Bɔɔlɔs-ŋǝ yaavɔr-yi yir ter.
1 Mǝ yithlǝ ere wrii-kwaɽiŋan, nǝnyaaɽitha Urshaliim kwokwony Barnaaba-gi kwɔmɔlthanna Ṯiiṯus-ŋwɔ tok. 2 Ninyǝni kwinḏi kaka nurwǝccǝ-nyji-ŋwɔ Allah-lɔ etheele. E-ta nǝnyii ɔɽɔmaṯṯi dɔŋw rɔ-asa-ri cuk-cuk, mindaŋ nǝnyji ilŋithini ŋiɽaŋali ŋǝthi Inyjiil wǝccǝny-yi Umama bǝshirǝ. Ninyeere naŋni ŋothɽor ŋiinyi ŋǝthi kerreny-ŋwɔ, alla ŋǝthi kire-kirem-ŋgwɔŋw etheere ere faayitha-na mac. 3 Nɔrɔ-va kinnǝni Ṯiiṯus kwɔrɔɔmɔthiny-gi Yuunaani tok, nǝr-tǝ ere kwɔrmɔṯasi mac ethi uɽunni. 4 Laakin kaka ninaanir-gwɔ lokwo lir ŋiyaŋga ŋidiny limǝ ǝnḏǝ ki-mǝjlǝs-nǝ ŋejmethi ethi ṯǝccici hɔrriiyya wǝri wǝthi-nyii ethi Kwɔrɔstɔ-na kwǝni Yǝcu, mindaŋ ethi kǝkkici nyuŋwsi hɔrriiyya. 5 Laakin nǝnseere ǝmminici ethisi kettice ṯaay mac wala kwokwo cuk domony, mindaŋ ethi ŋa ŋir rerrem ŋǝthi Inyjiil riyǝnnici ŋaaŋwɔsi.
6 Laakin kila luruusǝrsi lɔppa; ŋǝnyji andasi ŋɔ kaka niti nɔrɔr-gwɔ duŋgwinyii ŋiɽaŋal ŋeere mac lirṯaŋ; Allah wende wǝṯi ṯǝmsi kwizi-lǝ kweere. Nǝ kila lɔppa nǝrnyii-gweere kiɽǝccǝ-lǝ ŋeere ŋir ter mac. 7 Laakin nǝrsi kǝniny elŋe ethaarɔŋw, Allah wɔmǝ-nyii inḏǝthǝ ŋothɽor ethi-ŋi ǝccǝ Umama bǝshirǝ Inyjiilǝ, kaka-ṯǝ kinaŋw ninḏǝthǝ-ŋgwɔ Bɔṯrɔs-ŋw ŋothɽor ethi-ŋi ǝccǝ Yahuuḏǝ bǝshirǝ Inyjiilǝ. 8 Kaka nɔrɔny-gwɔ kaavɔr kǝthi Umam ŋɔma-ŋi ŋǝthi Allah, kaka-ṯǝ nuŋuusǝ-ŋgwɔ Bɔṯrɔs-ŋw kaavɔr kǝthi Yahuuḏ. 9 Na mǝ Ya@guub-ŋǝ Bɔṯrɔs-gi nǝ Yuhanna tok lir riɽiithin ese ne@ma kwɔmǝnyii Allah inḏǝthǝ; nǝrnyji ṯiŋacca rii rǝthi ŋɔmath, nyiiŋǝ Barnaaba-gi, ŋǝniŋw, a kwɔmroro dɔŋw lɔtɔpɔt. Mindaŋ nǝnyii kette ŋiɽaŋali ṯuunyu ṯɔtɔpɔt, etheele nyiiŋǝ Barnaaba-gi ethi akkɔ ŋothɽor ki Umam-na, nǝ ŋunduŋǝ tǝ, ethisi akkɔ ki Yahuuḏ-nǝ. 10 Nǝ ŋa tatap ŋuṯucǝr-nyji-ŋǝlɔ, nǝroro eth-ŋi kikithaayini lɔwaaya, nǝ nǝrṯoro ŋa kǝniny tittir ŋǝṯiny-gwɔ kittisasa ṯɔgwori ṯiinyi ethisi ǝrri.
Bɔɔlɔs mɔŋgwɔ ǝrmici Bɔṯrɔs-ŋwɔ Anṯaakiya.
11 Laakin mǝ Bɔṯrɔs iila Anṯaakiya, nǝnyii ɔppɔpɔthasi ŋunduŋw ŋiɽaŋali kii, kaka nɔrɔŋw-ŋgwɔ kaṯṯi. 12 Kerreny niṯi nɔppaṯhi lɔr mac kila lɔɔsasi Ya@guub, ǝṯi Bɔṯrɔs ethne lizi-li lir Umam. Laakin mǝ lɔr kila ɔppatha tǝ, nɔŋw ruu ŋijrithǝ-ŋijrithǝ mindaŋ nǝreere ethne Umam-yi kwokwony mac, kaka nithiinya-ŋwsi-gwɔ kila lǝṯi uɽunni ŋwɔthrɔnya. 13 Mindaŋ nǝsi-ṯǝ Yahuuḏ yithaathɔ tok ǝrriŋw ŋithenya kaka ŋǝrrǝsi Bɔṯrɔs, mindaŋ nǝ Barnaaba iidǝthǝ dukwuɽ ki-ŋitheny-na ŋeeŋen. 14 Laakin minyjeese liti laami eleŋw lirllalɔ mac, ki-ŋiɽaŋal-na ŋǝthi Inyjiil wir rerrem, nǝnyii ǝccǝ Bɔṯrɔs-ŋw kiyǝnǝ yeeŋen tatap ŋwɔ, “Nɔrŋa-ma Yahuuḏi mindaŋ naaɽi nǝ nanni ŋethre ŋir kaka ŋǝthi kwette kwir Umam, neere nanni kaka Yahuuḏǝ mac, e-ta a kwǝthi ŋɔma aŋgwɔrɔ ethi kwɔrmɔṯasi Umama ethi nanni ŋethre ŋir kaka ŋǝthi Yahuuḏ?”
Yahuuḏ-ŋǝ Umam-yi ligilaaw ṯǝmminǝ-thi.
15 Aw rerrem lilŋithi-nyji ŋelŋe lir Yahuuḏ, liti lir Umam mac wigii rɔgwori. 16 Laakin ŋɔ tatap nǝnyji elŋe rac ethaarɔŋw kwizi kwiti kwǝṯi suuɽunni ŋothɽor-ŋi ŋǝthi Sherii@a mac, laakin ǝṯɔŋw suuɽunni ṯǝmminǝ-thi ethi Yǝcu Kwɔrɔstɔ-na, nyiiŋǝ tok a kwɔmǝr ǝmminici Kwɔrɔstɔ-ŋw kwǝni Yǝcu, mindaŋ mǝr suuɽunni ṯǝmminǝ-thi ethi Kwɔrɔstɔ-na, nǝreere oro ŋothɽor ŋǝthi Sherii@a mac, kaka niti-ŋgwɔ kweere mac kwǝthi ŋɔma ethi suuɽunni ŋothɽor-ŋi ŋǝthi Sherii@a. 17 Na mǝr ṯǝccici nyiiŋǝ ethi suuɽunni Allah-yi ŋɔmath-ŋi ŋǝri ŋǝthirisi ethi Kwɔrɔstɔ-na, mindaŋ nǝr kaṯṯanni ligii rɔgwori tok kaka Umama, e-ta ŋǝniŋw Kwɔrɔstɔ kwǝkkicǝ ŋikiyaŋi ŋothɽor-a? Bǝri-mǝ! 18 Laakin mǝnyii aaɽi mǝnyii acci ŋgwa kwokwony kwɔmǝ-nyii kii kerreny tuk, e-ta nyii ruusi rogɽo riinyi kaaṯi-pa ki Sherii@a-na!
19 Ŋwɔṯaŋw ŋiɽaŋal-ŋi ŋǝthi Sherii@a, ninyǝni kwaayɔ, kwǝni kwɔmǝ Sherii@a ɽeenye mindaŋ ethi-mǝ oro kwɔmiithɔ kwǝthi Allah. 20 Ŋwɔṯaŋw ninyǝni kwɔmǝr ai Kwɔrɔstɔ-gi ki-ŋwuuɽi-lǝ; ninyeere oro nyii ŋgwa kwɔmiithɔ kwokwony mac, laakin nǝ Kwɔrɔstɔ oro kwɔnaaniny-gwɔna, nǝ ŋimiitha ŋɔ ŋimiithi-nyji kire-kirem-ŋgwɔ kaŋna-na wiinyi, nǝnyii miithi ṯǝmminǝ-thi ki Tɔr-na ṯǝthi Allah, kira ṯamɽa-nyii, mindaŋ nɔŋw inḏǝthǝ nyuŋwɔ rogɽo ruuŋwun. 21 Nyii kwende kwǝṯi dirnatha ne@ma-lɔ kwǝthi Allah mac. Laakin mǝ kwizi ɔvthanni Allah-yi ŋiɽaŋal-ŋi ŋǝthi Sherii@a, e-ta ŋiti ŋǝniŋw-pǝ, Kwɔrɔstɔ kwaayi-ṯalɔ pa ceg-cegi-a!
aza 2
ŋafur ŋuŋun ŋimezi lizi emnici urzaliim
1 ma yiḏla wri-kwaɽŋan ere, nenyi ṯaŋi kwokwony urzaliim barnaaba gi, nenyi mulḏani tiiṯazŋw tɔk nyi gi. 2 nenyi ṯaŋi ŋiɽaŋal ŋi kaka menyji gwu Allah ruwecelu; nenyji ŋi andaci ki yey-na yeŋen (lakin nenyorɔ cu-cuk nani gwu lizi liruzerzi lupa) ŋeḏi ŋiɽaŋal ŋizaw ŋir injiil weṯinyji yi ilŋiiḏini ki lizi-na lir umam, mindaŋ mer ere ruzi ŋɔḏɽor ŋinyi ŋiira fayḏa mac. 3 ner ere ari mac, lazim eḏi tiiṯaz uɽuni luḏrunya, urŋw gwu keni yunaani. 4 lakin ner zi mulḏani ŋejmeṯi ki mejliz-na lɔkwɔ lir ŋiaŋga ŋidiny, linaŋna eḏi ṯeci hurriya weri eḏi Kwruztu-na kweni Yecu, mindaŋ eḏi kəki nyuŋwuzi kuruu gi. 5 nenyji ere emnici tamin tere ḏuṯ, mindaŋ eḏaŋraci ŋaŋwuzi ŋiɽaŋali ŋirlalu ŋir injiil. 6 na kla limerzi ruzi lupa, ner nyi ere kiɽeci ŋiɽaŋali ŋere mac ki injiil-na weṯinyji yi andaci (mer eni liṯemḏizi la ner nyi ere ruḏaḏa ŋiɽaŋali ŋere mac, eṯi zi Allah biɽḏina). 7 lakin keni, ner elŋe eḏari, Allah wumenyi inḏeḏa ŋiɽaŋali ŋizaw ŋir injiil eḏi yi andaci lizi lir umam, kaka ta muŋw gwu inḏeḏa buṯruzŋw ŋiɽaŋali ŋizaw ŋir injiil eḏi zi yi andaci kla lir yahuuḏ. 8 kaka ma gwu Allah errizi buṯruzŋw ŋiɽaŋali ŋupa eḏi ruzi ŋunduŋwu kafur ki lizi-na lir yahuuḏ, nuŋw zi ta errizi nyuŋwu tɔk eḏorɔ kafur ki lizi-na lir umam. 9 na kla lir lijowit leni riɽḏin reḏi kaniiza, yaguub-ŋa zafa gi, na yuhanna tɔk, mer eze ṯimeca ṯeḏi ŋimɽi ṯimenyji Allah inḏeḏa, ner nyji agni rii ri reḏi mini, nyiŋa barnaaba gi, eḏorɔ ŋiaŋga; ner nyji emnici eḏele ki lizi-na lir umam, na ŋunduŋa ta eḏele ki lizi-na lir yahuuḏ. 10 lakin ner naŋni nyuŋwuzi eḏi tiŋayini luwaya, na ŋinderta ŋeti nyi gwu kiṯazi ṯugwori eḏizerri.
buuluz muŋw kiɽaci buṯruzŋw kwecer zafa
11 kwaḏan ta ma zafa ila anṯaakya nenyi rilli eḏupiḏazi ŋunduŋwu ŋiɽaŋali ki yey-na, kaka eficaŋw gwu rɔgwɽɔ ruŋwun hukma. 12 kerreny, iti uɽu gwu lor lɔkwɔ kinna mac limɔnani nani gwu yaguub, eti zafa-ŋa eḏne lizi li lir umam, lakin mer ila ta, nuŋw zi ruci-na lir umam nuŋw nani ter, kaka tinyaŋw zi gwu kla lir yahuuḏ. 13 na liḏaḏu leḏi yahuuḏ tɔk, ner zi erri ŋu ŋidiny ŋunduŋali, na barnaaba tɔk iideḏa ki ŋiɽaŋal-na ŋu ŋeŋen ŋir ŋidiny. 14 lakin menyjeze liti linḏi lirlalu mac ki ŋiɽaŋal-na ŋirlalu ŋir injiil, nenyeca zafaŋw ki yey-na yeŋen tatap ŋwu: na ŋa kwir yahuuḏi keni ŋgwu, ma nani kaka kwizi kwir umam, kwiti kwir kaka yahuuḏi mac, na a kwɔḏɔ kwunaŋna lizi lir umam eḏi miḏa kuruu keḏi yahuuḏ?
kuruu kiti keḏi fayḏa kwere mac
15 nyiŋa ta, ner nyjelŋe liri yahuuḏ, liti liri lizi lir umam mac, leni liki rugwori, 16 ner zi elŋece keni rac eḏaruŋw, kwizi kwiti kweṯir ruzi kwofḏana ŋɔḏɽor ŋi ŋeḏi kuruu mac, lakin təmna ṯi eḏi Yecu Kwruztu-na, nyiŋa keni limalliḏa Kwruztuŋw rugwori nana kweni Yecu, mindaŋ er nyji ruzi lofḏana ṯəmna ṯi kḏu, ner ere orɔ ŋeḏi ŋɔḏɽor ŋeḏi kuruu mac; kaka iti eṯir gwu ruzi kwizi kwere kwofḏana mac ŋɔḏɽor ŋi ŋeḏi kuruu. 17 lakin, mer naŋni nyiŋa eḏeni lofḏana eḏi Kwruztu-na ta, mindaŋ mer nyji inḏa leni liki rugwori ta, eṯinyji Kwruztu emnici eḏi nanniḏa ki ŋikya-na? beri ma! 18 ŋende ŋofḏana eḏaɽiḏa kwaḏan kwokwony ki ŋiɽaŋal-na ŋimenyji ala rii. eŋginyjerri ŋu ta, eŋginyorɔ kaṯi. 19 na kuruu ruzi nyuŋwu kaṯi eḏay, nenyay ŋiɽaŋal ŋi ŋeḏi kuruu mindaŋ eḏi miiḏi eḏorɔ kwedi Allah. 20 nyi kwumay Kwruztu gi ki ŋwuɽi la ŋwuɽmɔḏalu; na nyi kwiti kwiri mac ŋgwu kwumiiḏu, lakin na Kwruztu orɔ ŋgwu kwumiiḏu nyi gwu-na; nyi kwunani kwumiiḏu kaŋna-na wu, lakin nyi ŋgwu kwumiiḏu ki təmna-na ṯeṯi nyi ṯi alliḏa Toru teḏi Allah tugwori nana, tamɽa nyi mindaŋ nuŋw tiŋaci nyuŋwu rɔgwɽɔ lu eḏeyzi nyuŋwu. 21 nyi kwiti kwinḏi eḏi ruzi ṯimeca ṯeḏi ŋimɽi ŋeḏi Allah zagi mac. eŋgi kuruu eḏi ŋuma eḏi ruzi nyuŋwu kwofḏana ta, eŋgi ŋiɽany ŋeḏi Kwruztu ere eḏi fayḏa kwere mac.