgwu kwende kweḏi ŋarḏa ŋere. 48 na ŋwuduŋw tatap, ŋwumɔ rayḏiza eḏ izaci, eze ŋiɽaŋali ŋimɔ rɔtɔ ŋwu, ner pini lurdum ner aɽa duənu. 49 na kla lirir li ŋumaḏi, law li likwaḏiḏi jaliil, lirli tuk eḏ izaci.
ṯaniḏa ṯeḏi Yecu
50 nuŋw nani kwor kwete kweni kwizaw, kwofḏana tɔk, kwir kwijowiṯ kweḏi majliz, kweni yuzif, 51 kweḏi ayin weḏi yahuuḏ weni ar raama; kwunde kwir kwudirna ŋiɽaŋali ŋeŋen ki zeyria-na, naŋnar zi eḏi zi erri, nuŋw eni kwetəkizi ŋelenyi ŋeḏi Allah kizen tɔk. 52 nuŋw ele nani gwu bilaaṯuz, nuŋw utizi aŋna yi lu weḏi Yecu. 53 nuŋw dapizalu, nuŋw pezi kireṯi nana kimri-na, nuŋw aniḏa ki ṯimamu-na, tipiiḏir ki liiɽi-na ṯiti ṯaniḏir gwu kwere kinna mac. 54 na lamin orɔ kla leḏi ogwumlu, na zabiṯ adiḏi. 55 na law kwaḏiḏa, linḏir li jaliil, ner eze ṯimamu, na aŋna wuŋwun wunani ḏa ḏa. 56 ner aɽi ner lagiza kwuḏɽula, ner daɽmaḏa ŋila tɔk.
ki lamin leḏi zabiṯ, ner ere ogwumlu mac, kaka eṯir gwu miḏa kuruu.