Ŋiɽaŋal ŋiŋna.
1 Sǝyyiḏ Thaawfiilɔs: Kaka mǝgwɔ lizi luuru ṯǝccici beṯṯen ethi lo ŋiɽaŋali ŋǝthi kwomne ŋgwa kwǝrrinǝ dǝŋgǝr-nǝ. 2 Nǝrsi lo ŋa ŋandica-nyji kila liisasi yǝy-yi naana yeeŋen, ŋa ŋiisarsi kwon-kwon-lɔ tuk, lindǝr-ṯǝ lir yaavɔr yǝthi ŋiɽaŋal ŋisaaw. 3 Nǝ ŋwɔṯaŋw yaɔ Sǝyyiḏ Thaawfiilɔs, kaka nɔrɔɔminy-gwɔ ŋiɽaŋali-lɔ ŋɔ tatap mammak ŋǝmǝ-ŋǝmmǝŋ kinaŋw-lɔ tuk kwon-kwon, ninyaarɔŋw ŋisaawi ethi lɔcca ŋaaŋwɔ ŋiɽaŋali ŋɔ ŋǝmmǝŋ. 4 Ŋǝrrǝ-nyji ŋɔ mindaŋ mǝsi elŋe ŋir rerrem ŋǝthi kwomne tatap ŋimǝr-ŋǝsi ilŋithini.
I@laan wǝthi ŋelŋe ŋǝthi Yuhanna kwǝni Ma@maḏaan.
5 Ki-ŋwaamin-la ŋwa ŋwɔr-ŋi Hiiruuḏus mǝlik kwǝthi Yahuuḏiiyyǝ-ŋw, na kaahin naani kette kinaŋw kǝni Zakkariiyyǝ, kuruuthu ethi Abiiyyǝ-ŋǝ. Nǝ yiriny yǝthi kwaaw kwuuŋwun ǝni Aliisaabaaṯ; kwuruuthu ki-ŋwɔɔla-na ŋwɔthi Haaruun. 6 Nǝr aami naanaŋw ndǝndǝk kiyǝnǝ yǝthi Allah, nǝr iinyici awaamira naana na gwaaniin tatap min-min kǝthi Kweeleny. 7 Laakin nǝreere ǝthi tɔɔrɔ-na teere mac, kaka nɔrɔ-gwɔ Aliisaabaaṯ kwɔɔrɔm, nǝ nǝroro yimǝyǝŋ-nǝ keene-keene.
8 Laamin lette nǝ Zakkariiyyǝ akkɔ ŋothɽor ki Heikal-na kiyǝnǝ yǝthi Allah, kaka nɔrɔ-ŋgwɔ kaahin, nǝ ḏɔɔr rɔɔthanni ṯuuŋwun tok, 9 nǝ kaka nɔrɔ-gwɔ ǝthi wǝṯi kahana rɔɔmi, nǝ gwɔra@ iidi duŋgwun-lǝ ethi anḏi ki Heikal-na wǝthi Kweeleny ethi ruuɽǝsi kwɔthɽɔla ki-ŋwɔthgwun-lǝ. 10 E-ta na lizi naani dɔŋw par laarɔ kiyiiriny ki-lɔɔmɔr-la luruɽǝnnǝli kwɔthɽɔl. 11 Nǝ meleka kwǝthi Kweeleny ruwǝnicǝlɔ, kwirlǝccǝ ŋwɔthgwunǝ-lɔ ki-thii ṯǝthi mɔni, kinaŋw nuruuɽǝsǝ-ŋgwɔ kwɔthɽɔla. 12 Mǝ Zakkariiyyǝ ese tǝ, nɔŋw burcǝŋnǝ-lɔ burccǝk, nɔŋw ṯeenye. 13 Laakin nǝ meleka ǝccǝŋw, “Ǝṯi ṯiinya mac yaa Zakkariiyyǝ! Kaka mǝ-gwɔ Allah neŋne ṯaara ṯɔɔŋwɔ kiyiiriny, nǝ kwaaw kwǝǝŋa kwǝni Aliisaabaaṯ kwɔŋǝ ilŋanyji tɔɔrɔ, mindaŋ ǝnyjici yiriny ǝccǝ Yuhanna. 14 Mindaŋ aamina nǝ a nyeŋlena, nǝ lithaathɔ littǝzir ǝri aamina ŋelŋe-ŋi ŋuuŋun tok! 15 Kaka ninḏi-ŋgwɔ ethoro kwɔr kwɔppa ŋɔɔrɔ, kiyǝnǝ yǝthi Kweeleny. Nǝ laazim ŋweere ii kiɽicaŋi keere mac, wala ethi ii kiɽii ḏuṯ, ŋwuurǝnni Ṯigɽimǝ-nǝ Ṯirllinǝlɔ ter, kaari-na tuk kǝthi lǝnyin. 16 Nǝ ŋwɔɽǝ nyɔɔrɔ nyuuru nyǝthi Israa-iil naana-gwɔ Kweeleny kwir Allah weeŋen. 17 Ŋwɔ iŋnaci Kweelenyi keereny ṯigɽim-thi kwɔfirlli ŋɔma-ŋi ŋir kaka ŋǝthi kwiɽii kwǝni Iliiyyǝ. Ŋwaaɽasi papa-ŋwɔsi nyelle-nyi dɔŋw kwokwony; ŋwɔsi urlelɔ kila luuɽu yǝninǝ ethi aaɽtha ki-thaay-la ṯǝthi lizi lɔvthanna; ŋwɔ kettice Kweelenyi lizi-lɔ luuŋwun cɔgwo-cɔgwop.”
18 Nǝ Zakkariiyyǝ ǝccǝ meleka-ŋw, “Ŋǝnyji elŋe ŋɔ aŋgwɔrɔ? Nyimoro kwɔr kwɔmoro kimǝyǝŋ, nǝ kwaaw kwiinyi oro kimǝyǝŋ tok.” 19 Nǝ meleka ǝŋnici nɔŋwɔccǝŋw, “Nyii kwir kwǝni Jibraa-iil kwǝṯi rilli kiyǝnǝ yǝthi Allah, wɔsa-nyii ethi andaci ŋaaŋwɔ ŋiɽaŋali ŋisaaw. 20 Laakin neere mithǝ ŋiɽaŋali ŋiinyi mac, ŋinḏi ethoro rerrem mǝ lɔɔmɔr iila kila dap-dap. Nǝ kaka mɔgweere ǝmmini mac tǝ, ere ǝthi ŋɔma ethi andasi mac; a-naani tugwup mindaŋ a laamin iila kila landicaŋa-li linḏi-li ethi ŋiɽaŋal-ŋɔ rattathi rerrem.” 21 Nǝ ki-lɔɔmɔr-la ṯǝ kila nǝ lizi ǝkkici Zakkariiyyǝ-ŋw kizǝn mindaŋ nǝr urǝŋni, nǝraarɔŋw kwotho kwɔmǝ ɽindaŋnalɔ lǝlu-ttuk ki Heikal-na. 22 Ṯaŋw mɔŋw ruuthǝ par tǝ, nɔŋweere ǝthi ŋɔma mac ethisi andaci, mindaŋ nǝr elŋece ethaarvŋw kwɔmǝ iisa rɔ-ɔya ki Heikal-na. Nɔŋw naani ndip kwiti kwǝthi ŋɔma ethi andasi mac, mindaŋ nɔŋwsi andaci rii-ri. 23 Mǝ ḏɔɔr ṯǝthi ŋothɽor ŋuuŋun ernene ki Heikal-na tǝ, nɔŋw aaɽitha dɔɔnɔ kwuuŋwun. 24 Mǝ ŋwaamin ŋwokwo ere, nǝ kwaaw kwuuŋwun kwǝni Aliisaabaaṯ eethe, mindaŋ nɔŋw naani yǝwǝ ṯɔthni kiininy kwiti kwurwǝthǝlɔ mac, 25 nɔŋwaarɔŋw, “Ŋindǝr-ṯǝ ŋɔ mindaŋ Kweeleny kwɔmǝ-nyii iisasalɔ kirem ethi dimmǝthǝ nyuŋwɔ ṯɔŋwnɔtha kithaay ki-lizi-nǝ.”
Kimǝcci kwǝthi ŋelŋe ŋǝthi Yǝcu.
26 Ki-yǝwǝ-lǝ yir nyirlil yiitha-yi Aliisaabaaṯ, nǝ Allah ɔɔsi meleka kwǝni Jibraa-iil etheele ki-mǝḏiinǝ-nǝ kwɔnaana Jǝliil kwǝni Naasira, 27 naana-gwɔ letteṯ limthi kwɔr kwette nda kwǝni Yuusuf, kwǝthi ŋwɔɔla ŋwɔthi Ḏaawḏ-ŋǝ, nǝ yiriny yǝthi letteṯ ǝni Mǝryǝm. 28 Nǝ meleka iila naana-ŋgwɔ nɔŋwɔccǝŋw, “Ŋa-ŋgwa kwisaawa! Kweeleny kwɔnaana ŋa-gi mindaŋ kwɔmǝ-ŋǝ ɔrtatha tig-tig!” 29 Nǝ Mǝryǝm ippinni ṯɔgwor-na tig-tig ŋiɽaŋal-ŋi ŋǝthi meleka, mindaŋ nɔŋw urǝŋni kwaarɔŋw ŋiɽaŋal ŋuuŋun ŋɔ ŋǝni-thi manɔ ǝyǝ. 30 Nǝ meleka ǝccǝŋw, “Ǝṯi ṯiinya mac Mǝryǝm; kaka niniyǝŋǝ-gwɔ Allah-na. 31 A kweethe mindaŋ elŋe toŋwora, mindaŋ anyjici yiriny ǝccǝ Yǝcu. 32 Mindaŋ ŋwɔ peŋe ŋɔɔrɔ yǝnǝ, mindaŋ ǝri ǝccǝ Tɔr tǝthi Allah wuthǝmthi-lǝ pur-pur. A Kweeleny kwir Allah ruusi ŋundu-ŋwɔ mǝlik, kaka kwugwurnǝyin kwǝni Ḏaawḏ, 33 mindaŋ ŋwɔnannitha dok-dok kwir mǝlik kwǝthi nyɔr nyǝthi Ya@guub, mindaŋ a ŋeeleny ŋuuŋun ere ernene mac!” 34 Nǝ Mǝryǝm ǝccǝ meleka-ŋw, “Ŋinḏi ethi ǝrrini ŋɔ aŋgwɔrɔ ɔrɔny-ma letteṯ linaana min-min?” 35 Nǝ meleka ǝŋnici nɔŋwɔccǝŋw, “Ṯigɽim Ṯirllinǝlɔ ter ṯiŋǝ-gwɔ dappitha-na, mindaŋ a-ŋǝ ŋɔma ŋǝthi Allah kwuɽubǝthǝlɔ. Nǝ sǝbǝb-gi-ṯǝ ŋgwɔ ǝri ǝnyjici lurgwuduŋi lirllinǝlɔ ter yiriny yǝni Tɔr tǝthi Allah. 36 Ṯiŋaayina Aliisaabaaṯ-ŋwɔ kwir ŋa-gi ǝgwur wɔtɔpɔt, kwɔmeethe toŋwora ŋimǝyǝŋ-ŋinǝ, nǝ yǝwǝ yimoro nyirlil yǝthi ŋgwa kwǝṯir-gi aarɔŋw kwir kwɔɔrɔm. 37 Kaka niti ninaani-gwɔ kwomne kweere mac kwǝṯi kettice Allah ŋɔɔrɔ.” 38 Nǝ Mǝryǝm ǝccǝŋw, “Nyii kwir-pa khaḏaam kǝthi Kweeleny, ethirnyii-mǝ tǝ ǝrrinici kaka ŋa ŋandica-nyji.” Ŋwɔṯaŋw nǝ meleka ɔrlacci ŋwɔdoŋw.
Mǝryǝm mɔŋŋweele ethi raaŋitha Aliisaabaaṯ-ŋwɔ.
39 Nǝ ki-ŋwaamin-la ṯǝ ŋwa, nǝ Mǝryǝm diiɽi nɔŋw fiɽigazi kilyǝ etheele ki-mǝḏiinǝ-nǝ kwɔnaana kǝzir wir ŋwundǝr ŋwɔthi Yahuuḏiiyyǝ-ŋw. 40 Nɔŋw ǝnḏi ki-dɔɔnɔ kwǝthi Zakkariiyyǝ mindaŋ nɔŋw aaganni Aliisaabaaṯ-ŋwɔ. 41 Mǝ Aliisaabaaṯ neŋne ṯaaginna ṯǝthi Mǝryǝm-ṯǝ, nǝ tɔr ogwom kaari-na kuuŋun; mindaŋ nǝ Aliisaabaaṯ urǝnni-nǝ Ṯigɽim-thi Ṯirllinalɔ ter. 42 Nɔŋw ɔvɔna ŋǝmmaŋi nɔŋwaarɔŋw, “A kwǝni kwɔrtanna beṯṯen ki-laaw-na tatap, nǝ tɔr tinḏi-ŋǝ ethelŋe ŋwɔni tɔrtanni! 43 Nǝ aatha kworo mindaŋ nǝrricǝr-nyji ŋɔ ŋɔppak, ŋinḏi-ŋi lǝnyin kwǝthi Kweeleny-ŋa kwiinyi ethi raaŋitha nyuŋwɔ? 44 Kaka mǝnyii-ŋwɔ neŋne ṯaaginna ṯɔɔŋwa ṯǝ, nǝ tɔr ogwom kaari-na kiinyi taamina. 45 A kwir-mba kwir kwaaw kwinḏi ethi ɔrtanni kaka nǝmminǝŋǝ-gwɔ ŋiɽaŋali ŋǝthi Kweeleny ŋa ŋinḏi ethi rattathi!”
Mǝryǝm mɔŋgwɔ ɔrtatha Allah.
46 Nǝ Mǝryǝm aarɔŋw,
“Nyii kwɔrtatha Kweelenyi;
47 nyii kwɔnyiŋlana kaka nɔrɔ-ŋwɔ Allah kwiglǝthǝ kwiinyi,
48 kaka mɔŋgwɔ ṯiŋaayini nyuŋwɔ kwir khaḏaam kuuŋun
kirtalɔŋw!
Min kire-kirem-ŋgwɔ mindaŋ mǝ lɔɔmɔr iila ǝnyili lizi
tatap ǝccǝŋw,
a kwǝni kwɔrtanna
49 kaka mǝnyii-gwɔ Allah wǝthi ŋɔma
ǝrrici nyuŋw kwomne kwɔppa-kwɔppa.
Yiriny yuuŋwun yǝni yirllinǝlɔ ter;
50 ŋimɽi ŋuuŋun ŋǝṯi nannitha ki-lizi-nǝ lǝṯiiɽi ŋunduŋw-nǝ
kila linḏi ethiila ki-ŋwɔɔla-ŋwɔɔla.
51 Nɔŋw ruwǝzi ŋɔma-lǝ ŋǝthi lɔɔɽall luuŋwun,
nɔŋwsi fǝthǝlɔ kila lǝṯi piŋi rogɽo ǝfkǝr-yi wǝthi rɔgwor
reeŋen.
52 Nɔŋw dappasi muluuk-gǝlɔ kwǝthi ŋɔma,
ki-lɔrsi-la lǝthi ŋeeleny ŋeeŋen,
nǝ nɔŋwsi dimmǝthǝ-lǝ teṯ kila lirtalɔŋw.
53 Nɔŋwsi bii kila liithisi yaaŋwɔ kwomne-gi kwisaaw-kwisaaw,
nɔŋwsi ṯiŋatha kila lir lɔrṯɔ rii-ri-na domony.
54 Nɔŋw mithǝthǝ wa@ḏa wandicaŋw-yi rǝrnyǝri-ŋwsi,
mindaŋ nɔŋw iila ethi mǝcci khaḏaama kuuŋun kani
Israa-iil.
55 Nɔŋw kithaayini ethi baaŋaci Ibraahiim-ŋwɔ ŋimɽiyǝ
ŋwɔɔlaŋi-na ŋwuuŋwun tatap ethi nanniṯha dok-dok!”
56 Nǝ Mǝryǝm naani Aliisaabaaṯ-gi yǝwǝ ṯoɽol, mindaŋ nɔŋw-mǝ
aaɽitha dɔɔnɔ kwuuŋwun.
Ŋelŋe ŋǝthi Yuhanna kwǝni Ma@maḏaan.
57 Nǝ ṯaŋw nǝ lɔɔmɔr iila lǝthi ŋelŋe ŋǝthi Aliisaabaaṯ, mindaŋ nɔŋw elŋe toŋwora. 58 Nǝ jiiraan kwuuŋwun lizi-li lǝthi ǝgwur wuuŋwun neŋne ethaarɔŋw Kweeleny kwɔmǝ ruwǝcci ŋunduŋw ŋimɽiyǝ-lɔ ŋɔppa ŋimni, nǝr aamina tatap ŋundu-ŋǝli. 59 Mǝ tɔr oro nyaamin dɔvokwɔppa, nǝr-ri iila ethi uɽu lɔthrɔnya, nǝr naŋni ethi ǝnyjici yiriny yǝthi ṯǝrnyin yǝni Zakkariiyyǝ. 60 Laakin nǝsi lǝnyin ǝccǝnw. “Bǝri-mǝ! Ǝrisi ǝnyjici yǝni Yuhanna.” 61 Nǝrǝccǝŋw, “Laakin a kwende kwǝthi kwizi kweere kwǝthi ǝgwur wɔɔŋa kwǝthi yiriny kiyɔ!” 62 E-ta nǝr andaci ṯǝrnyin rii-ri ethisi ilŋithini yiriny yinaŋna-ŋwsi ethisi ǝnyjici tɔɔrɔ. 63 Nǝ Zakkariiyyǝ ɔṯalɔ lɔɔh-li, mindaŋ nɔŋw lo nɔŋwaarɔŋw, “Yiriny yuuŋwun yǝni Yuhanna.” Mindaŋ nǝr liŋri beṯṯen. 64 Nǝ kina-ṯǝ kinaŋw-lɔ tɔc, nǝ ṯuunyu ṯǝthi Zakkariiyyǝ kiṯṯini, nǝ ṯiŋla ṯuuŋwun kǝdinni, mindaŋ nɔŋwɔthi ŋɔma ethi andasi, nɔŋw aari ibṯǝḏi ethi ɔrtatha Allah. 65 Nǝ jiiraan tatap urǝnni-nǝ ŋitheny-ŋi deddep, nǝ khabar kǝthi kwomne-ŋgwɔ tatap faathitha ŋwundǝri naana tatap ŋwɔthi Yahuuḏiiyyǝ-ŋwɔ. 66 Nǝ kila tatap limǝsi neŋne nǝrsi mithǝ ki-rɔgwor-na reeŋen nǝraarɔŋw, “Tɔr kirɔ tinḏi ethi rotto tha?” Kaka a-naana-gwɔ ŋɔma ŋǝthi Kweeleny ŋundu-gi.
Ṯilŋa ṯǝthi Zakkariiyyǝ.
67 Nǝ Zakkariiyyǝ kwir ṯǝrnyin ṯǝthi Yuhanna-ŋǝ urǝnni-nǝ deddep Ṯigɽim-thi Ṯirllinǝlɔ ter, nɔŋw andasi ŋiɽiya-ŋi, nɔŋwaarɔŋw,
68 “Ethi Kweeleny kwir Allah wǝthi Israa-iil ɔrtanni,
kwǝni-mǝ-ṯǝ kwɔmǝ iilatha ki-ṯimǝcǝ ṯǝthi lizi luuŋwun,
mindaŋ nɔŋwsi kǝdu.
69 Nɔŋw usicǝ nyuŋwsi Kwiglǝthǝ kwǝthi ŋɔma,
kwir ŋwɔɔla ŋwɔthi khaḏaam kuuŋun kǝni Ḏaawḏ.
70 Kaka nandisa-ŋgwɔ kwusǝttuk,
ruunyu-ri rǝthi liɽii luuŋwun lirllinǝlɔ ter.
71 Mindaŋ nɔŋw kilǝthi nyuŋwsi ki-ṯuwǝn-nǝ,
nǝ ŋɔma-na ŋǝthi kila lǝṯi-nyji wǝzi.
72 Nɔŋwaarɔŋw, kwinḏi ethi baaŋaci lugwurnǝ lǝri ŋimɽiyǝ,
nǝ ŋwɔ kithaayini wa@ḏa wuuŋwun wirllinǝlɔ ter.
73 Nǝ wa@ḏ wǝ nɔŋworo wǝricǝŋw-yi papa-ŋwɔ kwǝri kwǝni
Ibraahiim haalifa,
74 ethi kilǝthi nyuŋwsi ki-ṯuwǝn-nǝ ṯǝri, mindaŋ ǝri ǝkkici
ŋunduŋw ŋothɽor liira ŋithenya-na,
75 mindaŋ mǝr rillinǝlɔ ter, nǝ lirllalɔ tok kiyǝnǝ yuuŋwun
ŋwaamin tatap ŋwɔṯhi ŋimiitha ŋǝri.
76 Nǝ ŋa kwir tɔr tiinyi, ǝrŋǝ ǝnyjici yiriny yǝni Kwiɽii kwǝthi
Allah wuthǝmthi-lǝ pur-pur.
A iŋnaci Kweelenyi keereny ethi daɽimaci raay-la ruuŋwun
77 Ethi andaci lizi luuŋwun ethisi ǝccǝŋw, ŋaaŋa linḏi ethi
kilaaw ṯifivrinnǝ-thi ṯǝthi ŋikiya ŋaalɔ,
78 ŋimɽi-ŋi ŋithii jiɽeem ŋǝthi Allah wǝri, kwǝnyji irṯaṯhalɔ
fɔɔri-gi kwǝthi ŋimiitṯha,
79 nǝ ethisi irṯacalɔ fɔɔri-gi kila linaana kirim-nǝ, nǝ
ki-ṯigɽim-nǝ ṯǝthi ŋiɽany,
ethi aŋraci kilyǝ kǝri ki-thaay-la ṯǝthi ṯaama naana.”
80 Ṯaŋw nǝ tɔr peŋǝ tir aŋna, nɔŋw duŋgwɔ-ŋgwatha ṯigɽim-thi tok, nɔŋw nanni ki-sahraa-na mindaŋ nǝ laamin iila kila limǝŋw-li ruwǝnnici lizi-lɔ por-por lǝthi Israa-iil.
aza 1
1 lizi luru limɔ lɔ ŋiɽaŋali ŋimerrini deŋgeri-na, 2 ŋandindicai nyji kla ŋizarzi ṯayṯi yey yi yeŋen; linde lir limorɔ yafur yeḏ ŋiɽaŋal ŋizaw. 3 ŋwu ṯa, jenaaba kweni ṯiwufiluz, nyi kwaru ŋwu tɔk: kaka ur nyi gwu kwete kweṯelŋece ŋiɽaŋali minmin, er eni ŋizaw duŋgwinyi eḏi zi loce ŋaŋwu ŋama-ŋamaŋ. 4 mindaŋ mezelŋe ŋir rerem ŋimerŋazi ilŋiiḏini.
ṯikitaḏa ŋiɽya ŋi ṯeḏi ŋelŋe ŋeḏi yuhanna kweni baptizt
5 ki ŋwamin ŋwumɔ ŋi hiruuḏuz orɔ kweleny kweḏi yahuḏiiyaŋw, na kiziiz nani kete keni zakariiya, keḏi abiiya-ŋa, keḏi kwayu kweḏi haruun-ŋa kweni ilizabaaṯ. 6 ner ofḏani nden tɔk ki yey-na yeḏi Allah, eṯir ami miḏici Kwelenyi amra wuŋwun, kuruu gi-na kuŋun tatap. 7 lakin ner ere eḏi toru-na tere mac, kaka ur gwu ilizabaaṯ kworum; ner uṯeḏa nden tɔk ŋimeyaŋi nana.
8 ner orɔ ṯaŋwu, muŋw morḏaḏi ŋɔḏɽor la eḏi zi əkizi Allah, 9 ŋeṯi zi yiziiz errici dak, muŋw enḏi ki heykal-na weḏi Kweleny, nuŋw ruɽeci kwuḏɽula. 10 mindaŋ na lizi lulubeḏa duŋw par tatap ari Allah ki yiriny, ki lomur leṯir li ruɽici kwuḏɽula. 11 na gwu maleyka kwete kweḏi Kweleny ruweḏa nana, nuŋw rillazi ŋweḏugwuna lu, ki ṯii ṯeḏi mini, ŋwunani gwu kwuḏɽiil la. 12 ma zakariiya eze nuŋw apri ṯugwori, na ŋiḏeny ye-na. 13 na maleyka andaci, nuŋw eca ŋwu: eṯi ṯinya mac, zakariiya. ŋiɽaŋal ŋeṯi ŋi ari ki yiriny ŋeni ŋwu ŋimɔniŋnini, na kwulelu kweni ilizabaaṯ kwɔ ŋa ilŋanji toru tir tɔŋwor. enjici yiriny, eca yuhanna.
14 a kwamina, a nyeŋlena kaka aḏa kwere,
na luru er nyeŋlena ŋelŋe ŋi ŋuŋun;
15 kwupeŋe ŋoru yeyna, ki yey-na yeḏi Kweleny,
ta ŋwuderne nabiṯa eḏ ii, na kiɽcaŋi tɔk;
ŋwu ureni-na dedep Ṯigɽim ṯi ṯirlinelu ter
ki lamin, keni, le li lenyin elŋe.
16 lɔŋw zi orlazi luru leḏi izrayiil Kwelenyi nana kweŋen, kweni Allah.
17 ŋwiŋnaci kereny Ṯigɽim ṯi, ŋuma ŋi ŋeṯinanni nani gwu iliiya,
eḏorlica rernyinŋwuzi rugwori lu eḏorlaḏa nyiɽŋeyin nana;
ŋwu zi rutici ŋudurlaḏu ŋeŋen kiṯay, mindaŋ er eni limeḏi yeyna, kaka kla leni lofḏana;
ṯaŋwu, ŋwudaɽmaḏa lizi eḏi li əkizi Kwelenyi kizen.
18 na zakariiya eca maleyka ŋwu: nyi kwelŋece ŋiɽaŋali ŋi ṯaka ezir? kaka menyi gwu orɔ kimeyaŋ, na kwaw kwinyi uṯeḏa ŋimeyaŋi nana tɔk. 19 na maleyka eŋnici nuŋw eca ŋwu: nyi kweni jabrayiil, kweṯirillazi Allah lu; ner nyi ṯiŋaḏa eḏi zi andaci ŋaŋwu, eḏi zi baŋaci ŋaŋwu tɔk ŋiɽaŋali ŋu ŋeni ŋami, 20 izaṯi, kaka iti emnaŋa gwu ŋiɽaŋali ŋinyi mac ta, orɔ kwiila mindaŋ a lamin kla ila le li ŋiɽaŋal ŋu rataḏi. 21 na lizi nanji zakariiyaŋw lu, ner ari: ŋeni emba aḏa, ŋumɔŋw zi nanji li heykal-na lelu tuk? 22 mindaŋ muŋw ruḏa nuŋw ere eḏi ŋuma mac eḏi zi andaci, ner ari: kwumɔ manja iza kwɔmne kwere li heykal-na? kaka muŋw gwu andazi rii ri, nanaḏuŋw gwu-na ndip. 23 ner ṯa orɔ ŋwu, muŋw ṯimazi ŋwamin ŋweḏi ŋɔḏɽoi ŋuŋun ta, nuŋw ele duənu duŋgwun.
24 ma ŋwamin ere ŋwere caw, na kwulen kweni ilizabaaṯ eḏe; nuŋw lucini yowa ṯuḏni, aruŋw gwu ŋwu: 25 ŋwamin ŋwu ŋwumenyi ŋi Kweleny izazalu, nuŋw ṯa dimeḏa nyuŋwu ṯuŋwuniḏa ṯeḏi ŋorum kiṯay ki lizi-na.
ṯikitaḏa ŋiɽya ŋi ṯeḏi ŋelŋe ŋeḏi Yecu
26 ma yowa orɔ nyirlil, na Allah ṯiŋaḏa maleyka kweni jabrayiil eḏele kayin weni nazra, weḏi jaliilŋw, 27 nani gwu tira tete teḏi dauḏ-ŋa, tir kiŋaɽu tikemṯa kwor kwete kweni yuzif eḏagwu, na tira kra teni maryam. 28 na maleyka ele nanuŋw gwu nuŋw eca ŋwu: a ŋgwa ṯa, ŋa kwir emba kwortani Kweleny kweṯiŋa nanazi. 29 na maryam ipini ṯugwor-na beṯen ŋiɽaŋal ŋi ŋandicaŋwzi, nuŋw ari ki ṯugwor-na ŋwu: adri mindaŋ aginarnyi ŋi ŋwu? 30 na maleyka eca ŋwu: eṯi ṯinya mac, maryam; kaka niya ŋa gwu Allah-na. 31 izaṯi, a kwicin kari-na; mindaŋ ma eḏe, a elŋe tɔŋwora; enjici yiriny, eca Yecu:
32 kwinḏi eḏorɔ kwupa ŋoru yeyna, er eca, Tor teḏi ŋgwa kwuṯemḏizi la tatap ŋiniṯ ŋi;
a Kweleny kweni Allah inḏeḏa ŋelenyi ŋeḏi ṯernyin teni dauḏ,
33 ŋwuketize lizi leḏi yaguub-ŋa ŋelenyi dɔk dɔk;
a ŋeleny ŋuŋun ere ernine mac.
34 na maryam eca maleyka ŋwu: ŋinḏi eḏi rɔtɔ ŋu ḏa ḏa? kaka iti eḏi nyi gwu kworu-na kwere mac. 35 na maleyka eŋnici nuŋw eca ŋwu:
Ṯigɽim ṯirlinelu ter ṯi ŋa dapḏana,
a ŋa ŋuma ŋeḏi ŋgwa kwuṯemḏizi la tatap ŋiniṯ ŋi, kwuɽbeḏa lu.
taŋwu, na ŋgwa kwelŋe, ŋweni Kwirlinelu ter, na Tor teḏi Allah.
36 izaṯi, kwinyaraŋ kwɔŋa kweni ilizabaaṯ, kwumɔ mi eḏe tɔk, kwelŋe tɔŋwora ŋimeyaŋi nana, na kwumɔnani kari gi yowa nyirlil, ruzer gwu ta kworum. 37 kwɔmne kwende kwere kweṯurreḏa Allah eḏerri. 38 na maryam eca ŋwu: nyi kwiri pa ŋgwu kwir ŋira ŋeḏi Kweleny. eḏi ma ta ŋiɽaŋal orɔ ŋwu, kaka ŋandizaŋa zi. ṯaŋwu, na maleyka ṯay lu.
maryam muŋw raŋda ilizabaatŋw
39 ki ŋwamin ṯa ŋwu, na maryam diɽeni fitak eḏele kezir weḏi yahuḏiiyaŋw wunanje yayinu. 40 nuŋw enḏi ki duənu kweḏi zakariiya-ŋa, nuŋw agani ilizabaaṯŋw. 41 ner ṯa orɔ ŋwu, ma ilizabaaṯ niŋnaci maryamŋw ṯagna ṯuŋwun, na tor ogwum kari-na, na ilizabaaṯ ureni-na Ṯigɽim ṯi dedep ṯirlinelu ter, 42 nuŋw ofna nuŋw eca ŋwu: li ŋa ortaḏa ki law-na, na Tor telŋe teḏi aŋna wɔŋwa ortani tɔk! 43 na aḏa kworɔ mindaŋ na ma lenyin kweḏi Kweleny kwinyi ila nani nyi gwu? 44 ner ṯa orɔ ŋwu, mer nyi oɽi ki yəni-na ŋɔŋa ŋagna nyi ŋi, na tor ogwum kari-na, kaka amuŋw gwu-na. 45 na kwortani ŋgwa kwemni ŋiɽaŋali ŋandicarzi ŋeḏi Kweleny, mindaŋ mer aɽani dap kaka ŋa ŋandina.
ṯilŋa ṯeḏi maryam
46 na maryam aru ŋwu:
rɔgwɽɔ rinyi reṯipiŋi yiriny yeḏi Kweleny,
47 mindaŋ eti ṯigɽim tinyi nyeŋlena ki Allah-na, kwir Kwigileḏa kwinyi,
48 kaka izaŋw gwu ŋira ŋuŋun ŋene luŋw, mindaŋ er nyi ma keni enjici yiriny tatap rerec, er nyi eca, kwortana.
49 kaka menyi gwu ŋgwa kwuṯemḏelu errici kwɔmne kwizaw kwizaw,
na yiriny yuŋwun irlinelu ter.
50 eti zi ŋimɽi yaḏa deŋgen leṯ inyizi ŋunduŋwu nana,
ki ŋelŋe-na ŋwola ŋwola.
51 limɔŋw zi baŋaci ŋuma, loɽal li luŋwun;
nuŋw zi feḏe lu kla leṯellini ki rɔgwɽɔ, leṯarri ki rugwor-na ŋwu.
52 nuŋw zi dapizalu kla leṯir zi piŋi,
nuŋw zi allazi kla leni lɔkwɽeny;
53 nuŋw zi bunici kla liiḏi zi yaŋwu, kwomne gi kwizaw kwizaw;
na kla leni lurtu, nuŋw zi əɽi kitay domony.
54 nuŋw meci izrayiila, kwir kaḏam kuŋwun,
ṯiŋayinaŋw gwu ŋimɽya ŋuŋun ŋeṯiyaḏa duŋgwun,
55 kaka kitaḏaŋw gwu likwurna leri.
ibrahiim ŋali, na ŋwola ŋi-na ŋwuŋwun dɔkdɔk.
56 na maryam-ŋa nani ilizabaaṯ gi kaka yowa ṯɔɽɔl, mindaŋ nuŋw ma aɽa duənu kwuŋwun.
ŋelŋe ŋeḏi yuhanna kweni baptizt
57 ma lomur ṯimayini pa leḏi li ilizabaaṯ elŋe, nuŋw elŋe tɔŋwora. 58 nezi kla leḏi yəni lu, nyimaɽan nyi, neŋne ŋedi Kweleny ma gwu ŋimɽi ŋupa yaḏa duŋgwun, ner li amina nyiḏak. 59 ner ṯa orɔ ŋwu, ma ŋwamin orɔ dufɔkwupa, ner ele eḏi uɽu toru liḏrunya, ner naŋni eḏi enjici yiriny yeḏi ṯernyin, ṯeni zakariiya. 60 nezi lenyin eca ŋwu: titi teni ŋwu mac; eḏuŋw eni, yuhanna. 61 ner eca ŋwu: kwende kweḏi ŋa kwere kwedi yiriny kyu. 62 ner andaci ṯernyin rii ri, eḏari tuŋw eca eya? 63 nuŋw uṯalu kwɔmne gi eḏi gi lɔ, nuŋw zi loce: yiriny yuŋwun yeni yuhanna. ner liŋɽalu bɽiny. 64 nuŋw diŋelni kworɔ tuc, na ṯiŋla afri-na dar, nuŋw andazi nuŋw ortaḏa Allah. 65 nezi ŋiḏeny ye-na tatap leṯinani kezir wirkaḏizelu. na ŋiɽaŋal ŋu tatap iṯiḏi yayin nana tatap yeḏi yahuḏiiyaŋw. 66 na kla tatap liniŋna zi, ner zi enji ki rugwor-na dip. ner ari: tor kru teḏi rɔtɔ ḏa? kaka eṯi gwu ṯii nani-na ṯeḏi Kweleny.
ṯilŋa ṯeḏi zakariiya
67 na ṯernyin ṯeni zakariiya ureni-na Ṯigɽim ṯi ṯirlinelu ter, nuŋw andazi ŋiɽya ŋi nuŋw ari:
68 eḏi Allah ortanni, wir Kweleny kweḏi lizi leḏi izrayiil,
kaka muŋw gwu raŋḏa lizi luŋwun, nuŋw zi alla eḏi zi fifrici ŋikyaŋi ŋeŋen.
69 nuŋw diɽiza nyuŋwuzi kwete kweḏi ŋuma, kwinḏi eḏi kileḏi nyuŋwuzi;
kwuruḏa eḏi dauḏ-ŋa, kwir kaḏaam kuŋwun.
70 kaka kikitaḏaŋw zi gwu, runyu ri reḏi liɽi lirlinelu ter leḏi kwuzatuk,
71 eḏi kileḏi nyuŋwuzi ki tuwən-na teri,
na ki rii-na reḏi kla tatap leṯinyji uwezi.
72 eḏi zi erri ŋir kaka ŋikitaḏaŋw gwu likwurna leri, yaḏi zi gwu ŋimɽi,
ṯiŋayinaŋw gwu tikitaḏa ṯuŋwun ṯirlinelu ter.
73 kaka kitaḏaŋw gwu papaŋw kweri, kweni ibrahiim,
74 ecaŋw gwu ŋwu:
nyi kwɔŋazi alla ki rii-na reḏi kla leṯi ŋazi uwezi,
mindaŋ er nyi ami kwoceluŋw, liira ŋiḏeny-na,
75 lirlinelu ter, ŋizana ŋi, ŋwamin ŋwalu tatap.
76 na ŋa, kwir tor tinyi, er ŋa enjici yiriny, er ŋa eca, kwiɽi kweḏi ŋgwa kwutemḏizi la tatap,
kaka inḏi ŋa gwu eḏi iŋnici Kwelenyi, eḏi daɽmaci ray lu;
77 eḏi zi ilŋiiḏini lizi luŋwun ŋeḏi ŋigileḏa ŋundu ŋgi,
muŋw zi gwu fifrici ŋikyaŋi ŋeŋen,
78 ŋimɽi ŋi ŋami ŋeḏi Allah weri.
kaka inḏi gwu aŋwun weḏi ŋurpanaŋw eḏalliḏa kilerena, eḏi zuɽici nyuŋwuzi ezir,
79 eḏi zi ṯiŋaca kla fori lu linanu kirim-na, na ki ṯigɽim-na teḏi ŋiɽany,
eḏi mulɔtɔ nyuŋwuzi mamak ki ṯay ṯeḏi ŋiɽena.
80 eṯi tor duŋgwuŋgwa, eṯuŋw ferle ki rɔgwɽɔ-na, nuŋw nanni kwuḏer-na mindaŋ ma gwu lamin ilaḏa la limɔŋw li ruwenici izrayiila lu.