Ŋikiya-ŋa ṯiɽinyacathilɔ.
(Maṯṯa 18:6-7, Maṯṯa 21-22Mɔrgus 9:42)1 Nǝ Yǝcu ǝccǝ ṯalaamiiza ṯuuŋwun-ŋwɔ, “Ṯɔmɔmma ṯǝthi ǝrri ŋikiyaŋi ṯinḏi ethiila rerrem; laakin ǝyǝwǝy ǝnnǝ ṯurvǝ ṯǝthi ŋgwa kwinḏi ethaava! 2 Ŋɔvthanna beṯṯen ǝŋgir kǝkkici ŋundu-ŋw aali wɔrom-la kwuuŋwun mindaŋ ǝŋgir kaṯṯɔ ki-bahar-na, ki-lɔɔbi lǝthi-li kaṯṯɔ tette tǝthi kinyɔ nyokwɔɽony ki-ŋikiya-na. 3 Ŋwoṯaŋw aŋricarsi ŋa ŋǝṯisi ǝrri!
“Mǝ aŋgalɔ ǝrri ŋikiyaŋi ǝrmicǝ ŋunduŋwɔ, mɔŋw urlǝ ṯɔgwor-lɔ, ǝsi fivrici. 4 Mɔŋw ǝkkici ŋaaŋwɔ pir nyaamin-na dɔvowɔɽony aaŋwɔn wɔtɔpɔt, nǝ mɔŋw tǝ aaɽinna ṯogdo-ṯogdo ethǝccǝ ŋaaŋwɔŋw, ‘Nyii kwɔmǝ urlǝ ṯɔgwor-lɔ’, laazim ǝsi fivrici.”
Ŋɔma ŋǝthi ṯǝmminǝ.
5 Nǝ yǝavɔr ǝccǝ Kweelenyi-ŋwɔ, “Kiɽǝccǝ-nyji ṯǝmminǝ ethi ferlle.”
6 Nǝsi Kweeleny ǝŋnici nɔŋwsǝccǝŋw, “Mǝthi ṯǝmminǝ tokwɽoc ṯir kaka lɔɔla lǝthi kwatta, ǝŋgǝthi ŋɔma ethi ǝccǝ kwaaɽi kwɔppa-ŋwɔ ‘Ǝllinǝ rɔvɔɔra-lɔ mindaŋ ǝnyjinǝlɔ ki-bahar-na!’ Ǝŋgiŋw tǝ iinyici ŋaaŋwɔsi naana.
Ŋothɽor ŋǝthi khaḏaam kisaaw.
7 “Ǝŋgi kwette daŋgal-na ǝthi khaḏaama kǝṯi ǝgici ŋɔrɔŋ alla kǝṯi iyici yaaŋali-lɔ mindaŋ mɔŋw aaɽa ki-wuthǝr-nǝ, kwɔŋwɔ ǝccǝŋw, ‘Fiɽigathɔ a-naana-lɔ a yee ethneyǝ wɔɔŋa?’ 8 Ṯaba@an bǝri! Kwiti kwɔŋwɔ ǝccǝ mac ŋwɔ, ‘Daɽimica-nyii @asha nyii kettice-lɔ cɔgwo-cɔgwop, e-ta ǝmǝ kenne yirethi nyii ǝkkici ŋothɽor kethne-la, mindaŋ mǝnyii ethne nǝ mǝnyii ii tok; e-ta kwaathan tǝ, ǝmǝ yee ethneyǝ wɔɔŋa’. 9 Nǝ khaḏaam kɔvthanna ethi ǝccǝ-ŋw shukran kaka mɔŋgwɔ iinyici waamira naana? 10 Nǝrṯoroŋw tok ŋaalɔ mǝsi ǝrri ŋa tatap ŋandicar-ŋǝsi ethisi ǝrri tǝ, ǝṯaarɔŋw, ‘Nyiiŋǝ lir tǝ yaḏaama domony; ŋǝrrǝ-nyji-ṯǝ ṯɔɽɔk ŋirga ŋǝṯi-nyji ǝrri’.”
Yǝcu mɔŋgwɔ sǝwi nyiilǝŋǝ wrii.
11 Mǝ Yǝcu ele kwinḏi Urshaliim, nɔŋw rɔɔmasi ṯiɽany-lɔ tǝthi Saamira-ŋa Jǝliil-gi. 12 Mɔŋweele ethi ǝnḏi ki-lilli-na leṯte nǝr kadrithi nyiilǝŋ-nyi ki-thaay-la wrii nyuumǝ ŋiilǝŋǝ ŋigii ṯiga-ṯiga. Nǝr rilli kinǝŋgwu tuk. 13 Nǝr mithithi kwɔɔla nǝrǝccǝŋw, “Yǝcu! Yaa Sǝyyiḏ, iinǝ-nyji-ṯǝ ṯɔgwor-na!”
14 Mǝsi Yǝcu ese nɔŋwsǝccǝŋw, “Nḏir naanɔ-gwɔ kaahin kwɔŋǝsi rarŋa naana.” Mindaŋ mǝr iidǝthǝ kithaay mǝreele, nǝr suuɽunni. 15 E-ta mǝ kwette deŋgen-na iisanni kwɔmǝ saawi, nɔŋwaaɽa kwɔrtathɔ Allah ŋɔmmaŋi-ŋɔmmaŋi. 16 Nɔŋw iidi kwurǝyu-lu ŋwɔɽelle-na ŋwɔthi Yǝcu, nɔŋwɔccǝ shukran. Kwɔr-ŋgwa tǝ nɔŋworo kwǝthi Saamira-ŋw. 17 Nǝ Yǝcu aarɔŋw, “Naa lizi lir wrii lima suuɽunni-yǝ; nǝ lende kwunǝṯurri? 18 Arpa kwotho kwɔmaaɽa ŋgwɔ dak kwǝthi fartɔŋwɔ ethi nii Allah-na?” 19 E-ta nǝ Yǝcu ǝccǝŋw, “Diiɽu ele ṯǝmminǝ ṯɔɔŋwɔ ṯimǝŋǝ sǝwi.”
Mǝ ŋeeleny ŋǝthi Allah iila.
(Maṯṯa 24:23-28, Maṯṯa 37-41)20 Nǝ Lifirriisiiyyiin lokwo iila naanɔ-gwɔ Yǝcu, nǝr uṯicǝlɔ Ŋeeleny-ŋi ŋǝthi Allah, ŋǝŋgi iila ṯaccaŋ. Nɔŋwsi aŋnici nɔŋwsǝccǝŋw, “Ŋeeleny ŋǝthi Allah ŋiti ŋinḏi ethiila ṯǝrṯiib-thi ṯǝthi-thi iijini mac. 21 Kwiti kweere mac kwǝthi ŋɔma ethaarɔŋw, Iisar-mba, ŋɔrpa-ŋɔ!’ ya ‘Ŋɔrpa ŋaana!’ Kaka naanɔ-gwɔ Ŋeeleny ŋǝthi Allah daŋgal-na.”
22 E-ta nɔŋwɔccǝ ṯalaamiiza-ŋw, “Lɔɔmɔr kila linḏi, linḏiŋǝ-li ethǝthi sɔɔrɔma beṯṯen kwǝthi-gi ese laamin lette lǝthi ŋwaamin ŋwɔthi Tɔr tǝthi Kwizigwunǝŋ laakin ere ese mac. 23 Linḏi ethi naani kila linḏi-ŋǝsi ethǝccǝŋw, Iisar-mba kwɔrpa-ŋgwala kinanaŋw!’ ya ‘Kwɔrpa-ŋgwɔ kɔnɔŋw!’ Ǝṯi ruuthu mac ethisi kwaathitha. 24 Kaka nǝṯi-gwɔ ṯimen aari pinǝk leereya naana, ǝṯɔŋw erṯelɔ ki-ṯuɽumǝ kitha mindaŋ ǝṯɔŋw ɔppathi ki-ṯuɽumǝ ṯithaathɔ, nǝ ǝrṯǝ oroŋw ŋǝthi Tɔr tǝthi Kwizigwunǝŋ ki-laamin-lǝ luuŋwun. 25 Laakin laazim ŋwɔ rǝrinni kerreny kwomne-gi kwittǝzir, mindaŋ a lizi lǝthi lɔɔmɔr luuŋwun dirnathalɔ. 26 Kaka-ṯǝ ŋa ŋǝrrinǝ ki-lɔɔmɔr-la lǝthi Nuuh, ǝrṯǝ oroŋw tok ki-ŋwaamin-la ŋwɔthi Tɔr tǝthi Kwizigwunǝŋ. 27 Nǝraari isṯimir ethi ethne nǝ ethii tok, nǝ lɔr-ŋa laaw-li aagithathisi-nɔ, mindaŋ mǝ laamin iila kila limǝ-li Nuuh ǝnḏi ki-mɔrkǝb-nǝ, nǝ kiiru ɔɽa nɔŋwsi kiirasalɔ tatap. 28 Ŋinḏi-ṯǝ ethoro ṯǝŋw kaka ŋa ŋǝrrinǝ ki-lɔɔmɔr-la lǝthi Lɔɔṯ. Ǝṯiraari isṯimir ethi ethne nǝ ethii tok, ǝṯir liṯṯathisina, ǝṯir kiithi, ǝṯir acci yiŋna. 29 Laakin ki-laamin-la limǝ-li Lɔɔṯ ɔrlacci Saḏɔɔm-ŋwɔ ŋwɔdoŋw, nǝ iigǝ ɔɽa kawwa ki-leere kibriiṯ-gi nɔŋwsi kiirasalɔ tatap. 30 Ŋinḏi-ṯǝ ethoroŋw ki-laamin-la kila linḏi-li Tɔr tǝthi Kwizigwunǝŋ ethi ruwǝnnǝlɔ.
31 “Ki-laamin-la ṯǝ kila, mɔŋw naani kweere kiɽibala kǝthi yiŋna yuuŋwun, laazim ŋweere dappitha-lɔ mac ethi ǝnḏi kiininy kwuuŋwun ethi ɔṯa kwomne kwuuŋwun; nǝ ǝrṯǝ oroŋw tok ŋǝṯhi kwizi-ŋgwa kwɔnaanɔ kwuthǝr, laazim ŋweere aaɽitha ki-dɔɔnɔ kwuuŋwun mac. 32 Ṯiŋaayinarsi ŋǝthi kwaaw kwǝthi Lɔɔṯ! 33 Kweere kwǝṯi ṯǝcci ethi ǝgini ŋimiitha ŋuuŋun ŋwɔsi ṯuusi; laakin kweere kwɔṯuusi ŋimiitha ŋuuŋun ŋwɔsi kilǝthi. 34 Nyii kwǝccǝ-ŋǝsi-mǝ ŋwɔ, kulŋǝ ṯǝ ŋga, mǝr naani ndǝn linḏirɔ kwaŋgiraŋ-la kwɔtɔpɔt; ǝri dimmǝ kwette, ǝri ṯayyalɔ kwɔthaathɔ. 35 Mǝ laaw naani ndǝn luruuthu kal-kalɔ; ǝri dimmǝ kwette, ǝri ṯayyalɔ kwɔthaathɔ. [ 36 Mǝ lɔr ndǝn akki ŋothɽor kwuthǝr; ǝri dimmǝ kwette, ǝri ṯayyalɔ kwɔthaathɔ.”]
37 Nǝ ṯalaamiiz uṯicǝlɔ nǝrǝccǝŋw, “Ṯaka Kweeleny?” Nɔŋwsi ǝŋnici nɔŋwsǝccǝŋw, “Kǝzir wette nyithak wǝṯi-gwɔ kwomne naani kwaythalɔ ǝṯigwɔ ŋwɔfirṯaŋ iirǝthǝ.”
aza 17
ŋiɽaŋal ŋere ŋere ŋandiza zi Yecu
1 nuŋw andaci limeḏgen, nuŋw zi eca ŋwu: ṯiṯugwudaza eḏaki pir ṯila rac, lakin, eyewey, ṯurfa teḏi ŋgwa kwinḏi eḏi zi ṯugwudazi! 2 ŋizawi duŋgwun eḏi kəkini ali kwrɔm, eḏi kaṯu ki tujul-na, muŋw ṯugwudazi tete kru tɔkwɽeny eḏaki tay pir. 3 aŋiranar; ma ŋazi aŋgalu əkizi lɔmori puɽcur ta, ermicer, muŋw orla ṯugwori lu, iɽnyacarzelu. 4 muŋw əkizi ŋaŋwuzi lɔmori puɽcur nyamin dufɔkwɽeny ki lamin lutuput, mindaŋ muŋw orlaḏa ŋaŋwuzi nana nyamin dufɔkwɽeny, muŋw eca ŋaŋwuzi ŋwu: nyi orlaci ŋikyaŋi ŋinyi ŋwudɔŋw, fifricarzelu.
5 na yafur yuŋwun eca Kwelenyi ŋwu: kiɽecenyji ṯəmna. 6 nezi Kweleny eca ŋwu: eŋgi eḏi ṯəmna ṯir ṯɔkwɽoc kaka lola lete leḏi kwatta, eŋgi eca kwaɽi ŋgwu kweḏi ṯuuṯ, elline rufu ri lu a keṯini ki ṯujul-na, eŋgir ṯa errini ŋwu tuc.
7 muŋw eḏi kwete kaḏaama kete, muŋw əgizi ŋuruŋ, ya eḏi izaci ŋirela lu, mindaŋ muŋw ṯaŋa kwuḏer ta, ŋwu eca ŋgwa kwerrizaŋw zi, ila nanalu ndeḏne? 8 ta, ŋwu ere eca, əgizenyi kwɔmne gi ezir a, ami kinna yireṯŋw, nyi efiza eḏneya, mindaŋ menyi eḏne, menyi ii tɔk ta, a ma eḏne kwaḏan gi, eḏ ii tɔk a? 9 ta, ŋwu eca kaḏaama ŋgu, zukran, kaka muŋw zi gwu erri ŋa ŋandicaŋw zi eḏi zi erri a? 10 ŋu ṯa, orɔ ŋwu daŋgal-na tɔk, mezi erri tatap ŋir kaka ŋandicaŋazi eḏi zi erri, eṯaruŋw: ŋiti ŋeṯinyji ami erruŋw mac, kaka ŋeṯinyji ṯa erri ŋa ṯuɽuk kaka ŋeṯi ŋi aruŋw.
ṯizeya ṯeḏi lor wri, lir nyilaŋ
11 mer ṯa orɔ ŋwu, muŋw ele urzaliim, nuŋw ṯamḏu zaamra ŋgi, jaliil ŋgi tɔk. 12 mindaŋ muŋw enḏi kayin wete, ner biɽḏi lor li wri, lir nyilaŋ, lirlu tuk. 13 ner miḏiḏi kwola ner eca ŋwu: Yecu, muallim, iinenyji ṯugwori-na. 14 muŋw zi eze, nuŋw zi eca ŋwu: inḏir ta, a ma baŋaci kiziiza kalu yaŋna. ner ṯa orɔ ŋwu, mer keni ele ki ṯay la ta, ner zeyini. 15 nuŋw izani kwete deŋgen-na, muŋw zeyini, nuŋw orlalu ŋwal ŋi ŋwupa kwuniya Allah-na ŋinit ŋi ŋumma ŋi. 16 nuŋw iidicelu ŋwuɽele-na, nuŋw eca ŋunduŋwu, zukran, kwunde kwir kweḏi ezir weni zaamra. 17 na Yecu eca ŋwu: nyi ari, ŋaŋa liri wri lidaɽmina. na lende kwuniṯri? 18 kwiti kwere kwurna ɽa eḏi nii Allah-na ŋiniṯ ŋi, illa kwor ŋgwu kwir ter a? 19 nuŋw eca ŋwu: diɽi, ele. ṯəmna ṯɔŋwa ṯimɔŋa zəwi.
ṯenda ṯeḏi ŋeleny ŋeḏi Allah
20 na lifarzi uṯizelu, ner eca ŋwu: ŋeleny ŋeḏi Allah ŋeŋgila ṯacaŋ? nuŋw zi eca ŋwu: a liti leḏi ŋuma mac eḏeze ŋelenyi ŋeḏi Allah yey yi yalu, mer ŋazi ilica. 21 er ere aru ŋwu mac: izarṯi, ŋir pa ŋu kunuŋ, ya ŋir pa ŋana kinanɔŋw, kaka nani gwu ŋeleny ŋeḏi Allah daŋgal-na. 22 nuŋw andaci limeḏgen, nuŋw zi eca ŋwu: ŋwamin ŋwa ŋwinḏi ŋwe ŋi naŋni eḏeze laminu lutuput leḏi Tor teḏi kwizigwunaŋ, na liti leze mac. 23 leŋazi eca ŋwu: ca ŋgwu kunuŋ, ya ca ŋgwana kinanɔŋw. eṯinḏi mac eḏi zi kwaki ḏalu. 24 kaka eṯi gwu ṯimen ari pinak kezir wete lerya nana, mindaŋ eṯuŋw ṯamḏu kezir wuḏaḏu, a Tor teḏi kwizigwunaŋ orɔ ŋwu, ki lamin luŋwun. 25 lakin, kwurerini kwɔmne gi kwitezir kerreny, a lizi leḏi lomur klu dirnaḏa lu. 26 kaka ŋwamin ŋwunani ŋi kwor kweni nuuh, er ṯa orɔ ŋwu ki ŋwamin ŋweḏi Tor teḏi kwizigwunaŋ. 27 ki ŋwamin ŋwa, eṯir eḏne, eṯir ii, eṯir amɽaḏizina eḏagiḏi, mindaŋ na lamin ila limɔ li nuuh enḏi ki faluuka-na, na kiiru ila, nuŋw zi kiraza lu tatap. 28 ŋiri ṯaŋwu, ki ŋwomur ŋwunani ŋi luuṯ; eṯir eḏne, eṯir ii, eṯir liṯaḏizi kwɔmne-na ki yiili-na, eṯir kwe, eṯir acici yiŋna tɔk. 29 mindaŋ ma lamin enḏa limɔ li luuṯ ruḏa zaḏuum, ner dunna igəŋi ki lere, mindaŋ nuŋw zi kiraza lu tatap. 30 er ṯa orɔ ŋwu ki lamin linḏi li Tor teḏi kwizigwunaŋ eḏi ruwene lu. 31 ki lamin ṯa kla, eḏi ŋgwa kwunani ki daŋga la, ere dapa mac eḏoɽi kiininy, eḏafa kwɔmne kwere kwuŋwun; ŋgwa kwunani kwuḏer-na, eḏuŋw ere aɽa tɔk mac. 32 ṯiŋayinar kwayu kweḏi luuṯ. 33 muŋw naŋni kwere nyiḏak eḏi kileḏi rɔgwɽɔ ruŋwun, kwunde kwiru kwe zi kiraza lu: muŋw ṯuzi kwere rɔgwɽɔ ruŋwun, kwunde kwiru kwe zi kileḏi.
34 nyi kwecaŋazi ma ŋwa, kuluŋa ŋga, ma lor oɽmaṯi kwaŋgiɽaŋ la kwutuput nden, er dimi kwete, et ṯay lu kwete. 35 mer nani lir law nden liruḏi, er dimi kwete, er ṯay lu kwete. 36 mer nani lir lor nden kwuḏer, er dimi kwete, er ṯay lu kwete. 37 mer zi neŋne ŋu, ner uṯizelu, ner eca ŋwu: ṯaka kwiru manuŋ, Kweleny? nuŋw zi eca ŋwu: kezir were weṯi gwu kwɔmne ay, eṯi gwu ŋwufurṯaŋ ireḏa.