Yǝcu kwir kǝrǝm kir rerrem.
1 “Nyii kwir kǝrǝm kir rerrem, nǝ Papa kwiinyi oro kwaṯi daɽimatha naana. 2 Mǝ ṯill ṯeere ṯinaany-gwɔna ere riiɽi nyɔɔrɔ mac tǝ, ŋwuuɽu kithaay, na ṯill ṯeere ṯǝṯi riiɽi tǝ, ŋwɔ daɽimatha naana, mindaŋ ŋwɔ riiɽi nyɔɔrɔ nyuuru. 3 Ŋaaŋa lǝni limǝ suuɽunni kerreny tuk ŋiɽaŋal-ŋi ŋa ŋandica-ŋǝsi. 4 Nannirny-gwɔna, mindaŋ ŋǝsi-gwɔ nannina tok. Kaka niti naṯi-gwɔ ṯill ere ǝthi ŋɔma mac, ethi riiɽi wɔɽeny mɔŋweere naani kǝrǝmǝ naana mac. Nǝrṯoroŋw tok daŋgal-na, meere nanni ḏuŋgwiny-nǝ mac. 5 Nyii kwir kǝrǝm, ŋaaŋa tǝ noro rill. Ŋgwa kwɔnanni duŋgwiny-nǝ, nǝ mǝny nanni duŋgwun-nǝ tok, ŋwɔ riiɽi nyɔɔrɔ nyuuru, ŋaaŋa liti lɔthi ŋɔma mac ethisi ɔrri ŋeere ŋiirany-gwɔ-na. 6 Mǝ kwizi ere kweere nanni duŋgwiny-nǝ mac, ŋwɔ kǝṯṯini kithaay kaka ṯill, mindaŋ ŋwunḏi, kaka nǝṯir-gwɔ aaɽasi rill dɔŋw mindaŋ ǝṯirsi kaṯṯɔ kiigǝ-nǝ ethi-gwɔ dɔnni. 7 Mǝ nanni duŋgwiny-nǝ, mindaŋ mǝ ŋiɽaŋal ŋiinyi nanni daŋgal-na tok tǝ, e-ta mǝgi ɔṯalɔ kweere nyithak kwɔnaŋna-ŋa tǝ, ǝrŋǝsi-tǝ ǝrrici. 8 Ŋiɽaŋal-ŋi ṯǝ-ŋɔ ǝŋi Papa kwiinyi niini-nǝ, mǝ riiɽi nyɔɔrɔ nyuuru, e-ta ǝmoro ṯalaamiiz ṯiinyi. 9 Kaka namɽany-gwɔ Papa kwiinyi ŋǝsi-ṯǝ amɽi nyii tok ŋwɔ, naanir ki-ṯamɽa-na ṯiinyi. 10 Mǝ mithǝ awaamira wiinyi, a-nannitha ki-ṯamɽa-na ṯiinyi, kaka tǝ nimthiny-gwɔ awaamira wǝthi Papa kwiinyi, mindaŋ nǝnyii nanni ki-ṯamɽa-na ṯuuŋwun. 11 Nyii kwɔmǝ-ŋǝsi andaci ŋiɽaŋali ŋɔ, mindaŋ mǝ ṯinyiŋlana ṯiinyi nanni daŋgal-na, mindaŋ mǝ ṯinyiŋlana ṯaalɔ oro min-min.
12 “Waamir wiinyi wir wɔ, ethi amɽathisina wɔɽe-wɔɽeny kaka namɽa-ŋǝsi-gwɔ. 13 Ṯamɽa ṯiti ṯeere mac ṯithǝmthi ṯamɽa-la ṯǝthi kwizi ŋgwa kwǝṯi ṯiŋacci limethgen ŋimiitha-lɔ ŋuuŋun ethisi ǝyici. 14 Mǝsi ǝrri ŋa ŋandica-ŋǝsi-tǝ, oro limǝthgǝri liinyi. 15 Ŋiseere ǝccǝ yaḏaama kwokwony mac, kaka niti naṯi-gwɔ khaḏaam ere elŋe ŋiɽaŋali mac ŋǝṯisi sayyiḏ kwuuŋwun ǝrri, laakin nyii kwɔmǝ-ŋǝsi ǝccǝ limǝthgǝri, ŋimǝ-ŋǝsi ilŋithini ŋa tatap ŋiniŋna-nyji naanɔ-gwɔ Papa kwiinyi. 16 Ŋaaŋa liti lir liccany-na mac, laakin ninyoro nyii kwicca-ŋǝsi-na, nǝŋǝsi alla etheele ethi riiɽi nyɔɔrɔ mindaŋ mǝ nyɔr nannitha dok; na mǝ uṯici Papa-ŋwɔlɔ kwomne-gi kweere yiriny-yi yiinyi kwǝŋǝsi tǝ inḏǝthǝ. 17 Waamir wiinyi wir-ṯa wɔ ethi amɽathisi-na.
Ŋuwǝzǝ ŋǝthi ṯurmun.
18 “Mǝŋǝsi ṯurmun wǝzi, ǝsi elŋe ethaarɔŋw, ṯuwǝze-nyii kerreny daŋgal-la. 19 Ǝŋgoro lǝthi ṯurmun, aŋgi-ŋǝsi ṯurmun amɽi kaka nɔrŋa-gwɔ luuŋwun; laakin neere oro luuŋwun mac laakin nǝŋǝsi allana ki-ṯurmun-nǝ, ŋindǝr-ṯǝ ŋɔ mindaŋ nǝŋǝsi ṯurmun uwǝzi. 20 Kithaayinarsi ŋa ŋǝccǝ-ŋǝsi-ŋiŋw, ‘Khaḏaam kiti kǝṯi ṯamthɔ sǝyyiḏǝ-lǝ kwuuŋwun mac’. Mǝrnyii ǝrrǝ-lɔŋw ǝrŋǝsi ǝrrǝlɔŋw tok; mǝr iinyici ṯa@liima ṯiinyi naana, ǝri iinyici naana ṯaalɔ tok. 21 Laakin ŋǝrŋǝsi ǝrrici ŋɔ tatap kaka nɔrŋa-gwɔ liinyi, kaka niṯi nilŋithir-gwɔ ŋgwa kwɔɔsa-nyii mac. 22 Ǝŋginyeere iila ethisi andaci mac, ǝŋgireere oro kaṯṯi mac, nǝ krem-tǝ nǝrseere ǝthi ŋeere mac ŋǝthi-gwɔ kǝɽinnǝthǝ ŋǝthi ŋikiya ŋeeŋen. 23 Ŋgwa kwǝṯi-nyii wǝzi, ǝṯɔŋw wǝzi Papa-ŋw kwiinyi tok. 24 Ǝŋgi-nyeere ǝrri ŋothɽor deŋgen-na ŋiti ŋimǝsi kwizi kweere ǝrri mac; aŋgireere oro kaṯṯi mac; laakin kirem-tǝ ŋimǝrsi ese, mindaŋ nǝrnyji wǝzi Papa-gi kwiinyi ndǝndǝk. 25 Ŋǝrrinǝ ŋɔ mindaŋ mǝr rattathi ŋa ŋɔlɔɔthɔna ki Sherii@a-na kweeŋen ŋaarɔŋw, ‘Luwǝzǝ-nyii tǝlɔ ceg-cegi’. 26 Laakin mǝ kwumǝccǝ iila ŋgwa kwinḏi-ŋǝsi ethi ṯiŋacca kwunruthu naanɔ-gwɔ Papa, kwir Ṯigɽim ṯǝthi ŋirllalɔ, ṯuruuthu naanɔ-gwɔ Papa, ŋwɔ-ŋi ɔnḏi kiyǝnǝ ŋǝni nyii. 27 Ŋaaŋa lir shuhuuḏ kwiinyi tok, kaka a-naani-ŋa-gwɔ nyii-gi kinaŋw-lɔ tuk kwon-kwon.
aza 15
kwayi kwir rerem, ril ri-na
1 nyi kwiri kwaɽi kwir rerem; na Papa kwinyi orɔ kweṯidaɽminana. 2 ṯil ṯere titi ṯeṯiriɽi mac duŋgwinyi-na, ŋwuɽu kiṯay. ṯil ṯere ṯeṯiriɽi, ŋwuzuɽi nana, mindaŋ ŋwami riɽuŋw. 3 a klu ṯa limɔzuɽu-na, ŋiɽaŋal ŋi ŋandicaŋazi. 4 nannir nyi gwu-na, ŋazi gwu ṯa nanni-na tɔk. kaka eṯi gwu ṯil ṯere ere eḏi ŋuma mac eḏi riɽi oɽeny, muŋw ere nani kwaɽi nana mac, a ṯa orɔ ŋwu ŋaŋa tɔk; a liti leḏi ŋuma mac eḏi riɽi, ma ere nanni duŋgwinyi-na mac. 5 nyi kwiri kwaɽi, na orɔ ŋaŋa ril. muŋw nanni kwere duŋgwinyi-na, menyi gwu nanni-na tɔk, kwunde kwiri kweṯami riɽuŋw. ma ere nanni duŋgwinyi-na mac, a liti leḏi ŋuma eḏerri kwɔmne kwere mac. 6 ma kwizi ere nanni duŋgwinyi-na mac, er ṯa kaṯu kaka ṯii ṯay nana. ril ray nana, er zi andazi ŋwuduŋw, er zi kaṯu kigə-na, er uɽeḏi. 7 ma nanni duŋgwinyi-na, ma ŋazi gwu ŋiɽaŋal ŋinyi nanni-na tɔk, uṯir lu ŋiɽaŋal ŋi ŋere nyiḏak ŋinaŋnaŋazi, ta ezi ṯa inḏa. 8 ŋiɽaŋal ŋi ŋu, e ṯa Papa kwinyi niini-na, ma ami riɽuŋw; ta a ma ami orɔ limeḏgeriŋw linyi. 9 kaka eṯinyi gwu Papa amɽi, eṯinyi ṯa amɽi ŋaŋwuzi tɔk. nannir ki ŋimɽya-na ŋinyi. 10 ma miḏa amra winyi, a ṯa nanni ki ŋimɽya-na ŋinyi; kaka eṯi nyi gwu miḏa amra weḏi Papa kwinyi, nenyi ṯa nanni ki ŋimɽya-na ŋuŋun. 11 ŋimɔŋazi andaci ŋwu mindaŋ a ṯinyiŋlana ṯinyi ureni daŋgal-na dedep, ta ma ami nyeŋlenaŋw nyiḏak.
12 amr winyi wiri ṯa wu, amiḏirna, kaka eṯiŋazi gwu amɽi. 13 ŋimɽi ŋende ŋere ŋiṯemḏizi la ŋu, eḏi kwizi kwere ṯiŋaci limeḏgen rɔgwɽɔ lu eḏi zi eyzi. 14 a leni limeḏgeri linyi, mezi erri kaka ŋeṯiŋazi andaci. 15 ŋazi ere eca yaḏaama kwokwony mac, kaka iti ilŋiica gwu kaḏaam kwɔmne mac kweṯi kwizi erri kwunannir gi. lakin, nyi kwumɔŋazi eca, limeḏgeri, kaka ma ŋazi gwu ilŋiiḏini ŋiɽaŋali tatap ŋiniŋnanyji nani gwu Papa. 16 a liti liri licanyi-na mac, nenyi orɔ kwicaŋazi-na, na ŋazi alla eḏele eḏami riɽuŋw nyoru nyinḏi eḏi nanni dɔk, mindaŋ a Papa inḏeḏa ŋaŋwuzi ŋere nyiḏak ŋuṯizi ŋi lu yiriny yi yinyi. 17 amr winyi wiri wu, amiḏirna.
ṯurmun na Ṯigɽim ṯeḏi ŋirlalu
18 mer ŋazi uwezi leḏi ṯurmun, ezi elŋece rac, aruŋw: kwuwezer ṯaŋwu kerreny deŋgeri la. 19 eŋgir orɔ leḏi ṯurmun, eŋgir zi ṯa amɽi leni luŋwun, lakin kaka iti ur ŋa gwu leḏi ṯurmun mac, elli ŋazi gwu ki ṯurmun-na, ṯaŋwu eṯir ŋazi uwezi leḏi ṯurmun. 20 ṯiŋayinar ŋiɽaŋali ŋandicaŋazi ŋeni ŋwu: kaḏaam kiti keṯiṯamḏu kwizi kwunannir gi mac. mer nyi erre luŋw, er ŋazi erre luŋw tɔk. mer nyi miḏici ŋiɽaŋali, er ŋazi ṯa miḏici tɔk. 21 er ŋazi errizi ŋu tatap, ŋiɽaŋal ŋi ŋeḏi yiriny yinyi, kaka ṯimiḏir gwu ŋgwa kwuzanyi. 22 eŋgi nyi ere ila mac eḏi zi andaci, eŋgir ere eḏi kaṯiya kere mac; na kirem ner ere eḏi ŋiɽaŋali ŋere mac eḏi ŋi kwuɽbeḏa ŋikyaŋi lu ŋeŋen. 23 kweṯuwezi nyuŋwu, eṯuŋwu uwezi Papaŋw kwinyi tɔk. 24 eŋgi nyji ere errizi ŋilima deŋgen-na mac, ŋiti ŋimezi kwizi kwir ter erri mac, eŋgir ere eḏi kaṯiya mac. lakin kirem limenyji ṯa eze, na limenyji ta uwezi, Papa gi-na kwinyi nden tɔk. 25 lakin ner orɔ ṯaŋwu eḏi ŋiɽaŋal rataḏi ŋuluḏina kuruu-na keŋen, ŋeni ŋwu: limenyi uwezi cakicagi.
26 mindaŋ ma Kwumeca ila, kwinḏi ŋazi eḏi ṯiŋaca nani gwu Papa, kwir Ṯigɽim teḏi ŋirlalu ṯiruḏi nani gwu Papa, kwɔ ŋi unḏizi ki ŋeni nyi. 27 ŋaŋa tɔk, a klu lunḏizenyi ki, kaka nani ŋa gwu duŋgwinyi kinaŋw kwɔnkwɔn.