Baabil mɔŋgwɔ kiirathalɔ.
1 E-ta kwaathan kwokwo tǝ ninyeese meleka kwɔthaathɔ kwɔɔɽɔ ki-leere-na, kwǝthi sɔlṯa kwɔppa, nǝ fɔɔri kwuuŋwun erṯelɔ ṯurmunǝ naana tatap. 2 Nɔŋw urnuni ṯogɽo-thi ṯɔppa nɔŋwaarɔŋw, “Baabil kwɔmǝ iidi! Baabil kwɔppa ŋɔɔrɔ yǝnǝ kwɔmǝ iidi! Kwɔmoro ǝzir wǝṯi-gwɔ rigɽim rigii rir Shayaaṯin nǝ ruruuŋwɔ nanni-na tok, na ǝṯi-gwɔ ndǝw tatap lirna ter-ter, luruuŋwɔ mindaŋ, nǝ lǝṯirsi durni mindaŋ, ǝri nanni duŋgwun-nǝ. 3 Kaka mǝgwɔ ŋeeleny tatap ii kiɽicaŋi kir sɔɔrɔm kwǝthi ŋiijin ŋuuŋun. Nǝ ǝṯi limǝlik lǝthi ṯurmun ǝrri-ri ŋiijinǝ ŋundu-gi, mindaŋ nǝ raajir rǝthi ṯurmun oro lɔrṯɔ ceg-cegi ŋɔrṯɔ-ŋi ŋuuŋun ŋir ŋikiya ṯarr.”
4 E-ta nenyii neŋne kwokwony ṯogɽo ṯithaathɔ, ṯuruuthu ki-leere-na ṯaarɔŋw, “Tuuthǝr kithaay lizi liinyi! Tuuthǝr kithaay naanɔ-ŋgwɔ! Laazim ere ɔɽɔmaṯṯi ŋundu-gi ki-ŋikiya-na ŋuuŋun mac; nǝ laazim a-leere ɔɽɔmaṯṯi ki-jiizǝ-nǝ kwuuŋwun mac! 5 Kaka nɔrgwɔthɔ-gwɔ ŋikiya ŋuuŋun lundǝri ŋidallithathi leereya, mindaŋ nǝ Allah kithaayini raay rigii rǝthi ŋikiya ŋuuŋun. 6 Ǝrricǝrsi-ṯǝ ŋɔ tittir ŋirga ŋǝrricǝ-ŋwsi ŋaaŋwɔsi; ǝɽiccǝrsi nyaamin-na nyiɽǝ-nyiɽǝn ŋir kaka ŋa tatap ŋǝṯɔŋwsi ǝrri. Ŋwɔṯaŋw ɔrṯacci ŋunduŋw nyaamin-na nyiɽǝn ki tiṯiraŋ-na tǝṯɔŋw-ri ɔrṯasi. 7 Nḏǝthǝr ṯurvǝ ṯɔppa ṯǝthi ṯɔrɔɔnyɔna, kaka nattina-ŋgwɔ ŋinithi-ŋwsi kwomne-gi naana ŋgwa kwǝṯi ǝmi ŋunduŋw-nǝ. Kaka nǝṯɔ-ŋgwɔ aari isṯimir ethi ǝccǝ rogɽo ruuŋwun-ŋwɔ, ‘Nyii ŋgwɔ kwǝṯi naanalɔ kaka kwaaw kwɔrɔ mɔlika! Nyii kwiti kwɔrɔ kweethel kǝzir weere mac, nyii kwiti kwinḏi ethi ese ṯɔrɔɔnyɔna ṯeere ḏuṯ!’ 8 Ŋwɔṯaŋw laamin lette ǝri ippi jiizǝ-gi kwir kimǝthi-ŋǝ ṯɔrɔɔnyɔna-thi nǝ yaaŋwɔ. Mindaŋ ǝri uɽǝzi iigǝ-yi wǝr, kaka nǝccǝ-gwɔ Kweeleny haakima kwir Allah wǝthi ŋɔma jiizǝ-gi.”
9 A limǝlik lǝthi ṯurmun kila ɔɽɔmaṯṯir-li ki-ŋiijin-nǝ ŋuuŋun nǝ sɔɔrɔm-gi tok, ǝri aaritha mǝḏiinǝ mǝreese kwuuluŋi kwǝthi iigǝ kwuuɽǝzǝ mǝḏiinǝ. 10 Ǝri rilli kinǝŋgwɔ tuk lithiinya, ethi ɔɽɔmaṯṯi ki-ṯurvǝ-nǝ ṯuuŋwun. Mindaŋ nǝraarɔŋw, “Ǝyǝwǝy ǝnnǝ ṯurvǝ! Ǝyǝwǝy ǝnnǝ ṯurvǝ! Ŋa kwir mǝḏiinǝ ŋgwɔ kwɔppa kwǝthi ŋɔma kwǝni Baabil! Limǝŋǝ-tǝ aami ǝccǝ haakima-lɔ fita-fittak!”
11 Nǝ ǝṯi raajir rǝthi ṯurmun aaritha ŋunduŋw ŋwundǝ-ŋwundǝ, kaka niti ninaanɔ-ŋgwɔ kwokwony kweere mac kwǝthisi liṯṯatha bɔḏaa@ kweeŋen; 12 nɔŋweere kweere mac kwɔliṯathisi ḏahaba ṯeeŋen, fiḏḏa mindaŋ, yall yir ghaali mindaŋ, lu-u-lu-a mindaŋ; bɔḏaa@ kwir yireth yǝwrǝnǝ yir kaṯṯaan mindaŋ, yɔɔri cel-cel mindaŋ, hariir mindaŋ, yireth yɔɔri yǝnǝ ɽiyǝr mindaŋ, ŋwuuɽi ŋwaami wǝŋ ŋwirna ter-ter mindaŋ, kwomne tatap kwɔdaɽiminna riiɽam-ri rǝthi rɔɔŋwɔr, kwǝthi yɔmbɔr yir ghaali mindaŋ, kwomne kwir nɔhaas mindaŋ, kwir haḏiiḏ mindaŋ, 4 rɔkhaam mindaŋ; 13 girva mindaŋ, kwɔthɽɔl mindaŋ, fithni mindaŋ, mɔrr mindaŋ, lɔɔbaan mindaŋ, kiɽica-ŋa ŋiila-ŋi mindaŋ, yiilǝ-ŋǝ gemeh-gi mindaŋ, yida-ŋa yaaŋal-yi mindaŋ, limɔrṯa-ŋa yaarrɔ-yi mindaŋ, nǝ lɔwaay-ŋǝ lizi-li. 14 Nǝ a raajir ǝccǝŋw, “Kwomne-ŋgwa tatap kwǝṯi rogɽo rɔɔŋwa naŋninni kwɔmǝ irṯathalɔ, nǝ ŋɔrṯɔ ŋɔɔŋa tatap ŋinith-ŋǝnǝ ŋimǝŋǝ aṯithalɔ, mindaŋ eseere kaṯṯasi kwokwony ḏuṯ!” 15 Nǝ raajir kira rimoro lɔrṯɔ ŋaajir-ŋi ki-mǝḏiinǝ-nǝ ŋgwa, ǝri rilli kinǝŋgwɔ tuk, kaka nithiinyar-gwɔ etheere ɔɽɔmaṯṯi ki-ṯurvǝ-nǝ ṯuuŋwun mac, ǝri aari ŋwundǝ-ŋwundǝ. 16 E-ta araarɔŋw, “Ǝyǝwǝy ǝnnǝ ṯurvǝ! Ṯurvǝ ṯirṯaŋ kɔthɔ ṯǝthi mǝḏiinǝ kwɔppa! Kaka nǝṯɔ-ŋgwɔ keginne yirethi yǝwrǝnǝ yir kaṯṯaan, nǝ yireth yɔɔri cel-cel mindaŋ, yɔɔri yǝnǝ ɽiyǝr, nǝ nɔŋw balni ŋaamali naana ŋir ḏahab nǝ ŋir yall ŋir ghaali mindaŋ, nǝ lu-u-lu-a tok! 17 Ŋwɔṯaŋw mindaŋ nǝ ŋɔrṯɔ ŋuuŋun irṯathalɔ fita-fittak ki-saa@-la kwɔtɔpɔt.”
E-ta nǝ liswaag lǝthi limɔrkǝb-ŋǝ lizi-li linaanɔ-gwɔla, nǝ kila lǝṯi akkɔ ŋothɽor ki-limɔrkǝb-nǝ mindaŋ, nǝ kila lithaathɔ tatap lǝṯi ǝgini kwomne kweeŋen ki-bahar-na, nǝr rilli kinǝŋgwu tuk, 18 nǝr aari mǝreese kwuuluŋi kwǝthi iigǝ wɔmǝ uɽǝzi mǝḏiinǝ, nǝraarɔŋw, “Mǝḏiinǝ kwende kweere kwɔppa kwir kaka ŋgwɔ!” 19 Ŋwɔṯaŋw mindaŋ nǝr bablanni wurǝyuŋi naana ki-ŋwɔɽa-la ŋweeŋen, mindaŋ nǝraari laarathina ŋwundǝ-ŋwundǝ, nǝraarɔŋw, “Ǝyǝwǝy ǝnnǝ ṯurvǝ! Ṯurvǝ ṯirṯaŋ kɔthɔ ṯǝthi mǝḏiinǝ kwɔppa! Kwir mǝḏiinǝ kwette kwǝṯi-gi lizi kila lǝthi limɔrkǝbǝ leṯeele ŋaaw-la, ǝṯir oro lɔrṯɔ ŋɔrṯɔ-ŋi ŋuuŋun! Mindaŋ kwɔmǝ-tǝ aami irṯasi kwomne-lɔ kwuuŋwun tatap fita-fittak! 20 Nyiŋlarna ki-leere-na kaka mɔŋgwɔ kiirathalɔ! Nyiŋlarna lir lizi lǝthi Allah-ŋǝ yaavɔr-yi, nǝ liɽii tok! Kaka mǝgwɔ Allah ǝccǝ mǝḏiinǝ haakima ŋiɽaŋal-ŋi ŋǝthi kwomne-ŋgwa kwǝrricǝŋw ŋaaŋwɔsi!”
21 Nǝ meleka kwette kwɔfirlli naana dimmǝ kaali kette kɔppa kir kaka aali, mindaŋ nɔŋw kaṯṯɔ ki-bahar-na nɔŋwaarɔŋw, “Mǝḏiinǝ kwɔppa kwǝni Baabil kwinḏir-ṯǝ ethi kaṯṯɔŋw ŋɔmmaŋi mindaŋ ŋweere iijini kwokwony ḏuṯ. 22 E-ta a ŋwal ŋwɔthi lumbǝrǝ mindaŋ, nǝ kila lǝṯi kette rilŋa mindaŋ, kila lǝṯi ǝrii ŋwɔvɽɔṯɔra mindaŋ, nǝ yibooɽonya tok, ǝreere niŋnini naaniŋa-gwɔ kwokwony mac, mindaŋ a kworṯo ere kweere kwinḏini duŋgwun-nǝ mac, wala ethi neŋne kwuurunnǝ kweere kwǝthi aali! 23 Nǝ a fɔɔri ere iijini kwǝthi lombo naaniŋa-gwɔ mac; wala ethi niŋnaci ṯogɽo ṯǝthi kwɔr-ŋa kwaaw-gi laagithɔ liyaŋ. Nǝ raajir rɔɔŋwa oro rǝthi ŋɔma ŋɔppa ṯurmunǝ naana tatap, mindaŋ nǝ kǝɽinyji lizi-lɔ tatap lǝthi ṯurmun ŋozŋor-ŋi ŋɔɔŋa ŋir ŋǝluŋ!” 24 Baabil kwinḏǝthǝr jiizǝ ŋiɽaŋal-ŋi ŋǝthi ŋin ŋǝthi liɽii-ŋǝ lizi-li lǝthi Allah, ŋa ŋinḏinǝ ki-mǝḏiinǝ-nǝ; imba nǝṯǝ ŋin oro ŋa tatap ŋǝthi kila limǝrsi ɽeenye ki-ṯurmun-nǝ.
aza 18
ṯiida ṯeḏi meḏiina kwupa
1 na ma ŋiɽaŋal ŋu ernine nenyeze maleyka kwir ter kwoɽu kilerena, kweḏi zulṯa kwupak; na ureyu erṯe fori gi lu kwuŋwun, 2 nuŋw ari ṯɔgwɽɔ ṯi ṯupak, ŋwu:
baabil, kweni kwupa, kwumiidi, kwumiidi!
kwumorɔ duənu kweḏi yibliiz,
na ezir weṯi gwu rigɽim riki urbeḏa,
na weḏi ndow liki leṯuwezi lizi;
3 kaka ma gwu ŋeleny tatap ii nabiṯa kwir ŋijin ŋuŋun,
na leleny leḏi ṯurmun nerzerri ŋir ŋijin ŋundu ŋali
na rayjir reḏi ṯurmun orɔ lurṯu ŋurṯu ŋi ŋuŋun ŋikiyaḏa lu cil.
4 nenyi neŋne ṯɔgwɽɔ ṯete ṯir ter ṯiruḏi kilerena, ṯaruŋw:
ruḏar gwu-na, ŋaŋa lir lizi linyi,
mindaŋ ma ere oɽmaṯi ŋundu ŋali ki ŋikya-na ŋuŋun mac,
mindaŋ ma ŋazi jiiza kwere kwuŋwun ere miḏa mac;
5 kaka ma gwu ŋikya ŋuŋun upaḏi kilerena,
mindaŋ mezi Allah kiḏayini.
6 inḏeḏer ŋunduŋwu kwir kaka kwinḏeḏaŋw zi liḏaḏu
ezi inḏeḏa ŋunduŋwu maḏbuga-na kwuɽen kweḏi ŋa ŋeṯuŋw zi erri;
na ki tiṯra-na kra teṯuŋw urṯazi,
urṯacer ŋunduŋwu maḏbuga-na kwuɽen.
7 kaka niiyaŋw gwu rɔgwɽɔ-na ruŋwun eḏizerri kaka kwijin,
ṯaŋwu, inḏeḏer ṯa ŋunduŋwu ṯurfa dap, na ŋwunda tɔk.
kaka eṯuŋw gwu aruŋw ki ṯugwor-na ṯuŋwun: nyi kwunanalu kwir kweleny,
nyi kwiti kwiri kweḏel mac, enyere eze ŋwunda dut.
8 ŋwu ṯaŋwu a jiiza kwuŋwun ila ki lamin lutuput,
kimeṯ kiki, na ŋwunda, na yaŋwu yu tɔrtɔr,
na er uɽezi igə yi;
kaka eḏi gwu Kweleny kwir Allah ŋuma ŋupak, kweṯiketize ŋunduŋwu hukma.
9 a leleny leḏi ṯurmun, leṯir zi li erri ŋir ŋijin, er ari ŋunduŋwu ŋwunda ŋwunda. mer eze kwuluŋi kwuŋwun kwumuŋw gi uɽeḏi; 10 er irli lirucena tuk, liṯinya ṯirara ṯuŋwun, mindaŋ er aruŋw:
eyewey, eyewey, ŋa kweni meḏiina kwupa,
ŋa, kwiri meḏiina kweḏi ŋuma ŋupak, kweni baabil!
ki zaa kwutuput na hukm wɔŋwa ila!
11 na eṯi rayjir reḏi ṯurmun ariḏa ŋunduŋwu ŋwunda ŋwunda, ŋiɽaŋal ŋi ŋeḏi kwɔmne kweŋen, kaka iti liṯaḏi ŋwuzi gwu kwere mac ŋgwa kwapar ki lifaluuka-na, 12 kwir ḏahab, na faḏḏa, na ŋamal ŋir-na ter ter, na ŋete ŋir gaali beṯen ŋifiiḏu nana kaka ŋan, ŋeni lulu, na yireṯ yimri-na ter ter, yeḏi ŋele ŋiɽen ŋori, ɽiyer, na ŋwuɽi ŋwami wəŋ ŋwir-na ter ter, na kwɔmne tatap kweṯir daɽmaḏa yiŋaṯ yi yeḏi ṯuŋwur, na kwɔmne kweṯir daɽmaḏa yumbur yi yir gaali, na kwɔmne kwir zarṯu kwir zurman, na hadiid, na yal yir gaali tɔk, 13 na kwuḏɽul kwuru kwir-na ter ter, na murr, na luban, na nabiṯ, na ŋila, na yila yimri-na, na ŋwan ŋwir gamah, nyiḏri na yaŋal tɔk, na limɔrṯa yarbiya yi, na lizigwunaŋ lir luway leṯir zi ilila.
14 kwɔmne tatap kweṯi rɔgwɽɔ rɔŋwa naŋni, kwumɔŋa ṯaza lu:
a kwumɔṯuzi kwɔmne kwɔŋwa tatap kwir eḏne weḏi ŋila-na,
na firyar kweḏi ŋiniṯ ŋɔŋa,
na ere kaṯazi kwokwony mac.
15 na rayjir reḏi buḏaa ŋgwu, reṯəgini ŋurṯua ŋeŋen nanuŋw gwu, er irli rurucena tuk riṯinya ṯirara ṯuŋwun, rari kwola ŋwunda ŋwunda, ŋwu:
16 eyewey, eyewey kweḏi meḏiina kwupa
kweṯikenne yireṯi yimri-na, yeḏi ŋele ŋiɽen ŋori, ɽiyer,
kwɔgwuɽana ŋamal nana ŋir dahab, na ŋete ŋir gaali beṯen ŋifiiḏu nana kaka ŋan, ŋeni lulu!
17 ki zaa kwutuput, na ŋurtu ŋu ke ndendeṯ.
na lor lir leleny leḏi lifaluuka, na linani gwu-na tatap, na kla leṯaki ŋɔḏɽor ki rujul-na lirli tuk, 18 ner ari kwola, izar gwu kwuluŋi kweḏi igə dunnazaŋw gwu ŋunduŋwu, ner aruŋw:
meḏiina kwende kwere kwir kaka ŋgwu kwupa?
19 ner akani kulaŋi ŋwoɽa-na ŋweŋen, arir gwu kwola, lari ŋwunda tɔk, laruŋw:
eyewey, eyewey kweḏi meḏiina kwupa,
kwumer gwu be kla tatap leḏi lifaluuka linani ki rujul-na kwɔmne kwizaw kwizaw!
ki zaa kwutuput na ŋurṯu ŋuŋun ke ndendeṯ.
20 ŋa, kwir kilerena, nyiŋlar-na ŋiɽaŋal ŋi ŋuŋun,
na ŋaŋa, lirlinelu ter, na yafur, na liɽi,
kaka ma gwu Allah inḏeḏa ŋunduŋwu hukma ki ŋiɽaŋal ŋalu.
21 na maleyka kwete kwufirli teter dimi kali kete teṯ, kir kaka ali wupak, nuŋw kaṯa ki ṯujul-na, kwaruŋw:
le ta kalu baabilŋw kwir meḏiina kwupa taŋwu,
mindaŋ ŋwere inḏini kwokwony mac.
22 na rɔgwɽɔ reḏi kla letəri lumbəra, na leṯikete rilŋa rir-na ter ter, na kla leṯəri ŋwufɽitira na libruza,
er ere niŋnini nani ŋa gwu kwokwony mac;
na kwir kwɔrṯɔ kwere,
ŋwere inḏini daŋgal-na kwokony mac;
na kwurna kweḏi ali
ŋwere niŋnini nani ŋa gwu kwokony mac;
23 na fori kweḏi lɔmba
ŋwere fudi nani ŋa gwu kwokwony mac;
na tɔgwɽɔ ṯeḏi kwor kwagiḏu, ŋundu-ŋa kwaw gi kwuŋwun,
er ere niŋnini daŋgal-na kwokwony mac;
kaka ur gwu rayjir rɔŋwa lizi lupa leḏi ṯurmun kerreny,
na ŋeleny tatap ṯuḏi ŋuzur ŋi ŋɔŋa.
24 na ki meḏiina-na ŋgwa, ner kaṯazi ŋina ŋeḏi liɽi na kla lirlinelu ter,
na kla tatap limerzi endinye ki ṯurmun-na.