Tirany-ŋǝ lizi-li luuŋwun.
1 E-ta mǝnyii dimmǝ yǝy ninyeese Tiranyɔ tirllɔ Kaayin-la wǝni Sihyɔɔn; nǝr naani lizi-li lir miiyyǝ arba@ wa arba@iin alf lǝthi yiriny yuuŋwun nǝ yǝthi Ṯǝrnyin tok, yɔlɔɔthɔna ki-yuthul-lǝ yeeŋen. 2 Nǝnyii neŋne ṯogɽo ki-leere-na ṯir kaka kwuurunnǝ kwǝthi ŋaaw ŋuuru, nǝ kwir kaka kwuurunnǝ kwǝthi leere lɔppɔna. Nǝ ŋwal ŋwuuŋwun aaɽanni ŋwal ŋwɔthi lumbǝrǝ lǝṯirsi ǝrii. 3 Nǝr kette ṯilŋa ṯiyaŋ kiyǝnǝ yǝthi kwɔrsi kwǝthi ŋeeleny, nǝ kiyǝnǝ yǝthi haywaanaaṯ wɔmiithɔ wir kwaɽiŋan, nǝ kiyǝnǝ yǝthi lishiyuukh tok. Nɔŋweere kweere mac kwǝthi ŋɔma ethi elŋe ṯilŋa kitha, illi lizi kila lir miiyyǝ arba@ wa arba@iin alf, kila limǝ-ŋwsi kilǝthi ki-ṯurmun-nǝ. 4 Nǝṯǝ lizi oro kila, liti ludugɽuthu layɔ naana mac mindaŋ etheere ruuŋwi rogɽo reeŋen mac, linaanɔ-tǝ kinnǝni mothmoṯ. Lindǝr-ṯǝ kɔlɔ lǝṯi rɔɔmi Tirany-lɔ kǝzir wette nyithak wǝṯi-ŋgwɔ ele. Nǝrṯoro kɔlɔ limǝrsi kilǝthi ki-lizi-nǝ, ethoro ŋwɔɔla ŋwiŋna ŋwɔthi Allah-ŋa Tirany-ri. 5 Liti lalɔ kǝkki ŋǝluŋi ḏuṯ; wala ethǝthi fǝthiyǝ-nǝ kweere.
Limeleka lir ṯoɽol.
6 E-ta ninyeese meleka kwɔthaathɔ kwidiiɽu ki-leere puc-puc, Inyjiil-yi wǝṯi nannitha dok-dok, ethisi andaci kila linaanɔ kwurǝyu-lu, umam tatap, yǝbiilǝ mindaŋ, riŋla mindaŋ, nǝ lizi tatap tok. 7 Nɔŋwaarɔŋw ṯogɽo-thi ṯɔppa-ŋwɔ, “Iiɽǝr Allah-na nǝ a-nii ŋunduŋw-nǝ! Kaka mǝgwɔ saa@ kwuuŋwun iila kwǝthi-gi ǝccǝ lizi haakima. Kwɔccar-lɔ ŋgwa kwɔgitta leereya, wurǝyuŋi, nǝ bahar-ŋǝ ruwǝ-ri rǝthi ŋaaw!”
8 Nǝ meleka kwir nimrǝ kwuɽǝn kwaathitha ŋgwa kwiŋna ŋɔŋwaarɔŋw, “Baabil kwɔmǝ iidi! Baabil ŋgwa kwɔppa ŋɔɔrɔ kwɔmǝ iidi! Ŋgwa kwuduŋgwǝcǝ lizi tatap ethi ii kiɽicaŋi kuuŋun, kǝthi sɔɔrɔm kwǝthi ŋiijin ŋuuŋun!”
9 Nǝsi meleka kwir nimrǝ ṯoɽol kwaathitha kila lǝthi kerreny-ŋwɔ lir ndǝn, nɔŋwaarɔŋw ṯogɽo-thi ṯɔppak, “Mɔŋw kwocce kweere haywaana-lɔ nǝ suurǝ kwuuŋwun tok, mindaŋ mǝr uɽuci @alaama kuthul-lǝ kuuŋun, ya ki-thii ṯuuŋwun tok, 10 ŋwii ŋundu tok kiɽicaŋi kǝthi ŋirŋasa ŋǝthi Allah, ŋga kibalsaŋw ŋɔmaŋi-na tatap ki-tiṯiraŋ-na tǝthi ŋǝryǝ ŋuuŋun! Nǝ kila tatap lǝsi ǝrri ŋɔ, ǝri kaṯṯasi ṯurvǝ ṯǝthi iigǝ-ŋǝ kibriiṯ-gi, kiyǝnǝ yǝthi limeleka lirllinǝlɔ ter, nǝ yǝthi Tirany tok. 11 Ǝṯi kwuulu kwǝthi iigǝ wa winḏǝthǝsi ṯurvǝ kwuɽuttǝthi dok-dok. Nǝ kila lǝṯi kwogwɔcce haywaana-lɔ nǝ suurǝ-lɔ kwuuŋwun, lǝthi @alaama wǝthi yiriny yuuŋwun, ǝreere kaṯṯɔ wǝŋ mac yaaŋwɔnɔ yulŋǝ tok.”
12 Nǝrṯoro ŋɔ ŋǝthi ṯindinyanna naana ṯǝthi lizi lǝthi Allah, kila lǝṯi iinyici awaamira naana wǝthi Allah, nǝ ṯǝmminǝ tok ṯǝthi Yǝcu.
13 Nǝnyii neŋne ṯogɽo ki-leere-na ṯaarɔŋw, “Luuthusi ŋɔ ŋǝniŋw: Lɔrtanni kila linḏi ethi ai ki-ŋothɽor-na ŋǝthi Kweeleny!” E-ta nǝ Ṯigɽim ǝŋnici nɔŋwaarɔŋw, “Aaw rerrem! Linḏi ethi nyeŋlena kaṯṯɔ-ŋgi wǝŋ ki-ŋothɽor-na ŋeeŋen ŋifirlli, kaka nǝṯi-gwɔ ŋothɽor ŋeeŋen oro shuhuuḏ kweeŋen.”
Hɔkwɔm wirimthithɔ wǝthi ṯurmun.
14 Mǝnyii dimmi yǝy, ninyeese leblethi lifiithɔ, nǝ ŋgwa kwɔnaanɔ ki-lebleth-la, nɔŋwaaɽanni kwizigwunǝŋi, kwɔginna taŋgiŋi tǝthi ḏahab ki-nda-la luuŋwun, nǝ nɔŋw appi kwaabira kwiiranna ki-thii-na. 15 E-ta nǝ meleka ruuthǝ kwɔthaathɔ ki heikal-na, nɔŋw ɔrnɔṯi meleka ŋgwa kwɔnaanalɔ ki-lebleth-la ṯogɽo-thi ṯɔppa nɔŋwɔccǝŋw, “Ǝɽi, ɔni kwaabir-gi kwɔɔŋa, kaka mǝgwɔ lɔɔmɔr ɔppatha limǝ-li ṯurmun rattathi ethi ɔni kithaay!” 16 Nǝ ŋgwa kwɔnaanalɔ ki-lebleth-la kaṯṯa kwaabira kwuuŋwun ki-ṯurmun-nǝ, mindaŋ nǝ ṯurmun ununni kithaay.
17 Ninyaaɽi ninyeese meleka kwɔthaathɔ kwokwony kwuruuthu ki heikal-na ki-leere-na, nɔŋwɔthi ŋundu tok kwaabira kwiiranna. 18 Naaɽi nǝ meleka kwir ter ruuthǝ ki-ŋwɔthgwun-nǝ, ŋgwa kwǝthi ŋɔma ki-iigǝ-lǝ nɔŋw ɔrnɔṯi meleka ŋgwa kwɔppa kwaabira kwiiranna ṯogɽo-ṯhi ṯɔppa nɔŋwɔccǝŋw, “Ǝɽi a dimmi kwaabira kwɔɔŋa ǝgi uɽu rill ririiɽɔ @ineba wǝthi kwaaɽi kwǝni kǝrǝm ki-ṯurmun-nǝ, kaka mǝŋwɔ @ineb ɔrii!” 19 E-ta nǝ meleka kaṯṯa kwaabira kwuuŋwun ki-ṯurmun-nǝ, nɔŋw unduthǝ @ineba kǝrǝmǝ naana, e-ta nɔŋwsi kaṯṯɔ kǝzir wɔppa wǝṯirsi-gwɔ tundǝthǝ wir ǝzir wǝthi ŋirŋasa ŋǝthi Allah. 20 Nǝr ṯundǝthǝ @ineba kǝzir wǝṯirsi-gwɔ tundǝthǝ parŋgala kwǝthi mǝḏiinǝ, mindaŋ nǝ ŋin ruuṯhǝ kǝzir wǝṯir-gwɔ tundǝthǝ kiɽicaŋi, nǝr ruuthǝ kaka kiiru kinḏi tuk kaka miilǝ ruɽi-wrii, nǝ ŋwaara ṯɔthni kuṯṯǝlɔ-ŋgi.
aza 14
Tirany na lizi limɔŋw zi alla ki ŋuway-na ŋeḏi ŋikya, ŋin ŋi ŋuŋun
1 na menyi dimi yey ta, nenyeze Tiranyu tirli kayin la weni ziyuun, lizi li litezir lir miya-wa-arba-wa-arabayiin alif, lir 144,000, leḏi yiriny yuŋwun na yiriny yeḏi Ṯernyin yuluḏina ki yuḏul la yeŋen. 2 nenyi neŋne ṯɔgwɽɔ tete tiruḏi kilerena, tir kaka kwurna kweḏi kiiru, na tir kaka lere muŋw upuḏina ŋuma ŋi, ŋuma ŋi; na ṯɔgwɽɔ ṯiniŋnanyi ṯir kaka kwurna kweḏi lizi mer əri lumbəra, 3 ner kete ṯilŋa ṯiaŋ ki yey-na yeḏi kwurzi kweḏi ŋeleny, na ki yey-na yeḏi kwɔmne ŋgwa kwumiiḏu kwir kwaɽŋan, na ki yey-na yeḏi lijowiṯ. nuŋw ere kwere mac kweḏi ŋuma eḏelŋe ṯilŋa kḏa illi kla litezir lir miya-wa-arba-wa-arbayiin alif, lir 144,000, kla limerzi alla ki ŋuway-na ŋeḏi ŋikya ki ṯurmun-na. 4 linderṯa kla liti limezerri ŋir ŋijin law li mac, kaka urir gwu lizuɽu-na cucuɽic. linderṯa kla leṯi kwaḏiḏa Tiranyu kezir wete nyiḏak wilaḏuŋw gwu; linderṯa kla limɔŋw zi alla ki ŋuway-na ŋeḏi ŋikya eḏorɔ ŋwola ŋwiŋna eḏi zi inḏeḏa Allah na Tiranyu, 5 ner zi ere inḏaci ŋəluŋi ŋere mac kworɔ-na kweŋen, kaka iti eḏir gwu tiɽaŋali-na tere tiki mac.
limaleyka lir tɔɽɔl
6 nenyeze maleyka kwete kwir ter kwudiɽiki lere keligeny-na, ŋiɽaŋal ŋi ŋizaw ŋir injiil ŋeṯinanniḏa dɔk, eḏi zi ireci kla linani ki ṯurmun-na, leḏi ŋeleny tatap ŋir-na ter ter, na leḏi yabiila tatap yir-na ter ter, na leḏi kandiza kir-na ter ter tɔk, lizi ndendeṯ. 7 nuŋw ari ṯɔgwɽɔ ṯi ṯupa ŋwu: ṯinyar Allah, a nii ŋunduŋwu-na, kaka ma gwu lomur leḏi zeyria kwuŋwun ila; eṯi kwoce ŋunduŋwu lu kwudaɽmaḏi lerya ŋwuzi ureyu yi, na ṯujuli ṯupa, le li leḏi ŋaw.
8 na maleyka kwir ter, kwir nimra kwuɽen, kwaḏiḏa kwaruŋw: baabil, kwir meḏiina kwupa, kwumiidi, kwumiidi, kaka muŋw gwu efrici lizi eḏoɽmaṯi ŋunduŋali ki ŋijin-na ŋuŋun.
9 na maleyka kwaḏiḏa, kwir nimra ṯɔɽɔl, kwari ṯɔgwɽɔ ṯi ṯupa, ŋwu: muŋw kwoce kwere kwɔmne lu ŋgwu kwumiiḏu kweḏi ŋerya, zura gi kwuŋwun tɔk, mindaŋ muŋw emni nimra kwuŋwun kuḏul la, ya ki ṯii la ta, 10 ŋwu ii tɔk nabiṯa kwir ŋirŋaza ŋeḏi Allah ṯar, ŋibalḏalu ki tiṯra-na tir ŋarriny ŋuŋun, ŋwu inḏini tɔk ṯurfa igə yi kibriṯ gi, ki yey-na yeḏi limaleyka lirlinelu ter, na ki yey-na yeḏi Tirany. 11 na eṯi kwulu kweḏi ṯurfa ṯeŋen ruɽi dɔk dɔk; eṯir ere keṯini wəŋ mac, yaŋwunu yuluŋa, klu leṯi kwoce kwɔmne lu ŋgwa kwumiiḏu kweḏi ŋerya, zura gi kwuŋwun, na kla leṯemni ŋwuli ŋweḏi yiriny yuŋwun.
12 ŋiɽaŋal ŋu ŋeṯornuṯi lizi lirlinelu ter eḏi kwurmɔṯani, kla leṯi miḏa kuruu keḏi Allah, na leṯalliḏa Yecuŋw rugwori nana ṯəmna ṯi.
13 nenyi neŋne ṯɔgwɽɔ ṯiruḏi kilerena, ṯaruŋw: luḏi zi ŋwu, kla linḏi eḏay eḏi Kweleny-na leni lortani tuc. na Ṯigɽim ṯirlinelu ter aruŋw: emba, leni lortani rerem, kaka eḏir gwu ŋuma eḏala ŋɔḏɽor ŋeŋen rii eḏi keṯini wəŋ, kaka eṯi zi gwu ŋa ŋimerzerri kwakiḏaḏa lu.
ṯuna ṯupa ṯeḏi ṯurmun
14 nenyi dimi yey nenyeze lebleṯi lifiiḏu pər pər, na ŋgwa kwunani gwu la, nuŋw aɽani Toru teḏi kwizigwunaŋ, kweḏi taŋgiŋi ṯir ḏahab kindala, nuŋw eḏi ki ṯii-na ṯuŋwun kwabra kwirana tiyə-tiyək. 15 na maleyka kwir ter ruḏa ki heykal-na, nuŋw ornuṯi ṯɔgwɽɔ ṯi ṯupa ŋgwa kwunanalu ki lebleṯ la, nuŋw eca ŋwu: ṯiŋaḏi kwabra kwɔŋwa, a uni, kaka ma gwu lomur leḏi li uni rataḏi, na ṯuna ṯeḏi ṯurmun ṯimayini eḏuni. 16 ŋwu ṯa, na ŋgwa kwunanalu ki lebleṯ la ṯiŋaḏa kwabra kwuŋwun ki ṯurmun-na, na kwɔmne kweḏi ṯurmun unini.
17 na maleyka kwir ter ruḏa ki heykal-na wunani kilerena, kwapa kwabra tɔk kwirana tiyə-tiyək. 18 mindaŋ na maleyka kwir ter ruḏa kezir-na weḏi ŋweḏgwun, ŋgwa kweḏi zulṯa kweḏi igə, nuŋw ornuṯi ŋgwa kwapa kwabra kwirana ṯɔgwɽɔ ṯi ṯupa, nuŋw eca ŋwu: ṯiŋaḏi kwabra kwɔŋwa, a gi aɽazi nyoru duŋw nyeḏi kwaɽi kweni eynab ki ṯurmun-na, kaka ma gwu nyor nyuŋwun ṯimayinici ṯuna. 19 ŋwu ṯa, na maleyka ṯiŋaḏa kwabra kwuŋwun ki ṯurmun-na, nuŋw aɽazi nyoru duŋw nyeḏi yaɽi yeni eynab, nuŋw zi kaṯu kezir weṯir zi gwu rundi wir ŋirŋaza ŋeḏi Allah; 20 ner ortɔl kwɔmne ŋgwa kweṯi rundi nyoru nyeḏi eynab meḏiina ṯoɽu ṯi la, na gwu ŋin ira-na ki lobi leḏi nabiṯ, ner dallu mindaŋ ner kaṯazi lijami leḏi mɔrṯa, ner irrelu ner ele tuk, kaka miila ruɽi-wri.