Yǝcu mɔŋgwɔ diiɽǝ ki-ŋiɽany-na.
(Maṯṯa 28:1-10Mɔrgus 16:1-8Yuhanna 20:1-10)1 Mǝ ŋɔrpana oro tuttuk kwǝthi laamin lǝni Lahaḏ, nǝ laaw ele ki-thimaamɔ-la lappinna kwɔthɽɔla kwɔlagizar. 2 Mindaŋ nǝr kaṯṯasi kiɽibini kimǝ ṯǝrṯiɽinni kithaay ǝgwur kworo wǝthi ṯimaamɔ. 3 Mindaŋ nǝr ǝnḏi, laakin nǝreere kaṯṯisa aŋna mac. 4 Nǝr rilli limǝ urǝŋni wurǝŋ ŋiɽaŋal-ŋi ŋɔ. Nǝ biḏaan nǝsi lɔr ndǝn rillacalɔ tɔc liginna yirethi yifiithɔ per-per. 5 Mindaŋ nǝr urǝnni ŋithenya-na deddep, nǝr irrasi ŋwɔɽa-lɔ, nǝsi lɔr kila ǝccǝŋw, “Kwotho kwɔnaŋna-ŋalɔ ŋgwa kwɔmiithɔ ki-ŋiɽany-na? 6 Kwiti kinɔŋw mac; kwɔmǝ diiɽi. Kithaayinarsi-mba ŋa ŋandica-ŋwsi ŋaaŋwɔsi a-naanɔ-ŋw ta kinnǝni Jǝliil; 7 naarɔ-ŋgwɔŋw, ‘Laazim ǝri inḏǝthǝ Tɔɔrɔ tǝthi Kwizigwunǝŋ lizi ligii, ǝri ṯigrǝthǝ ki-ŋwuuɽi-lǝ, mindaŋ mǝ ŋwaamin ṯoɽol ere tǝ, ŋwɔ diiɽǝ ki-ŋiɽany-na’.”
8 E-ta nǝ laaw kithaayini ŋiɽaŋali ŋuuŋun. 9 Mǝr aaɽa ki-thimaamɔ-la tǝ, nǝr andaci ṯalaamiza ṯir wrii-kwette, nǝ lithaathɔ tatap tok ŋiɽaŋali ŋɔ tatap. 10 Nǝ laaw oro lǝni mǝryǝm Majḏaliiyyǝ-ŋǝ Hanna-gi nǝ mǝryǝm kwir lǝnyin kwǝthi ya@guub-ŋǝ, nǝ laaw lithaathɔ lirɔɔmɔthir-li, nǝr andaci yaavɔra ŋiɽaŋali ŋɔ. 11 Laakin nǝ yaavɔr ruusi ŋiɽaŋali kathiri-kathiri ŋa ŋandisasi laaw, mindaŋ nǝrseere ǝmminici mac. 12 Laakin nǝ Bɔṯrɔs diiɽi nɔŋw avri nɔŋweele ki-thimaamɔ; nɔŋw biɽi nda-lalɔ, mindaŋ nɔŋweese kǝfǝnǝ dak. E-ta nɔŋw aaɽitha dɔɔnɔ kwiliŋɽɔ ŋiɽaŋal-ŋi ŋimǝrrini.
Kweeleny mɔŋgwɔ ruwǝthǝthǝ ṯalaamiiza naana ṯir ṯiɽǝn.
(Mɔrgus 16:12-13)13 Nǝ ki-laamin-la ṯǝ kila, nǝr naani ndǝn lǝṯi rɔɔmi Yǝcu-ŋwlɔ linḏi etheele ki-lilli-nǝ lǝni @imwaas, lir miilǝ dɔvokwɔɽony Urshaliim-ŋgi, 14 nǝr mɔmri ŋiɽanali-la ŋa tatap ŋǝrrinǝ. 15 Nǝ kinaŋw nandisar nǝ nɔmɔmrɔr-sila tok, nǝsi Yǝcu dɔŋgwatha naana, mindaŋ nǝr-li rɔɔmɔthi. 16 Laakin nǝ yǝy yeeŋen mithinni nǝreere elŋe mac. 17 Nǝsi Yǝcu ǝccǝŋw, “Aatha kwɔrɔ kwɔmɔmrɔ-ŋala ki-thaay-la?” Nǝr rilli kirip liti laami kiyǝnǝ mac. 18 Nǝ kwette deŋgen-na kwǝni Kalyuubaas uṯicǝlɔ nɔŋwɔccǝŋw, “A kwir tǝ kwɔrɔ kwiirin kwɔtɔpɔt kɔnɔŋw Urshaliim kwiti kwilŋithi mac kwomne kwǝrrinǝ kinanaŋw ki-nyaamin-la kinyɔ nyeere caawa?”
19 Nɔŋwsi uṯicǝlɔ nɔŋwsǝccǝŋw, “Kwomne kwɔrṯaŋ manɔ?” Nǝr ǝŋnici nǝrǝccǝŋw, “Kwomne-pa kwɔmǝ ǝrrinici Yǝcu-ŋw kwǝthi Naasira-ŋw, kwir kwiɽii kwǝmminicǝ Allah, nǝ kwǝṯi-gi lizi tatap aarɔŋw kwǝthi ŋɔma ŋɔppa ŋǝthi kwomne tatap kwǝṯɔŋw andasi nǝ kwǝṯɔŋw ǝrri tok. 20 Nǝ rɔ-asa rǝri rǝthi kahana-ŋǝ leeleny-li inḏǝthǝ lizi ethi ǝccǝ haakima ethi ɽeenye, mindaŋ nǝr ṯigrǝthǝ ki-ŋwuuɽi-lǝ. 21 Ninyǝni ligittathɔ ethaarɔŋw, kwundǝr-ṯǝ kwinḏi ethi kǝdu Israa-iila! Laakin ŋɔ tatap, nyaamin nyimoro ṯoɽol nyimǝ-nyi ŋiɽaŋal ŋɔ ǝrrini. 22 Naaɽi nǝ laaw lokwo dǝngǝr-nǝ, nǝrnyji liŋɽǝlɔ buruc, mǝrgweele ki-thimaamɔ ǝzir-yi, 23 laakin nǝreere kaṯṯisa aŋna wuuŋwun mac, mindaŋ mǝr aaɽa nǝrnyji ǝccǝŋw, nyiiŋǝ limǝ iisa limelekǝ, nǝrsi andica nǝrsi ǝccǝŋw ŋgwana-tǝ kwɔmiithɔ. 24 Nǝreele lokwo dǝŋgǝr-nǝ ki-thimaamɔ mindaŋ nǝrsi-ṯǝ kaṯṯisa ŋa dap-dap ŋir-ga ŋandisasi laaw, laakin nǝreere inḏa ŋundu-ŋwo mac.”
25 E-ta nǝsi Yǝcu ǝccǝŋw, “Ŋaŋa lirmba lithii gii, nǝ lǝṯi ɽindaŋnalɔ tok ethisi ǝmmini rɔgwor-ri ŋa tatap ŋandisasi liɽii! 26 Ŋirpa ḏɔrɔɔri ǝthi Kwɔrɔstɔ rǝrinni kwomne-gi ŋgwɔ, e-ta ethi-mǝ ǝnḏi ki-ŋinithi-nǝ ŋuuŋun.” 27 Ṯaŋw nǝsi Yǝcu ilŋithini ŋa ŋɔlɔɔthɔna ŋǝni ŋundu ki yiṯaab-na tatap yirllinǝlɔ ter, nɔŋwaari ibṯǝḏi Yiṯaab-yi yǝthi Muusǝ, nǝ ŋa ŋɔlɔɔthɔna ŋǝthi liɽii tatap.
28 Mǝr iilicǝ lilliya keṯṯok liilathir-gwɔ nǝ Yǝcu oro-ga kwinḏi ethi ṯamthɔ etheele keereny; 29 laakin nǝr ṯiinyini nǝrǝccǝŋw “Ǝr-naani nyji-ŋǝli; kaka mǝ-gwɔ aaŋwɔn kwɔlŋatha keereeny-gi, nǝ ǝzir naŋni ǝthoro kirim tok.” E-ta nɔŋwɔnḏi nǝr-li naani. 30 Mindaŋ mɔŋw naanalɔ ethi-li ethne tǝ, nɔŋw dimmi rǝghiivǝ, mindaŋ nɔŋw-ri aari shukran; e-ta nɔŋwsi undǝthǝnǝ nɔŋwsi inḏǝthǝ. 31 Ṯaŋw tɔc nǝ yǝy yeeŋen avrina dar, mindaŋ nǝr elŋe bir, laakin nɔŋw irṯathalɔ kiyǝnǝ yeeŋer. 32 Nǝr andasi-na nǝraarɔŋw, “Anna rɔgwor rǝri riti rǝŋgi dununǝnnǝ-pǝ ṯinyiŋlathi-na, kinanw nandica-ŋgwɔ nyuŋwɔsi ki-thaay-la, nǝ nilŋithinǝ-ŋgwɔ nyuŋwsi ŋiɽaŋali ŋinaanɔ ki Yiṯaab-na Yirlliinǝlɔ ter-a?” 33 Nǝr diiɽǝ ki-saa@-la ṯǝ ŋgwa nǝr aaɽitha Urshaliim, mindaŋ nǝr kaṯṯasi ṯalaamiiza ṯir wrii-kwette ṯaaɽathɔ dɔŋw nǝ kila linaanir-li tok. 34 Laarɔŋw, “Kweeleny kwɔmǝ diiɽi rerrem! Mindaŋ nɔŋw ruwǝnnici Sim@aan-ŋwɔlɔ!” 35 E-ta nǝsi kila lir ndǝn ilŋithini ŋiɽaŋali ŋa ŋǝrrinicǝsi ki-thaay-la, nǝ kwɔmǝri elŋe aŋgwɔrɔ kinaŋw mɔŋw undǝthǝ rǝghiivɔ-nǝ.
Yǝcu mɔŋgwɔ ruwǝnnici ṯalaamiiza-lɔ ṯuuŋwun.
(Maṯṯa 28:16-20Mɔrgus 16:14-18Yuhanna 20:19-23A@maal 1:6-8)36 Nǝ kinaŋw nandicasi tǝ kinnǝ kila lir ndǝn ŋiɽaŋali ŋɔ, biḏaan nǝ Kweeleny rillanni tɔc kelgeny-na keeŋen, mindaŋ nɔŋwsǝccǝŋw, “Ŋaaŋa kila laami naana?”
37 Nǝr kinaŋw beṯṯen lɔnḏɔthɔ, nǝraarɔŋw nyiiŋǝ kilɔ liisa kǝzinni ṯigɽimǝ. 38 Laakin nɔŋwsi ǝccǝŋw, “Aatha kwɔrɔ kwǝpirce-ŋǝ rɔgwori? Ŋotho ŋurlulǝ-ŋǝsi-lɔ ki-rɔgwor-na raalɔ? 39 Iisar-ṯi rii riinyi ŋwaaraŋi-na ŋwiinyi, nyii kwirimi-ṯa-ŋgwɔ. Mɔmɔr-nyii, e-ta ǝrnyii-mǝ elŋǝ, kaka riti nǝṯi-gwɔ ṯigɽim ere ǝthi aŋna-ŋwɔsi ŋwiya-ŋi mac, kaka ṯǝ niisar-nyii gwɔ.”
40 Mɔŋwsi andasi ŋɔ, nɔŋwsi baaŋaci rii-ŋwɔsi ŋwaara-ŋi ŋwuuŋwun. 41 Laakin nǝrtǝ ere ǝmmini kinnǝni mac, kaka nuurǝnnǝr-gwɔ ṯinyiŋlana dǝddǝp lurǝŋnǝ tok; e-ta nɔŋwsi uṯicǝlɔ nɔŋwsi ǝccǝŋw, “Ŋaaŋa kila lǝthi kwomne kweere kɔnɔŋw kwǝthi yee-a?” 42 Nǝr inḏǝthǝ kithritha kǝthi kwɔm kwudununǝ, 43 mindaŋ nɔŋw aavi nɔŋw yee kiyǝnǝ yeeŋen.
44 E-ta nɔŋwsi ǝccǝŋw, “Ŋiɽaŋal ŋiinyi-ŋɔ ŋindǝr-ṯǝ ŋa ŋette-ŋette ŋandisa-ŋesi kinaŋw a-naaniny-tǝ kinnǝni ŋaaŋa-li; mindaŋ mǝ kwomne tatap kwɔlɔthɔna kweni nyii rattathi rerem Sherii@a-gi kwethi Muusǝ, nǝ ki yiṯaab-na yǝthi liɽii nǝ ki Mazaamiir-na tok.”
45 Ṯaŋw nɔŋwsi kiṯṯici ŋaɽinyi ŋeeŋen ethi elŋe Yiṯaabi Yirllinǝlɔ ter, 46 nɔŋwsǝccǝŋw, “Ŋinḏǝr-ṯǝ-ŋɔ ŋɔlɔɔthɔna ŋaarɔŋw laazim a Kwɔrɔstɔ rǝrinni nǝ laazim ŋwɔ diiɽǝ ki-ŋiɽany-na tok mǝ ŋwaamin ṯoɽol ere, 47 mindaŋ mǝ ŋiɽaŋal ŋuuŋun ŋǝthi urlǝ rɔgwor-lɔ, nǝ ṯifivrinnǝ ṯǝthi ŋikiya ǝrinni bǝshirǝ yiriny-yi yuuŋwun ṯurmunǝ naana tatap ethi aari ibṯǝḏi Urshaliim. 48 Ŋaaŋa lɔrɔ lir shuhuuḏ kwǝthi kwomne-ŋgwɔ 49 Nǝ duŋgwiny-ŋgi tǝ, ŋǝsi usicǝ ŋgwa kwɔgittathi-gi Papa kwiinyi. Laakin laazim akkɔ kizǝn ki-mǝḏiinǝ-nǝ mindaŋ a ŋɔma ŋǝthi leere dappitha daŋgal-na.”
Yǝcu mɔŋgwɔ dimmǝnni ki-leere.
(Mɔrgus 16:19, Mɔrgus 20A@maal 1:9-11)50 Nǝrṯoroŋw mindaŋ nɔŋw-li ruu ki-mǝḏiinǝ-nǝ nɔŋwleele Beiṯ@aniya, mindaŋ nɔŋw allasi rii-la nɔŋwsi ǝccǝ baarika. 51 Mɔŋwsi ǝccǝ baarika tǝ, nɔŋwsi ruccinǝ, mindaŋ nɔŋw dimmǝnni ki-leere. 52 E-ta mǝr kwoccelɔ-tǝ, nǝr aaɽitha Urshaliim luurǝnnǝnǝ deddep ṯinyiŋla-thina ṯɔppa. 53 E-ta nǝr nanni ki-lɔɔmɔr-la ṯǝ kila tatap ki Heikal-na ǝṯir-gwɔ biɽǝthǝ Allah yiriny.
aza 24
ṯimamu ṯeḏi Yecu ṯinani domony
1 mindaŋ ma lamin ila liŋna leḏi uzbuwa wir ter, ŋurpana tutuk, ner ele ki ṯimamu, lapa kwuḏɽula kwulagizar. 2 ner inḏa kiɽbini kimɔ ṯerṯirini kiṯay, 3 lakin mer enḏi, ner ulezi aŋna weḏi Yecu kwir Kweleny. 4 ner ṯa orɔ ŋwu, mer keni ureŋni uraŋ ŋiɽaŋal ŋi, nezi lor nden rillazi lu, likinna yireṯi yifiiḏu pərpər, yiṯiŋaḏi firyar lu. 5 nezi ŋiḏeny ye-na, ner irrazi ŋwoɽa lu kureyu lu ta, nezi lor klu eca ŋwu: a lɔḏɔ manuŋ linaŋna ŋunduŋwu ŋiɽany-na ŋgwa kwumiiḏu? 6 kwiti kunuŋ mac; kwumɔdiɽi. ṯiŋayinarzi ŋandicaŋw zi ŋaŋwuzi kerreny naŋuŋw gwu keni jaliil, 7 ŋari ŋi ŋwu: lazim er ṯa inḏeḏa Toru teḏi kwizigwunaŋ ki rii-na reḏi lizi leni liki, er ṯigra ŋwuɽi la ŋwuɽmɔḏalu eḏi gwu eɽenye, mindaŋ ki ŋwamin la ŋwir ṯɔɽɔl, ŋwu diɽi. 8 ner ṯiŋayini ŋiɽaŋali ŋandicaŋw zi, 9 ner aɽi nanir gwu ki ṯimamu, ner zi andaci lir wri-kwete ŋiɽaŋali ŋu, na liḏaḏu tatap tɔk. 10 kwete kweni maryam majdaliiya, na yuwanna tɔk, na maryam kwir lenyin kweḏi yaguub-ŋa, law li lir ter linanir li, ner orɔ landica yafura ŋiɽaŋali ŋu. 11 ner ari: kenjer kiri ṯa domony, ner zi ere emni mac. 12 lakin na buṯruz diɽi, nuŋw afraḏa ki ṯimamu. muŋw buŋweḏa ezir-na, nuŋw inḏa yireṯi yinanalu domony; nuŋw ele duənu kwureŋni ŋiɽaŋal ŋi uraŋ, ŋimɔ rɔtɔ ŋwu.
ṯiruwenelu ṯeḏi Yecu ki ṯay ṯinḏi amwaz
13 lamin ṯa kla ner ele nden kezir wete weni amwaz, wunani urzaliimŋw kworɔ keṯɔk, wir kaka zaa ṯɔɽɔl, 14 ner mumri ŋiɽaŋali la tatap ŋimɔ rɔtɔ ŋwu. 15 ner ṯa orɔ ŋwu, mer andazi, mer zi mumri la tɔk, nezi Yecu ilaḏa nana, ner li romḏi. 16 lakin na yey yeŋen ere elŋe ŋamaŋ mac, ner ṯime ŋunduŋwu. 17 nuŋw zi eca ŋwu: aḏa kwiri manuŋ, kwumumri ŋa la, kilya la? ner rilli krip, lironyina. 18 nuŋw eŋnici kwete kweni kiluuba, nuŋw eca ŋwu: aḏri pa, a kwiru dak kwunani urzaliim kwiti kwilŋiica ŋiɽaŋali ŋimerrini ki ŋwamin la ŋwu a? 19 nuŋw zi eca ŋwu: ŋeḏaḏa? ner eca ŋwu: ŋeḏi Yecu pa, kweḏi nazraŋw, kwiɽi kwuṯemḏelu purpur, kweṯandindazi ŋilima, kweti zi erri ŋilima tɔk ki yey-na yeḏi Allah, ki yey-na yeḏi lizi tatap tɔk. 20 na ŋeḏi leleny leḏi yiziiz, lijowiṯ leri tɔk, limɔ mulɔ ŋunduŋwu ner gi ele ki zeyria-na, ner ketize hukma weḏi ŋiɽany, ner tigreḏa ki ŋwuɽi la ŋwuɽmɔḏalu. 21 kwunde kwir pa kwəkizenyji kizen eḏalla izrayiila, epa, na aŋwunu ŋwamin ŋwumorɔ tɔɽɔl ŋwumɔ ŋi ŋiɽaŋal rɔtɔ ŋwu. 22 emba. nenyji law lɔkwɔ leri kaɽkaɽ tɔk. mer gwu nana ki ṯimamu ŋurpana tutuk, 23 ner uleza aŋna wuŋwun; ner aɽa, nernyjeca ŋwu: nyiŋa liminḏa limaleyka, limenyji ruweda nana, ner aru ŋwu: ŋgwu kwumiiḏu. 24 ner ele lɔkwɔ leri ki ṯimamu, ner zi ṯa inḏa kaka ŋari ŋi law, lakin ner uleza ŋunduŋwu.
25 nuŋw zi andaci, nuŋw zi eca ŋwu: a liri lor liḏiki, iti miḏiŋazi fitak mac tatap ŋandizazi liɽi. 26 ŋiɽaŋal ŋiti ŋeŋgorɔ ŋwu manya, eḏi Kwruztu rerini ṯa ŋwu, mindaŋ eḏuŋw enḏi ki ŋiniṯ-na ŋuŋun? 27 nuŋw zi ilŋiiḏini ŋiɽaŋali tatap ŋeni ŋundu, ŋandizazi muuza, mindaŋ liɽi tatap, ŋuluḏina.
28 mer ilizi ezir keṯɔk winḏir gwu eḏele, muŋw naŋni eḏi zi tamḏu duṯuk, 29 ner ṯinyini ŋunduŋwu, ner dadizalu, laruŋw: er nani kaka ma gwu aŋwun kwulaŋa kereny, nuŋw enḏi edi li nani. 30 ner ṯa orɔ ŋwu, mer inḏiraḏa ezir keḏneya la ta, nuŋw dimi eḏneya, nuŋw ortaḏa, nuŋw undena, nuŋw zi inḏeḏa. 31 ner afri yey-na dar, ner elŋe bir; nuŋw irṯaḏa lu nyetec. 32 ner andazina, ner aru ŋwu: anna! andicaŋw nyuŋwuzi ki ṯay la, ilŋiiḏiniŋw nyuŋwuzi ŋiɽaŋali tɔk ŋuluḏina ta, er ere nyeŋle rugwor-na nyel nyel manya?
33 ner ṯa diɽa ki zaa ŋgwa, ner aɽiḏa urzaliim, ner zi kaṯazi lir wri-kwete linanalu duŋw, ner li nanalu liḏaḏu tɔk, 34 laruŋw, Kweleny kwumɔdiɽi, kwumɔ ruweḏi zimaanŋw nana. 35 ner zi andaci ŋiɽaŋali ŋimɔ rɔtɔ ŋwu ki ṯay la, na ŋimɔŋw ŋi unda eḏneya-na ta, ner ma elŋe.
Yecu muŋw ruweḏa limeḏgen nana
36 andizarzi ŋu ta, nezi Yecu ṯermizelu keligeny-na, nuŋw zi agani. 37 lakin ner ṯenye, ner unḏuḏi kwɔḏidɔ kwɔḏidɔ; ner aru ŋwu: ṯigɽim tiri mi, ṯizanyi. 38 nuŋw zi eca ŋwu: aḏa kwureŋnizaŋa? ŋɔḏɔ ŋurluleŋazi ki rugwor-na? 39 izarṯi rii rinyi, ŋwara tɔk; nyi kwiri mi ṯa ŋgwu rerem. mummir nyi ṯi, er nyi ma elŋe. ṯigɽim ṯere ṯende ṯeḏi yiiḏi ya ŋwiaŋi, kaka izar nyi. 40 muŋw zi andaci ta, nuŋw zi baŋaci rii, ŋwara ŋi tɔk. 41 iti emnar gwu fitak mac, ṯinyiŋlana ṯi, ureŋnar gwu tɔk, nuŋw zi eca ŋwu: a kla leḏi eḏneya were? 42 ner inḏeḏa lumi lɔkwɔ lidunnu; 43 muŋw zi afi, nuŋw zi ṯa ye ki yey-na yeŋen.
44 mindaŋ nuŋw zi eca ŋwu: ŋiɽaŋal ŋu ŋinderṯa ŋari nyi ŋi ŋwu, nanir kinna duŋw, ŋaruŋw: ŋiɽaŋal tatap ŋuluḏina ŋeni nyi, kuruu-na keḏi muuza, ki liɽi-na, na ki limazmuur-na tɔk, ŋe ṯa pa rataḏi ṯaŋwu. 45 nuŋw zi meci eḏelŋe ŋiɽaŋali ŋuluḏina ŋeni ŋundu. 46 nuŋw zi eca ŋwu: ŋuluḏina ṯa ŋwu, ŋaruŋw, Kwruztu kwu ṯa rerini ŋwu, mindaŋ ki ŋwamin ŋwa ŋwir ṯɔɽɔl, ŋwudiɽi ŋiɽany-na. 47 er zi ireci leḏi ṯurmun tatap, er zi eca ŋwu, orlacar ŋikyaŋi ŋalu ŋwudɔŋw, a ŋazi ŋikya ŋalu fifrinizi, yiriny yi yuŋwun; er zi andaci kla leḏi urzaliimŋw kerreny. 48 a liri pa lilŋiiḏi ŋiɽaŋali ŋu eḏi zi ŋi unḏizi ki. 49 izarṯi; nyi kwɔŋazi uziza haḏiya wukitaḏi yi Papa kwinyi eḏuza. lakin, nanir ki meḏiina-na mindaŋ a ŋazi ma ŋuma, ŋinanni kindala kider, oɽaḏa-na.
Kweleny kweni Yecu muŋw aɽiḏa nani gwu Allah wir ṯernyin
50 nuŋw zi mulɔ, ner li ele beyṯanya, nuŋw zi allaci rii la, nuŋw zi ortaḏa. 51 ner ṯa orɔ ŋwu, orṯaḏaŋw zi ta, nuŋw zi ruci-na, nuŋw diminila. 52 ner kwoce lu, ner aɽa urzaliim linyiŋila rugwor-na nyel nyel. 53 eṯir nani ki heykal-na duṯu-duṯuk, lortaḏi Allah.