Ṯaaginna.
1 Nyii kwɔrɔ kwǝni Bɔɔlɔs, kwir mahbuus ŋiɽaŋal-ŋi ŋǝthi Kwɔrɔstɔ kwǝni Yǝcu, nǝ Ṯiimɔɔthaaws kwir ǝŋgǝri kwǝri.
Nyii kwɔlɔcca-ŋa ŋaaŋwɔ kwǝni Fiilimuun kwir mǝthgǝri kwǝri ki-ŋothɽor-na, kwǝṯi-nyii amɽi, 2 nǝ kǝniisǝ ŋga tok kǝṯi aaɽathi dɔŋw ki-dɔɔnɔ kwɔɔŋa, nǝ ǝŋgǝri kwǝri kwir kwaaw kwǝni Abfiiyyǝ, nǝ mǝthgǝri kwǝri kwir ǝsikǝr ki-ŋothɽor-na kwǝni Arkhibbus:
3 Ethi ne@ma-ŋa ŋiiɽǝnnǝ-ŋǝ ŋǝthi Allah wir Papa kwǝri nǝ Kweeleny kwǝni Yǝcu Kwɔrɔstɔ nanni naaniŋa-gwɔ.
Ṯamɽa ṯǝthi Fiilimuun nǝ ṯǝmminǝ ṯuuŋwun tok.
4 Mǝŋǝ kithaayini nyaamin tatap ki-ṯaarana ṯiinyi kiyiiriny, ǝṯi-nyii ǝccǝ allah shukran, 5 kaka niŋnany-gwɔ ŋiɽaŋali ŋǝthi ṯamɽa ṯɔɔŋwa ṯǝmminǝ-thi ṯǝthicǝ-ŋǝ Kweelenyi kwǝni Yǝcu, nǝ lizi kila tatap lirillnǝlɔ ter. 6 Nǝ ǝṯi-nyii aari kiyiiriny mindaŋ mǝ ṯɔɽɔmaṯṯa ṯɔɔŋwa ki-ṯǝmminǝ-nǝ, oro ṯaay ethisi elŋe ŋa ŋisaaw ŋǝthirsi Kwɔrɔstɔ-ŋgi. 7 Ǝŋgǝri kwiinyi, ṯamɽa ṯɔɔŋwa ṯimǝ-nyii ǝvicǝ ṯinyiŋlanɔ ṯɔppa ṯimini, nǝ ṯifirllasa-la ṯuuru tok! Kaka mǝgwɔ firlli rɔgwori naana rǝthi kila lirllinǝlɔ ter.
Bɔɔlɔs mɔŋgwɔ tuurǝthǝlɔ Ɔnisiimus-ŋgi.
8 Nǝ sǝbǝb-gi ṯǝ ŋgwɔ tǝ, ninyoro kwuuŋwul, kaka nɔrɔny-gwɔ ǝŋgalɔ ethi Kwɔrɔstɔ-na, ethi ǝllici ŋaaŋwɔ waamira ethisi ǝrri ŋɔvthanna. 9 Laakin ŋiɽaŋal-ŋi ŋǝthi ṯamɽa tǝ, ǝŋǝ uṯicǝlɔ. Nyii kwɔrɔ kwǝni Bɔɔlɔs kwɔmoro kimǝyǝŋ, nǝ ninyoro mahbuus kirem ṯǝŋw tok, ŋiɽaŋal-ŋi ŋǝthi Kwɔrɔstɔ kwǝni Yǝcu, 10 ŋwɔṯaŋw ŋǝ uṯicǝlɔ ŋiɽaŋal-ŋi ŋǝthi tɔr tiinyi tǝni Ɔnisiimus ethi Kwɔrɔstɔ-na, nǝ nyii-tǝ kwɔnaanɔ ki-sijin-nǝ. 11 Kerreny nɔŋweere ǝthi faayitha kweere mac naaniŋa-gwɔ, laakin kirem tǝ, ŋgwɔ kwɔmǝthi faayitha kwǝni ŋa, nǝ nyii tok. 12 Ŋgwa kwɔmǝŋǝ ǝɽiccǝ naaniŋa-gwɔ, ninyǝni kwuusucǝ-ŋǝ ṯɔgwori ṯiinyi tittir. 13 Nyii kwǝŋgi aamina ethi ḏuŋgwǝci ŋunduŋw kɔnɔŋw nyii-gi, ethi ǝkkici nyuŋwɔ ŋothɽor ki-lɔɔbi lɔɔŋwa a-naaniny-tǝ kinnǝni ki-sijin-nǝ ŋiɽaŋal-ŋi ŋǝthi Inyjiii. 14 Nǝ ŋɔ tatap nǝŋeere naŋni ethi kwɔrmɔṯasi mac, ethi mǝcci nyuŋwɔ; laakin nǝnyii naŋni ŋaaŋwɔ ethisi ǝrri ṯɔgwor-thi ṯɔɔŋwa. Kaka niti ninaŋna-nyji ethisi ǝrri ŋeere mac, illi mǝmmini ŋa ṯɔɽɔk.
15 Kimanni-pa, ya nǝrṯoro ŋɔ mindaŋ nǝŋǝ Ɔnisiimus ruccǝnǝ kwokwo kinnǝni, mindaŋ mɔŋwaaɽa-tǝ, ŋwɔ rɔɔthatha kwɔɔŋa keereny-gi tɔc. 16 Kwiti kwir kwɔwaay kwokwony mac, laakin kwuthǝmthi kwɔwaaya-la, ethoro kaka aŋgalɔ kwǝṯamɽi ethi Kwɔrɔstɔ-na, nǝ kaka nɔrɔ-ŋgwɔ eŋgǝri kwette kwamɽa-nyii tok, e-ta ŋwɔmǝ rotto tha naaniŋa-gwɔ, ninḏi-ŋgwɔ ethɔrɔ kwɔwaay aŋna-yi domony, laakin kaka aŋgalɔ ethi Kweeleny-na. 17 Ŋwɔṯaŋw mǝnyii ruusi nyuŋwɔ kwette kwɔɽɔmaṯṯi-ndi ki-ṯǝmminǝ-nǝ tǝ, a ǝmmini ŋunduŋw kaka-ṯǝ nǝmminǝ-nyii tok. 18 Mɔŋwsi ǝrrici ŋaaŋwɔ ŋeere ŋigii, ya mǝgi ethi kǝmzu keere tǝ, e-ta ǝnyii ruusici kiinyi. 19 Nyii kwɔrɔ kwǝni Bɔɔlɔs kwɔlɔcca-ŋa ṯii-thi ṯiinyi, kiŋǝ ǝɽiccǝ rac. Nǝ ninyjeere naŋni ethisi kithǝyini ŋaaŋwɔ mac ŋǝniŋw, a kwǝthindi kǝmzu kir rogɽo rɔɔŋwa. 20 Aw ǝŋgǝri kwiinyi, nyii kwɔnaŋna-ŋa ethisi ǝrrici nyuŋwɔ ŋɔ ŋɔvthanna, ethi Kweeleny-na, mindaŋ mǝ kǝṯṯini ṯɔgwori ṯiinyi wǝŋ ethi Kwɔrɔstɔ-na.
21 Kaka nilŋicaŋa-gwɔ ŋaaŋwɔ dedder kwiniŋnithɔ, e-ta nǝŋǝsi-mǝ lɔcca ŋɔ, mindaŋ mǝsǝrri ŋa ŋuṯucǝŋǝŋi-lɔ. Aw ŋinḏi-ŋǝsi kǝniny ethisi ǝrri ŋɔvthanna ŋuuru ŋithǝmthi-lǝ kaka nandica-ŋa gwɔ. 22 Nǝrṯoroŋw tok, e-ta ǝɽi kǝniny nyii kettice lɔɔḏo-lɔ cɔgwo-cɔgwop, kaka nigittathiny-gwɔ naanɔ-gwɔ Allah, ethi niŋnaci ṯaara kiyiiriny ṯaalɔ tatap, mindaŋ mɔŋwaaɽisa nyuŋwɔ naamŋa-gwɔ.
Ṯaaginna ṯirimthithɔ.
23 Abafraas kwaaginna-ŋa kwɔnaaniny-gi ki-sijin-nǝ ndǝndǝk ŋiɽaŋal-ŋi ŋǝthi Kwɔrɔstɔ kwǝni Yǝcu, 24 nǝ limǝthgǝri tok linaaniny-li ki-ŋothɽor-na lǝni Mɔrgus-ŋǝ Arasṯarkhus, nǝ Ḏiimaas-ŋǝ Luuga-gi.
25 Ethi ne@ma kwǝthi Kweeleny kwǝni Yǝcu Kwɔrɔstɔ nanni ṯgɽim-thi ṯɔɔŋwa. Amiin.
ṯagna
1 buuluz, kwir mabuuz ŋiɽaŋal ŋi ŋeḏi Kwruztu kweni Yecu, na timuṯaawuz, kwir eŋgeri, lagne falimunŋw kweṯi nyi gi opnaṯi ki ŋɔḏɽor-na, kwamɽa nyi beṯen, 2 na afyaŋw, eŋgeri kwir kwaw, na arkibuzŋw, kweṯi nyi gi oɽmaṯi ki ṯiṯugwuḏana tizaw ṯeḏi Yecu Kwruztu, na kaniiza kinani ki duənu kwɔŋwa.
3 eḏi ṯimeca ṯedi ŋimɽi nani daŋgal-na ŋiɽena ŋi ŋinḏi nani gwu Allah wir Papa kweri, na Kweleny kweni Yecu Kwruztu.
ṯuṯalu ŋiɽaŋal ŋi ŋeḏi kwuway kwumɔ rorfe
4 nyi kweṯeca Allah zukran ŋwamin tatap ma ŋazi gwu kikiḏayini ki ṯara-na ṯinyi ki yiriny, 5 kaka ŋiniŋnanyji gwu ŋeḏi ṯamɽa ṯɔŋwa ṯeḏi Kweleny kweni Yecu, na ṯeḏi lizi tatap leni lirlinelu ter eḏi Kwruztu-na. 6 na eṯi nyi ari ki yiriny mindaŋ ma kla leṯoɽmati ŋaŋa li ki ṯəmna-na, er zi ami elŋeŋw ŋama-ŋamaŋ ŋeḏi ṯortaḏa tatap ṯeṯorɔ ṯeri eḏi Kwruztu-na. 7 kaka eṯi nyi gwu nyeŋlena beṯen ŋiɽaŋal ŋi ŋeḏi ṯamɽa ṯɔŋwa, na ṯikandiza ṯi lu ṯɔŋwa tɔk, eŋgeri kwinyi, kaka eṯi zi gwu keṯini wəŋ kla leni lirlinelu ter eḏi Kwruztu-na.
8 ŋwu ṯaŋwu, menyi keni bonye eḏi Kwruztu-na eḏellici ŋaŋwu amra eḏizerri ŋeni ŋofḏana, 9 nenyi keni naŋni eḏami dediŋw ŋaŋwu, ŋiɽaŋal ŋi ŋeḏi ṯamɽa ṯɔŋwa—nyi, kweni buuluz, kwumorɔ kimeyaŋ na kirem kwir mabuuz tɔk ŋiɽaŋal ŋi ŋeḏi Yecu Kwruztu— 10 nyi kwuturecaŋa lu ŋiɽaŋal ŋi ŋeḏi tor tinyi, teni anizimuz, kaka menyi gwu orɔ ṯernyin ki zijin-na. 11 (na kinaŋw nuŋw ere eni kwofḏana mac duŋgwɔŋwa, lakin kirem ta, nuŋw orɔ kwofḏanicaŋa, na kwofḏanicanyi tɔk.) 12 nyi ŋgwu kwuzicaŋa ŋunduŋwu nani ŋa gwu, enuŋw gwu keni kaka ṯugwor ṯinyi. 13 nyi kweŋgamina eŋguŋw nani nyi gi, eḏaŋraci nyuŋwu ki lobi lɔŋwa, nani nyi gwu ki zijin-na ŋiɽaŋal ŋi ŋeḏi injiil; 14 lakin ŋiti ŋinaŋnanyji eḏi zi erri ŋere mac ŋiti ŋimezemni mac, mindaŋ ma ŋizana ŋɔŋa orɔ ŋeḏi ṯugwor ṯɔŋwa, ŋiti ŋiri ŋeḏi amr were mac.
15 ner ṯa orɔ ŋwu, kezni, ŋimɔ ŋi ṯazi ŋaŋwu lu kwɔkwɔ, mindaŋ muŋw aɽa eḏorɔ kwɔŋwa tuc, 16 ŋwu ere orɔ kwokwony kaka kwuway domony mac, lakin ŋwu ṯamḏu kwuwaya kaka urŋw gwu ŋiaŋga ŋete ŋamɽanyji beṯen, na ŋamɽa ŋa ŋi ŋunduŋwu beṯen eḏi duŋgwinyi la, rɔgwɽɔ ri ruŋwun na edi Kweleny-na tɔk. 17 ŋwu ṯa, ma orɔ kwumaṯ kwinyi ta, enji ŋunduŋwu kiloɽu-na kaka eŋgi ŋa gwu enji nyuŋwu kiloɽu-na. 18 muŋw eni kwəkizaŋa lomori puɽcur kezir were, ya ma gi edi kəmzu kere ta, eḏi kəmzu kuŋwun orɔ kinyi. 19 nyi kwiri kweni buuluz, ŋu ŋuluḏinyji ṯii ṯi ṯinyi ŋwu: kenyi əɽici. nenyere naŋni eḏi zi kiḏayinici ŋaŋwuzi mac, ŋenuŋw, a kweḏindi kəmzu, keni rɔgwɽɔ rɔŋwa. 20 aw, eŋgeri kwinyi, nyi kwunaŋna ŋa edi kiɽeci nyuŋwu kwɔmne kwɔkwɔ eḏi Kweleny-na. keṯine ṯugwori ṯinyi wəŋ eḏi Kwruztu-na.
21 kaka ilŋiicaŋa gwu kwuniŋneḏu ta, na ŋazi ma luca ŋu, ilŋiicaŋa gwu ŋezerri ŋiṯemḏelu keni, kaka ari nyi gwu ŋwu. 22 na ki lomur ṯa kla tɔk, daɽmicenyi liḏmina lete leḏi lirin, kaka aki nyi gwu kizen, er nyi ketize ṯay eḏila nani ŋa gwu, ŋiɽaŋal ŋi ŋeḏi ṯara ṯalu ki yiriny.
23 abufraz, kweṯinyi gi oɽmaṯi eḏi Kwruztu-na kweni Yecu ki zijin-na, kwagnaŋa, 24 na marguz, na arizṯarkuz, na diimaz, na luuga, leṯi nyi li oɽmaṯi ki ŋɔḏɽor-na, ner agni ŋaŋwu tɔk.
25 eḏi ṯimeca ṯeḏi ŋimɽi ŋeḏi Kweleny kweri kweni Yecu Kwruztu nani ki ṯigɽim-na ṯɔŋwa.