Ibliis mǝr-gwɔ kǝkki yithlǝyu alf.
1 E-ta ninyeese meleka kwɔɔɽɔ ki-leere-na, kwappa mɔfṯaah ki-thii-na ṯuuŋwun, kwǝthi ǝzir wǝthi kuṯṯǝlɔŋw lac-lac, nǝ ŋwɔɔɽɔŋa ŋwɔppa tok. 2 Mindaŋ nɔŋw mithǝ kimǝwǝ kɔppa kɔɔri, kir kimǝw kɔɔɽɔn kǝni Ibliis ya Shiiṯaan, mindaŋ nɔŋw ɔvacci ŋwɔɔɽɔŋa ethi nanni yithlǝyu alf. 3 E-ta nǝ meleka kaṯṯɔ kǝzir-nǝ kuṯṯǝlɔ lac-lac, nɔŋw lǝŋthǝci mindaŋ nɔŋw ǝccici ǝzir akhṯima, mindaŋ nɔŋweere ǝthi ŋɔma kwokwony mac ethi kǝkiɽinyji ŋeelenyi-lɔ, mindaŋ mǝ yithlǝ ṯimmayini alf kimaara. Nǝ kwaathan tǝ, laazim ǝri kǝdithǝ ethi naani kwokwo cuk.
4 Ŋwɔṯaŋw ninyeese lɔrsi lǝthi ŋeeleny, nǝ kila linaanɔ-gwɔla nǝroro linḏǝthǝrsi ŋɔma ŋǝthi hɔkwɔm. Nǝ ninyeese rogɽo rǝthi lizi kila liɽinyithirsi ŋiɽaŋal-ŋi ŋǝthi shahaaḏa kweeŋen kwandisar kwǝni Yǝcu, nǝ ŋiɽaŋal-ŋi ŋǝthi Allah tok, nǝroro kila liti limǝ kwocce haywaana-lɔ mac, wala suurǝ kwuuŋwun, wala ethaavi @alaama wuuŋwun ki-yuthul-lǝ yeeŋen, wala ki-rii reeŋen. Nǝr miithi kwokwony mindaŋ nǝr mithǝ ŋeelenyi kaka limǝlik-gǝ Kwɔrɔstɔ-gi, mindaŋ nǝr naani yithlǝyu alf. 5 Nǝ kila lithathina laayɔ, nǝreere miithi kinnǝni mac, mindaŋ nǝ yithlǝ alf ernene kimaara. Nǝṯǝ ṯidiiɽǝ ki-ŋiɽany-na oro kɔthɔ ṯiŋna. 6 Ŋgwa kwɔrtanni, nǝ nɔŋwɔni kwirllinǝlɔ ter tok, mǝr-li ɔɽɔmaṯṯi kila ki-ṯidiiɽǝ-nǝ ṯiŋna! E-ta a ŋiɽany ŋa ŋir nimrǝ kwuɽǝn ere ǝthi ŋɔma mac deŋgen-la; laakin ǝroro kahana kǝthi Allah nǝ kǝthi Kwɔrɔstɔ tok, mindaŋ ǝri mithǝ ŋeelenyi ŋundu-gi yithlǝyu alf.
Shiiṯaan mǝr-gwɔ illazi gii.
7 Nǝ mǝ yithlǝ ernene alf tǝ, ǝri kǝdithǝ Shiiṯaana ki-sijin-nǝ kwuuŋwun, 8 mindaŋ ŋwɔ ruuthǝ ethi kǝkiɽinyji ŋeeleny-lɔ ŋinaanɔ ki-rɔkɔn rir kwaɽiŋan rǝthi ṯurmun, ŋir ŋeeleny ŋǝni Juuj nǝ Maajuuj, ethisi aaɽaci ŋǝryǝ dɔŋw, nǝ ŋwɔɔɽɔ ŋweeŋen uri beṯ-beṯṯen ŋwɔr kaka ramla rǝthi bahar. 9 Nǝr faathitha ṯurmunǝ naana tatap, mindaŋ nǝr riithini ǝzir wǝthi lizi lǝthi Allah, nǝ mǝḏiinǝ ŋgwa kwǝṯɔŋw amɽi tok. Laakin nǝ iigǝ ɔɽa ki-leere-na nɔŋwsi uɽǝzǝlɔ wǝr. 10 Nǝ Ibliis wa wǝṯisi kǝkiɽinyjǝlɔ, nǝr kaṯṯɔ ki-bɔheyra-na kwǝthi iigǝ-ŋǝ kibriiṯ-gi, kǝzir wa wukǝṯṯir-gwɔ haywaan-ŋwɔsi kwiɽii-gi ŋgwa kwir kwǝluŋw; ethi-gwɔ inḏǝthǝ ŋunduŋw ṯurvǝ dok-dok yaaŋwɔnɔ nǝ yulŋǝ tok. Hɔkwɔm wirimthithɔ.
11 E-ta ninyeese kwɔrsiya kwɔppa kwɔfiithɔ kwǝthi ŋeeleny, nǝ ŋgwa kwɔnaanɔ-gwɔ-la; nǝ wurǝyu-ŋǝ leere-li avri kiyǝnǝ yuuŋwun, mindaŋ nǝreere iijinǝlɔ kwokwony fuuthi mac. 12 E-ta ninyeese lizi laayɔ, lɔppa nǝ lokwɔɽony tok lirlɔ kiyǝnǝ yǝthi kwɔrsi kwǝthi ŋeeleny. Mindaŋ nǝ yiṯaab kiṯṯini, naaɽi nǝ kiṯaab kithaathɔ kiṯṯini, kir kiṯaab kǝthi ŋimiitha. Ṯaŋw nǝrǝccǝ lizi kila laayɔ haakima ŋiɽaŋal-ŋi ŋǝthi ŋothɽor ŋeeŋen ŋǝrrǝrsi, kaka ŋa ŋɔlɔɔthɔna ki-yiṯaab-na. 13 E-ta nǝ bahar ruwǝ lizi kila laayɔ-gwɔna. Na nǝ Ŋiɽany-ŋa Jahiim-gi kuṯṯǝlɔ ruwǝ lizi kila limthǝthirsǝlɔ kinaŋw laayɔ. Mindaŋ nǝrsi ǝccǝ haakima tatap ŋiɽaŋal-ŋi ŋǝthi ŋothɽor ŋeeŋen ŋǝrrǝrsi. 14 E-ta nǝr kaṯṯɔ Ŋiɽnny-ŋwɔsi Jahiim-gi ki-bɔheyra-na kwǝthi iigǝ. Nǝ bɔheyra ŋgwɔ kwǝthi iigǝ, nɔŋworo ŋiɽany ŋir nimrǝ kwuɽǝn; 15 na mǝ yiriny yǝthi kweere ere inḏini kiṯaab-na kǝthi ŋimiitha mac tǝ, ǝri kaṯṯɔ ki-bɔheyra-na kwǝthi iigǝ.
aza 20
zeyṯaan mer kəki ŋunduŋwu yiḏleyu wahiḏ ali
1 mindaŋ nenyeze maleyka kwete kwoɽu kilerena, kwapa mufṯah ki tii-na ṯuŋwun kweḏi ezir woɽu lac kuṯelu, na ŋwuɽuŋ ŋwete ŋwupa. 2 nuŋw miḏa kumowa ŋga kuɽun kwɽup, kir ibliiz na zeyṯaan tɔk, nuŋw kəki yiḏleyu wahiḏ alif, 3 nuŋw kaṯu kezir woɽu lac kuṯelu, nuŋw leŋḏeci, nuŋw ecici ezir akṯima, mindaŋ eḏere ṯuzi ŋelenyi ŋir-na ter ter kwokwony mac, mindaŋ ma yiḏla ṯimayini yir wahiḏ alif. na kwaḏan ta, lazim er kediḏa kwokwony eḏefrici eḏi nani kinna kwɔkwɔk.
4 nenyeze lurzi leḏi ŋeleny, ner gwu nani la kla limerzi inḏeḏa zulṯa eḏi hakwumi, nenyeze tɔk rɔgwɽɔ reḏi kla limerzi eɽenye kalany gi kaka unḏizer gwu Yecuŋw ki, miḏir gwu ŋiɽaŋali ŋeḏi Allah tɔk, linderṯa kla liti limɔkwoce kwɔmne lu mac ŋgwa kweḏi ŋerya, ya zura kwuŋwun tɔk mac, liti limemni ŋwuli ŋwuŋwun mac ki yuḏul la yeŋen, ya ki rii-na reŋen tɔk mac. ner miiḏi kwokwony ner miḏa ŋelenyi Kwruztu ŋali yiḏleyu wahiḏ alif. 5 na kla leɽina limay, ner ere miiḏi kwokwony mac mindaŋ ma yiḏla kya yir wahiḏ alif ernine, ṯidiɽa ṯir ṯa kḏu ṯiŋna. 6 ŋgwa kwinḏi eḏi li oɽmaṯi ki ṯiḏiɽa-na ṯiŋna kweni kwortani, kwirlinelu ter! na deŋgen-na ta, a ŋiɽany ŋir nimra kwuɽen ere eḏi zulṯa mac, lakin er orɔ yiziiz yeḏi Allah na yeḏi Kwruztu, er miḏa ŋelenyi ŋundu ŋali yiḏleyu wahiḏ alif.
zeyṯaan mer kediḏa ŋunduŋwu, na ŋiɽaŋal ŋeḏi ṯitugwuḏa ṯeḏi kwaḏanŋw
7 mindaŋ ma yiḏla ere wahiḏ alif, er kediḏa zeyṯaana ki zijin-na kwuŋwun, 8 ŋwu ruḏa eḏi ṯuzi ŋelenyi ŋir-na ter ter ŋinani kezir kwaɽŋan weḏi ṯurmun, ŋeni juja na majuja, eḏi zi aɽazi duŋw eḏi ṯugwuḏi; er orɔ litezir kaka kufurṯa kir ṯije keḏi ṯujul. 9 ner dalliḏa kezir la worana, ner riḏini ŋwufəɽera ŋweḏi kla leni lirlinelu ter, na meḏiina kweṯir amɽi beṯen; lakin na igə oɽa kilerena nani gwu Allah, nuŋw zi kiraza lu, 10 ner kaṯa ibliiza, wa weṯi zi ṯuzi, ki ṯujul-na tir igə na kibriṯ, kezir weṯi gwu ŋgwa kwir kwɔmne kwumiiḏu kweḏi ŋerya nanni-na, na kwiɽi kwir kwəluŋ tɔk, er gwu rərini kaŋwun kaŋwun kulu kulu ŋwamin dɔk dɔk.
ṯidiɽa ṯeḏi kla limay eḏi nani tatap ki zeyria-na kweḏi kwaḏanŋw
11 nenyeze kwurzi kwupa kwufiiḏu kweḏi ŋeleny, na ŋgwa tɔk kwunani gwu la. na ureyu-ŋa lere li afri ki yey-na yuŋwun, mindaŋ ner ere kaṯazi ezir weḏi gwu nani mac. 12 nenyjeze kla limay, lɔkwɽeny lupa tɔk, lirlu ki yey-na yeḏi kwurzi ŋgwa, na yiṯam kitini, na kiṯam kitini kete kir ter, kinderṯa kir kiṯam keḏi yiriny-na yeḏi kla leḏi ŋimiiḏa. mindaŋ ner zi hakwumi kla limay, ŋiɽaŋal ŋi ŋuluḏina ki yiṯam-na, ŋa ŋimer zi erri. 13 nezi tujul ruwa kla limay linani gwu-na, nezi ŋiɽany-ŋa ezir yi weḏi rigɽim ruwa kla limay linani gwu-na, ner zi hakwumi tatap ŋiɽaŋal ŋi ŋa ŋimerzerri. 14 mindaŋ ner kaṯu ŋiɽany ŋwuzi, ezir yi weḏi rigɽim, ki ṯujul-na tir igə. ṯinderṯa ṯir ŋiɽany ŋir nimra kwuɽen, ṯir ṯujul ṯir igə; 15 mindaŋ mer ulezi yiriny yeḏi kwizi kwere kiṯam-na keḏi yiriny-na yeḏi kla leḏi ŋimiiḏa, ner kaṯu ŋgwa ki ṯujul-na tir igə.