Haḏaaya wǝthi Ṯigɽim Ṯirllinǝlɔ ter.
1 Nǝ ŋǝthi haḏaaya wǝthi Ṯigɽim Ṯirllinǝ ter liyǝŋgǝri liinyi, nyii kwɔnaŋna-ŋǝsi ethisi elŋe ŋir rerrem ŋǝni haḏaaya. 2 Ŋilŋithi-ŋǝsi-pǝ rac kinaŋw nɔrŋa-ta kinnǝni lǝthi ṯurmun, ǝṯir-ŋǝsi mɔmlotto ki-raay-la rir ter-ter ethi ṯuusi ŋaaŋwɔsi, mindaŋ ethi kwogwɔcce riiɽuwǝlɔ riti rǝṯi andasi mac. 3 Ŋwɔṯaŋw nǝŋǝsi naŋni ethisi elŋe ethaarɔŋw kwiti kweere mac kwǝṯi andasi Ṯigɽim-thi ṯǝthi Allah mindaŋ ethaarɔŋw, “Ǝthi Yǝcu ollone!” Nǝ nɔŋweere kweere mac kwǝthi ŋɔma ethaarɔŋw, “Yǝcu kwɔrɔ Kweeleny” illi Ṯigɽim-thi Ṯirllinǝlɔ ter.
4 Nǝ haḏaaya naani wirna ter-ter, laakin nǝtǝ Ṯigɽim oro kitha ṯette-ṯette ṯǝṯisi kannaci. 5 Na nǝ ŋothɽor naani ŋirna ter-ter, laakin nǝtǝ Kweeleny oro kwette-kwette kwǝkkicǝrsi. 6 Nǝ ŋɔma naani ŋirna ter-ter ethi-ŋi ǝrri ŋothɽor, laakin nǝtǝ Allah oro wette-wette wǝṯisi inḏǝthǝ ŋɔma leere-leere ŋǝthi ŋothɽor ŋeeŋen. 7 Ǝṯi Allah inḏǝthǝ lizi leere-leere haḏaaya Ṯigɽim-thi ethi iijini deŋgen-na, ethi-yi mǝcci lizi tatap. 8 Ǝṯi Ṯigɽim inḏǝthǝ kwizi kwette ŋiɽaŋali ŋuurǝnnǝ ṯǝthinǝ yǝnǝ deddep, nǝ kwɔthaathɔ ǝṯɔŋw inḏǝthǝ ŋiɽaŋali ŋuurǝnnǝ ṯilŋiṯṯana deddep. 9 Nǝ kwɔthaathɔ ǝṯi-ṯǝ Ṯigɽim kitha ṯette-ṯette inḏǝthǝ ṯǝmminǝ, nǝ Ṯigɽim ṯǝ kitha ṯete-ṯete, ǝṯɔŋw inḏǝthǝ kwir ter haḏaaya wǝthi-yi sǝwi, 10 nǝ kwɔthaathɔ ǝṯɔŋw inḏǝthǝ ŋɔma ŋǝthi-gi ǝrri ŋilima, nǝ kwɔthaathɔ ǝṯɔŋw inḏǝthǝ ŋiɽiiyaŋi, nǝ kwɔthaathɔ ǝṯɔŋw inḏǝthǝ ŋɔma ethi-ŋi elŋe rigɽimǝ rirna ter-ter, nǝ kwɔthaathɔ ǝṯɔŋw inḏǝthǝ ŋɔma ethi-ŋi andasi kandisa kir riŋla-na ter-ter, nǝ kwɔthaathɔ ǝṯɔŋw inḏǝthǝ ŋɔma ethi uppupi kandisa-nǝ kir riŋla-na ter-ter. 11 Nǝ ŋa tatap ǝṯisi-ṯa Ṯigɽim kitha ṯette-ṯette ǝrri, likannica-ŋwsi haḏaaya leere-leere wɔrga wɔnaŋna-ŋwsi ethisi inḏǝthǝ.
Kwomne kwǝthi aŋna kwirna ter-ter.
12 Nǝ kaka ṯǝ nɔrɔ-gwɔ aŋna wɔtɔpɔt wundǝnnǝnǝ ter-ter laakin nɔŋwtoro aŋna-na wɔtɔpɔt tɔttɔr, ŋwɔṯaŋw nǝṯǝ Kwɔrɔstɔ oroŋw tok. 13 Nǝrṯoroŋw tok nyiiŋǝ tatap, nɔrɔr-gwɔ Yahuuḏ alla Umam alla lɔwaay alla lir hɔrr nǝraari @ammiḏa kaŋna-na wɔtɔpɔt, Ṯigɽim-thi ṯǝ kitha ṯette-ṯette nǝ nyiiŋǝ tatap nǝr ɔɽɔmaṯṯi ki Ṯigɽim-nǝ tɔtɔpɔt.
14 Kaka niti nigittina-gwɔ aŋna dɔŋw lɔtɔpɔt dak mac, laakin nɔŋw kettine wundǝnnǝnǝ ter-ter. 15 Mǝ kaaga aarɔŋw, “Nyii kwende kwir kerge, mindaŋ nǝnyii-mǝ oro kwǝthi aŋna”, ŋenḏe ŋinḏi ethi dirnini ŋunduŋw mac ethoro kwette kwǝthi aŋna. 16 Mǝ kǝni aarɔŋw, “Nyii kwende kwir lǝy mindaŋ nǝnyii-mǝ oro kwǝthi aŋna”, ŋende ŋinḏi ethi dirnini ŋunduŋw ethoro kwǝthi aŋna. 17 Ǝŋgi aŋna oro tatap lǝy domony e-ta, ǝŋgiŋw-mǝ neŋne ǝŋgwɔrɔ? Nǝ ǝŋgiŋworo kǝni dak tǝ, e-ta ǝŋgiŋw-mǝ akki wǝŋ ǝŋgwɔrɔ? 18 Laakin nǝ Allah kette ṯundǝnnǝnǝ kɔthɔ ṯǝthi aŋna, kaka ŋinaŋnasi ṯɔgwor ṯuuŋwun. 19 Nǝ witi waŋgoro aŋna mac ǝŋgiŋw oro dɔŋw lɔtɔpɔt dak! 20 Nǝrṯoroŋw nundǝnnǝ-tǝ kinnǝni aŋna-na tok, nɔŋwtoro aŋna-na wɔtɔpɔt tɔttɔr.
21 Lǝy lende lǝthi ŋɔma ethi ǝccǝ kerge-ŋw, “Nyiiti kwɔnaŋna ṯimǝccǝ ṯɔɔŋwa mac”, wala ethi nda ǝthi ŋɔma ethi ǝccǝ yaaŋa-ŋw, “Nyiiṯi kwɔnaŋna ṯimǝccǝ ṯaalɔ mae.” 22 Nǝrṯoroŋw tok, kaka niti nǝthir-gwɔ ŋɔma mac ethi naani domony liira kwomne-na kwokwo kwathi aŋna ŋgwa kwǝṯir-gi aarɔŋw, kwiti kwǝthi faayitha-na mac; 23 nǝ ŋgwa kwǝṯir-gi aarɔŋw, kwiti kwǝthi faayitha-na mac, nɔŋwmoro kǝniny rerrec kwǝṯir iiɽinǝ, nǝ ŋgwa kwɔthaathɔ kwǝni kwiti kwisaaw ŋisanna ŋeere mac, ǝṯir kǝniny iiɽinǝ rerrec, 24 ŋgwa kwiti kwǝṯi kwomne ŋgwa kwisaaw ŋisanna ere kettice yǝy mac. Nǝṯǝ Allah oro rogɽo-ri ruuŋwun kwɔgitta aŋna dɔŋw tatap mindaŋ mɔŋw iiɽinninǝ beṯṯen wa tok witi wǝṯir kettice yǝy mac. 25 Ŋwɔṯaŋw nǝ aŋna ere ǝni wundǝnnǝnǝ mac, laakin ṯundǝnnǝnǝ ṯuuŋwun ṯirna ter-ter, ǝṯirsi-tǝ ǝrrici-ṯǝ ŋa ŋette-ŋette. 26 Na mǝ ǝzir wette wǝthi aŋna raari, ǝṯɔŋw raari wɔthaathɔ tatap tok; nǝ mɔŋw iiɽinninǝ wette, ǝṯɔŋw nyeŋlena wɔthaathɔ tok.
27 Ŋaaŋa lir tatap aŋna wǝthi Kwɔrɔstɔ, nǝ noro leere-leere lǝthi aŋna wuuŋwun. 28 Nǝ Allah ecce lizi kǝniisǝ-nǝ nɔŋw kette ker-kerreny yaavɔra, nǝ nimrǝ kwuɽǝn liɽii, nǝ nimrǝ ṯoɽol mɔ@allimiin, nǝ kila lǝṯisi ǝrri ŋir ŋilim, nǝ kila lǝṯi sǝwi lizi, nǝ kila lǝthi ṯimǝccǝ-nǝ, nǝ kila lir iḏaariyyiin, nǝ kila lǝṯi andindasi kandisa kir riŋla-na ter-ter. 29 E-ta lir yaavɔr tatap-a? Lir liɽii tatap-a? Lǝṯǝrri tatap ŋilima? 30 Lǝthi tatap haḏaaya wǝthi-yi sǝwi lizi-a? Lǝṯi andasi tatap riŋla rirna ter-ter-a? Nǝ lǝṯi uppupi tatap kandisa-na kir riŋla-na ter-ter-a? 31 Laakin ethi-ŋǝsi kǝniny sɔɔrɔm yatha ki haḏaaya wir mɔhim beṯṯen.
Nǝ ethi-ŋǝsi andaci kwokwony ŋette ŋithǝmthisi-lǝ ŋɔ beṯ-beṯṯen.
aza 12
haḏiya weḏi Ṯigɽim ṯirlinelu ter wir-na ter ter
1 na ŋazi ere naŋni mac eḏi nani, lieŋgeri linyi, liira tilŋiiḏina ṯeḏi haḏiya weḏi Ṯigɽim tirlinelu ter. 2 ŋilŋiiḏi ŋazi eḏaruŋw, ur ŋa gwu liira ṯilŋiiḏina ṯeḏi Allah, ner firgazi ŋaŋwuzi lu eḏi kwɔkwoce libayila lu. 3 ṯaŋwu, na ŋazi ŋaŋni eḏelŋe eḏaruŋw, kwizi kwiti kwere mac kwaruŋw: eḏi Yecu ɔllɔne, andizaŋw gwu Ṯigɽim ṯi tirlinelu ter. nuŋw ere kwere tɔk mac kweḏi ŋuma eḏaruŋw: Yecu kwiri Kweleny, iti andizaŋw gwu Ṯigɽim ṯi tirlinelu ter mac.
4 na haḏiya weḏi Ṯigɽim tirlinelu ter nani wir-na ter ter, lakin na ta Ṯigɽim orɔ tutuput; 5 na ray rinani rir-na ter ter eḏi ri əkici Allah ŋɔḏɽor, lakin na ta Kweleny orɔ kwutuput; 6 na ŋɔḏɽor nani ŋir-na ter ter, lakin na ta Allah orɔ keni wutuput weṯaki ŋɔḏɽor ŋu tatap Ṯigɽim ṯi, ki lizi-na. 7 na deŋgen-na lere lere, eti Ṯigɽim tirlinelu ter ruwene lu, haḏiya yi wir-na ter ter, er yi meceḏizina tatap. 8 na eṯir inḏeḏa kwete ŋuma eḏi zi andaci teḏina ṯi yeyna Ṯigɽim ṯi tirlinelu ter, na kwir ter eḏi zi andaci tilŋiiḏina ṯi, lakin eti Ṯigɽim orɔ tutuput tuɽuk; 9 na kwir ter, eṯir inḏeḏa ṯəmna Ṯigɽim ṯi ṯir ṯutuput, na kwir ter haḏiya wir ŋuma eḏi ŋi zəwi lizi luma, Ṯigɽim ṯi tir ṯutuput, 10 na kwir ter eṯir inḏeḏa ŋuma eḏi ŋi erri ŋilima, na kwir ter eḏi zi andaci ŋinḏeḏa zi Allah Ṯigɽim ṯi; na kwir ter ŋuma eḏi ŋi elŋe eḏaruŋw, ŋiɽaŋal ŋu ŋimɔ ruḏa nani gwu Ṯigɽim ṯirlinelu ter, ya, ŋimɔ ruḏa nani gwu ṯigɽim tiki; na kwir ter eḏortaḏa kandiza gi kiṯimḏina keḏi Ṯigɽim tirlinelu ter, na kwir ter eḏorɔ muṯarjam kweḏi kandiza ŋga. 11 lakin na haḏiya wu tatap wir-na ter ter, wiri ŋɔḏɽor ŋeḏi Ṯigɽim ṯutuput ṯeṯi zi kannaci ter ter ṯugwor ṯi ṯuŋwun.
kwɔmne kwedi aŋna kwir-na ter ter kwiri kaka zura kweḏi kaniiza
12 kaka ur gwu ṯa aŋna wutuput nuŋw undeni kwɔmne ter ter, nuŋw orɔ tatap kweni kwuru aŋna wutuput, na ṯa Kwruztu orɔ wu tɔk. 13 kaka baptizinar gwu tatap Ṯigɽim ṯi ṯutuput, eḏi aŋna-na wutuput—urir gwu yahuuḏ ya yunaan, ya luway ya lir hurr, —na klu tatap ner oɽmaṯi eḏi Ṯigɽim-na ṯutuput.
14 kaka iti eḏi gwu aŋna kwɔmne kwutuput mac lakin nuŋw keni uri. 15 ma kaga aruŋw: nyi kwende kwiri ṯii, ŋwu ta nyiti kwiri kwete kweḏi aŋna mac; ta ŋwere orɔ kwete kweḏi aŋna manya? 16 na ma kəni aruŋw: nyi kwende kwiri ley, ŋwu ta nyiti kwiri kweḏi aŋna mac; ta ŋwere orɔ kewte kweḏi aŋna manya? 17 ma aŋna tatap orɔ ley ta, a ma neŋne aŋgwuru? na ma aŋna orɔ tatap kəni ta, a ma aki wəŋ aŋgwuru? 18 lakin na Allah ketize aŋna kwɔmne kwere kwere tugwor ṯi ṯuŋwun. 19 na eŋguŋw orɔ duŋw lutuput ta, eŋgi ma aŋna naniḏa ṯaka ŋgi? 20 lakin a kwilŋiiḏir eḏaruŋw, kwɔmne kweḏi aŋna kweṯinani keni kwitezir, nuŋw ta orɔ-na wutuput ṯirṯir. 21 ley lende leḏi ŋuma eḏeca ṯii, ŋwu: nyi kwiti kwunaŋna ṯimeca ṯɔŋwa mac. nda lende leḏi ŋuma eḏeca yaga, ŋwu: nyi kwiti kwunaŋna ṯimeca ṯalu mac. 22 beri ma. aŋna weṯi naŋni ṯimeca ṯeḏi kwɔmne kwuŋwun kweṯir gi aruŋw, kwiri kwajila eḏi lieŋgen la. 23 na kwɔmne kwiti kweṯir naŋni eḏi iɽi-na mac, eṯuŋw orɔ rerec kweṯir ami iɽi-na ŋwu, na ŋgwa kwiti kweṯi ijini pɔrpɔr mac, eṯir ami kwuɽbeda ŋwu; 24 lakin na kwɔmne kweṯi ijini pɔrpɔr kwende kweṯinaŋni ṯukwuɽbena lu kḏu. Allah muŋw aci aŋna ta, nuŋw inḏeḏa kwɔmne kweḏi aŋna kwiti kwuṯemḏi mac, ṯiniiya-na ṯiṯemḏelu. 25 mindaŋ ma ṯundenena ere nani kaŋna-na mac, lakin a aŋna tatap meceḏizina wuɽe-wuɽeny. 26 ma kwɔmne kwete kweḏi aŋna rerini, eṯi aŋna rari tatap, na muŋw iɽinina kwete, eṯuŋw amina kwuḏaḏu tatap tɔk.
27 ŋaŋa pa, a liri aŋna weḏi Kwruztu, na orɔ ŋaŋa lere lere kwɔmne kweḏi aŋna wuŋwun. 28 nezi Allah ece-na kaniiza-na kerre-kerreny kla lir yafur, na lir ter lir liɽi, na lir ter lir limuallim, na lir ter leṯerri ŋilima, na lir ter leṯi zəwi lizi, na lir ter leṯi zi mecici tɔk, na lir ter lir lijowiṯ, na kla tɔk leṯortaḏa kandiza gi kiṯimḏina keḏi Ṯigɽim tirlinelu ter. 29 liri yafur tatap yimɔ Yecu Kwruztu ece-na? liri liɽi tatap a? liri limuallim tatap a? leṯizerri tatap ŋir ŋilim a? 30 leḏi tatap haḏiya wir ŋuma eḏi ŋi zəwi lizi a? leḏi haḏiya tatap eḏi yi ortaḏa kandiza gi kiṯimḏina keḏi Ṯigɽim a? leṯorɔ limuṯarjam tatap a? 31 lakin na ŋaŋa pa, eṯorɔ zurum eḏafi haḏiya wuṯemḏelu.
na nyi kwɔŋazi baŋaci ṯay tizaw beṯen, ṯiṯemḏelu purpur.