Limeleka-ŋǝ jiizǝ-gi kwirimthithɔ
1 E-ta ninyeese kwomne kwette kwɔthaathɔ kwir ŋilim ki-leere, kwɔppa kwir ṯiliŋɽasa. Nǝ limeleka dɔvokwɔɽony naani kinaŋw lappa ɽiizǝ dɔvokwɔɽony kwirimthithɔ, kwandisa ŋiɽaŋali ŋǝthi ŋirŋasa ŋǝthi Allah ŋirimthithɔ.
2 Ŋwɔṯaŋw mindaŋ ninyeese kwomne kwette kwaaɽinna bahara kwir gizaaza kwɔrṯanna-na iigǝ-yi. Nǝ ninyjeese kila tok limǝ ṯiinyi haywaana, nǝ suurǝ kwuuŋwun tok. Nǝ lithiinyǝ ŋgwa kwǝthi yiriny yir ŋwɔɔɽɔ. Nǝr rilli bahara kǝni kwir gizaaza, lappa lumbǝrǝ kila linḏǝthǝsi Allah. 3 Mindaŋ nǝr elŋe ṯilŋa ṯǝthi Muusǝ kwir khaḏaam kǝthi Allah, nǝ ṯilŋa ṯǝthi Tirany tok, nǝraarɔŋw:
“Kweeleny kwir Allah wǝthi Ŋɔma Ŋɔppa,
ŋothɽor ŋaaŋa ŋǝni ŋɔppa ŋir ṯiliŋɽasa!
Ŋa kwir Mǝlik kwǝthi umam,
raay rɔɔŋwa rirllalɔ rir rerrem!
4 Kweeleny, ǝyǝ kwɔrɔ kwiti kwinḏi ethiiɽi ŋaaŋwɔ-na mac?
Ǝyǝ kwɔrɔ kwinḏi ethi derne ethi andasi ŋinithi ŋɔɔŋa kworo?
Ŋa kwirṯa kwɔtɔpɔt kwirllinǝlɔ ter.
Umam winḏi ethiila tatap ethi kwocce ŋaaŋwɔ-lɔ,
kaka mǝgwɔ lizi tatap ese ŋothɽor ŋɔɔŋa ŋirllalɔ.”
5 Nǝ mǝreere ŋɔ ta nenyii dimmi yǝy, ninyeese heikala wǝthi kheme kǝthi shahaaḏa ki-leere-na wugiṯṯinǝ. 6 Nǝ limeleka dɔvokwɔɽony lɔppa jiizǝ dɔvokwɔɽony, nǝr ruuthǝ ki heikal-na, liginna yirethi yir kaṯṯaan yisɔɔɽɔ yifiithɔ per-per, ligǝkkinǝ-nǝ yaraath-yi lɔrdɔm-na yir ḏahab. 7 E-ta nǝ haywaan wette wǝthi wa wir kwaɽiŋan wɔmiithɔ inḏǝthǝ limeleka dɔvokwɔɽony looro dɔvokwɔɽony lǝthi ḏahab, luurǝnnǝ ŋirŋasa-na ŋǝthi Allah deddep, wa wǝṯi miithatha dok-dok. 8 Mindaŋ nǝ heikal urǝnni kwuuluŋw-nǝ deddep, kwuruuthu naanɔ-gwɔ ŋinith-ŋǝ ŋɔma-ŋi ŋǝthi Allah. Ŋwɔṯaŋw mindaŋ nɔŋweere kweere mac kwǝthi ŋɔma ethi ǝnḏi ki heikal-na mindaŋ mǝ jiizǝ ŋgwa kwir dɔvokwɔɽony ernene, ŋgwa kwaava limeleka lir dɔvokwɔɽony.
aza 15
nyiṯra nyir dufɔkwɽeny jiiza gi kweŋen
1 mindaŋ nenyeze ŋiɽaŋali ŋir ter kilerena, ŋir ŋupa ŋeṯi liŋɽazi tɔk ŋir ŋu, limaleyka dufɔkwɽeny jiiza gi dufɔkwɽeny, kwunde kwiri kweḏi kwaḏanŋw, kaka ma gwu ŋirŋaza ŋeḏi Allah irmiḏiḏi jiiza gi ŋgu.
2 nenyeze ṯujuli ṯete ṯir kaka ṯujul ṯir gizaaza ṯilagḏina igə yi, nenyjeze kla limillazi kwɔmne ŋgwa kwumiiḏu ki kweḏi ŋerya, na zura kwuŋwun tɔk, na ŋwuɽu ŋweḏi yiriny yuŋwun, ner irli tatap ṯujuli kəni ṯir gizaaza, lapa lumbəra leḏi Allah ki rii-na reŋen. 3 eṯir kete ṯilŋa ṯeḏi muuza, kwir kaḏaam keḏi Allah, na ṯeḏi Tirany, ṯaruŋw:
na, kwir Kweleny kweni Allah wuṯemḏizi la tatap ŋuma ŋi,
ŋɔḏɽor ŋɔŋa ŋir ŋupa ŋeṯi liŋɽazi tɔk.
ŋa, kwir Kweleny kweḏi ŋeleny ŋir-na ter ter,
ŋeḏre ŋɔŋa ŋir ŋirlalu rerec.
4 eya kwiri kwiti kwɔ ŋa ṯenye mac, Kweleny, ŋwere nii yiriny-na yɔŋwa tɔk mac?
kaka ur ŋa gwu dak Kwirlinelu ter.
na ŋeleny tatap ŋir-na ter ter ŋinḏi eḏi kwoce ŋaŋwu lu,
kaka mer gwu ruwene lu ŋa ŋofḏana ŋeṯizerri.
5 mer ere ŋu ta, nenyi kete yey nenyeze heykala weḏi kheyma kinani kilerena kimɔ iŋḏini, 6 na limaleyka lir dufɔkwɽeny ruḏa ki heykal-na, likinna yireṯi yimri-na, yifiiḏu pər pər, liməlina ŋwar ŋi ŋwir ḏahab ki lurdum la, lapa jiiza dufɔkwɽeny. 7 na kwete kweḏi kwɔmne ŋgwa kwumiiḏu kwir kwaɽŋan inḏeḏa limaleyka dufɔkwɽeny nyiṯraŋi dufɔkwɽeny nyir ḏahab, nyurene ŋirŋaza-na ŋeḏi Allah weṯinanniḏa dɔk dɔk; 8 na heykal ureni kwuluŋi-na kweḏi ŋiniṯ ŋeḏi Allah, na kweḏi ŋuma ŋuŋun, mindaŋ nuŋw ere kwere mac kweḏi ŋuma eḏenḏi ki heykal-na mindaŋ ma jiiza ŋgwa dufɔkwɽeny kweḏi limaleyka dufɔkwɽeny ernine.