Yǝcu mǝr-gwɔ mithǝ.
(Maṯṯa 26:47-56Mɔrgus 14:43-50Luuga 22:47-53)1 Mǝ Yǝcu ṯimmǝsi ŋiɽaŋali ŋɔ ŋandisa-ŋwsi tǝ, nǝr ele ṯalaamiiz-thi ṯuuŋwun nǝr dappi kǝthi Gaḏrɔɔn-ŋwɔ kǝzir wǝthi jineeneya nǝr-gwɔ ǝnḏinǝ ṯalaamiiz-thi ṯuuŋwun. 2 Nǝ yahuuthǝ, ŋgwa kwɔmǝ bɔɔŋwɔthi ŋunduŋw, elŋe ǝzir wa; kaka nǝṯi-gwɔ Yǝcu-ŋǝ ṯalaamiiz-thi ṯuuŋwun aaɽathi dɔŋw dɔṯɔ-dɔṯṯɔk kinaŋw.
3 Nǝ Yahuuthǝ ele kinanaŋw kwumɔlthɔ dɔŋw lǝthi @asaakir wir Rɔɔmaani, nǝ hɔrraas wǝthi Heikal tok, wɔɔsa rɔ-asa rǝthi kahana-ŋǝ Lifirriisiiyyiin-li, nǝr appa ŋwombo-ŋwɔsi iigǝ-yi wir rooɽo nǝ kwomne kwǝthi ŋǝriyǝ tok. 4 Nǝ Yǝcu elŋe kwomne tatap kwinḏi ethi ǝrrinici ŋunduŋw, mɔŋw dɔŋgwatha-lɔ tǝ nɔŋwsi uṯicǝlɔ nɔŋwsǝccǝŋw, “Ŋaaŋa linaŋna ǝyǝ-ŋwɔ?” 5 Nǝr ǝŋnici nǝrǝccǝŋw, “Yǝcu kwɔrɔ kwǝthi Naasira-ŋw.” Nǝsi Yǝcu ǝccǝŋw, “Nyii kwirṯa-pa-ŋgwɔ.” Nǝ Yahuuthǝ ŋgwa kwɔbɔɔŋwɔthɔ ŋunduŋw rilli ŋunduŋǝ-li kinaŋw.
6 Mǝsi Yǝcu ǝccǝŋw, “Nyii kwirṯa-pa-ŋgwɔ.” Nǝraaɽi tɔc ŋɔɔɽɔ-ri nǝr irdi kwurǝyu-lu. 7 Nɔŋwsi uṯicǝlɔ kwokwony nɔŋwsǝccǝŋw, “Ŋaaŋa linaŋna ǝyǝ-ŋwɔ?” Nǝrǝccǝŋw, “Yǝcu kwɔrɔ kwǝthi Naasira-ŋw.” 8 Nǝsi Yǝcu ǝŋnici nɔŋwsǝccǝŋw, “Nyii kwɔmǝ-ŋǝsi andaci rac nǝŋǝsi ǝccǝŋw, nyii kwirṯa-pa-ŋgwɔ; nǝ minyoro kwɔnaŋna-ŋa tǝ, ǝsi dɔŋgwǝci kɔlɔ ǝreele ŋunduŋǝ.” 9 Ŋandisa-ŋwsi ŋɔ mindaŋ ethi raṯṯathi ŋanḏisasi Kwiɽii ŋǝniŋw, “Kwiti kwɔmǝ-nyii ṯuusi kweere mac, lǝthi kila linḏǝthǝ-nyji.” 10 Nǝ Sim@aan Bɔṯrɔs kaka nǝthi-ŋgwɔ kaalala, nɔŋw alla mindaŋ nɔŋw-ŋgi ippi kwɔwaaya kwǝthi Rǝ-iis Rɔppa rǝthi kahana, ŋɔŋw uɽuthǝci kǝnilɔ kǝthi mɔni. Nǝ yiriny yǝthi kwɔwaay-ŋgwa ta nǝrǝni Malkhus. 11 Nǝ Yǝcu ǝccǝ Bɔṯrɔs-ŋwɔ, “Aaɽisa kaalala kǝll-nǝ kuuŋun. Nyiiti kwinḏi ethii tiṯiraŋi tǝthi ṯurvǝ ṯinḏǝthi-nyii Papa mac-a?”
Yǝcu mɔŋgwɔ rilli kiyǝnǝ yǝthi Hannaan.
12 E-ta nǝ jesh kwɔr Rɔɔmaani ŋundu-ŋǝ gaa-iḏ-ŋǝli keeŋen nǝ hɔrraas wǝthi Yahuuḏ tok, mithǝ Yǝcu-ŋw mindaŋ nǝŋ kǝkki. 13 Nǝr mɔlo ker-kerreny ŋǝrgeele naanɔ-gwɔ Hannaan; kaka nɔrɔ-ŋgwɔ kwunǝyin kwǝthi Gayaafa-ŋǝ kwir Rǝ-iis Rɔppa rǝthi kahana kithlǝyu ŋga. 14 Nǝ Gayaafa oro kwette kwiccǝ Yahuuḏǝ ŋejmethi ŋǝccǝŋwsi-ŋiŋw, ŋɔvthanna ethi kwɔr kwette ai ki-lɔɔbi lǝthi lizi tatap.
Bɔṯrɔs mɔŋgwɔ ǝvrinni Yǝcu-ŋw.
(Maṯṯa 26:69-70Mɔrgus 14:66-68Luuga 22:55-57)15 Nǝ Sim@aan Bɔṯrɔs-ŋǝ ṯilmiiz-thi ṯithaathɔ kwaathitha Yǝcu-ŋw. Nǝ ṯilmiiz ṯithaathɔ kaka nilŋithi-gwɔ Rǝ-iis Rɔppa rǝthi kahana, nɔŋw ǝnḏi Yǝcu-gi ki-lɔz-na lǝthi mahkama, 16 Bɔṯrɔs-tǝ nɔŋw-tǝ rilli kinnǝni par kilibaab. E-ta nǝ ṯilmiiz kitha ṯilŋithi Rǝ-iis Rɔppa rǝthi kahana ruu par nɔŋw andaci khaḏaama kir tiira kǝṯi rilli kilibaab mindaŋ nɔŋw mɔlo Bɔṯrɔs-ŋwɔ nɔŋw ǝnyji kiininy. 17 Nǝ tiira tǝṯi rilli ki-libaab ǝccǝ Bɔṯrɔs-ŋwɔ, “A kwiti kwir kwette kwǝthi ṯalaamiiz ṯǝthi kwɔr-ŋgwa mac-a?” Nɔŋwɔccǝŋw, “Nyii kwiti kwɔrɔ mac.” 18 Nǝ yaḏaama-ŋǝ hɔrraas-yi uṯǝthǝ iigǝŋi ŋwɔrɔ-ŋi kaka nithii-gwɔ kɔrɔn, nǝr rilli kinaŋw laanica iigǝŋi. E-ta nǝ Bɔṯrɔs naani kinaŋw ŋundu-ŋǝli kwirlɔ kwaanica iigǝŋi tok.
Rǝ-iis Rɔppa rǝthi kahana mɔŋgwɔ uṯici Yǝcu-ŋw-lɔ.
(Maṯṯa 26:59-66Mɔrgus 14:55-64Luuga 22:66-71)19 Nǝ Rǝ-iis Rɔppa rǝthi kahana uṯici Yǝcu-ŋw-lɔ ŋiɽaŋal-ŋi ŋǝthi ṯalaamiiz ṯuuŋwun nǝ ṯa@liim ṯuuŋwun tok. 20 Nǝ Yǝcu ǝŋnici nɔŋwɔccǝŋw, “Nyii kwǝṯi andaci ṯurmunǝ-lɔ por-por; ǝṯi-nyii aari @allima dok-dok ki-limajma@-na nǝ ki Heikal-na tok, kǝzir wǝṯi-gwɔ Yahuuḏ aaɽathi dɔŋw; nǝnyjeere andasilɔ ŋeere ŋejmethi ḏuṯ 21 A kwotho kwuṯucǝ-nyii-lɔ nyuŋwɔ? Uṯicǝsilɔ kila lǝṯi-nyii niŋnaci ŋiɽaŋali ŋǝṯi-nyji andasi, nǝ ŋilŋithirsi ŋǝṯi-nyji andasi.”
22 Mɔŋw andasi ŋiɽaŋali ŋɔ tǝ, nǝ haras wette wirlɔ kinaŋw ippi Yǝcu-ŋw kerge-gi, nɔŋwɔccǝŋw, “Ŋindǝr-ṯǝ ŋɔ ŋǝthi-ŋi ǝŋnici Rǝ-iisa Rɔppa rǝthi kahana?” 23 Nǝ Yǝcu ǝŋnici nɔŋwɔccǝŋw, “Mǝnyji andasi ŋeere ŋigii tǝ, ǝsi andasi ŋindǝr ŋǝndu. Laakin mǝnyji andasi ŋirllalɔ tǝ, nǝ ŋǝni ǝyǝ ŋippǝthi-nyii-gwɔ?” 24 E-ta nǝ Hannaan ɔɔsi ŋunduŋw kwukǝkkinnǝ naanɔ-gwɔ Gayaafa kwir Rǝ-iis Rɔppa rǝthi kahana.
Bɔṯrɔs mɔŋgwɔ ǝvirinni Yǝcu-ŋw kwokwony.
(Maṯṯa 26:71-75Mɔrgus 14:69-72Luuga 22:58-62)25 Nǝ Sim@aan Bɔṯrɔs rilli kinaŋw kwaanica iigǝŋi. Nǝrǝccǝŋw, “A kwiti kwɔrɔ kwette kwǝthi ṯalaamiiz ṯuuŋwun tok mac-a?” Nɔŋw ǝvirinni nɔŋw aarɔŋw, “Nyii kwiti kwɔrɔ mac.” 26 Nǝ kwette kwǝthi lɔwaay lǝthi Rǝ-iis Rɔppa rǝthi kahana, kwǝthi kwɔr-ŋa ŋgwa kwuɽuthǝthi Bɔṯrɔs kǝni uṯicǝlɔ nɔŋwɔccǝŋw, “Naa nyii kwiisa-ŋa ki-jineene-na ŋundu-gi-a?” 27 Nǝ Bɔṯrɔs ǝvirinni kwokwony, ŋwɔṯaŋw nǝ kɔthɔgɽi ɔrranni tɔc.
Yǝcu mɔggwɔ rilli kiyǝnǝ yǝthi Biilaaṯɔs.
(Maṯṯa 27:1-2, Maṯṯa 11-14Mɔrgus 15:1-5Luuga 23:1-5)28 E-ta nǝr iili Yǝcu-ŋw min ki-dɔɔnɔ kwǝthi Gayaafa nǝr-geele ki-siraaya-la kwǝthi haakim ŋɔrpana tuttuk. Nǝreere ǝnḏi ŋundu-ŋǝ rogɽo-ri reeŋen mac ki-siraaya-la, mindaŋ etheere ruuŋwunni mac, mindaŋ ethǝthi ŋɔma ethi yee ethneya wǝthi Fis-ha. 29 Ŋwɔṯaŋw nǝsi Biilaaṯɔs ruwǝthǝ naana par nɔŋwsǝccǝŋw, “Shǝkiyǝ kwǝthaatha kwɔrɔ kwallisa-ŋa kwɔɔrɔ-ŋgwɔ naana?” 30 Nǝr ǝŋnici nǝrǝccǝŋw, “Ǝŋgi kwɔr-ŋgwɔ ere ǝrri kwomne kwigii mac ǝŋgi-nyii ere mɔlca ŋaaŋwɔ mac.” 31 Nǝsi Biilaaṯɔs ǝccǝŋw, “Mɔlthur ŋaaŋa rogɽo-ri raalɔ ele ǝccǝ haakima wɔɽeny Sherii@a-gi kwaalɔ.” Nǝ Yahuuḏ ǝccǝŋw, “Ŋende ŋir gaanuuni dǝŋgǝri ethi ǝccǝ kweere haakima ŋiɽany-ŋi.” 32 Ŋǝrrinǝ ŋɔ mindaŋ mǝrǝthi yǝnǝ ŋa ŋandisasi Yǝcu ŋǝthi ŋiɽany ŋuuŋun ŋinḏi ethi rotto ṯatha. 33 Nǝ Biilaaṯɔs aaɽitha ki-siraaya-la kwokwony, mindaŋ mɔŋw ɔrnɔṯi Yǝcu-ŋw nɔŋwɔccǝŋw, “A kwɔrɔ mǝlik kwǝthi Yahuuḏǝ?”
34 Nǝ Yǝcu ǝŋnici nɔŋwɔccǝŋw, “Ŋurwǝŋǝsi ŋɔ kirogɽo-na rɔɔŋwa-i alla lithaathɔ lir landica-ŋǝsi?”
35 Nǝ Biilaaṯɔs ǝŋnici nɔŋwɔccǝŋw, “Nyii kwɔrɔ Yahuuḏǝ? Lizi lɔɔŋwa nǝ rɔ-asa rǝthi kahana tok, lindǝr-pǝ laava-ŋa naaniny-gwɔ. Aatha kwǝrrǝ-ŋǝ?” 36 Nǝ Yǝcu ǝŋnici nɔŋwɔccǝŋw, “Ŋeeleny ŋiinyi ŋiti ŋir ŋǝthi ṯurmun kɔthɔ mac, ǝŋgi ŋeeleny ŋiinyi oro ŋǝthi ṯurmun kɔthɔ ǝŋgi yaḏaam yiinyi ṯɔgthi mindaŋ ǝŋgi-nyii Yahuuḏ ere mithǝ mac. Laakin Ŋeeleny ŋiinyi ŋiti ŋir ŋǝthi ṯurmun mac.” 37 Nǝ Biilaaṯɔs uṯicǝlɔ, “E-ta noro mǝlik-pǝ?” Nǝ Yǝcu ǝŋnici nɔŋwɔccǝŋw, “A kwɔrɔ kwaarɔŋw ŋa kwir mǝlik. Nyii kwilŋinna nǝnyiila ki-ṯurmun-nǝ karath-gi kɔtɔpɔt, ethi-ŋi ɔnḏi kiyǝnǝ ŋir rerrem. Ŋgwa kwir kwǝthi rerrem-ŋa, ǝṯɔŋw niŋnacci nyuŋwɔ.” 38 Nǝ Biilaaṯɔs ǝccǝŋw, “Aatha kwɔrɔ kwǝni rerrem?”
Yǝcu mǝr-gwɔ ǝccǝ haakima ŋiɽany-ŋi.
(Maṯṯa 27:15-31Mɔrgus 15:6-20Luuga 23:13-25)Mǝ Biilaaṯɔs timmasi ŋiɽaŋali ŋɔ, nɔŋw ruu par kwokwony naanɔ-gwɔ Yahuuḏ nɔŋwsǝccǝŋw, “Kwende kwɔmǝ-nyii inḏaca kaṯṯiya keere. 39 Laakin ŋaaŋa lǝthi ǝthiyǝ wette ethi kǝdicǝ ŋaaŋwɔsi musjuunǝ kwette ki Fis-ha-na. Nyii kwɔŋǝsi kǝdicǝ Mǝlik-gǝ kwǝthi Yahuuḏǝ?” 40 Nǝr mithithi kwɔɔla kwokwony nǝraarɔŋw, “Kwɔr kwiti kwɔrɔ ŋgwa mac, laakin Baaraabaas kwɔrɔ.” Baaraabaas-tǝ, nɔŋworo kwɔɔɽam.
aza 18
Yecu mer gwu miḏa
1 ma Yecu andazi ŋiɽaŋali ŋu ta, ner ru limeḏgen li, ner ṯamḏu kufurṯa gi la keni kiḏruun. na gwu jineyna nani, ner gwu enḏi limeḏgen li. 2 na ŋgwa kwubɔŋwḏi, kweni yahuuza, elŋece ezir rac, kaka eti gwu Yecu-ŋa kindimiḏi limeḏgen li kinaŋw. 3 na yahuuza mulḏa ŋwuduŋw ŋwir yezgar laŋɽa li, ŋwuzazi leleny leḏi yiziiz-ŋa lifarzi li. ner ila kinaŋw ŋwɔmba ŋi, igə yi wir rɔɽɔ, kwɔmne gi-na kwapar ki rii-na reŋen. 4 ilŋiicazi gwu Yecu rac tatap ŋinḏi eḏerrini nanuŋw gwu, nuŋw zi kwumaḏa-na, nuŋw zi eca ŋwu: eya kwiri kwicaŋa? 5 ner eŋnici, ner eca ŋwu: Yecu kwiri, kweḏi nazraŋw. nezi Yecu eca ŋwu: nyi kwiri ta pa ŋgwu. na yahuuza, ŋgwa kwinḏi eḏi bɔŋwḏi, rilli ŋundu ŋali tɔk. 6 muŋw zi eca ŋwu: nyi kwiri ṯa pa ŋgwu, ner aɽi roɽu ri, ner irdi kureyu lu. 7 nuŋw zi ṯa andaci kwokwony, nuŋw zi eca ŋwu: eya kwiri kwicaŋa? ner eca ŋwu: Yecu kwiri, kweḏi nazraŋw. 8 nezi Yecu eŋnici, nuŋw zi eca nyu: nyi kwumɔŋazi pa andaci, na ŋazi eca ŋwu: nyi kwiri ṯa. menyi ṯa orɔ kwicaŋa, efricerzi klu er ele kiṯay. 9 eḏi gwu ŋiɽaŋal rataḏi, ŋa ŋandizaŋwzi ŋari ŋi ŋwu: kla limenyjinḏeḏa, kwiti kwumenyi ṯuzi kwere mac. 10 na zimaan buṯruz əɽi ṯii nuŋw alla kalala kapaŋw, nuŋw gi ipii kaḏaama keḏi kweleny kweḏi yiziiz, nuŋw uɽuḏəḏa kəni keḏi mini. na yiriny yeḏi kaḏaam yeni mulkuz. 11 na Yecu eca buṯruzŋw: aɽiza kalala kɔŋa kəl-na. tiṯra kru tinḏeḏa Papa, titi tenyi ri ii manya?
12 na ṯa kla lir ezgar zawiiz ŋali, laŋɽa li leḏi yahuuḏ, miḏa Yecuŋw, ner kəki. 13 ner mulica hannaanŋw kerreny, kwir kwuneyin kweḏi gayaafa-ŋa, kwir kweleny kweḏi yiziiz kiḏleyu ŋga. 14 na gayaafa orɔ kwumɔ eca yahuuḏa ŋwu: ŋiti ŋofḏana manya eḏi kwor kwutuput eyzi lizi.
buṯruz muŋw gwu nyindini Yecuŋw
15 na zimaan-ŋa kweni buṯruz romi Yecuŋw lu, meḏgen gi kwuḏaḏu, na meḏgen ŋgwa, kwilŋiiḏi kweleny kweḏi yiziiz, enḏi ki loz-na leḏi kweleny kweḏi yiziiz. 16 buṯruz ta, nuŋw rilli ogwur kworɔ par ŋgi la. ṯaŋwu na meḏgen kwuḏaḏu, kwilŋiiḏi kweleny kweḏi yiziiz, nuŋw ru par, nuŋw andaci tira tir kwaŋɽa kweḏi ogwur, nuŋw enji butruzŋw. 17 na kwaŋɽa ŋgwu eca buṯruzŋw ŋwu: a kwiri manja kwete tɔk kweḏi limeḏgen leḏi kwor ŋgwu a? nuŋw eca ŋwu: nyiti kwiri mac. 18 na yaḏaam-ŋa laŋɽa li rilli kinaŋw, lani igəni, uteḏir gwu wir ŋwurɔ, kaka iiḏi zi gwu kurun, na buṯruz rilli ŋundu ŋali, lanu.
19 na kweleny kweḏi yiziiz utizi Yecuŋw lu ŋiɽaŋal ŋi ŋeḏi limeḏgen, na ŋetuŋw zi andaci tɔk. 20 na Yecu eŋnici, nuŋw eca ŋwu: nyi kwumandaci ṯurmuna pɔrpɔr; etinyji ilŋiiḏini ki majma-na, na ki heykal-na tɔk, kezir weri gwu yahuuḏ rayḏi tatap duŋw, nenyji ere andazi ŋere ŋejmet ŋi mac. 21 ŋɔḏɔ ŋuṯizenyi ŋi lu? uṯizezi ŋi lu kla limenyji niŋnaci ŋa ŋandicanyji. ŋilŋiiḏir zi ŋecenyji ŋi ḏa. 22 muŋw zi ta andaci ŋu, na kwete kweḏi laŋɽa, kwurillu ketok, nuŋw ipii Yecuŋw kerge gi ki yeyna, nuŋw eca ŋwu: ŋofḏana ŋu eḏi ŋi eŋnici kwelenyi kweḏi yiziiz a? 23 na Yecu eŋnici, nuŋw eca ŋwu: menyjandaci ŋiki ta, andizazi ṯi. mer eni ŋizaw ta, nenyi ma ipeḏa kaḏa? 24 na hannaan ṯiŋaḏa Yecuŋw, kwukəkina, eḏi gayaafa-ŋa, kwir kweleny kweḏi yiziiz.
25 na zimaan buṯruz rilli, kwanica igəni. ner eca ŋwu: ŋa, a kwiri kwete tɔk kweḏi limeḏgen a? nuŋw nyindini, nuŋw zi eca ŋwu: nyiti kwiri mac. 26 na kwete kwunanir li ŋaḏaama ŋeḏi kweleny kweḏi yiziiz, kwirir kwor ŋali ŋiaŋga ŋgwa kwumɔ buṯruz uɽuḏəḏa kəni, eca ŋwu: nyi kwiti kwizaŋa ki jineyna-na ŋundu ŋali manya? 27 na buṯruz nyindini kwokwony, na kuḏugwɽi orrani tuc.
Yecu muŋw gwu nani ki yey-na yeḏi bilaaṯuz kwir muḏiir kweḏi ruumiyaŋw
28 ner mulḏa Yecuŋw nani gwu gayaafa eḏi gi ele muḏiriya. na ezir yi wiri. na yahuuḏ ere enḏi muḏiriya ŋunduŋa mac, eḏere ruŋi mac, mindaŋ er ami ye eḏneyaŋw weḏi kuruu keni ṯiṯamḏa ŋiɽany. 29 ṯaŋwu nezi bilaaṯuz ruweḏa nana par lu, nuŋw zi eca ŋwu: zekiya kweḏi aḏa kwiri, kwumulicaŋa kwor ŋgwu? 30 ner eŋnici, ner eca ŋwu: eŋgi kwizimini ŋgwu ere orɔ kwiki mac, eŋgir ŋa ere mulḏaḏa nana tɔk mac. 31 nezi bilaaṯuz eca ŋwu: mulḏir ŋaŋa, a ketize zeyria kuruu gi kalu. na yahuuḏ eŋnici, ner eca ŋwu: nyiŋa lende leḏi ŋuma eḏeca kwere hakwuma ŋiɽany ŋi. 32 na ŋiɽaŋal ŋandizazi Yecu, ner gwu ta rataḏi dap, ŋari ŋi ŋwu, ŋeḏi ŋiɽany ŋɔrɔtɔ ḏa ŋinḏuŋw ŋi eḏay.
33 na bilaaṯuz aɽiḏa kiininy muḏiriya nuŋw ornuti Yecuŋw, nuŋw eca ŋwu: a kwiri Melik kweḏi yahuuḏ a? 34 na Yecu eca ŋwu: ŋandizazi ŋu ŋeḏi rɔgwɽɔ rɔŋwa e, ya ŋeḏi lir ter ŋandicar ŋazi ŋeni nyi? 35 na bilaaṯuz eŋnici, nuŋw eca ŋwu: nyi kwiri yahuuḏi a? lizi lɔŋwa liri, leleny li leḏi yiziiz, limɔŋa mulḏaḏa nyuŋwu nana. aḏa kwerri ŋa? 36 na Yecu eŋnici, nuŋw eca ŋwu: ŋeleny ŋinyi ŋiti ŋiri ŋeḏi ṯurmun kḏu mac. eŋgi ŋeleny ŋinyi orɔ ŋeḏi ṯurmun kḏu, eŋgi nyi gwu lizi linyi tugwuḏaḏi la, eŋgi nyi yahuuḏ ere uzi rii nana mac. na zulṯa kweḏi ŋeleny ŋinyi kweḏi kunuŋw kwiti kwiri mac. 37 na bilaaṯuz eca ŋwu: a kwiri fa ta melik, a? na Yecu eŋnici nuŋw eca ŋwu: a kwumami andazuŋw ŋeni melik. ŋinderṯa ŋu ŋilŋaḏir nyi gwu, inḏinyi gwu ki ṯurmun-na tɔk, eḏi zi ŋi unḏizi ki ŋeni ŋirlalu. lere nyiḏak liti limɔniŋneḏa yəni mac eḏi zi ṯinyini ŋirlalu, leṯi nyi niŋnaci ṯɔgwɽɔ. 38 na bilaaṯuz eca ŋwu: na aḏa kwiri kweni ŋirlalu?
muŋw zi andazi ŋu, nuŋw ruweḏa yahuuḏa nana kwokwony, nuŋw zi eca ŋwu: nyi kwende kwinḏaca kworu ŋgwu kaṯiya kere. 39 lakin, a leḏi əḏya wete weḏi yi kedici ŋaŋwuzi mabuuza kwete ki iid-na. a linaŋna nyi eḏi kedici ŋaŋwuzi Melik kweḏi yahuuḏ a? 40 ner upina kwokwony tatap, ner ari: kwunde kwiti kwiri mac, barabbaaz kwiri kwunaŋnanyi. na barabbaaz kwiri kwoɽam.