1 E-ta nenyii meleka baaŋaci bahara kwokwɔɽony kwǝthi ŋaaw ŋǝthi ŋimiitha, kwɔsɔɔɽɔ kaka gizaaza, kwuruuthu kwɔrsi-na kwǝthi ŋeeleny ŋǝthi Allah nǝ ŋǝthi Tirany, 2 ŋapralɔ kelgeny-na kǝthi shaari kwǝthi mǝḏiinǝ. Nɔŋw baaŋaci nyuŋw kwaaɽi kwǝthi ŋimiitha kwɔnaanɔ bahara kiyǝni raay riɽǝndǝk, kwǝṯi riiɽi nyɔɔrɔ nyaamin-na wrii-kwuɽǝn kithlǝyu kɔtɔpɔt; taamin tɔtɔpɔt kǝwǝ-lǝ wette, na ǝṯi yǝni yuuŋwun oro ṯisǝwǝ ṯǝthi ṯurmun tatap. 3 A kwomne ere naani kweere mac ki-mǝḏiinǝ-nǝ kwɔllɔna Allah-yi. E-ta nǝ kwɔrsi oro kwǝthi ŋeeleny ŋǝthi Allah nǝ ŋǝthi Tirany ŋinḏi ethi naani ki-mǝḏiinǝ-nǝ, mindaŋ agwɔ yaḏaam yuuŋwun kwogwɔccelɔ. 4 Mindaŋ ǝri eccice ŋunduŋw kiyǝnǝ, nǝ a yiriny yuuŋwun lothone ki-yuthul-lǝ yeeŋen. 5 A kulu ere naani kwokwony keere mac, ǝreere naŋni ŋwombo mac, wala fɔɔri kwǝthi aaŋwɔn, kaka ninḏi-gwɔ Kweeleny kwir Allah ethoro fɔɔri kweeŋen, mindaŋ mǝr mithǝ ŋeelenyi dok-dok, kaka limǝlik-gǝ.
Yǝcu naarɔ-ŋgwɔ wa@ḏa ethaaɽa fittak.
6 E-ta nenyii meleka ǝccǝŋw, “Ŋiɽaŋal ŋɔ ŋir rerrem, nǝ nǝr ǝthi ŋɔma ethisi allatha ṯɔgwori naana. Nǝ Kweeleny kwir Allah, kwǝṯi inḏǝthǝ liɽiiya Ṯigɽimǝ ṯuuŋwun, nǝ ŋwɔɔsi meleka kwuuŋwun ethi baaŋaci yaḏaama yuuŋwun kwomne-ŋgwa kwinḏi laazim ethǝrrini fittak.”
7 Nǝnyii Yǝcu ǝccǝŋw, “Niŋnacany-ṯi! Nyii ŋgwa kwinḏi ethiila fittak! Lɔrtanni kila liinyici ŋiɽaŋali naana ŋir ŋiɽiiya ŋinaanɔ kiṯaab-na ŋgɔ!”
8 Nyii kwɔrɔ kwǝni Yuhanna kwiniŋna nǝ kwiisa kwomne-ŋgwɔ tatap. Nǝ mǝr ṯimmanni ŋa ŋiniŋna-nyji nǝ ŋiisa-nyji tok, nenyii iidi ŋwɔɽelle-na ŋwɔthi meleka ŋgwa kwɔbaaŋica-nyii kwomne-ŋgwɔ tatap, mindaŋ ninyaadithi ethi kwoccelɔ. 9 Laakin nɔŋwɔccǝ nyuŋwɔ-ŋw, “Ǝṯi-nyji ǝrricǝ ŋɔ mac! Nyii kwir khaḏaam kaka ŋaaŋwɔsi nǝ liyaŋgalɔ laalɔ lir liɽii tok, nǝ kila lǝṯi mithǝ ŋiɽaŋali ŋǝthi kiṯaab ŋgɔ. Kwɔcca kǝniny Allah-lɔ!”
10 E-ta nɔŋwɔccǝ nyuŋwɔŋw, “Ǝṯi luccǝ ŋiɽaŋali ŋir ŋiɽiiya ŋǝthi kiṯaab ŋgɔ mac, kaka mǝgwɔ lɔɔmɔr aadithi keṯṯok linḏi-li kwomne-ŋgwɔ tatap ethi ǝrrini. 11 Ŋgwa kwigii ethɔŋw taari isṯimir ethisi ǝrri ŋigii, nǝ ŋgwa kwir kwudur ethɔŋw tǝ rɔɔthatha kwudur; nǝ ŋgwa kwirllalɔ ethɔŋw tǝ aari isṯimir kwirllalɔ, nǝ ŋgwa kwirllinǝlɔ ter ethɔŋw tǝ rillinǝlɔ ter.”
12 Nǝ Yǝcu aarɔŋw, “Niŋnar-ṯi! Nyii ŋgwa kwinḏi fittak! Kwappinna ɔjra wiinyi, ethisi inḏǝthǝ kila leere-leere ŋiɽaŋal-ŋi ŋirga ŋǝrrǝrsi. 13 Nyii kwɔrɔ kwir nda nǝ kwɔrɔ yuṯṯu, ninyoro kwir kerreny nǝ kwɔrɔ kwaathan kwir kwon-kwon nǝ kwirimthithɔ.”
14 Lɔrtanni kila lǝṯi ɔyi lɔɔvan leeŋen ethi sɔɔɽi, mindaŋ ǝrǝthi ŋɔma ethi yee nyɔɔrɔ nyǝthi kwaaɽi kwǝthi ŋimiitha, mindaŋ ǝreele ǝri ǝnḏi ki-mǝḏiinǝ-nǝ ŋwɔbaab-ŋi. 15 Nǝ kila linaanɔ parŋgala kwǝthi mǝḏiinǝ, lir ludur-ŋǝ lozŋor-li oro, liijin mindaŋ, kila lǝṯi kegitte ḏimmiya mindaŋ, kila lǝṯi kwogwɔcce kwomne-lɔ mindaŋ, kila lir lǝluŋw kandisa-gi nǝ ŋothɽor-ŋi tok.
16 “Nyii kwɔrɔ kwǝni Yǝcu kwuusucǝ-ŋǝsi meleka kwiinyi shahaaḏa-gi ŋgwɔ kwir kwǝthi yǝniisǝ. Nyii kwɔrɔ kwir ṯɔvɔɔ nǝ lɔɔla lǝthi Ḏaawḏ-ŋǝ, nǝ ninyoro Kwɔkwɔbel kwǝṯi erṯelɔ fɔɔri-gi.”
17 Nǝ Ṯigɽim-ŋǝ Ŋiira-ŋi ŋimthinǝ nda aarɔŋw, “Ila!” Nǝ kweere nyithak kwǝṯisi neŋne ŋɔ laazim ŋwaarɔŋw tok, “Ila!” Kweere nyithak kwiithi ǝwthǝ, ethiŋw iila; kweere nyithak kwɔnaŋni ŋaaw ŋǝthi ŋimiitha tǝ, ŋwɔsi aavi ŋir kaka haḏiiyǝ.
Ŋiɽaŋal ŋirimthithɔ.
18 Nyii kwɔrɔ kwǝni Yuhanna kwɔlɔccasi kila tatap lǝṯi neŋne ŋiɽaŋali ŋǝthi ŋiɽiiya ŋǝthi kiṯaab ŋgɔ: nǝ mǝsi-gwɔ kwizi kweere kiɽǝzǝsi-lǝ ŋeere nyittak tǝ, a Allah kiɽǝcci jiizǝ ki-ṯurvǝ-lǝ kitha ṯɔlɔɔthɔna kiṯaab-na ŋgɔ. 19 Na mǝ kwizi kweere nyithak dimmǝ ŋiɽaŋali kithaay ŋǝthi ŋiɽiya ŋǝthi kiṯaab ŋgɔ tǝ, a Allah dimmǝthǝ lɔɔɽɔŋi luuŋwun kithaay lǝthi nyɔr nyǝthi kwaaɽi kwǝthi ŋimiitha, nǝ lǝthi Mǝḏiinǝ Kwirllinǝlɔ ter, ŋa ŋɔlɔɔthɔna kiṯaab-na ŋgɔ.
20 Nǝ ŋgwa kwiisa kwɔgitta Shahaaḏa kwǝthi ŋiɽaŋali ŋɔ tatap nɔŋwaarɔŋw, “Aaw rerrem! Nyii ŋgwa kwinḏi ediila fittak!”
Amiin. Ila kǝniny Kweeleny kwǝni Yǝcu!
21 Ethi ne@ma kwǝthi Kweeleny kwǝni Yǝcu naani ŋaaŋa-li tatap lirllinǝlɔ ṯer. Amiin.
aza 22
1 mindaŋ na maleyka baŋaci nyuŋwu kufurṯa keḏi ŋaw-na ŋeṯizinḏeḏa ŋimiiḏa, ŋuzuɽu-na cucuɽic, kuruḏu nani gwu kwurzi kweḏi Allah-ŋa Tirany ri 2 ki zari la keligeny-na titir kweḏi meḏiina; nuŋw baŋaci nyuŋwu kwaɽi kweṯizinḏeḏa ŋimiiḏa tɔk, kwunani kufurṯa ki yəni ray riɽen tɔk, nyor nyi-na wri-kwuɽen nyir-na ter ter, kweṯi riɽi nyoru nyuŋwun ki yowa yere yere tatap; na yəni yeḏi kwaɽi ŋgwa, ner orɔ eḏi yi zəwi ŋelenyi ŋeḏi ṯurmun ŋir-na ter ter. 3 mindaŋ a gwu kwɔmne ere nani kwere mac kwinḏi eḏi ṯinyini ṯortaḏa ṯeḏi Allah; lakin, a kwurzi kweḏi Allah-ŋa Tirany ri nanni-na, a yaḏaam yuŋwun kwoce ŋunduŋwu lu; 4 er eze ŋunduŋwu kiyeyna, a yiriny yuŋwun nanni ki yuḏul la yeŋen. 5 a kilikelu ere nani kwokwony mac, er ere naŋni ŋwɔmba ya fori kweḏi aŋwun mac, kaka inḏi gwu Kweleny kweni Allah eḏi zi ṯiŋaci fori lu, mindaŋ mer miḏeḏa ŋelenyi dɔk dɔk.
ŋiɽaŋal ŋimɔ irmiḏiḏi
6 nuŋw eca nyuŋwu ŋwu: ŋifaŋal ŋu ŋeni ŋirlalu rerec, na Kweleny, kwir Allah weḏi rigɽim reḏi liɽi, kwumɔ uza maleyka kwuŋwun eḏi baŋaci yaḏaama yuŋwun ŋiɽaŋali ŋa ŋinḏi eḏerrini fitak. 7 na, izaṯi, nyi ŋgwu kwinḏi fitak.
ŋgwa kweṯaŋraci ŋifyaŋi ŋeḏi kiṯam ŋgwu kweni kwortani.
8 nyi kwiri kweni yuhanna, kwuniŋna na kwiza kwɔmne ŋgwu. na menyi neŋne, na menyeze tɔk, nenyiidi ŋwurgwu ŋi lu eḏi kwoce maleyka lu, ŋwuɽele-na ŋwuŋwun, ŋgwa kwubaŋcenyi. 9 nuŋw eca nyuŋwu ŋwu: beri, ma! eṯi zi erra ŋir ŋu mac. nyi kwiri kaḏaam keṯoɽmaṯi ŋa gi ki ŋɔḏɽor-na, na liaŋgalu li tɔk, lir liɽi, na kla letaŋraci ŋifaŋali ŋedi kiṯam ŋgu. kwoce Allah lu.
10 nuŋw eca nyuŋwu ŋwu: eti luca ŋiɽyaŋi ŋeḏi kiṯam ŋgu mac, kaka adiḏi gwu lomur keṯɔk. 11 ŋgwa kweṯizerri ŋir ḏalim, eḏuŋw zi ta erraḏa, na ŋgwa kweṯizerri ŋuruŋa, eḏuŋw zi ta erraḏa ŋuruŋa, ŋgwa kwofḏana eḏuŋw zi ta erraḏa ŋofḏana, na ŋgwa kwirlinelu ter, eḏuŋw ta nanniḏa kwirlinelu ter.
12 izaṯi, nyi ŋgwu kwinḏi fitak ujra yi eḏinḏeḏa lizi lere lere, ŋifaŋal ŋi ŋeḏi ŋa ŋimerzerri. 13 nyi kwiri kweni alfa na omega, yinderṯa yeni kwiŋna na kwukwaḏaḏi, na kwɔnkwɔn na kwaḏan tɔk.
14 kla leṯi yii yireṯi nana yeŋen leni lortani, kaka iti dirnaḏar gwu kwaɽi lu kwetizinḏeḏa ŋimiiḏa, ya eḏenḏi ki meḏiina-na yogwur yi. 15 na par ŋgi la na ludur nani, na luzur mindaŋ, na lijin mindaŋ, na kla leṯi kete ḏimya, na kla leṯikwoce kwɔmne lu kwere kwiti kwir Allah wumiiḏu mac, na kla tatap leṯizamɽi ŋir ŋəluŋ eḏizandazi, eḏizerri tɔk.
16 nyi kwiri kweni Yecu, kwuza maleyka kwinyi nani ŋa gwu, ṯunḏiza ṯi ki kḏu eḏi baŋaci yaniiza, nyi kwiri ṯufu ṯuruḏi eḏi dauḏ-ŋa, nenyorɔ tor tuŋwun tɔk, nenyeni ṯorum ṯeḏi ezir yi ṯeṯiṯiŋaḏa fori lu.
17 Ṯigɽim-ŋa tirlinelu ter kiŋaɽu gi ner aruŋw: ilar. na ŋgwa kwuneŋne eḏuŋw ari tɔk: ilar. na ŋgwa kwiiḏowḏa eḏuŋw ila, na ŋgwa kwir zurum eḏuŋw afi ŋaw beyin ŋetizinḏeḏa ŋimiiḏa.
18 nyi ŋgwu kwirece ŋunduŋwu kwere nyiḏak kwuneŋne ŋiɽyaŋi ŋeḏi kiṯam ŋgu ŋeni ŋwu: mezi kwere kiɽezi, a Allah kiɽeci ŋunduŋwu jiiza kwuluḏina kiṯam-na ŋgwu, 19 na muŋw zi iri kitay kwere ŋir ŋiɽaŋal ŋere ŋeḏi kiṯam ŋgu ŋir ŋiɽya, a Allah dimeḏa ŋunduŋwu ŋoru ŋuŋun ŋeḏi kwaɽi kwetizinḏeḏa ŋimiiḏa, na ŋeḏi meḏiina kwirlinelu ter tɔk, kwuluḏina kiṯam-na ŋgu.
20 ŋgwa kwunḏiza ŋiɽaŋali ŋu ki kwaruŋw: nyi kweca ma ŋwa, nyi ŋgwu kwinḏi fitak, ilamba, Kweleny kweni Yecu!
21 eḏi ṯimeca ṯeḏi ŋimɽi ŋeḏi Kweleny kweni Yecu nani ŋaŋa li tatap. emba.