Ŋiɽaŋal ŋandisasi Isṯifaanuus.
1 Nǝ Rǝ-iis Rɔppa rǝthi kahana uṯici Isṯifaanuus-ŋwɔlɔ nɔŋwɔccǝŋw, “Ŋir rerrema?” 2 Nǝ Isṯifaanuus ǝŋnici nɔŋwɔccǝŋw, “Liyǝŋgǝri-ŋǝ papa-ŋǝli niŋnacar-nyii-ṯi! Kinaŋw niti mǝ papa kwǝri kwǝni Ibraahiim ele ethi nanni Haaraan kinnǝni mac, nǝ Allah wǝthi ŋinith ruwǝthithǝ naana kinaŋw naanɔ-ŋgwɔ Beinǝ Nahrein, 3 nɔŋwɔccǝŋw, ‘Durṯu a ṯayyi bǝlǝḏǝ-lɔ kwɔɔŋa, mindaŋ ele ki-bǝlǝḏ kwir ter kwɔŋǝ andaci’. 4 Ṯaŋw nɔŋw ṯayya bǝlǝḏǝ-lɔ kwuuŋwun nɔŋweele eṯhi nanni Haaraan. Mindaŋ mǝ ṯǝrnyin ṯǝṯhi Ibraǝhiim-ŋǝ ai ṯǝ, na Allah iilǝ ki-bǝlǝḏǝ-nǝ ŋgwɔ kwɔnaaniŋa-gwɔ kire-kirem-ŋgwɔ. 5 Laakin nǝ Allah ere inḏǝthǝ Ibraahiim-ŋwɔ tǝzir tokwo kinnǝni mac, wala kaaga kɔtɔpɔt kǝthi wurǝyu tok mac, laakin nǝtǝ Allah ǝccǝ wa@ḏa ethi inḏǝthǝ ŋunduŋw ṯǝ wɔ ethoro wǝthi rogɽo ruuŋwun, nǝ wǝthi ŋwɔɔla ŋwuuŋwun tok. Nǝ ki-lɔɔmɔr-la lǝccǝŋw-li wa@ḏa, nǝ Ibraahiim ere ǝthi kinnǝ nyɔɔrɔ nyeere mac. 6 Ŋindǝr-ṯǝ ŋɔ ŋandicasi Allah ŋǝccǝŋw-ŋiŋw, ‘Ŋwɔɔlaa ŋwɔɔŋa ŋwinḏi ethi nǝnni ki-bǝlǝḏ kwiti kwir kweeŋen mac, kǝzir winḏir-gwɔ ethoro lɔwaay, mindaŋ ǝrsi ǝwɽi yǝy-lɔ yithlǝyu ruɽi-ṯuɽi. 7 Laakin nyǝccǝ lizi haakimǝa kila linḏirsi ethisi ǝkkici ŋothɽor, nǝ kwaathan-tǝ, ǝri ruuthǝ kithaay ki-bǝlǝḏ-nǝ ŋgwa, mindaŋ ǝrnyii kwogwɔccelɔ kǝzir wɔ’. 8 E-ta nǝ Allah inḏǝthǝ Ibraahiim-ŋwɔ kuruu kǝthi-gi unduni ŋwɔthrɔnya kir @alaama wǝthi wa@ḏ wuuŋwun. E-ta nǝ Ibraahiim uɽu Is-haag-ŋwɔ lɔthrɔnya ki-ŋwaamin-la ŋwir dɔvokwɔppa ŋwɔthi ŋelŋe ŋuuŋun; nǝ Is-haag tok uɽu tiɽiŋǝyin tǝni Ya@guub, na nǝ Ya@guub uɽu nyiɽiŋǝyin nyir wrii-kwuɽǝn, kinya nyimoro lugwurnǝ lǝri.
9 “Nǝ lugwurnǝ kiici eŋgen kweeŋen ŋiɽany kwǝni Yuusuf, mindaŋ nǝr iila ŋunduŋw ethoro kwɔwaay Mɔsir-na. Laakin nǝtǝ Allah naanaci, 10 nǝ ki-ṯurvǝ-nǝ tuuŋwun tatap nǝtǝ Allah aŋraci ethi nannatha kwisaaw. Nǝ mǝ Yuusuf iila kiyǝnǝ yǝthi mǝlik kwǝthi Mɔsir-ŋwɔ, nǝ Allah inḏǝthǝ ne@ma nǝ ṯǝthinǝ yǝnǝ tok, mindaŋ nǝ mǝlik ruusi Yuusuf-ŋwɔ haakim wǝthi bǝlǝḏ tatap, nǝ dɔɔnɔ kwǝthi ŋeeleny tok. 11 E-ta nǝ yaaŋwɔ karbatha Mɔsir-ŋwɔ naana tatap, nǝ Kan@aan-ŋwɔ tok, mindaŋ nǝraava ṯurvǝ ṯɔppa ṯimni. Nǝ lugwurnǝ lǝri ere ǝthi ethneyǝ-na weere mac, 12 mindaŋ mǝ Ya@guub neŋne ethaarɔŋw ŋwan ŋwana Mɔsir-na tǝ, nɔŋw ɔɔsi kwelle kwuuŋwun, kwir lugwurnǝ lǝri, lǝni linḏi etheele ṯaay-thi kwon-kwon. 13 Nǝ mǝr aaɽi ki-taamin tithaathɔ, nǝsi Yuusuf ruwǝnnicǝ-lɔ, mindaŋ nǝ mǝlik kwǝthi Mɔsir-ŋwɔ elŋe lizi lǝthi dɔɔnɔ kwǝthi Yuusuf. 14 E-ta nǝ Yuusuf ṯiŋacci ṯǝrnyin ŋiɽaŋali ṯǝni Ya@guub, nɔŋwsi andaci dɔɔnɔ-ŋgana tatap kwǝthi lizi-nǝ lir ruɽi-ṯoɽol-la wrii-ṯɔthni ethi diiɽǝ ethiilǝ Mɔsir. 15 Ṯaŋw nǝ Ya@guub ele Mɔsir, kǝzir wɔmǝr-gwɔ ai ŋundu-ŋǝ nyɔr-nyi nyuuŋwun. 16 Mindaŋ nǝr ɔṯa ŋwiyaŋi ŋweeŋen nǝr-ŋi iila Shakiim, kǝzir wɔmǝrsi-gwɔ aanitha ki-thimaamɔ-na ṯiliṯṯathi Ibraahiim nyɔɔrɔ nyǝthi Haamuur gwuruushǝ.
17 “Laakin mǝ lɔɔmɔr aadithi keṯṯok kila linḏi-li Allah ethi ṯimmaci Ibraahiim-ŋwɔ wa@ḏa, nǝ lizi kikiɽǝthi tok Mɔsir-na mindaŋ nǝr uri deddep. 18 Nǝ kwaathan-tǝ nǝ mǝlik iila kwir ter kwiti kwilŋithi Yuusuf-ŋwɔ mac, mindaŋ nɔŋw mithǝ Mɔsir-ŋwɔ. 19 Nɔŋw ǝrri rǝrnyǝriŋwɔ-silɔ biḏinǝ-biḏinǝ, nɔŋwsi kǝgiṯici nyɔɔrɔ par nyǝṯirsi elŋe taay-thi ethi-gwɔ ai. 20 Nǝ ki-lɔɔmɔr-la ṯǝ kila nǝr elŋe Muusǝ-ŋwɔ mindaŋ nɔŋw saawi ŋɔɔrɔ beṯṯen kiyǝnǝ yǝthi Allah. Mindaŋ nǝr aŋraci yǝwǝ ṯoɽol ki-dɔɔnɔ kwǝthi ṯǝrnyin, 21 mindaŋ mǝr ruwazǝlɔ pǝr, nǝ tǝr tǝthi mǝlik kwǝthi Mɔsir-ŋwɔ tir tiira dimmi nɔŋw ruusi tɔr tuuŋwun. 22 Nǝrǝccǝ @allima ṯǝthinǝ yǝnǝ ṯǝthi Mɔsriyyiin, mindaŋ nɔŋw ǝthi ŋɔma kandisa-gi nǝ ŋothɽor-ŋi tok.
23 “Mǝ Muusǝ oro yithlǝyu ruɽi-riɽǝn, nɔŋw kittatha etheele ethi raaŋitha lizi luuŋwun lir Israa-iil. 24 E-ta nɔŋweese kwette kweeŋen kwǝwɽǝ Kwɔmɔsrii yǝy-lɔ, mindaŋ nɔŋweele ethi mǝcci mindaŋ nɔŋw ɽeenye ŋgwa kwir Kwɔmɔsrii. 25 Nɔŋw kittatha ethaarɔŋw liyeŋgen luuŋwun lelŋe ethaarɔŋw kwɔɔsa Allah ethisi alla, laakin nǝrseere elŋe ŋɔ mac. 26 Mǝ ŋɔrpɔ-ŋgwa oro, nɔŋweese lizi ndǝn lir Israa-iil lurrǝthu, mindaŋ nɔŋwsi ṯǝcci ethisi ǝmmithinǝ nɔŋwsǝccǝŋw, ‘Niŋnar-ṯi lɔr laalɔ ŋaaŋa lirpa ŋiyaŋga, nǝ aatha kwurrǝthicǝ-ŋǝ?’ 27 Laakin ŋgwa kwir kaṯṯi nɔŋw ove Muusǝ-ŋwɔ wur, nɔŋwɔccǝŋw, ‘Ǝyǝ kwɔrɔ kwuruusǝ-ŋǝ rǝ-iis nǝ gaaḏi dǝŋgǝr-lǝ? 28 A kwɔnaŋna-nyii ethi ɽeenye kaka niɽinyithi-ŋǝ-gwɔ Kwɔmɔsriiya kilginǝ?’ 29 Mǝ Muusǝ neŋne ŋiɽaŋali ŋɔ, nɔŋw avri Mɔsir-nǝ nɔŋweele Miḏiyaan mindaŋ nɔŋw elŋe nyiɽiŋǝyin nyiɽǝn nyir nyoŋwor kinanaŋw.
30 “Mǝ yithlǝ ere ruɽi-riɽǝn, nǝ meleka ruwǝthǝthǝ Muusǝ-ŋw naana kwaaɽi-gi kwɔfɔɔdɔ iigǝŋi ki-sahraa-na kwɔnanyja ayinɔ-lɔ keṯṯok wǝni Siinaa. 31 Nǝ Muusǝ liŋɽi beṯṯen kwomne-gi ŋgwa kwiisa-ŋwɔ, mindaŋ nɔŋw dɔŋgwatha kwaaɽi naana keṯṯok ethaami eseŋw. Laakin nɔŋw niŋnaci ṯogɽo ṯǝthi Kweeleny ṯǝccǝŋw, 32 ‘Nyii kwir Allah wǝthi rarnyalɔ ŋǝ, Allah wǝthi Ibraahiim, nǝ Is-haag, nǝ Ya@guub’. E-ta nǝ Muusǝ ṯeenye nɔŋw ɔnḏɔthi nɔŋweere bonye etheese ǝzir wa mac. 33 Nǝ Kweeleny ǝccǝŋw, ‘Ǝlli yithwǝnu yɔɔŋwa kithaay ki-ŋwaara, kaka nirllinǝ-gwɔ ǝzirlɔ wa ter wirliŋa-gwɔla. 34 Nyii kwɔmǝ ese ṯurvǝ ṯɔppa ṯǝthi lizi liinyi Mɔsir-na. Nyii kwɔmǝ neŋne ŋwɔɽundulǝ ŋweeŋen, mindaŋ nenyii-mǝ ɔɽa ethisi alla ki-ŋɔwaay-na. Ila kire-kirem-ŋgwɔ, ŋǝ ɔɔsi Mɔsir-na’.
35 “Nǝ Muusa oro kwette kwɔmǝ lizi lǝthi Israa-iil dirnathalɔ mindaŋ nǝrǝccǝŋw, ‘Ǝyǝ kwɔrɔ kwuruusǝ-ŋǝ rǝ-iis nǝ gaaḏi ethi ǝccǝ nyuŋwsi haakima?’ Nǝ nɔŋworo kwette kwɔɔsa Allah ethoro kweeleny nǝ kwiglǝthǝ kwǝthi lizi mindaŋ ethisi alla lɔɔɽall-li nǝ ṯimǝccǝ-thi ṯǝthi meleka ŋgwa kwuruwǝthu Muusǝ-ŋw naana kwaaɽi-na ŋgwa kwɔfɔɔdɔ iigǝŋi. 36 Nɔŋw ruwǝ lizi Mɔsir-na, ǝrrǝ-ŋgwɔ ŋilima-ŋwɔsi kwomne-gi kwir ŋwundǝ-ŋwundǝ Mɔsir-na ki Bahar El-ahmar, mindaŋ nǝr nanni yithlǝyu ruɽi-riɽǝn ki-sahraa-na. 37 Nǝ Muusǝ oro kwǝccǝ lizi lǝthi Israa-iil-ŋwɔ, ‘Allah wɔŋǝsi usicǝ kwiɽiiya kwette, kaka-ṯǝ nɔɔsǝ-ŋgwɔ nyuŋwɔ, kwinḏi ethoro kwette kwaalɔ daŋgal-na’. 38 Nɔŋworo kwette kwɔnaanir lizi-li lǝthi Israa-iil dɔŋw ki-sahraa-na; nɔŋw naani kinanaŋw rǝrnyǝri-ŋǝli nǝ meleka ŋgwa tok kwɔmǝ andaci kaayin-la wǝni Siinaa, mindaŋ nɔŋw aava ŋiɽaŋali ŋimiithɔ naanɔ-gwɔ Allah ethisi tǝllicǝ nyuŋwsi.
39 “Laakin nǝ rǝrnyǝri-ŋǝ derne ethi iinyici ŋunduŋw naana; nǝr ove kithaay, mindaŋ nǝrǝthi sɔɔrɔma ethaaɽitha Mɔsir-na. 40 E-ta nǝrǝccǝ Haaruun-ŋwɔ, ‘Daɽimica-nyji riiɽuwǝ ǝrnyji mɔmlotto, kaka niti nilŋithiny-gwɔ mac aatha kwɔmǝ ǝrrinici kwɔɔrɔ ŋgwɔ kwǝni Muusǝ, ŋgwa kwuruwǝ-nyji Mɔsir-na’. 41 Nǝr ṯoo tithri, mindaŋ nǝr kettice kiraama, mindaŋ nǝr aamina kwomne-gi kwuthuuthur kwǝthi ŋothɽor ŋǝthi rii reeŋen. 42 Laakin nǝsi Allah ɔrlacci ŋwɔdoŋw, ethi kwogwɔcce rɔɔrɔm-lɔ kaka nɔlɔɔthonar-gwɔ Kiṯaab-na kǝthi liɽii ŋaarɔŋw,
‘Lizi lǝthi Israa-iil!
Nyii-ti kwir mac ŋgwa kwɔgittica-ŋa kiraama kwomne-gi
ŋgwa kwǝṯi undundu kworo yithlǝyu ruɽi-riɽǝn
ki-sahraa-na.
43 Nǝ kheme oro ŋga kǝthi ṯiiɽu ṯǝni Mulɔkh kǝṯi appila, nǝ
suurǝ kwǝthi ṯiiɽu ṯǝni Ramfaan,
kwir ṯɔɔrɔm ṯir ṯiiɽu ṯaalɔ, kaka nɔrɔr-gwɔ riiɽu raalɔ,
kaka nɔrɔr-gwɔ riiɽu rǝṯirsi kwogwɔccelɔ, ŋwɔṯaŋw ŋǝsi iili
ki-ŋɔwaay-na tuk Baabil-ŋwɔ ṯɔɔɽɔthala’.
44 “Nǝ rǝrnyǝri-ŋǝ ǝthi khemeya kǝthi shahaaḏa ki-sahraa-na. Nɔŋw daɽimanni kaka-ṯǝ nandica-gwɔ Allah Muusǝ-ŋwɔ. 45 Nǝ kwaathan-tǝ nǝ lugwurnǝ lǝri dimmǝ khemeya ŋga kaavar naanɔ-gwɔ rǝrnyin-ŋǝ reeŋen, nǝrgeele kinaŋw ninḏir Yashuu@-ŋǝli, mindaŋ nǝr aavi bǝlǝḏǝ kwǝthi Umam wa wɔmǝ Allah rutti kithaay. Ŋwɔṯaŋw nɔŋw nannitha mindaŋ nǝ lɔɔmɔr iila lǝthi Ḏaawḏ. 46 Nɔŋw ǝmi Allah-na, mindaŋ nɔŋw uṯicǝlɔ ethi duŋgwǝci ŋunduŋw, ethi ǝccici dɔɔnɔŋw kwǝthi Allah wǝthi Ya@guub. 47 Laakin nǝ Sulemaan oro kwɔmǝ ǝccici dɔɔnɔŋwɔ.
48 “Laakin ǝṯi Allah Wɔppa Wuthǝmthi-lǝ Pur-pur ere nanni ki-yiŋna-na mac yaccasi lizigwunǝŋ; kaka nandisa-gwɔ kwiɽii naarɔ-ŋgwɔŋw,
49 ‘Kweeleny kwaarɔŋwa, Leere lir kwɔrsi kwiinyi kwǝthi
ŋeeleny,
nǝ wurǝyu oro ǝzir wǝṯiny-gwɔ kette ŋwaara-la.
Yiŋna yɔrtɔ aŋgwɔrɔ yinḏi-nyji ethisi kettice?
Ǝzir wundǝr wǝndu wiinyi winḏiny-gwɔ ethi-gwɔ kaṯṯɔ
wǝŋ?
50 Nyiti kwɔrɔ rogɽo-ri riinyi kwɔgitta kwomne ŋgwɔ tatap
mac-a?’
51 “Ŋaaŋa lir-mba linyɔɔrɔthɔna gaa! Rɔgwor raalɔ ririmba rifirlli kaka aatha kweere, ŋaaŋa lirṯaŋ kɔlɔ limǝ riimǝcci Allah yǝni-nǝŋw ethi neŋne ŋiɽaŋali ŋuuŋun! Ŋaaŋa laaɽinna-ma-ṯǝ lugwurnǝ laalɔ; nǝ ǝṯi urrǝthǝ Ṯigɽimǝ-nǝ Ṯirllinǝlɔ ter dok-dok! 52 Kwiɽli kwunaanɔ kweere kwiti kwɔmǝ lugwurnǝ-lɔ ere ǝwɽi yǝy-lɔ mac-a? Ǝṯir endinye lizi kila lǝṯisi Allah ɔcicca, kila landindisa kerreny tuk ŋiɽaŋali ŋǝthi Kwette Kwirllalɔ kwinḏi ethiila. Nǝ kirem tǝ kwɔmǝ bɔɔŋwɔthi mindaŋ nǝ ɽeenye. 53 Ŋaaŋa lir laava Sherii@a kwǝthi Allah kwinḏǝthǝ-ŋǝsi limeleka, laakin neere iinyici naana mac!”
Isṯifaanuus mǝr-gwɔ ɽeenye yall-yi.
54 Mǝ lizi lǝthi mǝjlǝs neŋne ŋiɽaŋali ŋɔ ŋǝthi Isṯifaanuus, nǝr urǝzi rɔgwori deddep, mindaŋ nǝr yecce yiŋath-na. 55 Laakin nǝ Isṯifaanuus urǝnni-nǝ Ṯigɽim-thi Ṯirllinǝlɔ ter, mindaŋ nɔŋw baaŋatha leereya-la, nɔŋweese ŋinithi ŋǝthi Allah, nǝ Yǝcu-ŋwɔ tok kwirlɔ tok ki-ṯuɽumǝ ṯǝthi mɔni ṯǝthi Allah. 56 Nɔŋwaarɔŋw, “Iisar-ṯi nyii-ŋgwɔ kwiisa leereya lidiŋǝlnǝ kworo, ninyeese Tɔɔrɔ tǝthi Kwizigwunǝŋ tirllɔ ki-ṯuɽumǝ ṯǝthi mɔni ṯǝthi Allah!”
57 Nǝ lizi kila linaanɔ ki-mǝjlǝs-na ɔvɔna kwɔɔla-gi ŋɔmmaŋi, mindaŋ nǝr ǝnyjini nyaamin ki-yǝni-nǝ yeeŋen. Nǝr avratha naana tɔc dɔŋw-li tatap, 58 nǝr mithǝ nǝrgeele nǝr-gi ruu par kwǝthi mǝḏiinǝ mindaŋ nǝr accathalɔ yall-yi. Nǝ kila lir shuhuuḏ ṯǝyyici kaamali kette kǝni Shaawul yirethi-lɔ yeeŋen ki-ŋwaara-na ŋwuuŋwun ethisi karnicalɔ. 59 Nǝraari isṯimir ethi accatha Isṯifaanuus-ŋwɔ-lɔ, laakin ŋundu-tǝ nɔŋwɔni kwɔrnɔṯɔ Kweelenyi nɔŋwɔccǝŋw, “Kweeleny Yǝcu, mǝṯṯi ṯigɽimǝ ṯiinyi!” 60 Ŋwɔṯaŋw nɔŋw kwee ŋwɔrŋwɔ-lɔ, nɔŋw ɔvɔna ŋɔmmaŋi ṯogɽo-thi nɔŋwaarɔŋw, “Kweeleny! Ǝṯisi kitta kǝṯṯi ŋikiya-ŋi ŋɔ mac!” Mɔŋwsi andasi ŋɔ nɔŋw ayanni tɔc.