Ǝthoro ǝsikǝr wisaaw wǝthi Kwɔrɔstɔ kwǝni Yǝcu.
1 Nǝ ŋa tǝ, tɔr tiinyi, firlli tetter, ne@ma-gi ŋgwa kwǝthi Kwɔrɔstɔ kwǝni Yǝcu. 2 Nǝ ṯa@liim kitha ṯiniŋnaŋa naaniny-gwɔ kiyǝnǝ yǝthi shuhuuḏ kwittǝzir, ǝsi ǝccici wǝkilǝ kila lirllalɔ lǝthi ŋɔma tok ethisi ǝccǝ lithaathɔ @allima. 3 Indinyanna ṯurvǝ naana, kaka ǝsikǝrǝ wisaaw wǝthi Kwɔrɔstɔ kwǝni Yǝcu. 4 Ǝsikǝr witi weere mac wǝṯi naŋni ethǝmi gaayiḏa-na kuuŋun, mindaŋ ethimaaɽi ethi ɔnḏi kiyǝnǝ kwokwony kwɔro-kwɔrop ŋothɽor-ŋi ŋǝthi rogɽo ruuŋwun. 5 Ŋgwa kwǝṯi kalmiṯathi kwiti kwǝthi ŋɔma ethaavi taŋgiŋi tir haḏiiyyǝ mac, illi mɔŋw mithǝ gaanuunǝ ŋǝmmǝŋ kǝthi ṯigalmiṯatha. 6 Ŋgwa kwǝṯi akkɔ ŋɔrɔŋ tig-tig, kwundǝr-pǝ kwǝŋgi aavi lɔɔɽɔŋi lǝthi ṯɔrɔny kerreny. 7 Aari fǝkirǝ ŋiɽaŋal-ŋi ŋɔ ŋandica-ŋǝsi, kaka ninḏiŋǝ-gwɔ Kweeleny ethinḏǝthǝ ŋɔma ethisi elŋe tatap.
8 Ǝṯi kithaayini Yǝcu Kwɔrɔstɔ-ŋw kwidiiɽǝr ki-ŋiɽany-na, kwuruuthu ki-ṯɔvɔɔ ṯǝthi Ḏaawḏ-ŋǝ, kaka-ṯǝ ŋa ŋaariny-ŋi bǝshirǝ Inyjiil-yi wiinyi. 9 Nǝ kaka naari-nyii bǝshirǝ Inyjiilǝ, nǝnyii-mǝ kaṯṯasi ṯurvǝ, mindaŋ ninyǝni kwukǝkkinǝ kirem ŋwɔɔɽɔŋw-ŋi, kaka ŋgwa kwǝṯisi ǝrri ŋigii, laakin ŋiɽaŋal ŋǝthi Allah tǝ, ǝṯireere kǝkkini ŋwɔɔɽɔŋw-ŋi mac, 10 Ŋwɔṯaŋw nǝnyii indinyanni kwomne naana tatap, ŋiɽaŋal-ŋi ŋǝthi lizi lǝthi Allah kila liccarsi-na, mindaŋ mǝr kaṯṯasi ŋundu-ŋǝ tok ŋiglǝthǝ ŋinḏi ethiila Kwɔrɔstɔ-ŋgi kwǝni Yǝcu, nǝ ŋinith-ŋi ŋǝṯi nannitha dok-dok. 11 Ŋiɽaŋal ŋɔ ŋidǝr-ṯǝ ŋir rerrem ŋǝniŋw:
“Mǝrǝni limǝ ai ŋundu-ŋi tǝ,
ǝri mithǝ ŋundu-ŋi tok;
12 Nǝ mǝr-tǝ aari isṯimir linḏa ṯurvǝ,
ǝri mithǝ ŋeelenyi ŋundu-gi.
Mǝr ǝvrinni ŋunduŋw tǝ,
ŋwɔ ǝvrinni nyuŋwsi tok.
13 Mǝroro lizi lir khaayiniin,
ŋwɔtǝ nannitha ŋundu kwirllalɔ,
kaka niti nǝthi ŋgwɔ ŋɔma mac
ethi ǝvrinni rogɽo ruuŋwun.”
Khaḏaam kir rerrem kǝthi Kwɔrɔstɔ.
14 Kkhǝymǝsi ŋiɽaŋali ŋɔ, ǝsi ulici tig-tig kiyǝnǝ yǝthi Kweeleny, etheere ɔppɔpathalɔ mac kandisa-gilɔ kǝthi riŋla, kiti kǝṯi aava faayitha kweere mac, laakin ǝṯɔŋw kǝniny kiyaasi lizi-lɔ rerrec kila lǝṯi akkaci kizǝn. 15 Ɔnḏɔ kiyǝnǝ kwɔro-kwɔrop ethi ɔvthanni kiyǝnǝ yǝthi Allah, ethoro kaka @aamil witi wǝṯi ṯɔrony mithǝ mac ethǝkkici ŋunduŋw ŋothɽor, ethoro kaka kwette kwǝṯi aari @allima ŋiɽaŋali ŋǝthi Allah ŋir rerrem ŋǝmmǝŋ. 16 Tuccǝ ṯɔppathalɔ-na kithaay tuk ṯir ŋǝɽiyǝŋ, kitha ṯǝṯi rutti lizi kithaay tuk naanɔ-gwɔ Allah. 17 Ṯa@liim ṯɔrɔŋw ṯir kaka kǝɽiyǝ kǝṯi ṯilathi. Nǝ Hiimiinaayus-ŋǝ Fiilliiṯus-gi oro kila linaanɔ deŋgen-na. 18 Lǝni limǝ ɔrlacci ṯaay ṯir rerrem ŋwɔdoŋw, mindaŋ nǝr ruunyuni ṯǝmminǝ ṯǝthi lɔgrɔstiyan lokwo, nǝṯir-gwɔ aarɔŋw ṯidiiɽǝ ki-ŋiɽany-na ṯimǝ ṯamthɔ kerreny tuk. 19 Laakin ṯɔgwagiza kitha ṯifirlli Allah ṯiti ṯǝthi ŋɔma ethi riiginnǝlɔ mac, nɔŋw lothone ŋiɽaŋali naana ŋǝniŋwɔ: “Kweeleny kwilŋithi lizi kila lǝni luuŋwun”, nǝ “Kweere nyithak kwǝṯaarɔŋw nyii kwiri kwǝthi Kweeleny, laazim ŋwɔrlacca ŋikiyaŋi ŋuuŋun ŋwɔdoŋw.”
20 Ki-dɔɔnɔ kwɔppa ŋiɽaŋali, ǝṯi kwomne ere naani kwir dahab-ŋǝ fiḏḏa-gi ṯɔɽɔk mac, laakin ǝṯi yɔmbɔr-ŋǝ kwomne-gi kwǝṯir ṯoo kwǝthi kɔlɔɔ, nɔŋworo kwokwo kwǝthi ŋothɽor ŋɔppa, nǝ kwɔthaathɔ kwǝthi ŋothɽor ŋǝṯǝrrini dok. 21 Mɔŋw suuɽi kweere rogɽo ruuŋwun kwomne-na ŋgwa tatap kwigii, ǝri ruusi kwǝthi karath ŋga-ṯa kir tittir, kaka mɔŋgwɔ ǝllini ethoro kwɔvthannica Sǝyyiḏ-ŋwɔ kwuŋwun, kwɔnanyja ŋothɽor-lɔ ŋisaaw cɔgwo-cɔgwop. 22 Arṯathi kadɔwalɔ kǝthi ŋaamal, mindaŋ a kwakithatha ŋirllalɔ, ṯǝmminǝ-thi, na ṯamɽa-ŋa ŋiipǝnnǝ-ŋi lizi-li kila lisɔɔɽɔ rɔgwor-na, lǝṯi ɔrnɔṯi Kweelenyi ethisi mǝcci. 23 Laakin a rucci ṯɔppathalɔ-na kinǝŋgwu tuk, kitha ṯir kwenyjer domony; ṯǝṯi aava ŋǝriyǝ. 24 Laazim ethi khaḏaam kǝthi Kweeleny ere oro kwǝriyǝ mac, laazim ŋwɔthici lizi tatap ŋimɽiyǝ-nǝ, ŋworo mɔ@allim kwisaaw, kwǝṯisi indinyanni naana. 25 Kwǝṯi thee jiɽeem mɔŋwɔi tatti kila liti leṯaami ele-ŋw ŋundu-gi mac, kimanni-pa ya ǝsi Allah inḏǝthǝ fɔrsa kwǝthi-gi urlǝ rɔgwor-lɔ mindaŋ mǝrsi elŋe ŋa ŋir rerrem. 26 E-ta ǝri-mǝ aaɽitha rogɽo naana reeŋen, mindaŋ mǝr arṯitha kerllenyi kǝthi Ibliis wa wiithǝ ŋunduŋwsi, mindaŋ nɔŋwsi duŋgwǝci ethisi rɔɔmi ŋǝthi ṯɔgwor ṯuuŋwun.
aza 2
1 ṯa ŋwu, tor tinyi, eṯi ferle teter ki ṯimeca-na ṯeḏi ŋimɽi ṯeṯinani eḏi Kwruztu-na kweni Yecu. 2 ŋiɽaŋal ŋa ŋiniŋnaŋa zi nani nyi gwu ki yey-na yeḏi lizi luru, e zi inḏeḏa kla leni lirlalu, leḏi ŋuma tɔk eḏi zi ilŋiiḏjni lir ter. 3 eṯi keni emni eḏi indinyani ṯurfa nana kaka orṯa wizaw weḏi Yecu Kwruztu. 4 kwende kwere kwir orṯa ki ṯuwənu-na, kweṯi kəkini ŋɔḏɽor ŋi ŋir ter ṯugwor ṯi ṯuŋwun? eṯuŋw naŋni eḏəmi-na ŋgwa kwumenji ŋunduŋwu eḏorɔ orṯa. 5 kwete kweṯi kalmiṯaḏi kwiti kweṯafi taŋgiŋi tir haḏiya illi muŋw ketize nizama yey kweḏi ṯikalmiṯaḏa. 6 na kwizi kweṯaki ŋuruŋ ŋima ŋi, eṯuŋw orɔ kweŋgi nyeŋle kwɔmne kweḏi ṯuruny kerre-kerreny. 7 ṯece zi ŋu ṯugwor ṯi ŋandicaŋa zi ta, a ŋa ma Kweleny inḏeḏa ŋuma eḏi ŋi elŋece ŋiɽaŋali tatap.
8 ṯiŋayine Yecuŋw Kwruztu, kwudiɽi ki ŋiɽany-na, kwuruḏi eḏi dauḏ-ŋa. ŋinderṯa ŋir injiil ŋeṯinyji andindaci. 9 ŋiɽaŋal ŋi ta ŋu, nenyi indinyani ṯurfa nana bɽe-bɽeṯ. na kineni nani nyi kwukəkine ŋwuruŋw ŋi kaka kwizi kweṯizerri ŋeni ŋiki, lakin ta, na ŋiɽaŋal ŋeḏi Allah ere kəkini ŋwuruŋw ŋi mac. 10 eṯi nyi kwormaṯazi ṯugwori kwɔrɔ-kwɔrɔp ŋiɽaŋal ŋi tatap ŋeḏi kla lornuṯi zi Allah, mindaŋ mer kaṯazi ŋunduŋa tɔk ŋigileḏa ŋeṯinani eḏi Kwruztu-na kweni Yecu, ŋiniṯ ŋi ŋeṯinanniḏa dɔk. 11 ŋiɽaŋal ŋu ŋiri rerem:
mer eni limay nyiŋa ŋundu gi, er miiḏi ŋundu gi tɔk.
12 na mer kwoɽmaṯazi rugwori kwɔrɔ-kwɔrɔp ta, er li oɽmaṯi ki ŋeleny-na ŋuŋun.
mer nyindini ŋunduŋwu, kwenyji nyindini ŋundu tɔk.
13 mer orɔ kinna rugwor-na riɽen riɽen, ŋundu ta etuŋw ta nannida kwirlalu ŋwamin dɔk.
kwiti kweḏi ŋuma mac eḏi ṯirenje tay lu tuŋwun.
ṯireca ŋupaḏa lu nana
14 eti zi tiŋayinici ŋiɽaŋali ŋu, na eti zi oraci ki yey-na yeḏi Allah, eḏere upaḏa lu ŋiɽaŋal ŋi ŋu mac, ŋiti ŋeṯi zi meci mac na eti zi kiici kla ŋiɽaŋali leṯi zi neŋne. 15 eti deŋṯini eḏinḏeḏa Allah rɔgwɽɔ rɔŋwa kaka kwete kweṯəmi ŋunduŋwu-na, kwir kwɔḏɽor kwiti kwinḏi eḏi turony ye mac, kweṯizandaci ŋiɽaŋali ŋir rerem kaka kwete kwirlalu titir. 16 eṯorlaci kenjera tatap ŋwudɔŋw, kiti keṯi nii Allah-na mac, kinḏi eḏi mulɔtɔ lizi mindaŋ e ri durni Allah tuc. 17 na ŋiɽaŋal ŋeŋen ṯilaḏi kaka kəma. linderṯa lir nden, himinaayiz-ŋa filiituz ŋali, 18 limɔ ṯirenje ŋiɽaŋali lu ŋir rerem, arir gwu ŋwu, ṯidiɽa ṯeri ṯimɔ ṯamḏu. mindaŋ mer zi ŋi ejilici lɔkwɔ ṯəmna. 19 lakin eti ṯugwagiza ṯifirli ṯeḏi Allah ami nanuŋw, ṯiluḏina ŋwuli nana ŋwir ŋwu: eṯi zi Kweleny elŋece kla leni luŋwun, na kwokwony ŋwu: kla leṯandazi yiriny yeḏi Kweleny, eḏir ruci ŋikyaŋi-na tuk.
20 ki duənu kwupa ŋiɽaŋali, er ere kaṯazi kwɔmne kweḏi ḏahab na faḏḏa ṯuɽuk mac, lakin na kweḏi yumbur mindaŋ na kweḏi kullu tɔk; kwɔkwɔ kweḏi ŋɔḏɽor ŋupa, na kwɔkwɔ kweḏi ŋɔḏɽor ŋuruŋwa. 21 ma kwere zuɽi rɔgwɽɔ-na ruŋwun ŋiɽaŋal ŋi ṯa ŋa, ŋworɔ kwete kweḏi ŋɔḏɽor ŋupa, kwirlinelu ter, kwofḏana kweḏi ŋɔḏɽor ŋeḏi Kweleny, kwunanalu cugwɔ-cugwɔp eḏerri ŋɔḏɽor ŋete nyiḏak ŋizaw.
22 arṯaḏi kaduwa lu keḏi ŋamal mindaŋ a kwakiḏa ṯofḏana, na ṯəmna, na ṯamɽa, na ŋiɽena, lizi li kla leṯari Kwelenyi ki yiriny rugwor ri rizuɽu-na cucuɽic. 23 lakin tuce ŋiɽaŋali-na ŋir kwajal domony kwir ŋiḏyaki, kaka ilŋiicaŋa gwu wuɽe-wuɽeny eḏaruŋw, ŋiɽaŋal ŋu ŋeṯi mi enji ŋerya. 24 na kwir kaḏaam keḏi Kweleny ŋwere ofḏani mac eḏi eḏiḏa lizi ŋerya nana, ner ofḏani duŋgwun eḏeni kwumeca ki lizi-na tatap, muallim kwizaw, kwindinyanizi nana, 25 kwir kwiɽena na kwiḏi ṯugwori jiɽem eḏi zi dandimaci kla ŋiɽaŋali ŋeṯir zi upupuḏaci ŋunduŋwu lu. na kezni ezi Allah urlica rugwori lu mindaŋ mer zi elŋe ŋirlalu ta, 26 er kilaḏa difa kweḏi ibliiz kweṯuŋw zi gi ummi eḏizerri ṯugwor ṯi ṯuŋwun.