Ŋiglǝthǝ ŋɔppa.
1 Nǝrṯoro ŋɔ ŋir laazim ǝri mithǝ ŋiɽaŋali ŋɔ ŋir rerrem tetter ŋa ŋiniŋnarsi, mindaŋ mǝreere ṯɔɔthi mac. 2 Na mǝ ŋiɽaŋal ŋa ŋandicasi limeleka rǝrnyǝri-ŋwsi rǝri ǝthi yǝnǝ, nǝ ŋgwa kweere kwiti kwɔmǝsi ǝmmini mac tǝ, nɔŋwaavi jiizǝ kwɔvthannica ŋunduŋw. 3 E-ta, ǝrmǝ arṯitha jiizǝ nyiiŋǝ aŋgwɔrɔ, mǝreere kettice ŋiglǝthǝ yǝy ŋɔ ŋɔppa mac? Ŋǝni-pǝ ŋɔɔlɔ-ŋi Kweeleny kerreny tuk rogɽo-ri ŋuuŋwun, nǝ kila limǝsi neŋne nǝrni aarɔŋw ŋir ŋerrem. 4 Naaɽi nǝsi Allah kiɽǝzǝsi naana ŋeeŋen ŋa ŋɔnḏɔŋw-ŋi kiyǝnǝ, ŋa ŋǝrrirǝ-ŋwsi ŋir ŋilim, nǝ ŋir ŋwundǝ-ŋwundǝ, nǝ nɔŋw kǝnni haḏaaya ṯɔgwor-thi ṯuuŋwun wǝthi Ṯigɽim Ṯirllinǝlɔ ter.
Ŋgwa kwǝṯi-nyji iili ki-ŋiglǝthǝ-nǝ.
5 Nǝ Allah ere kettice limeleka ṯurmunǝ kitha ṯinḏi mac ki-ŋwaara-na ŋweeŋen ethi mithǝ kitha ṯandisar 6 Ŋǝni ŋandinna kǝzir wette Kiṯaab-na ŋaarɔŋw:
“Yaa Allah, kwizigwunǝŋ kwirṯaŋ mindaŋ nǝṯi-mǝ
kikithaayini,
ɔrɔŋw-ma kwizigwunǝŋ domony mindaŋ nǝṯaami kagirni
ŋunduŋw?
7 Kwɔmǝ ruusi ŋunduŋw kwokwɔɽony kwokwo cuk domony
ethi limeleka-la,
nǝ ɔɽacci taŋgiŋi tǝthi ŋinith nǝ tǝthi ṯiiɽǝnǝ,
8 mindaŋ nǝ ruusi Kweeleny kwomne-la tatap.”
Ŋandinna ŋaarɔŋw, Allah wigitta kwizigwunǝŋi mindaŋ, “Nɔŋw ruusi kweeleny kwomne-la tatap.” Nǝ a kwende kwɔmǝr ese kwizi kweeŋe kinnǝni kire-kirem-ŋgwɔ kwɔmoro kweeleny kwomne-la tatap mac. 9 Laakin a kwɔmǝr ese Yǝcu-ŋw, kwɔmǝr aaɽisalɔ ethoro kwokwɔɽony ethi limeleka-la kwokwo cuk domony, nǝr ɔɽacci taŋgiŋi tǝthi ŋinith nǝ ṯiiɽǝnǝ sǝbǝb-gi kwǝthi ṯurvǝ ṯinḏaŋw ṯǝthi ŋiɽany, mindaŋ ethi nyiŋlici lizi tatap ŋiɽany ne@ma-gi kwǝthi Allah.
10 Ŋǝni kǝniny ŋɔvthanna ethi Allah wǝṯi kette, nǝ wǝṯi mithǝ kwomne tatap, nɔŋw ruusi Yǝcu-ŋw min-min ṯirǝrinnǝ-thi, mindaŋ ethi mɔltha lizi luuru ethi ɔɽɔmaṯṯi ki-ŋinith-nǝ ŋuuŋun. Kaka nɔrɔ-gwu Yǝcu kwinḏisi ethisi iili ŋiglǝthǝ-nǝ. 11 Nɔŋw suuɽi lizi ki-ŋikiya-na ŋeeŋen, kaka nuruuthur-gwɔ ki-ṯɔvɔɔ ṯɔtɔpɔt, ŋgwa kwusuuɽǝsi nǝ kila limǝ suuɽunni tok, ŋindǝr-ṯǝ-ŋɔ mindaŋ nǝ ṯɔrony ere mithǝ mac ethisi ǝccǝŋw, ŋaaŋa lir liyǝŋgǝri liinyi. 12 Nɔŋwaarɔŋw,
“Nyii kwurwǝci liyǝŋgǝri-ŋwɔsi, yiriny-lɔ yɔɔŋwa,
nyii biɽǝthǝ ŋaaŋwɔ yiriny ki-lɔdɔŋw-na leeŋen.”
13 Nɔŋwaarɔŋw kwokwony,
“Nyii kwɔŋa allatha ṯɔgwori naana ṯiinyi.”
Nɔŋwaarɔŋw kwokwony,
“Nyii kwir-pa ŋgwɔ nyelle-nyi kinya nyinḏǝthǝ-nyji Allah.”
14 Kaka nɔrgwɔ nyɔr lizigwunǝŋ, nǝ ŋundu tok nɔŋw-ṯǝ aavi ṯobii@a ṯǝ kɔthɔ tok, mindaŋ mɔŋwɔthi ŋɔma ŋiɽany-ŋi ethi-ŋi kiirasi Ibliisǝ-lɔ kiya ywǝthi ŋɔma ki-ŋiɽany-la, 15 nǝ ṯaay-thi ṯǝ kɔthɔ, ŋwɔsi kǝdithǝ kila linaanɔ ki-ŋɔwaay-na ki-ŋimiitha-na ŋeeŋen tatap, ŋiɽaŋal-ŋi ŋǝthi ŋitheny ŋǝthi ŋiɽany ŋeeŋen. 16 Ŋilŋithina dedder rac ethaarɔŋw kwiti kwinḏi mac ethi mǝcci limeleka. Laakin nǝ Kiṯaab aarɔŋw, “Kwɔmǝccǝ-pǝ ŋwɔɔla ŋwɔthi Ibraahiim.” 17 Nǝrtoroŋw mindaŋ nǝr kitta kwaaɽinna liyeŋgen kwomne-gi tatap, mindaŋ ethoro Rǝ-iis Rɔppa rǝthi kahana ririlalɔ, rir kwimɽi ki-ŋothɽor-na ŋuuŋun ŋǝṯɔŋwsi ǝrrici Allah, mindaŋ ethisi-mǝ ŋikiya ŋeeŋen fivrinnici kithaay. 18 Nǝ kaka nɔmɔmmɔr-gwɔ ŋunduŋw nǝ nɔŋw rǝrinni tok rogɽo-ri ruuŋwun, e-ta ŋwɔthi ŋɔma tok ethisi mǝcci kila tok lǝṯirsi mɔmmi.
aza 2
1 ŋwu ṯaŋwu, ner ofḏani deŋgeri-na eḏami ketize ŋiɽaŋali yəni ciɽŋil ŋa ŋiniŋnarzi, mindaŋ mer zi ere ṯemzi mac. 2 na ma ŋiɽaŋal ŋandizazi limaleyka eḏi zulṯa eḏefica ŋikyaŋi ya ŋudurlaḏu tatap jiiza kweni kwirlalu, 3 a kwinḏir eḏi kilaw aŋgwuru, mer ere ketize ŋigileḏa ŋu yey mac ŋeni ŋupa ŋiminni? ŋinderṯa ŋimandani Kweleny gi kerre-kerreny ta, ner nyji ma ruwecelu ŋir rerem kla liniŋnaca ŋunduŋwu, 4 na Allah unḏi ki tɔk ŋilim ŋi ŋeṯi liŋɽazi lizi, ŋuma ŋi ŋir-na ter ter, na haḏiya yi weḏi Ṯigɽim tirlinelu ter, wumɔŋw kanni ṯugwor ṯi ṯuŋwun.
5 na Allah ere ketize limaleyka ṯurmuna ŋwara-na mac, kḏa tinḏi eḏila ṯandizari ṯi. 6 ŋimerzi andazi rerem kezir wete, ŋaruŋw:
lizigwunaŋ liri ṯaŋ mindaŋ mezi karni?
ya tor teḏi lizigwunaŋ tiri ṯaŋ mindaŋ ma raŋḏa ŋunduŋwu?
7 na ruzi ŋunduŋwu kwɔkwɔk cukw kwɔkwɽeny edi lima-leyka la,
a kwumɔ kinnini ŋunduŋwu taŋgiŋi tir ŋiniṯ ṯiniiya ṯi,
8 na kete kwɔmne tatap ŋwara-na ŋwuŋwun.
na muŋw inḏeḏa lizigwunaŋi zulṯa eḏi kwɔmne la tatap, nuŋw ere uɽuḏeci kwɔmne kwere par ŋgi la mac. lakin kineni ner ere eze kwɔmne tatap mac ki zulṯa-na kweḏi lizigwunaŋ. 9 lakin eṯir eze Yecuŋw, kwumer ruzi kwɔkwɔk kwɔkwɽeny eḏi limaleyka la, kwukinniner taŋgiŋi tir ŋiniṯ ṯiniiya ṯi, kaka muŋw gwu rerini ŋiɽany ŋi; mindaŋ nuŋw nyiŋlici lizi tatap ŋiɽany, ṯimeca ṯi ṯeḏi ŋimɽi ŋeḏi Allah.
10 kaka enir gwu ŋofḏana nani gwu Allah, ur gwu kwɔmne tatap kwuŋwun, na kwuruḏi ŋundu ŋgi, mulḏuŋw gwu nyoru nyitezir ki ŋiniṯ-na, eŋguŋw ṯimaci ŋgwa ŋiɽaŋali kworɔ ṯireriha ṯi, kweni kwuruwa kweḏi ŋigileḏa ŋeŋen. 11 kaka kiziiz kere keṯirli lizi lu ter, na kla limɔŋw zi irlelu ter, ner ṯa eḏi Papaŋw kwutuput, ŋwu ṯa, eti ṯurony ere ye ŋunduŋwu mac eḏizeca, lieŋgeri, 12 aruŋw gwu ŋwu:
nyi kwuruweci lieŋgeri ŋwuzi lu linyi yiriny lu yɔŋwa pɔrpɔr,
enyi iɽezi ŋaŋwu ki duŋw-na.
13 na kwokwony,
nyi kwalliḏa ŋunduŋwu ṯugwori nana.
na kwokwony,
nyi kwiri pa ŋgwu, nyor nyi nyimenyji Allah inḏeḏa.
14 ŋwu ṯaŋwu, kaka eḏi gwu nyor aŋna-ŋa ŋin ŋi, ṯaŋwu nuŋw zi aɽani tɔk, mindaŋ eḏi ma ofe teṯ, ŋiɽany ŋi ŋuŋun, ŋgwa kweḏi ŋelenyi ŋir ŋiɽany, kwunderṯa kweni ibliiz; 15 mindaŋ eḏi zi ma kileḏi kla tatap lir luway leḏi ŋiḏeny ŋwamin ŋweŋen tatap, ṯinyar gwu ŋiɽany. 16 na izarṯi, ŋiɽaŋal ŋuŋun ŋiti ŋiri ŋeḏi limaleyka mac, eṯir orɔ ŋeḏi nyor nyeḏi ibrahiim. 17 ŋwu ṯaŋwu, ner eni ŋofḏana duŋgwun eḏaɽani lieŋgen ki ŋiɽaŋal-na ndendeṯ, mindaŋ ŋwu ma eḏici nyuŋwuzi ŋimɽya-na, eḏi ma orɔ Kiziiz kir kweleny, kirlalu, kofḏana ki ŋɔḏɽor-na ŋeḏi Allah, eḏi ketize rɔgwɽɔ ruŋwun karama keḏi ŋikya ŋeḏi lizi, eḏi zi əmiḏina Allah yi. 18 na kaka muŋw gwu rerini ki rɔgwɽɔ-na ruŋwun, na kwumer mummi tɔk, nuŋw eḏi ŋuma eḏi zi meci liḏaḏu ki tumɔmma-na.