Yǝcu mɔŋgwɔ ɔɔsi ṯalaamiiza ṯir wrtt-kwuɽǝn
(Maṯṯa 10:5-15Mɔrgus 6:7-13)1 Nǝ Yǝcu ɔrnɔṯi ṯalaamiiza dɔŋw ṯir wrii-kwuɽǝn, nɔŋwsi inḏǝthǝ ŋɔma nǝ sɔlṯa tok kwǝthi-gi ruttu rigɽimǝ kithaay tatap rigii, nǝ ethisi sǝwici kimǝthi tok. 2 E-ta nɔŋwsi ɔɔsi etheele ethi aari bǝshirǝ Ŋeelenyi ŋǝthi Allah, nǝ ethisi sǝwi luumǝ tok. 3 Mindaŋ nɔŋwsi ǝccǝŋw, “Ǝṯi dimmǝ kwomne kweere mac kwǝthi ṯaay; wala ṯɔɔ, wala shanṯa kwǝthi ṯii, wala rǝghiiv, wala gwuruush, wala yǝmiis yiɽǝ-yiɽǝn 4 Kǝzir wette nyithak wǝrŋǝsi-gwɔ ǝnyji, ǝgwɔ nanni ki-yiŋna-na-ṯǝ kiya mindaŋ mǝ dɔŋgwatha ki-mǝḏiinǝ kwir ter. 5 Kǝzir weere nyithak witi wǝŋsi-yi lizi ǝnyji ki-dɔɔnɔ-na kweeŋen mac tǝ, a ɔrlacci mǝḏiinǝ ŋgwa ŋwɔdoŋw, mindaŋ mǝsi pǝcci kuulǝŋi ŋwaara naana ŋwaalɔ ethisi ɔɽacci lɔɔma ki-rogɽo reeŋen.”
6 Nǝ ṯalaamiiz ele nǝr irǝrǝlɔ ki ŋwilli-na tatap nǝraari bǝshirǝ Inyjiilǝ mindaŋ nǝr sǝwi lizi ǝzir naana tatap.
Hiiruuḏus mɔŋgwɔ pinni ṯɔgwor-na ṯǝni Yǝcu.
(Maṯṯa 14:1-12Mɔrgus 6:14-29)7 Mǝ Hiiruuḏus kwir mɔhaafis kwǝthi Jǝliil-ŋwɔ neŋne kwomne ŋgwa tatap kwǝrrinǝ, nɔŋw pinni ṯɔgwor-na beṯṯen, kaka naarɔ-gwɔ lizi lokwoŋw Yuhanna Ma@maḏaan kwir kwɔmǝ miitha kwokwony. 8 Nǝ lithaathɔ aarɔŋw, kwiɽii kwɔrɔ kwɔmǝ ruwǝnnǝlɔ, nǝ lithaathɔ aarɔŋw, kwiɽii kwɔrɔ kwette kwǝthi liɽii lǝthi kerreny-ŋwɔ tuk, kwɔmǝ miitha kwokwony. 9 Nǝ Hiiruuḏus aarɔŋw, “Nyii kwɔmǝthi uɽuthǝthǝ Yuhanna-ŋwɔ nda-lɔ mindaŋ, nimǝ ǝyǝ oro ŋgwɔ kwɔniŋnany-gi kwǝṯi arri kwomne-ŋgwɔ?” Mindaŋ nɔŋw ṯǝccici etheese Yǝcu-ŋwɔ.
Yǝcu mɔŋgwɔ ithni lɔɔrɔ lir khamsa alf.
(Maṯṯa 14:13-21Mɔrgus 6:30-44Yuhanna 6:1-14)10 Nǝ yaavɔr aaɽa, nǝr andaci Yǝcu-ŋwɔ kwomne ŋgwa tatap kwɔmǝr ǝrrǝ. Nɔŋwsi mɔlo nǝreele cuk-cuk ki-mǝḏiinǝ-nǝ kwǝni Beiṯ-sayḏa. 11 Mǝ ŋwɔdɔŋw neŋne ŋiɽaŋali ŋɔ, nǝr kwaathitha mindaŋ nɔŋwsi ele nɔŋwsi aalinna, mindaŋ nɔŋwsi andaci ŋiɽaŋali ŋǝthi Ŋeeleny ŋǝthi Allah, mindaŋ nɔŋwsi sǝwi kila linaŋna ṯisǝwunnǝ.
12 Mǝ aaŋwɔn naŋni ethi ɔɽi, nǝ ṯalaamiiz ṯir wrii-kwuɽǝn iila naana-ŋgwɔ nǝrǝccǝŋw, “Fǝthǝ lizi kithaay mindaŋ mǝreele ŋwilli-na nǝ kǝzir tatap wirikanna-lɔ tok ethi kaṯṯisa ethneya weere, nǝ ǝzir tok wǝthi-gwɔ inḏira. Kaka a-naanir-gwɔ ki-wuthǝr-nǝ.”
13 Laakin nǝsi Yǝcu ǝccǝŋw, “Nḏǝthǝrsi-mbǝ ŋaaŋa kwomne kweere kwǝthi yee.” Nǝr ǝŋnici nǝrǝccǝŋw, “Ŋgwa tatap kwǝthi-nyii kwir rǝghiivǝ ṯɔthni nǝ lɔm nḏǝn ṯɔɽɔk. A kwɔnaŋna-nyji etheele ethisi licca kɔlɔ tatap eḏneya?” 14 Kaka naanɔ-gwɔ lizi kinaŋw lir khamsa alf. Nɔŋwandaci ṯalaamiiza ṯuuŋwun nɔŋwsǝccǝŋw, “Nǝnǝr lizi-lɔ ŋwɔdɔŋw-ŋwɔdɔŋw ŋwir ruɽi-riɽǝn la wrii ruɽi-riɽǝn la wrii.”
15 Mǝsi ṯalaamiiz ǝrri ŋɔ tǝ, 16 nǝ Yǝcu dimmi rǝghiivǝ rir ṯɔthni nǝ lɔm nḏǝn, nɔŋw baaŋitha leereya-la, nɔŋw-ri ǝccǝ Allah shukran, nɔŋwsi undǝthǝnǝ, nɔŋwsi inḏǝthǝ ṯalaamiiza ethisi kannaci lizi. 17 Mindaŋ nǝr ethne tatap nǝr bee, mindaŋ nǝr ɔṯi wa wǝɽinnǝ luvǝ wrii-kwuɽǝn.
Bɔṯrɔs aarɔŋgwɔŋw Yǝcu kwir Kwɔrɔstɔ.
(Maṯṯa 16:13-20Mɔrgus 8:27-29)18 Laamin lette laari-li Yǝcu kiyiiriny kwɔtɔpɔt, nǝ ṯalaamiiz ele naanɔ-ŋgwɔ. Nɔŋwsi uṯicǝlɔ nɔŋwsǝccǝŋw, “Ŋwɔdɔŋw ŋwɔṯi aarɔŋw nyii-ŋgi kwirtaŋ?” 19 Nǝr ǝŋnici nǝrǝccǝŋw, “Lǝṯaarɔŋw lokwo ŋa kwɔrɔ Yuhanna kwǝni Ma@maḏaan, lithaathɔ nǝraarɔŋw a kwir kwǝni Iliiyyǝ, nǝ lithaathɔ nǝraarɔŋw ŋa kwir kwette kwǝthi liɽii lǝthi kerreny-ŋwɔ kwɔmǝ diiɽǝ ki-ŋiɽany-na.” 20 Nɔŋwsi uṯicǝlɔ nɔŋwsǝccǝŋw, “Nǝ ŋaaŋa tǝ a liṯaari nyii-ŋgi kwirṯaŋ?” Nǝ Bɔṯrɔs ǝŋnici nɔŋwɔccǝŋw, “Ŋa kwɔrɔ Kwɔrɔstɔ kwǝthi Allah.”
Yǝcu mɔŋgwɔ andasi ŋiɽaŋali ŋǝthi ṯurvǝ ṯuuŋwun, nǝ ŋiɽany tok.
(Maṯṯa 16:20-28Mɔrgus 8:30—9:1)21 E-ta nǝsi Yǝcu inḏǝthǝ waamira wɔfirlli etheere andaci kwizi kweere mac. 22 Nɔŋwsi andaci tok nɔŋwsǝccǝŋw, “Laazim a Tɔr tǝthi Kwizigwunǝŋ rǝrinni beṯṯen kwomne-gi kwittǝzir mindaŋ a lishiyuukh dirnathalɔ rɔ-asa-ri rǝthi kahana nǝ mɔ@allimiin kwǝthi Sherii@a tok. Ǝri ɽeenye, mindaŋ mǝ ŋwaamin ṯoɽol ere ǝri diiɽǝ ki-ŋiɽany-na.”
23 Nɔŋwsi ǝccǝŋw tatap, “Mɔŋw naŋni kweere ethi rɔɔmi nyuŋwɔ-tǝ laazim ŋwɔ ǝvrinni rogɽo-ri ruuŋwun, ŋwɔ dimmi ŋwuuɽi ŋwuuŋwun ŋwɔɽɔmɔthalɔ ŋwaamin tatap, kwǝnyii-ŋi rɔɔma. 24 Mǝ kweere nyithak naŋni ethi kilǝthi ŋimiitha ŋuuŋun-tǝ, ŋwɔsi ṯuusi, nǝ kweere kwuṯuusi ŋimiitha ŋuuŋun sǝbǝb-gi kwǝni nyii-tǝ, ŋwɔsi kilǝthi. 25 Kwizi kwinḏi ethi ǝgini aatha-ŋwɔ, mɔŋwaavi kwomne tatap kwǝthi ṯurmun mindaŋ mɔŋw ṯuusi rogɽɔ ruuŋwun, ya mɔŋwsi kiirasalɔ? 26 Mǝ ṯɔrony mithǝ kwizi kweere ṯǝni nyii nǝ ṯǝni ta@liim ṯiinyi a ṯɔrony mithǝ Tɔɔrɔ tǝthi Kwizigwunǝŋ ṯǝŋw tɔk ṯǝni ŋundu mɔŋwaaɽa ŋinith-ŋi ŋuuŋun, nǝ ŋǝthi Papa nǝ ŋǝthi limeleka lirllinǝlɔ ter. 27 Laakin nyii kwǝccǝ-ŋǝsi-mǝ ŋwɔ rerrem, kɔlɔ lokwo lirlɔ kɔnɔŋw liti lai mac mindaŋ mǝreese Ŋeelenyi ŋǝthi Allah.”
Yǝcu mɔŋgwɔ reethe reṯ kaayin-la.
(Maṯṯa 17:1-8Mɔrgus 9:2-8)28 Mǝ ŋwaamin ṯamthɔ dɔvokwɔppa ŋwandisaŋw-ŋi ŋiɽaŋali ŋɔ, nǝ Yǝcu mɔlɔ Bɔṯrɔs-ŋwɔsi Yuhanna-gi nǝ Ya@guub tɔk, nǝr-li allɔ kaayin-la ethi-gwɔ aara kiyiiriny. 29 Nǝ kinaŋw naarɔ-ŋgwɔ kiyiiriny nɔŋw reethe kiyǝnǝ reṯ mindaŋ nǝ yireth yuuŋwun fiithi per-per mindaŋ nǝr erṯelɔ kiɽǝr-kiɽǝr. 30 Nǝ biḏaan nǝ lɔr ndǝn lǝni Muusǝ-ŋǝ Iliiyyǝ-gi ruwǝnnǝlɔ tɔc nǝr-li andasi. 31 Lirwǝnnǝlɔ ŋinith-ŋi ŋǝṯhi leere, mindaŋ nǝrandasi Yǝcu-ŋǝli ŋiɽaŋali ŋǝthi tǝrṯiib ṯǝthi ŋiɽany ŋuuŋun, ŋinḏi-ŋwsi ethisi rattasi kworo Urshaliim-na. 32 Nǝ ŋwaarɔ apanni Bɔṯrɔs-ŋwɔsi lizi-li liṯhaathɔ, mindaŋ mǝr avri kiyǝnǝ dar ṯǝ, nǝreese ŋinithi ŋǝthi Yǝcu nǝ lɔr ndǝn lirlɔ ŋundu-gi. 33 Na mǝ lɔr ɔrlacci Yǝcu-ŋwɔ ŋwɔdɔŋw tǝ, nǝ Bɔṯrɔs ǝccǝŋw, “Yaa Sǝyyiḏ, ŋiɽaŋal ŋimaami beṯṯen a-naanir kɔnɔŋw! Nyiiŋǝ lidaɽimatha yǝvǝŋi ṯɔɽɔl kette kɔɔŋa, nǝ kette kǝthi Muusǝ, nǝ kette kǝthi Iliiyyǝ.” Nɔŋwseere elŋǝ ŋa rerrem mac ŋandisa-ŋwsi.
34 Nǝ nandisaŋw-tǝ kinnǝni, nǝ lebleth ruwǝnnǝlɔ nɔŋwsi kwuɽubǝthǝlɔ ṯigɽim-thi ṯuuŋwun; mindaŋ nǝ ṯalaamiiz ṯeenye mǝsi lebleth kwuɽubǝthǝlɔ. 35 Nǝ ṯɔgɽɔ ɔɽa ki-lebleth-na ṯaarɔŋw, “Tɔr tiinyi tir-ṯa kirɔ ticcany-na niŋnacar ŋunduŋwɔ!” 36 Mǝ ṯɔgɽɔ uɽǝthi-tǝ, nǝ Yǝcu ǝɽinnǝlɔ kwɔtɔpɔt ṯɔɽɔk. Nǝ ṯalaamiiz naani dec nǝreere andasilɔ ŋiɽaŋal-ŋi ŋɔ mac, nǝ ki-lɔɔmɔr-la-ṯǝ kila nǝreere andaci kwizi kweere mac kwomne ŋgwa kwiisar.
Yǝcu mɔŋgwɔ sǝwi tɔɔrɔ tǝthi ṯigɽimǝ-nǝ tigii.
(Maṯṯa 17:14-18Mɔrgus 9:14-27)37 Mǝ ŋɔrpɔ-ŋgwa oro nǝ Yǝcu-ŋǝ ṯalaamiiz-thi ḏappitha-lɔ kaayin-la, mindaŋ nǝ dɔŋw lɔppa iila nǝr-li biɽithi kithaay. 38 Nǝ kwɔr kwette ɔrnɔṯila ŋɔmmaŋi ki-lɔdɔŋw-na nɔŋwɔccǝŋw, “Yaa Mɔ@allim! Nyii kwutuurǝccǝ-ŋǝlɔ iisa-ṯi tɔɔrɔ tiinyi; tǝthi-nyii-ṯǝ tɔtɔpɔt dak! 39 Ǝṯi ṯigɽim ṯigii aathitha ŋɔmaŋi-na kwurup, ǝṯɔŋw aari kwɔɔla ǝṯɔŋw lakkisalɔ mindaŋ ǝṯɔŋw iirǝ kitho kworo, ǝṯɔŋw kagiṯṯɔ kwurayu-lu, ǝṯɔŋw aari isṯimir ethi rǝri naana mindaŋ ǝṯɔŋweere duŋgwǝci etheele-lɔ biɽǝṯ mac. 40 Nǝnyii tuurǝcci ṯalaamiiza-lɔ ṯɔɔŋwa ethi ruttuci kithaay laakin nǝr ulǝcci abaariya.” 41 Nǝ Yǝcu ǝŋnici nɔŋwaarɔŋw, “Ŋaaŋa lirmba liira ṯǝmminǝ-gaa, na noro lizi lir lɔdɔrllathɔ too lǝthi lɔɔmɔr kɔlɔ! Nyii kwɔŋǝsi-thi naanasi ṯacca-ṯaccaŋ? Nyii kwɔŋǝsi-thi mithici ṯɔgwori ṯacca-ṯaccaŋ? Mɔlca-nyii-ṯi tɔɔrɔ tɔɔŋwa kɔnɔŋw.”
42 Nǝ kinaŋw niilathi tɔr naana, nǝ ṯigɽim ṯuruuŋwɔ allɔ naana nɔŋw ɔvthathalɔ timbɽǝk kwurǝyu-lu. Laakin nǝ Yǝcu ǝrmici ṯigɽimǝ ṯuruuŋwɔ, e-ta nɔŋw sǝwi tɔɔrɔ mindaŋ nɔŋwɔɽici ṯǝrnyin. 43 Nǝ lizi tatap liŋɽalɔ buruc ŋɔma-ŋi ŋɔppa ŋǝthi Allah.
Yǝcu mɔŋgwɔ andasi kwokwony ŋiɽaŋali ŋǝthi ŋiɽany ŋuuŋun.
(Maṯṯa 17:22-23Mɔrgus 9:30-32)Laakin a-naanir-ṯǝ kinnǝni lithbilɔ ṯibǝk ŋiɽaŋal-ŋi ŋǝrrǝsi Yǝcu, nɔŋwɔccǝ ṯalaamiiza ṯuuŋwun-ŋwɔ, 44 “Ǝṯi-ŋi ṯɔɔthɔna mac ŋɔ ŋinḏi-ŋǝsi ethisi andaci! Tɔr tǝthi Kwiziŋwunǝŋ tinḏir ethi inḏǝthǝ lizi lǝthi sɔlṯa ki-rii-na reeŋen.” 45 Laakin na ṯalaamiiz ere elŋe ma@na kwǝthi ŋiɽaŋal ŋɔ mac. Kaka nɔluccunǝthisi-gwɔ ma@na, mindaŋ nǝrsi-mǝ ere elŋe mac. Na nǝr ṯeenye kii ethi-ŋi uṯicǝlɔ.
Ǝyǝ kworo kwuthǝmthisi-lǝ tatap.
(Maṯṯa 18:1-5Mɔrgus 9:33-37)46 Nǝ ṯalaamiiz ɔppathalɔ deŋgen-na ethi elŋe ǝyǝ kwɔrɔ kwuthǝmthisi-lǝ deŋgen-na. 47 Mǝ Yǝcu elŋe ǝfkǝrǝ wǝthi rɔgwor reeŋen, nɔŋw mɔltha tɔɔrɔ nɔŋw rilli ki-ṯuɽumǝ ṯuuŋwun. 48 E-ta nɔŋwsǝccǝŋw, “Kweere nyithak kwǝnyji tɔɔrɔ kɔrɔ ki-lɔɔɽɔ-na yiriny-yi yiinyi, kwǝni kwǝnyjǝ-nyii nyuŋwɔ tok; nǝ kweere kwǝnyii ǝnyji ki-lɔɔrɔ-na, nɔŋwɔni kwǝnyjǝ ŋgwa kwɔɔsa-nyii. Nǝ ŋgwa kwɔrɔ kwokwɔɽony daŋgal-na tatap, kwundǝ kwɔrɔ kwuthǝmthi-lǝ.”
Ŋgwa kwiti kwir ṯuwǝn ṯaalɔ mac kwaalɔ kwɔrɔ.
(Mɔrgus 9:38-40)49 Nǝ Yuhanna andaci nɔŋwɔccǝŋw, “Yaa Sǝyyiḏ! Nyiiŋǝ liisa kwɔɔrɔ kwette kwurwǝ rigɽimǝ rigii yiriny-yi yɔɔŋwa, mindaŋ nǝnyii ṯiinyini ethisi ǝrri ŋɔ, kaka niti nɔrɔ-ŋgwɔ kwǝthi dɔŋw lǝri mac.” 50 Nǝ Yǝcu ǝccǝŋw ŋundu-ŋǝ ṯalaamiiz-thi ṯithaathɔ, “Ǝṯi ṯiinyinǝ mac, mɔŋweere oro kweere ṯuwǝn ṯaalɔ mac ṯǝ, nɔŋworo kwaalɔ.”
Lilli lǝthi Saamira-ŋwɔ lidirnathɔ Yǝcu-ŋwlɔ.
51 Mǝ lɔɔmɔr luuŋwun aadithi ethi-li allanni ki-leere, nɔŋw ǝllici Urshaliim-ŋwɔ nda-na dɔṯṯɔk. 52 Nɔŋw ɔɔsi lizi ethi iŋnaci ŋunduŋw keereny, nǝreele nǝr ǝnḏi ki-lilli-na lette lǝthi Saamira-ŋw, ethi daɽimaci kwomne-lɔ tatap cɔgwo-cɔgwop. 53 Laakin nǝ lizi lǝthi kinaŋw-ŋwɔ ere ǝmmini ŋunduŋw mac, kaka ǝllicǝ-ŋgwɔ Urshaliim-ŋwɔ nda-na dɔṯṯɔk. 54 E-ta ma ṯalaamiiz ṯuuŋwun ṯǝni Ya@guub-ŋǝ Yuhanna-gi ese ŋiɽaŋali ŋɔ ŋɔmǝ rottoŋw, nǝrǝccǝŋw, “Kweeleny a kwɔnaŋna-nyji ethi ɔrnɔṯa iigvŋi ki-leere ethi ɔɽa mindaŋ ethisi uɽǝzǝlɔ wǝrǝ?” 55 Nǝ Yǝcu ɔrllalɔ nɔŋwsi ǝrmici nɔŋwsǝccǝŋw, “Ŋaaŋa lende lilŋithi, ŋaaŋa lir lǝthi Ṯigɽim ṯǝndu; kaka inḏi-gwɔ Tɔr tǝthi Kwizigwunǝŋ etheere kiirasi ŋimiitha-lɔ ŋǝthi lizi mac, laakin ethisi kǝniny kilǝthi.” 56 E-ta na Yǝcu-ŋǝ ṯamthɔ ṯalaamiiz-thi ṯuuŋwun nǝreele ki-lilli-na lithaathɔ.
Ya ethi kwaathitha Yǝcu-ŋwɔ ya bǝri.
(Maṯṯa 8:19-22)57 Mǝreele ki-thaay-la tǝ, nǝ kwɔr kwette ǝccǝ Yǝcu-ŋwɔ, “Nyii kwɔŋǝ rɔɔmi kǝzir wette nyithak wǝgwɔ ele.”
58 Nǝ Yǝcu ǝccǝŋw, “Lɔthlɔm lǝthi-pǝ rubuni, nǝ ndǝw ǝthi yɔɽɔɔ, laakin Tɔr tǝthi Kwizigwunǝŋ-tǝ, nɔŋweere ǝthi ǝzir-nǝ mac wǝthi-yi tɔgdasi nda-la.” 59 Nɔŋwɔccǝ kwɔɔrɔ kwɔthaathɔŋw, “Rɔɔma-nyii.” Laakin nǝ kwɔr ŋgwa accǝŋw, “Kweeleny, duŋgwǝcǝ-nyii nyeele nyaaɽi nyaanitha ṯǝrnyǝri-ŋw kerreny.”
60 Nǝ Yǝcu ǝŋnici nɔŋwɔccǝŋw, “Duŋgwǝcǝsi kila liira ŋimiithana ŋiyaŋ ethisi aanitha kila leeŋen laayɔ. Nḏi kǝniny ŋa aari bǝshirǝ Ŋeeleny-ŋi ŋǝthi Allah.” 61 Nǝ kwɔr kwɔthaathɔ ǝccǝŋw, “Kweeleny, nyii kwɔnaŋna-ŋa ethi rɔɔmi rac, laakin duŋgwǝcǝ-nyii nyeele nyaaginnaɔ lizi liinyi lǝthi dɔɔnɔŋw kerreny.” 62 Nǝ Yǝcu ǝccǝŋw, “Ma kwizi kweere aari ibṯǝḏi ethi kwee limen-li mindaŋ mɔŋw iccanni kwaathan-gi tǝ, ŋweere ɔvthanni mac ki Ŋeeleny-na ŋǝthi Allah.”
aza 9
yafur ŋedi yafur yir wri-kwuɽen
1 nuŋw ornuti limeḏgen duŋw lir wri-kwuɽen, nuŋw zi inḏeḏa zulṯa eḏi gi illazi rigɽima riki ki, na ŋuma tɔk eḏi ŋi zəwi kimeti kir-na ter ter. 2 nuŋw zi ṯiŋa klu lir wri-kwuɽen eḏi zi ireci ŋeḏi ŋeleny ŋeḏi Allah, eḏi zəwi lizi luma tɔk. 3 nuŋw zi eca ŋwu: eṯapa kwɔmne kwere mac kweḏi ṯay, ŋwumor, ya lulugwuŋw, ya eḏne, ya kwuruuz, na eṯi kwukwubaza lofan-na tɔk mac. 4 ma enḏi ki duənu kwere, eṯi gwu nani mindaŋ ma duŋgwalu. 5 muŋw ere enji ŋaŋwuzi kwere mac, ma ṯamḏu ayinu weŋen ta, ipii kulaŋi ŋwara nana eḏi zi gi ilŋiiḏini loma leŋen. 6 ner ru ner ele ki yayin yere yere, na eṯir gwu ireci ŋiɽaŋali ŋizaw, eṯir zi zəwi ezir nana tatap.
ṯurreḏa-na ṯeḏi hiruuḏuz
7 mezi hiruuḏuz, kwir kweleny, neŋne ŋimerrini, na ŋiɽaŋal urreḏa, kaka mer gwu ari lɔkwɔ ŋwu: yuhanna kwiri, kwumɔdiɽi ki ŋiɽany-na. 8 ner ari lɔkwɔ ŋwu: iliiya kwir manja ta, kwumɔruweḏe lu: ner ari liḏaḏu ŋwu: kwiɽi kwere kwiri manja ta, kweḏi kerrenyŋw tuk, kwumɔdiɽi. 9 na hiruuḏuz ari ŋundu, ŋwu: yuhanna kwumenyi ṯi uɽuḏa nda; na eya kwiri kweti nyi gi neŋne ŋiɽaŋali ŋenu ŋwu ŋwu? nuŋw naŋnini eḏeze.
Yecu kwubiye lizi lir alaaf ṯuḏni
10 ma yafur aɽi ner zi andaci Yecuŋw tatap ŋimerzi erra. nuŋw zi mulɔ, ner li ele cukcuk kezir wete wir wuḏer yi-na, weḏi balaḏ weni beyṯzayḏa. 11 lakin mezi lizi elŋece ner zi kwaḏiḏa; nuŋw zi agani, nuŋw zi andaci ŋeḏi ŋeleny ŋeḏi Allah. nuŋw zi zəwi kla luma. 12 mindaŋ ma aŋwun kwuluŋa kereny, ner ila lir wri-kwuɽen ner eca ŋwu: feḏe lizi kitay, erele ki yayin kezir were wirkana-lu, er gwu fa ta kaṯazi eḏneya were, er gwu inḏiri, kaka ur gwu ezir wu wuḏer-na domony. 13 nuŋw zi eca ŋwu: inḏeḏerzi ma ŋaŋa eḏneya. ner eca ŋwu: eḏne wir ṯa wu wir yafaŋi ṯuḏni ṯuɽuk, na lum nden illa kezni menyele eḏi liṯa eḏneya weḏi lizi klu litezir. 14 ner nani lor lir kaka alaaf ṯuḏni. nuŋw eca limeḏgen ŋwu: andicarzi eḏi nanalu, ŋwuduŋw ŋwuduŋw, ruɽi-riɽen-wri, ruɽi-riɽen-wri. 15 ner zi erru ŋwu, ner zi nənalu tatap. 16 nuŋw dimi eḏneya wir yafaŋi ṯuḏni, lum li kla nden, nuŋw yi baŋḏa lerya la, nuŋw ortaḏa, nuŋw undena, nuŋw inḏeḏa limeḏgen eḏi zi kekitizelu kla lulubeḏu. 17 ner eḏne tatap ner be. ner uṯi wumeɽini, ner urezi luffa wri-kwuɽen.
ṯundiza ki ṯeḏi buṯruz, aru ŋwu: Yecu kwir Kwruztu
18 ner ṯa orɔ ŋwu, nanuŋw gwu keni eḏari ki yiriny, na limeḏgen nani tɔk. nuŋw zi uṯizelu nuŋw zi eca ŋwu: lizi leṯi manuŋ aruŋw, nyi kwir ṯaŋ? 19 ner eŋnici ner eca ŋwu: leṯari lɔkwɔ ŋwu: yuhanna kweni baptizt kwir manja ta? eṯir ari lɔkwɔ ŋwu: iliiya kwiri, eṯir ari liḏaḏu ŋwu: kwiɽi kwiri kwere kweḏi kerrenyŋw tuk, kwumɔdiɽi. 20 nuŋw zi eca ŋwu: na ŋaŋa ta, eṯi ma ari, nyi kwir ṯaŋ? na buṯruz eŋnici nuŋw eca ŋwu: a kwiri Kwruztu kweḏi Allah. 21 nuŋw oraci ɔrɔ ɔrɔ edi zi ere andaci kwizi kwere mac ŋeni ŋundu.
Yecu kwandize ŋiɽya ŋi ŋeḏi ŋiɽany ŋuŋun ŋinḏi, na ŋeḏi ṯiḏiɽa ṯuŋwun tɔk
22 nuŋw aru ŋwa: lazim eḏi Tor teḏi kwizigwunaŋ rerini beṯen. er durni leni lijowiṯ-ŋa leleny li leḏi yiziiz tɔk, na kla leṯizilŋiiḏini kuruu-na tɔk, er eɽenye, mindaŋ ki ŋwamin la ŋwir ṯɔɽɔl, ŋwudiɽi.
ṯornuṯa eḏi zi duŋgweci ŋeḏi rɔgwɽɔ
23 nuŋw zi andaci tatap ŋwu: ma kwere nyiḏak naŋni eḏi kwaḏiḏa nyuŋwu, eḏuŋw dirnaḏa rɔgwɽɔ lu ruŋwun, ŋwudimi ŋwuɽi ŋwuŋun ŋwuɽmɔḏalu ŋwamin rac, ŋwenyi kwaḏiḏa. 24 kaka muŋw naŋni kwere eḏi kileḏi ŋimiiḏa ŋuŋun, kwunderṯa kwezi kiraza lu, lakin muŋw ṯuzici ŋimiiḏa ŋuŋun, ŋwu zi ta kileḏi. 25 kaka əgina gwu kwizi aḏa, muŋw afi kweḏi ṯurmun tatap, mindaŋ muŋw kirazi rɔgwɽɔ lu ruŋwun? 26 kaka ṯaŋwu, ma turony ye kwete nyiḏak ṯeni nyi, ya ṯeni ŋiɽaŋal ŋinyi ki lizi-na klu liira ṯəmna-na, leni liki rugwori tɔk, a ṯurony ye Toru teḏi kwizigwunaŋ tɔk ki lamin linḏuŋw li eḏila ŋiniṯ ŋi ŋuŋun, na ki ŋinit-na ŋeḏi Ṯernyin, na ŋeḏi limaleyka lirlinelu ter. 27 nuŋw zi eca ŋwu: lakin, nyi kwecaŋazi ma ŋwa rerem, lɔkwɔ lirilli kunuŋ liti linyeŋle ŋiɽany kineni mac, mindaŋ mer eze ŋelenyi ŋeḏi Allah.
ṯiriiḏa ṯeḏi Yecu
28 ner ṯa orɔ ŋwu, muŋw zi andaci ŋiɽaŋali ŋu, na ŋwamin ŋwir kaka dufɔkwupa ere, nuŋw mulɔ buṯruz ŋwuzi, yuhanna gi, na yaguub tɔk ner li allu kayin la eḏi gwu ari ki yiriny. 29 na aruŋw gwu ki yiriny ta, nuŋw reḏe kiyeyna reṯ, na yireṯ yuŋwun fiiḏi pərpər ner ṯiŋaḏa firyar lu kɽar kɽar. 30 na, izaṯi, ner andazi lor li nden, linderṯa leni muuza-ŋa iliiya gi, 31 liruwene lu ki ŋinit-na, ner zi mumri la ŋeḏi ŋiɽany ŋuŋun ŋinḏuŋw ŋi edi gwu enḏi-na urzaliim.
32 na ŋwaru apani buṯruz ŋwuzi, lakin ner afri ki, ner eze ŋiniṯi ŋuŋun, na loru nden lirlirli. 33 ner ṯa orɔ ŋwu, mer faḏaḏa zi, na buṯruz oɽi ki ŋiɽaŋal-na mbiny, nuŋw eca Yecuŋw: ŋofḏana menyji nəni kunuŋ. er kete yəfaŋi ṯɔɽɔl, kete kɔŋwa, kete keḏi muuza, na kete keḏi iliiya, kaka iiracaŋw gwu ŋere ḏuṯ ŋeḏi zi andazi. 34 andizaŋw ṯaŋwu, iti muŋw zi urezi kworɔ kinna mac, nezi lebleṯ kwuɽbeḏe lu; ner tenye mer enḏi ki lebleṯ-na. 35 na ṯɔgwɽɔ tete andazi ki lebleṯ-na, nuŋw aru ŋwu: Tor kru tinyi tiri, tamɽenyi; niŋnacar ŋunduŋwu. 36 mindaŋ mezi ṯɔgwɽo uɽeci, ner inḏa Yecuŋw kwutuput. ner zi enji ŋu dip, ner zi ere andazi kwizi kwere mac ki ŋwamin ŋwa, ŋedi kwomne kwizar.
Yecu kwuzeye toru teḏi ṯigɽima-na ṯiki
37 ma ŋurpu ŋgwa orɔ, mer dapi kayin la, ner biɽḏi ki tay ŋwuduŋw ŋi ŋwuru. 38 na kwor kwete, kwunani ki duŋw-na, ofna nuŋw eca ŋwu: muallim, nyi kwuturecaŋa lu, icacanyi ṯi toru nana tir tutuput teḏi nyi. 39 eti tigɽim tiki miḏa, eṯuŋw erini kwola, eṯuŋw lakizalu mindaŋ eṯuŋw ye kuḏo kworo, eṯuŋw allazi ŋwumbal nana, mindaŋ nuŋw ere duŋgwece lu weṯ mac, 40 nenyi tureci limaḏgalu eḏi ruci kiṯay, ner uleci abarya, 41 nezi Yecu eŋnici, nuŋw zi eca ŋwu: enna, lizi leḏi kiremŋw, liira ṯəmna-na, nyi kwoŋazi nanazi ṯaca-ṯacaŋ? a lenyi urreda ŋwamin ḏa? ilaṯi tor ri ṯoŋwa. 42 muŋw ri ilizi, na tigɽim tiki ofḏalu timbɽak. na Yecu ermici ṯigɽima ṯiki, nuŋw zəwi toru, nuŋw inḏeḏa ṯernyin. 43 ner liŋɽalu tatap, yilim yi yupa yeḏi Allah.
ŋandizazi Yecu kwokwony ŋeḏi ŋiɽany ŋuŋun ŋinḏi
lakin mer ṯibi ŋiɽaŋal ŋi ŋerrizi Yecu, nuŋw eca limeḏgen ŋwu: 44 kitizar ŋiɽaŋali ŋu yey, eḏizenji ki yəni-na lac; kaka inḏir gwu eḏi boŋwḏi Toru teḏi kwizigwunaŋ ki rii-na reḏi lizi, 45 ner zi ere elŋece ŋu mac, ŋaruŋw ŋi ŋwu, kaka luciner gwu kinna. ner zi ere ecice mac, ner ṯenye gi eḏi ŋi uṯizelu.
ṯilŋiiḏina ṯeḏi ṯejilina ṯeḏi rɔgwɽɔ
46 ner upaḏa lu deŋgen-na, ner aru ŋwu: eya kwiri manuŋ kwumenyji ṯamḏu deŋgeri-na? 47 nezi Yecu elŋece ki rugwor-na reŋen rac, nuŋw mulɔ toru tete, nuŋw kete ki ṯuɽma. 48 nuŋw zi eca ŋwu: muŋw emmi kwere toru kru, yiriny yi yinyi, nyi kwir ṯa kwemmaŋw. muŋw emmi kwere nyuŋwu, eṯuŋw eni kwemma ŋgwa kwuzenyi. kaka muŋw gworɔ kwere kwɔkwɽeny daŋgal-na, kwunderṯa kwuṯamḏu.
49 na yuhanna eŋnici, nuŋw eca ŋwu: muallim, kwizanyi kwete kwukeṯi rigɽima riki kitay, yiriny yi yɔŋwa, nenyi ṯinyini, kaka iti eṯir li romḏi mac. 50 na Yecu eca ŋwu: eṯi ṯinyina mac. ŋgwa kwiti kweṯiŋazi roḏaḏa ṯuwən nana mac, kwunde kwiri kweni kwalu.
lizi ledi zaamraŋw lidirna Yecuŋw muŋw naŋni eḏi ṯaŋi urzaliim
51 ner ṯa orɔ ŋwu, ma lomur ṯimayini leḏi li allazi ŋunduŋwu kilerena, nuŋw elizi urzaliimŋw nda-na duṯuk, 52 nuŋw uzi yafura eḏiŋnaci ŋunduŋwu kereny, ner ele ner enḏi kayin wete weḏi zaamraŋw eḏi gwu əgizi ezir. 53 lakin ner ere emni mac, kaka mu gwu elizi urzaliimŋw nda-na duṯuk. 54 mindaŋ mezi yaguub-ŋa eze, yuhanna gi, ner eca ŋwu: Kweleny, a kwer ellica igəŋi amra eḏoɽa kilerena eḏi zi dunnazi a? 55 nuŋw zi orlaḏa nana, nuŋw zi ermici, nuŋw zi eca ŋwu: ŋende ŋilŋiiḏi ŋazi ŋeḏi ṯigɽim daŋgal-na, eḏi ari, ṯurɔ ŋwu? 56 kaka iti inḏi gwu Tor teḏi kwizigwunaŋ eḏi kiraci lizi ŋimiiḏa lu mac; lakin timila keni eḏi zi kileḏi. ner ele kayin wir ter.
ṯiṯeca rugwori reḏi kla leṯaruŋw: nyiŋa linḏi eḏi kwaḏiḏa Yecuŋw
57 mer ele ki ṯay la, na kwor kwete eca ŋwu: nyi kwɔŋa romalu kezir were nyiḏak. 58 na Yecu eŋnici nuŋw eca ŋwu: luḏlum leṯeḏi rubuni; ndow leṯeḏi ŋwərnya; lakin na Tor teḏi kwizigwunaŋ tende teḏi ezir were weḏi gwu inḏiri, eḏi gwu kete nda la. 59 nuŋw eca kwir ter ŋwu: romanyi. nuŋw eŋnici nuŋw eca ŋwu: Kweleny, eḏi nyi ele, nyi aniḏa ṯernyeriŋw kerreny. 60 na Yecu eca ŋwu: efrinjezi kla layyu er zi ta aniḏa leŋen layyu; na inḏi ŋa keni eḏandindazi ŋiɽaŋali ŋeḏi ŋeleny ŋeḏi Allah. 61 nuŋw eca kwete kwir ter ŋwu: Kweleny, nyi kwɔŋa romi, lakin, eḏi nyi ele kinna duənu deŋgeri enyjandica, enyjeca ŋwu: nanir ma ta pa lu nyidak, nenyi gwu ele. 62 na Yecu eca ŋwu: muŋw kitaḏa kwere eḏagi ŋurun, mindaŋ muŋw orɔ kwuzɔmbɔṯ ta, ŋwu ere ofḏani mac eḏenḏi ki ŋeleny-na ŋeḏi Allah.