Tirany mɔŋgwɔ kiṯṯi yaaṯima.
1 E-ta ninyeese Tiranyɔ tigiṯṯu khaaṯima kette kǝthi kiya yir dɔvokwɔɽony, mindaŋ nenyii neŋne haywaana wette wǝthi wa wɔmiithɔ wir kwaɽiŋan, wandisa ṯogɽo-thi ṯɔppa, ṯir kaka leere lɔɔvɔna, nɔŋwaarɔŋw, “Ila!” 2 Mindaŋ mǝnyii dimmi yǝy ninyeese mɔrṯa kwifiithɔ per-per, nǝ ŋgwa kwǝllithi-gwɔlǝ, nɔŋw appi kworje, mindaŋ nǝr inḏǝthǝ taŋgiŋi. Nɔŋw ruu kwǝllithi nɔŋweele ŋillaza-ŋi kii ethisi illaza kii.
3 Nǝ mɔŋw kiṯṯi khaaṯima kir nimrǝ kwuɽǝn, nenyii niŋnaci haywaana wɔmiithɔ wir nimrǝ kwuɽǝn waarɔŋw, “Ila!” 4 Mindaŋ nǝ mɔrṯa kwɔthaathɔ ruuthǝ kwɔɔri cel-cel. Nǝ ŋgwa kwudǝllithi-gwɔlǝ, nǝr inḏǝthǝ ŋɔma ethi ǝnyji ŋǝryǝ kwurǝyu-lu, ethi lizi indinyathisi-na wɔɽe-wɔɽeny. Na nǝr inḏǝthǝ kaalala kɔppa ṯok.
5 Nǝ mɔŋw kiṯṯi khaaṯima kir nimrɔ ṯoɽol, nenyii niŋnaci haywaana wumiithɔ wir nimrǝ ṯoɽol waarɔŋw, “Ila!” Mindaŋ mǝnyii dimmi yǝy, ninyeese mɔrṯa kwuŋwnɔ tittiṯ, nǝ ŋgwa kwǝllithi-gwɔlǝ, nɔŋw appi miizaana ki-thii ṯuuŋwun; 6 nenyii niŋnaci kwomne kwette kwir kaka ṯogɽo, kelgeny-na kǝthi haywaanaaṯ wa wɔmiithɔ wir kwaɽiŋan ṯaarɔŋw, “Rɔbɔ@ rǝthi gemeh riri ɔjra wǝthi laamin lɔtɔpɔt, nǝ rɔbɔ@ ṯoɽol rǝthi she@iir riri ɔjra wǝthi laamin lɔtɔpɔt, laakin ŋiila-ŋa kiɽica-gi tǝ ǝseere kiirasalɔ mac!”
7 Nǝ mɔŋw kiṯṯi khaaṯima kir nimrǝ kwaɽiŋan tǝ, nenyii niŋnaci ṯogɽo ṯǝthi haywaan wɔmiithɔ wir nimrǝ kwaɽiŋan waarɔŋw, “Ila!” 8 Mindaŋ mǝnyii dimmi yǝy, ninyeese mɔrṯa kwir ṯiiginy, nǝ yiriny yǝthi ŋgwa kwɔdǝllithi-gwɔlǝ, nǝrǝni Ŋiɽany, na nǝ Jahiim kwaathitha kuṯṯunǝ. Nǝrsi inḏǝthǝ sɔlṯa ethi-gi mithǝ rɔbɔ@a rette rǝthi wurǝyu, ethi ɽeenye ŋǝryǝ-ŋi, yaaŋwɔ-yi, kimǝth-gi, nǝ haywaanaaṯ-yi wǝthi ŋǝryǝ.
9 Nǝ mɔŋw kiṯṯi khaaṯima kir nimrǝ ṯɔthni, ninyeese rigɽimǝ ŋwɔthgwunǝ kuṯṯu rǝthi kila liɽinyithirsi ŋiɽanal-ŋi ŋandisarsi ŋǝthi Allah, nǝ shahaaḏa kwɔgittar tok. 10 Nǝr allasi kwɔɔla kwɔppak nǝraarɔŋw, “Kweeleny kwǝthi ŋɔma beṯṯen, kwirllinǝlɔ ter, nǝ kwir rerrem! Ṯaccaŋ tuk kwɔrɔ kwinḏiŋǝ-gi ethi ǝccǝ lizi haakima kɔnɔŋw kwurǝyulu, nǝ ethisi inḏǝthǝ jiizǝ kila lǝṯi-nyji endinye?” 11 E-ta nǝrsi inḏǝthǝ leere-leere lɔɔvana lifiithɔ per-per, mindaŋ nǝrsi andaci ethi kaṯṯɔ wǝŋ wokwo kinnǝni, mindaŋ mǝ ŋwɔɔɽɔ ṯimmayini tatap ŋiɽany-ŋi ŋwɔthi kila lǝṯir-li ɔɽɔmaṯṯi lir yaḏaam, nǝ lir liyeŋgen tok, kaka-ṯǝ niɽinyiḏirsi ŋunduŋwsi ṯǝŋw tok.
12 Nǝ mɔŋw kiṯṯi khaaṯima kir nimrǝ nyirlil, e-ta nenyii dimmi yǝy, mindaŋ ninyeese wurǝyuŋi wiriiginnǝ ŋɔmmaŋi; e-ta nǝ aaŋwɔn reethe nɔŋw uŋwni tittiṯ kaka kirethi kir ṯirigii, na nǝ ǝwǝ wɔɽɔmaṯṯa reethe nɔŋworo kaka ŋin. 13 Nǝ rɔɔrɔm rǝthi leere irdithǝ kwurǝyulu, kaka nǝṯi-gwɔ ŋwɔɔtha ŋwiglǝ irdidǝ kwɔɔtha-la mǝ kɔrɔn kɔppa lakkisalɔ. 14 Nǝ leere irṯathalɔ nyim kaka kiṯaab kǝṯir aaɽasi dɔŋw-na, nǝ yaayin-ŋǝ lijǝziirǝ-li nǝr dimmini kithaay kǝzir weeŋen. 15 E-ta nǝ limǝlik lǝthi ṯurmun, ŋwɔmba mindaŋ, leeleny lǝthi jesh mindaŋ, lɔrṯɔ mindaŋ, kila lǝthi ŋɔma mindaŋ, nǝ lizi lithaathɔ tatap, lɔwaay nǝ kila lir hɔrr, nǝr luccini ki-yibaŋ-na, nǝ ŋwiiɽiya kuṯṯu ki-yaayin-la. 16 Nǝr ɔrnɔnɔṯi yaayinɔ-ŋwsi ŋwiiɽi-ŋi nǝrsǝccǝŋw, “Irdǝthǝr-nyji-gwɔlǝ, ǝrnyji luccǝzǝ yǝy yǝthi ŋgwa kwɔnaanalɔ kwɔrsi-la kwǝthi ŋeeleny, nǝ ŋirŋasa tok ŋǝthi Tirany! 17 Kaka mǝgwɔ laamin lɔppa lǝthi ŋirŋasa ŋeeŋen iila, nǝ ǝyǝ kwir-mba kwǝthi ŋɔma ethisi nee kithaay?”
aza 6
ṯikiiya-na ṯeḏi ŋwuli ŋweḏi yaṯim
1 mindaŋ nenyeze ma Tirany kii ŋwuli ŋweḏi kaṯim kete keḏi kya yir dufɔkwɽeny, nenyi neŋne kwɔmne kwete kwumiiḏu kweḏi ŋgwa kwir kwaɽŋan, kwari kaka ṯɔgwɽɔ ṯeḏi lere, ŋwu: ilamba! 2 menyi dimi yey nenyeze mɔrṯa kwufiiḏu pərpər, na ŋgwa kwelliḏi gwu la kwape kwɔrje; ner inḏeḏa taŋgiŋi, nuŋw ruweḏe lu ṯillaza ṯi ki, na eḏi illazi ki.
3 muŋw kii ŋwuli ŋweḏi kaṯim kir nimra kwuɽen, nenyi neŋne kwɔmne kwumiiḏu, kwir nimra kwuɽen, kwaruŋw: ilamba! 4 na mɔrta ruḏa kwir ter, kwori cel cel; na ŋgwa kwelliḏi gwu la ner inḏeḏa zulṯa eḏi iri ŋiɽena ŋeḏi ṯurmun kitay, mindaŋ ma lizi endinyaḏizina wuɽe-wuɽeny; ner inḏeḏa kalala kupak.
5 muŋw kii ŋwuli ŋweḏi kaṯim kir nimra ṯɔɽɔl, nenyi neŋne kwɔmne ŋgwu kwumiiḏu, kwir nimra ṯɔɽɔl, kwaruŋw: ilamba! menyi kete yey, nenyeze mɔrta kwuŋwuna titiṯ, na ŋgwa kwelliḏi gwu la kwapa mezana ki tii-na ṯuŋwun; 6 nenyi neŋne ṯɔgwɽɔ kaka etuŋw ruḏa keligeny-na keḏi kwɔmne ŋgwa kwumiiḏu kwir kwaɽŋan, taruŋw: melwa kwete kwɔkwɽeny kweḏi gamah kwiri ujra weḏi yomiiya, na limelwa ṯɔɽɔl lɔkwɽeny leḏi ŋwan liri ujra weḏi yomiiya, na ŋila-ŋa nabita gi ezere mummi nana ŋiɽaŋal ŋi ŋere mac!
7 na muŋw kii ŋwuli ŋweḏi kaṯim kir nimra kwaɽŋan, nenyi neŋne ṯɔgwɽɔ ṯeḏi kwɔmne kwumiiḏu, kwir nimra kwaɽŋan, ṯaruŋw: ilamba! 8 menyi kete yey nenyeze mɔrṯa kwigla nana kiny, na ŋgwa kwelliḏi gwu la kweni ŋiɽany, na ezir weḏi rigɽim kwaḏiḏa; na ṯurmun yiḏriḏa kwaɽŋan ner zi inḏeḏa zulṯa eḏi kekite kete ŋiɽany kalala gi mindaŋ, yaŋwu yi mindaŋ, na kwɔmne gi kweḏi ŋerya kweḏi yaɽi-na ki ṯurmun-na.
9 muŋw kii ŋwuli ŋweḏi kaṯim kir nimra ṯuḏni, nenyeze rɔgwɽɔ ŋweḏgwuna kuṯu, reḏi kla limerzi iɽinyaḏa ki ŋiɽaŋal ŋeḏi Allah, unḏizerzi gwu ki ŋeni ŋuŋun tɔk. 10 ner kete kwola ŋuma ŋi, laruŋw: ṯacaŋ kwiri, Kweleny kweri, kwirlinelu ter rerec, nenyji gwu uɽici ŋwoɽa ŋweḏi ŋin ŋeri nani gwu kla linani ki ṯurmun-na? 11 mindaŋ ner zi inḏeḏa lere lere yireṯi yifiiḏu pərpər, ner zi eca ŋwu; keṯir wəŋ kinna kwɔkwɔ mindaŋ ma ŋwuɽu ŋweḏi kla leṯir li oɽmaṯi ki ŋaḏaama-na, na lieŋgen tɔk, ṯimayini kworɔ dap, kla linḏir zi eḏi zi eɽenye kaka ŋunduŋwuzi.
12 muŋw kii ŋwuli ŋweḏi kaṯim kir nimra nyirlil nenyeze, na izaṯi, na ureyu rigini; na aŋwun uŋwuni titiṯ kaka kireṯ kuŋwuna keḏi yala, na owa woɽmaṯu orɔ kaka ŋin. 13 na rorum reḏi lere irdeḏa kureyu lu, kaka nyor nyigla nyeḏi kwoḏa ma kurun lakizalu; 14 na lere aɽani duŋw nuŋw ṯuḏaḏa lu, na yayin tatap lijaziira li duŋgwaḏa kiṯay kezir weŋen. 15 mindaŋ na leleny leḏi ṯurmun, na lizi lupa ŋoru, na leleny leḏi orṯa, na lurṯu, na kla leḏi ŋuma-na, na lizi tatap lir luway, na lir hurr tɔk, ner lucini ki yibaŋ-na na ki ŋwiiɽi-na ŋweḏi yayin. 16 ner eca yayinŋwuzi ŋwiiɽi ŋi ŋwu: iideḏer nyji nana, er nyji lucezi yey yeḏi ŋgwa kwunani kwurzi la kweḏi ŋeleny, na ŋirŋaza ŋeḏi Tirany. 17 kaka ma gwu lamin leni lupa leḏi ŋirŋaza ŋeŋen ila, na eya kwiri kweḏi ŋuma eḏi zi rillaca lu?