Haḏiiyya wǝthi kweethel kwir kwaaw.
(Mɔrgus 12:41-44)1 Mǝ Yǝcu iccannalɔ mindaŋ nɔŋweese lɔrṯɔwa ligǝkṯu haḏaaya weeŋen khazna-na kǝthi Heikal, 2 mindaŋ nɔŋweese tok kweethela kwir kwaaw kwir kwɔwaay ceg-cegi kwugǝṯṯi raariva riɽǝn. 3 Mindaŋ nɔŋwaarɔŋw, “Nyii kwǝccǝ-ŋǝsi-mǝ ŋwɔ, kweethel-ŋgwɔ kwir kwɔwaay kwɔmǝ-ŋwɔ kaṯṯɔ kwuuru beṯṯen ethi lithaathɔ-la. 4 Kaka nigǝṯṯi-gwɔ lithaathɔ haḏaaya weeŋen wǝthi kwomne kwɔthǝmthǝlɔ kwǝthi ŋɔrṯɔ ŋeeŋen; laakin ŋundu-tǝ, nɔrɔŋw-va kinnǝni kwɔwaay tok, nɔŋwtǝ kette tatap kwǝthiŋw kwǝthi ŋɔwaay ŋuuŋun.”
Yǝcu nandisa-ŋgwɔ niranali ŋǝthi ṯigiirathalɔ ṯǝthi Heikal.
(Maṯṯa 24:1-2Mɔrgus 13:1-2)5 Nǝ ṯalaamiiz ṯokwo andasi ŋiɽaŋali ŋǝthi Heikal wǝni wisaaw aŋgwɔrɔ yall-yi-na yuuŋwun yisaaw-yisaaw, nǝ haḏaaya wǝṯir inḏǝthǝ Allah tok. Nǝsi Yǝcu ǝccǝŋw, 6 “Kwomne-ŋgwɔ tatap kwiisa-ŋa, lɔɔmɔr kila linḏi mindaŋ ǝreere duŋgwǝci kaali keere kɔtɔpɔt ḏuṯ ethi ɔrgwɔthi keŋgen-la, mindaŋ ǝrisi fǝthǝlɔ tatap faṯ-faṯ.”
Ṯurvǝ-ŋǝ ṯǝwɽǝ-thi yǝy-lɔ.
(Maṯṯa 24:3-14Mɔrgus 13:3-13)7 Nǝr uṯicǝlɔ nǝrǝccǝŋw, “Yaa Mɔ@allim ŋiɽaŋal-ŋɔ ŋinḏi ethǝrrini ṯaccaŋ? @alaama windǝr wǝndu winḏi ethi ǝrrini ethi-mǝ elŋe ethaarɔŋw ŋimeele ethi ǝrrini?”
8 Nǝsi Yǝcu ǝccǝŋw, “Aŋricar; etheere kǝɽinyji ŋaaŋwɔsi-lɔ mac; kaka ninḏir-gwɔ ethiila littǝzir yiriny-yi yiinyi ǝraarɔŋw, ‘Nyii kwirṯa ŋgwa, nǝ lɔɔmɔr limǝ raṯṯathi!’ Laakin ǝseere kwaathitha mac. 9 Ǝṯi ṯiinya mac mǝ neŋne ŋiɽaŋali-lɔ ŋǝṯhi ŋǝriyǝ-ŋǝ ṯilakitha-thi-na nǝ kwomne kwir kaka-ṯǝ ŋgwɔ laazim ŋwɔrrini kerreny, laakin nǝreere ǝniŋw mac ṯirnina ṯimǝ aadithi.”
10 Nɔŋw aari isṯimir ethaarɔŋw, “Libǝlǝḏ linḏi ethi ṯɔgthathisit na; nǝ a ŋeeleny tɔgthathisi-na tok 11 A ǝzir riiginni riiginniŋw kwigii beṯṯen, a yaaŋwɔ-ŋa kimǝthi-gi karbatha ǝzir naana tatap; a kwomne ǝrrini kwir ŋitheny ṯarr, nǝ a @alaamaaṯ ǝrrini wɔppa-wɔppa ki-leere. 12 Nǝ niti nǝrrinǝ-gwɔ kinnǝ kwomne-ŋgwɔ mac, ǝrŋǝsi ɔmɔmmi ǝrŋǝsi ǝwindi-ndi yǝy-lɔ, ǝrŋǝsi inḏǝthǝ limajma@ ethi ǝccǝ ŋaaŋwɔsi haakima mindaŋ ǝrŋǝsi kagiṯɔ ki-sijin-nǝ; ǝrŋǝsi mɔmlɔttaṯha kiyǝnǝ yǝthi limǝlik nǝ yǝthi hɔkkaam tok, sǝbǝb-gi kwǝni nyii. 13 E-ta a fɔrsa oro kwaalɔ ŋgwa kwǝthi-gi aari bǝshirǝ Inyjiilǝ. 14 Ere kirǝsi ethi apprasi rɔgwor-lɔ mac kerreny, mindaŋ ethaarɔŋw lanyji ǝŋnici aŋgwɔrɔ. 15 Kaka ninḏiny-gwɔ ethi inḏǝthǝ ŋaaŋwɔsi ŋiɽaŋali nǝ tǝthinǝ yǝnǝ tok, mindaŋ a ṯuwǝn ṯaalɔ ere ǝthi ŋɔma mac ethisi rii keereny ŋǝṯisi andasi, nǝ ethisi mǝmlithici ŋaaŋwɔsi tok mac. 16 Ǝŋǝsi rarnyalɔ-ga laanyalɔ-ŋǝli nǝ liyaŋgalɔ lir lɔr-ŋa lizi-li lir-ŋǝli ǝgwur wɔtɔpɔt, nǝ limathgalɔ laalɔ, ǝrŋǝsi inḏǝthǝ hɔkkaama; mindaŋ ǝrsi ɽeenye lokwo daŋgal-na. 17 A lizi tatap wǝzi ŋaaŋwɔsi, sǝbǝb-gi kwǝni nyii. 18 Laakin a ǝwɽu wɔtɔpɔt wǝthi ŋwɔɽa ŋwaalɔ ŋweere biɽathalɔ ḏuṯ. 19 Ǝnyjǝr ŋwaara-lɔ tetter, mindaŋ a kilǝthi rogɽo raalɔ.
Yǝcu nandisa-ŋgwɔ ŋiɽaŋali ŋǝthi ṯigiirathalɔ ṯǝthi Urshaliim.
(Maṯṯa 24:15-21Mɔrgus 13:14-19)20 “Meese Urshaliim-ŋwɔ kwɔmǝ jesh riithini dɔc, ǝ-ta ǝlŋǝ ethaarɔŋw kwɔmǝ aadithi keṯṯok ethi kiirathalɔ. 21 Nǝ kila linaanɔ Yahuuḏiiyyǝ laazim ǝri avri ǝri allɔ ki-ŋwundǝr-lǝ; nǝ kila linaanɔ ki-mǝḏiinǝ-nǝ laazim ǝri ɔrlacci ŋwɔḏoŋw, kila linaanɔ parŋgala laazim areere ǝnḏǝ ki-mǝḏiinǝ-nǝ mac. 22 Kaka ninḏi-gwɔ ŋwaamin-ŋwa ethoro ‘Ŋwaamin ŋwɔthi jiizǝ’, mindaŋ mǝr rattathi ŋa tatap ŋɔlɔɔthɔna. 23 Ǝnnǝ ŋinḏi-mi ethi kee beṯṯen ki-ŋwaamin-la ŋwa, ŋǝni laaw liitha, nǝ liiɽǝ ŋwurgwuduŋi tok! E-ta a ṯurvǝ ǝnḏithǝ bǝlǝḏǝ ŋgwɔ ṯɔppa, mindaŋ a jiizǝ kwǝthi Allah dappitha-lɔ ki-lizi-nǝ kɔlɔ. 24 Ǝrsi endinye lokwo kaalala-gi, nǝ lithaathɔ ǝrsi iili lir musjuun bǝlǝḏǝ naana tatap; a Umam annasi Urshaliim-ŋwɔlɔ mindaŋ mǝ ŋwɔɔmɔr ŋweeŋen rattathi.
Kilyǝ kǝthi Tɔr tǝthi Kwizigwunǝŋ mɔŋwaaɽa.
(Maṯṯa 24:29-31Mɔrgus 13:24-27)25 “A @alaamaaṯ naani aaŋwɔna naana ǝwǝ-yi nǝ rɔɔrɔm tok. A lizi lǝthi ṯurmun tatap pinni rɔgwor-na, mindaŋ ǝri ṯeenye beṯṯen kwuurunnǝ kwǝthi bahar-ŋa ŋaaw-ŋi ŋilakkathina 26 A lizi ai ŋwɔrṯɔgɽɔnya ŋwɔni ŋitheny kaka nǝkkicǝr-gwɔ kwomne kizǝn kwinḏi ethiila ki-ṯurmun-nǝ, kaka ninḏi-gwɔ ŋɔma ŋǝthi ŋweere ethi lakkithalɔ. 27 E-ta a Tɔr tǝthi Kwizigwunǝŋ ruwǝnnǝlɔ, ŋwiila lebleth-lina ŋɔma-ŋi ŋɔppa nǝ ŋinith-ŋi tok. 28 Mǝ kwomne-ŋgwɔ aari ibṯǝḏi ethi ernene, a diiɽǝthǝlǝ a baaŋasi ŋwɔɽa-la, kaka mǝgwɔ ṯǝllithisa ṯaalɔ aadithi keṯṯok ethiila.”
Ḏǝris ṯǝthi kwɔɔtha.
(Maṯṯa 24:32-35Mɔrgus 13:28-31)29 E-ta nǝsi Yǝcu andaci mǝthǝlǝ-ŋgwɔ, nɔŋwsǝccǝŋw, “Kithaayinar ŋiɽaŋali ŋǝthi kwɔɔtha, nǝ ŋǝthi yaaɽi yithaathɔ tatap tok. 30 Meese yǝni yeeŋen yimǝ ruuthǝ ǝṯaarɔŋwa kiɽa kimǝ aadithi keṯṯok. 31 Nǝrṯoroŋw tok, meese kwomne-ŋgwɔ kwɔmǝ ǝrrini, e-ta elŋece ethaarɔŋw Ŋeeleny ŋǝthi Allah ŋɔmǝ aadithi ethiila.
32 “Nyii kwǝccǝ-ŋǝsi-mǝ ŋwɔ rerrem, lizi lǝthi lɔɔmɔr kɔlɔ liti linḏi ethi ernene mac mindaŋ, mǝ kwomne ŋgwɔ tatap ǝrrini rac. 33 A leere-ŋa wurǝyu-yi ernene kithaay, laakin ŋiɽaŋal ŋiinyi tǝ, ǝreere ernene ḏuṯ.
Ṯaŋrinna naana.
34 “Aŋrinnar naana, mindaŋ meere ǝnḏǝlɔ dɔkwɔ-dɔkwɔl mac, yǝzuumǝ-yi, nǝ urlǝli-ŋgi tok mac, nǝ ṯipinnǝ rɔgwor-na kwomne-gi kwǝthi ŋimiitha ŋǝthi ṯurmun, nǝ laamin liila kǝzir weere kwɔŋǝsi ṯǝrmizǝlɔ 35 kaka kiɽibini, ŋwɔṯaŋw ŋwiilicǝ lizi tatap linannɔ kwurǝyu-lu. 36 Aŋrathir ŋwɔɔmɔri tatap mindaŋ ǝṯaari kiyiiriny dok-dok mindaŋ mǝthi ŋɔma ŋǝthi-ŋi aami ruu-ŋw kwomne-na ŋgwɔ tatap kwinḏi ethǝrrini, mindaŋ mǝ rilli kiyǝnǝ yǝthi Tɔr tǝthi Kwizigwunǝŋ.”
37 Nǝ Yǝcu aari @allima ki-nyaamin-la kinya ki Heikal-na, mindaŋ mǝ kirakalɔ oro tǝ ǝṯɔŋw ele ǝṯɔŋw nḏira kaayin-la wǝni Zeiṯuun. 38 Nǝ ǝṯi-gwɔ lizi tatap ruwǝthǝ naana ŋɔrpana tuttuk ǝṯireele ki Heikal-na ethi niŋnaci ŋunduŋw.
aza 21
haḏiya weḏi kwaw kwir kweḏel
1 na Yecu baŋḏala nuŋw icaci lizi lir lurṯu, likeṯi haḏiya weŋen kazzina-na keḏi heykal. 2 ta nuŋw eze kweḏela kwete kwir kwuway cakicagi, kwukeṯi rarifa riɽen. 3 nuŋw zi eca ŋwu: nyi kwecaŋazi ma ŋwa rerem, kweḏel ŋgwu kwir kwuway, kwumɔkaṯu kwuṯemḏelu kweḏi kla tatap limɔkatu kazzina-na; 4 kaka keṯer gwu tatap kweḏi ŋurṯu ŋeŋen, lakin kwaw ŋgwu kweḏi ŋuway ŋuŋun, tatap kweḏuŋwi.
Yecu kwandiza ŋiɽya ŋi ŋeḏi ṯikiraza lu ṯeḏi heykal
5 mer zi andazi lɔkwɔ ŋeḏi heykal, ṯowcina ṯi ṯuŋwun, yal yi yizaw nana, nuŋw zi eca ŋwu: 6 ŋeḏi kwɔmne ŋgwu kwizaŋa, ŋwamin ŋwa ŋwinḏi a ŋi kal kere ere urgwuḏi mac; yifaḏa lu faṯ faṯ. 7 ner uṯizelu, ner eca ŋwu: muallim, ŋiɽaŋal ŋu ŋinḏi eḏenḏa ṯacaŋ? na aḏa kwinḏi eḏorɔ mindaŋ ma kwɔmne ŋgwu naŋni eḏi rataḏi? 8 nuŋw zi eca ŋwu: aŋraḏir er ŋazi ere lere ṯugwudazi eḏaki ṯay pir mac, kaka inḏir gwu eḏila luru yiriny yi yinyi, er aru ŋwu: nyi kwiri ṯa ŋgwu, na lomur limadiḏi. eṯi zi kwaḏaḏi kla mac. 9 mezi neŋne ŋeḏi ṯuwən, na təmbalnina ṯɔk, eṯi ṯinya mac, eṯere afri rugwori mac; ŋinḏi eḏenḏa, lakin er ere rataḏi kinna mac.
10 nuŋw zi eca ŋwu: lizi linḏi eḏ ofaḏa lizi lir ter, a ŋeleny ofaḏa ŋelenyi ŋir ter; 11 a ureyu rigini; ezi yaŋwu ye yu tɔrtɔr kezir were were, a kimeṯ enḏa kiki beṯen tɔk; er inḏa kwɔmne tɔk kweḏi gi ṯenye ṯeṯec; er eze kwɔmne kweḏi lerena tɔk kwupa kwuminni. 12 lakin, iti enḏi ŋiɽaŋal ŋu kinna mac, er ŋazi kete rii nana, er ŋazi owɽi yeye, er ŋazi mulḏa ki limajma-na, ki zijin-na tɔk; er ŋazi mulḏa ki leleny, ki limuḏiir, kaka roḏa ŋa gwu leḏi yiriny yinyi. 13 ŋalu ŋir ṯa kinaŋw ki lomur la kla, eḏi ŋi unḏizi ŋiɽaŋali ki. 14 ŋwu ṯa, kitizar ŋiɽaŋali ŋu yey, eḏi zi ere enji ŋwoɽa-na kerreny mac eḏi zi andazi. 15 kaka roḏi nyi gwu, kwinḏi ŋazi eḏinḏeḏa runyu eḏi zi andazi ŋeḏi yeyna, mindaŋ na leṯi ŋazi ɔpipiḏacelu, er ŋazi ere eḏici ŋuma mac eḏi zi rii ya eḏi zi ermiḏeḏa nana tɔk mac. 16 er ŋazi bɔŋwḏi lir rarnyalu-ŋa lanyalu ŋali, lir ŋali ŋiaŋga, lizi li-na lalu rac, na limaḏgalu, er ŋazi kete lɔkwɔ kaṯi eḏendinye. 17 er ŋazi uwezi tatap, kaka roḏu ŋa gwu leḏi yiriny yinyi. 18 lakin na owɽu weḏi ŋwoɽa ŋwalu ere kiraḏa lu were mac. 19 kwurmɔṯazar rɔgwɽɔ mindaŋ a əgini ŋimiiḏa ŋir rerem.
20 ma eze ŋwufeɽera ŋwumɔ rikaḏa urzaliimŋw lu, ezi ta elŋece rac eḏaruŋw, lomur klu mi, lim ani ila luŋwun leḏi tikiraḏa lu. 21 linani yahuḏiiya, eḏir afra yayinu nana na kla linani ki meḏiina-na, eḏir ru, na linani par kwuḏer, eḏir ere enḏi ki meḏiina-na mac. 22 kaka nani gwu lomur linḏi li jiiza eḏi zi gwu enḏi-na, er rataḏi tatap ŋuluḏina. 23 enna, ezi ṯurfa enḏiḏa ṯupak kla leni liiḏa, ya leṯ iɽi nyelle tɔk, ki ŋwamin ŋwa, kaka nani gwu ṯurfa ṯupa kezir wu, na hukm wifirli, ki lizi-na klu tɔk. 24 er ipiḏi yalala yi, er irdi; er zi mulḏa ŋuwaya ezir nana tatap; a lizi leḏi umam ruta urzaliimŋw lu, mindaŋ a ŋwomur ŋweḏi umam ṯimayini.
25 a alaama ijini kaŋwun, ki owa tɔk, rorum tɔk; a ṯurfa enḏida ṯurmun nana ndendeṯ; kaka iti ilŋiicar gwu ŋiɽaŋali ezir mac, kaka ma gwu rujul upuna ŋuma ŋi, kiiru gi, 26 a lizi ere keṯini wəŋ mac ŋiḏeny ŋi, kaka ṯinyar gwu ŋiɽaŋal ŋi ŋedi kwɔmne kwinḏi ki ṯurmun-na; kaka inḏi gwu ŋuma ŋupa ŋedi lere eḏi rigini. 27 ta er ma eze Toru teḏi kwizigwunaŋ tinḏi ki lebleṯ-na, ŋuma ŋi, ŋiniṯ ŋi ŋupa ŋiminni. 28 ma ŋazi ŋiɽaŋal ŋu naŋni eḏenḏiḏa, rillir titir, a dima ŋwoɽala, kaka inḏi gwu lomur leḏi ṯalliḏiza ṯalu.
ṯireca eḏaŋraḏa ŋama-ŋaman
29 nuŋw zi andaci ŋiŋerɔŋwa, nuŋw zi eca ŋwu: eti ketize ŋiɽaŋali yey ŋeḏi kwoḏa, yaɽi yi tatap. 30 mer ru-na kurfu-kurfuk, mezeze, ezi ta elŋece rac, ari, kiɽa ŋgu nii kwum ani adiḏi. 31 ŋwu ṯa ŋwu, ma inḏa kwɔmne ŋgwu kwindi eḏ iŋna, a elŋe eḏaru ŋwu: ŋeleny ŋeḏi Allah ŋimadiḏi adi adi. 32 emba, nyi kwecaŋazi ma ŋwa, a lizi leḏi ŋelŋe ŋu ŋutuput, er ere ay mac mindaŋ ma kwɔmne ŋgwu tatap errini. 33 a lere-ŋa ureyu yi ernine, lakin a ŋiɽaŋal ŋinyi ere ernine ḏuṯ.
34 deŋniṯiner eḏaŋrani ki rɔgwɽɔ; eṯi riimeḏi ŋwoɽa-na mezi ṯibaḏa ŋeḏi rɔgwɽɔ ralu, ṯurulela ṯi, na ṯaŋrica ṯeḏi kwɔmne kweḏi ṯurmun, a ta lamin kla iidezi ŋaŋwuzi dip kaka kiɽbin. 35 kaka inḏi gwu lamin kla eḏi zi ilica tatap kezir wanda gwu ṯurmun. 36 ŋwu ṯa ŋwu, eṯ icazi ki ṯay, eṯariri ki yiriny dɔk dɔk, mindaŋ ma inḏa ŋuma eḏ arṯiḏa ṯurfa lu kḏu tatap ṯinḏi; mindaŋ a rillazi Toru lu teḏi kwizigwunaŋ ki yey-na.
37 eṯuŋw zi ilŋiiḏini ki heykal-na; mindaŋ ma kilikelu orɔ, eṯuŋw ele kayin weni zeyṯuun eḏi gwu inḏirini. 38 na eṯi lizi ila nanuŋw gwu ŋurpana tutuk ki heykal-na, eḏi niŋnaci ŋiɽaŋali ŋeṯuŋw zi anandazi.