Yǝcu mɔŋgwɔ alla rigɽimǝ rigii kwɔr-na, mindaŋ nǝ yiizǝŋ irdǝthi ki-bahar-na.
(Maṯṯa 8:28-34Luuga 8:26-39)1 Nǝ Yǝcu-ŋǝ ṯalaamiiz-thi ṯuuŋwun ɔppathi bahara ṯɔɽɔthalaǝ kwǝthi Jǝliil-ŋwɔ, kǝzir wǝthi Lijaraasiiyyiin. 2 Mindaŋ mɔŋw ruuthǝ ki-mɔrkǝb-nǝ, nǝr biɽithǝnni tɔc kwɔr-gi kwette kwǝthi rigɽimǝ-nǝ rigii kwuruuthu ki-rimaamɔ-na, 3 kwǝṯi nanni ki-rimaamɔ-na; nɔŋweere kweere mac kwǝthicǝ ŋɔma-na eṯhi kǝkki ŋwɔɔɽɔŋw-ŋi; 4 kaka nǝṯir-gwɔ kakkiki dɔṯɔ-dɔṯɔ yalbash-yi nǝ ŋwɔɔɽɔŋw-ŋi tɔk, laakin ǝṯɔŋwsi undundǝthǝ-nǝ rɔṯ-rɔṯ, nǝ ǝṯɔŋw kikkii yabasha ṯɔk, mindaŋ nǝ kwizi ǝrǝ kweere mac kwǝthicǝ ŋɔma-nǝ eṯhi iiɽǝzi. 5 Nǝ ǝṯɔŋw nanni ki-yayin-na nǝ ki-rimaamɔ-na tok, yulŋǝ yaaŋwɔnɔ kaarirrɔ kwɔɔlǝ, mindaŋ ǝṯɔŋw unduni naana yawwa-yi.
6 Mɔŋweese Yǝcu-ŋw kinǝŋgwu tuk, nɔgŋwɔ avratha nɔŋw kwoccelɔ; 7 mindaŋ nɔŋw aari kwɔɔla ŋɔmmaŋi nɔŋwɔccǝŋw, “A kwǝthi karatha kǝndu naaniny-gwɔ, ŋa kwǝni Yǝcu, kwir Tɔr tǝthi Allah wuthǝmthǝla pundu-punduk? Nyii kwutuurǝccǝ-ŋǝlɔ Allah-yi etheere ǝwɽi nyuŋwɔ yǝy-lɔ mac.” 8 Kaka nǝccǝ-gwɔ Yǝcu-ŋw, “Tuuthǝ kithaay kwɔr-na, ŋa ŋgwɔ kwir ṯigɽim ṯigii!” 9 Nǝ Yǝcu uṯicǝlɔ nɔŋwɔccǝŋw, “A kwǝni ǝyǝ?” Nɔŋw ǝŋnici nɔŋwɔccǝŋw, “Nyii kwǝni Jesh, kaka nǝniny-gwɔ luuru!” 10 Nɔŋw tuurǝccǝlɔ tur, ethiseere ṯiŋatha kithaay tuk mac ki-bǝlǝḏ-nǝ ŋgwa. 11 Nǝ yiizǝŋ naani kinaŋw lundǝri kuṯṯu yiinalɔ. 12 Ṯaŋw nǝ rigɽim rigii ṯuurǝccǝlɔ nǝrǝccǝŋw, “Ṯiŋathi-nyji ki-yiizǝŋ-nǝ ǝnyii-gwɔ ǝncinǝ.” 13 Nɔŋwsi ǝmminici etheele, mindaŋ nǝ rigɽim ruu kwɔr-na, nǝr ǝnḏi ki-yiizǝŋ-nǝ dɔŋw tugwrǝ, yir kaka ǝlfein tatap, nǝr ɔvi nduum, mindaŋ nǝr irri ŋwɔɽa-ŋi ki-nḏɔṯṯɔm, nǝr irdǝthi ki-bahar-na nǝsi-gwɔ ŋaaw ǝnyji dip.
14 Nǝ nyaaɽa ǝvri, nǝrsi iirǝcǝ ki-mǝḏiinǝ-nǝ, nǝ ŋwilli-na tɔk. Nǝ lizi ruuthǝ etheese aatha kwumǝ ǝrrini. 15 Mǝr iila naanɔ-gwɔ Yǝcu, nǝreese kwɔɔrɔ kwǝthi rigɽimǝ-nǝ rigii ruuru kwɔnaanalɔ, kwɔmǝ kenne yirethi kwɔmɔ avri nda-na dar; nǝr ṯeenye tatap. 16 Nǝ kila limǝsi ese ŋɔ, nǝrsi andasi ŋa ŋǝrrinicǝ kwɔɔrɔ kwǝthi rigɽimǝ-nǝ rigii, nǝ ŋǝthi yiizǝŋ tɔk. 17 Nǝr daadica-lɔ ethi rucci ǝzir-nǝ weeŋen. 18 Mindaŋ mɔŋw ǝnḏi ki-mɔrkǝb-nǝ tǝ, nǝ ŋgwa kwǝthi rigɽimǝ-nǝ rigii uṯicǝlɔ ethi kwaathitha ŋunduŋw. 19 Nɔŋweere ǝmminici mac, nɔŋwɔccǝŋw, “Nḏi dɔɔnɔ daŋgalɔ, ǝsi andaci laalɔ, nǝ ǝsi ilŋithini ŋǝ ŋimǝ-ŋǝsi Kweeleny ǝrrici, nǝ kwǝthicǝŋǝ ŋimɽiyǝ-nǝ aŋgwɔrɔ.” 20 Ŋwɔṯaŋw mǝ kwɔr ele nɔŋw ǝnḏi ki-muḏun-nǝ kwir wrii, nɔŋwsi andasi ŋa ŋǝrricǝsi Yǝcu. Mindaŋ nǝr liŋɽi kila tatap limǝ niŋnaci nandisa-ŋwsi.
Yǝcu mɔŋgwɔ miithici Yaayrɔs-ŋwɔ tɔɔrɔ tuuŋwun tir tiira nǝ mɔŋgwɔ sǝwi kwayɔ tɔk kwǝṯi ɔnda ŋiinǝ.
(Maṯṯa 9:18-26Luuga 8:40-56)21 Mǝ Yǝcu ṯamthɔ mɔrkǝb-gi kinǝŋgwu-ŋga-nǝ bahara kǝni kithaathɔ. Nǝ ŋwɔdɔŋw ŋwuuru ɔɽɔmaṯṯi naanɔ-ŋgwɔ mindaŋ nɔŋw naanaci bahara keṯṯɔk. 22 Nɔŋw iila kwette kwǝthi rɔ-asa rǝthi majma@a kwǝni Yaayrɔs; mɔŋweese ṯǝ nɔŋw iidǝccǝlɔ ŋwɔɽelle-na, 23 nɔŋw daadica-lɔ beṯṯen nɔŋwɔccǝŋw, “Tɔr tiinyi tir tiira kirana tǝrricǝ ŋiɽany. Ila-ṯa a kette ṯii naana, mindaŋ gwɔ saawi.” 24 Ŋwɔṯaŋw nareele ndǝndǝk.
Nǝ lɔdɔŋw lɔppa kwaathitha nǝr attathi naana. 25 Nǝ kwaaw naani kwette kinaŋw kwǝṯi ɔnda ŋiinǝ kwɔmǝ aagɔ yithlǝyu wrii-kwuɽǝn, 26 mindaŋ nɔŋw ṯuusi kwomne kwittǝzir ki-yǝkim-nǝ, mindaŋ nɔŋw kiirasi kwomne-lɔ kwuuŋwun kwittǝzir tatap, nǝ ŋɔ tatap nɔŋweere sǝwinni too, laakin nɔŋw-mǝ kǝniny umǝthǝ keereny-gi rerrec. 27 Mɔŋw neŋne ŋiɽanali ŋǝni Yǝcu, nɔŋw ɔvtha ŋwɔdɔŋw-na ṯɔɔɽɔthala nɔŋw mummuci kirethi kuuŋun. 28 Kaka naarɔ ŋgwɔŋw, “Mǝnyii-tǝ mummuci yirethi yuuŋwun ṯɔɽɔk, nyiitǝ saawi.” 29 Ŋwɔṯaŋw nǝ ŋin rilli tɔc; mindaŋ nɔŋw iccini kaŋna-na wuuŋwun kwɔmǝ sǝwinni. 30 Ṯaŋw nǝ Yǝcu iccini ŋɔma-ŋi ŋimǝ ruu, nɔŋw ɔrllalɔ ki-lɔdɔŋw-na nɔŋwsǝccaŋw, “Ǝyǝ kwɔrɔ kwɔmɔmmucǝ-nyii yirethi?” 31 Nǝ ṯalaamiiz ṯuuŋwun ǝŋnici nǝrǝccǝŋw, “Neese lɔdɔŋw lattathi-ŋa naana, mindaŋ naarɔŋw, ǝyǝ kwɔrɔ kwɔmɔmmɔ-nyii-a?” 32 Nɔŋw iccanna-lɔ etheese ǝyǝ kwɔrɔ kwǝrrǝ ŋiɽaŋali ŋɔ. 33 Nǝ kwaaw ṯeenye nɔŋw ɔnḏɔthi, kaka nilŋithi-ŋgwɔ kwomne kwǝrrinǝ. Nɔŋw iila nɔŋw iidǝccǝlɔ ŋwɔɽelle-na, mindaŋ nɔŋwsi andaci tatap ŋir rerrem. 34 Nɔŋwɔccǝŋw, “Ŋiira ŋiinyi ṯǝmminǝ ṯɔɔŋwa ṯimǝŋǝ sǝwi; nḏi kǝniny kwisaaw, mindaŋ a saawi ki-ṯurvǝnǝ ṯɔɔŋwa.”
35 Kinaŋw nandisaŋw ṯaŋw, nǝr iila lǝthi dɔɔnɔ kwǝthi rǝ-iis rǝthi majma@a nǝrǝccǝŋw, “Ŋiira ŋɔɔŋa ŋimǝ ai. Nǝ a kwɔthɔ kwundǝŋnǝ Mɔ@allima ceg-cegi?” 36 Laakin nǝ tǝ Yǝcu ere kettice ŋiɽanali ŋa yǝy mac ŋandicarsi rǝ-iisǝ, nɔŋwɔccǝŋw, “Ǝṯi ṯiinya mac, ǝmminɔ tǝ kǝniny.” 37 Nɔŋweere duŋgwǝci kweere ethi rɔɔmi mac, illi Bɔṯrɔs-ŋǝ Ya@guub-gi, nǝ Yuhanna kwir eŋgen kwǝthi Ya@guub-ŋǝ. 38 Mǝr ɔppathi ki-dɔɔnɔ kwǝthi rǝ-iis rǝthi majma@a, nɔŋweesc lizi lalliza kwuurunna laarathina, nǝ lɔarɔ kwɔɔla ŋɔmmaŋi tɔk. 39 Mɔŋw ǝnḏi kiininy, nɔŋwsǝccǝŋw, “Aatha kwallica-ŋa kwuurunnǝ ŋwalŋi-na, tɔr titi-mǝ taayɔ mac, laakin tinḏirɔ-tǝ domony!” 40 Nǝr aaritha ŋunduŋw yiimǝ nyithak. Nɔŋwsi ruwǝ tatap kithaay, 41 nɔŋw mɔlɔ ṯǝrnyin-ŋwɔsi lǝnyin-gi nǝ kila linaanir-li tɔk, nǝr ǝnḏi kǝzir winḏiri-gwɔ tiiralɔ. Nɔŋw mithǝ ṯii, e-ṯa nɔŋwɔccǝŋw, “Ṯoliitha gɔɔmi,” ŋǝniŋw, “Tiira tokwɔɽony, nyii kwǝccǝŋǝ ŋwɔ, Diiɽu.” 42 Nǝ tɔr diiɽi mindaŋ nɔŋw rikannalɔ. (Kaka nɔrɔthɔ-ŋgwɔ yithlǝyu wrii-kwuɽǝn.) Nǝr liŋɽalɔ ṯɔc buruc, kaka aatha kweere. 43 Nɔŋwsi ɔracci oro-oro ethisi kwizi kweere ere elŋe ŋɔ mac, e-ṯa nɔŋwsi andaci ethi inḏǝthǝ kwomne kweere kwǝthi yee.