Ṯǝjlinnǝ ṯǝthi Kwɔrɔstɔ, nǝ ŋɔvŋa ŋuuŋun ṯok.
1 Ŋwɔṯaŋw, mǝrǝni ṯivirllasa-la ethi Kwɔrɔstɔ-na, na mǝrǝni ṯikandiza-lɔ ṯamɽa-thi, mǝrǝni ŋɔmath Ṯigɽim-thi, na mǝrǝni ŋimɽi-ŋǝ yathisi rɔgworna-ŋgi tǝ, 2 ŋǝsi tuurǝccǝlɔ ethi ṯimmaci nyuŋwɔ ṯinyiŋlana ṯiinyi kwoɔo, ethǝthi fikirǝ kwɔtɔpɔt, lǝthi ṯamɽa ṯɔtɔpɔt, nǝ ŋaɽinyi ŋɔtɔpɔt tok. 3 Ǝṯisi ǝrrǝ ŋeere ṯapranna-thi naana mac, ya ethi-ŋi ǝllini ki-rogɽo, laakin ǝṯi ajlathisina ki-rogɽo wɔɽe-wɔɽeny, nǝ ǝṯisi ruusi lithaathɔ lɔvthanna daŋgal-na nyaamin tatap. 4 Ǝṯiseere naŋnalɔ ŋǝthi rogɽo raalɔ ṯɔɽɔk mac, laakin ǝṯisi nǝŋnici lithaathɔ tok. 5 Ethi fikir-ŋgwɔ naani daŋgal-na, kwɔr-ga kwɔnaanɔ ethi Kwɔrɔstɔ-na kwǝni Yǝcu. 6 Naaɽinna-ŋgwɔ-va kinnǝni Allah tok, nɔŋwsi-tǝ ere kettice yǝy ŋɔmaŋi-na mac, ethi biɽithina Allah-yi. 7 Laakin nɔŋwsi aalitha ŋa rii tatap ṯɔgwor-thi ṯuuŋwun, nɔŋworo khaḏaam. Nǝr ilŋitha kwaaɽinna lizigwunǝŋi. 8 Nǝ kaka mɔŋgworo kwizigwunǝŋ, nɔŋw ǝjlinni ki-rogɽo kwiinyicǝ Allah naana ethi ai, aw ethi ai ki-ŋwuuɽi-lǝ ŋwɔɽɔmɔthalɔ. 9 Nǝrṯoroŋw mindaŋ nǝ Allah nii ŋunduŋw-nǝ, nɔŋw allasi-la kider, nɔŋw inḏǝthǝ yiriny yɔppa yithǝmthi yiriny-lǝ ndendeṯ. 10 Mindaŋ ethi ŋwɔrgwɔ tatap kwocce yiriny-lɔ yǝthi Yǝcu, ki-leere-na, kwurǝyulu, nǝ kwurǝyulu kuṯṯǝlɔ. 11 E-ta a riŋla tatap aarɔŋw, Yǝcu Kwɔrɔstɔ kwir Kweeleny, ethi nii Allah-na wir Papa.
Ethi erṯelɔ fɔɔri-gi ki-ṯurmun-nǝ.
12 Ŋwɔṯaŋw limǝthgǝri liinyi lamɽa-nyji, kaka nǝṯir-nyii-gwɔ iinyici naana nyaamin tatap kinaŋw nǝṯi-nyii naani ŋaaŋa-li, nǝ kinaŋw tok niti nǝṯi-nyii naani yǝy-lɔ mac. Ǝɽir kǝniny akkɔ ŋothɽor tig-tig ŋitheny-ŋi lɔnḏɔthɔ ethi ṯimmasi ŋiglǝthǝ ŋaalɔ kworo, 13 kaka nǝṯi-gwɔ Allah akkɔ ŋothɽor nyaamin tatap daŋgal-na, ethi inḏǝthǝ ŋaaŋwɔsi ŋɔma ethisi ǝmmini ŋǝthi ṯɔgwor ṯuuŋwun, mindaŋ ethisi ǝrri ŋǝthi ṯɔgwor ṯuuŋwun.
14 Ǝsi ǝrri tatap liti lǝrmithǝthinǝ mac, walɔa ethi ɔppathalɔ, 15 mindaŋ meere ǝthi lɔɔma-na leere mac, nǝ ǝthi naani lɔsɔɔɽɔ cur-cɔɽic kaka nyɔr nyǝthi Allah, linannɔ ki-ṯurmun-nǝ ṯigii ṯɔthɔɔthɔ; ŋwɔṯaŋw laazim ǝsi ṯiŋacci fɔɔri-lɔ deŋgen-na, 16 ǝthi mithǝ ŋiɽaŋali tetter ŋir ŋimiitha. Nǝ mǝsi ǝrri ŋɔ tǝ, nyǝthi sǝbǝbǝ kwǝthi-gi ǝllini ŋiɽaŋal-ŋi ŋǝni ŋaalɔ ki Laamin-la lǝthi Kwɔrɔstɔ, kaka niti mǝgwɔ ŋɔma-ŋa ŋothɽor-ŋi ŋiinyi kiirannalɔ domony mac. 17 Nǝ mǝ ŋin ŋiinyi iirǝnnǝlɔ kinnǝni kaka kiraama, kiraama-la kǝthi ṯǝmminǝ ṯaalɔ, ǝnyii-tǝ aamina nǝ nyii-tǝ nyeŋlena ṯir-ṯir ŋaaŋa-li tatap. 18 Ŋwɔṯaŋw laazim aamina nǝ a nyeŋlena tok nyii-gi.
Ṯiimɔɔthaaws-ŋǝ Abafrɔɔḏiiṯus-gi.
19 Nyii ŋgwɔ kwɔgittathɔ, mindaŋ mǝroro ŋǝthi ṯɔgwor ṯǝthi Kweeleny kwǝni Yǝcu-tǝ, ŋǝsi ṯiŋacca Ṯiimɔɔthaaws-ŋwɔ fittak, mindaŋ mǝnyji neŋne ŋǝni ŋaalɔ tǝ, ǝnyii firllanni-la. 20 Nyii kwiti kwǝthi kwizi kweere kwokwony kwir kaka ŋunduŋw mac, kaka nǝni-ŋgwɔ kwǝṯi-ŋǝsi aŋraci. 21 Nǝ lithaathɔ tatap nǝŋsi kettice yǝy ŋǝthi rogɽo reeŋen, ŋiti ŋir ŋǝthi Yǝcu Kwɔrɔstɔ mac. 22 Laakin ŋaaŋa tǝ nǝsi elŋe rogɽo-ri raalɔ ŋǝthi ŋɔvthanna ŋpuŋun, na nǝnyii-gi akkɔ ŋothɽor ndǝndǝk ŋǝthi Inyjiil kaka tɔr-ŋwɔsi tir toŋwor ṯǝrnyin-thi. 23 Ŋwɔṯaŋw nyii ŋgwɔ kwɔgittathɔ ethi ɔɔsicǝ ŋaaŋwɔsi ŋunduŋw fittak, mǝ ŋiɽaŋal ŋiinyi elŋethine ŋǝmmǝŋ. 24 Nyii kwɔgittathɔ ethi Kweeleny-na ethiila nyii tok naaniŋa-gwɔ kwaathan kwokwo.
25 Nyii kwaari fǝkirǝ nǝnyaarɔŋwa, ŋɔvthanna ethi ɔɔsicǝ ŋaaŋwɔsi ǝŋgǝriŋw kwǝni Abafrɔɔḏiiṯus, kwǝṯi-nyii-gi rɔɔmɔthalɔ ki-ŋothɽor-na, kwɔthɔgthathisany-gi ruɽumǝ-ri, kwuusucǝr-nyii ethi kǝṯṯini nyuŋwɔ wǝŋ. 26 Nǝ nɔŋwɔthi sɔɔrɔma tok beṯṯen etheese ŋaaŋwɔsi tatap, nǝ ṯaay ṯette nɔŋw ronyine tok kaka mɔŋgwɔ neŋne ethaarɔŋw ŋaaŋa limǝ neŋne ŋiɽaŋali ŋǝthi kimǝthi kuuŋun. 27 Aw kwani kwuuma rerrem, mindaŋ nɔŋwaaɽa ŋiɽany kwɔrɔ keṯṯɔk. Laakin na Allah aṯhici ŋimɽiya-na, laakin nɔŋweere aṯhici ŋunduŋw dak mac, laakin nyuŋwɔ tok, mindaŋ ǝŋgi ṯɔrɔɔnyɔna ere ɔrgwɔthi duŋgwiny-lǝ mac. 28 Nǝrṯoro ŋɔ ŋǝvricǝ-nyii ethi ǝthi ŋɔma ethi ɔɔsicǝ ŋaaŋwɔsi ŋunduŋw, mindaŋ meese tǝ a aamina kwokwony, nǝ ṯɔrɔɔnyɔna ṯiinyi tǝ, ŋworo ṯokwɔɽoc. 29 Ŋwɔṯaŋw aalinar ŋunduŋw ṯinyiŋla-thina ethi Kweeleny-na; ǝṯi iiɽi lizi-nǝ tatap kaka ŋunduŋw. 30 Kaka naadithi-ŋgwɔ keṯṯɔk ethi ai ŋiɽaŋal-ŋi ŋǝthi ŋothɽor ŋǝthi Kwɔrɔsṯɔ, kaka ṯiŋacca-ŋgwɔ ŋiɽany ŋimiitha-lɔ ŋuuŋun ethi ṯimmaci ŋaaŋwɔsi ŋothɽor ŋǝni ŋaalɔ kworo, ŋa ŋiti ŋǝthicǝ-ŋǝsi ŋaaŋa ŋɔma-na ethisi ǝrrici nyuŋwɔ mac.
aza 2
ṯoraca eḏi kiɽmiḏi ŋiɽaŋal-na
1 ŋwu ṯaŋwu, ma ṯikandizelu ṯere nani eḏi Kwruztu-na, ya ŋiɽaŋal ŋere eḏi ŋi ukwazi rugwori ṯamɽa ṯi, ma oɽmaṯi eḏi Tigɽim-na, ṯimeca ṯi liyaḏi zi gwu rugwor-na liḏaḏu ta, 2 a ma ureni ṯinyiŋlana tinyi dedep ur ŋa gwu ṯugwor ṯutuput, leḏi ṯamɽa-na ṯutuput, leṯi kiɽmiḏa-na kaɽam, leḏi ṯireca yey lu ṯutuput tɔk.
ṯoraca eḏejilini ki rɔgwɽɔ
3 eṯizerri ŋere ŋiɽaŋal ŋi ŋeḏi rɔgwɽɔ ralu domony mac, ya eḏi piŋi rɔgwɽɔ, lakin eṯizerri tatap ejilina ŋa gwu ki rɔgwɽɔ eḏaruŋw, lizi kla ta luru liṯemḏinyi la rac. 4 ŋofḏana daŋgal-na lere lere eḏere aŋraci rɔgwɽɔ ralu dak ŋiɽaŋal ŋi ŋere mac, lakin eḏi zi aŋraci liḏaḏu tɔk.
ṯibaŋica ṯeḏi Yecu ejilinaŋw gwu ki rɔgwɽɔ
5 eḏi ṯugwor kḏu nani daŋgal-na kaka kḏa ṯinani eḏi Kwruztu-na kweni Yecu. 6 kwunderṯa, aɽanaŋw gwu pa kinna Allah ta, nuŋw ṯa ere miḏini teter ŋiɽaŋal ŋi ŋu mac, eḏi biɽḏi-na Allah yi, 7 lakin nuŋw aliḏi ŋiniṯi rii eḏorɔ kaḏaam kuŋwun, ner ilŋiida eḏaɽani lizigwunaŋi. 8 na urŋw gwu kwor ki yey-na yeḏi lizi ta, nuŋw ejilini ki rɔgwɽɔ eḏinyizi Allah nana keni eḏay—emba, eḏay ki ŋwuɽi la ŋwuɽmɔḏalu. 9 ŋwu ṯaŋwu, na Allah nii ŋunduŋwu-na ṯiniiya ṯi-na ṯupak, allizaŋw gwu ŋunduŋwu kindala kider, nuŋw enjici ŋunduŋwu yiriny yiṯemḏi yiriny la ndendeṯ, 10 mindaŋ mer neŋne yiriny yeḏi Yecu ta, eŋgir kwoce ŋunduŋwu lu tatap ŋwurgwu ŋi lu, linani kilerena na ki ṯurmun-na, na kuṯelu tɔk, 11 na a riŋla tatap eŋgir aruŋw: Yecu Kwruztu kwiri Kweleny, eḏi ŋi nii Allah-na wir Papa ṯa ŋwu.
ŋeḏre ŋeḏi likwruztyan ŋiɽaŋal ŋi ŋeḏi ŋigileḏa ŋeŋen
12 ṯaŋwu, limɽi linyi, kaka eṯi gwu niŋneḏi ŋwamin tatap, eḏi ṯa ŋeḏre ŋalu ruwene lu ŋeḏi ŋigileḏa ŋalu kirem, eḏizaŋraci ŋiḏeny ŋi, ŋiti ŋiri mac kaka nani nyi gwu ṯa yey lu kinna daŋgal-na, lakin ŋeni ŋiṯemḏelu, menyi ere nani mac. 13 kaka eṯi gwu Allah akiki ŋɔḏɽor ki rugwor-na ralu lere lere, eḏi meci ŋaŋwuzi eḏi zi erri ṯugwor ṯi ṯuŋwun, na eḏəmi ŋunduŋwu-na tɔk.
14 eṯizerri tatap liti lermiḏeḏi-na mac, ya eḏi ŋaŋlaḏi tɔk mac. 15 eṯorɔ lizi liti leḏi loma-na lere mac, lizuɽi rugwor-na cucuɽic, lir nyor nyeḏi Allah, liti leḏi tiɽaŋal-na tere tiki mac ma fa nani ki lizi-na lukwurlelu kwurlu-kwurlut, na nani ŋa gwu deŋgen-na ṯa, a leṯi tiŋaḏa fori lu kaka rorum kirim-na keḏi ṯurmun, 16 ṯiŋacaŋa zi gwu ŋiɽaŋali ŋir ŋimiiḏa. mindaŋ ma lamin ila leḏi Kwruztu ta, enyi allilazi kwurdum la, kaka iti menyi gwu kalmiteḏizi kwɔmne kwere mac na nenyi ere akiki ŋɔḏɽor ŋere tɔk mac ŋiira fayḏa-na. 17 ma kinneni ŋimiiḏa ŋinyi ketinelu karama gi kir ṯəmna ṯalu, eṯinyamina, na eṯi nyi nyeŋlena ŋaŋa li tatap. 18 ŋofḏana daŋgal-na er ṯa amina, er nyeŋlena ŋaŋa tɔk nyi tɔk.
timuṯaawuz
19 nyi kwukitaḏa eḏi Kweleny-na kweni Yecu eḏuzica ŋaŋwuzi timuṯaawuzŋw fitak, mindaŋ enyamina menyi neŋne ŋiɽaŋali ŋalu. 20 nyi kwende kweḏi kwizi kwere kunuŋ kwir kaka ŋunduŋwu, kweṯi ŋazi enji ki ṯugwor-na. 21 liḏaḏu leṯundici ŋɔḏɽor ŋeŋen ki yey-na kwurɔ-kwurɔp beṯen eḏi ŋɔḏɽor la ŋeḏi Yecu Kwruztu. 22 lakin ŋaŋa lilŋiica rac eḏaruŋw, timuṯaawuz kwedi fayḏa beten duŋgwinyi ŋgi, kaka tor ŋwuzi ṯernyin ṯi, kwaki nyi gi ŋɔḏɽor ŋeḏi injiil. 23 ŋwu ta, nyi kwumɔ kitaḏa eḏi ṯiŋaca ŋaŋwuzi timutaawuzŋw fitak, ki lomur linḏi nyi li eḏelŋe ŋiɽaŋali ŋeḏi hukm winyi, winḏi eḏi roto ḏa; 24 nyi kwukitaḏi nani gwu Kweleny eḏila fitak tɔk.
abafruṯuz
25 nyi kwaruŋw tɔk, ŋofḏana duŋgwinyi eḏeɽica ŋaŋwuzi eŋgeri kweri kweni abafruṯuz, kwumenyi gi aki ŋɔḏɽor ŋumaṯi, kwinḏi nani ŋa gwu kwir kafur kalu eḏi meci nyuŋwu. 26 kaka urŋw gwu zurum eḏeze ŋaŋwuzi tatap, urreḏar gwu ŋunduŋwu ŋeni ŋalu, limezi neŋne ŋeḏi kimeṯ kuŋun. 27 emba, kwumɔ umi beten mindaŋ nuŋw aɽa ŋiɽany kworɔ keṯɔ-keṯɔk. lakin na gi Allah ari ŋimɽya, nuŋw ari nyi ŋgi ŋimɽya tɔk, iti naŋnaŋw gwu mac eḏi kiɽeci nyuŋwu ṯurfa ki ṯurfa la tiḏaḏu. 28 ŋwu ṯaŋwu, nyi kwamina beṯen eḏəɽici ŋaŋwuzi, mindaŋ a nyeŋlena ma eze ŋunduŋwu kwokwony, mindaŋ mer nyi ŋi keṯini wəŋ ki ṯuronyina-na tinyi tɔk. 29 agnari ŋunduŋwu eḏi Kweleny-na ṯinyiŋla ṯi-na ṯupak; na eṯi nii loru-na lir kaka ŋunduŋwu. 30 kaka nanuŋw gwu keṯɔ-keṯɔk eḏay eḏəkici Kwruztuŋw ŋɔḏɽor, tiŋacaŋw gwu ŋiɽany rɔgwɽɔ lu ruŋwun eḏi ṯimazi ṯimeca ṯalu ṯeni nyi, ṯiti ṯeḏiceŋazi ŋaŋa wuɽe-wuɽeny ŋuma mac eḏerri.