Sherii@a kwirii alla ṯǝmminǝ?
1 Ŋaaŋa lir Ghalaaṯiiyyiin lir yǝɽiyǝŋ kɔlɔ! Ǝyǝ kwɔrɔ kwɔmǝ-ŋǝsi iithǝsi? Naa lilŋithinǝ-ŋǝsi Yǝcu Kwɔrɔstɔ-ŋwlɔ por-por kiyǝnǝ yaalɔ, ŋgwa kwɔṯigrǝthir ki-ŋwuuɽi-lǝ ŋwɔɽɔmɔthalɔ! 2 Ethi-ŋǝsi-ṯi uṯicǝlɔ ŋiɽaŋal-ŋi ŋɔ ŋɔtɔpɔt dak. Ŋaaŋa laava Ṯigɽimǝ ŋothɽor-ŋi ŋǝthi Sherii@a, alla ṯiniŋna-thi ṯǝthi Inyjiil ṯǝmminǝ-thi? 3 Ŋaaŋa laani oro yǝɽiyǝŋ-ŋwɔ? Naari-ŋa ibṯǝḏi Ṯigɽim-thi, e-ta ǝsi rattasi kworo aŋna-yi-a? 4 E-ta a ṯirǝrinnǝ ṯaalɔ ṯittǝzir orolɔŋw domony-a? Ŋwɔmǝ orolɔŋw domony kinnǝni aŋgwɔrɔ? 5 E-ta Allah winḏǝthǝ-ŋǝsi Ṯigɽimǝ mindaŋ nɔŋw ǝrri ŋilima daŋgal-na, kaka nǝrrǝ-ŋǝsi ŋinaŋnasi Sherii@a? Alla kaka mǝgwɔ neŋne Inyjiilǝ mindaŋ nǝtǝ ǝmminicǝ-lɔ dɔṯṯɔk?
6 Ŋwɔṯaŋw mindaŋ nǝ Kiṯaab aarɔŋw, “Nǝ Ibraahiim ǝmminci Allah mindaŋ nǝ Allah ruusi kwirllalɔ ŋiɽaŋal-ŋi ŋǝthi ṯǝmminǝ ṯuuŋwun.” 7 Ŋwɔṯaŋw nǝ lizi kila lǝthi ṯǝmminǝ, oro rerrem nyɔr nyǝthi Ibraahiim. 8 Kiṯaab Kirllinǝlɔ ter kirarmathi-lɔ nɔŋwaarɔŋw, Allah winḏi ethi ruusi lizi lir Umam lɔvthanna ṯǝmminǝ-thi. Nǝrṯǝ oroŋw tok nǝ Kiṯaab Kirllinǝlɔ ter rarmatha nɔŋwɔccǝ Ibraahiim-ŋwɔ bǝshirǝ Inyjiilǝ nɔŋwɔccǝŋw, “Allah winḏi ethi ǝccǝ lizigwunǝŋi tatap baarika ŋaaŋgi.” 9 Nǝrṯoroŋw kila lir lizi lǝthi ṯǝmminǝ-ŋǝ, ǝri baarikni Ibraahiim-ŋǝli kwǝthi ṯǝmminǝ.
10 Laakin kila tatap lǝṯi allatha ŋɔthɽor ŋǝthi Sherii@a rɔŋwori naana, lindǝr-ṯǝ lǝṯi nanni ki-ṯɔllɔthana. Kaka nɔlɔɔthɔnar-gwɔ ŋaarɔŋw, “Mǝ kweere nyithak ere iinyici ŋiɽaŋali naana tatap mac ŋa ŋɔlɔɔthɔna Kiṯaab-na kǝthi Sherii@a tǝ, ŋwɔni kwollonne hɔkwɔm-yi.” 11 Nǝ kirem tǝ, ŋǝni ŋimǝ leŋthene-lɔ dedder ŋǝniŋw, kwiti kweere kwǝṯi Allah ruusi kwɔsɔɔɽɔ mac ŋiɽaŋal-ŋi ŋǝthi Sherii@a, kaka naarɔ-gwɔ Kiṯaab-ŋwɔ, “Ŋgwa kwirllalɔ ṯǝmminǝ-thi, kwundǝr-ṯǝ kwǝṯi miithi.” 12 Laakin Sherii@a kwende kwǝṯi kettice ṯǝmminǝ yǝy. Laakin Kiṯaav ṯǝ nɔŋwaarɔŋw, “Kweere nyithak kwǝṯisi ǝrri ŋaari-ŋi Sherii@a-ŋw, ŋwɔ miithi.” 13 Laakin Kwɔrɔstɔ kwɔmǝ-nyji kǝdithǝ ki-ṯɔllɔna-na ṯǝthi Sherii@a, kaka mɔŋgworo ṯɔlɔnna ki-lɔɔbi lǝri. Kaka nɔlɔɔthɔnar-gwɔ ŋaarɔŋw, “Ṯɔllɔnna ṯǝṯi naani naanɔ-gwɔ kwette nyithak kwǝṯir allasi ki-ŋwuuɽi-lǝ.” 14 Ŋǝrrǝsi Kwɔrɔstɔ ŋɔ mindaŋ mǝ barka ŋgwa kwɔgittathica-gi Allah Ibraahiim-ŋw, ethi inḏǝthǝ Umama tok Kwɔrɔstɔ-ŋgi kwǝni Yǝcu. Ŋwɔṯaŋw ṯǝmminǝ-thi tok ǝri aavi Ṯigɽimǝ kitha ṯigittathi-thi Allah.
Sherii@a-ŋǝ wa@ḏ-yi.
15 Liyǝŋgǝri liinyi, nyii-ŋgwɔ kwinḏi ethi andasi mǝthǝl-gi kwǝthi ŋizigwunǝŋ: mǝ lizi ndǝn uɽu wa@ḏa kwomne-la kweere, mindaŋ mǝrsi ǝccǝ khatima, ǝṯɔŋweere kweere kwokwony mac kwǝthi ŋɔma ethisi kii-nǝ wala ethisi kiɽǝzǝsi-lǝ ŋeere. 16 Nǝrṯǝ oroŋw nǝ Allah uruci Ibraahiim-ŋw wa@ḏa, nǝ lɔɔla luuŋwun tok. Nǝ Kiṯaab ere andasi ŋiɽaŋali ŋǝni “Ŋwɔɔla” mac, ethǝni ŋwuuru, laakin ŋǝthi kwɔtɔpɔt “Lɔɔla” ŋǝniŋw kwizi kwɔtɔpɔt ṯɔɽɔk, na nǝṯǝ Kwɔrɔstɔ oro. 17 Ŋiinyi ŋǝni-ŋwɔ, Allah wuɽucǝ Ibraahiim-ŋwɔ wa@ḏa mindaŋ nɔŋw ǝccǝ wa@ḏa ethi mithǝ. Nǝ Sherii@a ŋgwa kwɔmǝ ǝvinǝ kwaathan mǝ yithlǝ ṯamthɔ rac yir ruɽi-ṯuɽi-la ṯuɽi-wrii, ŋweere ǝthi ŋɔma mac ethi kii wa@ḏa wa, nǝ ethiiri wa@ḏa kithaay mac wǝthi Allah. 18 Kaka ǝŋgi ŋɔr ŋǝṯir-ŋi mɔrthathi-la oro ŋǝṯi ǝvinǝ Sherii@a-gi, e-ta ǝŋgireere ǝni wa@ḏ kwokwony mac, laakin Allah-tǝ nɔŋwɔni waarɔ wa@ḏa ethi inḏǝthǝ Ibraahiim-ŋwɔ haḏiiyyǝ wa.
19 Nǝ karath kǝthi Sherii@a kǝni ǝyǝ? Kwǝni-pǝ kwɔgɽǝzǝr ŋiɽaŋal-ŋi ŋǝthi ŋikiya, ethi nannitha mindaŋ ethi lɔɔla lǝthi Ibraahiim ɔppatha kila ligittathica-li Allah Ibraahiim-ŋwɔ. Nǝ Sherii@a ǝni kwǝvinnǝ limeleka-li nǝr kette ki-rii-na rǝthi kwette kwǝṯi ǝmmithi lizi-nǝ. 20 Laakin kwǝṯisi ǝmmithinǝ kwiti kwǝṯir naŋni kwɔtɔpɔt mac. Laakin Allah tǝ nɔŋworo wɔtɔpɔt.
Karath kǝthi Sherii@a.
21 E-ta ŋǝniŋw Sherii@a kwir ḏiḏ wa@ḏ wǝthi Allah? Bǝri-mǝ! Ǝŋgi kwizigwunǝŋ aavi Sherii@a kwǝṯi aava ŋimiitha tǝ, ǝŋgi ŋirllalɔ iila tok Sherii@a-gi. 22 Laakin Kiṯaab-na Kirllinǝlɔ ter nɔŋwaarɔŋw, ṯurmun tatap ṯǝni ṯimthinǝ ŋɔma-ŋi ŋǝthi ŋikiya; ŋwɔṯaŋw a haḏiiyyǝ wa wɔgittathir-yi ŋiɽaŋal-ŋi ŋǝthi ṯǝmminǝ ethi Yǝcu Kwɔrɔstɔ-na ǝrisi inḏǝthǝ kila lǝṯi ǝmmini.
23 Laakin niti nimǝ lɔɔmɔr lǝthi ṯǝmminǝ iila kinnǝni mac, nǝnyji Sherii@a lǝŋthǝci kaka misaajiin, mindaŋ ǝŋgi ṯǝmminǝ kɔthɔ ṯinḏi ethi ruwǝnnǝlɔ. 24 Ŋwɔṯaŋw nǝnyji Sherii@a mithǝ mindaŋ nǝ Kwɔrɔstɔ iila kimaara, ethi daɽimatha nyuŋwsi Allah-ŋǝli ṯǝmminǝ-thi. 25 Ṯaŋw nǝṯǝ lɔɔmɔr lǝthi ṯǝmminǝ oro kɔlɔ, e-ta a Sherii@a ere ǝthi sɔlṯa dǝŋgǝr-lɔ kwokwony mac.
26 Kaka nɔrɔŋa-gwɔ tatap nyɔr nyǝthi Allah ṯǝmminǝ-thi ethi Kwɔrɔstɔ-na kwǝni Yǝcu. 27 Ŋaaŋa limǝ ǝrini @ammiḏa kwɔrɔstɔ-ŋgi ŋaaŋa-ṯa kila limǝ kenne Kwɔrɔstɔ-ŋw. 28 Ŋwɔṯaŋw nǝreere naani ŋeere kwokwony mac ŋǝni Yahuuḏi alla Yuunaani, wala ethi kwɔwaay naani, wala kwir hɔrr, wala ethi kwɔr naani, wala kwaaw; ŋaaŋa lir tatap lɔtɔpɔt ethi Kwɔrɔstɔ-na kwǝni Yǝcu. 29 Nǝ moro lǝthi kwɔrɔstɔ tǝ, e-ta oro ŋwɔɔla ŋwɔthi Ibraahiim, mindaŋ ǝmǝ aava ŋgwa kwɔgittathi-gi Allah.
aza 3
ṯəmna ṯiri ṯuɽuk ṯeṯinyji əmiḏina Allah yi, kuruu kiti kiri mac
1 ŋaŋa leḏi galaatyaŋw, ŋiḏya ŋalu ki! eya kwiri kwumɔ ŋazi errezi-na dar, ŋaŋa limerzi baŋaci Yecuŋw Kwruztu pɔrpɔr ki yey-na yalu, kwuṯigreḏir ki ŋwuɽi la ŋwuɽmɔḏalu? 2 eḏi ŋazi ŋi uṯizelu ŋu ŋutuput dak: a limafi Ṯigɽima ṯirlinelu ter ŋɔḏɽor ŋi ŋeḏi kuruu a, ya ŋiɽaŋal ŋi ŋimezi neŋne ṯəmna ṯi? 3 a leni mi liḏiki ŋwu? enḏi ŋa gwu ŋimiiḏa-na kwɔnkwɔn Ṯigɽim ṯi ṯirlinelu ter ta, a linaŋna kirem eḏi zi ratazi aŋna yi a? 4 a lirərine ŋiɽaŋal ŋi ŋitezir domony a? mer keni orɔ domony rerem. 5 na Allah muŋw inḏeḏa ŋaŋwuzi Ṯigɽima ṯirlinelu ter, na muŋw zi erri ŋir ŋilim ŋupa daŋgal-na ta, eṯuŋw zi erri ŋu kaka miḏa gwu kuruu a, ya ŋiɽaŋal ŋi ŋimezi neŋne ṯəmna ṯi?
6 ŋiri ṯaŋwu na ibrahiim eḏici Allah ṯəmna, mindaŋ na Allah ruzi ṯəmna ṯuŋwun kaka ṯofḏana ṯuŋwun. 7 na izarṯi, lizi ledi ṯəmna linderṯa liri nyor nyeḏi ibrahiim. 8 na ŋiɽaŋal ŋuluḏina ilŋiiḏir zi gwu eḏaruŋw, Allah winḏi eḏi ruzi lizi lir umam lofḏana ṯəmna ṯi, ner andaci ibrahiimŋw ŋiɽaŋali ŋizaw ŋir injiil kerreny, ŋaruŋw: lizi leḏi ṯurmun tatap lortani ŋa ŋgi. 9 ŋwu ṯaŋwu, kla leḏi ṯəmna linderṯa lortani ibrahiim ŋali, ŋgwa kweḏi ṯəmna.
10 lakin kla tatap leṯalliḏa kuruu rugwori nana, linderṯa leṯinani ki ṯɔllɔḏina-na hukm yi. kaka luḏinar gwu ŋeni ŋwu: kwere nyiḏak kwiti kweṯami miḏa ŋiɽaŋali ŋwu tatap mac ŋuluḏina kiṯam-na keḏi kuruu, eḏizerri, ŋweni kwɔllɔḏine hukm yi. 11 ŋimɔ liŋeḏine rac, kwizi kwiti kwere kweni kwofḏana mac ki yey-na yeḏi Allah kuruu gi, kaka luḏinar gwu: ŋgwa kweni kwofḏana ṯəmna ṯi, kwunderṯa kwumiiḏi. 12 lakin ŋiɽaŋal ŋeḏi kuruu ŋiti ŋiri ŋiɽaŋal ŋeḏi ṯəmna mac, kaka luḏinar gwu: ŋgwa kweṯizerri ŋeḏi kuruu, kwunderṯa kwe ŋi miiḏi. 13 Kwruztu kwuliṯi nyuŋwuzi ki ṯɔllɔḏina-na ṯeḏi kuruu, urŋw gwu ṯɔllɔḏina ki ŋwobi ŋweri—kaka luḏinar gwu: eḏi ṯɔllɔḏina nani nani gwu kwere nyiḏak kwuṯigreni ŋwuɽi la— 14 mindaŋ eḏi ṯortaḏa ṯeḏi ibrahiim ila ki lizi-na lir umam eḏi Kwruztu-na kweni Yecu, mindaŋ er ma afi nyiŋa ṯikitaḏa ṯeḏi Ṯigɽim ṯəmna ṯi.
15 ŋizaw eḏilŋiiḏini ŋaŋwuzi, lieŋgeri, ŋiɽaŋal ŋi ŋeṯirzerri ki lizi-na. ŋiɽaŋal ŋere ŋeḏi kwizigwunaŋ ŋimerzi enjici kaṯima ŋimerzi lɔ, ezi kwizi ere kwere kwezi dimi kiṯay, ya eḏi zi kiɽezi. 16 na ŋiɽaŋal ŋimɔ ŋi Allah kitaḏa, nuŋw ŋi kitaḏa ibrahiim ŋwuzi lola li lir ŋelŋe ŋuŋun. ner ŋi ere eca mac, ŋwola, ŋweni ŋwuru, lakin ner ŋi eca, lola, leni lutuput, linderṯa leni Kwruztu. 17 ŋinderṯa ŋari nyi ŋi ŋwu: kuruu, kinderṯa kimila kwaḏan gi ki yiḏla yir arbamiya wa ṯalaṯiin, kiti keḏi ŋuma mac eḏafrazi ṯikitaḏiza ṯay ṯete, ṯimɔ Allah enjelu teter, mindaŋ eḏi iri fayḏa kwuŋwun kiṯay. 18 eŋgi kwere afi ŋoru kuruu gi, eŋguŋw ere afi ṯikitaḏiza ṯi mac; lakin na Allah inḏeḏa ibrahiimŋw ŋoru ṯikitaḏiza ṯi.
kuruu keḏaḏa kiri?
19 na kuruu keḏaḏa kiri? kimer kiɽezi ŋiɽaŋal ŋi ŋeḏi ŋikya mindaŋ ma lola ila, lir ŋelŋe limerli kitaḏa. na kimer kete limaleyka li ki ṯii-na ṯeḏi kwete kwunani keligeny-na eḏorɔ ṯəmiḏana. 20 na eṯi ṯəmiḏana ere orɔ ṯeḏi kwizi kwutuput mac; eṯir nani leṯi kamaḏizi; lakin na Allah orɔ ŋundu wutuput.
21 kuruu kiri ṯuwən nani gwu ṯikitaḏa ṯeḏi Allah? beri ma! eŋgir zi inḏeḏa kuruu kete keḏi ŋuma eḏinḏeḏa lizi ŋimiiḏa ta, eŋgi ṯofḏana orɔ rerem kuruu gi. 22 ner nyjinḏeḏa ŋiɽaŋali ŋuluḏina ŋeḏi kuruu eḏi zi ŋi ici mindaŋ er elŋe eḏaruŋw, ŋikya ŋeri ŋimenyji ruzi kaṯi eḏay. na eṯi ṯireca kḏu mulɔ nyuŋwuzi eḏi naŋni ŋigileḏa ṯay ṯi ṯir ter, ŋimerzi kitaḏa kla leḏici Yecuŋw Kwruztu ṯəmna.
23 na iti inḏi gwu ṯəmna kinna mac na kuruu orɔ kwaŋɽa kweri eḏi ṯinyini nyuŋwuzi mindaŋ ma ṯəmna ruwenelu. 24 ṯaŋwu na kuruu orɔ kimenyji karni mindaŋ ma Kwruztu ila, ta er nyji ma ruzi lofḏana ṯəmna ṯi.
ṯerrina ṯeḏi ṯəmna
25 lakin kire-kirem na təmna ila, ŋwu ṯa a kwiti kwunanir kwokwony mac ki rii-na reḏi kwaŋɽa; 26 kaka ma gwu eḏici Kwruztuŋw kweni Yecu təmna, a liri tatap nyor nyeḏi Allah ṯəmna ṯi. 27 na kla daŋgal-na limɔ baptazini eḏi Kwruztu-na limɔ kenne Kwruztuŋw. 28 ŋiti mac ŋeni yahuuḏi ya ŋeni yunaani, ŋiti mac ŋeni kwuway ya ŋeni hurr, ŋiti mac ŋeni kwor ya ŋeni kwaw, kaka ur ŋa gwu tatap kwizi-na kwutuput eḏi Kwruztu-na kweni Yecu. 29 na ma ṯa orɔ leḏi Kwruztu, na ṯa orɔ lola lir ŋelŋe ŋeḏi ibrahiim, na orɔ nyor nyinḏi eḏafi ŋoru, ŋiɽaŋal ŋi ŋeḏi ṯikitaḏa.