1 Nyii kwɔrɔ kwǝni Bɔɔlɔs, kwir kaavɔr kǝthi Kwɔrɔstɔ kwǝni Yǝcu, ŋiɽaŋal-ŋi ŋǝthi ṯɔgwor ṯǝthi Allah, kwɔlɔcca-ŋǝsi kila lirllinǝlɔ ter, nǝ kila lir laalɔ ethi Kwɔrɔstɔ-na kwǝni Yǝcu:
2 Ethi ne@ma-ŋa ŋiiɽǝnnǝ-ŋi nanni daŋgal-na ŋinḏi naanɔ-gwɔ Allah wir Papa kwǝri, nǝ Kweeleny kwǝni Ysǝcu Kwɔrɔstɔ.
Barka kwǝthi Ṯigɽim ethi Kwɔrɔstɔ-na.
3 Ǝri ǝccǝ Allah shukran, wir Papa kwǝthi Kweeleny kwǝri kwǝni Yǝcu Kwɔrɔstɔ! Kaka nɔɽɔmaṯṯir nyiiŋǝ Kwɔrɔstɔ-ŋǝli, nɔŋw-mǝ ǝccǝ nyuŋwsi baarika, ninḏǝthǝ-ŋgwɔ nyuŋwsi barka tatap kwǝthi Ṯigɽim kwǝthi ki-leere-naŋw. 4 Niti nigittina ṯurmun kinnǝni mac, nǝnyji Allah allana kerreny tuk ethoro luuŋwun, ṯɔɽɔmaṯṯa-thi ṯǝri ṯǝthir Yǝcu-ŋǝli, mindaŋ mǝr rillinǝlɔ ter, liira lɔɔma-na leere kiyǝnǝ yuuŋwun. 5 Nɔŋw kittatha ki-ṯɔgwor-na ṯuuŋwun ṯamɽa-thi ethi ruusi nyuŋwsi nyɔr nyuuŋwun Yǝcu Kwɔrɔstɔ-ŋgi, ŋiɽaŋal-ŋi ŋǝthi ṯɔgwor ṯuuŋwun. 6 Ǝri biɽǝthǝ Allah yiriny ŋinith-ŋi ŋǝthi ne@ma kwuuŋwun, haḏiiyyǝ-yi wɔmǝŋw inḏǝthǝ nyuŋwsi ethi Tɔr-na tuuŋwun tir ghaali. 7 Ŋiɽaŋal-ŋi ŋǝthi ŋin ŋǝthi Kwɔrɔstɔ, nǝrnyji ruusi hɔrr, nǝ ŋikiya ŋǝri fivrinni kithaay, ŋiɽaŋal-ŋi ŋǝthi ne@ma kwɔppa kwǝthi Allah, 8 kwɔbalsaŋw nyuŋwsi naana. 9 Kaka mǝnyji-gwɔ Allah ilŋithini ŋa tatap ŋuluccunǝ ŋǝthi ṯɔgwor ṯuuŋwun ṯǝthinǝ-thi yǝnǝ, ŋa ŋigittathɔ-ŋgwɔ kerreny tuk ethisi ṯimmasi kworo Kwɔrɔstɔ-ŋgi. 10 Ŋindǝr-ṯǝ-ŋɔ ŋinaŋnasi Allah ethisi ṯimmasi kworo mǝ lɔɔmɔr iila lɔvthanna, ŋwaaɽasi ṯurmunǝ tatap dɔŋw, nǝ kwomne tatap kwǝthi ki-leere-naŋw nǝ kwurǝyu-lu tok, ŋwaava Kwɔrɔstɔ-ŋgi kwir nda leeŋen.
11 Kwomne tatap kwǝrrinǝ niizaam-ŋi kwǝthi Allah, ŋiɽaŋal-ŋi ŋǝthi ṯɔgwor ṯuuŋwun; ŋwɔṯaŋw nǝnyji Allah allana ethoro lǝthi rogɽo ruuŋwun, ɔɽɔmaṯṯi-ŋgi dɔŋw ethi Kwɔrɔstɔ-na, ŋiɽaŋal-ŋi ŋǝthi ṯɔgwor ṯuuŋwun ŋigittathɔŋw-ŋi kinaŋw-lɔ tuk kwon-kwon. 12 Nǝ ǝɽir-mbǝ kǝniny nyiiŋǝ kila limǝ eŋne ethǝthi ṯǝkkizǝ kizǝn ethi Kwɔrɔstɔ-na, ǝri biɽǝthǝ ŋinithi ŋǝthi Allah yiriny. 13 Nǝ kinaŋw mǝ neŋne ŋiɽaŋali ŋir rerrem, noro lǝthi Allah, nǝ Inyjiil oro wǝviccǝ-ŋǝsi ŋigilǝthǝ ŋaalɔ. Na mǝ ǝmminici Kwɔrɔstɔ-ŋw tǝ, nǝŋǝsi Allah uɽuci nimrǝ kwuuŋwun, kaka mɔŋgwɔ inḏǝthǝ ŋaaŋwɔsi Ṯigɽimǝ Ṯirllinǝlɔ ter ṯaarɔŋw-thi wa@ḏa, 14 ṯir ǝrbuun wǝthi ŋɔr ŋa ŋinḏir-gwɔ ethi mɔrthathi-la ŋigittathica-nyji-ŋi Allah. Ŋwɔṯaŋw ǝri biɽǝthǝ ŋinithi yiriny ŋuuŋun!
Ṯaara kiyiiriny ṯǝthi Bɔɔlɔs.
15 Nǝ kaka mǝnyii-gwɔ neŋne ŋiɽaŋali ŋǝthi ṯǝmminǝ ṯaalɔ ṯǝthi-ŋǝ ethi Kweeleny-na kwǝni Yǝcu, nǝ ṯamɽa ṯǝthicǝ-ŋǝ lizi kila tatap lirllinǝlɔ ter, 16 ǝṯi-nyeere uɽǝthi mac ethi ǝccǝ Allah shukran ŋiɽaŋal-ŋi ŋǝni ŋaalɔ. Nyii kwǝṯi-ŋǝsi kikithaayini ki-ṯaara-na ṯiinyi kiyiiriny, 17 mindaŋ mǝŋǝsi Allah wǝthi Kweeleny kwǝri kwǝni Yǝcu Kwɔrɔstɔ, wir Papa kwǝthi ŋinith, ethi inḏǝthǝ ŋaaŋwɔsi Ṯigɽimǝ ṯǝthi ṯǝthinǝ yǝna, nǝ ṯɔǝthi rɔ-ɔya tok, ethelŋe ŋunduŋw, 18 mindaŋ ŋwɔ kiṯṯici ŋaaŋwɔsi yǝy yǝthi rɔgwor raalɔ etheese fɔɔri kwuuŋwun, mindaŋ mǝ elŋe ṯǝkkizǝ kizǝn kitha ṯɔrnacaŋw ŋaaŋwɔsi, nǝ barka kwuuŋwun kwɔppa kwɔgittathɔŋw-ŋgi ethinḏǝthǝ lizi luuŋwun lirllinǝlɔ ter, 19 nǝ ŋɔma ŋuuŋun ŋɔppa ŋakkɔ ŋothɽor dǝŋgǝr-nǝ, nyiiŋǝ kila lǝthi ṯǝmminǝ. Nǝrǝni ŋɔma ŋuuŋun ŋir ŋwundǝ-ŋwundǝ ŋǝṯi akkɔ ŋothɽor dǝŋgǝr-nǝ. 20 Nǝ ŋa ŋǝrrinǝ ethi Kwɔrɔstɔ-na kinaŋw mɔŋw diiɽǝ ŋunduŋw ki-ŋiɽany-na, mindaŋ nɔŋw kette ŋunduŋw ki-thii ṯǝthi mɔni ki-leere-na. 21 Nǝ Kwɔrɔstɔ aari haakima kinanaŋw ki-rɔ-asa-la tatap rǝthi kindala-ŋw, lɔsɔlṯa mindaŋ, ŋɔma mindaŋ, nǝ leeleny tok, nɔŋwɔthi yiriny yɔppa yǝthi ŋɔsɔlṯaan ki-ṯurmun-nǝ kɔthɔ, nǝ kitha ṯinḏi ethiila tok. 22 Nǝ Allah kette kwomne tatap ki-ŋwaara-na ŋwɔthi Kwɔrɔstɔ, mindaŋ nɔŋw-mǝ inḏǝthǝ ŋunduŋw kǝniisǝ ethoro Kweeleny kwɔthamthi kwomne-la ndendeṯ, 23 kir aŋna wuuŋwun wǝṯi ṯimmaci ŋunduŋw ŋiɽaŋali kworo dap-dap, mindaŋ ethoro ŋundu tatap min-min.
aza 1
ṯagna
1 nyi, kweni buuluz, kwir kafur keḏi Kwruztu kweni Yecu tugwor ṯi ṯeḏi Allah, kwagnaŋazi leni lirlinelu ter, linderṯa leḏi ṯəmna na leṯinani eḏi Kwruztu-na kweni Yecu. 2 eḏi ṯimeca ṯeḏi ŋimɽi nani daŋgal-na ŋiɽena ŋi ŋinḏi nani gwu Allah wir Papa kweri, na Kweleny kweni Yecu Kwruztu.
buuluz muŋw ortaḏa Allah
3 eḏi Allah weḏi Kweleny kweri kweni Yecu Kwruztu, wir Papa kwuŋwun tɔk, ortani, wa wumenyji ortaḏa eḏi Kwruztu-na, ṯortaḏa ṯi tatap ṯeḏi Ṯigɽim ṯirlinelu ter eḏi yilim-na. 4 na eḏi Kwruztu-na tɔk wumenyjece-na, iti kitina gwu ṯugwagiza ṯeḏi ṯurmun kinna mac, eḏorɔ lizi luŋwun lirlinelu ter, liira tiɽaŋali-na tere tiki ki yey-na yuŋwun, 5 kaka kitaḏuŋw gwu ki rɔgwɽɔ-na ṯamɽa ṯi, ki lomur ṯa kla eḏinḏeḏa nyuŋwuzi zulṯa eḏeni nyor nyuŋwun Yecu ŋgi kweni Kwruztu, nuŋw nyeŋle ṯugwor-na eḏi zi erri ŋu, 6 mindaŋ er ṯa ortaḏa ŋiniṯi ŋuŋun ṯimeca ṯi ṯeḏi ŋimɽi, ŋinḏedaŋw zi nyuŋwuzi beyin eḏi Kwimɽi-na kwuŋwun. 7 a kweḏi ri duŋgwun-na talliḏiza, ŋin ŋi ŋuŋun, ṯififrina ṯi ṯeḏi ŋiɽaŋal ŋakir ŋi ṯay pir. ner ṯa orɔ ŋu ŋurṯu ŋi ŋeḏi ṯimeca ṯuŋwun ṯeḏi ŋimɽi, 8 ŋimɔŋw zi inḏeḏa nyuŋwuzi beyin. 9 Allah wumenyji ilŋiiḏini ŋiɽaŋali ŋulucina ŋeḏi ṯugwor ṯuŋwun ṯeḏina ṯi yeyna tatap eḏi zi ṯi erri ŋizaw, ŋikitaḏuŋw zi gwu kwizatuk eḏi Kwruztu-na; 10 ŋinderṯa ŋeni ŋwu, ma lomur ṯimayini kworɔ dap, ŋwu lufezi kwɔmne tatap duŋw kweḏi kilerena na kweḏi ṯurmun tɔk, ŋwu ruzi nda lutuput leni Kwruztu.
11 na eḏi Kwruztu-na tɔk ner afi keni nyiŋa ŋoru ŋeri, kaka ellirinyji gwu-na kerreny tuk ŋiɽaŋal ŋi ŋeḏi ŋgwa kweṯizerri tatap nizam gi kweḏi ṯugwor ṯuŋwun. 12 kaka urir gwu ŋeḏi ṯugwor ṯuŋwun er zi ukwazi nyiŋa liḏaḏu eḏortaḏa ŋiniṯi ŋuŋun, kaka mer gwu orɔ liŋna liməkizi ŋigileḏa kizen ŋundu ŋgi. 13 na ŋaŋa tɔk, ma gwu neŋne ŋiɽaŋali ŋirlalu, ŋeni ŋami tɔk ŋeḏi ŋigileḏa ŋalu, mindaŋ emnizaŋazi gwu tɔk, nuŋw uɽici ŋaŋwuzi nimra kwuŋwun kwir Tigɽim ṯirlinelu ter, kḏa ṯikitaḏuŋw gwu eḏuza, 14 eḏorɔ arbun weḏi ŋor ŋeri mindaŋ mer zi afi, ṯortaḏa ṯi ṯeḏi ŋiniṯ ŋuŋun.
ṯutalu ṯara ṯi ki yiriny edizelŋe ŋir ŋeḏi Allah ŋama-ŋamaŋ
15 ṯaŋwu, ŋiɽaŋal ŋi ŋu, nyi tɔk menyi neŋne ŋiɽaŋali ŋeḏi ṯəmna ṯalu ṯinani eḏi Kweleny-na kweni Yecu, na ṯamɽa ṯalu tɔk, ṯeṯi ṯi amɽi lizi leni lirlinelu ter ta, 16 nenyere kiraḏi ḏut eḏeca Allah zukran kweni ŋaŋa, menyi kiḏeyini ŋunduŋwu yiriny yalu ki ṯara na tinyi ki yiriny. 17 nyi kwari ki yiriny mindaŋ ma Allah weḏi Kweleny kweri kweni Yecu Kwruztu, wir Papa kweḏi ŋiniṯ inḏeḏa ŋaŋwuzi ṯigɽima ṯeḏi ṯeḏinayeyna na ṯeḏi ṯuruwenizelu eḏelŋe ŋunduŋwu beṯen eḏi kerrenyŋw la. 18 nenyi ari ki yiriny mindaŋ ma Allah inḏeḏa yey yeḏi rugwor ralu fori, mindaŋ ma eḏi ŋuma eḏelŋe ṯəkiza kizen kḏa ṯornaca ŋwi ŋaŋwuzi, na ŋurṯua ŋeḏi ŋiniṯ ŋeḏi ŋor ŋuŋun ki lizi-na leni lirlinelu ter eḏi Kwruztu-na.
ŋuma ŋeḏi Allah muŋw diɽa Kwruztuŋw ŋiɽany-na
19 nenyi ari ki yiriny mindaŋ ma elŋe ŋuma ŋuŋun ŋeni ŋupa ŋiminni, ŋeṯinani deŋgeri-na leṯalliḏa ŋunduŋwu rugwori nana. na Allah ruwezi ŋuma lu ŋu ŋeni ŋupa, 20 ogwumuḏuŋw gwu eḏi Kwruztu-na eḏi diɽa ŋunduŋwu ŋiɽany-na, na eḏi nəni ŋunduŋwu lu ki ṯii ṯuŋwun ṯeḏi mini, kezir weḏi yilim, 21 enuŋw gwu kwuṯemḏi hakwuuma la tatap zulṯa gi, na ŋuma la tatap ŋeleny ŋi, na yiriny la tatap yeḏi kla liḏaḏu, yiti yeṯinani ki ŋwomur ŋwu dak mac, lakin ki ŋwomur ŋwa ŋwinḏi tɔk; 22 nuŋw kete kwɔmne tatap ŋwara-na ŋwuŋwun, nuŋw ruzi ŋunduŋwu nda leḏi kwɔmne tatap kweḏi kaniiza, 23 kir aŋna wuŋwun, weṯiṯimaci ŋunduŋwu ŋiɽaŋali kworɔ dap, na ŋundu ta, eṯuŋw afi ṯurena kworɔ ṯeḏi Allah.