1 Yaa Sǝyyiḏ Ṯaawfulus, kiṯaab-na kiinyi kiŋna kǝthi kerreny-ŋwɔ, nǝŋǝ lɔcca kwomne tatap ŋgwa kwǝrrǝ Yǝcu nǝ kwaari-ŋgi @allima tok, ki-lɔɔmɔr-la kila laarɔŋw-li ibṯǝḏi ŋothɽor ŋuuŋun, 2 mindaŋ nǝ laamin iila limǝŋw-li dimmǝnni ki-leere. Laakin kinaŋw niti nidimmǝnnǝ-ŋgwɔ kinnǝni ki-leere mac tǝ, nɔŋw icci yaavɔra kiya yicca-ŋwsi-na rejmethi ŋɔma-ŋi ŋǝthi Ṯigɽim Ṯirllinǝlɔ ter, ethisi mithǝ. 3 Nǝ ki-ŋwaamin-la ŋwa ŋwir ruɽi-riɽǝn ŋwɔmǝŋw-ŋwi diiɽǝ ki-ŋiɽany-na, nɔŋwsi ruwǝnnicǝlɔ nyaamin-na nyittǝzir, mindaŋ etheere oro rɔgwor-na riɽǝ-riɽǝn mac, ŋiɽaŋal-ŋi ŋǝthi miithi kwuuŋwun. Nǝreese yǝy-yi naana yeeŋen, mindaŋ nɔŋwsi andaci ŋiɽaŋal ŋǝthi Ŋeeleny ŋǝthi Allah. 4 Mǝr aaɽathi dɔŋw, nɔŋwsi inḏǝthǝ waamira wuuŋwun wǝni-ŋwɔ, “Ǝṯi ruccǝ Urshaliim-ŋwɔna mac, laakin ǝkkici haḏiiyyǝ kizǝn wandica-ŋǝsi-yi, wir haḏiiyyǝ waari-yi Papa kwiinyi wa@ḏa. 5 Yuhanna kwǝṯaari @ammiḏa ŋaaw-ŋi, laakin ki-ŋwaamin-la ŋwɔ ŋwokwo ŋwinḏi ethiila, ǝṯaari ŋaaŋa @ammiḏa Ṯigɽim-thi Ṯirllinǝlɔ ter.”
Yǝcu mɔŋgwɔ allanni ki-leere-na.
6 Mǝ yaavɔr aaɽathi dɔŋw Yǝcu-ŋǝli, nǝr uṯicǝlɔ nǝrǝccǝŋw, “Kweeleny a kwaɽicǝ Israa-iila Ŋeelenyi ki-lɔɔmɔl-la ṯǝ lir kaka kɔlɔ-a?”
7 Nǝsi Yǝcu ǝccǝŋw, “Ŋaalɔ ŋiti ŋir mac ŋǝthi-ŋi elŋe ŋwaaminɔ-ŋwɔsi ŋwɔɔmɔr-ŋi ŋwɔgittasi Papa kwiinyi sɔlṯa-gi kwuuŋwun, nǝreere oro ŋaalɔ mac ethisi elŋe ŋinḏi ethi naani ṯaccaŋ tuk. 8 Laakin mǝ Ṯigɽim Ṯirllinǝlɔ ter ɔɽatha daŋgal-na tǝ, kwɔŋǝsi urǝzi ŋɔma-na deddep, mindaŋ ǝŋi ɔnḏi kiyǝnǝ ŋǝni nyii, ki Urshaliim-na nǝ Yahuuḏiiyyǝ-ŋwɔ naana tatap, nǝ Saamira tok, nǝ ǝzir naana wandi-gwɔ ṯurmun-lɔ cuk-cuk.” 9 Mɔŋwsi andaci ŋɔ tǝ, nɔŋw dimmǝnni-lǝ ki-leere, mindaŋ mǝr iccasila tǝ, nǝ lebleth kwuɽubǝthǝ ŋunduŋw kiyǝnǝ yeeŋen.
10 Nǝ kinaŋw mɔŋwsi ɔrlacci ŋwɔdoŋw etheele, nǝr ɔnḏasi yǝy yeeŋen leereya naana kwɔrop, e-ta nǝsi lɔr ndǝn liginna yirethi yifiithɔ per-per irlacalɔ. 11 Mindaŋ nǝrsǝccǝŋw, “Lɔr lǝthi Jǝliil-ŋwɔ, ŋaaŋa laaritha nirliŋa kinaŋw niccasa-ŋa leereya-la? Yǝcu-ṯǝ ŋgwa kwɔmǝr-ŋǝsi dimmǝthǝ ethigeele ki-leere-na, kwaaɽa kaka-ṯaŋw niisaŋa-gwɔ ǝllithi-ŋgwɔ ki-leere-na.”
Kaavɔr kimǝr mɔrthasi ki-lɔɔbi lǝthi Yahuutha.
12 E-ta nǝ yaavɔr diiɽǝ kinaŋw kaayin wǝni Zeṯuun wir ŋaajara nus miil min mǝḏiinǝ, nǝr aaɽitha Urshaliim. 13 Mǝr ɔnḏi ki-mǝḏiinǝ-nǝ nǝreele nǝr dallɔ ki-lithmin-na kǝzir wǝṯir-gwɔ naani, Bɔṯrɔs-ŋǝ Yuhanna-gi, Ya@guub Anḏraaws-gi, Fiilibbus-ŋǝ Ṯɔɔma-gi, Barṯulamaaws-ŋǝ Maṯṯa-gi, Ya@guub kwir tǝr tǝthi Halfa, Sim@aan kwǝṯi ṯogthi ethi kǝdu bǝlǝḏǝ kwuuŋwun, nǝ Yahuuthǝ kwir tɔr tǝthi Ya@guub. 14 Ǝṯir andindathi dɔŋw ethi ǝrri-ri kiyiiriny laaw-li nǝ Mǝryǝm kwir lǝnyin kwǝthi Yǝcu-ŋǝ, nǝ liyeŋgen tok lir lɔr.
15 Mǝ ŋwaamin ŋwokwo ere tǝ, nǝr aaɽathi dɔŋw mindaŋ nǝ Bɔṯrɔs diiɽi kelgeny-na kǝthi ṯalaamiiz, nǝ kila linaanɔ kinaŋw nǝroro tatap ruɽi-nyirlil, 16 nɔŋwsǝccǝŋw, “Liyǝŋgǝri liinyi ŋiɽaŋal ŋɔlɔɔthɔna Kiṯaab-na Kirllinǝlɔ ter ŋimǝ rattathi ŋandisasi Ṯigɽim Ṯirllinǝlɔ ter Ḏaawḏ-ŋgi kerreny tuk, ŋǝthi Yahuuthǝ ŋgwa kwɔmǝ mɔlca Yǝcu-ŋwɔ lizi mindaŋ nǝr mithǝ. 17 Nɔŋworo kwette kwǝthi lɔdɔgw lǝri ki-ŋothɽor-na.” 18 Nǝ Yahuuthǝ iila ṯɔrɔny gwuruush-gi ŋgwa kwaava-ŋwɔ kwǝthi ŋiɽaŋal ŋuuŋun ŋigii, nɔŋw iidi nda-li, nɔŋw ɔvi kaari wɔlac, mindaŋ nǝ kwomne tatap kiwǝthi kaarinanw balthalɔ balac. 19 Nǝ lizi tatap linannɔ Urshaliim neŋne ŋiɽaŋali ŋɔ, ŋwɔṯaŋw mindaŋ nǝr ǝnyjici ṯɔrɔny yiriny kandisa-gi keeŋen yǝniŋw, “Hagil Ḏamakh”, ŋǝniŋw ṯɔrɔny ṯǝthi ŋin.
20 “Kaka lɔɔthɔnar-gwɔ Kiṯaab-nǝ kǝthi Mazaamiir ŋaarɔŋw,
‘Ethi dɔɔnɔ kwuuŋwun ɔpannalɔ, ǝgwɔ kwizi kweere ere nanni-na mac’.
Nǝr lothone kwokwony ŋaarɔŋw,
‘Ethi kwette mɔrthathi ki-ŋothɽor-la ŋuuŋun’.
21 Nǝrṯoroŋw, nǝr saawi ethi kwette kwǝthi kila lǝṯir-li rɔɔmɔthi ŋwaamin tatap ŋwa ŋwɔnaani-ŋi Kweeleny kwǝni Yǝcu dǝŋgǝr-nǝ, ŋwɔṯɔŋw-ŋi irǝrǝlɔ, 22 min ki-laamin-la limǝ-li Yuhanna aari ibṯǝḏi ethaari @ammiḏa, lahaḏḏɔ ki-laamin-la limǝŋw-li dimmini kithaay kimaara dǝŋgǝr-nǝ, nǝ laazim ŋworo shuhuuḏ kwǝthi ṯidiiɽǝ ṯuuŋwun ki-ŋiɽany-na.”
23 Nǝr alla lɔɔrɔ ndǝn Yuusuf kwǝni Baarsaaba kwǝṯir ǝccǝ Yuusṯus nǝ Miṯṯiyaas tok, 24 mindaŋ nǝraari kiyiiriny nǝraarɔŋw, “Kweeleny a kwilŋithi ǝfkǝrǝ wǝthi lizi tatap, ŋwɔṯaŋw ilŋithinǝ-nyji ǝyǝ kwɔrɔ kwette kwɔmǝ allana kwǝthi kɔlɔ lir ndǝn, 25 ethi akkɔ ŋothɽor ŋǝthi paavɔr ki-lɔɔbi lǝthi Yahuuthǝ, ŋa ŋimǝ-ŋwsi ṯayyalɔ mindaŋ nɔŋweele kǝzir wɔvthannica.” 26 Ṯaŋw nǝr kaṯṯɔ gwɔra@ minaaŋ nɔŋw iidi ethi Miṯṯiyaas-la, mindaŋ nǝr ɔɽɔmaṯṯi yaavɔr-yi dɔŋw yir wrii-kwette.