Yǝcu-ŋǝ kwaaw-gi kwir Kwɔsaamira.
1 Nǝ Lifirriisiiyyiin elŋece ethaarcŋw Yǝcu ŋgwana kwǝti ǝgini, nǝ ǝṯɔŋwɔccǝ ṯalaamiiza @ammiḏa ṯuuru ethi Yuhanna-la. 2 Nǝ Yǝcu rogɽo-ri ruuŋwun-tǝ, nɔŋweere ǝccǝ kwizi kweere @ammiḏa mac; laakin nǝ ṯalaamiiz oro ṯoɽok ṯuuŋwun. 3 Nǝ mǝsi Yǝcu neŋne ŋa ŋandinna, nɔŋw ɔrlacca Yahuuḏiiyyǝ-ŋw ŋwɔdɔŋw, nɔŋwaaɽitha Jǝliil. 4 Nǝ kinaŋw ninḏiŋw nɔŋwɔni kwindi ethi ruu Saamira-ŋgi-na. 5 Mɔŋw ɔppathi Saamira nɔŋw iila ki-mǝḏiinǝ-nǝ kwǝni Sɔɔkhaar, kwɔnanyja ṯɔrɔny keṯṯɔk ṯinḏǝthǝ Ya@guub tiɽiŋǝyin tǝni Yuusuf. 6 Nǝ ṯill ṯǝthi Ya@guub naani kinaŋw, nǝ kaka mǝgwɔ Yǝcu mɔɔli ŋiɽaŋal-ŋi ŋǝthi kilyǝ, nɔŋw naanalɔ ṯill kǝni. Nǝ ki-lɔɔmɔr-la ṯǝ kila tǝ, nǝ aaŋwɔn rilli kelgeny-na tittir. 7 E-ta nǝ kwaaw iila kwir Kwɔsaamira ethi aŋri. Nǝ Yǝcu ǝccǝŋw, “Nḏǝthǝny ŋaaw nyjii.” 8 Kaka mǝgwɔ ṯalaamiiz ṯuuŋwun ele ki-mǝḏiinǝ-nǝ ethi liṯṯa ethneya. 9 Nǝ kwaaw kwir Kwɔsaamira ǝccǝŋw, “A kwotho kwuṯucǝny-lɔ ŋaaw-ŋi ŋata kwir Yahuuḏi, nǝ nyii-tǝ ninyoro kwaaw kwǝthi Saamira-ŋw?” Kaka nǝṯi-gwɔ Yahuuḏ-ŋǝ Lisaamiriiyyiin-li durnǝthisinǝ. 10 Nǝ Yǝcu ǝŋnici nɔŋwɔccǝŋw, “Ǝŋgi elŋe haḏiiyyǝ wǝthi Allah, nǝ ǝyǝ kwir-ŋgwa kwǝccǝ-ŋǝŋw, ‘Nḏǝthǝny ŋaaw nyjii’, ǝŋgi uṯici ŋunduŋw-lɔ, mindaŋ ǝŋgwɔŋw inḏǝthǝ ŋaaŋwɔ ŋaaw ŋimiithɔ.” 11 Nǝ kwaaw ǝccǝŋw, “Yaa Sǝyyiḏ, a kwende kwǝthi kwomne kweere kwǝthi-gi alla ŋaaw, ŋaaɽi nǝ ṯill ɔlɔna too; e-ta amaava ŋaaw ŋimiithɔ ṯaka? 12 A kwɔthǝmthi ŋa ṯǝrnyǝriŋw-lǝ ṯǝri ṯǝni Ya@guub, ṯinḏǝthǝ-nyji ṯill kɔthɔ, nɔŋwsii rogɽo-ri ruuŋwun, nǝ nyiɽiŋǝyin-ŋǝ ŋirel-ŋi ŋuuŋun-ǝ?” 13 Nǝ Yǝcu ǝŋnici nɔŋwɔccǝŋw, “Kweere kwii ŋaaw; ŋɔ a ǝwthǝ yee kwokwony, 14 laakin kweere kwii ŋaaw ŋǝnyji inḏǝthǝ a ǝwthǝ ere yee kwokwony ḏuṯ. Nǝ ŋaaw ŋa ŋǝnyji inḏǝṯhǝ ǝroro ḏuŋgwun-nǝ ṯuwǝ ṯǝṯi irṯǝṯhi dok-dok, mindaŋ ŋwuurǝnni ŋimiitha-na ŋǝṯi nannitha dok-dok.” 15 Nǝ kwaaw ǝccǝŋw, “Yaa Sǝyyiḏ nḏǝthǝ-nyii ŋaaw ṯǝ ŋa! Mindaŋ ǝnyii ǝwthǝ ere yee kwokwony mac, wala ethiila kwokwony kɔnɔŋw ethi aŋɽi.”
16 Nǝ Yǝcu ǝccǝŋw, “Nḏi ɔrnɔṯa kwɔɔrɔ kwɔɔŋa ǝgi iila kɔnɔŋw.” 17 Nǝ kwaaw ǝŋnici nɔŋwɔccǝŋw, “Nyiiti kwǝṯhi kwɔɔrɔ-na mac.” Nǝ Yǝcu ǝccǝŋw, “A kwaami andasiŋw, naariŋaŋw, ‘Nyiiṯi kwǝthi kwɔɔrɔ-na mac; 18 kaka nǝthiŋǝ-gwɔ lɔɔrɔ ṯɔthni kerreny, nǝ ŋgwana kwǝthi-ŋǝ kire-kirem-ŋgwɔ kwiti kwir kwɔr kwɔɔŋa mac, ŋandisa-ŋasi ŋir rerrern.” 19 Nǝ kwaaw ǝccǝŋw, “Yaa Sǝyyiḏ, nyii-ŋgwɔ kwɔmǝ-ŋǝ elŋece a kwɔrɔ kwiɽii. 20 Ǝṯi rǝrnyǝri-ŋǝ rǝri kwogwɔccelɔ kaayin-la wɔ, laakin ŋaaŋa lir Yahuuḏ tǝ, ǝṯaarɔŋw, Urshaliim kwir ǝzir wɔvthanna wǝthi-gwɔ kwocce Allah-lɔ.” 21 Nǝ Yǝcu ǝccǝŋw, “Kwaaw kwaalɔ, ǝmminicǝ-nyii, saa@ ŋgwa kwinḏi ethiila kwiti kwinḏi-gi lizi ethi kwocce Papa-ŋwɔ-lɔ kwiinyi wala kaayin-la wɔ wala Urshaliim. 22 Ŋaaŋa lir Lisaamiriiyyiin ŋaaŋa liti lilŋithi ŋgwa rerrec mac kwǝṯi kwogwɔccelɔ; laakin nyiiŋǝ lir Yahuuḏ tǝ, nǝnyii elŋe ŋgwa kwǝṯi-nyii kwogwɔccelɔ, kaka ninḏi-gwɔ ŋiglǝthǝ ethiila Yahuuḏ-yi. 23 Nǝ saa@ ŋgwa kwinḏi, nɔŋw-ṯǝ kǝniny ɔro-ŋgwɔ kwinḏi-gi lizi eṯhi kwogwɔcce Papa-ŋwɔ-lɔ kwiinyi ŋɔma-ŋi ŋǝthi Ṯigɽim ṯǝthi Allah, ṯɔgwɔccathalɔ ṯir rerrem, ṯir kaka ṯinaŋnaŋw ŋundu. 24 Allah wir Ṯigɽim, nǝ kila lǝṯi kwogwɔcce ŋunduŋw-lɔ, laazim ǝri kwogwɔccelɔ ṯigɽim nǝ rerrem tok.” 25 Nǝ kwaaw ǝccǝŋw, “Nyii kwilŋithi rac ethaarɔŋw. Masiiyya ŋgwa kwinḏi ethiila, mindaŋ mɔŋw iila tǝ, kwǝnyji ilŋithini kwomne tatap.” 26 Nǝ Yǝcu ǝccǝŋw, “Nyii Kwirṯa-pa ŋgwɔ kwandisa-ŋa-gi.”
27 Nǝ kinaṯa kinaŋw-lɔ, nǝ ṯalaamiiz ṯuuŋwun ɔppatha. Nǝr liŋɽi etheese ŋunduŋw kwandisar kwaaw-gi, laakin nɔŋweere kweere mac kwǝccǝŋw, “Aatha kwir kwɔnaŋnathiŋa?” ya, “Kwotho kwandisa-ŋa-gi?” 28 E-ta nǝ kwaaw ṯayyi tii-lɔ ṯuuŋwun tǝthi ŋaaw, nɔŋw ele ki-mǝḏiinǝ-nǝ, nɔŋwɔccǝ lizi-ŋw, 29 “Ilar-ṯi ese kwɔɔrɔ kwɔmǝ-nyii andica kwomne tatap kwǝrri-rǝ-nyii. Kwɔrɔstɔ kwiti kworo-ŋgwɔ mac-a?” 30 Nǝr ruuthǝ ki-mǝḏiinǝ-nǝ nǝreele naanɔ-gwɔ Yǝcu.
31 Nǝ ṯalaamiiz tuurǝccǝlɔ kinaṯa-kinaŋw nǝrǝccǝŋw, “Yaa Ma@allim iithi-ṯǝ kwomne kweere!” 32 Laakin nɔŋwsi ǝŋnici nɔŋwsi ǝccǝŋw, “Nyii kwǝthi ethneya witi wilŋithiŋǝ mac.” 33 Nǝ ṯalaamiiz andasi deŋgen-na nǝraarɔŋw, “Kwɔmǝ mǝnyjǝ-tǝ kwizi kweere ǝvicǝ ethneya?” 34 Nǝsi Yǝcu ǝccǝŋw, “Ethne wiinyi wir, ethisi ǝrri ṯɔgwor-thi ṯǝthi ŋgwa kwɔɔsa-nyii, mindaŋ ethi ṯimmaci ŋothɽor kworo ŋuuŋun. 35 Ŋaaŋa liṯi lǝṯi aari mac-ŋwɔ, ‘Yǝwǝ kiyita kinnǝ yǝɽinǝ kwaɽiŋan yinḏi-yi ṯɔɔna ethiila?’ Nyii kwǝccǝ-ŋǝsi-mǝ ŋwɔ, dimmǝr-ṯi yǝy ese rɔrɔny rimǝ ṯimmayini rǝthisi ɔni. 36 Ŋgwa kwǝṯi ɔni ǝṯɔŋw aavi ɔjra wuuŋwun, mindaŋ ǝṯɔŋw ruusi ŋwɔɔla dɔŋw ŋwɔṯhi ŋimiitha ŋǝṯi nanni dok-dok; mindaŋ mǝ ŋgwa kwǝthi ṯɔrɔny nǝ ŋgwa kwǝṯi ɔni tok ǝṯir aamina ndǝndǝk. 37 Kaka nǝthi-gwɔ ŋiɽaŋal yǝnǝ ŋǝṯaarɔŋw, ‘Ǝṯi kwizi kwette kwee, nǝ kwɔthaathɔ ǝṯɔŋw ɔni’. 38 Nyii kwɔmǝ-ŋǝsi ɔɔsi ethi ɔni ki-thɔrɔny-nǝ ṯiti ṯakkiŋa-gwɔ ŋothɽor mac; nǝ lithaaṯhɔ oro lakkɔ ŋothɽor kinanaŋw, ŋaaŋa-tǝ noro limǝ kaṯṯasi faayitha ki-ŋothɽor-na ŋeeŋen.”
39 Nǝ Lisaamiriyyiin littǝzir lǝthi mǝḏiinǝ ǝmminici Yǝcu-ŋw ŋiɽǝaŋal-ŋi ŋǝthi shahaada kwǝthi kwaaw kwǝccǝŋw-sigiŋw, “Kwandica-nyii kwomne-ŋgwa tatap kwǝrri-rǝ-nyii.” 40 E-ta mǝ Lisaamiriiyyiin iila naanɔ-ŋgwɔ, nǝr tuurǝccǝlɔ ethi-li naani; e-ta nɔŋw naani ŋwaamin ŋwuɽǝn kinanaŋw. 41 Nǝ luuru ǝmminici ŋunduŋw ŋiɽaŋali ŋuuŋun. 42 Nǝrǝccǝ kwǝyɔ-ŋwɔ, “Nyiiŋǝ liti lǝmminǝ sǝbǝb-gi kwǝthi ŋiɽaŋal ŋɔɔŋa mac, kaka mǝnyji-gwɔtǝ neŋne dɔṯṯɔk rogɽo-ri rǝri wɔɽe-wɔɽeny, mindaŋ ŋimǝ-nyji elŋe rerrem ethaarɔŋw, Kwiglǝthǝ kwǝthi ṯurmun kwirṯa-ŋgwɔ rerrem.”
Yǝcu mɔŋgwɔ sǝwici mɔwozofa tɔɔrɔ tuuŋwun tir toŋwor.
43 Mǝ Yǝcu ṯimmasi ŋwaamin ŋwuɽǝn kinanaŋw, mindaŋ nɔŋw diiɽi nɔŋweele Jǝliil. 44 Kaka naarɔ-ŋgwɔ rogɽo-ri ruuŋwun-ŋwɔ, “Kwiɽii kwiti kwǝṯir iiɽinǝ mac ki-bǝlǝḏ-nǝ kwuuŋwun.” 45 Ṯaŋw nɔŋw iila Jǝliil. Nǝ Lijǝliil aalanni ŋunduŋw, kaka niisacarsi-gwɔ ŋa tatap ŋǝrrǝ ŋwsi Urshaliim ki-@iiḏ-nǝ, kaka ninaanir-gwɔ ŋundu-ŋǝ tok ki-@iiḏ-nǝ.
46 Ŋwɔṯaŋw nɔŋw aaɽitha kwokwony Gaana kwɔnaanɔ Jǝliil kǝzir wuruusǝ-ŋgwɔ ŋaaw kiɽica. Nǝ mɔwozof naani kwette Kafranaahuum kwǝthi tɔɔrɔ tir toŋwor tuumǝ. 47 Mɔŋw neŋne ethaarɔŋw Yǝcu ŋgwana kwɔmǝ iila min Yahuuḏiiyyǝ ethiila Jǝliil, nɔŋweele nɔŋw tuurǝccǝlɔ tur ethɔɔɽi ethi sǝwici ŋunduŋw ṯiɽiŋǝyin, kaka mɔŋgwɔ aadiṯhi ethi ai. 48 Ŋwɔṯaŋw nǝ Yǝcu ǝccǝŋw, “Meere ese ŋilima-ŋwɔsi ŋiɽaŋal-ŋi ŋa ŋir ŋwundǝ-ŋwundǝ mac tǝ, ere ǝmmini ḏuṯ.” 49 Nǝ mɔwozof accǝŋw, “Yaa Sǝyyiḏ, ndɔɔɽi fira-vra niti naayɔ tɔr ṯiinyi kinnǝni mac.” 50 Nǝ Yǝcu accǝŋw, “Nḏi nǝ tɔr tɔɔŋwa timiithi rac.” Nǝ kwɔr ǝmmini ŋiɽaŋali ŋandisasi Yǝcu, mindaŋ nɔŋw iidǝthǝ kithaay nɔŋweele. 51 Nǝ kinaŋw nɔɔɽɔŋw, nǝr biɽithi yaḏaama-yi kithaay mindaŋ nǝrǝccǝŋw, “Tɔr tɔɔŋwa kirana timiithɔ!” 52 E-ta nɔŋwsi uṯicǝlɔ lɔɔmɔr-li limɔŋw-li saawi. Nǝrǝccǝŋw, “Kilgin saa@ kwette kwǝthi kaaŋwɔn-naŋw na hɔmmǝ duŋgwǝci.” 53 Nǝ ṯǝrnyin kithaayini ethaarɔŋw saa@ kwundǝr-ṯǝ ŋgwa kwandica-gi Yǝcu ŋunduŋw nǝccǝŋw-ŋgwɔŋw, “Tor timiithi rac.” Ṯaŋw nǝr ǝmmini lizi-li tatap lǝthi dɔɔnɔŋw kwuuŋwun. 54 Nǝ ŋilim oro ŋɔ ŋir nimrǝ kwuɽǝn ŋǝrrǝsi Yǝcu Jǝliil-nǝ kinaŋw mɔŋwaaɽa min Yahuuḏiiyyǝ.
aza 4
Yecu-ŋa kwaw gi kwedi zaamraŋw
1 mezi Kweleny Yecu elŋece ŋeḏi lifarzi ŋimer ŋi neŋne ŋiɽaŋali, ŋarir ŋi ŋwu: Yecu kweḏi lumaṯi luru, na kweṯi zi baptazi luru eḏi yuhanna la, 2 (lakin eti zi Yecu ere baptazi ŋundu mac, na limeḏgen orɔ leri zi baptazi,) 3 nuŋw ṯazi yahuḏiiyaŋw lu, nuŋw diɽi eḏaɽiḏa jaliil. 4 nuŋw ta pa ele zaamra ŋgi. 5 ŋwu ta, nuŋw upaḏi kayin weḏi zaamraŋw weni zukaar, wunani gwu ṯuruny ketok tinḏeḏa yaguub tiɽŋeyin teni yuzif. 6 na ṯil ṯeḏi yaguub nani kinaŋw, na kaka ma gwu Yecu ajili nana ki ṯay la, nuŋw ta nanalu kineni pet ki ṯil la. na kaŋwun-na kwiri, kaka zaa wri-kwuɽen. 7 nuŋw ila kwete kwir kwaw kweḏi zaamraŋw eḏaŋɽi. na Yecu eca ŋwu: inḏeḏenyji, nyji ii; 8 kaka ma gwu limeḏgen ele ki meḏiina-na eḏi liṯa eḏneya. 9 na kwaw kwir zaamri eca ŋwu: aḏa kwiri mindaŋ uṯizenyi lu ŋaw ŋi ŋeḏi zi ii, ŋa kwiri yahuuḏi, nenyi ma orɔ nyi zaamri? kaka orɔ gwu yahuuḏ-ŋa lizaamri li ṯuwən. 10 na Yecu eŋnici, nuŋw eca ŋwu: eŋgelŋe haḏiya weḏi Allah, eŋgelŋe ŋgwa kwuṯizeŋa gi lu eḏi zi inḏeḏa, eḏi zi ii, eŋgi uṯize ŋunduŋwu lu, eŋguŋw ma inḏeḏa ŋaŋwu ŋaw ŋeṯinḏeḏa ŋimiiḏa. 11 na kwaw eca ŋwu: kwor kwalu, a kwafa ḏelwa ṯaka, olu ma ṯil-na dudul; ta ma afa ŋaw ŋa ṯaka, ŋeṯinḏeḏa ŋimiiḏa? 12 a kwuṯemḏi ṯernyeriŋw ṯeni yaguub, ṯinḏeḏenyji ṯil kḏu, ṯeṯir gwu ii ŋundu-ŋa nyiɽŋeyin nyi, ŋirel ŋi-na ŋuŋun rac a? 13 na Yecu enŋici, nuŋw eca ŋwu: kwere kweri ii ŋaw ŋu, a owḏa ye kwokwony, 14 lakin kwere nyiḏak kwumɔ ii ŋaw ŋenyji inḏeḏa, a owḏa ere ye kwokwony ḏuṯ, lakin ŋaw ŋenyji inḏeḏa, er orɔ duŋgwun-na ṯuwa ṯeḏi ŋaw ŋeṯirṯeḏi eḏinḏeḏa ŋimiiḏa ŋiaŋ, ŋeṯinanniḏa dɔk. 15 na kwaw eca ŋwu: kwor kwalu, inḏeḏenyi ŋaw ŋu, ŋiti ŋi nyi iini owḏa mac, enyere onda kunuŋ tɔk mac ki ṯay ṯolana eḏi gwu aŋindi.
16 na Yecu eca ŋwu: inḏi, ornuṯa kwulelu, a gi oɽa kunuŋ. 17 na kwaw eŋnici, nuŋw eca ŋwu: nyi kwiti kweḏi kworu-na mac. na Yecu eca ŋwu: a kwumami andazuŋw, ari ŋa gwu ŋwu: nyi kwiti kweḏi kworu-na mac, 18 kaka akwukwu ŋa gwu lor mindaŋ ner orɔ tuḏni, na ŋgwa kweḏi ŋa kirem, kwulelu kwiti kwiri mac. ŋimezi andazi ŋir rerem. 19 na kwaw eca ŋwu: kwor kwalu, nyi kwilŋiicaŋa rac, a kwiri kwiɽi. 20 eti rernyeri-ŋa kwɔkwocelu kayin la wu; na ŋaŋa ta, etaruŋw ŋofḏana eḏi lizi kwɔkwocelu urzaliim. 21 na Yecu eca ŋwu: kwaw kwalu, emnicenyi. lomur klu linḏi, le li ere kwoce Papaŋw lu kunuŋ mac, ya urzaliim tɔk mac. 22 a leṯi kwɔkwocelu ŋgwa kwiti kwilŋiiḏi ŋa mac. kwilŋiicanyi nyiŋa rac kweti nyi kwɔkwocelu, kaka inḏi gwu ŋigileḏa nani gwu yahuuḏ. 23 na lomur klu linḏi, linderṯa kirem, leḏi li kla leṯikwocelu rerem, er kwɔkwoce Papaŋw lu ṯigɽim ṯi, ŋirlalu ŋi, kaka eṯi zi gwu ṯa Papa naŋni eḏi kwɔkwocelu. 24 Allah wiri ṯigɽim, na kla leṯi kwɔkwocelu er ṯa pa kwɔkwocelu ṯigɽim ṯi, ŋirlalu ŋi. 25 na kwaw eca ŋwu: nyi kwilŋiiḏi maziyyaŋw kwinḏi eḏila (kwecer Kwruztu); muŋw ila ta, kwenyji andaci ŋiɽaŋali tatap. 26 na Yecu eca ŋwu: nyi kwiri ṯa ŋgwu. nyi kwiri, kwandizaŋa gi. 27 ner ṯa orɔ ŋwu, na limeḏgen ilana tuc, ner zi kaṯazi kwandizar kwaw gi kwete, ner liŋɽi. nuŋw ere kwere mac kwuṯizelu eḏeca ŋwu: aḏa kwiri kwuneŋnicaŋa? ya eḏeca ŋwu: kwɔḏɔ kwandizaŋa gi? 28 na kwaw ṯazi tibɽaŋi lu teḏi aŋɽi, nuŋw aɽiḏa ki meḏiina-na, nuŋw eca loru ŋwu: 29 ilarṯi, ele, iza kworu kwete kwumenyi andaci kwɔmne tatap kwumenyi erri. Kwruztu kweŋgi ma ṯa orɔ ŋgwu manja? 30 ner ruḏa ki meḏiina-na, ner ila nanuŋw gwu. 31 na ṯa limeḏgen andaci, ner eca ŋwu: rabbi, iiḏi ṯa kwɔmne kwere. 32 nuŋw zi eca ŋwu: nyi kweḏi eḏneya witi wilŋeceŋa ezir mac. 33 na limeḏgen andizazina ner ari: kwumɔ manja kwizi kwere efiza eḏneya were? 34 nezi Yecu eca ŋwu: eḏne winyi wiri eḏi zi errici ŋgwa kwuzanyi ṯugwor ṯi ṯuŋwun, na eḏi rataci ŋunduŋwu ŋɔḏɽor. 35 a liti leṯaru ŋwu manya, yowa yende yimɔṯimayini kinna kwaɽŋan mindaŋ eḏi ma uni? nyi kwecaŋazi ma ŋwa, dimer ṯi yey, eze ruruny rir pa kru rimɔṯimayini eḏuni. 36 na kwumɔratazi ṯuna, ŋgwu kwafi ujra kirem, eṯuŋw aɽazi kwɔmne kwuriɽu duŋw kweḏi ŋimiiḏa ŋiaŋ. ṯaŋwu ŋgwa kwugwuḏu, na ŋgwa kwunu, er nyeŋlena ki lomur lutuput. 37 ner orɔ rerem, ṯaŋwu ŋarir ŋi ŋwu: eṯuŋw kwe kwete, na kwuḏaḏu eṯuŋw uni. 38 nyi kwuza ŋazi eḏuni ŋgwa kwiti kwaki ŋa ŋuruŋ mac. liḏaḏu limaki ŋuruŋ, na orɔ ŋaŋa limɔ li oɽmaṯi ki ṯuna-na ṯeŋen.
39 ner emnizi luru leḏi ayin wa, lir lizaamri, eḏalliḏa ŋunduŋwu rugwori nana ŋiɽaŋal ŋi ŋunḏiza zi kwaw ki, ŋecaŋw zi ŋwu: kwumenyi andaci kwɔmne tatap kwumenyi erri. 40 ma lizaamri ila nanuŋw gwu, ner uṯizelu eḏi li nani ŋundu ŋali; nuŋw nani kinaŋw ŋwamin ŋwuɽen. 41 ner emnizi litezir liḏaḏu, kaka muŋw zi gwu andaci ŋundu oɽeny. 42 ner eca kwayu ŋwu: ŋimenyjemni kire-kirem, kaka menyji gwu neŋne yəni yi yeri, ŋɔŋa ŋiti ŋiri mac; na ŋilŋiicanyji rac, eḏaru ŋwu: kwunderṯa rerem kwiri Kwigileḏa kweḏi ṯurmun.
Yecu kwuzeye toru teḏi kwor kwupa ŋelenyi jaliil
43 ma ŋwamin ere ŋwuɽen nuŋw ru kinaŋw eḏele jaliil. 44 kaka ari gwu Yecu ŋundu ŋwu: liti leṯi nii kwiɽyaŋi-na mac kezir wuŋwun. 45 muŋw ila jaliil, na leḏi jaliilŋw ner emni ŋunduŋwu eḏami enjuŋw deŋgen, limeze kwɔmne tatap kwerraŋw ki iid-na urzaliim, kaka mer gwu nani ŋunduŋa tɔk ki iid-na.
46 na Yecu ila kwokwony kaana kweḏi jaliilŋw, kezir wuruzaŋw gwu ŋaw nabiṯ. na kwor nani kwete kwupa ŋelenyi, kweḏi toru tume kafranahum. 47 mindaŋ ma kwor ŋgwu neŋne mer ari, Yecu kwumaɽa yahuḏiiya, kwumupaḏi jaliil, nuŋw ele nanuŋw gwu eḏuṯizelu eḏoɽi eḏi zəwi tiɽŋeyin, kaka muŋw gwu adiḏi keṯɔk eḏay. 48 na Yecu eca ŋwu: ma ere eze kwɔmne kwere kwir ŋilim kweḏi gi liŋɽi mac, a liti lemni mac. 49 na kwor kwupa ŋelenyi eca ŋwu: jenaaba, oɽe fitak, iti ay gwu toru tinyi mac. 50 na Yecu eca ŋwu: inḏi ma, tiɽŋelu timiiḏi rac. na kwor emni ŋiɽaŋali ŋandicazi Yecu, nuŋw ele. 51 mindaŋ muŋw oɽi ki ṯay la, ner biɽḏi yaḏaam yi yuŋwun kiṯay, ner eca ŋwu: tiɽŋelu timiiḏi rac. 52 nuŋw zi uṯizelu, nuŋw zi eca ŋwu: timɔ zey ki zaa kwendu? ner eca ŋwu: kiligin kwiri, kaŋwun-na, kaka zaa kwete, na kimeṯ duŋgweci. 53 na ṯernyin aɽazi yey ki zaa ŋgwa kwumɔ gi Yecu andaci ŋunduŋwu: tiɽŋelu timiiḏi rac, nuŋw alliḏa ŋunduŋwu ṯugwori nana tuc, ŋundu, na kla tatap ledi duənuŋw tɔk. 54 na kwɔmne kwerri Yecu orɔ kwuɽen kwir ŋilim, muŋw oɽa yahuḏiiya eḏele jaliil.