Ŋelŋe ŋǝthi Yǝcu Kwɔrɔstɔ.
(Maṯṯa 1:18-25)1 Ki-ŋwaamin-la ṯǝ ŋwa nǝ Imbraaṯɔɔr wǝni Ogosṯɔs alla waamira ethi iiɽǝthǝ lizi bǝlǝthǝ naana tatap kwǝthi Imbraaṯɔɔriya. 2 Nǝ ki-lɔɔmɔr limǝr-li iiɽǝthǝ lizi ṯaay-thi, nǝ Kiiriiniiyuus oro haakim wǝthi Suuriiyyǝ-ŋw. 3 E-ta nǝ lizi dindi tatap nǝr anditha ki-muḏun kweeŋen ethisi-gwɔ locce yiriny yeeŋen. 4 Nǝ Yuusuf diiɽǝ kinaŋw ki-mǝḏiinǝ-nǝ kwǝthi Naasira-ŋw kwɔnaana Jǝliil, nɔŋweele ki-mǝḏiinǝ-nǝ kwǝni Beit-lahm kwǝthi Yahuuḏiiyya-ŋw, kǝzir wǝthi ŋelŋe ŋǝthi mǝlik kwǝni Ḏaawḏ. Ṯaŋw nǝ Yuusuf ele kinana-ŋw kaka nɔrɔ-ŋgwɔ ṯɔvɔɔ ṯǝthi Ḏaawḏ-ŋǝ. 5 Nǝreele Mǝryǝm-gi ŋgwa kwimthiŋw nda ethi aagwɔ nǝreele ethi lɔɔthɔna. Nɔŋwɔni kwǝthigdǝzǝ-nnǝ tok, 6 nǝ kinaŋw a-naanir-ta kinnǝni Beiṯ-lahm, nǝ lɔɔmɔr iilicǝ lǝthi ŋelŋe ŋuuŋun. 7 Mindaŋ nɔŋw elŋe toŋwora tir nda, nɔŋw ippǝsi yirethi naana, nɔŋw kette ki-sonḏuug-nǝ kwǝthi ethne wǝthi ŋirel, kaka niira-gwɔ ǝzir ki-funḏug-nǝ ethi-gwɔ naani.
Nyaaɽa-ŋǝ limeleka-li.
8 Nǝ nyaaɽa naani kinaŋw nyokwo ki-wuthǝr-nǝ nyigarna ŋirela ŋeeŋen kilkǝlu. 9 Nǝsi meleka kwǝthi Kweeleny ruwǝnnicǝ-lɔ, mindaŋ nǝsi ŋinith ŋǝthi Kweeleny irṯacalɔ. Mindaŋ nǝr ṯeenye beṯṯen, 10 laakin nǝsi meleka ǝccǝŋw, “Ǝṯi ṯiinya mac! Iisar-ṯi nyii-ŋgwɔ kwǝvicǝ-ŋǝsi ŋiɽaŋali wisaaw, ŋinḏi ethi ǝvicǝ lizi tatap ṯinyiŋlana ṯɔppa. 11 Ki-laamin-la ṯǝ kɔlɔ, limɔŋǝsi ilŋanyji Kwiglǝthǝ ki-mǝḏiinǝ-nǝ kwǝthi Ḏaawḏ-ŋǝ, kwǝni Kwɔrɔsṯa kwir Kweeleny! 12 Nyii kwɔŋǝsi andaci @alaama wǝthi-yi elŋe tɔɔrɔ kɔrɔ: ŋaaŋa linḏa tɔɔrɔ tippǝnnǝ yirethi naana tinḏiralɔ ki-sɔnḏuuŋ-nǝ, kwɔnaana kireny-na.” 13 Ŋwɔṯaŋw biḏaan nǝ jesh kwuuru kwǝthi limeleka lǝthi ki-leere-nɔŋw iirǝthǝ tɔc meleka naana, nǝr ɔrtatha Allah rilŋa-ri nǝraarɔŋw, 14 “Ŋinith ŋǝthi Allah ŋǝṯi naani ki-leere-na kider, nǝ a ṯaama naana naani kwurǝyu-lu, ki-lizi-nǝ lǝṯɔŋw-li aamina!” 15 Mǝsi limeleka ɔrlacci ŋwɔdoŋw mindaŋ mǝr aaɽiṯha ki-leere-na, nǝ nyaaɽa andasi-na wɔɽe-wɔɽeny nǝraarɔŋw, “Ǝrṯi ele manɔ Beiṯ-lahm ethiisa kwomne ŋgwala kwɔmǝ ǝrrini, ŋgwala kwugmǝcǝ-nyji-gi Kweeleny.” 16 Nǝreele liviɽigathɔ mindaŋ nǝr kaṯṯasi Mǝryǝm-ŋwɔsi Yuusuf-gi nǝ tɔr tok tinḏralɔ ki-sonḏuug-nǝ kwɔnaana kireny-na. 17 Mǝ nyaaɽa ese ŋunduŋw, nǝrsi andaci ŋa ŋandicasi meleka ŋǝthi tɔr kɔrɔ. 18 Nǝ kila tatap limǝsi neŋne, nǝr liŋɽi ŋiɽaŋal-ŋi ŋandicasi nyaaɽa. 19 Ǝṯi Mǝryǝm ṯiŋaayini kwomne-ŋgwɔ tatap, ǝṯɔŋw-ŋgi urtutuninǝ ki-ṯɔgwor-na ṯuuŋwun. 20 Nǝ nyaaɽa aaɽi nyiniyǝ Allah-na nǝ wɔrtathir tok rilŋa-ri ŋiɽaŋal-ŋi ŋǝthi kwomne-ŋgwa tatap kwɔniŋnar nǝ kwiisar tok, kaka-ṯǝ ŋa dap-dap ŋandicasi-ŋi meleka.
Yǝcu mǝr-gwɔ ǝnyjici yiriny.
21 Mǝ ŋwaamin dɔvokwɔppa ere, mǝ lɔɔmɔr iila kila lǝthi-li uɽu tɔɔrɔ lɔthrɔnya, nǝr ǝnyjici yiriny yǝni Yǝcu, kiya yǝnyjicǝsi meleka iti iithar-ŋwɔ ŋunduŋw kinnǝni mac.
Yǝcu mǝrgeele ki Heikal-na.
22 Mǝ lɔɔmɔr iila lǝthi-li Yuusuf-ŋǝ Mǝryǝm-gi suuɽunni, kaka nǝllicǝsi-gwɔ Muusǝ waamira Sherii@a-gi kwuuŋwun, nǝ ŋwɔṯaŋw nǝr dimmǝ tɔɔrɔ nǝr-ri ele Urshaliim ethi inḏǝthǝ Kweelenyi, 23 kaka lɔɔthɔnar-gwɔ ki Sherii@a-na kwǝthi Kweeleny ŋaarɔŋw, “Mǝr elŋe tɔŋwɔra tir nda tǝ, ǝri rillici Kweelenyi-lɔ ṯer.” 24 Nǝreele tok ethi kitta kiraama kǝthi lɔrrɔ ndǝn ya yɔɔthɔr yiɽǝn yir ŋwurgwudu, kaka-ṯǝ ŋa ŋandisasi Kweeleny ki Sherii@a-nǝ kwuuŋwun.
25 Ki-lɔɔmɔr-la-ṯǝ kila, nǝ kwɔr naani kwette Urshaliim kwǝni Sim@aan kwirllalɔ kwǝṯi iiɽi Allah-na, nǝ ǝṯɔŋw ǝkkici ŋiglǝthǝ kizǝn ŋǝthi Israa-iil. Nǝ ǝṯi-gwɔ Ṯigɽim Ṯirllinǝlɔ ter ɔmina. 26 E-ta nǝ Ṯigɽim Ṯirllinǝlɔ ter ruwǝcci ŋunduŋw ŋiɽaŋali-lɔ ŋǝniŋw, kwiti kweese ŋiɽany kinnǝni mac mindaŋ mɔŋweese Kwɔrɔstɔ-ŋwɔ kwǝthi Kweeleny. 27 Nǝ Ṯigɽim iili Sim@aan-ŋwɔ ki Heikal-na, nǝ Yuusuf-ŋǝ Mǝryǝm-gi aava Yǝcu-ŋwɔ kwir tɔr ki Heikal-na ethi ǝrrici ǝthiyǝ wirga wandisa-yi Sherii@a, 28 nǝ Sim@aan dimmǝthǝ tɔɔrɔ kiriny nɔŋw ɔrtatha Allah nɔŋwɔccǝŋw,
29 “Kweeleny a kwɔmǝ ṯimmasi wa@ḏa wɔɔŋa aŋwɔnɔ,
ṯaŋw a duŋgwǝci khaḏaama kɔɔŋa ŋweele kaami naana.
30 Nyii kwɔmǝ ese ŋiglǝthǝ ŋɔɔŋa yǝy-yi yiinyi.
31 Ŋa ŋidaɽimica-ŋǝsi lizi tatap kiyǝnǝ yeeŋen.
32 Fɔɔri kwinḏi ethi ruwǝnnici Umama-lɔ ŋiɽaŋal-ŋi ŋǝthi
ṯɔgwor ṯɔɔŋwa,
ethi ǝvicǝ lizi lɔɔŋwa lir Israa-iil ŋinithi.”
33 Nǝ ṯǝrnyin-ŋǝ lǝnyin-gi liŋɽi ŋiɽaŋali-ŋi ŋandisasi Sim@aan ŋǝni ŋundu. 34 Nǝsi Sim@aan ɔrtatha, mindaŋ nɔŋwɔccǝ Mǝryǝm-ŋwɔ kwir lǝnyin, “Iisa-ṯi tɔr kɔrɔ tǝlli Allah-na ethisi kiirasalɔ luuru, nǝ ethisi kilǝthi luuru tok lǝthi Israa-iil. Ŋworo @alaama wǝthi Allah winḏi lizi littǝzir ethi andindisa naana ṯuwǝnu-ṯuwǝnu. 35 Mindaŋ ŋwɔsi ruwǝcci ŋejmeth-lɔ ŋǝthi ǝfkǝr wǝthi rɔgwor reeŋen. Ǝŋǝ ṯɔrɔɔnyɔna ṯir kaka kaalala kiiraana ovece ŋaaŋwɔ ṯɔgwori-na ṯɔrɔṯ.” 36 Nǝ kwiɽii naani kwette kwir kwaaw kwir kimǝyǝŋ kwir kweeṯhel kwǝni Hanna kwir tɔr ṯǝthi Fanuu-iil kwǝthi gabiilǝ kǝthi Ashiir-ŋǝ. Kwǝginǝ yithlǝyu dɔvokwɔɽony dak, 37 nǝ kire-kirem-ŋgwɔ ŋɔŋworo yithlǝyu ruɽi-kwaɽiŋan-la kwaɽiŋan. Nɔŋweere rucci Heikala-na mac; ǝṯɔŋw kwogwɔcce Allah-la kaŋwɔn-kaŋwɔn, kulu-kulu, kwimthi arminḏaani nǝ ṯaara kiyiiriny tok. 38 Nǝ ki-saa@-la ṯǝ ŋgwa nɔŋw ɔppatha mindaŋ nɔŋwɔccǝ Allah shukran, nɔŋwsi andaci lizi tatap ŋǝthi tɔr, kila lǝkkicǝ Allah kizǝn ethi alla Urshaliim-ŋwɔ ki-ŋɔwaay-na.
Yuusuf-ŋǝ Mǝryǝm-gi mǝr-gwɔ aaɽitha Naasira.
39 Mǝ Yuusuf-ŋǝ Mǝryǝm-gi ṯimmasi ǝthiyǝ wǝthi Sherii@a kwǝthi Kweeleny, nǝr aaɽitha ki-mǝḏiinǝ-nǝ kweeŋen kwǝni Naasira kwɔnaana Jǝliil. 40 Nǝ tɔr peŋe mindaŋ nɔŋw ferlle, nɔŋw urǝnni-nǝ ṯǝthinǝ-ṯhi yǝnǝ deddep, nǝgwɔ ne@ma kwǝthi Allah naanina.
Tɔr tǝni Yǝcu a-naana-ŋgwɔ ki Heikal-na.
41 Ǝṯi ṯǝrnyin ṯǝthi Yǝcu-ŋǝ lǝnyin-gi ṯaaŋi Urshaliim yithlǝyu tatap ethi kitta @iiḏǝ wǝthi Fis-ha. 42 Na mǝ Yǝcu oro yithlǝyu wrii-kwuɽǝn nǝreele ki-@iiḏ-nǝ kaka nɔrɔ-gwɔ ǝthi weeŋen. 43 Mindaŋ mǝ @iiḏ ernene tǝ nǝraari ibṯǝḏi ethaaɽitha dɔɔnɔ. Laakin nǝ tɔr tǝni Yǝcu ṯathinaɔlɔ Urshaliim-na. Nǝ ṯǝrnyin-ŋǝ lǝnyin-gi ere elŋece ŋiɽaŋali ŋɔ mac; 44 nǝraarɔŋw ŋgwana-ta kǝzinni ki-lɔdɔŋw-na, ŋwɔṯaŋw nǝreele aaŋwɔnɔ min-min, mindaŋ nǝraari ibṯǝḏi ethi naŋna-lɔ ki-lizi-nǝ leeŋen nǝ limethgen tok. 45 Mindaŋ mǝreere kaṯṯasi mac tǝ nǝr aaɽitha Urshaliim ethi naŋnalɔ. 46 Nǝ mǝ ŋwaamin ṯoɽol ere nǝr kaṯṯasi ki Heikal-na, kwɔnaanalɔ mɔ@allimiin-gi kwǝthi Yahuuḏ, lakkica-ŋwsi kizǝn, nǝ ǝṯɔŋwsi uṯicǝlɔ tok; 47 nǝ kila tatap liniŋnaca liŋɽi elŋeṯṯe-ŋgi kwuuŋwun ŋiɽaŋali-na, nǝ ŋa ŋǝṯiŋwsi-ǝi aǝnici tok. 48 Nǝ ṯǝrnyin-ŋǝ lǝnyin-gi liŋɽi mǝreese, mindaŋ nǝ lǝnyin ǝccǝŋw, “Tɔr, a kwotho kwǝrricǝ-nyji ŋiɽaŋali ŋɔrtɔŋw? Iisa-ṯi nyuŋwsi ṯarnyalɔ-thi abiyinyii-gwɔ ṯurvǝ biɽe-biɽeṯ ethi naŋni ŋaaŋwɔ-lɔ.” 49 Noŋwsi ǝŋnici nɔŋwsǝccǝŋw, “Aatha kworo kwɔnǝŋnicǝr-nyii-lɔ? A liti lilŋithi mac ethaarɔŋw, kwinḏi laazim ethi naani ki-dɔɔnɔ kwǝthi Papa kwiinyi mac-a?” 50 Laakin ŋa ŋǝŋnicǝŋwsi-ŋi nǝrseere elŋe mac. 51 Mindaŋ nǝ Yǝcu aaɽitha Naasira ŋundu-ŋǝli, nɔŋwsi-gwɔ iinyici naana. Nǝ lǝnyin aanitha ŋiɽaŋali ŋɔ tatap ki-ṯɔgwor-na ṯuuŋwun. 52 Ǝṯi Yǝcu duŋgwɔ-ŋgwatha ṯǝthinǝ-thi yǝnǝ, nǝ aŋna-yi tok, nǝ Allah ǝmminici nǝ lizi tok ṯikikiɽǝnnǝ-thi.
aza 2
ŋelŋe ŋeḏi Yecu
1 ner ṯa orɔ ŋwu ki ŋwomur ŋwa, na aguztuz gezar alla amra eḏi lɔ yiriny yeḏi lizi leḏi ṯurmun tatap. 2 na kiriiniyuuz orɔ muḏiir kwedi zuriiyaŋw, ki lamin limerli lɔ yiriny ṯay ṯi. 3 ner andiḏa tatap ki yayin yeŋen eḏi zi loce yiriny. 4 na yuzif diɽi tɔk jaliil, kayin weni nazra, ner ele yahuḏiiya kayin wete weḏi dauḏ-ŋa, weni beyṯlahm, urŋw gwu kweḏi dauḏ-ŋa, kwuruḏuŋw gwi, 5 ner ele maryam gi kwukemṯaŋw, eḏi zi loce yiriny, kweni kwuṯigideza. 6 ner ṯa orɔ ŋwu, nanir gwu kinaŋw ta, na ŋwamin ṯimayini keni eḏelŋe. 7 nuŋw elŋe kwukwuŋw kwir nda; nuŋw pezi yireṯi nana, nuŋw kete ki zanḏuk-na kwunani kireny-na, kaka iiracazi gwu ezir weḏi gwu nani ki manzil-na.
8 na nyaɽa nani kinaŋw ŋirel ŋi kwuḏer, ŋaŋricarzi kuluŋana, 9 nezi maleyka kwete kweḏi Kweleny enḏiḏena pugwuṯ, nezi ŋinit ŋeḏi Kweleny ṯiŋaci fori lu; ner ṯenye ṯeṯec. 10 nezi maleyka andaci nuŋw zi eca ŋwu; eṯiṯinya mac, kaka ma ŋazi gwu efiza ŋiɽaŋali ŋizaw ŋeḏi ŋi nyeŋlena, ŋinḏi eḏ ilica lizi tatap. 11 kaka mer ŋazi gwu ilŋanji aŋwunu, kayin weḏi dauḏ-ŋa, Kwigileḏa kwir Kwruztu, kwir Kweleny. 12 nyi kwɔŋazi andaci kwɔmne kweḏi gi elŋe Toru kru: a linḏa Toru tipena yireṯi nana tinḏiru ki zanḏuk-na kwunani kireny-na. 13 ner ireḏa maleyka nana tuc luru leḏi kilerena, ner ortaḏa Allah, ner aru ŋwu:
14 ŋiniṯ ŋeṯinanni nani gwu Allah kindala kider;
a ŋiɽena nani ki ṯurmun-na, ki lizi-na leṯəmi Allah-na.
15 ner ṯa orɔ ŋwu, mezi limeleyka orlaci ŋwudɔŋw ner aɽaḏa kilerena ta, na lor lir nyaɽa andizaḏizina, ner ari: er ma pa ele beyṯlahm eḏeze kwɔmne kwumorɔ, kwumenyji gi Kweleny andaci. 16 ner firgazi kilya, ner upaḏi, ner inḏa maryamŋwuzi yuzif gi, na Toru tɔk tinḏiru ki zanḏuk-na kwunani kireny-na. 17 mer eze, ner iṯiḏi ŋiɽaŋali la ŋandicarzi ŋeḏi Tor kru. 18 na limɔneŋne, ner ureŋni tatap uraŋ ŋiɽaŋal ŋi ŋimezi nyaɽa andaci. 19 na maryam ŋundu miḏa ŋiɽaŋali ŋu, nuŋw ŋi orutuni ki ṯugwor-na. 20 na nyaɽa aɽa, ner nii Allah-na, ner ortaḏa tɔk ŋiɽaŋal ŋi ŋiniŋnarzi, ŋizarzi tɔk, ŋandicarzi ŋeni ŋwu ŋwu.
21 ma ŋwamin ŋweḏi Tor orɔ dufɔkwupa ner uɽu luḏrunya ner enjici yiriny, ner eca Yecu, kaka andicazi gwu maleyka kerreny, iti iḏa gwu lenyin kinna mac.
ṯortaḏa ṯeḏi Yecu ki heykal-na
22 ma ŋwamin ṯimayini ŋweḏi kuruu keḏi ŋelŋe, kaka andiza gwu muuza kuruu-na, ner ele urzaliim eḏi rillici Kwelenyi lu. 23 (kaka luḏinar gwu kuruu-na keḏi Kweleny, ŋaru ŋi ŋwu: mer elŋe tɔŋwora tay ṯi tir nda, eṯir rillici Kwelenyi lu, ŋwu eni tor ṯirlinelu ter), 24 eḏundici kwɔmne kworɔ tɔk andinar gwu kuruu-na keḏi Kweleny; eḏi kwubazi lurruŋi nden ya yuəduri yiɽen, yir ŋwurgwudu.
zimaan na ṯilŋa ṯuŋwun
25 na kwor nani kwete urzaliim, kweni zimaan, kwofḏana, kwami miḏa kuruu ŋwu tɔk, kweṯəkizi kwete kizen kwinḏi eḏi zi kakindizelu leḏi izrayiil, na eṯi gwu Ṯigɽim ṯirlinelu ter nani-na. 26 nezi Ṯigɽim ṯirlinelu ter ilŋiiḏini ŋunduŋwu kerreny ŋeḏi ŋi ere ay mac, ŋeḏi nani mindaŋ eḏinḏa Kwruztuŋw kweḏi Kweleny. 27 na Ṯigɽim iili ki heykal-na, ki lamin lenḏi li lenyin kweḏi Yecu-ŋa ṯernyin ṯi Tor ri, eḏerrizi kuruu keḏi əḏi. 28 ta na zimaan dimi kaɽfiny, nuŋw ri ortaḏa Allah, nuŋw eca ŋwu:
29 Kweleny, a kwefrinje nyuŋwu, kwir kaḏaam kɔŋwa, eḏele kirem ŋiɽena ŋi,
kaka kitaḏi ŋa gwu;
30 kaka ma gwu yey yinyi eze ŋigileḏa ŋɔŋa,
31 ŋa ŋidaɽmaḏi ŋa zi ki yey-na yeḏi lizi tatap,
32 ŋir fori kwinḏi eḏi ruwenizi lizi lu leḏi umam.
eḏi gi baŋaci lizi lɔŋwa, leni izrayiil, ŋiniṯi ŋɔŋa.
33 na ṯernyin-ŋa ureŋni ŋiɽaŋal ŋi uraŋ, lenyin gi kweḏi Yecu-ŋa, ŋandizaŋw zi ŋeni ŋundu. 34 nezi zimaan ortaḏa, nuŋw zi andaci maryamŋw, kwir lenyin kweḏi Yecu-ŋa, ŋeḏi Tor, nuŋw eca ŋwu:
izaṯi, Tor kru tinderṯa timer kete eḏi zi ṯiŋaṯa litezir leḏi izrayiil, eḏi zi diɽezi la litezir tɔk,
eḏorɔ tɔk ṯiruwenizelu ṯeṯir zi ṯi upipiḏace lu,
35 ŋwu zi ṯa ruwece lu luru ṯortutina ṯulucer ki rugwor-na.
(na ŋa ta, a ŋa emba kalala irṯici ŋaŋwu rɔgwɽɔ tɔk.)
kwaw kweni hanna
36 na kwaw nani kwete kwir kwiɽi, kweni hanna, kwir tor teḏi fanuwil, kweḏi lizi leḏi azur-ŋa, kwir kimeyaŋ dɔkwɔl dɔkwɔl; urŋw gwu tira, na kwor kwete agwu, ner gi nani yiḏleyu dufɔkwɽeny, 37 mindaŋ nuŋw orɔ kweḏel nuŋw nani ŋeḏela yiḏleyu ruɽi-kwaɽŋan-kwaɽŋan; eṯuŋw ere ruci heykal-na mac; eṯuŋw kwoce Allah lu, kwalilaḏi eḏneya rii, kwariri ki yiriny kulu kulu kaŋwun kaŋwun. 38 nuŋw ila ki lomur ṯa kla, nuŋw ortaḏa Allah tɔk, nuŋw zi ŋi andaci ŋeni ŋundu tatap kla linanja ṯalliḏiza lu ṯeḏi urzaliim.
ŋɔgɔŋ ŋeḏi Yecu
39 mer zi erri tatap ŋeḏi kuruu keḏi Kweleny, ner aɽaḏa jaliil ki balaḏ-na kweŋen kweni nazra. 40 na Tor duŋgwuŋgwa, nuŋw ferle teter; eṯuŋw eḏi yeyna, na eṯi gwu ṯortaḏa ṯeḏi Allah omi-na.
41 eṯi ṯernyin-ŋa ṯaŋi lenyin gi ki yiḏla tatap urzaliim ki iid-na weḏi kuruu keni ṯiṯamḏa ŋiɽany. 42 mindaŋ muŋw orɔ yiḏleyu wri-kwuɽen, ner ṯaŋi urzaliim ki iid-na, kaka eṯir gwu erri əḏya. 43 ma iid ṯimayini, mer ele ki ṯay la eḏaɽa, na tɔŋwor teni Yecu ṯaḏi-na ŋundu urzaliim, ŋezi lizi lugwun ere elŋece mac. 44 ner ta aruŋw: ŋgwata kezni ki duŋw-na. mindaŋ mer ele ki ṯay la lamin lete, ner naŋni ki lizi-na linḏir li, lilŋiiḏir zi tɔk. 45 mer ulezi ḏuṯ, ner aɽaḏa kwokwony urzaliim eḏi naŋna. 46 ma ŋwamin ṯɔɽɔl orɔ, ner kaṯazi ki heykal-na, kwunanalu ki limuallim-na keligeny-na. eṯuŋw zi niŋnaci, eṯuŋw zi uṯizelu tɔk ŋiɽaŋal ŋi ŋere ŋere. 47 na kla tatap liniŋnaca ureŋni ŋiɽaŋal ŋi uraŋ, ŋilŋiiḏuŋw zi-na, ŋupupuḏazaŋw gwu tɔk. 48 mindaŋ mer eze ner liŋɽi, na lenyin eca ŋwu: Tor tinyi, ŋɔdɔ ŋerricanyji ŋwu? izaṯi, nyiŋa limɔŋa naŋni ṯarnyalu ṯi mindaŋ nenyi ronyina. 49 nuŋw zi eca ŋwu: aḏa kwiri kwuneŋnicaŋa nyuŋwu? ŋiti ŋilŋiicaŋa zi manya eḏaruŋw: ŋofdana eḏuŋw nani ki duənu kweḏi Papa kwuŋwun? 50 ner zi ere elŋece mac ŋimɔŋw zi andaci. 51 ner li ele, ner oɽi nazra, nuŋw zi miḏici ŋiɽaŋali. na lenyin aniḏa ŋiɽaŋali ŋu tatap ki ṯugwor-na.
52 eṯi Yecu ami duŋgwuŋgwa ŋwu, ŋiɽaŋal ŋi tatap, na eṯuŋw əmi Allah-na lizi li.