Ṯigɽim ṯir rerrem nǝ ṯir ŋidiny.
1 Limɽi liinyi ǝṯeere ǝmminici rigɽimǝ tatap mac, laakin ǝṯi kǝniny ṯǝccici rigɽimǝ ethisi ese nɔrɔr-gwɔ rǝthi Allah alla bǝri. Kaka mǝgwɔ liɽii lir lǝluŋw luuru faathitha ṯurmunǝ naana. 2 Nǝrṯoro ŋɔ ŋǝŋi elŋe Ṯigɽimǝ ṯǝthi Allah: ṯigɽim kitha ṯinḏi ethi ruwǝzi Yǝcu Kwɔrɔstɔ-ŋwlɔ ethaarɔŋw kwinḏi aŋna-yi, nɔŋworo ṯǝthi Allah, 3 nǝ ṯigɽim ṯeere nyithak ṯiti ṯǝṯi ruwǝzi Yǝcu-ŋw-lɔ mac, ṯǝthi Allah ṯiti ṯir mac. Nǝ ṯigɽim ṯɔrtɔtɔŋw ṯir ṯuwǝn ṯǝthi Kwɔrɔstɔ, kitha ṯiniŋnaca-ŋa ṯarir-thiŋw ṯinḏi ethiila, nǝ ṯǝni ṯimǝ ɔppatha ki-ṯurmun-nǝ kerreny tuk. 4 Kwelle kwiinyi, ŋaaŋa lǝthi Allah lɔrɔ, e-ta nǝsi-mǝ illasi kii; kaka ŋgwa kwɔnaani-ŋǝsi-gwɔ-na kwɔppa kwuthamthi-lǝ ŋgwa kwɔnaanɔ ki-ṯurmun-nǝ. 5 Lǝthi ṯurmun-nǝ lɔrɔ, ŋwɔṯaŋw ŋa ŋǝṯirsi andasi, nǝroro ŋǝthi ṯurmun, ŋwɔṯaŋw ǝṯisi-mǝ ṯurmun kettice yǝni. 6 A kwɔrɔr lǝthi Allah. Kweere kwǝṯi elŋǝ Allah ǝṯɔŋw kettice nyuŋwsi kǝni, nǝ ŋgwa kwiti kwir kwǝthi Allah mac, ǝṯɔŋweere kettice nyuŋwsi kǝni mac. Ŋiɽaŋal-ŋi ṯǝ ŋɔ, ǝrŋi elŋǝ ṯigɽimǝ ṯir rerrem, nǝ ṯir ŋidiny tok.
Ṯamɽa ṯǝthi Allah.
7 Limɽi liinyi, ǝri amɽathisi-na wɔɽe-wɔɽeny; kaka nɔrɔ-gwɔ ṯamɽa ṯǝthi Allah, kweere kwǝthi ṯamɽa nɔŋwɔni kwilŋinna ŋelŋe-ŋi ŋǝthi Allah, nǝ ǝṯɔŋw elŋe Allah tok. 8 Ŋgwa kwiti kwǝthi ṯamɽa-na mac ta, nɔŋweere elŋe Allah tok mac; kaka nɔrɔ-gwɔ Allah ṯamɽa. 9 Nǝrṯǝ oro ŋɔ ŋurwǝzǝ-ŋi Allah ṯamɽalɔ ṯuuŋwun dǝŋgǝr-nǝ, ŋiɽaŋal-ŋi ŋɔɔsa-ŋi Allah Tɔɔrɔ tuuŋwun ṯɔtɔpɔt ki-ṯurmun-nǝ, mindaŋ mǝr miithi ŋundu-ŋgi. 10 Ki-ŋiɽaŋal-na ŋɔ nǝ ṯamɽa oro, nǝreere ǝniŋw a kwamɽa-ri Allah mac, laakin nɔŋworo ŋundu kwamɽa-nyji mindaŋ nǝŋw-ma ɔɔsa Tɔɔrɔ tuuŋwun ethoro ṯifivrinnǝ ṯǝthi ŋikiya ŋǝri. 11 Limɽi liinyi, mǝnyji-ṯǝ Allah amɽiŋw beṯṯen tǝ, laazim nyiiŋǝ tok ǝriṯǝ amɽathisi-naŋw wɔɽe-wɔɽeny. 12 Kwende kweere kwɔmǝ ese Allah mac; nǝ mǝr amɽathis-na wɔɽe-wɔɽeny tǝ, ǝmǝ Allah ɔmi dǝŋgǝr-nǝ, mindaŋ ǝmǝ ṯamɽa ṯuuŋwun oro min-min dǝŋgǝr-nǝ.
13 Nǝ ŋiɽaŋal-ŋi ṯǝ ŋɔ, ǝrselŋe ethaarɔŋw, a kwǝṯir naani duŋgwun-nǝ, nǝ ŋundu ǝṯɔŋw naani dǝŋgǝr-nǝ, kaka ninḏǝthǝ-ŋgwɔ nyuŋwsi Ṯigɽimǝ ṯǝthi rogɽo ruuŋwun. 14 Ŋimǝrsi ese nǝ nǝr-ŋi kette shahaaḏa ethaarɔŋw, Papa kwɔɔsa Tɔɔrɔ tuuŋwun ethoro Kwiglǝthǝ kwǝthi ṯurmun. 15 Kweere nyithak kwǝṯi andisalɔ por-por ethaarɔŋw Yǝcu kwir Tɔr tǝthi Allah, ǝṯi-gwɔ Allah ɔmina, nǝ ǝṯɔŋw ɔmi ethi Allah-na tok. 16 Ŋwɔṯaŋw nǝr elŋe, na nǝr ǝmminici ṯamɽa kitha ṯǝthicǝ-nyji Allah. Nǝ Allah oro ṯamɽa, nǝ ŋgwa kwǝṯɔɔmi ki-ṯamɽa-na, ǝṯɔŋw ɔmi ethi Allah-na tok, nǝ ǝṯi-gwɔ Allah ɔmina tok. 17 Nǝ ki-ŋiɽaŋal-na ŋɔ ǝṯi ṯamɽa oro min-min dǝŋgǝr-nǝ, mindaŋ mǝroro luugwul ki Laamin-la lǝthi Hɔkwɔm, kaka nɔrɔ-ŋgwɔ-ṯǝŋw ŋundu ki-ṯurmun-nǝ kɔthɔ, ǝri-ṯǝ oroŋw nyiiŋǝ tok. 18 Ṯamɽa ṯiti ṯǝṯǝthi ŋithenya-na mac, laakin ǝṯi ṯamɽa ṯir min-min kaṯṯɔ ŋithenya kinǝŋgwu tuk. Kaka nǝṯi-gwɔ ŋitheny iilathisi hɔkwɔm-yi. Ŋgwa kwǝṯi ṯeenye kwiti kwǝthi ṯamɽa ṯir min-min mac. 19 A kwǝṯir amɽi kaka nɔrɔ-ŋgwɔ ŋundu kwamɽa-nyji kerreny. 20 Mɔŋwaarɔŋw kweere, “Nyii kwǝṯi amɽi Allah”, mindaŋ mɔŋw wǝzi eŋgen, e-ta nɔŋworo kwǝluŋw; nǝ ŋgwa kwiti kwǝṯi amɽi eŋgen mac ŋgwa kwiisa-ŋw yǝy-yi, ŋweere ǝṯhi ŋɔma tok mac ethi amɽi Allah wa witi wiisa-ŋw mac. 21 Nǝṯǝ waamir oro wɔ waavar naanɔ-ŋgwɔ wǝni-ŋwɔ, mǝ kweere amɽi Allah tǝ, laazim ŋwamɽi eŋgen tok.
aza 4
eḏi zi ṯeci ŋeḏi ŋiɽya mer orɔ ŋirlalu ya ŋidiny
1 limɽi linyi, eṯere emnici rigɽima tatap mac, lakin eṯi zi ṯeci mer orɔ redi Allah ya beri; kaka ruḏir gwu liɽi litezir ki ṯurmun lir ŋidiny. 2 a ŋi ṯa elŋe Tigɽima ṯeḏi Allah ŋwu: ṯigɽim ṯere ṯunḏizi Yecuŋw Kwruztu ki, ṯaruŋw, kwumila kwir aŋna, ṯinderṯa ṯir ṯeḏi Allah. 3 na ṯigɽim ṯere ṯiti ṯunḏizi Yecuŋw ki, ṯinderṯa ṯiti ṯir ṯeḏi Allah mac. ṯinderṯa ṯiri ṯigɽim ṯir ṯuwən ṯeḏi Kwruztu, ṯiniŋnacaŋa rac ṯinḏi eḏila, na kḏu ṯinani kirem ki ṯurmun-na. 4 kwelle kwinyi, a liri leḏi Allah na limezi illazi ki kla lir liɽi ŋidiny, kaka ŋgwa kwunanni daŋgal-na kwuṯemḏi ŋunduŋwu kwunani ki ṯurmun-na. 5 liri leḏi ṯurmun, ŋwu ṯaŋwu, eṯir zi andazi ŋir ŋeḏi ṯurmun, na eṯi zi ṯurmun niŋnaci. 6 nyiŋa liri leḏi Allah, na kwete nyiḏak kwilŋiiḏi Allah, eṯuŋw niŋnaci nyuŋwuzi, lakin ŋgwa kwiti kwiri kweḏi Allah mac, eṯuŋw ere niŋnaci nyuŋwuzi mac. eṯir ŋi ta elŋe Ṯigɽima ṯeḏi ŋirlalu, na tigɽima ṯeṯi zi mulɔtɔ eḏaki ŋiɽaŋali pir.
eḏamɽi Allah na eḏi zi amɽi liḏaḏu
7 limɽi linyi, er amɽaḏizina, kaka ur gwu ṯamɽa ṯeḏi Allah, na kwere kwetizamɽi, kwunde kwir kwilŋiiḏir ŋelŋe ŋi ŋeḏi Allah, na eṯuŋw elŋe Allah tɔk. 8 kwiti kwetizamɽi mac, eṯuŋw ere elŋe Allah mac, kaka ur gwu Allah ṯamɽa. 9 ṯamɽa ṯeḏi Allah ṯimɔ ruwene lu deŋgeri-na, uza gwu ṯa Allah Toru tuŋwun tutuput ki ṯurmun-na eḏafi nyuŋwuzi ŋimiiḏa ŋuŋun. 10 na ṯamɽa kḏu, nuŋw ere orɔ ṯamɽa ṯeri ṯeṯir ṯi amɽi Allah mac, lakin eṯuŋw orɔ ṯamɽa ṯuŋwun ṯimɔŋw ṯi amɽi nyuŋwuzi, uzicaŋw gwu nyuŋwuzi Toru tuŋwun eḏorɔ kra timəmiḏi nyuŋwuzi-na Allah yi, dimicaŋw gwu nyuŋwuzi ŋikyaŋi ŋeri kiṯay. 11 limɽi linyi, kaka amɽanyji gwu Allah ṯa ŋwu, er ṯa amɽaḏizina wuɽe-wuɽeny. 12 kwizi kwiti kwere kwumeze Allah ḏuṯ; mer amɽaḏizina ta, eṯinyji gwu Allah nanni-na, na ṯamɽa ṯuŋwun ṯimorɔ minmin deŋgeri-na.
13 kaka inḏeḏaŋw gwu nyuŋwuzi Tigɽima ṯuŋwun, ṯaŋwu eṯir ŋi elŋe eḏaruŋw, a kweṯir nanni duŋgwun-na, na ŋundu ta, eṯuŋw nanni ki rugwor-na reri lere lere. 14 na ŋimenyjeze, nenyi ŋi unḏi ki ŋeni ŋwu, Papa wumuza Toru tuŋwun eḏorɔ Kwigileḏa kweḏi ṯurmun. 15 kwete nyiḏak kwari pɔrpɔr ŋwu: Yecu kwiri Tor teḏi Allah, eṯi gwu ṯa Allah nanni duŋgwun-na, na eṯuŋw gwu nanni ŋundu tɔk eḏi Allah-na. 16 ṯaŋwu, a kwilŋiiḏir ṯamɽa ṯeṯi ṯi Allah amɽi nyuŋwuzi ner emnici tɔk. Allah wiri ṯamɽa, na ŋgwa kweṯi dirnaṯi ki ṯamɽa-na, eṯuŋw dirnaṯi eḏi Allah-na. 17 ŋinderṯa ŋu ŋir ṯamɽa ṯir minmin, eḏami bɽeḏi rugwor lu pet ki lamin leḏi zeyria; kaka urŋw gwu ŋundu ṯa ŋwu ki ṯurmun kḏu, eṯir ṯa orɔ keni nyiŋa ŋwu tɔk. 18 ezir witi mac eḏi gwu ŋiḏeny nanni ki ṯamɽa-na, lakin eṯi ṯamɽa ṯir minmin kaṯu ŋiḏenya kiṯay wur. kaka eṯi gwu ŋiḏeny-ŋa orɔ hukm yi duŋw, na ŋgwa kweṯinanni. ŋiḏeny ŋi kwiti kweḏi ṯamɽa-na mac ṯir minmin. 19 a kweṯir eḏizi ṯamɽa ki rugwor-na reri kaka amɽaŋw gwu nyuŋwuzi kerreny. 20 muŋw ari kwere: nyi kwamɽa Allah, muŋw uwezi eŋgen, kwunderṯa kwir kwəluŋ. muŋw ere amɽi eŋgen mac, kwijina yey yi ta, kwiti kweḏi ŋuma mac eḏamɽi Allah, witi wijina mac. 21 nuŋw inḏeḏa nyuŋwuzi amra wu: ŋgwa kweṯamɽi Allah, ŋofḏana eḏuŋw amɽi eŋgen tɔk.