Shuhuuḏ kwir kwuɽǝn kwǝthi Allah.
1 E-ta nǝrnyii inḏǝthǝ tɔmɔr tir kaka tǝthi sarṯɔ tǝṯṯir-ri ṯǝccici, mindaŋ nǝrnyii andaci nǝrnyii ǝccǝŋw, “Diiɽu, a ṯǝcci heikala wǝthi Allah, nǝ ŋwɔthgwun-ŋǝ lizi-li kila lǝṯi kwogwɔccelɔ kinaŋw. 2 Laakin ere ṯǝcci lɔza mac kila lirikkathɔ heikala-lɔ parŋgala; uɽuthǝ-thǝlɔ kithaay, kaka mǝr-gwɔ inḏǝthǝ umama, ethi rɔgnyatha mǝḏiinǝ-lɔ kwirllinǝlɔ ter ŋwaara-ŋi, yǝwǝ ruɽi-riɽǝn-la kwuɽǝn. 3 Nyii ɔɔsi lishuhuuḏǝ liinyi lir ndǝn ŋɔma-ŋi liginna lishwaala, mindaŋ ǝri andasi ŋiɽiiya-ŋi, ki-lɔɔmɔr-la kila lǝthi nyaamin nyir alf wa miiyǝṯein wa siṯṯin.”
4 Nǝ lishuhuuḏ kila lir ndǝn oro yaaɽi yǝthi zeiṯuun yir yiɽǝn, nǝ ŋwombo ŋwir ŋwuɽǝn ŋwɔṯi rilli kiyǝnǝ yǝthi Kweeleny kwǝthi ṯurmun. 5 Mɔŋw naŋni kweere ethisi ṯǝcci ethisi rǝri naana tǝ, a iigǝ ruuthǝ kworo-na kweeŋen mindaŋ ŋwɔ kiirasi ṯuwǝn-lɔ ṯeeŋen; nǝ nǝrṯoroŋw tok, mɔŋwsi naŋni kweere ethisi rǝri naana tǝ, ǝri ɽeenye kithaay. 6 Nǝrǝthi sɔlṯa kwǝthi-gi lǝŋthǝthǝ leereya, mindaŋ ethi kaaw ere dɔnni mac, ki-ŋwɔɔmɔr-la ŋwa ŋwandisar-ŋi ŋiɽiiya-ŋi. Nǝrǝthi sɔlṯa tok ki-ruwǝ-lǝ rǝthi ŋaaw, ethisi riithi ethoro ŋin; nǝ nǝrǝthi sɔlṯa tok kwǝthi-gi inḏǝthǝ ṯurmunǝ jiizǝ dok-dok kaka ŋwɔɔmɔri ŋwɔṯirsi naŋni rɔgwor-ri reeŋen. 7 Na mǝr ṯimmasi shahaaḏa kweeŋen tǝ, e-ta a haywaan dallitha kuṯṯǝlɔ lac, mindaŋ ŋwɔsi diiɽǝthǝ naana ŋǝryǝ-ŋi. E-ta ŋwɔsi ṯiinyi, mindaŋ ŋwɔsi ɽeenye. 8 Mindaŋ a yaŋna yeeŋen yaayɔ kǝgiṯṯinǝlɔ ki-shaar-la kwǝthi mǝḏiinǝ kwɔppa, kǝzir wɔṯigrǝthir-gwɔ Kweelenyi kweeŋen ki-ŋwuuɽi-lǝ ŋwɔɽɔmathalɔ. Ǝṯir ǝnyjici yiriny ŋiɽaŋal-ŋi ŋir ṯigɽim naana yǝniŋw, saḏɔɔm ya Mɔsir. 9 A lizi lǝthi libǝlǝḏ tatap, yǝbiilǝ mindaŋ, riŋla rirna ter-ter mindaŋ, nǝ umam tok, ǝri eccice yaŋna yeeŋen yaayɔ ŋwaamin ṯoɽol nǝ nus, ǝrseere duŋgwǝci ethisi aanitha mac. 10 A lizi lǝthi ṯurmun nyeŋlena beṯṯen ŋiɽany-ŋi ŋǝthi kila lir ndǝn. Ǝri kette siibirǝ, mindaŋ ǝri iṯṯithi haḏaaya-na wɔɽe-wɔɽeny, kaka nǝvicǝ-gwɔ liɽii kila lir ndǝn lizi ṯurvǝ ki-ṯurmun-nǝ. 11 Laakin mǝ ŋwaamin ṯoɽol nǝ nus ernene tǝ, nǝ wǝŋ wɔmiithɔ wǝthi Allah ǝnḏi deŋgen-na, mindaŋ nǝr diiɽǝthǝlǝ nǝr rilli; nǝ kila limǝsi ese, nǝr ṯeenye beṯ-beṯṯen. 12 E-ta nǝ liɽii kila lir ndǝn neŋne ṯogɽo ṯɔppa ṯɔɔɽɔ ki-leere-na ṯǝccǝsiŋw “Allithar kinɔŋwaa!” Nǝ kinaŋw niccasi ṯuwǝn ṯeeŋen, nǝr dallɔ ŋunduŋǝ ki-leere-na ki-lebleth-na. 13 Nǝ kina-ṯǝ kinaŋw-lɔ ṯogdo-ṯogdo, nǝ wurǝyu riiginni tig-tig; nǝ yiŋna yǝthi mǝḏiinǝ irdidi nǝr kiirathalɔ @ɔshɔra wette, mindaŋ nǝ lizi ai saba@ alf. Nǝ lizi kila lithathina ṯeenye beṯ-beṯṯen, mindaŋ nǝr nii Allah-na wǝthi ki-leere-naŋw.
14 Ṯurvǝ ṯir nimrǝ kwuɽǝn ṯimǝ ṯamthɔ, laakin kitha tǝ ṯir nimrǝ ṯoɽol ṯinḏi ethiila rac fittak!
Meleka kwir nimrǝ dɔvokwɔɽony mɔŋgwǝrii kibooɽonya kuuŋun.
15 Ŋwɔṯaŋw mindaŋ nǝ meleka kwir nimrǝ dɔvokwɔɽony ǝrii kibooɽonya kuuŋun, mindaŋ nǝ rogɽo mithitha ki-leere-na rɔppa raarɔŋw, “Ŋeeleny ŋǝthi ṯurmun ŋimoro ŋeeleny ŋǝthi Kweeleny kwǝri, nǝ ŋǝthi Kwɔrɔstɔ kwuuŋwun, mindaŋ ŋwɔsi mithǝthǝ dok-dok.” 16 E-ta nǝ lishiyuukh lir ṯuɽi-kwaɽiŋan, lǝṯi naanalɔ ki-lɔrsi-la lǝthi ŋeeleny ki yǝnǝ yǝthi Allah, nǝr iidi yǝy-yǝlɔ, nǝr kwocce Allah-lɔ, 17 nǝraarɔŋw,
“Kweeleny kwir Allah wǝthi Ŋɔma Ŋɔppa,
kwɔnaanɔ kire-kirem-ŋgwɔ nǝ kwɔnaanɔ kerreny tuk!
Nyiiŋǝ lǝccǝ-ŋǝ shukran kaka mǝgwɔ aavi ŋɔma ŋɔppa,
mindaŋ ibṯǝḏi ethi mithǝ ŋeelenyi!
18 Nǝ lizi liira Allah-na nǝr urǝzi rɔgwori,
kaka mǝgwɔ lɔɔmɔr lǝthi ŋǝryǝ ŋɔɔŋa iila,
lir lɔɔmɔr lǝthi-li ǝccǝ kila laayɔ haakima.
Lɔɔmɔr limǝ iila lǝthi-li inḏǝthǝ yaḏaama yɔɔŋwa yir liɽii ɔjra,
nǝ lizi lɔɔŋwa kila tatap lǝṯi iiɽi yiriny-nǝ yɔɔŋwa,
lɔppa mindaŋ nǝ lokwɔɽony tok.
Lɔɔmɔr limǝ illa lǝthisi-li kiirasalɔ kila lǝṯi kikiirasi ṯurmunǝ-lɔ!”
19 Nǝ Heikal wǝthi Allah kiṯṯini ki-leere-na, mindaŋ nǝ Sonḏuug kwǝthi Wa@ḏ wuuŋwun iijini ki Heikal-na. Nǝ fɔɔri kwuuru kwǝthi rimen naani, rogɽo mindaŋ, kwuurunnǝ kwǝthi ŋweere ŋwɔppɔna mindaŋ, nǝ wurǝyu riiginni mindaŋ nǝ ŋwɔɔrɔm irdǝ.
aza 11
ŋiɽaŋal ŋeḏi liɽi nden leḏi Allah
1 ner nyi inḏeḏa tumori eḏi ri ṯeci, ner nyi eca ŋwu: diɽi a ṯeci heykala weḏi Allah, na ŋweḏgwuna, na iɽeḏa lizi leṯi kwokwocelu kinaŋw. 2 lakin, eṯi ṯeca luza leḏi heykal par ŋgi la mac; uɽiḏeḏe lu kaka mer gwu inḏeḏa lizi leḏi ŋeleny ŋir-na ter ter, a lurtaḏa meḏiina lu ŋwara ŋi, kwirlinelu ter, yowa ruɽi-riɽen-kwuɽen. 3 enyinḏeḏa lizuhuuḏa linyi lir nden ŋuma eḏi zi ŋi andaci ŋinḏeḏa zi ŋwamin ŋwuru, ŋwir wahiḏ alif wa miyaṯen-wa-ziṯṯiin, ŋwir 1,260, likinna yireṯi yuŋwuna yeḏi yala.
4 na kla lir nden eni yaɽi yeḏi zeyṯuun yir yiɽen, na ŋwɔmba ŋwuɽen ŋweṯinani ki yey-na yeḏi kweleny kweḏi ṯurmun. 5 ma kwizi kwere naŋni eḏi zi eca ḏurra ta, eṯi igə ruḏa kworɔ-na kweŋen, eṯuŋw mineḏa ṯuwənu minak; ṯaŋwu, muŋw naŋni kwere eḏi zi eca ḏurra, eṯi hukm weḏi kwizi ŋgwa eni ŋiɽany. 6 na kla leḏi zulṯa eḏi leŋḏiḏa lerya, mindaŋ ma kaw ere dunni mac ki ŋwamin la ṯa ŋwa ŋweṯir ŋi andazi ŋinḏeḏa zi Allah, ner eḏi zulṯa eḏi riiḏi ŋaw eḏorɔ ŋin, na eḏipii ureyuŋi jiiza gi tatap, ki ŋwamin ŋwere nyiḏak rugwor ri reŋen. 7 mindaŋ mer ṯimazi ṯunḏiza ki ṯeŋen ta, a kwɔmne kwumiiḏu kweḏi ŋerya, kwinḏi eḏi ruḏa kezir-na woɽu lac kuṯelu, eḏi li ṯugwuḏi, ŋwezi illazi ki, ŋwezi eɽenye, 8 a yaŋna yeŋen yayyu inḏiralu ki zari lu kweḏi meḏiina kwupa, kweṯir enjici yiriny Ṯigɽim ṯi tirlinelu ter, yeni zaḏuum, na mizr tɔk, wuṯigreḏir gwu Kwelenyi kweŋen ki ŋwuɽi la. 9 mindaŋ a lizi leḏi ṯurmun, leḏi yabiila yir-na ter ter, na kandiza kir-na ter ter, na ŋeleny ŋir-na ter ter tɔk, ece yaŋna yeŋen yayyu yey yi-na domony, er zi derne eḏi zi aniḏa ki ŋwamin la ŋwir ṯɔɽɔl na nuzz, 10 er amina kla leṯinani ki ṯurmun-na, er nyeŋlena tɔk, er iṯiḏi haḏiya la ter ter deŋgen-na, kaka urreḏi zi gwu liɽi-na klu lir nden ŋunduŋwuzi leṯinani ki ṯurmun-na. 11 mindaŋ ma ŋwamin ṯɔɽɔl na nuzz ere, nezi wəŋ weḏi ŋimiiḏa winḏi nani gwu Allah enḏi-na, ner diɽeḏa la ŋwara ŋi ŋweŋen, mindaŋ na ŋiḏeny iidi ŋwupa nani gwu kla licazi. 12 mindaŋ na liɽi klu neŋne ṯɔgwɽɔ ṯete ṯupak ṯuruḏi kilerena, ṯeca zi ŋwu: alliḏar kunuŋ. na ki yey-na yeḏi ṯuwən ṯeŋen, ner allu kilerena ki lebleṯ-na. 13 na ki zaa ṯa ŋgwa, na ureyu rigini na meḏiina yiḏriḏa wri nuŋw iidi kete; na lizi ay litezir, lir kaka alaaf dufɔkwɽeny, ŋiɽaŋal ŋi ŋeḏi ṯirigina ṯeḏi ureyu, na kla liḏaḏi-na ner ṯenye ṯeṯec, ner nii Allah-na weḏi kilerena.
14 jiiza kwir nimra kwuɽen kwumɔṯamḏu; izaṯi, ŋgwata kwir nimra ṯɔɽɔl kwinḏi eḏila fitak.
bruz kwir nimra dufokwɽeny
15 mindaŋ na maleyka kwir nimra dufɔkwɽeny əri bruza kwuŋwun, na rɔgwɽɔ rupa andazi kilerena, raruŋw: ŋeleny ŋeḏi ṯurmun ŋimorɔ ŋeleny ŋeḏi Kweleny kweri, na ŋeḏi Kwruztu kwuŋwun, ŋwu miḏa ŋelenyi dɔk dɔk. 16 na lijowiṯ lir ṯuɽi-kwaɽŋan, leṯinanalu ki lurzi la leŋen ki yey-na yeḏi Allah, iidi yey yelu, ner kwoce Allah lu, 17 laruŋw:
nyiŋa lecaŋa zukran, Kweleny kwir Allah
wuṯemḏizi la tatap ŋuma ŋi, wunani kirem,
na weṯinanni kerreny tɔk,
kaka ma gwu dimi zulṯa kwɔŋwa kwupa,
na miḏa ŋelenyi ŋɔŋa.
18 na ŋeleny ŋeḏi ṯurmun apaḏizi kworɔ, lakin na ŋirŋaza ŋɔŋa ila,
na lomur ila leḏi kla limay eḏizi ketice zeyria,
mindaŋ eḏinḏeḏa yaḏaama yɔŋwa yir liɽi,
na kla lirinelu ter eḏi Kwruztu-na haḏiya,
na kla leṯiṯenye yiriny yɔŋwa, lir lɔkwɽeny lupa tɔk,
na eḏi kirazi lizi lu kla limɔkirazi ṯurmuna lu.
19 mindaŋ na heykal weḏi Allah kilerena iŋḏini, na zanḏuk kweḏi kuruu-na ijini ki heykal-na; na rimen iiḏi kec kec, na kwurna alliḏa, na lere upuḏina, na ezir rigini, na ŋworum ŋwupa irda.