Yǝcu mɔŋgwɔ ǝrnɔṯi ṯalaamiiza ṯuuŋwun ṯiŋna.
(Maṯṯa 4:18-22Mɔrgus 1:16-20)1 Laamin lette nǝ Yǝcu rilli bahara kǝni kwǝni Janniisaaraṯ, nǝgwɔ lizi iilatha lɔppɔthɔ naana ethi niŋnaci ŋiɽaŋali ŋǝthi Allah. 2 Nɔŋw ese limɔrkǝbǝ ndǝn nḏɔṯɔma kǝni; liṯayyasi lizi-lɔ kila lǝṯi ɔmɔmmi lɔmi ethi iyi diivǝ naana. 3 Nǝgwɔ Yǝcu ǝnḏinǝ, kwette kwir kwǝthi Sim@aan, nɔŋw uṯicǝlɔ ethi linye ethi rucci nḏɔṯɔma-na kwokwo. E-ta nǝ Yǝcu naanalɔ ki-mɔrkǝb-nǝ mindaŋ nɔŋwɔccǝ lizi @allima. 4 Mɔŋw ṯimmasi kandisa tǝ, nɔŋwɔccǝ Sim@aan-ŋwɔ, “Irǝthisǝ mɔrkǝbǝ-lɔ keeremy ŋaaw-na ŋɔɔlɔna, mindaŋ ɔɽasi diivǝ a ɔmma lɔmi.” 5 Nǝ Sim@aan ǝŋnici nɔŋwɔccǝŋw, “Yaa Sǝyyiḏ, nyiiŋǝ libii ṯurvǝ kulŋǝ-ŋgɔ ṯugwrǝ mindaŋ ninyeere mithǝ kwomne kweere mac, laakin ŋiɽaŋal-ŋi ŋɔɔŋa tǝ, nyii-tǝ-pǝ ɔɽasi ḏiivǝ.” 6 Mǝr ɔɽasi mindaŋ nɔŋw mithǝ lɔmi littǝzir, e-ta nǝ ḏiivǝ naŋni ethi unduni. 7 Ṯaŋw nǝr kǝṯṯici lɔɔrɔ rii-la lɔɽɔmaṯṯir-li linaana ki-mɔrkǝb-nǝ kwir ter ethiila ethisi mǝcci. Mǝr iila nǝr urǝzi lɔmi limɔrkǝbǝ ndǝn deddep, mindaŋ nǝr naŋni ethi ɔndatha iininyu. 8 Mǝsi Sim@aan Bɔṯrɔs ese ŋa ŋimǝ ǝrrini nɔŋw iidi ŋwɔrgwɔ-ŋalɔ ki-ŋwɔɽǝlle-na ŋwɔthi Yǝcu nɔŋwɔccǝŋw, “Tuccǝnyii-nǝ kithaay Kweeleny kaka nɔrɔny-gwɔ kwizi kwette kwigiyathalɔ!” 9 Nɔŋw liŋɽi ŋundu nǝ kila linaanir-li ŋiɽaŋal-ŋi ŋǝthi lɔm luuru limǝrsi mithǝ. 10 Nǝrṯoroŋw tɔk naana-gwɔ Ya@guub-ŋǝ Yuhanna-gi lir nyɔr nyǝthi Zǝbḏi lɔɽɔmaṯṯir Sim@aan-ŋǝli ki-ŋothɽor-nǝ. Nǝ Yǝcu ǝccǝ Sim@aan-ŋwɔ, “Ǝṯi ṯiinya mac; nǝ a kworo min kire-kirem-ŋgwɔ kwizi kwǝṯi mɔmlɔtta lizi.” 11 Nǝr mɔlo limɔrkǝbǝ nǝr-siili nḏɔṯɔma kǝni, nǝr ṯayyi kwomne-lɔ tatap nǝr kwaathitha Yǝcu-ŋw.
Yǝcu mɔŋgwɔ sǝwi kwɔɔrɔ kwir tiilǝŋ.
(Maṯṯa 8:1-4Mɔrgus 1:40-45)12 Laamin lette nǝ Yǝcu naani ki-mǝḏiinǝ-nǝ kwette kwɔnaana-gwɔ kwɔr-na kwette kwuurǝnnǝ ŋiilǝŋǝ naana deddep. Mɔŋweese Yǝcu-ŋwɔ nɔŋw iidi yǝyǝlɔ kwurǝyu-lu nɔŋw tuurǝccǝlɔ tur, nɔŋwɔccǝŋw, “Kweeleny mǝmmini-tǝ, a kwǝthi ŋɔma rac ethi suuɽi nyuŋwɔ.” 13 Nǝ Yǝcu alla ṯii-na nɔŋw mɔmmi mindaŋ nɔŋwɔccǝŋw, “Nyii kwǝmminǝ, sɔɔɽɔ naana.” Nǝ taŋw tɔc nǝ ŋiilǝŋ irṯathalɔ. 14 Nǝ Yǝcu ǝllici waamira etheere andaci kwizi kweere mac, nɔŋwɔccǝŋw, “Nḏi laakin a baaŋaci kaahina rɔgɽɔ rɔɔŋwa, nǝ a inḏǝthǝ kiraama kǝthi ṯusuuɽunnǝ tɔɔŋwa, kaka nǝlli-gwɔ Muusa waamira ethisi ilŋithini lizi ŋǝni shahaaḏa kweeŋen.”
15 Laakin nǝmǝ khabar kǝni Yǝcu karbatha ǝzir naana rerrec. Nǝ ŋwɔdɔŋw ŋwuuru ŋwɔthi lizi lulbǝthǝ ethi niŋnaci, nǝ ethi sǝwinni tok kimǝthi-nǝ keeŋen. 16 Laakin ǝṯɔŋw ruu ǝṯɔŋweele kwuthǝr kwɔtɔpɔt ethi-gwɔ aara kiyiiriny.
Yǝcu mɔŋgwɔ sǝwi kwɔɔrɔ kwir kiborkon.
(Maṯṯa 9:1-8Mɔrgus 2:1-12)17 Laamin lette naaɽi Yǝcu @allima, nǝ Lifirriisiiyyiin lokwo ŋundu-ŋǝ mɔ@allimiin-gi kwǝthi Sherii@a naanalɔ kinaŋw, ŋgwa kwinḏi muḏunǝ naana tatap kwǝthi Jǝliil-ŋwɔ nǝ Yahuuḏiiyyǝ, nǝ Urshaliim tɔk. Nǝ ŋɔma ŋǝthi Kweeleny naani duŋgwun-nǝ ethi-ŋi sǝwi lizi. 18 Nǝ lɔr iila lokwo lappathɔ kwɔɔrɔ kwir kiborkon kwaŋgiraŋ-ŋgi, nǝr ṯǝcci ethi-gi ǝnḏi kiininy ethi kettice Yǝcu-ŋwlɔ ŋwɔɽelle-na. 19 Nǝ kaka nattathi-gwɔ ŋwɔdɔŋw rɔgwoṯ-rɔgwoṯ, nǝreere kaṯṯasi ṯaay mac, ṯǝthi-thi ǝnyji ŋundu-ŋw kiininy. Ŋwɔṯaŋw nǝr-gi dallɔ ki-yiŋna-lɔ, nǝr fer-fer yiŋna-la nǝr-mǝ ɔɽasi kwaŋgiraŋ-ŋgi kelgeny-na kǝthi lizi kiyǝna yǝthi Yǝcu. 20 Mɔŋwseese lǝthi ṯǝmminǝ, nɔŋwɔccǝ kwɔɔrɔ-ŋwɔ, “Kwɔr kwaalɔ ŋikiya ŋɔɔŋa ŋimǝŋǝ fivrinici.” 21 Nǝ ma@allimiin kwǝthi Sherii@a ŋundu-ŋǝ Lifirriisiiyyiin-li aari ibṯǝḏi ethaɔndasi-na nǝraarɔŋw, “Kwɔr-ŋgwɔ kwir ṯaŋ manɔ kwǝllinǝthi Allah naana! Allah wirṯa-pa ṯɔɽɔk wǝṯi fivri ŋikiyaŋi!” 22 Nǝsi Yǝcu ilŋithatha fikirǝ-nǝ kweeŋen bir, mindaŋ nɔŋwsǝccǝŋw, “A lotho manɔ lurtutunǝnǝ ki-rɔgwor-na raalɔ? 23 Aatha kworo kwir heyyin, ethi ǝccǝŋw ‘Ŋikiya ŋɔɔŋa fivrinicii’, alla ethǝccǝŋw, ‘Diiɽǝthilǝ ele’? 24 Nyii kwɔŋǝsi ilŋiṯhini ethaarɔŋw, Tɔr ṯǝthi Kwizigwunǝŋ ṯǝthi sɔlṯa kɔnɔŋw kwurǝyu-lu ethi fivri ŋikiyaŋi.” Ṯaŋw nɔŋwɔccǝ kwɔɔrɔ kwir kiborkon-ŋwɔ, “Nyii kwǝccǝŋǝ-ŋwɔ diiɽu a dimmi kwaŋgiraŋi kwɔɔŋa ageele dɔɔnɔ.”
25 Ŋwɔṯaŋw biḏaan nǝ kwɔr diiɽǝnni tɔc puruṯ kiyǝnǝ yeeŋen tatap, mindaŋ nɔŋw dimmi kwinḏirɔ-ŋgwɔ-la, nɔŋw ele dɔɔnɔ, kwiniyǝ Allah-na. 26 Ṯaŋw nǝr liŋɽalɔ tatap buruc! Nǝsi ŋitheny yee-na beṯṯen mindaŋ nǝr nii Allah-na nǝraarɔŋw, “Ŋimǝ-nyji ese aŋwɔnɔ ŋir ŋilim-ŋilim!”
Yǝcu mɔŋgwɔ ɔrnɔti Laawi-ŋwɔ.
(Maṯṯa 9:9-13Mɔrgus 2:13-17)27 Kwaathan-tǝ mǝ Yǝcu ruu nɔŋweese kwɔɔrɔ kwette kwǝṯi allilla ṯɔlba kwǝni Laawi, kwɔnaanalɔ ki-mǝkṯǝb-nǝ kwuuŋwun. Nǝ Yǝcu ǝccǝŋw, “Kwaathitha-nyii.” 28 Ṯaŋw nǝ Laawi diiɽi nɔŋw duŋgwǝci kwomne tatap nɔŋw kwaathitha ŋunduŋw. 29 E-ta nǝ Laawi kettice Yǝcu-ŋwɔ ŋiirina ŋɔppa ki-dɔɔnɔ kwuuŋwun, nǝ lizi lǝṯi allilla ṯɔlba naani kinaŋw tok littǝzir, nǝ lizi lithaathɔ tɔk, linaanalɔ ŋundu-ŋǝli ethi ethne. 30 Nǝ Lifirriisiiyyiin-ŋǝ mɔ@allimiin-gi kweeŋen kwǝthi Sherii@a, nǝr rivaŋnici ṯalaamiiza ṯuuŋwun nǝrsǝccǝŋw, “Ŋaaŋa lotho lǝṯi ethne nǝ ǝṯi ii lizi-li lǝṯi allilla ṯɔlba, nǝ lizi-li ligii rɔgwori tok?” 31 Nǝsi Yǝcu ǝŋnici nɔŋwsǝccǝŋw, “Lizi lisaaw liti lǝṯi naŋni hakiimǝ mac, laakin nǝroro luumǝ ṯɔɽɔk. 32 Nyiiti kwinḏi ethisi ɔrnɔṯi kila lirllalɔ mac, laakin nǝroro ligii ethi urlǝ rɔgwor-lɔ.”
Ṯɔṯalɔ ṯǝthi arminḏaan.
(Maṯṯa 9:14-17Mɔrgus 2:18-22)33 Nǝ lizi lokwo ǝccǝ Yǝcu-ŋwɔ, “Ṯalaamiiz ṯǝthi Yuhanna ṯǝṯi mithǝ arminḏaani dok-dok, ǝṯir aari kiyiiriny tɔk, nǝ ṯǝthi Lifirriisiiyyiin ǝṯirsi-tǝ ǝrriŋw tok; laakin ṯɔɔŋwa-tǝ, ǝṯir ethne nǝ ǝṯir ii.” 34 Nǝsi Yǝcu ǝŋnici nɔŋwsǝccǝŋw, “A lǝthi ŋɔma ethi mithinni liirinǝ lǝthi ǝzuumǝ arminḏaani mǝsi-tǝ kwɔr kwaagithɔ naanasi kinnǝni-a? 35 Laakin laamin kila-pa linḏi ethiila rac mǝrsi dimmǝthǝ kwɔɔrɔ kithaay kwaagithɔ, e-ta ǝrmǝ mithǝ arminḏaani!”
36 Nǝsi Yǝcu andaci mǝthǝlǝ-ŋgwɔ tok nɔŋwsǝccǝŋw, “Kwiti kweere kwǝṯi direny kirethi kiyaŋ mindaŋ ǝthi-gi kaṯṯɔ livaatha kwɔɔvana naana kwɔɔɽɔn mac. Mɔŋw-sǝrri ŋɔrɔŋw-tǝ, a livaatha liyaŋ kii kirethi kɔɔɽɔn, kaka nǝṯi-gwɔ kɔɔɽɔn ere ammithi livaatha-li liyaŋ mac. 37 Nɔŋweere kweere tɔk mac kwǝṯi balsi kiɽicaŋi kiyaŋ ki-lulgwuŋw-nǝ lɔɔɽɔn. Mɔŋw-sǝrri ŋɔ ta esi kiɽica kiyaŋ uvi, mindaŋ a kiɽica balthalɔ, nǝ a lulgwuŋw kee. 38 Laakin laazim a kiɽica kiyaŋ balni ki-lulgwuŋw-nǝ liyaŋ. 39 Kwiti kweere mac kwǝṯi ii kiɽicaŋi kiɽii mindaŋ ethi naŋni kwɔɽali kwokwony. Kaka naarɔ-ŋgwɔŋw, ‘Kiɽica kiɽii kindǝr-tǝ kisaaw’.”
aza 5
Yecu muŋw ornuṯi limeḏgen luŋwun liŋna
1 na ma lizi ataḏi nana keni eḏi niŋnaci ŋiɽaŋali ŋeḏi Allah, nuŋw rilli ṯujuli kəni teni janiizaraṯ. 2 nuŋw eze lifaluuka nden lirillu kinḏɔṯma kəni, na lor leṯummi lumi ruweḏe lu, lii difa nana. 3 nuŋw enḏi ki faluuka-na kwete, kweḏi zimaan, nuŋw eca ŋwu: ruca ṯi ureyuŋi-na kwɔkwɔ. nuŋw nanalu ki faluuka-na, nuŋw gwu andaci lizi duŋw lu. 4 muŋw ratazi kandiza ta, nuŋw andaci zimaanŋw, nuŋw eca ŋwu: ireḏize kezir wolu-na, oɽazi difa, ezi gwu iiḏa. 5 na zimaan eŋnici, nuŋw eca ŋwu: aḏri, muallim, lerrenyji kulukulu, mindaŋ nenyi beryeŋini ḏuṯ, lakin kaka ur gwu ŋiɽaŋal ŋɔŋa, eḏi nyi ma ta oɽazi difa. 6 mindaŋ mer zi ṯa erri ŋwu, ner iiḏa lumi litezir, nezi difa naŋni eḏi zi kiyaḏa. 7 ner kekiṯizi loru rii la, leṯir li oɽmaṯi ŋɔḏɽor-na, linani ki faluuka-na kwuḏaḏu, eḏila eḏi zi meci. ner ila ner urezi lifaluuka nden tɔk, mindaŋ ner naŋni eḏoɽaḏa iininyu. 8 mezi zimaan buṯruz eze, nuŋw iideḏa Yecuŋw ŋwuɽele-na, nuŋw eca ŋwu: duŋgwecenyi pa, Kweleny, kaka ur nyi gwu kwiki ṯugwori. 9 kaka ṯibir gwu lizi li tatap ŋiɽaŋal ŋi ŋeḏi lum litezir liiḏer zi. 10 na yaguub-ŋa ṯibi tɔk, yuhanna gi, lir nyor nyeḏi zabḏi, leṯoɽmaṯi zimaan ŋali ŋɔḏɽor-na. na Yecu andaci zimaanŋw, nuŋw eca ŋwu: eti ṯinya mac; a kwele kirem eḏ ummimi lizi. 11 mer aɽazi lifaluuka ezir kəni, ner ṯazi kwɔmne lu tatap ner kwaḏiḏa.
ṯizeya ṯeḏi kwor kwir tilaŋ
12 ner ṯa orɔ ŋwu, muŋw nani ki balaḏ-na kwete, na kwor ila kwir tilaŋ. muŋw eze Yecunw nuŋw iidicelu yey yelu, nuŋw andaci nuŋw eca ŋwu: aḏri, Kweleny; memni ta, a kweḏi ŋuma eḏi zuɽi nyuŋwu nana. 13 na Yecu uzi ṯii, nuŋw mummi, nuŋw eca ŋwu: nyi kwemne, ziiɽi nana. na ŋilaŋ irṯaḏa lu tuc, nuŋw zey. 14 na Yecu oraci nuŋw eca ŋwu: eṯandica ŋiɽaŋali ŋere mac; lakin inḏi, a baŋaci kiziiza aŋna wɔŋwa ta, inḏeḏa kwɔmne kaka andiza gwu muuza, eḏ ilŋiiḏini lizi ŋeḏi ṯizuɽu-na. 15 lakin na ŋiɽaŋal ŋeni ŋundu iṯiḏi la rerec, ner lulubeḏu duŋw luru luru eḏi neŋne, eḏi zeyini tɔk leḏi kimeti. 16 lakin nuŋw ilaḏa wuḏer yi-na nuŋw gwu ari ki yiriny.
ṯizeya ṯeḏi kwor kwir kubɔrkɔn
17 ner ṯa orɔ ŋwu, ki lamin lete ledi ŋwamin ŋwa, muŋw zi ilŋiiḏini, na lifarzi-ŋa nani tɔk, lor li leṯizilŋiiḏini kuruu-na, linḏi ki yayin tatap yeḏi jaliilŋw, yeḏi yahuḏiiyaŋw, na ledi urzaliimŋw tɔk. na ŋuma ŋeḏi Kweleny nani ŋunduŋwu-na eḏi ŋi zəwi lizi. 18 na lor afa kworu kwete kwir kubɔrkɔn, ŋwumbany ŋi, ner naŋni ezir weḏi yi enḏi eḏi ketizelu. 19 mer ulezi ezir weḏi yi enḏi, kaka lulubeḏir gwu luru ta, ner dallu kuɽbala, ner ulici ṯu, ner ṯi oɽazi ŋwumbany ŋi keligeny-na, kezir wunani gwu Yecu. 20 muŋw zi izaci ṯəmna ṯeŋen, nuŋw eca ŋwu: kwor kwalu, ŋikya ŋɔŋa ŋimɔŋa fifrinici.
21 na lor-ŋa leṯizilŋiiḏini kuruu-na, lifarzi li, uŋwunḏizi-na, ner andazi ner aru ŋwu: eya kwiri manuŋ ŋgwu? kwiti kwumellineḏa Allah nana manya? eya kwiri kweḏi ŋuma eḏi fifri ŋikyaŋi illa Allah wutuput ṯuɽuk? 22 mezi Yecu ilŋiiḏaḏi-na lortutinena kaka ṯaŋwu, nuŋw zi eŋnici nuŋw zi eca ŋwu: a lɔḏɔ manuŋ lortutinena ŋiɽaŋal ŋi ŋu? 23 ŋinder ŋendu ŋiri eyin? eḏaru ŋwu: ŋikya ŋɔŋa ŋimɔŋa fifrinici, ya eḏaru ŋwu: diɽi, irere lu? 24 lakin eḏi zi elŋece eḏaru ŋwa, Tor teḏi kwizigwunaŋ teḏi zulṯa eḏi fifri ŋikyaŋi ki ṯurmun-na nuŋw eca kwubɔrkɔni ŋwu: nyi kweca ŋa ŋwa, diɽi, a dimi ŋwumbanyu, ele duənu. 25 nuŋw diɽeni fitak, nuŋw dimi ŋwumbanyu, nuŋw ŋi ele duənu duŋgwun, nuŋw gwu nii Allah-na. 26 ner ṯibi tatap, ner nii Allah-na; nezi ŋiḏeny ye-na beṯen, ner aru ŋwu: ŋiti ŋimenyji inḏa ŋir ŋu aŋwun were mac.
Yecu muŋw ornuṯi mattaŋw
27 ma niɽaŋal ŋu rataḏi na Yecu ru nuŋw kaṯazi kworu kwete kweni laawi, kwunderṯa kweni matta tɔk kweṯallila ṯulba, kwunanalu ki maktab-na kweḏi ṯulba, nuŋw eca ŋwu: romanyi. 28 nuŋw diɽeni nuŋw ṯay kwɔmne lu tatap, nuŋw romi. 29 na laawi ketize ŋirina ŋete ŋupa duənu duŋgwun. ner nani litezir leṯallila ṯulba, na liḏaḏu tɔk, ner li oɽmaṯi, keḏneya la. 30 na lor leṯizilŋiiḏini kuruu-na lifarzi li ermiḏeḏa limeḏgen leḏi Yecu-ŋa nana, ner zi eca ŋwu: a lɔḏɔ liiḏina lizi li leṯallila ṯulba, lizi li leni liki rugwori tɔk? 31 nezi Yecu eŋnici, nuŋw zi eca ŋwu: lizaw liti leṯinaŋni hakiima mac; na kla luma, eṯir orɔ leṯinaŋni. 32 nyi kwiti kwumila mac eḏi zi ornuṯi leni lizaw, ner orɔ liki rugwori lilaḏi nyi gwu, eḏorlaci ŋikyaŋi ŋwudɔŋw.
ŋiɽaŋal ŋeḏi kuruu eḏala eḏneya rii
33 ner eca Yecuŋw ŋwu: limeḏgen leḏi yuhanna-ŋa leṯi mida kuruu eḏala eḏneya rii, eṯir ariri ki yiriny tɔk; ner zi erri ŋwu tɔk lir limeḏgen leḏi lifarzi-ŋa, lakin lalu, eṯir eṯne, eṯir yii. 34 nezi Yecu eca ŋwu: lirin lalu leṯi manja miḏa kuruu eḏala eḏneya rii mezi kwor kwagiḏi nanazi a? 35 ŋwamin ŋwindi eḏenḏa mer zi ŋi dimeḏa kworu kwagiḏi, er orɔ ŋwe ri ŋi derne eḏneya. 36 nuŋw zi andaci tiŋerɔŋwa tete tɔk, nuŋw zi eca ŋwu: kwende kwere kweṯi dreny kireti kiaŋ eḏi kete kireṯi kuɽun lifaḏa. eŋguŋw zi erri ṯaŋwu, eŋguŋw kii kireti kiaŋ, mindaŋ a kireṯ kiaŋ ere ami nanuŋw kireṯ gi kuɽun tɔk mac. 37 na kwende kwere kweṯi balizi nabiṯa kwiaŋ ki lulugwuŋw-na luɽun; eŋguŋw erri ŋwu ta, eŋgi nabiṯa kwiaŋ ufi lulugwuŋwa, ŋwu balḏalu wac, a lulugwuŋw ke tɔk. 38 eṯir ma balizi nabiṯa kwiaŋ ki lulugwuŋw-na liaŋ. 39 ma kwizi kwere ii nabiṯa kwunanni, ŋwu ere naŋni eḏ iiyeni kwiaŋ mac, kaka aruŋw gwu, ŋgwa kwunanni kwizawi.