Yǝcu mǝgwɔ Ibliis mɔmmi.
(Maṯṯa 4:1-11Mɔrgus 1:12-13)1 Nǝ Yǝcu aaɽa min Urḏɔn kwurǝnnǝnǝ deddep Ṯigɽim-thi Ṯirllinǝlɔ tǝr, mindaŋ nǝ Ṯigɽim mɔlo nɔŋw iili ki-sahraa-na, 2 kǝzir wɔmǝ-gwɔ Ibliis mɔmmi ŋwaamin ruɽi-riɽǝn. Nǝ ki-ŋwaamin-la ŋwa tatap nɔŋweere yee kwomne kweere mac, mindaŋ mǝr ernene tǝ, nǝ yaaŋwɔ yee Yǝcu-ŋwɔ. 3 Nǝ Ibliis ǝccǝŋw, “Kaka nɔrŋa-gwɔ Tɔr tǝthi Allah tǝ, ǝllicǝ-ṯi kaali ŋgɔ waamira ethi rothonne rǝghiiv.” 4 Laakin nǝ Yǝcu ǝŋnici nɔŋwɔccǝŋw, “Ŋɔlɔɔthɔna ŋaarɔŋw, ‘Kwizigwunǝŋ kwiti kwǝṯi miithi rǝghiiv-ri dak mac’.” 5 E-ta nǝ Ibliis mɔlo nɔŋw-ŋgi allɔ kaayin-lǝ wɔɔlala tottoc, nǝ kinaṯa kinaŋw-lɔ fita-fittak, nɔŋw baaŋaci ŋeelenyi tatap ŋǝthi ṯurmun. 6 E-ta nǝ Ibliis ǝccǝŋw, “Nyii kwɔŋa inḏǝthǝ sɔlṯa ŋgwɔ tatap nǝ ŋinithi tatap tok, ŋinḏǝthǝr-nyji tatap kirii-nɔ riinyi, nǝ ninyǝthi ŋɔma ethisi inḏǝthǝ kwette nyithak kwɔnaŋna-nyii. 7 Mǝnyii kwoccelɔ a kwomne-ŋgwɔ tatap oro kwɔɔŋa.”
8 Nǝ Yǝcu ǝŋnici nɔŋwɔccǝŋw, “Ŋɔlɔɔthɔna-pa ŋaarɔŋw, ‘Ǝṯi kwocce Kweeleny-lɔ kwir Allah wɔɔŋa, nǝ ǝṯi ǝkkici ŋunduŋw ŋothɽor dak!’ ” 9 E-ta nǝ Ibliis mɔlo nɔŋw ŋgeele Urshaliim, nɔŋw allasi ki-ṯɔɔra-la kider tǝthi Heikal, nɔŋwɔccǝŋw, “Moro Tɔr tǝthi Allah, kǝṯṯi-ṯi rogɽo rɔɔŋwa kwurǝyu-lu. 10 Kaka nɔlɔɔṯhɔnar-gwɔ ŋaarɔŋw, ‘Allah wɔndica limeleka ethi aŋraci ŋaaŋwɔ’. 11 Nɔŋwaarɔŋw tok, ‘Ǝrŋǝ mithǝthǝ-lǝ rii-ri reeŋen, mindaŋ ǝŋǝ kall keere ere ove laara mac’.” 12 Laakin nǝ Yǝcu ǝŋnici nɔŋwɔccǝŋw, “Kiṯaab Kirllinǝlɔ ter kaarɔŋwa, ‘Ǝṯeere mɔmmi Kweelenyi kwir Allah wɔɔŋa mac!’ ” 13 Na mǝ Ibliis ṯimmaci Yǝcu-ŋw ṯɔmɔmma ṯirna ter-ter-tǝ, nɔŋw aalitha rii kinnǝni kwokwo mindaŋ ethi kaṯṯisa ṯaay kwokwony ṯǝthi-thi aaɽitha naana.
Yǝcu mɔŋgwɔ aari ibṯǝḏi ŋothɽor ŋuuŋun Jǝliil-nǝ.
(Maṯṯa 4:12-17Mɔrgus 1:14-15)14 E-ta nǝ Yǝcu aaɽitha Jǝliil-nǝ nǝ ŋɔma ŋǝthi Ṯigɽim naani duŋgwun-nǝ. Nǝ khabar kǝni ŋundu faathitha ǝzir naana tatap wǝthi bǝlǝḏ ŋgwa. 15 Nǝ ǝṯɔŋw aari @allima ki-limajma@-na leeŋen, mindaŋ nǝr nii ŋunduŋw-nǝ tatap.
Yǝcu mǝr-gwɔ dirnathalɔ Naasira-na.
(Maṯṯa 13:53-58Mɔrgus 6:1-6)16 Mǝ Yǝcu ele Naasira, kǝzir wurǝbinǝ-ŋgwɔ, nǝ kaka nɔrɔ-gwɔ ǝthi wuuŋwun, nɔŋweele ki-laamin lǝni Sǝbiṯ ki-majma@-na. Mindaŋ nɔŋw diiɽǝlǝ ethi ɔrti. 17 E-ta nǝr inḏǝthǝ kiṯaabi kǝthi kwiɽii kwǝni Isha@ya. Mɔŋw kiṯṯi nɔŋw kaṯṯasi ǝzir wɔlɔɔthɔnɔ waarɔŋw.
18 “Ṯigɽim ṯǝthi Kweeleny ṯinaana duŋgwiny-lǝ, kaka
nɔɔrathɔ-ŋgwɔ nyuŋwɔ
ethisi ǝccǝ bashirǝ kila lir lɔwaay Inyjiilǝ.
Nɔŋw ɔɔsɔ nyuŋwɔ ethisi kǝdu kila linaana ki-ŋɔwaay-na,
nǝ Kila lir lunḏduŋw ǝrisi ǝvrici yǝy-nǝ, nǝ ethisi kǝdu kila
lǝṯirsi ǝwɽi yǝy-lɔ,
19 nɔŋw ɔɔsa nyuŋwɔ ethi aari a@lina nɔŋwaarɔŋw, kithlǝ
kimǝ iila kinḏi-gi Kweeleny ethi kilǝthi lizi luuŋwun.”
20 Mǝ Yǝcu ɽiyǝzi kiṯaabi dɔŋw, nɔŋwaɽici khaḏaama kǝthi majma@, mindaŋ nɔŋw naanalɔ. Nǝ yǝy yǝthi lizi tatap linaana ki-majma@-na aaɽitha naana ṯiɽil, nǝr ecce ŋoṯ-ŋoṯ. 21 Mindaŋ nɔŋwaari ibṯǝḏi ethisi ǝccǝŋw, “Ŋiɽaŋal ŋɔ ŋiniŋna-ŋǝsi yǝni-yi yaalɔ ŋurtunǝ ŋǝthi Kiṯaab Kirllinǝlɔ ter ŋɔmǝ rattathi aŋwɔnɔ.” 22 Nǝ ŋwɔdɔŋw tatap andasi ŋiɽaŋali ŋisaaw ŋǝni ŋundu, nǝr liŋɽi ŋiɽaŋal-ŋi ŋisaaw ŋandisa-ŋwsi, nǝraarɔŋw, “Kwiti kwindǝr-ŋgwɔ mac kwir tɔr tǝthi Yuusufa?” 23 Nɔŋwsǝccǝŋw, “Nyii kwilŋithi rac rerrem ethaarɔŋw, ŋaaŋa lǝnyii andaci ŋiɽaŋali ŋǝthi mǝthǝl-ŋgwa kwǝniŋw, ‘Yaa ḏɔkṯɔɔr sǝwǝ-mbǝ rogɽo rɔɔŋwa kerreny! Kwomne-ŋgwa kwuniŋnany-gi kwǝṯi ǝrri Kafranaahuum, ǝrrǝ-mbǝ tok kɔnɔŋw ki-mǝḏiinǝ nǝ kwɔɔŋa wɔɽe-wɔɽeny’.” 24 Nǝsi Yǝcu kiɽǝcci ŋiɽaŋali nɔŋwsǝccǝŋw, “Nyii kwǝccǝ-ŋǝsi-mǝ ŋwɔ rerrem, kwiɽii kwiti kweere mac kwǝṯir iiɽinǝ ki-bǝlǝḏ-nǝ kwuuŋwun. 25 Niŋnacar-nyii-ṯi; ŋir rerrem ethaarɔŋw leeṯhel lir laaw linaani littǝzir ki Israa-iil-na, ki-ŋwaamin-la ŋwɔthi Iliiyyǝ, kinaŋw mǝ kaaw rilli yithlǝyu ṯoɽol nǝ yǝwǝ nyirlil, mindaŋ nǝ yaaŋwɔ yuu tottor karbatha bǝlǝthǝ naana tatap. 26 Laakin nǝreere ɔɔsi Iliiyyǝ-ŋwɔ naana-gwɔ kwizi kweere mac ki Israa-iil-na, illi naana-gwɔ kweethel kwir kwaaw ḏak kwɔnaana Sorfa, ŋgwa kwɔnaana kǝzir wǝthi Sayḏa-ŋw. 27 Naaɽi nǝ nyiilǝŋ naani nyittǝzir ki-lizi-nǝ lǝthi Israa-iil ki-ŋwaamin-la ŋwɔthi kwiɽii kwǝni Aliisha@; laakin nɔŋweere naani teere timǝ suuɽunni ḏuṯ, illi Nɔ@maan kwir Suurii.”
28 Mǝ lizi tatap linaana ki-majma@-na neŋne ŋiɽaŋali ŋɔ, nǝr urǝzi rɔŋwori deddep. 29 Nǝr diiɽi, nǝr mɔlo Yǝcu-ŋw nǝr-gi ruu ki-mǝḏiinǝ-nǝ, nǝr allasi ki-lundǝr-lǝ kider laccar-gwɔ mǝḏiinǝ-lǝ kweeŋen. Nǝr-gwɔ naŋni ethi ṯiŋatha ki-ṯirllilɔŋw. 30 Laakin nɔŋw-tǝ ruuthǝ kelŋeny-gina kǝthi lɔdɔŋw nɔŋw iidǝthǝ ki-thaay ṯuuŋwun.
Kwɔr kwǝthi ṯigɽimǝ-nǝ ṯigii.
(Mɔrgus 1:21-28)31 E-ta nǝ Yǝcu dappa nɔŋwaaɽitha Kafranaahuum kwir mǝḏiinǝ kwɔnaana Jǝliil, mindaŋ nɔŋwɔccǝ lizi @allima ki-laamin-la lǝni Sǝbiṯ. 32 Nǝr liŋɽi tatap ṯa@liim-thi ṯuuŋwun, kaka nandisa-ŋgwɔ ŋɔsɔlṯa-ŋi. 33 Nǝ kwɔr naani kwette ki-majma@-na kwǝthi ṯigɽimǝ-nǝ ṯigii ṯǝthi Shiiṯaan. Nɔŋw ɔvɔna ŋɔmmaŋi, nɔŋwaarɔŋw, 34 “Mama ŋa kwǝni Yǝcu kwǝthi Naasira-ŋw, a kwǝthi karatha kǝndu dǝŋgǝr-nǝ? A kwinḏi kɔnɔŋw ethi kiirasi nyuŋwsilɔ-a? Nyii kwilŋithiŋǝ rac ŋa kwɔrɔ kwǝndu. Ŋa kwir Kwirllinǝlɔ ter kwǝthi Allah!” 35 Nǝ Yǝcu ǝllici waamira nɔŋwɔccǝŋw, “Naani pǝt, a ruuthǝ kithaay duŋgwun-nǝ!” Nǝ Shiiṯaan kaṯṯɔ ŋunduŋw kelŋeny-na keeŋen, mindaŋ nɔŋw ruuthǝ kithaay duŋgwun-nǝ kwiṯi kwɔmǝ-ŋwɔ rǝri naana mac. 36 Nǝ lizi liŋɽi tatap, mindaŋ nǝr andasi-na nǝraarɔŋw, “Ŋiɽaŋal ŋɔ ŋir ṯaŋ? Ǝṯi kwɔr-ŋgwɔ ǝllici rigɽimǝ ruruuŋwɔ waamira sɔlṯa-gi, nǝ ŋɔma-ŋi tok mindarŋ ǝṯir ruuthǝ kithaay bǝy-bǝyin!” 37 Nǝ ŋiɽaŋal ŋǝni ŋundu faathitha ǝzir naana tatap nǝ wirikanna-lɔ ki-bǝlǝḏ ŋgwa.
Yǝcu mɔŋgwǝ sǝwi lizi littǝzir.
(Maṯṯa 8:14-17Mɔrgus 1:29-34)38 Nǝ Yǝcu ɔrlacci majma@ ŋwɔḏoŋw nɔŋweele ki-dɔɔnɔ kwǝthi Sim@aan. Nǝ kwunǝyin kwǝthi Sim@aan-ŋǝ kwir kwaaw naani kinaŋw kwimthi hummǝ tig-tig. Nǝr tuurǝcci Yǝcu-ŋw-lɔ ŋunduŋw-ŋgi. 39 Nɔŋweele nɔŋw rilli ki-ṯuɽumǝ, nɔŋw ǝllici hummǝ waamira ethi ruu kithaay. Ṯaŋw nɔŋw ruu kithaay tɔc. Mindaŋ nɔŋw diiɽǝnni tɔc, nɔŋwsi ogmicelɔ. 40 Mǝ aaŋwɔn ɔɽi tǝ, nǝ lizi kila tatap lǝthi limǝṯhgen luumǝ kimǝthi kirna ter-ter, nǝrsi ǝvicǝ Yǝcu-ŋwɔ; mindaŋ nɔŋw-si kette riila tatap leere-leere nɔŋwsi sǝwi. 41 Nǝ shayaaṯiin ruuthǝ ki-lizi-nǝ littǝzir kwaarɔ kwɔɔla nǝraarɔŋw, “Ŋa kwir Tɔr ṯǝthi Allah!” Nǝsi Yǝcu ǝrmici, mindaŋ nɔŋwseere ǝvrinyji ethi andasi mac, kaka mǝr-gwɔ elŋe ethaarɔŋw kwir Kwɔrɔstɔ.
Yǝcu mɔŋgwaari bǝshirǝ ki-limajma@-na.
(Mɔrgus 1:35-39)42 Mǝ kaaŋwɔn-na oro tǝ nǝ Yǝcu rucci mǝḏiinǝ-nǝ nɔŋweele kǝzir witi wǝthi lizi-nǝ mac, mindaŋ nǝ lizi aari ibṯǝḏi ethi naŋni ŋunduŋw-lɔ, mindaŋ mǝr kaṯṯasi tǝ, nǝr ṯǝcci ethi ṯiinyini ŋunduŋw ethiseere ṯayyalɔ mac. 43 Laakin nɔŋwsǝccǝŋw, “Laazim nyaari bǝshirǝ ŋiɽaŋali ŋisaaw ŋǝthi Ŋeeleny ŋǝthi Allah ki-muḏun-nǝ kwɔthaathɔ tok, kaka nɔrɔr-gwɔ ṯǝ ŋɔ ŋɔɔsasany-gwɔ Allah ethisi ǝrri.” 44 Ṯaŋw nɔŋwaari bǝshirǝ ki-limajma@-na lǝthi bǝlǝḏ tatap.
aza 4
Yecu ma gwu ibliiz mummi
1 na Yecu aɽiḏa urdun, kwurene Ṯigɽim-na ṯirlinelu ter, na Ṯigɽim iili kwuḏer-na. 2 nuŋw gwu nana kaka ŋwamin ruɽi-riɽen ŋwumɔ ŋi ibliiz mummi, iti iiḏuŋw gwu kwomne kwere mac ki ŋwamin la ŋwa, mer rataḏi, na yaŋwu ye. 3 na ibliiz eca ŋwu: ma orɔ Tor teḏi Allah, andicazi kali ŋgu eḏi roḏine eḏne. 4 na Yecu eŋnici nuŋw eca ŋwu: ŋuluḏina, ŋaruŋw,
lizigwunaŋ liti leṯi miiḏi eḏne yi ṯuɽuk mac.
5 na ibliiz mulɔ nuŋw allazi kayin la nuŋw baŋaci ŋelenyi der der ŋeḏi ṯurmɩm tatap, ŋiniṯ ŋi-na ŋeŋen. 6 nuŋw eca ŋwu: ŋe ŋa zi inḏeḏa tatap, ŋuma ŋi-na, ŋiniṯ ŋi; kaka mer nyji gwu inḏeḏa tatap. menyji ta naŋni eḏi iṯiḏi, nyji ta iṯiḏi. 7 menyi ta kwoce lu, er orɔ ŋɔŋa tatap. 8 na Yecu eŋnici nuŋw eca ŋwu: ŋuluḏina ŋaruŋw:
eti kwoce Kwelenyi lu kwɔŋa kweni Allah,
na eṯəkizi ŋunduŋwu ŋɔḏɽor ṯuɽuk.
9 nuŋw mulḏa urzaliim, nuŋw allazi ki ṯora la ṯeḏi heykal, nuŋw eca ŋwu: ma orɔ Tor teḏi Allah, iidi ṯi, 10 kaka luḏinar gwu, ŋaruŋw:
wɔŋa ṯiŋaca limaleyka luŋwun er ŋa aŋraci,
11 na:
le ŋa miḏeḏe la rii ri,
mindaŋ a ŋa kal kere ere ofe lara mac.
12 na Yecu eŋnici nuŋw eca ŋwu: ŋaruŋw, eṯere mummi
Kwelenyi kwɔŋwa kweni Allah mac.
13 ma ibliiz ratazi ṯumɔmma tatap, nuŋw rucina kinna kwɔkwɔ.
Yecu muŋw nani nazra
14 na Yecu aɽiḏa jaliil ŋuma ŋi-na ŋeḏi Ṯigɽim ṯirlinelu ter, ner iṯiḏi ŋiɽaŋali ŋeni ŋundu kezir wirkana lu tatap. 15 eṯuŋw zi ilŋiiḏini ki limajma-na leŋen, ner nii ŋunduŋwu-na tatap.
16 nuŋw upaḏi nazra, kezir wumɔŋw gwu peŋe. ma lamin orɔ leni zabiṯ, lirlinelu ter, nuŋw ele ki majma-na kaka etuŋw gwu erri, nuŋw diɽela eḏi zi orutizi. 17 ner inḏeḏa kiṯami keḏi ŋiɽaŋali-na ŋeḏi kwiɽi kweni izaya, nuŋw kiṯi kiṯami nuŋw kaṯazi ezir wuluḏina ŋiɽaŋali ŋeni ŋwu:
18 Ṯigɽim ṯeḏi Kweleny tinani duŋgwinyi,
kaka oɽaḏaŋw gwu nyuŋwu-na eḏ ireci luwaya ŋiɽaŋali ŋizaw;
nuŋw uza nyuŋwu eḏi zi ireci linanni ki ŋuway-na, eḏi zi eca ŋwu: a lellini;
eḏeca lunduŋa ŋwu: a lafri yey-na;
eḏi zi kedu kla leṯir zi owɽi yey;
19 eḏi zi ireci ŋeḏi kiḏla kizaw keḏi Kweleny.
20 nuŋw aɽazi kiṯami duŋw, nuŋw inḏeḏa kworu kweḏi majma, nuŋw nanalu eḏi zi andazi. na yey yeḏi kla tatap linani ki majma-na unḏaḏi ŋunduŋwu nana kwrɔp. 21 nuŋw zi naŋni eḏi zi andaci, nuŋw zi eca ŋwu: ŋiɽaŋal ŋu ŋuluḏine ŋimɔ ŋazi rataci aŋwunu, ŋimezi neŋne. 22 ner ŋi unḏi ki ŋeni ŋundu tatap ŋeni ŋami ŋami, ner liŋɽi ŋiɽaŋal ŋi ŋir ŋimɽi, ŋuruḏu ki ṯunyu-na ṯuŋwun, ner aru ŋwu: kwunde kwiri fa ta ŋgwu kwir tor teḏi yuzif a? 23 nuŋw zi eca ŋwu: a le nyi keni andaci ŋiɽaŋali ŋu, er nyi eca, kwor kwir hakiim, zeyine! errizenyji deŋgeri-na, kezir wɔŋwa, tatap ŋir kaka ŋiniŋnanyji, ŋarir ŋi ŋwu, ŋeṯuŋw zi erri kafranahum. 24 nuŋw zi eca ŋwu, nyi kwecaŋazi ma ŋwa rerem: lizi lende leṯ iɽi kwiɽyaŋi-na muŋw orɔ kwete kweŋen. 25 lakin, ŋiri rerem, leḏel lir law linani luru ki izrayiil-na, ki ŋwomur ŋwunani ŋi illiiya, na lere kiraḏi yiḏleyu ṯɔɽɔl na yowa nyirlil, mindaŋ ma yaŋwu enḏi yu tɔtɔr kezir wa tatap; 26 na Allah ere ṯiŋaḏa iliiyaŋw nani gwu kwere mac deŋgen-na, lakin nuŋw ṯiŋaḏa nani gwu kwaw kwete ṯuɽuk, kwir kweḏel, kayin wete kuṯu weni zarfa, weḏi zayḏaŋw. 27 na nyilaŋ nani nyuru kunuŋ ki izrayiil-na, ki lomur linani li kwiḏ kweni iliiza, nuŋw ere tere deŋgen-na mac timɔzuɽi, illa nuamaan ṯuɽuk kweḏi ezir kuṯu, weni zuriiya. 28 mer zi neŋne ŋu, na kla tatap linani ki majma-na, ner urezi rugwori dedep. 29 ner diɽela, ner ru Yecuŋw kinaŋw, ner mulɔ, ner gi allu kayin la wunanu gwu balaḏ kweŋen, wir ṯirlil, kaka naŋnar gwu eḏi ṯiŋaḏa. 30 lakin, nuŋw li ru-na tatap, nuŋw ele kitay papac.
ṯizeya ṯeḏi kwor kweḏi ṯigɽima-na ṯiki
31 nuŋw oɽaḏa lu ki meḏiina-na kwete kweḏi jaliilŋw, kweni kafranahum, na ki lamin leni zabit, lirlinelu ter, nuŋw zi gwu ilŋiiḏini; 32 ner liŋɽi ŋiɽaŋal ŋi ŋuŋun, kaka andicaŋw zi gwu ŋiɽya ŋi. 33 na kwor nani kwete ki majma-na, kweḏi ṯigɽima-na ṯiki, nuŋw ofna ŋuma ŋi, nuŋw eca ŋwu: 34 ma! nyiŋa le ŋa eca ḏa, kweni Yecu kweḏi nazraŋw? a kwumila eḏi kiraza nyuŋwuzi lu, a? nyi kwilŋiicaŋa pa rac; a kwiri kwete kwirlinelu ter kweḏi Allah. 35 na Yecu kirinyaḏa ŋunduŋwu, nuŋw eca ŋwu: nani pet, ruḏe kitay. na tigɽim tiki kalu kworu keligeny-na, nuŋw ruḏe duŋgwun-na, nuŋw zi ere errizi kworu ŋere ŋiki mac. 36 ner ṯibi tatap ner uŋwuniḏizi-na, ner aru ŋwu: ŋiɽaŋal ŋu ŋir ṯaŋ? eṯuŋw gwu andaci rigɽima riki ŋiɽya ŋi, ŋuma ŋi tɔk, eḏi ru, eṯir ṯa ru. 37 ner iṯiḏi ŋiɽaŋali la ŋeni ŋundu kezir tatap wirkana lu.
Yecu kwuzeye kwineyin kweḏi zimaan-ŋa na liḏaḏu luru
38 nuŋw diɽi nuŋw ru ki majma-na, nuŋw enḏi duənu kweḏi zimaan-ŋa; na kwineyin kweḏi zimaan-ŋa umi beṯen, kwiiḏinda. ner ŋi tureci la ŋu. 39 na Yecu rillaza lu, nuŋw ermici kimeṯi; na kimeṯ ala ŋunduŋwu rii; nuŋw diɽeni tuc, nuŋw zi ogwumicelu.
40 ma aŋwun naŋni eḏoɽi, na kla tatap leḏi lizi lere luma, kimeṯi kir ter ter, ner zi muloca ŋunduŋwu, nuŋw zi kekite rii nana lere lere, nuŋw zi kikileḏi tatap. 41 na rigɽim riki tɔk ruḏa ki lizi-na luru; eṯir ari kwola ner eca ŋwu: a kwiri Tor teḏi Allah. lakin, nuŋw zi ermici nuŋw zi ṯinyini eḏandazi, kaka mer gwu elŋece ŋunduŋwu, eḏari: kwiri Kwruztu.
42 ma ezir afralu nuŋw diɽi nuŋw ele kezir wir wuḏer-na. na lizi naŋni, ner ila nanuŋw gwu, ner naŋni eḏi ṯinyini eḏi zi ere ṯaza lu mac, 43 lakin nuŋw zi eca ŋwu: nyi gwu ta pa ele eḏi zi andindaci liḏaḏu ki yayin yir ter tɔk ŋeni ŋizaw, ŋeḏi ŋeleny ŋeḏi Allah, kaka uzarnyi gwu. 44 ŋwu ṯa eṯuŋw zi andindaci ki limajma-na leḏi yahuḏiiyaŋw.