Wǝkiil wir khaayin.
1 Nǝ Yǝcu ǝccǝ ṯalaamiiza ṯuuŋwun-ŋwɔ, “Kwɔr kwɔnaanɔ kwette kwir kwɔrṯɔ, mindaŋ nɔŋwɔthi khaḏaama kǝṯi aŋraci kwomne kwuuŋwun. Nǝr andaci kwɔrṯɔwa ŋiɽaŋali ŋǝthi wǝkiil wuuŋwun wǝṯi ǝthvǝyini kwomne-lɔ ḏoozona. 2 E-ta nɔŋw ɔrnɔṯi nɔŋwɔccǝŋw, ‘Aatha kwɔr-ŋgwɔ kwɔniŋna-nyii kwǝni-ŋa? Nḏǝthǝ-nyii hisaaba wɔɔŋa wǝthi kwomne kwiinyi, kaka niti nǝthiŋǝ-gwɔ ŋɔma kwokwony mac ethoro wǝkiil wiinyi. 3 Nǝ khaḏaam aarɔŋw ki-rogɽo-na ruŋwun-ŋwɔ, ‘Sǝyyiḏ kwiinyi kwǝnyii rutti ki-ŋothɽor-na ŋiinyi. Aatha kwǝnyii ǝrri? Nyii kwende kwufirlli beṯṯen ethi kwuuralu, nǝ ǝnyii ṯɔrony yee tok ethi kittasi rii-la. 4 Ŋǝnyji kittatha ethisi ǝrri ŋɔ! Mindaŋ mǝ ŋothɽor ŋiinyi rilli tǝ, nyǝthi limathi linḏi-nyii ethi ǝmmini ki-dɔɔnɔ-na kweeŋen’. 5 Ṯaŋw nɔŋw ɔrnɔṯi lizi tatap kila lǝthir sǝyyiḏ-gi kwuuŋwun kǝmsu. Nɔŋw uṯicǝlɔ kwiŋna nɔŋwɔccǝŋw, ‘A kwǝthi kǝmsu tha sǝyyiḏ-gi kwiinyi?’ 6 Nɔŋw ǝŋnici nɔŋwɔccǝŋw, ‘Kwǝthinyii-gi libirmiilǝ ruɽi-ṯɔthni lǝthi ŋiila ŋǝthi zeiṯuun’. Nǝ wǝkiil ǝccǝŋw, ‘Hisaab wɔɔŋa wir wɔ, naanalɔ a lo ruɽi-riɽǝn-la wrii’. 7 Nɔŋwaaɽi nɔŋw uṯicǝlɔ kwɔthaathɔ kwokwony nɔŋwɔccǝŋw, ‘Nǝ ŋa tǝ kwǝthiŋǝ-gi kǝmsu tha?’ Nɔŋwɔŋnici nɔŋwɔccǝŋw, ‘Lisǝfiyǝ ruɽi-ṯɔthni lǝthi ŋwan!’ Nǝ wǝkiil ǝccǝŋwɔ, ‘Hisaab wɔɔŋa wir wɔ, luuthu ruɽi-kwaɽiŋan’. 8 Nǝ sǝyyiḏ ɔrtatha wǝkiilǝ wir khaayin ŋiɽaŋal-ŋi ŋimǝ-ŋwsi ǝrri ŋishaaṯir-ŋi, kaka nifirlli-gwɔ nyɔr kii beṯṯen nyǝthi ṯurmun kɔthɔ ki-nyɔr-la nyǝthi fɔɔri, ethisi ǝrrǝthisinǝ wɔɽe-wɔɽeny.”
9 Nǝ Yǝcu aari isṯimir nɔŋwaarɔŋw, “Nyii kwǝccǝ-ŋǝsi-mǝ ŋwɔ; ǝṯi kette limathi lǝthi rogɽo raalɔ ŋɔrṯɔ-ŋi ŋǝthi ṯurmun kɔthɔ ṯigii, mindaŋ mǝ ŋɔrṯɔ ŋaalɔ ere ǝthi faayitha-na kweere mac tǝ, ǝrŋǝsi ǝnyji ki-dɔɔnɔ kwǝti nannitha dok-dok. 10 Kweere nyithak kwǝṯoro ǝmiin kwomne-na kwokwɔɽoc, ŋworo amiin tok kwomne-na kwuuru. 11 Meere oro ɔmanaa mǝc ki-ŋɔrṯɔ-na ŋǝthi ṯurmun, e-ta ǝrŋǝsi-mǝ ǝmminici ŋɔrṯɔ-ŋi ŋir rerrem aŋgwɔrɔ? 12 Nǝ meere oro amiin mac kwomne-gi kwǝthi ŋgwa kwɔthaathɔ, e-ta ǝyǝ kwɔrɔ kwɔŋa kiiracalɔ kwɔɔŋa wɔɽe-waɽeny?
13 “Khaḏaam kiti keere mac kǝṯi ǝkkici lisǝyyiḏǝ ndǝn ŋothɽor; nǝ kwɔŋw firasi kwette, nǝ ŋwamɽi kwɔthaathɔ; ŋwɔ iinyici naana kwette, nǝ ŋwɔrrǝlɔŋw kwɔthaathɔ. Ŋaaŋa liti lǝthi ŋɔma mac ethi ǝkkici Allah ŋothɽor nǝ gwuruush tok.”
Ŋiɽaŋal ŋithaathɔ ŋaari-ŋi Yǝcu @allima.
(Maṯṯa 11:12-13Maṯṯa 5:31-32Mɔrgus 10:11-12)14 Mǝsi Lifirriisiiyyiin neŋne ŋɔ tatap, nǝr ǝrri Yǝcu-ŋw kathri, kaka namɽar-gwɔ gwuruushǝ. 15 Nǝsi Yǝcu ǝccǝŋw, “Ŋaaŋa lirɔ lǝṯi ruusi rogɽo raalɔ rasɔɔɽɔ kiyǝnǝ yǝthi lizi, laakin Allah tǝ, nɔŋwelŋe rɔgwori raalɔ rac. Kaka nǝṯi-gwɔ kwomne oro ŋgwɔ kwǝṯi lizigwunǝŋ iiɽinǝ, nɔŋweere ǝthi faayitha-na kweere mac kiyǝnǝ yǝthi Allah.
16 “Nǝ Sherii@a kwǝthi Muusǝ-ŋǝ yiṯaab-yi yǝthi liɽii nanni yakkɔ ŋothɽor mindaŋ nǝ Yuhanna kwǝni Ma@maḏaan iila kimaara; e-ta nǝrmǝ aari ibṯǝḏi ethi aari baahirǝ Inyjiil-yi wǝthi Ŋeeleny ŋǝthi Allah, nǝ ǝṯi kwette nyithak kegitte ŋɔma ethi-gwɔ ǝnḏinǝ. 17 Laakin nǝroro heyyin ethi leere-ŋa wurǝyu-yi ernene kithaay, laakin a tɔnɔkṯa tokɽoc tǝthi Sherii@a ŋweere ernene ḏuṯ.
18 “Mǝ kwɔr kweere dirnatha kwayɔlɔ kwuuŋwun mindaŋ mɔŋw aagwɔ kwir ter nɔŋwɔni kwɔmǝ ǝrri ŋiijinǝ, na mǝ kwɔr kweere aagwɔ kwayɔ kwǝrinnǝ ṯolliga, ŋwɔni kwɔmǝ ǝrri ŋiijinǝ.
Kwɔrṯɔ-ŋǝ La@aazar-gi.
19 “Nǝ kwɔr naani kwette kwir kwɔrṯɔ, kwǝṯi keginne yirethi yir ghaali-ghaali, nǝ ǝṯɔŋw yee-yee ethneya ŋwaamin tatap wisaaw-wisaaw. 20 Naaɽi nǝ kwɔr naani kwette kinaŋw tok kwir kwɔwaay kwǝni La@aazar, kwuurǝnnǝ yǝmmǝŋi naana deddep, ǝṯir aava kǝgwur wǝthi kwɔr-ŋgwa kwir kwɔrṯɔ, 21 ǝṯɔŋw kittatha ethi yee kwuuthunǝŋilɔ ŋgwa kwǝṯi bibindathalɔ ṯerbeeza kuṯṯu ṯǝthi kwɔrṯɔ. Nǝ ǝṯi nyinyǝn iila ǝṯir minǝci yǝmǝŋinǝ yuuŋwun. 22 E-ta nǝ kwɔr kwir kwɔwaay ai, mindaŋ nǝ limeleka dimmǝ nǝr kettice Ibraahiim-ŋwɔ-lɔ kaɽiviny-na. Mindaŋ nǝ kwɔr kwir kwɔrṯɔ ai tok, mindaŋ nǝr aanitha; 23 nǝ nɔŋw dimmǝ yǝy ki-jahannam-nǝ kǝzir wurǝrinnǝ-ŋgwɔ beṯṯen, mindaŋ nɔŋweese Ibraahiim-ŋwɔ kinǝŋgwu tuk La@aazar-gi kwɔnaanɔ kaɽiviny-na kuuŋun. 24 Ŋwɔṯaŋw nɔŋw urnuni nɔŋwaarɔŋw, ‘Ṯǝrnyǝri Ibraahiim! Iinǝnyii-ṯǝ ṯɔgwor-na, mindaŋ ɔɔsa La@aazar-ŋwɔ, ŋwɔɔsa taamin tir nda ŋaaw-na mindaŋ kwǝnyii ṯiici ṯiŋla; nǝ nyii-ŋgwɔ kwɔraara beṯṯen kiigǝ-nǝ wɔ!’ 25 Laakin nǝ Ibraahiim ǝccǝŋw, ‘Tɔr tiinyi kithaayina a-naaniŋa-gwɔ kwɔmiithɔ nǝthi kwomne kwisaaw-kwisaaw, laakin La@aazar-tǝ nɔŋwɔthi kwomne tatap kwigii. Laakin kirem-tǝ kwɔmaamina ŋundu kɔnɔŋw, nǝ ŋa tǝ a kwɔmǝ rǝrinni beṯṯen. 26 Nǝ ŋɔ tatap nǝ lɔɔbi naani lɔɔlɔna dɔddɔl kelgeny-na kǝri ŋaaŋa-li, nǝ kɔlɔ linaanɔ kɔnɔŋw mǝr naŋni ethi ṯamthitha kinaŋgwɔ ǝṯireere ǝthi ŋɔma mac’. 27 Nǝ kwɔrṯɔ ǝccǝŋw, ‘E-ta ṯǝrnyǝri Ibraahiim nyii-ŋgwɔ kwutuurǝccǝ-ŋǝlɔ, ethi ɔɔsi La@aazar-ŋwɔ ki-dɔɔnɔ kwǝthi papa kwiinyi, 28 kaka nǝthiny-gwɔ liyǝŋgǝri-ŋi ṯɔthni, ŋwɔsi ulici mindaŋ mǝreere iila kɔnɔŋw mac kǝzir wǝthi ṯurvǝ’. 29 Nǝ Ibraahiim accǝŋw, ‘Ŋana ŋǝthisi liyaŋgalɔ ŋǝthi Muusǝ-ŋǝ liɽii-li, ethisi ulici ŋunduŋwsi; liyaŋgalɔ lǝthi ŋɔma ethisi kettice yǝni ŋanḏisarsi’. 30 Nǝ kwɔrṯɔ ǝŋnici nɔŋwɔccǝŋw, ‘Bǝri, ṯǝrnyǝri Ibraahiim; ŋiṯi ŋuuru ŋɔ mac. Laakin ǝŋgi kwette diiɽǝ ki-ŋiɽany-na etheele naanir-gwɔ, ǝŋgir ɔrlacca ŋikiyaŋi ŋeeŋen ŋwɔdoŋw’. 31 Laakin nǝ Ibraahiim ǝccǝŋw, ‘Mǝrseere kettice yǝy ŋǝthi Muusǝ-ŋǝ liɽii-li mac, ǝrseere ǝmmini tok mac ŋa ŋǝthi ŋgwa kwǝŋgi diiɽǝ ki-ŋiɽany-na’.”
aza 16
wakiil wete wir ḏalim
1 nuŋw andaci limeḏgen, nuŋw zi eca ŋwu: kwor kwunani kwete kwir kwurṯu, kweḏi wakiila wete. ner bɔŋwḏici ŋunduŋwu, ner eca kworu ŋgwa ŋwu: ŋgwana kweṯi ṯuzi kwɔmne kwɔŋwa. 2 nuŋw ornuti, nuŋw eca ŋwu: ŋiɽaŋal ŋeni aḏa ŋiniŋnanyji ŋeni ŋɔŋa? andizazi ṯi ŋeḏi ŋuwakiil ŋɔŋa. a kwellini ki ŋuwakiil-na. 3 na wakiil arina ŋwu: aḏa kwenyerri menyi gwu kweleny naŋni eḏalliḏalu? ŋuma ŋinyi ŋende ŋuru eḏi ŋi akiki ŋuruŋ. na eṯi nyi ṯurony ye eḏi babiŋaḏa lizi la tɔk. 4 nyi kwukitaḏa ki ŋiɽaŋal ŋete eḏi zi erri mindaŋ mer nyi alla ki ŋuwakiil-na, er nyi enji deŋgen-na tɔk. 5 nuŋw zi ornuṯi kla tatap lere lere leḏir kwor ŋali ŋgwa kəmzu, nuŋw eca ŋgwa kwiŋna ŋwu: kəmzu kɔŋwa kir ḏa kweleny kwinyi ŋali? 6 nuŋw eca ŋwu: kweḏi nyi gi ŋila lizafiya ruɽi-ṯuḏni. nuŋw eca ŋwu: meṯi warga weḏi ŋwoɽa ŋwɔŋa; luḏi fitak lizafiya ruɽi-riɽen-wri. 7 nuŋw eca kwir ter ŋwu: na ma eḏi ŋa ḏa? nuŋw eca ŋwu: kweḏi nyi gi ŋwana lizafiya ruɽi-ṯuḏni. nuŋw eca ŋwu: meṯi warga wɔŋwa; luḏi ruɽi-kwaɽŋan. 8 na kwor ŋgwa kwir kweleny kwuŋwun eca wakiila wir ḏalim ŋwu: a ŋgwu mi kwumɔferle ki. kaka firli gwu kwelle kweḏi ṯurmun ki, eḏi kwelle la kwedi fori.
9 nyi kwecaŋazi ma ŋwa: roḏur li ŋumaṯi ŋurṯu ŋi, mindaŋ mer ŋa kinna iiraci, a ta lizi enji ŋaŋwuzi kezir weṯinanni dɔk.
ṯirlalu kwɔmne-na kwere kwɔkwɽoc
10 ŋgwa kweni kwirlalu kwɔmne-na kwɔkwɽoc er allida rugwori nana kwɔmne gi kwuṯemḏelu; na ŋgwa kwiti kweni kwirlalu kwɔmne-na kwɔkwɽoc mac, er ere alliḏa rugwori nana kwɔmne gi kwuṯemḏelu tɔk mac. 11 ma ere eni kwirlalu eḏaŋraci ŋurṯua ŋir ḏalim mac, na eya kwiru kwɔŋazi alliḏa ṯugwori nana eḏaŋraci ŋurṯua ŋir rerem? 12 ma ere eni kwirlalu kwɔmne gi kweḏi kwizi kwir ter mac, eya kwiri kwɔŋazi kiraci kwɔmne lu kwalu?
13 kwiti kwere mac kweṯeḏi ŋuma eḏəkizi lizi nden ŋɔḏɽor. muŋw firazi kwete, eṯuŋw amɽi kwuḏaḏu; ya muŋw miḏa kwete, eṯuŋw erri kwuḏaḏu luŋw, a liti leḏi ŋuma mac eḏəkizi Allah ŋɔḏɽor, na ŋurṯua ŋeḏi ṯurmun tɔk.
Yecu kwermice loru leni lifarzi
14 nezi lifarzi neŋne ŋu tatap, ner erre luŋw. kaka eṯir gwu aminḏi kwuruuza. 15 nuŋw zi eca ŋwu: ŋaŋa lir ṯa, leṯinaŋni lizi eḏari ŋaŋwuzi li, lizayḏinyji gi, lakin na Allah wilŋiicaŋazi rugwori, kwɔmne kweti gi lizi ari, kwizaw beṯen eḏi miidaḏa, kwunder ṯa kwiti kweṯi zayḏa Allah gi mac; kweṯi kiyaḏa ŋunduŋwu.
16 na kuruu orɔ kinanni, ŋiɽaŋal ŋi ŋeḏi liɽi, mindaŋ ma gwu yuhanna kweni baptizt ilaḏa la. kirem ta, eṯir ireci ŋiɽaŋali ŋizaw ŋeḏi ŋeleny ŋeḏi Allah, ner naŋni lere nyiḏak eḏi firgaḏi eḏenḏi. 17 lakin, ŋiri eyin eḏi lere-ŋa ṯurmun ṯi eḏernine, eḏi tiɽaŋal la tere teḏi kuruu ere eḏi fayḏa mac.
18 muŋw dirnaḏa kwere kwayu lu kwuŋwun, mindaŋ muŋw agwu kwir ter, eṯi ŋijin orɔ. na muŋw agwu kwere kwayu kwumɔ kwor dirnaḏa lu, eṯi ŋijin orɔ.
kwurṯu-ŋa liazar gi kwir kwuway
19 kwunani kwete kwir kwurṯu; eṯuŋw kenne yireṯi yizaw yizaw yori yimri-na tɔk. eṯuŋw yeye eḏneya wizaw wizaw ŋwamin rac. 20 nuŋw nani kwete tɔk, kweni liazar, kwir kwuway, kweḏi yəmaŋi nana yitezir, kweṯinḏiralu ogwur kworɔ weḏi kwurṯu. 21 eṯuŋw naŋni eḏi ece kwurṯua ki, mindaŋ eḏi yaḏa kwɔmne kwere kweṯi bibinḏaḏa ṯarbeza kuṯu. na eṯi nyinyen ila ner mineci yəmaŋi-na. 22 ner ṯa orɔ ŋwu, ma kwuway keni ay, na limaleyka dimi, ner ketize ibrahiimŋw kaɽfiny. mindaŋ na kwurṯu ay tɔk, ner aniḏa. 23 nannuŋw gwu eydez, kwurerini ṯeṯec, nuŋw baŋḏala, nuŋw eze ibrahiim ŋwuzi tuk, liazar gi, kwunani kaɽfiny. 24 nuŋw ofna nuŋw eca ŋwu: papa ibrahiim, eḏi ŋa ṯa ṯugwor yaḏa duŋgwinyi. ṯiŋaḏa ṯa liazarŋw eḏoɽazi lamin lete lir nda ŋaw-na, eḏi ṯici nyuŋwu ṯiŋla, kaka menyi gwu rari ṯeṯec kigə-na wu. 25 na ibrahiim eca ŋwu: tor tinyi, ṯiŋayina zi. nani ŋa kwumiiḏu na miḏa kwɔmne-na tatap kwizaw; na liazar nani ŋundu, kwɔmne-na kwiki; na kire-kirem ŋgwu, kwumer kanḏizalu, na a kwurerini pa. 26 na ezir wumaɽi, wumenyji olaḏa-na tɔk, nani ŋa gwu keligeny-na, mer naŋni leḏi kunuŋw eḏi ṯamḏa nani ŋa gwu, eṯi zi ŋuma iiraci; mer naŋni eḏi ṯamḏu kunuŋ nani nyi gwu leḏi kinaŋw, eṯi zi ŋuma iiraci. 27 nuŋw eca ŋwu: ṯernyeri, nyi kwuturecaŋa lu, eŋgi uzi ŋunduŋwu duənu nanu gwu lizi leri deŋgeri, 28 kaka eḏi nyi gwu lieŋgeri ṯuḏni, eḏi zi ica-na mindaŋ er ere ila kezir wu mac weḏi ṯurfa ṯirara. 29 lakin, na ibrahiim eca ŋwu: ŋana ŋeḏir zi ŋeḏi muuza-ŋa, liɽi li; eḏir ketize ŋiɽaŋali ŋeŋen yey. 30 nuŋw eŋnici, nuŋw eca ŋwu: beri, ṯernyeri ibrahiim; eŋguŋw zi diɽici kwete ŋiɽany-na, eḏi zi ireci, eŋgir orla rugwori lu. 31 na ibrahiim eŋnici, nuŋw eca ŋwu: mer derne eḏi zi neŋne ŋeḏi muuza-ŋa, liɽi li ta, er derne eḏi ketize kwere ŋiɽaŋali yey, kinna kwudiɽi ŋiɽany-na.