1 Rɔ-ɔya rǝthi Yǝcu Kwɔrɔstɔ, rinḏǝthǝsi Allah ethisi baaŋaci yaḏaama yuuŋwun, ŋa ŋinḏi laazim ethi ǝrrini keṯe-keṯṯɔk. Nǝ nɔŋwsi ruwǝzǝlɔ meleka-gi kwuuŋwun, kwuusucǝŋw khaḏaama kuuŋun kǝni Yuhanna. 2 Nǝ Yuhanna kette shahaaḏa kwǝthi ŋiɽaŋal ŋǝthi Allah, nǝ ŋa ŋir rerrem ŋurwǝzǝsi Yǝcu Kwɔrɔstɔ-lɔ, na ŋa tok tatap ŋiisa-ŋwsi. 3 Ŋgwa kwǝṯi ɔrti kiṯaabi ŋgɔ kwǝni kwɔrtanni, na ǝri ɔrtanni tok kila linḏi ethi kettice ŋiɽaŋali ŋɔ yǝni ŋǝthi ŋiɽiiya, nǝ ethisi iinyici naana ŋa ŋɔlɔɔthɔna kiṯaab-na-ŋgɔ! Kaka mǝgwa lɔɔmɔr aadithi linḏi-li kwomne-ŋgwo tatap ethi ǝrrini.
Yuhanna nuusicǝ-ŋgwɔ yǝniisǝ dɔvokwɔɽony ṯaaginna.
4 Nyii kwɔrɔ kwǝni Yuhanna kwɔlɔcca yǝniisǝ yir dɔvokwɔɽony yinaanɔ ki-muḏiiriiyyǝ-nǝ kwǝthi Aasiiyya-ŋw:
Ethi ne@ma-ŋa ŋiiɽǝnnǝ-ŋi oro ŋaalɔ kwinḏi naanɔ-gwɔ Allah wa wɔnannɔ kire-kirem-ŋgwɔ, nǝ wɔnannɔ kerreny tuk, nǝ winḏi ethiila, nǝ ŋinḏi naanɔ-gwɔ rigɽim rir dɔvokwɔɽony rinaanɔ kiyǝnǝ yǝthi kwɔrsi kwǝthi ŋeeleny ŋuuŋun, 5 nǝ ŋinḏi naanɔ-gwɔ Yǝcu Kwɔrɔstɔ kwir shuhuuḏ kwirllalɔ, kwir Tɔr tir nda, kwɔmǝ diiɽǝ ki-ŋiɽany-na, nǝ kwir haakim tok wǝthi muluuk kwǝthi ṯurmun.
Nɔŋwɔni kwamɽa-nyji, mindaŋ nɔŋw kǝdithǝ nyuŋwsi ki-ŋikiya-na ŋǝri ŋiɽany-ŋi ŋuuŋun ŋir kiraama, 6 nɔŋw ruusi nyuŋwsi ŋeeleny ŋǝthi kahana ethi ǝkkici Allah wuuŋwun ŋothɽor wir Ṯǝrnyin. Ethi ŋinith-ŋǝ ŋɔma-ŋi oro ŋǝthi Yǝcu Kwɔrɔstɔ dok-dok! Amiin. 7 Iisar-ṯi, ŋgwa kwinḏi ŋwebleth-ŋina! Mindaŋ a lizi tatap ese, lizi-li kila lɔthɔɔgwɔ ŋunduŋw. A lizi tatap linaana kwurǝyu-lu aari ŋwal ŋwɔni ŋundu. Ŋinḏi-ṯǝ ethoroŋw. Amiin!
8 Nǝ Kweeleny kwǝthi ŋɔma ŋɔppa kwǝni Allah aarɔŋw, “Nyii kwir kwiŋna nǝ kwirimthithɔ, kwɔnaanɔ kire-kirem-ŋgwɔ, nǝ kwɔnannɔ kerreny tuk, nǝ kwinḏi ethiila.”
Yuhanna mɔŋgweese Kwɔrɔstɔ-ŋw.
9 Nyii kwɔrɔ kwǝni Yuhanna kwir aŋgalɔ kwaalɔ kwǝṯi rɔɔmi Yǝcu-ŋw-lɔ, nyii kwɔɽɔmaṯṯɔ ŋaaŋa-li mithǝ-ŋgi ṯɔgwori ṯindinyanna-thi naana ṯǝthi ṯurvǝ ṯǝṯi iilicǝ lizi lǝthi Ŋeeleny ŋuuŋun. Ligittanyii ki-jǝziirǝ-nǝ kwǝni Baṯmɔs kaka nigittany-gwɔ shahaaḏa kwǝthi ŋiɽaŋal ŋǝthi Allah, nǝ ŋa ŋir rerrem ŋurwǝzǝsi Yǝcu-lɔ. 10 Ki-laamin-la lǝthi Kweeleny nǝnyii-gwɔ Ṯigɽim ɔɽina, mindaŋ nenyii neŋne ṯogɽo ṯɔppak ṯaarɔ kaka kɔboɽony, ṯandisa ki-thɔɔɽɔ-na ṯiinyi. 11 Nɔŋwaarɔŋw, “Luuthusi kiṯaab-na ŋa ŋiisa-ŋǝsi, e-ta ǝsi ṯiŋacci yǝniisǝ yir dɔvokwɔɽony, kǝthi Afasuus-ŋwɔ, kǝthi Simiirna-ŋwɔ, kǝthi Barghaamɔs-ŋwɔ, kǝthi Thiiyaaṯiira-ŋwɔ, kǝthi Saarḏis-ŋwɔ, kǝthi Fiilaaḏalfiiyǝ-ŋwɔ nǝ kǝthi Laawḏikiiyyǝ-ŋwɔ.”
12 E-ta nenyii orllolɔ etheese ǝyǝ kwir kwandica-nyii, nǝ mǝnyii orllolɔ tǝ, ninyeese liminaara dɔvokwɔɽony lir ḏahab. 13 Nǝ kelgeny-na kǝthi liminaara kila, nǝ kwette iijini kwaaɽinna kwizigwunǝŋi, kwɔginna kwɔɔvan kwɔɔla tottoc kwɔɔɽɔ mindaŋ kwɔppathɔ ki-yaaga-lɔ, kwɔkǝkkinǝ-nǝ kwɔrdɔm-na karraath-gi kir ḏahab. 14 Nǝ ǝwɽu wuuŋwun kinda wɔfiithɔ per-per kaka yaala, ya kaka yibǝɽu; nǝ yǝy yuuŋwun oro kaka iigǝ wɔfɔɔdɔ; 15 nǝ yaaga yuuŋwun aaɽanni nɔhaasa kwiithɔ kwɔsɔɔɽɔ, nǝ ṯogɽo ṯuuŋwun aaɽanni kwuurunnǝ kwǝthi ŋaaw ŋuuru. 16 Nɔŋw appi rɔɔrɔmi dɔvokwɔɽony ki-thii ṯǝthi mɔni, mindaŋ nǝ kaalala kiiranna tiyǝ-tiyǝk raay tok ruuthǝ kworo-na kwuuŋwun. Nǝ kiyǝnǝ kwuuŋwun iithi kap-kap kaka aaŋwɔn wǝṯi rilli kelgeny-na tittir.
17 Mǝnyii ese tǝ, nenyii iidǝccǝlɔ kiyǝnǝ yuuŋwun kaka kwizi kwaayɔ. Laakin nɔŋw kette ṯii ṯuuŋwun ṯǝthi mɔni duŋgwiny-lǝ, mindaŋ nɔŋwaarɔŋw, “Ǝṯi ṯiinya mac! Nyii kwɔrɔ kwiŋna, nǝ kwirimthithɔ. 18 Nyii kwɔrɔ kwǝṯi miithi! Nyii kwaayɔ kerreny, nǝ kirem-tǝ, nyii miithatha dok-dok. Nyii kwǝthi sɔlṯa ki-ŋiɽany-la nǝ ki-jahiiim-lǝ tok. 19 Ŋwɔṯaŋw luuthusi ŋa ŋiisa-ŋǝsi, ŋa ŋinaanɔ kire-kirem-ŋgwɔ, nǝ ŋa ŋinḏi ethi ǝrrini kwaathan-gi. 20 Ma@na kwǝthi ŋiɽaŋal ŋuluccunǝ ŋǝthi rɔɔrɔm dɔvokwɔɽony kira riisa-ŋǝsi ki-thii ṯiinyi ṯǝthi mɔni, nǝ ŋǝthi liminaara dɔvokwɔɽony lir ḏahab nǝroro ŋɔ: rɔɔrɔm rir dɔvokwɔɽony rir limeleka lǝthi yǝniisǝ yir dɔvokwɔɽony, nǝ liminaara lir dɔvokwɔɽony lir yǝniisǝ yir dɔvokwɔɽony.
aza 1
ŋiɽaŋal ŋeḏi kiṯam ŋgu na ṯagna ṯeḏi yuhanna
1 ŋiɽaŋal ŋu ŋimezi Yecu Kwruztu ruweze lu, ŋinḏeḏa zi Allah eḏizilŋiiḏini yaḏaama yuŋwun ŋa ŋinḏi eḏerrini kwaḏan kwɔkwɔ. nuŋw zi tuweci yuhannaŋw lu maleyka gi kwuŋwun, 2 na yuhanna orɔ zuhuuḏ kweḏi kwɔmne tatap kwafa ŋwi nani gwu Allah, na ṯunḏiza ki ṯeḏi Yecu Kwruztu. 3 ŋgwa kworti pɔrpɔr ŋiɽaŋali ŋu ŋeḏi ŋiɽya, kweni kwortani; na kla tɔk leṯi zi neŋne mindaŋ ner zi inyici nana ŋa ŋuluḏina, leni lortani tɔk, kaka ma gwu lomur adiḏi.
4 nyi kwiri kweni yuhanna, kwuluca yaniiza dufɔkwɽeny yeḏi azyaŋw:
eḏi ṯimeca ṯeḏi ŋimɽi nani daŋgal-na ŋiɽena ŋi, ŋinḏi nani gwu ŋgwa kwunani kirem, na kwunani kerreny, na kwinḏi eḏila, na ŋinḏi nani gwu rigɽim rimiiḏu dufɔkwɽeny rirlaca kwurzi lu kwuŋwun kweḏi ŋeleny, 5 na ŋinḏi nani gwu Yecu Kwruztu, kwir zuhuuḏ kwirlalu, kwir Tor tir nda teḏi kla lidiɽi ki ŋiɽany-na, nuŋw orɔ Kweleny kweḏi leleny tatap leḏi ṯurmun.
eḏi ŋgwa kweṯinyjamɽi, kwumenyji fifri ki ŋikya-na ŋeri ŋin ŋi ŋuŋun, 6 kwumenyji ruzi ŋeleny ŋete, na yiziiz yere yere yeḏi Allah wuŋwun, wir Papa kwuŋwun tɔk, eḏi ŋiniṯ-ŋa zulṯa gi orɔ kwuŋwun dɔk dɔk. emba. 7 izari, ŋgwa kwinḏi eḏila ŋwebleṯ ŋi-na, na yey tatap yinḏi eḏeze, na kla tatap liṯugwi; a yabiila tatap yeḏi ṯurmun ari, eyewey, eyewey, ŋiɽaŋal ŋi ŋuŋun. ŋinḏi ṯa eḏorɔ ŋwu. emba.
8 na Kweleny kweni Allah, kwunderṯa kwunani kirem, na kweṯinani kerreny, na kwinḏi eḏila tɔk, ŋgwa kwuṯemḏizi la ŋuma ŋi, aru ŋwu: nyi kwiri kweni alfa na omega, yinderṯa yeni kwɔnkwɔn na kwaḏan.
ŋiniṯ ŋeṯi Tor teḏi kwizigwunaŋ ŋizazi yuhanna
9 nyi kwiri kweni yuhanna, kwir aŋgalu kwalu kweṯoɽmaṯi ŋaŋa li ki ṯurfa-na, na ki ŋeleny-na, na ki ṯukwurmɔṯana-na tɔk, ṯimorɔ ṯeri eḏi Yecu-na. nyi kwunani kaka mabuuz ki jaziira-na kwete kweni baṯmuz, kaka andizenyi gwu ŋiɽaŋali ŋeḏi Allah nenyi unḏizi Yecuŋw ki. 10 nenyi Ṯigɽim tirlinelu ter mulɔ ki lamin leḏi Kweleny, nenyi neŋne ṯɔgwɽɔ ṯete ṯupa nyuŋwu ṯoɽu ṯi la, kaka bruz, 11 ṯaruŋw: ŋa ŋizaŋa zi, luḏi zi kiṯam-na kete, ezi uzici yaniiza yir dufɔkwɽeny, nani afazuz, na zimirna, na bargamuz, na ṯiyaṯra, na zarḏiz, na filaḏalfiya na lawuḏikya.
12 ta nenyi orlelu eḏeze ṯɔgwɽɔ ṯandicenyi, mindaŋ menyi orlaḏa nana ta, nenyeze kwɔmne dufɔkwɽeny kwir ḏahab, kweṯir gi allazi lɔmba la, 13 na keligeny-na keḏi kwɔmne kweḏi ŋwɔmba, nenyeze kwete kwir kaka Tor teḏi kwizigwunaŋ, kwukinna kireṯi kola, na kwurdum la nuŋw məlini lar li lir ḏahab; 14 na nda luŋwun, owɽu yi-na, fiiḏi kaka afɽuga, nuŋw fiiḏa kaka yawa; na yey yuŋwun orɔ kaka igə wufudu; 15 na ŋwara ŋwuŋwun aɽani zarṯu kwir zurman kwuṯiɽnyinana igə yi, kweṯari kam kam, na ṯɔgwɽɔ ṯuŋwun aɽani kwurna kweḏi kiiru kupa. 16 ki ṯii-na ṯuŋwun ṯeḏi mini nuŋw api rorumi dufɔkwɽeny, na kalala kirana ray riɽen ruḏa kworɔ-na kwuŋwun, na kiyeyna kwuŋwun nuŋw aɽani aŋwunu muŋw ṯiŋaḏa fori lu kaŋwuna.
17 menyeze ŋunduŋwu, nenyi iideḏa ŋwuɽele-na ŋwuŋwun timbɽak, kaka kwizi kwayyu, lakin nuŋw kete nyuŋwu ṯii la ṯeḏi mini, nuŋw aruŋw: eṯi ṯinya mac. nyi kweni kwiŋna na kwukwaḏiḏi tɔk; 18 nenyorɔ ŋgwa kweṯi miiḏi; nenyi ay kerreny, lakin izaṯi, nyi kwumɔ miiḏi, enyi nanniḏa kwumiiḏu dɔk dɔk, nenyeḏi limufṯah leḏi ŋiɽany na ezir weḏi rigɽim. 19 luḏi zi fitak ŋa ŋizaŋa zi, ŋu ŋinani kire-kirem, na ŋa ŋinḏi eḏerrini kwaḏan gi. 20 ŋiɽaŋal ŋulucine ŋeḏi rorum rir dufɔkwɽeny, kra rizaŋa zi ki ṯii tinyi ṯeḏi mini, na ŋwɔmba ŋwir dufɔkwɽeny ŋwir ḏahab ŋiri ŋwu, rorum dufɔkwɽeny riti limaleyka leḏi yaniiza dufɔkwɽeny, na ŋwɔmba ŋwir dufɔkwɽeny ŋwiri yaniiza dufɔkwɽeny.