Ṯɔrlacca ŋikiyaŋi ŋwɔdoŋw.
1 Ki-lɔɔmɔr-la ṯǝ kila nǝ lizi naani lokwo kinaŋw, nǝr andaci Yǝcu-ŋwɔ ŋiɽaŋali ŋǝthi lizi lir Jǝliiliiyyiin, kila limǝsi Biilaaṯɔs ɽeenye, kinaŋw kitticar-gwɔ Allah kiraama. 2 Nǝsi Yǝcu ǝŋnici nɔŋwsǝccǝŋw, “Ŋaaŋa laari ŋarnaŋw lizi kila lir Jǝliiliiyyiin lir lizi ligii beṯṯen kilizi-lǝ tatap lithaathɔ lǝthi Jǝliil-ŋwɔ, kaka niɽiryithirsi-ṯǝ ŋwɔ-a? 3 Bǝri-mǝ! Nyii kwǝccǝ-ŋǝsi-mǝ ŋwɔ, meere ɔrlacca ŋikiyaŋi ŋaalɔ ŋwɔḏoŋw mac tǝ, ǝtǝ ai tatap tok kaka ṯǝ ŋunduŋwsi. 4 Nǝ ŋǝthi kila lir wrii-dɔvokwɔppa limǝsi lithmin lɔɔlala aathitha mindaŋ nɔŋwsi ɽeenye kǝzir wǝni Silwaam. E-ta ŋaaŋa laarɔŋw lizi kila lithǝmthisi-lǝ ŋikiyaŋi tatap linannɔ Urshaliima? 5 Bǝri-mǝ! Nyii kwǝccǝ-ŋǝsi-mǝ ŋwɔ, meere ɔrlacca ŋikiyaŋi ŋaalɔ ŋwɔdoŋw mac tǝ, ǝṯǝ ai tatap tok kaka ṯǝ ŋunduŋwsi.”
Mǝthǝl kwǝthi kwɔɔtha kwiti kwǝṯi riiɽi mac.
6 E-ta nǝsi Yǝcu andaci mǝthǝlǝ-ŋgwɔ nɔŋwsǝccǝŋw, “Kwɔr kwɔnaanɔ kwette kwǝthi kwɔɔtha ki-jineene-na kwuuŋwun. Nɔŋweele ethi ulǝccǝ ŋwɔɔtha ŋweere, laakin nɔŋwseere kaṯṯica ŋweere mac. 7 E-ta nɔŋwɔccǝ kwɔɔrɔ kwǝṯi aŋraci jineeneya-ŋwɔ, ‘Iisa-ṯi nyii kwɔmǝthi yithlǝyu ṯoɽol yǝṯiny-yi iila kɔnɔŋw ethi ulǝcci kwɔɔtha-ŋgwɔ ŋwɔɔtha ŋweere, laakin ǝṯi-nyjeere inḏaci ŋweere mac. Uɽuthǝthǝlɔ kithaay! Aatha kwɔrɔ kwɔŋwɔ nanyji kɔnɔŋw domony ethi kiirasi wurǝyuŋi-lu?’ 8 Laakin nǝ kwɔr kwǝṯi aŋraci jineeneya ǝŋnici nɔŋwɔccǝŋw, ‘Yaa sǝyyiḏ duŋgwǝcǝ-ṯi kinnǝ kithlǝyu-ŋgɔ kette; mindaŋ nyii kwuuruci lubuŋi nyii rikaccalɔ, mindaŋ nyii balci lur. 9 Ŋwɔṯaŋw mɔŋw riiɽi nyɔɔrɔ kithlǝyu kaaɽu tǝ, a ŋiɽaŋal saawi beṯṯen, nǝ ŋiti ŋɔ mac tǝ, e-ta ǝmǝ uɽuthǝthǝlɔ kithaay’.”
Yǝcu mɔŋgwɔ sǝwi kwayɔ kwɔgwɔdɔma ṯɔɔɽɔwana.
10 Laamin lette lǝthi Sǝbiṯ nǝ Yǝcu aari @allima ki-majma@-na. 11 Nǝ kwaaw naani kwette kinaŋw kwǝthi ṯigɽimǝ-nǝ ṯigii, nɔŋw uumi ŋundu-ŋwɔ yithlǝyu wrii-dɔvokwɔppa; mindaŋ nɔŋw kwodmena nɔŋweere ǝthi ŋɔma mac ethi rillala cor-cor. 12 Mǝ Yǝcu ese tǝ, nɔŋw ɔrnɔṯi nɔŋwɔccǝŋw, “Kwaaw kwaalɔ ethiŋǝ kimǝthi kɔɔŋa duŋgwǝci!” 13 Nɔŋw kette rii ruuŋwun duŋgwun-lǝ, nǝ ŋwɔṯaŋw tɔc nɔŋw irllathala cor-cor, mindaŋ nɔŋw ɔrtatha Allah.
14 Nǝ rǝ-iis rǝthi majma@ urǝzi ṯɔgwori kaka nǝṯi-gwɔ Yǝcu sǝwi ki-laamin-la lǝni Sǝbiṯ, mindaŋ nɔŋw andaci lizi nɔŋwsǝccǝŋw, “Ŋwaamin ŋwɔnaani nyirlil ŋwɔthi-ŋi akkɔ ŋothɽor, nǝ ki-ŋwaamin-la ṯǝ ŋwɔ, nǝroro ŋwɔthi ṯisǝwǝ, laakin Sǝbiṯ tǝ, bǝri!”
15 Nǝ Kweeleny ǝŋnici nɔŋwɔccǝŋw, “Ŋaaŋa kila lǝṯi arri-ri ŋidiny! Kweere nyithak daŋgal-na kwiira kwǝṯi kǝḏu tithri ṯuuŋwun ya tǝɽiŋgǝŋi ki-lɔz-na lǝthi ŋirel ǝṯɔŋw-ri ele ethi iccǝ ŋaaw ki-laamin-la lǝthi Sǝbit! 16 Nǝ ŋǝthi kwaaw ŋgwɔ kwir tɔr tir tiira tǝthi Ibraahiim tikǝkkǝ Shiiṯaan yithlǝyu wrii-dɔvokwɔppa; e-ta ŋweere kǝdinni ki-laamin-la lǝthi Sabiṯ mac-a?” 17 Nǝ ṯɔrony mithǝ ṯuwǝnu ṯuuŋwun mǝrsi neŋne ŋǝthi ṯǝŋnicǝ ṯuuŋwun, nǝ lizi-tǝ, nǝr nyeŋlena ŋundu-ŋǝ kwomne-gi ŋgwa tatap kwǝrrǝŋw kwir ŋilim.
Mǝthǝl kwǝthi lɔɔla lǝthi kwatta.
(Maṯṯa 13:31-32Mɔrgus 4:30-32)18 Nǝ Yǝcu ɔṯalɔ nɔŋwaarɔŋw, “Ŋeeleny ŋǝthi Allah ŋaaɽinna aathaŋw? Ŋǝnyji biɽithinǝ aatha-gi? 19 Ŋaaɽinna lɔɔla lǝthi kwatta, lidimmǝ kwor kwette nɔŋw ǝnyjǝlɔ ki-ṯɔrɔny-na, mindaŋ nɔŋw peŋe nɔŋworo kwaaɽi, e-ta ǝṯi ndǝw iila ǝṯir-gwɔ kette yɔɽɔɔ yeeŋen ki-ril-la ruuŋwun.”
Mǝthǝl kwǝthi khamiira.
(Maṯṯa 13:33)20 Nǝ Yǝcu ɔṯalɔ kwokwony, nɔŋwaarɔŋw, “Aatha kwɔrɔ kwǝnyii-gi biɽithi Ŋeeleny-na ŋǝthi Allah? 21 Ŋaaɽinna khamiira kette kidimmǝ kwaaw kwette, nɔŋw-ŋgi uthǝthǝ yiilǝ yir lisǝfiyǝ ndǝn mindaŋ nǝr ole tatap.”
Ǝgwur wumǝṯinǝ.
(Maṯṯa 7:13-14, Maṯṯa 21-23)22 Nǝ Yǝcu ele nɔŋw ruu muḏun-ginǝ nǝ ŋwilli-ŋina tok, kwǝccǝ lizi @allima inḏi-ŋgwɔ etheele Urshaliim. 23 Nǝ kwette uṯicǝlɔ nɔŋwɔccǝŋw, “Kweeleny, lizi linḏi-ṯǝ ethi kilaaw leere caaw dak-ga?”
Nǝsi Yǝcu ǝŋnici nɔŋwsǝccǝŋw, 24 “Kwɔrmɔṯannar tetter ethi ǝnḏi ǝgwur-yi wumǝṯina; kaka ninḏi-gwɔ lizi littǝzir ethi tǝccici ethi-yi ǝnḏi, laakin areere ǝthi ŋɔma mac. 25 Mǝ kwizi kwǝthi dɔɔnɔŋwɔ diiɽi mɔŋw lǝŋthithǝ ǝgwur; na mǝ rilli ŋaaŋa par mindaŋ mǝ ippi lɔbaaba, mindaŋ mǝccǝŋw, ‘Kweeleny, kiṯṯicǝ-nyji lɔbaaba!’ E-ta ŋwɔ ǝŋnicǝ ŋaaŋwɔsi ŋwɔccǝ ŋaaŋwɔsiŋw, ‘Nyii kwiti kwilŋithi-ŋǝsi mac ŋaaŋa lǝthi ṯakaŋw lɔrɔ!’ 26 E-ta ǝŋnici ǝccǝŋw, ‘A kwithnar-pa na nǝr ii dɔŋw tok; nǝ ǝtaari @allima ki-lishaar-la lǝri tok!’ 27 Laakin ŋwɔsi ǝccǝ kwokwony-ŋwɔ, ‘Nyii kwende kwilŋithi-ŋǝsi ŋaaŋa lǝthi ṯaka-ŋwɔ lɔrɔ. Tuccǝrnyiinǝ kithaay ŋaaŋa tatap lir lothɽor lǝthi ŋikiya!’ 28 Ŋaaŋa limbaami aariŋw, nǝ a yee yiŋath-na tok, meese Ibraahiim-ŋwɔsi Is-haag-gi, nǝ Ya@guub-ŋǝ liɽii-ŋǝli tatap ki Ŋeeleny-na ŋǝthi Allah, nǝ ŋaaŋa tǝ limǝ kǝṯṯini par! 29 Lizi linḏi ethiila aaŋwɔn-yi, nǝ ǝzir-yi wǝṯi-yi aaŋwɔn ɔɽi, nǝ wuthǝri-ŋgi nǝ ŋwɔdoŋw-ŋala-ŋgi, ǝri naanalɔ ki Ŋeeleny-na ŋǝthi Allah. 30 Ŋwɔṯaŋw a kila liŋna ǝri aaɽitha kwaathan, nǝ kila linaanɔ kwaathan ǝri eŋne.”
Ṯamɽa ṯǝthi Yǝcu ṯamɽaŋw-thi Urshaliim-ŋwɔ.
(Maṯṯa 23:37-39)31 Ki-lɔɔmɔr-la ṯǝ kila lette-lette, nǝ Lifirriisiiyyiin iila lokwo naanɔ-gwɔ Yǝcu nǝrǝccǝŋw, “Laazim a ruu kithaay kǝzir wɔ, mindaŋ ele kǝzir wir ter, kaka naŋnaŋa-gwɔ Hiiruuḏus ethi ɽeenye.”
32 Nǝsi Yǝcu ǝŋnici nɔŋwsǝccǝŋw, “Nḏir andaci kwɔthlɔma-ŋgwa ǝccǝŋw, ‘Nyii ŋgwɔ kwɔllilli rigɽimǝ rigii kithaay, nyji sǝwi aŋwɔnɔ, nǝ ŋɔrpɔ tok, nǝ ki-laamin-la kila lir ṯɔɽɔl nyii rattasi ŋothɽor ŋiinyi’. 33 Laakin laazim nyii naani ki-thaay-la ṯiinyi aŋwɔnɔ, ŋɔrpɔ nɔ ŋɔrpɔ ŋgwala, kaka niti nɔvthannar-gwɔ mac ethi ɽeenye kwiɽiiya kǝzir weere mac illi Urshaliim.
34 “Athrɔ Urshaliim! Athrɔ Urshaliim! Ŋa ŋgwɔ kwǝṯi endindinye liɽiiyaŋi, nǝ ǝṯi accicatha yaavɔra-lɔ kiya yusicǝ-ŋǝsi Allah! Nyii kwǝṯi naŋni beṯ-beṯṯen nyaamin nyittǝzir ethi alla rii-na mindaŋ ethi aaɽasi lizi lɔɔŋwa dɔŋw, kaka kagrɔ kǝṯi aaɽasi nyagwrɔŋi dɔŋw ki-yivɔɔ-na yuuŋwun; laakin nirnyeere duŋgwǝci mac! 35 Ṯaŋw Heikal waalɔ winḏi ethi arṯinnalɔ. Nyii kwɔŋǝsi andaci, ŋaaŋa liti lǝnyii ese mac mindaŋ mǝ lɔɔmɔr iila linḏiŋǝ-li ethaarɔŋw, ‘Kwɔrtanni ŋgwa kwinḏi yiriny-yi yǝthi Kweeleny!’ ”
aza 13
ṯireca eḏorlaci ŋikyaŋi ŋwudoŋw
1 ki lomur ṯa kla, ner nani lɔkwɔ landica Yecuŋw ŋiɽaŋal ŋeḏi kla leḏi jaliilŋw, limezi bilaaṯuz irezi ŋina lu, ŋimɔŋw lagizina ŋin ŋi ŋeḏi kwɔmne, kwumer mulḏa kweḏi karaama 2 nezi Yecu eŋnici, nuŋw zi eca ŋwu: kaka rerini gwu lizi klu ledi jaliilŋw kwɔmne ŋgwu, a lari, liṯemḏi lizi la tatap ledi jaliilŋw ŋikya ŋi a? 3 nyi kwecaŋazi ma, beri; liti lir ṯaŋwu mac, lakin ma ere orlaci ŋikyaŋi ŋwudɔŋw mac, a ṯa kiraḏa lu ŋaŋa tɔk tatap. 4 ya ŋeḏi kla lir wri-dufɔkwupa, liidi li ṯilaŋgwu tinani kezir weni ziluwaam, ṯimezi eɽenye, na ari liṯemḏi lizi la tatap ŋikya ŋi leṯinani urzaliim a? 5 nyi kwecaŋazi ma, beri; lakin ma ere orlaci ŋikyaŋi ŋwudɔŋw mac, a ṯa kiraḏa lu tɔk tatap.
kwoḏa kwete kwiti kweṯi riɽi mac
6 nuŋw zi andaci ŋu ŋiŋerɔŋwa tɔk, nuŋw zi eca ŋwu: kwor kwete kweḏi kwoḏa karṯiny-na kuŋun, nuŋw ele eḏ inḏaci ŋwoḏa ta, nuŋw zi uleca. 7 nuŋw eca kworu kweṯaŋraci karṯinya ŋwu: iza ṯi, yiḏla yimorɔ ṯɔɽɔl yeṯinyi yi ila eḏ inḏaci kwaɽi ŋgwu ŋwoḏa, enyji uleci; uɽuḏi pa kiṯay nyiḏak. kwɔḏɔ kwefricaŋa kinna kureyu-na wu cakicagi? 8 na kwor eŋnici nuŋw eca ŋwu: kweleny, efrinje ṯi kiḏleyu ŋgu ṯuɽuk. nyi kwurṯizi lubuŋi, nyi kwubablaci luuru. 9 muŋw ami riɽuŋw menyjerri ŋu ta, ŋwunani; muŋw ere riɽi mac, a ta uɽu kiṯay.
ṯizeya ṯeḏi kwaw ki lamin leni zabiṯ
10 lamin lete leni zabiṯ, lirlinelu ter, andicaŋw zi ki majma-na kwete, ilŋiiḏinaŋw zi gwu, 11 na kwaw nani kwete, kwurna aŋna-na yiḏleyu wri-dufɔkwupa, mindaŋ muŋw orɔ duŋw-na teter, nuŋw ere rilalu mac. 12 na Yecu eze, nuŋw ornuti nuŋw eca ŋwu: kwaw kwalu, eḏi kimeṯ kɔŋwa kedini. 13 nuŋw kete rii nana, nuŋw irlalu tuc, nuŋw nii Allah-na. 14 na kwijowiṯ kweḏi majma aalani ŋiɽaŋali kaka mezi gwu Yecu erru ŋwu ki lamin leni zabiṯ, nuŋw andaci lizi ŋarriny ŋarriny, nuŋw zi eca ŋwu: ŋwamin ŋwiri nyirlil ŋweḏi ŋi lizi agwu ŋɔḏɽor. ṯaŋwu, ma naŋni eḏi zawi, eṯila ki lamin la lete leḏi nyirlil, eṯere ila ki lamin leni zabiṯ mac. 15 lakin, na Kweleny eŋnici nuŋw eca ŋwu: a leṯarri ŋidiny. ma ŋwamin orɔ ŋweni zabiṯ, er ere ari lere, eḏi nyi kedu nyiḏiri nyeɽiŋga nyi ki yireny-na, nyji mulɔ, nyji iica? 16 na ŋeḏi kwaw ŋgwu, kweḏi ibrahiim-ŋa, kwukəka zeyṯaan yiḏleyu wri-dufɔkwupa, ŋiti ŋofḏana eḏi kedi ŋunduŋwu ki lamin leni zabiṯ manya? 17 muŋw zi andaci ŋu, nezi ṯurony ye kla limermiḏeḏa ŋunduŋwu nana. na lizi amina tatap kwɔmne gi kwir ŋiniṯ, kwumɔŋw erri.
ṯiŋerɔŋw ṯeḏi lola leḏi kwatta
18 nuŋw zi eca ṯa ŋwu: ŋeleny ŋeḏi Allah ŋaɽina aḏa? ŋenyji biɽḏi-na aḏa gi? 19 ŋaɽina lola lete leḏi kwatta lidirna kwor, nuŋw enjelu karṯiny-na; nuŋw allida, nuŋw duŋgwuŋgwa, mindaŋ muŋw orɔ kwaɽi kwupa, na gwu ndow leṯi dindi, omi ki ril la. 20 nuŋw zi eca ŋwu kwokwony, aḏa kwenyi biɽdi-na ŋelenyi ŋeḏi Allah? 21 ŋaɽina nyuruŋwa, nyudimizi kwaw nyulucaŋw zi ki yila-na yir lizafiya nden, mindaŋ mer ole tatap.
ogwur wumeṯi-na weḏi yi enḏi ŋimiiḏa-na
22 nuŋw zi iṯiḏila ki ṯay ki ṯay, ki yayin yupa mindaŋ yɔkwɽeny rac, eṯuŋw zi ilŋiiḏinini lilaḏuŋw zi gwu urzaliim ŋgi. 23 na kwete eca ŋwu: Kweleny, likilaw lere caw, a? nuŋw zi eca ŋwu: 24 deŋniṯiner eḏi ami enḏuŋw ogwur yi wumeṯ-na. nyi kwecaŋazi ma ŋwa, linaŋni luru eḏi yi enḏi, er uleci abarya. 25 ma kwor kweḏi duənuŋw diɽi, muŋw leŋḏa ezir, mindaŋ ma ila, ma rilli par ŋgi la, ma piici ezir, ma eca ŋwu, Kweleny, Kweleny, kiṯizenyji; ta, kwɔŋazi eca ŋwu: nyi kwende kwilŋiicaŋazi, a leḏi ṯakaŋw liri? 26 ma naŋni eḏandaci, ma eca ŋwu: a kwiri pa kweṯir li eḏne, kweṯir li ii tɔk; eṯinyjilŋiiḏini ki lumaɽa-na leri, 27 kwɔŋazi eca ŋwu: nyi kwecaŋazi ma ŋwa, nyi kwende kwilŋiicaŋazi, a leḏi ṯakaŋw liri? inḏir kiṯay tatap leṯi zi erri ŋeni ŋiki. 28 ma eze ibrahiim ŋwuzi ki ŋeleny-na ŋeḏi Allah, izhaag gi, na yaguub, liɽya li-na tatap, mer ŋazi ṯiŋaḏa kiṯay, a gwu irṯeḏi ŋwal ki, a ye yiŋaṯ-na tɔk. 29 lila leḏi ŋwudɔŋw ŋi la, leḏi yuṯu yi, leḏi januub ŋgi, zamaal ŋgi tɔk, er nanalu ki ŋeleny-na ŋeḏi Allah. 30 na kla linanu kwaḏan, er eŋne; na kla linani kereny, er aɽa kwaḏan.
ṯuweza ṯeḏi hiruuḏuz
31 ki lomur ṯa kla ner ila lɔkwɔ lir lifarzi, ner eca ŋwu: indi kiṯay, a duŋgweci ezir wu, kaka naŋna gwu hiruuḏuz eḏeɽenye ŋaŋwu. 32 nuŋw zi eca ŋwu: inḏir, andaci kwuḏluma ŋgwana, eca ŋwu: iza ṯi, kweti ma kakaṯu rigɽima riki, etuŋw zəwi lizi luma tɔk aŋwunu, na ŋurpu, na ŋurpu ŋgwana tɔk, mindaŋ ma ŋwamin orɔ ṯɔɽɔl, ŋwu zi ratazi. 33 nyi kwu ta pa irere lu aŋwunu, ŋurpu tɔk, ŋurpu ŋgwana tɔk; ŋiti kinna ŋorɔ ŋwu eḏi kwiɽi kwere kiraḏa lu par ŋgi la, kwiti kwupaḏi urzaliim kinna mac.
eyewey weḏi urzaliim!
34 aḏiru, urzaliim; aḏiru, urzaliim! a kweṯeɽenye liɽyaŋi, na eṯi zi aci yal yi kla leṯir ŋazi uziza. nyi kwumɔnaŋni beṯen eḏi razi kwelle kwɔŋwa duŋw eḏi kwuɽbeḏe lu kaka kagwurɔ keṯikwuɽbeḏa nyagwurɔŋi lu yufu yi, lakin na derne ḏut. 35 izarṯi, duənu kwalu kwumer tay lu domony, nyi kwecaŋazi ma ŋwa, ŋaŋa liti le nyi kaṯazi kwokwony mac, mindaŋ ma ari: eḏuŋw ortanni, ŋgwu kwinḏi yiriny yi yeḏi Kweleny.