Haywaanaaṯ wuɽǝn.
1 Ninyeese haywaana wuruuthu ki-bahar-na, wǝthi rill wrii, nǝ ŋwɔɽa dɔvokwɔɽony, nǝ rill ǝthi nyaŋgiŋ-la nyeere-nyeere, nǝ ki-ŋwɔɽa-la ŋweeŋen ŋweere-ŋweere tok, nǝrǝthi yiriny yaṯhi-yi ollo Allah. 2 Na haywaan wa wiisa-nyii nɔŋwaaɽanni kiɽiyaara, nǝ yaaga yuuŋwun aaɽanni kiiraawa kǝni ḏub, nǝ kworo kwuuŋwun aaɽanni kworo kwǝthi sɔndaŋa. E-ta na kimǝw kɔppa inḏǝthǝ ŋɔma ŋuuŋun, nǝ kwɔrsi kwuuŋwun kwǝthi ŋeeleny, nǝ sɔlṯa kwɔppa tok. 3 Nǝ nda lette luuŋwun ǝthi kǝmmǝ-ŋi kǝthi ŋiɽany, laakin tǝ nɔŋw sǝwinni, nǝ ṯurmun tatap kwaathitha haywaana wa ṯiliŋɽasa-thi. 4 Nǝ lizi tatap kwocce kimǝwǝ-lɔ kɔppa, kaka mɔŋgwɔ inḏǝthǝ haywaana sɔlṯa kwuuŋwun. Mindaŋ nǝr kwocce haywaana-lɔ tok, nǝraarɔŋw, “Ǝyǝ kwɔrɔ kwaaɽinna haywaana? Nǝ ǝyǝ kwɔrɔ kwǝthi ŋɔma ethi ṯɔgthi ŋundu-gi?”
5 Nǝr duŋgwǝci haywaana ethi andasi ṯippiŋǝ-thi rogɽo, ollo-ŋgi Allah, mindaŋ nǝr ǝmminci ethǝthi sɔlṯa yǝwǝ ruɽii-riɽǝn-la kwuɽǝn. 6 Nɔŋwaari ibṯǝḏi tɔc ethi ollo yiriny yǝthi Allah, na ǝzir wǝṯɔŋgwɔ nanni, nǝ kila tatap lǝṯi nanni ki-leere-na. 7 Nǝr duŋgwǝci ethi ṯɔgthi lizi-li lǝthi Allah mindaŋ ethisi ṯiinyi, e-ta nǝr inḏǝthǝ sɔlṯa ethi mithǝ yǝbiilǝ tatap, ŋeeleny mindaŋ, riŋla mindaŋ nǝ umam tok. 8 E-ta a lizi tatap linaanɔ ki-ṯurmun-nǝ kwoccelɔ; kila liti lɔlɔɔthɔna yiriny yeeŋen niti nigittina-gwɔ ṯurmun kinnǝni mac, ethisi lo kiṯaab-na kǝthi ŋimiitha ŋǝthi Tirany kira timǝr ɽeenye.
9 “Mɔŋwɔthi kweere yǝni yǝthi-yi neŋne ethɔŋw neŋne! 10 Mǝ kweere naŋni ethi mithinni etheele ki-ŋɔwaay-na, ŋwɔtǝ ele-pa ki-ŋɔwaay-na, nǝ mɔŋw naŋni kweere ethi ɽeenye ŋunduŋw kaalala-gi, laazim ǝri ɽeenye ŋunduŋw tok kaalala-gi. Nǝṯǝ ŋiɽaŋal oro ŋɔ ŋɔrnacarsi lizi lǝthi Allah ethisi indinyanni naana ṯǝmminǝ-thi.”
11 E-ta ninyeese haywaana wɔthaathɔ kwokwony wuruuthu ki-wurǝyu-nǝ. Nɔŋwɔthi rill riɽǝn rir kaka rill rǝthi tirany, mindaŋ nɔŋw andasi kaka kimǝw kɔppa. 12 Nɔŋw ǝrri-ri sɔlṯa tatap kwɔppa kwǝthi haywaan wǝthi kerreny-ŋwɔ kiyǝnǝ yuuŋwun. Nɔŋw kwɔrmɔṯasi ṯurmunǝ tatap lizi-li-nǝ kila tatap linaanɔ-gwɔna, ethi kwocce haywaana-lɔ wǝthi kerreny-ŋwɔ, wa wǝthi kǝmmǝŋi kǝthi ŋiɽany kimǝ sǝwinni. 13 Nǝ haywaan wa wir nimrǝ kwuɽǝn ǝrri-ri ŋilima ŋɔppɔ-ŋɔppa, nɔŋw duŋgwǝcǝ iigǝŋi ethɔɔɽa ki-leere-na ki-ṯurmun-nǝ kiyǝnǝ yǝthi lizi tatap. 14 E-ta nɔŋw kǝkiɽinyji lizi-lɔ tatap ki-ṯurmun-nǝ, ŋilim-ŋi ŋa ŋǝmminicǝrsi-ŋi ethisi ǝrri kiyǝnǝ yǝthi haywaan wǝthi kerreny-ŋwɔ. Nǝsi haywaan andaci ethi daɽimatha suurǝ ethi-gi iiɽi haywaana-na wa wippinnǝ kǝmmǝŋi kaalala-gi, laakin tǝ nɔŋweere ai mac. 15 Nǝr ǝmminici haywaana wir nimrǝ kwuɽǝn ethi ṯiŋatha wǝŋ wǝthi ŋimiitha ki-suurǝ-nǝ kwǝthi haywaan wǝthi kerreny-ŋwɔ, mindaŋ mǝ suurǝ ǝthi ŋɔma ethi andasi, nǝ ethisi ɽeenye tatap kila lidirna ethi kwoccelɔ. 16 Nǝ haywaan kwɔrmɔṯasi lizi tatap, lokwɔɽony nǝ lɔppa, lɔrṯɔ nǝ lir lɔwaay-na ṯarr, nǝ lɔwaay-ŋǝ lizi-li lir hɔrr, ethisi uɽuci @alaama ki-rii rǝthi mɔni nǝ ki-yithul-lǝ yeeŋen tok. 17 Mindaŋ a kwizi ere kweere mac kwǝthi ŋɔma ethi liṯṯa wala ethiila kithaay illi mɔŋwɔthi @alaama wɔ, wir yiriny yǝthi haywaan, ya ŋwɔɔɽɔ ŋwɔnaanɔ ki-lɔɔbi lǝthi yiriny yuuŋwun. 18 Ŋiɽaŋal ŋɔ ŋǝni ŋinaŋna ṯǝthinǝ yǝnǝ. Ŋgwa kwir shaaṯir ŋwɔthi ŋɔma ethi elŋe ma@na kwǝthi ŋwɔɔɽɔ ŋwɔthi haywaan, kaka nɔrɔr-gwɔ ŋwɔthi ŋizigwunǝŋ, ŋwir suṯṯu miiyyǝ siṯṯa siṯṯiin.
aza 13
ŋiɽaŋal ŋeḏi kwɔmne kwuɽen kwumiiḏu kweḏi ŋerya
1 nenyirli kufurṯana ṯujuli kəni, nenyeze kwɔmne kwete kwumiiḏu kweḏi ŋerya kwuḏelliḏi ki ṯujul-na, kweḏi ril wri, na ŋwoɽa dufɔkwɽeny, na ki ril la ruŋwun na nyaŋgi nani wri, na? ki ŋwoɽa la tatap na yiriny lɔḏine yeḏi yi ellineḏa Allah nana. 2 na kwɔmne ŋgwa kwizanyi kwaɽina kiɽyara, na ŋwara ŋwuŋwun orɔ kaka ŋweḏi kumuṯ, na kworɔ kwuŋwun orɔ kaka kweḏi zundaŋ. na kumow ŋga kupak inḏeḏa ŋunduŋwu ŋuma ŋuŋun, na kwurzi kwuŋwun kweḏi ŋeleny, na zulṯa kwupak tɔk. 3 nenyeze nda lete luŋwun lir kaka eṯuŋw uɽunici ŋiɽany kworɔ, na lumuṯ luŋwun zəwini. na ṯurmun tatap kwaḏiḏa kwɔmne ŋgwa kwumiiḏu kweḏi ŋerya ṯiliŋɽaḏi bruc. 4 na eṯi lizigwunaŋ kwoce kumowa lu kupak kaka muŋw gwu inḏeḏa kwɔmne ŋgwa kwumiiḏu kweḏi ŋerya zulṯa, ner kwoce kwɔmne lu ŋgwa tɔk, laruŋw: eya kwiri kwir kaka kwɔmne ŋgwa kwumiiḏu kweḏi ŋerya? eya kwiri kweḏi ŋuma eḏi gi ṯugwuḏi?
5 ner inḏeḏa kwɔmne ŋgwa kworɔ eḏi gi andazi tipiŋaḏi rɔgwɽɔ ruŋwun, mindaŋ eḏi gi ellineḏa Allah nana, ner inḏeḏa eḏi zi erri zulṯa gi yowa ruɽi-riɽen-la-kwuɽen; 6 nuŋw ofa kworɔ eḏellineḏa Allah nana, nuŋw ellineḏa yiriny nana yuŋwun, na kheyma nana kuŋwun tɔk, keṯinani kilerena. 7 ner efrici tɔk eḏi tugwuḏi lizi li lirlinelu ter mindaŋ eḏi zi illazi ki, ner inḏeḏa zulṯa tɔk kweḏi yabiila tatap, na lizi lir-na ter ter, na kandiza kir-na ter ter, na ŋeleny ŋir-na ter ter tɔk, 8 kwa lizi tatap kwoce lu leṯinani ki ṯurmun-na, kla tatap liti limerzi loce yiriny yeŋen mac kiṯam-na keḏi yiriny-na yeḏi kla leḏi ŋimiiḏa, ŋga keḏi Tirany timer eɽenye iti kitina gwu ṯurmun kinna mac. 9 kwere kweḏi kəni, eḏuŋw gi neŋne ŋwu:
10 muŋw nani kwere kwinḏi eḏenḏi ki ŋuway-na ta, ŋwu enḏi ki ŋuway-na;
muŋw nani kwere kwinḏi eḏeɽenye kalala gi ta, ŋwu ay kalala gi.
ŋiɽaŋal ŋu ŋetornuti lizi lirlinelu ter eḏi kwurmɔṯani ṯəmna ṯi.
11 nenyeze kwɔmne kwir ter kwumiiḏu kweḏi ŋerya, kwuruḏi kureyu-na kweḏi ril riɽen rir kaka reḏi tirany, na eṯuŋw andazi kaka kumow kupak. 12 eṯuŋw zi erri tatap zulṯa gi kweḏi kwɔmne kwumiiḏu kweḏi ŋerya kwiŋna, ki yey-na yuŋwun, na eṯuŋw ukwazi ṯurmuna lizi li-na luŋwun eḏi kwoce kwɔmne lu kwiŋna, ŋgwa kwumɔ zəwini lumuṯ luŋwun. 13 na eṯuŋw erri ŋilima ŋupa ŋupa ŋiminni, keni eḏornuṯi igəŋi mindaŋ muŋw dapa kilerena eḏoɽa kureyu lu, ki yey-na yeḏi lizi; 14 na eṯuŋw zi ṯuzi kla linani ki ṯurmun-na ŋilim ŋi ŋa ŋinḏeḏerzi eḏizerri ki yey-na yeḏi kwɔmne ŋgwa kwumiiḏu kweḏi ŋerya, na eṯuŋw zi ukwazi kla linani ki ṯurmun-na eḏi daɽmaḏa rii ri reŋen, kwɔmne kwir kaka zura kweḏi ŋgwa kwuɽu-na kalala gi, mindaŋ nuŋw ta nani kwumiiḏu. 15 ner inḏeḏa ŋuma eḏi ŋi ṯiŋaḏa weŋ ki zura-na ŋgwa kwaɽina kwɔmne kwumiiḏu kweḏi ŋerya, mindaŋ eŋgi zura eḏi ŋuma eḏi keni andazi, mindaŋ eḏukwazi eḏi zi eɽenye kla tatap liti lemni eḏi kwoce zura lu mac, kweḏi kwɔmne ŋgwa. 16 mindaŋ eṯuŋw alla amra eḏi loce lizi tatap ŋwuli ki ṯii ṯeḏi mini ya ki yuḏul la, 17 mindaŋ ŋwere eḏi kwere ŋuma mac eḏi zi ila ya eḏi zi liṯaḏa, illi muŋw eḏi ŋwuli, ŋwinderṯa ŋwir yiriny yeḏi kwɔmne ŋgwa kwumiiḏu kweḏi ŋerya, ya ŋwuɽu ŋweḏi yiriny yuŋwun. 18 ŋu ŋinaŋna ṯeḏinayeyna eḏizelŋe; ŋgwa kweḏi ṯeḏinayeyna, eḏuŋw iɽeḏa ŋwuɽuŋi ŋwɔḏrɔm ŋi, ŋweḏi kwɔmne ŋgwa kwumiiḏu kweḏi ŋerya, kaka ur gwu ŋwuɽu kaka yiriny yeḏi kwizi; na ŋwuɽu ŋwuŋwun orɔ zuṯumiya wa ziṯṯa-ziṯṯiin, ŋwir 666.