Yǝcu mɔŋwsi-gwɔ ɔɔsi lir ruɽi-ṯoɽol-la wrii-kwuɽǝn lir ter.
1 Kwaathan tǝ nǝsi Kweeleny alla lir ter, lir ruɽi-ṯoɽol-la wrii-kwuɽǝn, nɔŋwsi ɔɔsi ndǝnndǝn, ethi iŋnaci ŋunduŋw keereny-gi etheele ki-muḏun-nǝ kweere-kweere nǝ ǝzir naana tatap wɔnaŋna-ŋgwɔ ethi-gwɔ iilatha. 2 Nɔŋwsǝccǝŋw, “Ṯɔɔna kithɔ ṯittǝzir, laakin kila lǝṯi ɔni nǝroro lokwɔɽoc, ŋwɔṯaŋw aarathir Kweelenyi kiyiiriny kwǝthi ṯɔɔna, mindaŋ mɔŋw ṯiŋatha @ɔmmaala ethi unici ŋunduŋw. 3 Nḏir ǝŋǝsi ṯiŋatha kaka yaaŋal ki-yiiraaw-nɔ. 4 Ǝṯeere appi jɔzlaanaɔ mac, walaɔ shanṯa kwǝthi ṯii, wala yithwǝn, nǝ ǝṯeere rilli ki-thaay-la ethi aaganni lizi mac. 5 Mǝ ǝnḏi ki-dɔɔnɔ kweere tǝ, ǝṯisi aaganni kerreny, ǝṯisi ǝccǝŋw, ‘Ŋaaŋa kila laami naana?’ 6 Mɔŋw naani kweere kwamɽa ṯaaginna ṯaalɔ ṯǝ, ǝgwɔ ṯaaginna ṯaalɔ ɔɽina; mɔŋw derne tǝ, ǝɽinnǝ ṯaaginna ṯaalɔ. 7 Nannir-ṯǝ ki-dɔɔnɔ ŋgwa kwette-kwette, lithna nǝ lǝṯi ii kwomne kweere nyithak kwǝr-ŋǝsi inḏǝthǝ, kaka nɔvthanna-gwɔ @aamil ethi aavi ɔjra wuuŋwun. Ǝṯeere mɔmri yiŋna-la mac. 8 Meele ki-mǝḏiinǝ-nǝ kweere nyithak, mindaŋ mǝrŋǝsi ǝnyji tǝ, a yee kweere nyithak kwǝr-ŋǝsi inḏǝthǝ; 9 ǝsi sǝwi luumǝ ki-mǝḏiinǝ-nǝ ŋgwa, ǝsi ǝccǝ kila linaanɔ kinaŋw-ŋwɔ, ‘Ŋeeleny ŋǝthi Allah ŋimǝ-ŋǝsi iilicǝ keṯṯok’. 10 Laakin mǝnḏi ki-mǝḏiinǝ-nǝ kweere mindaŋ mǝrŋǝsi ere ǝnyji ki-dɔɔnɔ-na kweere mac tǝ, e-ta a ruu ele ki-raay-la mindaŋ ǝsi ǝccǝŋw, 11 ‘Mǝ kinnǝni kuulǝ kǝthi mǝḏiinǝ kwaalɔ nyinḏaŋṯi ŋwaara naana ŋwɔri, ǝrŋǝsi-tǝ pǝccǝlɔ tɔttɔr ethi tɔrony mithǝ ŋaaŋwɔsi. Laakin ǝsi ṯiŋaayini ŋɔ ŋǝniŋw Ŋeeleny ŋǝthi Allah ŋimǝ-ŋǝsi iilicǝ keṯṯok!’ 12 Nyii kwɔŋǝsi andaci rerrem, ki Laamin-la lǝthi Hɔkwɔm, a Allah ǝthici Saḏɔɔm-ŋwɔ ŋimɽiyǝ-nǝ ŋuuru beṯṯen ethi mǝḏiinǝ-lǝ ŋgwa!
Muḏun kwiti kwǝthi ṯǝmminǝ mac.
(Maṯṯa 11:20-24)13 “Ǝnnǝ kwǝthi ṯurvǝ ṯɔɔŋwɔ ŋa kwǝni Kuuraziin! Ǝnǝ kwǝthi ṯurvǝ ṯɔɔŋwɔ tok ŋa kwǝni Beiṯ-sayḏa! Ǝŋgi ŋothɽor ŋɔppa-ŋɔppa ŋǝrrinǝ daŋgal-na, ǝrrini ethi Sɔɔr-ŋǝ Sayḏa-gi, ǝŋgi lizi linaanɔ-gwɔna kinaŋw kerreny tuk, urlǝ rɔgwor-lɔ ǝŋgir kenne lishwaaliya mindaŋ ǝngir ǝnyjini yaarɔŋi naana, ethisi elŋe lǝni limǝ urlǝ rɔgwor-lɔ ki-ŋikiya-na ŋeeŋǝn! 14 Nǝ ki Laamin-la lǝthi Hɔkwɔm a Allah ǝthici Sɔɔr-ŋwɔsi Sayḏa-gi ŋimɽiyǝ ŋuuru ethi daŋgal-la. 15 Nǝ ŋa tok kwǝni Kafranaahuum, a kwallilisa kwɔrdɔm-la kwɔɔŋa bilbil-bilbil leereya? Lǝŋǝ fǝtǝ kaṯṯa rac, ethi ɔɽi ki-jahannam-nǝ!”
16 Nǝ Yǝcu ǝccǝ ṯalaamiiza ṯuuŋwun-ŋwɔ, “Kweere nyithak kwɔŋǝsi niŋnaci, ŋwɔ niŋnaci nyuŋwɔ tok mɔŋw dirnatha ŋaaŋwɔsi-lɔ kweere, kwǝnyii dirnathalɔ tok nǝ kwǝnyii dirnathalɔ ŋwɔ dirnathalɔ ŋgwɔ kwɔɔsa-nyii.”
Lizi kila limǝ aaɽa lir ruɽi-ṯoɽol-la wrii-kwuɽǝn.
17 Nǝ lɔr aaɽa kila lir ruɽi-ṯoɽol-la wrii-kwuɽǝn laamina beṯṯen, nǝrǝccǝŋw, “Athɔrɔ Kweeleny rigɽim rigii zaaṯɔk nǝrnyji iinyici naana, nǝllicǝ-nyji waamira yiriny-yi yɔɔŋwa!” 18 Nǝsi Yǝcu ǝŋnici nɔŋwsǝccǝŋw, “Nyii kwiisa Shiiṯaana kwiidu ki-leere kaka ṯimen. 19 Niŋnacar-nyi-ṯi! Nyii kwɔmǝ-ŋǝsi inḏǝthǝ sɔlṯa, mindaŋ ǝthi ŋɔma ethi rɔttatha yimǝwǝ-lɔ ŋwebdeny-ŋi, nǝ ǝthi ŋɔma ethi ṯiinyi ṯuwǝnu, mindaŋ ǝŋǝsi kwomne kweere ere rǝri naana mac. 20 Laakin ǝṯi nyiŋlana mac kaka mǝŋǝsi-gwɔ rigɽim rigii iinyici naana, laakin nyiŋlarna kǝniny kaka mǝgwŋ yiriny yaalɔ lothone ki-leere-na.”
Yǝcu mɔŋgwɔ nii Allah-na.
(Maṯṯa 11:25-27Maṯṯa 13:16-17)21 Nǝ ki-lɔɔmɔr-la-ṯǝ kila, nǝ Yǝcu urǝnni ṯinyiŋlana Ṯigɽim-thi Ṯirllinǝlɔ ter, mindaiŋ nɔŋwaarɔŋw, “Papa, Kweeleny kwǝthi ki-leere-naŋw nǝ wurǝyu tok! Nyii kwǝccǝŋǝ shukran kaka mǝsi-gwɔ ruwǝccǝlɔ kila lithii kii ŋa ŋuluccǝsǝ-ŋǝsi kila lǝthi yǝnǝ nǝ lilŋiṯṯisinǝ tok. Aw Papa, a kwǝni-ṯǝ kwaamina ethi ǝrrini ṯǝŋw ṯɔgwor-thi ṯɔɔŋwa.
22 “Papa kwiinyi kwɔmǝ-nyii inḏǝthǝ kwomne tatap. Nɔŋweere kweere mac kwilŋithi Tɔɔrɔ, illi Papa ṯɔɽɔk, nǝ nɔŋweere kweere mac kwilŋithi Papa-ŋwɔ illi Tɔr ṯɔɽɔk, nǝ kila liccasi Tɔr-na ethisi ruwǝnnicǝlɔ.”
23 Ŋwɔṯaŋw nǝ Yǝcu ɔrllatha ṯalaamiiza naana cuk-cuk nɔŋwsǝccǝŋw, “Ŋaaŋa lǝthi bakhatha etheese kwomne-ŋgwɔ kwiisa-ŋa! 24 Nyii kwǝccǝ-ŋǝsi-mǝ ŋwɔ, liɽii linaanɔ luuru muluuk-gi kwǝthi sɔɔrɔma etheese ŋgwa kwiisa-ŋa ŋaaŋa, laakin nǝreere kaṯṯasi ṯaay mac, nǝ ethisi neŋne ŋa ŋiniŋna-ŋǝsi, laakin nǝreere kaṯṯasi ṯaay mac.”
Mǝthǝl kwǝthi kwɔsaamirii kwisaaw.
25 Nǝ mɔ@allim kwette kwǝthi Sherii@a ṯǝcci ethi iidǝsi Yǝcu-ŋwɔ, mindaŋ nɔŋw uṯicǝlɔ nɔŋwɔccǝŋw, “Yaa Mɔ@allim aatha kwɔrɔ laazim kwǝnyii ǝrri mindaŋ ethi kaṯṯasi ŋimiitha ŋǝṯi nannitha dok-dok?” 26 Nǝ Yǝcu ǝŋnici nɔŋwɔccǝŋw, “Yiṯaab Yirllinǝlɔ ter yaari-tha? E-ta ŋǝṯisi uppunǝ aŋgwɔrɔ?” 27 Nǝ kwɔr ǝŋnici nɔŋwɔccǝŋw, “Ǝṯamɽi Kweelenyi kwir Allah wɔɔŋa, ṯɔgwor-thi ṯɔɔŋwa min-min, nǝ rogɽo-ri rɔɔŋwa min-min, nǝ ŋɔma-ŋi ŋɔɔŋa min-min, nǝ ŋaɽiny-ŋi ŋɔɔŋa min-min, nǝ ǝṯi amɽi jaara kwɔɔŋa kaka nǝṯi-gwɔ amɽi rogɽo rɔɔŋwa.” 28 Nǝ Yǝcu ǝŋnici nɔŋwɔccǝŋw, “Ŋɔɔŋa ŋǝthi yǝnǝ, ǝrrǝsi-ṯǝ ŋɔ, e-ta a miithi.”
29 Laakin nǝ mɔ@allim kwǝthi Sherii@a kaka naŋna-ŋgwɔ ethi suuɽi rogɽo ruuŋwun, nɔŋw uṯici Yǝcu-ŋwlɔ nɔŋwɔccǝŋw, “Ǝyǝ kwɔrɔ kwir jaar kwiinyi?” 30 Nǝ Yǝcu ǝŋnici nɔŋwɔccǝŋw, “Kwɔr kwɔnaanɔ wette kwɔɔɽɔ Urshaliim-ŋgi etheele Ariiha, mindaŋ nɔŋw ǝnḏi ki-lɔɔɽam-na lir lurṯǝthǝ, mindaŋ nǝr urṯǝthǝ yirethi yuuŋwun kwomne-gina kwuuŋwun tatap kwǝthiŋw, nǝr tppi mindaŋ nǝr ṯayyalɔ kwɔmǝ ǝrrici ŋiɽany. 31 E-ta nǝ kaahin kette ɔɽa ṯaay-thi kitha laakin mɔŋw kwuvǝnni kwɔɔrɔ-lɔ kwuvuk, nɔŋw daaricalɔ dar nɔŋweele 32 Naaɽi nǝ Laawi lette iilanna ṯaay-thi ṯǝ kitha, mindaŋ mɔŋweese kwɔɔrɔ nɔŋw daaricalɔ dar tok. 33 Laakin nǝ Kwɔsaamirii kwette kwaari saafira ṯaay-thi kitha iila naanɔ-ŋgwɔ mindaŋ mɔŋweese ŋunduŋw, nǝgwɔ ŋimɽi yatha beṯṯen 34 Nɔŋweele naanɔ-ŋgwɔ mindaŋ nɔŋw balci ŋiila-ŋwɔsi kiɽica-gi ki-yǝmǝ-nǝ yuuŋwun mindaŋ nɔŋwsi kǝkkici rɔbaaṯ-ri; e-ta nɔŋw allasi ki-tǝɽiŋgǝ-lǝ ṯuuŋwun nɔŋgeele ki-lokwonḏo-na, nɔŋgwɔ aŋraci ŋunduŋw. 35 Mǝ ŋɔrpana-ŋgwa oro tǝ, nɔŋw alla girishǝ kiɽǝn kir fiḏḏa nɔŋw inḏǝthǝ kwɔɔrɔ kwǝthi lokwonḏo, nɔŋwɔccǝŋw, ‘Aŋrica ŋunduŋw tetter, mindaŋ mǝnyii aaɽa ṯaay-thi kɔthɔ tǝ, ŋǝmǝ inḏǝthǝ kithaathɔ kimǝ kiṯǝzi’.”
36 Nǝ Yǝcu ǝccǝŋw, “Nǝ a kwaari-ŋa-tha ki-fikir-nǝ kwɔɔŋa, ǝyǝ kwɔrɔ ki-lizi-nǝ kɔlɔ lir ṯoɽol, kwundǝr kwǝndḏu kwɔmoro jaar wǝthi kwɔr-ŋgwa kwǝnḏi ki-lɔɔɽam-na lir lurṯǝthǝ?”
37 Nǝ mɔ@allim kwǝthi Sherii@a ǝŋnici nɔŋwɔccǝŋw, “Ŋgwa kwɔmǝ ǝthici ŋunduŋw ŋimɽiyǝ-nǝ.” Nǝ Yǝcu ǝŋnici nɔŋwɔccǝŋw, “Nḏi ŋa tok ǝsi ṯǝ ǝrri ŋɔrɔŋw tok.”
Yǝcu mɔŋŋweele ki-dɔɔnɔ kwǝthi Martha-ŋǝ Mǝryǝm-gi.
38 Nǝ mǝ Yǝcu-ŋǝ ele ṯalaamiiz-thi ṯuuŋwun, mindaŋ mɔŋw iila ki-lilli-na lette linaanɔ-gwɔ kwaaw kwette kwǝni Martha, nɔŋw aalanni Yǝcu-ŋwɔ ki-dɔɔnɔ kwuuŋwun. 39 Nɔŋwɔthi eŋgen kwette kwir kwaaw kwǝni Mǝryǝm, kwɔnaanisa Kweelenyi ki-ṯuɽumǝ, nɔŋw kettice ṯa@liima ṯuuŋwun kǝni. 40 Nǝ Martha ere aamina mac ŋothɽor-ŋi tatap ŋa ŋakkɔŋwsi, mindaŋ nɔŋw iila nɔŋwɔccǝŋw, “Kweeleny ŋa kwiti kwiinǝ-nyii ṯɔgwor-na mac-a, niṯayya-nyii ǝŋgǝr-lɔ mindaŋ nǝnyii akkɔ ŋothɽor ŋɔ kwɔtɔpɔt-na? Andica-mba ŋwiila ethi mǝcci nyuŋwɔ!” 41 Nǝ Kweeleny ǝŋnici nɔŋwɔccǝŋw, “Martha! Martha! A kwɔpinnicǝ ŋothɽor ṯɔgwor-na, na Nǝ kettice kwomne yǝy kwittǝzir, 42 laakin kwomne kwir-ta kwɔtɔpɔt kwunǝŋninnǝ. Mǝryǝm kwɔmǝ ecce kwomne-na kwɔvthanna mindaŋ kwɔmǝ-ŋwɔ alla, mindaŋ ǝreere ǝɽinnǝthǝ kwokwony ŋunduŋw ḏuṯ.”
aza 10
ŋafur ŋeḏi limeḏgen leḏi Yecu lir ruɽi-ṯɔɽɔl-wri
1 ma ŋiɽaŋal ŋu rataḏi, nezi Kweleny alla ruɽi-tɔɽɔl-wri lir ter, nuŋw zi tiŋa nden nden eḏiŋnizi ezir nana tatap winḏuŋw gwu eḏele, ki yayin tɔk. 2 nuŋw zi ṯa eca ŋwu: ṯuna tinani ṯuru eḏuni, lakin, ner ere nani luru mac leḏuni. ŋwu ṯaŋwu, arir keni Kwelenyi kweḏi ṯuna ki yiriny, mindaŋ ŋwu ṯiŋaḏa lɔḏɽor eḏele eḏunici. 3 faḏaḏir ezir nana walu; nyi kwɔŋazi ṯiŋa kaka yaŋal ki yiraw-na. 4 eṯapi lijizlana lere mac, ya lulugwuŋwa, ya yiḏwanu. eṯagani kwizi kwere ki ṯay la mac. 5 ma endi ki duənu kwere, ezi eca ṯayṯi ŋwu: eḏi ŋiɽena nani ki duənu ŋgwu. 6 muŋw nana kwere kinaŋw kweḏi ŋiɽena-na, a gwu ŋiɽena ŋalu enḏi-na. muŋw ere kwere, er ta aɽiḏa nani ŋa gwu. 7 eṯi nani ki duənu ŋgwa, eṯeḏne, eṯi ii tɔk kwɔmne kwere kwer ŋazi inḏeḏa. ŋofḏana eḏi kwɔḏɽor afi ujra weḏi ŋɔḏɽor. eṯi mumri yiŋna mac. 8 ma enḏi kayin were, mer ŋazi enji, iiḏir kwɔmne kwere kwer ŋazi kekitizelu. 9 ezi zəwi luma linani kinaŋw, ezeca ŋwu: ŋeleny ŋeḏi Allah ŋimɔŋazi ilica ketɔk. 10 lakin ma enḏi ki balaḏ-na kwere, mer ŋazi ere enji mac, inḏir kiṯay, andazi ki lumaɽa-na leḏi ezir wa, ezeca ŋwu: 11 kula kere keḏi balaḏ kwalu keliḏinyji nana, er ŋazi firṯaḏa nana edi ṯurony ye ŋaŋwuzi; kitizarzi ŋu yey: ŋeleny ŋeḏi Allah ŋimɔŋazi ilica keṯɔk. 12 nyi kwecaŋazi ma ŋwa, ki lamin leḏi zeyria er ketize zaḏuumŋw hukma wajila nana eḏi balaḏ la.
eyewey kweḏi libalaḏ leḏi lizi-na liti limorlaci ŋikyaŋi ŋwudɔŋw mac
13 eyewey, ṯurfa ṯɔŋwa, ŋa kweni kuuraziin! eyewey, ṯurfa ṯɔŋwa, ŋa kweni beyṯzayḏa! eŋgi ŋilim ŋerrina daŋgal-na errini eḏi zuur-ŋa zayḏa gi, eŋgir orlaci ŋikyaŋi ŋwudɔŋw kerreny tuk; eŋgir kenna lizuwala leni ŋuməru, eŋgir akani yaruŋi nana tɔk. 14 ki lamin leḏi zeyria, er ketize zuur ŋwuzi zayḏa gi hukma wajila nana eḏi daŋgal la. 15 na ŋa, kweni kafranahum, a kwalliḏa lerya nana bilbil a? beri ma. liŋa oɽazi kezir-na weni eydez rac.
16 muŋw niŋnaci ŋaŋwuzi kwere, ŋworɔ kwenyi niŋnaci tɔk; muŋw durni ŋaŋwuzi kwere, ŋworɔ kwumenyi durni tɔk; muŋw durni nyuŋwu kwere, ŋworɔ kwumɔdurni ŋgwa kwuzanyi.
17 mer aɽi kla lir ruɽi-tɔɽɔl-wri, ner nyeŋlena, ner eca ŋwu: Kweleny, rigɽim riki kinna tɔk ner nyji ta inyizi nana, yiriny yi yɔŋwa. 18 nuŋw zi eŋnici nuŋw zi eca ŋwu: nyi kwiza zeyṯaana kwiidu kilerena kaka ṯimen. 19 izarṯi, nyi kwumɔŋazi pa inḏeḏa zulṯa kinna eḏi ruta yumowa lu ŋwebdeny ŋi, na zulṯa tɔk wuṯemḏi ŋuma la ŋeḏi tuwən talu. a ŋazi kwɔmne ere kwere eca ḏurra tɔk mac. 20 lakin, eṯi nyeŋlena mac ŋiɽaŋal ŋi ŋeḏi ṯinyiza nana teḏi rigɽim riki; eṯi nyeŋlena keni, kaka ma gwu yiriny yalu loḏine kilerena.
ṯinyiŋlana ṯeḏi Yecu muŋw eca Allah zukran
21 ki lomur ta kla, na Yecu nyeŋlena ki Ṯigɽim-na ṯirlinelu ter, nuŋw eca ŋwu: zukran, Papa, kwir Kweleny kweḏi kilerena-ŋa ureyu yi tɔk, kaka mezi gwu luceza ŋiɽaŋali ŋu kla leḏi yeyna, lifirli ki tɔk, nezi ruweci nyelle lu. emba, Papa, kaka zayḏir ŋa gwu gi. 22 Papa kwinyi kwiri kwumenyi alliḏa tugwori nana kwɔmne gi tatap; nuŋw ere kwere mac kwilŋiica Toru eḏaruŋw, tir taŋw, illa Papa tuɽuk; nuŋw ere kwere mac kwilŋiica Papaŋw, illa Tiɽŋeyin ṯuɽuk, na ŋgwa tɔk kwunaŋna Tor eḏi ruwenici ŋunduŋwu lu.
23 nuŋw orlaḏa limeḏgen nana cukcuk, nuŋw zi eca ŋwu: yey yortani yiza kwɔmne ŋgwa kwizaŋa. 24 nyi kwecaŋazi ma ŋwa: liɽi-ŋa leleny li luru ner orɔ zurum eḏeze kwɔmne kaka kwizaŋa kirem, ner ulezi abarya; eḏi neŋne kwuniŋnaŋa kirem, ner ulezi abarya tɔk.
ṯay ṯeḏi ṯi afi ŋimiiḏa ŋinḏi eḏi nanniḏa dɔk
25 nuŋw diɽi kwete kwilŋiiti kuruu-na, nuŋw mumminizi Yecuŋw, nuŋw eca ŋwu: Kweleny, nyi kwerri aḏa, eḏi ma enḏi ŋimiiḏa-na ŋinḏi eḏi nanniḏa dɔk? 26 nuŋw eca ŋwu: ŋuluḏine aŋgwuru kuruu-na? ŋari aḏa? 27 nuŋw aalani ŋiɽaŋali, nuŋw eca ŋwu: ŋari pa, etamɽi Kwelenyi kwɔŋa kweni Allah tugwor ti minmin, rɔgwɽɔ ri minmin, ŋuma ŋi minmin, ŋaɽiny ŋi minmin tɔk; etizamɽi leḏi yəni lu, kaka eti gwu amɽi rɔgwɽɔ rɔŋwa. 28 na Yecu eca ŋwu: a kwumemba ami andazaŋw. erre zi ŋu, na a kwumiiḏi. 29 kwor ta, kaka naŋnaŋw gwu eḏi zeyini ki rɔgwɽɔ ruŋwun, nuŋw eca ŋwu: eya kwiri kweḏi yəni lu kwir kwinyi?
ṯiŋerɔŋw ṯeḏi kwor kwizaw kweḏi zaamraŋw
30 na Yecu eŋnici, nuŋw eca ŋwu: kwor kwete kwudiɽi urzaliim, eḏoɽi ariiha; nuŋw enḏi ki loɽam-na, ner urṯeḏa yireṯi, ner ipii, ner arṯiḏalu kwumerrizi ŋiɽany. 31 na kiziiz kete keni oɽana tay ṯi kḏa; muŋw eze ta, nuŋw ṯireny lu. 32 mer ṯa orɔ ŋwu, kineni, na kwor kwir laawi ilanna tɔk. muŋw ilizi ezir, muŋw eze ta, nuŋw ṯireny lu tɔk. 33 lakin, nuŋw morḏa kwete kwir ter kwir zaamri, mindaŋ muŋw ila kezir wunanu ŋw gwu ta, nuŋw eze, na ṯugwor yaḏa duŋgwun. 34 nuŋw duŋgwa ta, nuŋw kəkizi yəmaŋi yimɔŋw zi ṯuwaci ŋila ŋi, nabiṯ gi tɔk; nuŋw allazi ki teɽiŋga la tuŋwun, nuŋw gi ele ki manzil-na, nuŋw gwu aŋraci. 35 ma ŋurpu ŋgwa orɔ ta, nuŋw alla ruba wete nuŋw inḏeḏa kworu kweḏi manzil-na, nuŋw eca ŋwu: aŋrica, ma ŋa kwuruuz amɽiṯaḏa, menyaɽa ta, ŋa ma kiɽeci. 36 a kwari ḏa ki ṯugwor-na ṯɔŋwa, kwunde kwendu, ki lizi-na klu lir ṯɔɽɔl, kwumer gi orɔ kweḏi yəni lu ŋgwa kwupiiḏi loɽam? 37 nuŋw eca ŋwu: nyi kwari pa, kwunde kwir ŋgwa kwumeḏizi ŋimɽya-na. na Yecu eca ŋwu: inḏi ŋa tɔk, e zi ṯa erri ŋwu.
marṯa-ŋa maryam gi
38 ner ṯa orɔ ŋwu, mer ele ki ṯay, nuŋw enḏi kayin wete; na kwaw kwete kweni marṯa enji duənu duŋgwun. 39 nuŋw eḏi eŋgen kwete kwir kwaw, kweni maryam, kwunani Yecuŋw ki ṯuɽma, kwakica ŋiɽaŋali kizen ŋandicaŋw zi. 40 na marṯa kandaḏi ŋɔḏɽor ŋitezir, nuŋw ila nanuŋw gwu, nuŋw eca ŋwu: Kweleny, a ti kwiiḏi nyi ṯugwori manya, ṯaya nyi gwu eŋgeri lu kwutuput eḏaki ŋɔḏɽor? na ecamba, ŋwila kwenyi meci. 41 na Yecu eŋnici, nuŋw eca ŋwu: marṯa, marṯa, a kwiri kwejmeṯ, na ta kandaḏi kwɔmne kwitezir dukwu-dukwul. 42 kwɔmne kwir kwutuput kwer naŋni; na maryam ece kwɔmne-na ŋgwu kwizaw, kwiti kweŋgir dimeḏa ŋunduŋwu mac.