Yǝcu mɔŋgwɔ ɔlici lizi lǝṯi arri-ri ŋidiny.
(Maṯṯa 10:26, Maṯṯa 27)1 Nǝ lizi raaythi dɔŋw alf-ŋwɔna kwittǝzir, mindaŋ nǝr allathisi naana ṯɔvo-ṯɔvoc lɔrtannalɔ ŋwaara-ŋi, mindaŋ nǝ Yǝcu andaci ṯalaamiiza ṯuuŋwun kerreny nɔŋwsǝccǝŋw, “Aŋricar khamiirǝ kǝthi Lifirriisiiyyiin, ŋǝniŋw ṯǝrrǝ ṯǝthi ŋothɽor ŋeeŋen ŋir ŋidiny. 2 Mǝ kwomne naani kwette nyithak kwuluccunǝ ŋwɔ ruwǝnnǝlɔ, nǝ ŋgwa tatap kwir ŋejmeṯ ŋwelŋithine ǝzir. 3 Ŋwɔṯaŋw kweere nyithak kwǝ-gi andisalɔ nyiidi-nyiidi kirim-nǝ, ŋwo niŋnini ki-fɔɔri, nǝ ŋgwa kwǝ-gi andisalɔ ṯilla nyiidi-nyiidi ǝrgi opɔna ler-ler ki-yiŋna-la kider.
Ǝyǝ kwɔrɔ kwǝthi ṯeenye.
(Maṯṯa 10:28-31)4 “Limǝthgǝri liinyi nyii kwǝccǝ-ŋǝsi-mǝ ŋwɔ, ǝṯiseere ṯeenye kila lǝṯi ɽeenye aŋna, laakin ǝṯireere ǝthi ŋɔma kwokwony mac ethisi ǝrri ŋithaathɔ ŋigii beṯṯen. 5 Nyii kwɔŋǝsi ilŋithini kwizi kwǝthi ṯeenye: ṯiinyar Allah wǝthi ŋɔma ethi ɽeenye, mindaŋ kwaathan-tǝ nɔŋwɔthi sɔlṯa kwǝthi-gi kaṯṯo ki-jahannam-nǝ. Aw nyii kwɔŋǝsi andaci ethi ṯeenye ŋundu-ŋwɔ!
6 “Kill ṯɔthni kiti kǝṯir iila girishǝ kɔtɔpɔt mac-a? Laakin nɔŋweere keere mac kǝṯi-gi Allah ṯɔɔthina. 7 Laakin ǝwɽu wǝthi ŋwɔɽa ŋwaalɔ wǝni wiiɽǝnnǝ ndendeṯ. Ŋwɔṯaŋw ǝṯeere ṯeenye mac; kaka nǝniŋǝ-gwɔ lithǝmthi killǝ kuuru pur-pur!
Ya ethoro kwǝthi Yǝcu ya ethi dirnathalɔ.
(Maṯṯa 10:32-33Maṯṯa 12:32Maṯṯa 10:19-20)8 “Nyii kwǝccǝ-ŋǝsi-mǝ ŋwɔ, kweere nyithak kwǝnyii ruwǝzǝlɔ kiyǝnǝ yǝthi lizi, a Tɔr tǝthi Kwiziŋwunǝŋ ruwǝzǝlɔ tok kiyǝnǝ yǝthi limeleka lǝthi Allah. 9 Nǝ kwǝnyii ǝvrinni kiyǝnǝ yǝthi lizi, a Tɔr tǝthi Kwizigwunǝŋ ǝvrinni tok kiyǝnǝ yǝthi limelekǝ lǝthi Allah.
10 “Kweere nyithak kwandisasa Tɔɔrɔ naana tǝthi Kwizigwunǝŋ ŋiɽaŋali ŋigii, ǝrsi fivrici; laakin kweere nyithak kwandisasa Ṯigɽimǝ naana Ṯirllinǝlɔ ter ŋiɽaŋali ŋeere ŋigii, ǝrseere fivrici ḏuṯ.
11 “Mǝrŋǝsi mɔmlɔttatha kiyǝnǝ yǝthi lizi lǝthi limajma@, nǝ yǝthi limuḏiir-ŋǝ lisɔlṯaan-li, ǝṯeere pinni rɔgwor-na mac, ethaarɔŋw lǝnyji aŋnici aatha-gi alla lǝnyji andaci aatha-ŋwɔ. 12 Kaka ninḏi-gwɔ Ṯigɽim Ṯirllinǝlɔ ter ethi ǝccǝ ŋaaŋwɔ @allima ŋiɽaŋali ŋa ŋinḏi-ŋǝsi ethisi andasi ki-saa@-la ṯǝ ŋgwa.”
Mǝthǝl kwǝthi ṯamɽa ṯǝthi ŋɔrṯɔ.
13 Nǝ kwɔr kwette kwɔnaanɔ ki-lɔdɔŋw-na ǝccǝ Yǝcu-ŋwɔ, “Yaa Mɔ@allim andica ǝŋgǝri-ŋw ethi-gi kanni ŋɔɔrɔ-na ŋithayyica-nyji ṯǝrnyǝri-lɔ ṯǝri.”
14 Nǝ Yǝcu ǝŋnici nɔŋwɔccǝŋw, “Kwɔr kwaalɔ ǝyǝ kwɔrɔ kwuruusǝ-nyii gaaḏi ethi kannaci ŋaaŋwɔsi ŋɔɔrɔ ndǝndǝk ŋǝthi ṯarnyalɔ ṯaalɔ?” 15 Nɔŋwaari isṯimir nɔŋw-sandaci tatap nɔŋwsǝccǝŋw, “Kitticarsi yǝy, aŋraci rogɽo raalɔ ki-ṯigiirɔ-na tatap; kaka niti nǝṯi-gwɔ ŋimiitha ŋir rerrem ŋǝthi kwizigwunǝŋ ere naani kavindiny-na wǝṯɔŋw ǝthi mac, alla mɔŋw kinnǝni oro kwɔrṯɔ kaka aatha kweere.”
16 E-ta nǝsi Yǝcu andaci mǝthǝlǝ-ŋgwɔ nɔŋwsǝccǝŋw, “Kwɔr kwɔnaanɔ kwette kwir kwɔrṯɔ ceg-cegi, nɔŋwɔthi ṯɔrɔny ṯiriiɽɔ riṯṯak. 17 Mndaŋ nɔŋwaari ibṯǝḏi ethaari fǝkirǝ ki-rogɽo-na ruuŋwun nɔŋwaarɔŋw, ‘Nyii kwende kwǝthi ǝzir-nǝ wǝthi-gwɔ kette kwomne-ŋgwɔ kwiinyi tatap. Aatha kwǝnyii ǝrri?’ 18 Nɔŋwaarɔŋw ki-rogɽo-na ruuŋwun-ŋwɔ, ‘Ŋindǝr-ṯǝ ŋɔ ŋǝnyji ǝrri, nyii kwippi nyuuluŋǝ nyiinyi kithaay, mindaŋ nyjacci nyithaathɔ nyɔppa, nyinḏiny-gwɔ ethi balsi ŋwaana-na kwomne-gi tatap kwiinyi kwɔthaathɔ’. 19 E-ta nyǝccǝ rogɽo riinyi-ŋwɔ, ‘Rogɽo, a kwir-mba kwir kwɔr kwǝthi bakhatha gaa! A kwɔmǝthi kwomne tatap kwisaaw-kwisaaw kwɔnaŋna-ŋa kwinḏi ethi nannatha yithlǝyu yittǝzir. Ǝlli yiithi, ethne nǝ ii tok, mindaŋ arri-ri surṯǝnnǝ’. 20 Laakin nǝ Allah ǝccǝŋw, ‘Ŋaa-ŋgwɔ kwithii kii ŋgwɔ! Kulŋǝ-ṯǝ ŋgɔ rɔkwɔ-rɔkwɔ ǝrŋǝ dimmǝthǝ ṯigɽimǝ ṯɔɔŋwa; e-ta ǝyǝ kwɔrɔ kwaavi kwomne-ŋgwɔ tatap kwɔgittica-ŋa rogɽo rɔɔŋwa?’” 21 Nǝsi Yǝcu ṯimmaci nɔŋwsǝccǝŋw, “Ŋinḏi-ṯǝ ethoroŋw ki-lizi-nǝ kila lǝṯi immǝci rogɽo reeŋen ŋɔrṯɔwa, laakin ǝṯireere oro lɔrṯɔ kiyǝnǝ yǝthi Allah mac.”
Ethi allitha Allah ṯɔgwɔri naana.
(Maṯṯa 6:25-34)22 Nǝ Yǝcu andaci ṯalaamiiza ṯuuŋwun nɔŋwsǝccǝŋw, “Ǝṯeere pinni rɔgwor-na mac ŋiɽaŋal-ŋi ŋǝni ethnǝ wǝthi ŋimiitha ŋǝǝlɔ, ya ethaarɔŋw, aatha kwǝnyii yee, ya yaŋna-yi yaalɔ ethaarɔŋw, aatha kwǝnyii kenne. 23 Ŋimiitha ŋithǝmthi-pǝ ethneya-la, nǝ aŋna ṯamthɔ yirethi-la. 24 Iisar-ṯi yothŋoroŋi yende yǝṯi kwee ŋwaana wala ethi ɔni; wala ǝthǝthi limǝghzǝnǝ, wala nyuuluŋǝ; laakin ǝṯisi-tǝ Allah ithni! Ŋaaŋa lithǝmthi-pǝ ndǝwǝ-lǝ pur-pur! 25 A kwǝthi ŋɔma ethi nanni kwokwo lǝlu-ttuk ṯipinnǝ-thi ṯɔgwor-na ṯɔɔŋwa? 26 Mǝseere ǝthici ŋɔma-na ethisi ǝrri ŋɔ ŋokɔɽoc mac, e-ta ŋotho ŋurtunǝŋǝ-ŋinǝ ŋithaathɔ 27 Iisar-ṯi ɔvɽɔnya wǝthi yaaɽi-na wǝṯi peŋe aŋgwɔrɔ; wende wǝṯi akkɔ ŋothɽor ŋeere, wala ethi ɔgɽi yirethi yǝthi rogɽo reeŋen. Laakin nyii kwǝccǝ-ŋǝsi-mǝ ŋwɔ, mǝlik kwǝni Sulemaan ŋinith-ŋinǝ ŋuuŋun tatap, nɔŋweere kenne yirethi yisaaw beṯṯen yir kaka ɔvɽɔnya mac. 28 Laakin mǝ Allah kinnini karaawa kǝthi wuthǝr kǝṯi miithi aŋwɔnɔ nǝ ŋɔrpɔ-ŋgwa ǝṯɔŋw kǝṯṯini kiigǝ-nǝ, e-ta ŋweere kǝniny kinnini ŋaaŋwɔsi beṯṯen mac-a? Ŋaaŋa lirmba lir lizi lette lǝthi ṯǝmminǝ ṯokwɔɽony gaa! 29 Ŋwɔṯaŋw ǝṯeere naŋninnalɔ ŋgwa kwǝthi yee-ŋa mac, nǝ ŋgwa kwǝthi ii, na ǝṯi pinnǝ rɔgwor-na mac. 30 Kaka nǝṯi-gwɔ lizi lǝthi ṯurmun-nǝ naŋninni kwomne ŋgwɔ tatap. Papa kwaalɔ kwilŋithi kwomne tatap kwǝṯi naŋninni. 31 Nǝ ki-lɔɔbi lǝthi ŋiɽaŋal ŋɔ tǝ, naŋnar Ŋeelenyi ŋuuŋun mindaŋ kwɔŋǝsi inḏǝthǝ kwomne ŋgwa tatap.
Ŋɔrṯɔ ki-leere-na.
(Maṯṯa 6:19-21)32 “Ǝṯi ṯiinya maǝc yaaŋal yiinyi yir dɔŋw lokwɔɽony, kaka naami-gwɔ Papaǝ-na kwaalɔ, ethi inḏǝthǝ ŋaaŋwɔsi Ŋeelenyi. 33 Liṯṯir kwomne kwaalɔ kithaay kwǝthi-ŋǝ, mindaŋ a inḏǝthǝ lɔwaaya gwuruushǝ. Ǝthir lujɔzlaana liti lǝṯi kee mac, mindaŋ awanni ŋɔrṯɔwa ŋaalɔ ki-leere-na ŋiti ŋǝṯi ernene mac, wala ethisi lɔɔɽam nyiimi wala ethisi livɽitir kiirasalɔ tok mac. 34 Kǝzir wǝṯi-gwɔ ŋɔrṯɔ ŋaalɔ nanni, ǝṯi-gwɔ rɔgwor raalɔ nanni tok.
Yaḏaam yǝti aŋranni naana.
35 “Ǝṯisi nanyjalɔ ŋette nyithak cɔgwo-cogwop ŋinḏi ethiila, likǝkkinǝ-nǝ tetter ŋwombo-ŋi ŋwaalɔ ŋwɔvɔɔdɔ, 36 kaka yaḏaama kiya yǝkkicǝ sǝyyiḏǝ kweeŋen kizǝn ethaaɽa kǝzuumǝ-nǝ wǝthi ṯaaga. Mɔŋw iila ŋwɔ ippi lɔbaaba mindaŋ ǝri kiṯicǝnni fittak. 37 Nǝ yaḏaam kiya yindǝr-ṯǝ yinḏi ethaami ɔrtannɔŋw mǝsi sǝyyiḏ kweeŋen aaɽa mɔŋwsi kaṯṯasi ligɽiṯɔ linaanalɔ cɔgwo-cɔgwop! Nyii kwɔŋǝsi andaci rerrem, kwinḏi ethi allitha ibaaya-lɔ wuuŋwun mindaŋ ŋwɔsi nǝnǝlɔ mindaŋ ŋwɔsi ithni. 38 Linḏi-mbǝ ethaami ɔrtannɔŋw mɔŋwsi iila mɔŋwsi kaṯṯasi linaanalɔ cǝgwo-cɔgwop, mɔŋw iila kinnǝ kulŋǝ-nǝ, wala mɔŋw ɽindaŋnalɔ! 39 Laakin ilŋithirsi ŋɔ ethaarɔŋw, ǝŋgi kwizi kwǝthi dɔɔnɔ-ŋwɔ elŋe ethaarɔŋw kwɔɔram kwinḏi ethiila ki-saa@-la kwǝndu ǝŋgi-ŋweere duŋgwǝci dɔɔnɔ-ŋwɔ kwuuŋwun mac mindaŋ ethi kwɔɔɽam ere iila ethi kii ethi ǝnḏi mac. 40 Nǝ ŋaaŋa tok laazim a-naana-lɔ cogwo-cɔgwop, kaka ninḏi-gwɔ Tɔr tǝthi Kwizigwunǝŋ ethiila ki-saa@-la ŋgwa kwiti kwigittathiŋa-gi duŋgwun mac ethiila.”
Khaḏaam kirllalɔ nǝ kiti kirllalɔ mac.
(Maṯṯa 24:45-51)41 Nǝ Bɔṯrɔs ǝccǝŋw, “Kweeleny mǝthǝl ŋgwɔ kwǝri kwirii alla kwɔɽɔmasa-nyji-galɔ tatap?”
42 Nǝ Kweeleny ǝŋnici nɔŋwɔccǝŋw, “Ǝyǝ kwɔrɔ kwir khaḏaam kirllalɔ kǝthi yǝnǝ? Kindǝr-ṯǝ ŋga kinḏi sǝyyiḏ kwuuŋwun ethi ruusi wǝkiil ethi aŋraci dɔɔnɔŋwu kwuuŋwun, nǝ ethisi ithni ki-wǝkiṯ-lǝ dap-dap. 43 Khaḏaam ŋga kǝmbaami ɔrtannɔŋw, mǝ sǝyyiḏ kwuuŋwun aaɽitha dɔɔnɔ ethi kaṯṯasi ŋǝrrǝ-ŋwsi ŋɔ! 44 Nyii kwɔŋǝsi andaci rerrem, kwinḏi ethi sǝyyiḏ kwuuŋwun ruusi wǝkiil wǝthi kwomne tatap kwuuŋwun. 45 Laakin ma khaḏaam-ŋga aarinaŋw, ‘Sǝyyiḏ kwiinyi kwinḏi ethi ɽindaŋnalɔ’, mindaŋ mɔŋwaari ibṯǝḏi ethi ippi yaḏaama yithaathɔ yir lɔr-ŋa laaw-li, mindaŋ mɔŋw ethne, ŋwɔ ii mindaŋ mɔŋw urlǝli tɔk, 46 e-ta mǝ sǝyyiḏ kwuuŋwun aaɽa ki-laamin-la lette nyithak liti ligittathi-li khaḏaam-ŋga mac, wala ki-lɔɔmɔr-la kila liti lilŋicaŋw-li mac. E-ta ŋwɔ inḏǝthǝ jiizǝ, nǝ ŋwɔ kaṯṯɔ ki-lizi-nǝ kila luuɽu yǝni-nǝ.
47 “Laakin mǝ khaḏaam elŋece rac kwomne-ŋgwa kwɔnaŋnathi sǝyyiḏ kwuuŋwun ethǝrrici ŋunduŋw mindaŋ mɔŋweere naanalɔ cɔgwo-cɔgwop ethi ǝrrici mac tǝ, ǝri inḏǝthǝ jiizǝ kwɔppa kwir ǝpǝ. 48 Laakin khaḏaam-ŋga kiti kilŋithi mac ŋiɽaŋali ŋa ŋinaŋnathisi sǝyyiḏ kwuuŋwun, nǝ mɔŋwsi ǝrri ŋeere ŋǝthi ṯǝppǝ tǝ, ǝri inḏǝthǝ jiizǝ kwokwo kwǝwrǝ naana. Ŋgwa kwinḏǝthǝr kwuuru, ǝri naŋnatha kwuuru; nǝ ŋgwa kwinḏǝthǝr kwɔthǝmthǝlɔ ethi aŋraci ǝri naŋnatha kwɔthǝmthǝlɔ tok.
Yǝcu kwir sǝbǝb kwǝthi ṯundǝnnǝnǝ ṯǝthi lizi.
(Maṯṯa 10:34-36)49 “Nyii kwinḏi ethi ǝnyji kǝmruŋǝ ki-ṯurmun-nǝ. Nǝnyii naŋni beṯṯen kerreny tuk etheese kigwuɽutǝthɔ! 50 Nyii kwǝthi ma@muuḏiiyya laazim nyaavi, nyii-ŋgwɔ kwɔppinnǝ ṯɔgwor-na beṯṯen mindaŋ mǝr ṯimmanni kimaaraǝ. 51 Ŋaaŋa ligittathɔ ethaarɔŋw nyii kwǝvicǝ ṯurmunǝ ṯaama naana? Bǝri-mǝ, ṯaama naana ṯiti ṯir mac, laakin ṯundǝnnǝnǝ ṯirɔ. 52 Mǝr naani ṯɔthni dɔɔnɔ kwɔtɔpɔt, ǝri uɽǝnninǝ, ǝroro ṯoɽol ṯuwǝn tǝthi kila lir ndǝn; nǝ kila lir ndǝn, ǝroro ṯiwǝn tǝthi kila lir ṯoɽol. 53 A papa-ŋa oro ṯuwǝn ṯǝthi nyɔr nyeeŋen nyir nyoŋwor, nǝ nyir nyoŋwor ǝroro ṯuwǝn ṯǝthi rǝrnyin-ŋa reeŋen; a ayya-ŋa oro ṯuwǝn ṯǝthi nyǝr nyeeŋen nyir nyiira; nǝ nyɔr nyir nyiira ǝroro ṯuwǝn ṯǝthi lǝnyin-ŋǝ leeŋen; a laaw lir luunǝ oro ṯuwǝn tǝthi luunǝyin leeŋen lir nyiira, nǝ nyiira nyir luunǝ ǝroro ṯiwǝn ṯǝthi luunǝyin-ŋǝ leeŋen lir laaw.”
Ṯilŋiṯṯana ṯǝthi ŋwɔɔmɔr
(Maṯṯa 16:2-3)54 Nǝ Yǝcu andaci lizi kwokwony nɔŋwsǝccǝŋw “Meese leblethi ǝzir-yi wǝṯi-yi aaŋwɔn ɔɽi, ǝṯaarinaŋw tɔc kaaw kinḏi ethi dɔnni, mindaŋ ǝṯit-ṯǝ oroŋw dap. 55 Na mǝ iccini kɔrɔn-gi kǝthi ŋwɔdoŋw-ŋala kaarɔ, ǝṯaarɔŋw kiijaŋ kinḏi ethi fuuthi, mindaŋ ǝṯir-ṯǝ oroŋw dap. 56 Ŋaaŋa kila lǝṯi arri-ri ŋidiny! Mǝsi elŋe ethisi uppinǝ ŋa ŋǝṯi iijini kwurǝyu-lu nǝ leereya naana tok, nǝ ŋaaŋa lotho lithimthi ethisi uppinǝ ŋǝthi lɔɔmɔr kɔlɔ?
Ǝṯi ammithina kaasim-gi kɔɔŋa.
(Maṯṯa 5:25-26)57 “Nǝ athrɔ-pa ŋaaŋa lende lǝccǝ rogɽo raalɔ haakima ŋiɽaŋal-ŋi ŋa ŋɔvthanna? 58 Mǝŋǝ kaasim keere allasi lɔɔma naana, mindaŋ mɔŋw mɔlthatha ŋaaŋwɔ ki-mahkama-na, ǝɽi kǝniny ǝsi naŋnalɔ ŋeere ŋisaaw ŋǝthi-ŋi ammithina ŋundu-gi kinaŋw niti nɔppathi-ŋa kinnǝni ki-mahkama-na mac. Mǝseere ǝrri ŋɔ mac tǝ, kɔŋǝ iili naanɔ-gwɔ gaaḏi, mindaŋ ǝŋǝ gaaḏi inḏǝthǝ bǝuliisa, mindaŋ mǝŋǝ bǝuliis kaṯṯɔ ki-sijin-nǝ. 59 Nyii kwǝccǝŋǝ-mǝ ŋwɔ, a kwɔnannitha kinaŋw mindaŋ a ɽaanyasi girishǝ kǝjinnǝ kǝthi hɔkwɔm.”
aza 12
Yecu kwireca limeḏgen eḏi zi aŋraci ŋa ŋir ŋidiny
1 na ma lizi rayḏa duŋw litezir liminni, allaḏizar nana ṯufɔ-ṯufɔc, nuŋw naŋni eḏandaci limeḏgen kerreny, nuŋw zi eca ŋwu: aŋraḏir; eṯi ṯenye nyuruŋwa nyeḏi lifarzi, nyinderṯa nyeṯandazi rugwor ri-na ŋidiny. 2 na kwɔmne ere nani kwere mac kwukwuɽbene lu, na gwu ta ruwene lu pɔrpɔr, na kwuluci-na ta, ŋwu liŋeḏine. 3 ŋandizaŋazi kirim-na, er zi ta neŋne ki fori-na; ŋandizaŋazelu nyidi nyidi kiininy lac ta, er zi ŋi ireci kezir wolala.
Yecu kwufirlazi limeḏgen la
4 limeḏgeri linyi, nyi kwecaŋazi ma ŋwa: eti zi ṯinya mac kla leḏi ŋuma eḏeɽenye yaŋna, lakin liti leḏi ŋuma eḏi zi erri ŋere kwokwony mac. 5 ŋeŋazi baŋaci ŋeḏi ŋgwa kweŋgi tenye, ṯinyar ŋgwa kweḏi ŋuma eḏeɽenye, mindaŋ nuŋw eḏi zulṯa tɔk eḏi keṯini ki jahannam, emba, eti tenye ŋgwa. 6 nyiɽow nyɔkwɽeny nyiti nyeṯir zi iila nyir tuḏni, nyeḏi giriz kete manya? lakin Tarnyalu talu tende ṯeṯi gwu ṯuḏina tere. 7 na ŋiɽaŋal ŋiṯemḏi, kinna, owɽu weḏi ŋwoɽa ŋwalu ŋwere ŋwere wiɽena tatap. eti ṯinya mac; kaka ṯemḏiŋa gwu nyiɽow la nyuru nyuru.
8 nyi kwecaŋazi ma ŋwa: kwere kweti nyi ruweze lu ki lizi-na, kwunde kwir kwa Tor teḏi kwizigwunaŋ ruweze lu nani gwu limaleyka leḏi Allah. 9 lakin, kwere kweti nyi nyindini ki lizi-na, er nyindini ŋunduŋwu tɔk ki yey-na yeḏi limaleyka leḏi Allah. 10 kwere kwermiḏeḏa Toru nana teḏi kwizigwunaŋ, er zi fa ta fifrici; lakin kwere kwellineḏa Tigɽima nana ṯirlinelu ter, er zi ere fifrici mac. 11 mer ŋazi mulṯa ki limajma-na, ki yey-na yeḏi limuḏiir tɔk, eti ŋazi ŋiɽaŋal urreḏi mac eḏi zi eŋnici, eḏi zi andazi tɔk. 12 kaka ur gwu Ṯigɽim ṯirlinelu ter ṯinḏi eḏinḏeḏa ŋaŋwuzi ŋiɽaŋali ŋeḏi zi andazi ki lomur la ṯa kla.
ṯiŋeroŋw ṯeḏi kwurṯu kweni kwiḏiki
13 nuŋw andaci kwete ki duŋw-na, nuŋw eca ŋwu: muallim, andica eŋgeriŋw, eca ŋwu, kannir gi kwɔmne-na, kwumerŋazi ṯaci lu. 14 nuŋw eŋnici nuŋw eca ŋwu: kwor kwalu, eya kwiri kwuruzenyi kweleny kwalu eḏi kannaci ŋaŋwuzi kwɔmne? 15 nuŋw zi eca ŋwu: izarzi, ezi aŋraci ŋir afindiny. kaka iti nani gwu ŋimiiḏa ŋeḏi kwizi kwere mac kwɔmne-na kwubɔnalu, kweṯuŋw eḏi.
16 nuŋw zi andaci ŋir ŋiŋerɔŋw, nuŋw zi eca ŋwu: ṯuruny teḏi kwor kwete kwir kwurṯu, ṯiriɽu kwɔmne kwitezir. 17 nuŋw arina ŋwu: nyi kweḏi erri aḏa, ma gwu ezir ere were weḏi gwu kete kwɔmne kwinyi, kwiriɽu? 18 nuŋw aru ŋwu: ŋenyji erri ŋwu, nyi kwipii nyuluŋa nyinyi, enyjaci nyupa, nyi gwu ballazi kwɔmne-na kwinyi tatap, kwuriɽu. 19 nyi kweca rɔgwɽɔ rinyi ŋwu: rɔgwɽɔ, a kwumeḏi kwɔmne kwitezir, kwunani yiḏleyu yuru; eli yiiḏi keni, eṯeḏne, eṯi ii, eṯ arri zurṯena tɔk. 20 na Allah eca ŋwu: a kwumemba ḏe ki; kuluŋa ŋgu, er ŋa naŋneḏa rɔgwp rɔŋwa; na kwɔmne kwɔŋwa, kwukitaŋa lu cugwɔ-cugwɔp, kworɔ kweḏi eya manuŋ? 21 ṯaŋwu, kwere kweṯi əgineḏa rɔgwp ruŋwun kwɔmne nana, muŋw ere əgineḏa Allah nana mac, eṯuŋw ṯa orɔ kaka ŋgwu.
ṯundeŋna, ya ṯallida Allah rugwori nana
22 nuŋw eca limeḏgen ŋwu: ṯa ŋwu, nyi kwecaŋazi ma ŋwa, eṯere efrinji ŋiɽaŋali ŋeḏi ŋimiiḏa ŋalu eḏurreḏa ŋaŋwuzi mac, eḏaru ŋwu: aḏa kwiri kwenyi ye? ya aḏa kwiri kwenyi ii? na ŋeḏi aŋna tɔk mac, eḏaru ŋwu: aḏa kwiri kwenyi kenne? 23 ŋimiiḏa ŋiti ŋeṯiṯamḏu eḏneya la manya? aŋna witi weṯi ṯamḏu kwɔmne lu tɔk manya kweṯir kenne? 24 izarṯi keni ŋwufiḏuŋwa, ŋwiti ŋweṯi kwe mac, ŋwiti ŋweṯuni tɔk mac; eṯir ere ferṯada kwɔmne kwere ki nyuluŋ-na mac, na eṯi zi Allah inḏeḏa eḏneya. a liti leṯiṯamḏu nyiɽowa manya? 25 muŋw ari kwere daŋgal-na, nyi kweŋgi ṯa duŋgwa kwɔkwɔk, kwende kweḏi ŋuma eḏi kiɽeni ṯii ṯete? 26 ma ere eḏi ŋuma kinna eḏerri ŋgwu kwir kwɔgwɔ kwɔgwɔ mac, ŋɔḏɔ ŋikitizaŋazi yey ŋiḏaḏu?
27 ṯiŋayinar ufɽinya weḏi yaɽi-na. witi weṯi irezi ṯuḏna ṯere mac, ya eḏi daɽmaḏa yireṯi yere too. nyi kwecaŋazi ma ŋwa, zulemaan kinna, ki ŋiniṯ-na ŋuŋun ŋupak, nuŋw ta ere kenne kwɔmne kwizaw mac eḏi biɽḏi ufɽiny yi were wir kaka wu. 28 ma Allah kinni karwa keḏi yaɽi-na kaka ṯaŋwu, kinani aŋwunu ki yaɽi-na mindaŋ ma ŋurpu ŋgwa orɔ, eṯir gaṯu kigə-na ta, ŋwere ami kinni ŋaŋwuzi tɔk manya? ŋaŋa liremba leḏi ṯəmna ṯɔkwɽeny. 29 eṯere ṯibaḏa mac kwɔmne kwere kweḏi ye, ya kweḏi ii; eṯiŋazi ŋiɽaŋal ŋere urreḏi mac. 30 kaka ṯibaḏa gwu lizi lir ter leḏi ṯurmun kwɔmne ŋgwu, lakin ŋaŋa, a leḏi Tarnyalu ṯalu ṯeṯinanni kilerena, na eṯuŋw elŋece rac kwɔmne kwunaŋnaŋa tatap. 31 naŋnar ŋelenyi ŋuŋun kerreny, ṯofḏana ṯi ṯuŋwun tɔk, mindaŋ er ŋazi kikindeci kwɔmne ŋgwa tatap.
32 eṯiṯinya mac, yaŋal yɔkwɔ yinyi, kaka ami gwu Ṯarnyalu-na talu eḏinḏeḏa ŋaŋwuzi ŋelenyi. 33 liṯir kwɔmne kweḏi ŋa eḏ iṯiḏi; eṯeḏi lijizlana liti leri ke mac, kwɔmne kwownina kilerena tɔk kwiti kweṯernine mac, kwunannu kezir weri gwu kwoɽam ere duŋgwa nana kwere mac, ya lifɽitir yece tɔk mac. 34 kaka kezir weri gwu awni ŋurṯua ŋalu, a gwu rugwor ralu nani tɔk.
ṯireca eḏaŋraḏa ŋama-ŋamaŋ
35 eṯami kekinenaŋw, eṯagi fori gi kwalu ezir. 36 roḏur kaka loru lere leri nanji kwelenyi lu kweŋen, kwunaŋna eḏi duŋgweci azuuma weḏi ṯaga eḏaɽa, mindaŋ muŋw ila, muŋw urnuni er iŋḏici fitak. 37 yaḏaam kyu yortani yezi kweleny kweŋen ṯermizelu yəkice kizen. nyi kwecaŋazi ma ŋwa, ŋwukekinena, ŋwu zi nənalu eḏeḏne, mindaŋ ŋwila eḏi zi ogwumicelu. 38 muŋw ila kuluŋana, ya ezir yi, muŋw zi kaṯazi ŋwu, a yaḏaam kyu eni yortani. 39 ŋilŋiiḏi ŋazi ŋu: eŋgi kwor kweḏi duənuŋw elŋece lomuri linḏi li kwoɽam eḏi nyimeḏa, eŋguŋw nani yey yelu, eŋguŋw ere efrici eḏurṯeḏa mac. 40 ŋwu ṯaŋwu, ŋaŋa tɔk, eṯi nani yey yelu eḏi icazi ki ṯay; kaka naŋna gwu Tor teḏi kwizigwunaŋ eḏila ki lomur liti likitaḏi ŋa li mac.
ṯiŋeraŋw ṯeḏi wakiil wirlalu
41 na buṯruz eca ŋwu: Kweleny, ŋandicanyji ŋu ŋiŋerɔŋwa cukcuk i, ya ŋandizaŋazi ŋeḏi lizi tatap? 42 na Kweleny eca ŋwu: eya kwiru kinna kwir wakiil wuzuɽu-na, weḏi yeyna tɔk, wunaŋna kweleny eḏalla eḏi ruzi rayiiz weḏi duənuŋw kwuŋwun, eḏi zi kanaci eḏneya ki ŋwomur tatap? 43 wakiil wa weni wortani mezi kweleny kaṯazi ŋeṯuŋw zi erri ŋizaw ki lomur lɔ ŋwu li ila. 44 nyi kwecaŋazi ma ŋwa rerem, kwɔŋw ruzi rayiiz weḏi kwɔmne tatap kweḏuŋw. 45 eŋgi wakiil ari ki ṯugwor-na ŋwu: kweleny kweri kwuɽindaŋnalu; eŋguŋw ipii yaḏaama yir lor, yir law tɔk; eŋguŋw eḏne, eŋguŋw ii, eŋguŋw urleli, 46 ma kweleny kweḏi wakiil wa ila, ki lamin liti likitaḏuŋw li mac, ki lomur liti lilŋiicaŋw zi li tɔk mac, ŋwu iri kiṯay ḏuṯ; ŋwu alla eḏoɽmaṯi lizi li leṯi ideḏina.
47 wakiil were weṯelŋece kwelenyi ṯugwori ŋama-ŋamaŋ, mindaŋ muŋw ere agi ezir mac, muŋw zi ere erri ṯugwor ṯi ṯeḏi kweleny mac, er inḏeḏa əpa wurara ṯeṯec. 48 lakin wa wuṯimḏi, muŋw zi erri ŋeḏi əpa, er inḏeḏa witi wurara beṯen mac. kwi; kwere nyiḏak kwumer inḏeḏa kwɔmne kwuru, er gi əkizi kize kwuru; na ŋgwa kwumɔ lizi inḏeḏa kwuru, er gi uṯizelu kwun
ṯilŋiiḏina ṯeḏi lere
49 nyi kwumila eḏi kete igəŋi ki lizi-na leḏi ṯurmun. wunaŋn nyi ṯa wir burbur eḏuŋw fudi kirem. 50 nenyi eḏi baptizi kwete kweḏi gi baptazini, nenyi kwumiḏini mindaŋ er rataḏ 51 a lari ŋaŋa ŋwu: kwumila eḏi biɽci ṯurmun lu a? beri. ni kwecaŋazi ma ŋwa, ṯuɽena-na ṯiri. 52 mer nani ki duən kwutuput ṯuḏni, er uɽeni-na, er zi diɽeḏa nana lir ṯɔɽɔl, er; diɽeḏa nana kla lir nden. na lir nden er zi diɽeḏa nana kla li ṯɔɽɔl tɔk. 53 a ṯernyin-ŋa tor ri uɽeni-na; a ṯernyin diɽeḏa tor nana, a tor diɽeḏa ṯernyin nana; a lenyin diɽeḏa toru nana ti tira; a tira diɽeḏa lenyin nana; a lenyin kweḏi toru-ŋa diɽeḏa kwiŋeyin kwuŋwun nana; na kwaw kweḏi tor tuŋwun diɽed lenyin nana.
54 nuŋw eca ŋwuduŋw ŋwu tɔk: ma eze ŋwebleṯi ŋwudiɽ ŋwudɔŋw ŋi la, a leṯari, kaw kinḏi eḏi dunni; ṯaŋwu eṯir ṯi errini. 55 ma kaṯazi kuruni kofu janub ŋgi, a leṯari, kijaŋ ŋg kinḏi; eṯir ṯa errini. 56 a liremba leṯarri ŋidiny. ŋilŋiicaŋas rac ŋeḏi lere, na ŋeḏi ṯurmun tɔk, a lɔḏɔ pa liṯimḏi ŋiɽaŋai ŋeḏi lomur ṯa klu?
57 aḏri pa. a lɔḏɔ liti lakwumi rɔgwɽɔ ralu mac ŋiɽaŋal ŋizaw? 58 ma ele ki zeyria-na kwizi gi kweḏi ŋa gi wəŋ, ŋofḏan; eḏi zi ecelu ŋere eḏi ŋi peci ṯugwori lu ki ṯay la, mindaŋ muŋw ere iili ŋaŋwu nani gwu gaaḏi, na a ŋa gaaḏi rellici rayiiz; weḏi zijin, mindaŋ ma ŋa rayiiz kaṯu ki zijin-na. 59 nyi kwecaŋaz ma ŋwa, liti li ŋa duŋgweci ḏuṯ mindaŋ ma ɽanyazi kwuruuz; kweḏi hukm wac.