1 Ŋiinyi ŋǝni-ŋwɔ, ŋgwa kwǝṯi mɔrthathi ki-ŋɔr-la ŋǝthi ṯǝrnyin, mɔŋw-tǝ oro kinnǝni tɔr tokwɔɽony, ǝṯɔŋweere ṯamthɔ kwɔwaaya-la mac, nɔrɔ-va kinnǝni kwomne kwuuŋwun tok tatap. 2 Nǝ kinaŋw nɔrɔŋw kinnǝni tokwɔɽony, nǝr naani kila lǝṯi aŋraci ŋunduŋw, nǝ liwǝkiil luuŋwun tok mindaŋ mǝ laamin iila lǝllicǝ ṯǝrnyin.
3 Nǝrṯoroŋw nyiiŋǝ tok, kinaŋw nɔrɔr nyɔr nyokwɔɽony, nǝroro lɔwaay lǝthi rigɽim rǝthi ṯurmun. 4 Laakin mǝ lɔɔmor ɔppatha lɔvthanna, nǝ Allah ɔɔsa tɔɔrɔ tuuŋwun, nɔŋw iila tilŋinna ŋelŋe-ŋi ŋǝthi kwaaw, nɔŋw nanni kwimthi Sherii@a. 5 Mindaŋ ethisi kilǝthi kila linaanɔ ki-rii-na rǝthi Sherii@a, mindaŋ mǝroro nyɔr nyǝthi Allah.
6 Nǝ kaka nɔrɔŋa-gwɔ nyɔr nyuuŋwun, nǝnyji Allah usicǝ Ṯigɽimǝ ṯǝthi Tɔr tuuŋwun ki-rɔgwor-na rǝri ǝṯɔŋw aari-ŋwa, “Abba! Papa!” 7 Ŋwɔṯaŋw, neere oro lɔwaay kwokwony mac, laakin noro nyɔr nyir hɔrr. Nǝ kaka mǝgwɔ oro nyɔr nyuuŋwun, ǝŋǝsi Allah inḏǝthǝ ŋgwa tatap kwǝthiŋw kwǝthi nyɔr nyuuŋwun.
Bɔɔlɔs mɔŋgwɔ pinnici lizi lǝthi Ghalaaṯiiyya-ŋw ṯɔgwor-na.
8 Kerreny tuk niti nilŋithiŋǝ kinnǝni Allah mac, nǝ nanni ki-ŋiwaay-na ŋǝthi riiɽu riti rir rerrem mac. 9 Laakin kire-kirem-ŋgwɔ tǝ, ŋaaŋa limǝ elŋe Allah, nǝ ŋǝsi ǝccǝŋw Allah wɔmǝ-ŋǝsi elŋe kirem tok. E-ta ŋaaŋa lotho linaŋna ethi aaɽi kithaay, ethaaɽitha ki-rigɽim-nǝ kira rajla cige-cigep riti rǝthi faayitha-na kweere mac? Ŋaaŋa lotho linaŋna ethoro lɔwaay leeŋen kwokwony? 10 Ǝṯisi kettice yǝy ŋǝthi ŋwaamin ŋweere ŋweere, yǝwǝ-yi, nǝ ŋwɔɔmɔr-ŋa yithlǝ-yi tok! 11 Nyii-ŋgwɔ kwɔthiinya etheese ŋɔma ŋiinyi ŋimǝ kiirannalɔ domony daŋgal-na.
12 Liyǝŋgǝri, nyii-ŋgwɔ kwutuurǝccǝ-ŋǝsi-lɔ tur mindaŋ ethi aaɽanni nyuŋwɔ, kaka-ṯǝ naaɽinnany-gwɔ ŋaaŋwɔsi. Ŋiti ŋeere ŋimǝr-nyji ǝkkici pir mac. 13 Ŋaaŋa lilŋithi rac ethaarɔŋw, nyii kwuumǝy kinaŋw nǝccǝ-ŋǝsi bǝshirǝ-lɔ kwon-kwon. 14 Nǝ nipinnǝŋǝ-vǝ kinnǝni rɔgwor-na tok ŋiɽaŋal-ŋi ŋǝthi kimǝthi kiinyi, nǝrnyeere ǝrrǝlɔŋw mac. Laakin nǝr-nyii aalanni daŋgal-nǝ kaka melekǝ kwǝthi Allah, kaka-ṯǝ nǝŋgi-gwɔ aalanni Kwɔrɔstɔ-ŋw kwǝni Yǝcu. 15 Ŋaaŋa lǝni laamina beṯṯen! Aatha kwɔrɔ kwǝrrinnǝ? Ŋɔnḏɔny-ŋi ŋɔ kii ŋǝni ŋaalɔ ŋǝniŋw, ǝŋgiroro mǝmkin ǝŋgir-nyii ǝllicǝ yǝy yaalɔ ethisi inḏǝthǝ nyuŋwɔ. 16 E-ta nyimoro ṯuwǝn ṯaalɔ kaka nandica-ŋǝsi-gwɔ ŋiɽaŋali ŋir rerrema? 17 Nǝ kila lǝṯi-ŋǝsi ṯǝccici ŋɔma ethi ǝgini ŋaaŋwɔsi, laakin nǝ karath keeŋen ere ɔvthanni mac. Ŋa tatap ŋigǝkṯicǝrsi nda, nǝr naŋni ethi uɽǝthǝ ŋaaŋwɔsi-na nyii-gi, mindaŋ ǝŋgǝthi sɔɔrɔma kweeŋen. 18 Ŋani ŋɔvthanna rac ŋǝthi ṯǝginǝ mɔŋwɔni ṯǝrrinǝ sǝbǝb-gi kwisaaw, ŋirṯaŋw rerrem dok-dok, nǝreere ǝniŋw mǝnyii naani yǝy-lɔ ṯɔɽɔk mac. 19 Kwelle kwiinyi, ŋijma ŋǝni ŋaalɔ ŋɔ ŋiyathi-nyii kwokwony mindaŋ mǝ kenne Kwɔrɔsto-ŋw ki-rɔgwor-nǝ raalɔ! 20 Nyii kwǝthi sɔɔrɔma beṯṯen ethi naani yǝy-lɔ ŋaaŋa-li kire-kirem, mindaŋ ǝŋginy ǝthi ŋɔma ethi urlǝ ṯɔgwor-lɔ ṯiinyi, kaka nǝniny-gwɔ kwippinnǝ ṯɔgwor-nǝ tig-tig ṯǝni ŋaaŋa.
Mǝthǝl kwǝthi Haajar-ŋǝ Saara-gi.
21 Andicar-nyii-ṯi ŋaaŋa kila linaana ethi aaɽitha ki-hɔkwɔm-na wǝthi Sherii@a. Ŋaaŋa liti limǝ neŋne mac-a, Sherii@a kwandisa nɔŋywaari tha? 22 Ŋɔlɔɔthɔna-pa ŋaarɔŋw, Ibraahiim kwǝthi nyɔɔrɔ nyiɽǝn nyir nyoŋwor, tette tǝthi kwaaw kwir kwɔwaay, nǝ tithaathɔ tǝthi kwaaw kwir hɔrr. 23 Nǝr ilŋitha tɔɔrɔ tǝthi kwɔwaay ṯǝrṯiib-thi ṯǝṯir-thi ilŋitha nyɔɔrɔ. Laakin tɔr tǝthi kwaaw kwir hɔrr tǝ, nǝr ilŋitha wa@ḏ-yi wǝthi Allah. 24 Ŋiɽaŋal ŋɔ ŋir kaka suurǝ. Laaw kɔlɔ lir ndǝn lir kaka wa@ḏ wuɽǝn. Kwette nɔŋworo kwaaɽinna Ayinɔ wǝni Siinaa, kwǝṯi elŋe nyelle nyǝthi ŋɔwaay; nǝ Haajar oro. 25 Haajar kwɔrɔ Ayin wǝni Siinaa wɔnaanɔ ki-bǝlǝḏ kwǝthi nyǝthgwu, nɔŋworo suurǝ kwǝthi mǝḏiinǝ kwǝni Urshaliim, kaka a-naanɔ-ŋgwɔ ki-ŋɔwaay-na nyelle-nyi nyuuŋwun tatap. 26 Laakin Urshaliim kwǝthi ki-leere-naŋw nɔŋworo hɔrr, kwundǝr-ṯǝ kwir ayya kwǝri. 27 Kaka nɔlɔɔthɔnar-gwɔ ŋaarɔŋw,
“Aamina ŋa kwir kwɔɔrɔm kwiti kwǝṯi elŋe mac!
Ɔppɔna a ṯiŋaṯṯa ṯiiyǝ-lɔ kwaamina,
ŋa ŋgwa kwiti kwiccinǝ ŋijma-ŋi ŋǝthi ŋelŋe mac.
Kaka nǝthi-ŋgwɔ ŋgwa kwɔṯayyar-lɔ nyelle nyuuru,
ethi ŋgwala kwɔnannir kwɔlen-gi.”
28 Nǝ kirem tǝ liyǝŋgǝri, ŋaaŋa lir nyelle nyǝthi ṯigittatha kaka Is-haag-ŋwɔ. 29 Nǝ ki-lɔɔmɔr-la-ṯǝ kila, nǝ tɔr kira tilŋithir ŋelŋe ŋir-ga ŋǝthi nyelle tatap, nɔŋw ǝwɽi yǝy-lɔ kira tilŋithir Ṯigɽim-thi ṯǝthi Allah. Nǝ nǝrṯǝ oroŋw tok kire-kirem-ŋgwɔ. 30 Laakin Kiṯaab Kirllinǝlɔ ter kaari-tha? Kaari-pa-ŋwa, “Ruttǝ kwɔwaaya kithaay tɔr-ri tuuŋwun; kaka niti ninḏi-gwɔ tɔr tǝthi kwɔwaay ethi mɔrthathi ki-ŋɔr-la tɔr-ri tǝthi kwaaw kwir hɔrr mac.” 31 Ŋwɔṯaŋw liyǝŋgǝri, a kwiti kwirir nyelle nyǝthi kwɔwaay mac, laakin niroro nyelle nyǝthi kwaaw kwir hɔrr.
aza 4
eḏoro nyor nyeḏi Allah ṯəmna ṯi eḏi Kwruztu-na
1 ŋari nyi ŋi ŋwu, ŋgwa kwinḏi eḏafi ŋoru kwaḏan, enuŋw gwu kinna tor tɔkwɽeny, eṯuŋw ere tamḏu kaḏaama la mac, muŋw gwu kinna eḏi kwɔmne tatap; 2 lakin eṯuŋw nani ki rii-na reḏi kla leṯaŋraci, na reḏi liwakiil mindaŋ ma lomur ila likitaḏi li ṯernyin. 3 a kwirir ṯaŋwu; kinna urir gwu nyor nyɔkwɽeny ner ruzi nyuŋwuzi kaka luway, ilŋiiḏiner nyji gwu ŋeḏi rigɽim reḏi ṯurmun. 4 lakin ma lomur ṯimayini dap, na Allah uza Toru tuŋwun, timɔ kwaw elŋe, timer elŋe eḏi miḏa kuruu tɔk, 5 eḏi zi liṯa kla linani ki rii-na reḏi kuruu, mindaŋ er nyji ruzi nyuŋwuzi nyor ṯiɽuna ṯi. 6 na kaka ur ŋa gwu nyor, Allah wumɔŋazi uzica Ṯigɽima ṯeḏi Tor tuŋwun ki rugwor-na reri, ṯeṯaruŋw: Abba, Papa! 7 ṯaŋwu, ṯugwor ṯi ṯeḏi Allah, er ere ruzi ŋaŋwu kaḏaam kwokwony mac; a kwumorɔ tor, na ur ŋa gwu tor ta, a afi ŋoru tɔk.
buuluz kwuturecazelu lir likwruztyan eḏere aɽa kwaḏan gi mac
8 kerreny iti ilŋiiḏi ŋa gwu Allah wir yilim mac, na nani ki ŋuway-na ŋeḏi libayil liti lir yilim rerem mac; 9 lakin kirem, kaka ilŋiiḏi ŋa gwu Allah, ya, kaka ma ŋazi gwu Allah elŋe, a lɔḏɔ linaŋna eḏaɽiḏa kwaḏan gi ki ŋiɽaŋal-na ŋajila, ŋiti ŋeḏi fayḏa-na kwere mac? a linaŋna eḏorɔ luway kwokwony leḏi libayil a? 10 ŋaŋa leṯi miḏa əḏya weḏi ŋwamin, yowa yi, na ŋwomur ŋi, yiḏla yi-na tok. 11 nyi ŋgwu kwuṯinya ŋiɽaŋal ŋi ŋu ŋeni ŋalu, menyi gwu aki ŋɔḏɽor daŋgal-na ŋiira fayḏa-na.
12 lieŋgeri, nyi kwuturecaŋazelu tur, eḏorɔ kaka nyuŋwu kaka menyi gwu orɔ keni kaka ŋaŋwuzi. ŋiti ŋimernyji errizi ŋere ŋiki mac. 13 a limelŋe rac, kinaŋw kaka umi nyi gwu ta, na ŋazi andaci kerreny ŋiɽaŋali ŋizaw ŋir injiil. 14 mindaŋ nani gwu kimeṯ kaŋna-na winyi, na ŋazi ŋiɽaŋal urreḏa-na rac, lakin na ere dirnaḏa nyuŋwu lu mac, ya eḏi ruzi nyuŋwu luŋw tɔk mac; ner nyi enji daŋgal-na kaka maleyka kweḏi Allah, kaka ta Kwruztuŋw kweni Yecu. 15 ṯinyiŋlana ṯimele ṯaka kḏa ṯeḏi ŋa ṯeni nyi? nyi kwunḏizi ŋaŋwuzi ki, eŋgorɔ leḏi ŋuma, eŋgi nyi ellici yey yalu, eŋginyji inḏeḏa. 16 ta nyi kwumorɔ ṯuwən ṯalu kaka ma ŋazi gwu andaci ŋiɽaŋali ŋir rerem a? 17 kla leṯi dedi ŋaŋwuzi, eṯir zi erri ŋu ŋiɽaŋal ŋi ŋiti ŋofḏana mac. eṯir naŋni eḏi uɽeḏa ŋaŋwuzi-na mindaŋ mezi kwaḏiḏa. 18 ŋeni ŋofḏana rac mer naŋni eḏi dedi ŋaŋwuzi ŋiɽaŋal ŋi ŋizaw; ŋinaŋnanyji eḏizerri ŋu, ner ere orɔ ṯuɽuk mac nani nyi ŋaŋa li. 19 kwelle kwinyi, ŋijma ŋeni ŋalu ŋu ŋiyaḏinyji kwokwony mindaŋ ma Kwruztu miiḏi ki rugwor-na ralu minmin lere lere. 20 nyi ŋgwu kwunaŋna beṯe-beṯen eḏi nani ŋaŋa li kire-kirem ŋgwu, na eḏi urli ṯɔgwɽɔ ṯinyi, kaka eni nyi gwu kwapiri ṯugwori ṯeni ŋaŋa.
ŋiɽaŋal ŋete ŋedi ṯikitaḏiga ṯuɽun
21 andicar nyi ṯi, ŋaŋa leṯinaŋni eḏaɽiḏa ki rii-na reḏi kuruu, a liti liniŋna kuruu mac, a? 22 kaka luḏinar gwu ŋeni ŋwu: ibrahiim kweḏi nyoru nyiɽen, tete tilŋiiḏi kwaw kwir kwuway, na tete tilŋiiḏi kwaw kwir hurr. 23 na tor teḏi kwaw kwir kwuway ner ilŋiiḏa ŋelŋe ŋi ŋir kaka ŋeḏi lizi, lakin na tor teḏi kwaw kwir hurr, ner ilŋiiḏa ṯikitaḏa ṯi ṯeḏi Allah. 24 ŋinderṯa ŋeḏi maana, ur gwu law klu kaka ṯikitaḏiza ṯiɽen. ṯete, nuŋw orɔ ṯeḏi ayin weni ziinaa, ṯeṯelŋe kwelle kweḏi ŋuway. haajar kwiri ṯa ŋgwa. 25 na haajar eni ayin weni ziinaa, wunani arabiya, nuŋw aɽani urzaliimŋw kweḏi kirem, kaka nanuŋw gwu ki ŋuway-na kwelle gi kwuŋwun. 26 lakin na urzaliim kwunani kilerena kwiri hurr, nuŋw orɔ kwir aya kweri. 27 kaka luḏinar gwu:
eti nyeŋlena, ŋa kwir kworum, kwiti kweḏi ŋuma eḏi ŋi elŋe mac;
upuna kwola gi kweḏi ṯinyiŋlana, ŋa ŋgwa kwiti kwiyaḏi ŋijma mac;
kaka eḏuŋw gwu ŋgwa kwumer ṯayi lu kwelle kwuru
eḏi ŋgwa la kweḏi kwulen.
28 na kirem, lieŋgeri, a kwirir kwelle kweḏi ṯikitaḏa, kaka izhaagŋw. 29 lakin kaka ki lomur ṯa kla, kra timer ilŋiiḏa ŋelŋe ŋi ŋir kaka ŋeḏi lizi, eṯuŋw owɽi yey kra timer ilŋiiḏa ŋiɽaŋal ŋi ŋeḏi Ṯigɽim ṯirlinelu ter; ner orɔ ṯaŋwu kirem. 30 lakin na ŋiɽaŋal ŋuluḏina ŋari ḏa? urte kwuwaya kiṯay tor ri tuŋwun; kaka iti inḏi gwu tor teḏi kwuway eḏoɽmaṯi ŋoru-na tor ri teḏi kwaw kwir hurr mac. 31 ŋwu ṯa, lieŋgeri, a kwiti kwirir nyor nyeḏi kwuway mac, lakin nyor nyeḏi kwaw kwir hurr.