Yǝcu kwir ṯaay ṯinḏi naanɔ-gwɔ Papa.
1 “Ǝṯeere pinni rɔgwor-na mac, ǝṯi kǝniny ǝmminici Allah, nǝ ǝṯir-nyii ǝmminici tok. 2 Nǝ ki-dɔɔnɔ kwǝthi Papa kwiinyi nǝ ŋwooḏo naani ŋwittǝzir, nyii kweele ŋǝsi daɽimica ǝzir-lɔ. Ǝŋgireere oroŋw mac ǝŋgiŋǝsi tǝ ere andaci tok mac. 3 Minyeele mǝŋǝsi daɽimica ǝzir-lɔ tǝ, nyaaɽa kwokwony ŋǝsi dimmǝ ŋǝsi-li ele naaniny-gwɔ, kǝzir wǝny-gwɔ naani ǝgwɔ naani ŋaaŋǝ tok. 4 Nǝ nelŋe taay kitha ṯinḏiny-thi etheele.” 5 Nǝ Ṯɔɔma ǝccǝŋw, “Kweeleny, nyiiŋǝ lende lilŋithi ǝzir wǝgwɔ iilatha; nyiiŋǝ lelŋe ṯaay aŋgwɔrɔ?” 6 Nǝ Yǝcu ǝccǝŋw, “Nyii kwirpa ṯaay, ninyoro rerrem, ninyoro ŋimiitha; kwiti kweere kweele naanɔ-gwɔ Papa kwiinyi mac, illi nyii-ŋgi. 7 Ǝŋgir-nyii elŋe, ǝŋgi elŋe Papa-ŋwɔ tok; nǝ kirem kwɔmǝ elŋe nǝ kwɔmǝ ese tok.”
8 Nǝ Fiilibbus ǝccǝŋw, “Kweeleny baaŋica-nyji Papa-ŋwɔ tǝ, ǝtǝ ŋarritha ere.” 9 Nǝ Yǝcu ǝccǝŋw, “Fiilibbus, nyii kwɔmǝ-pǝ nanni ŋaaŋa-li tɔttɔṯ, e-ta ninyeere elŋe kinnǝni mac-a? Kwɔmǝ-nyii ese kwǝnitǝ kwɔmeese Papa-ŋwɔ tok; a kwotho kwaarɔŋw, ‘Baaŋica-nyji Papa-ŋw’? 10 Ŋiti ŋǝmminǝ-ŋǝsi mac ŋinanniny-ŋi ethi Papa-na, nǝ Papa nanni duŋgwiny-nǝ tok-a? Ŋiɽaŋal ŋa ŋǝṯi-ŋǝsi andaci, ǝṯi-nyjeere andasi sɔlṯa-gi kwiinyi mac, laakin nǝ Papa oro kwǝṯi nanni duŋgwiny-nǝ, nɔŋworo kwǝṯi akkɔ ŋothɽor ŋuuŋun. 11 Ǝmminicǝ-nyii ethaarɔŋw kwɔnanni ethi Papa-na, nǝ Papa nanni duŋgwiny-nǝ tok; ya nyǝmminici sǝbǝb-gi kwǝthi ŋothɽor ŋundu.
12 “Nyii kwǝccǝ-ŋǝsi-mǝ ŋwɔ rerrem, mɔŋw ǝmminici nyuŋwɔ kweere, ŋwakkɔ ŋothɽor tok ŋǝṯi-nyji akkɔ, mindaŋ ŋwɔsi ǝrri ŋɔppa ŋithǝmthisi-lǝ ŋɔ, kaka ninḏiny-gwɔ etheele naanɔ-gwɔ Papa. 13 Kweere nyithak kwǝgi ɔṯalɔ yiriny-yi yiinyi ŋǝsi tǝ ǝrrici, mindaŋ mǝ Papa niini-nǝ ki Tɔr-na. 14 Mǝŋi ɔṯalɔ ŋeere nyithak ki-yiiriny-nǝ yiinyi, nyji-tǝ ǝrri.
Wa@ḏ wǝni Ṯigɽim Ṯirllinǝlɔ ter.
15 “Mǝrnyii amɽi tǝ ǝrnyii mithici awaamira wiinyi. 16 Mindaŋ nyii uṯici Papa-ŋwɔlɔ, ethi inḏǝthǝ ŋaaŋwɔsi Kwumǝccǝ, ethi nannitha ŋaaŋa-li dok-dok. 17 Kwir Ṯigɽim ṯathi ŋirllalɔ, ṯiti ṯǝthicǝ ṯurmun ŋɔma-na ethi aavi mac, kaka niti niisar-gwɔ mac nǝ nǝreere elŋe tok mac. Laakin ŋaaŋa tǝ nelŋe ŋunduŋw, kaka a-naanɔ-ŋgwɔ ŋaaŋa-li nǝ nɔŋw nanni daŋgal-na.
18 “Nyii kwiti kwɔŋǝsi ṯayyalɔ cuk-cuk mac; nyii kwaaɽa naaniŋa-gwɔ rac. 19 Kwaathan kwokwo ǝnyii ṯurmun ere ese kwokwony mac, laakin ŋaaŋa tǝ, a lǝnyii ese rac; kaka nimiithiny-gwɔ, a miithi ŋaaŋa tok. 20 Ki-laamin-la ṯǝ kila elŋe ethaarɔŋw kwɔnaani ethi Papa-na kwiinyi, nǝ ŋaaŋa tok nǝ naani duŋgwiny-nǝ, nǝ nyii tok nǝnyii naani daŋgal-na. 21 Ŋgwa kwǝthi awaamira wiinyi, mindaŋ mɔŋw mithǝ tǝ ŋworo kwamɽa-nyii; a Papa kwiinyi amɽi ŋgwa kwamɽa-nyii tok. E-ta nyamiɽi ŋunduŋw mindaŋ nyii ruwǝcci ŋunduŋw rogɽo-lɔ riinyi.” 22 Na Yahuuthǝ kwiti kwǝni Is-khar-yɔɔṯii mac ǝccǝ ŋunduŋw-ŋwɔ, “Kweeleny, aatha kwirpa mindaŋ nǝnyji ruwǝcci rogɽo-lɔ rɔɔŋwa, mindaŋ ethiseere ruwǝcci ṯurmunǝlɔ mac?” 23 Nǝ Yǝcu ǝŋnici nɔŋwɔccǝŋw, “Mɔŋw amɽi nyuŋwɔ kweere, kwǝnyii mithici ŋiɽaŋali ŋiinyi, a Papa kwiinyi amɽi ŋunduŋw, mindaŋ nyiila nyiiŋǝ Papa-gi nyii nanni naanɔ-ŋgwɔ. 24 Kwiti kwǝnyii amɽi mac, ŋweere mithici nyuŋwɔ ŋiɽaŋali tok mac, nǝ ŋiɽaŋal ŋa ŋiniŋna-ŋǝsi, nǝreere oro ŋiinyi mac, laakin nǝroro ŋǝthi Papa ŋgwa kwɔɔsa-nyii.
25 “Ŋandica-ŋǝsi ŋɔ, a-naaniny-tǝ kinnǝni ŋaaŋa-li. 26 Laakin mǝ Kwumǝccǝ ŋgwa kwir Ṯigɽim Ṯirllinǝlɔ ter iila, kwinḏi Papa kwiinyi ethi ɔɔsa yiriny-yi yiinyi, kwɔŋǝsi ǝccǝ @allima kwomne tatap, mindaŋ kwɔŋǝsi kithǝyini ŋa tatap ŋandica-ŋǝsi. 27 Nyii kwɔŋǝsi ṯayyici ṯaama-lɔ naana tiinyi, imba nyii kwɔŋǝsi inḏǝthǝ ṯaama naana ṯiinyi, ṯiti ṯir kaka ṯǝṯi-ŋasi ṯurmun inḏǝthǝ mac, ŋǝsi inḏǝthǝ nyii. Ǝṯeere pinni rɔgwor-na mac, wala ethi ṯeenye. 28 Ŋaaŋa liniŋnaca-nyii rac nǝccǝ-ŋǝsi-gwɔŋw, ‘Nyii kwɔŋǝsi ṯayyalǝ mindaŋ ŋǝsi aaɽitha naana kwokwony’. Mǝrnyii amɽi tǝ a ayeŋlena, kaka ninḏiny-gwɔ etheele naanɔ-gwɔ Papa; kaka nithǝmthiŋy-gwɔ Papa-la. 29 Nyii-ŋgwɔ kwɔmǝ-ŋǝsi rarmatha kerreny niti nǝrrinǝr-gwɔ kinnǝni ŋeere mac, mindaŋ mǝr ǝrrini tǝ ǝmǝ ǝmmini. 30 Ŋiti ŋǝŋǝsi andaci ŋuuru kwokwony mac, kaka ninḏi-gwɔ kweeleny kwǝthi ṯurmun kɔthɔ ethiila, kwiti kwǝthi ŋɔma duŋgwiny-lǝ mac, 31 Laakin ŋǝṯi-nyji ǝrri kaka ŋǝllicǝny-ŋi Papa kwiinyi waamira, mindaŋ ma turmun elŋe ethaarɔŋw nyii kwǝṯi amɽi Papa-ŋwɔ. Diiɽir kɔnɔŋw ereele.
aza 14
ṯay ṯinḏi nani gwu Papa
1 eṯere pini rugwori-na mac; eṯalliḏa Allah rugwori nana; etalliḏa nyuŋwu rugwori nana tɔk. 2 ki duənu kweḏi Papa kwinyi, na ezir nani witezir weḏi gwu nanni; eŋgir ere orɔ ŋwu mac, eŋgi ŋazi ta andaci, nyi kwele eḏəgizi ŋaŋwuzi ezir. 3 menyi ele eḏəgizi ŋaŋwuzi ezir ta, enyi ma aɽa, ŋazi mulɔ nani nyi gwu. taŋwu, kezir wenyi gwu nanni, a gwu ta nanni ŋaŋa tɔk. 4 a lilŋiiḏi rac ezir wenyi gwu ilaḏa, na elŋe tay tɔk. 5 na tuma eca ŋwu: Kweleny, nyiŋa lende lilŋiiḏi ezir wɔ gwu ilaḏa, ta nyi ma elŋece tay ezir aŋgwuru? 6 na Yecu eca ŋwu: nyi kwiri pa tay, na ŋirlalu, na ŋimiiḏa tɔk. kwizi kwiti kwere kwele nanu gwu Papa tay ṯi ṯir ter mac, nenyi orɔ ṯuɽuk. 7 eŋgir nyi elŋe, eŋgelŋe Papaŋw kwinyi tɔk, na kire-kirem kwumɔ ṯa elŋe, kwumɔ ṯa eze tɔk.
8 na fiilibbuz eca ŋwu: Kweleny, baŋicanyji ṯi Papaŋw, ta ŋarḏa ere. 9 na Yecu eca ŋwu: a kwiti kwumer nani tutuṯ manya, ta er nyi fa ta ṯime, fiilibbuz a? kwumenyi eze, kweni kwumeze Papaŋw, a kwɔḏɔ kwaru ŋwu: baŋicanyji Papaŋw? 10 ŋiti ŋemnaŋazi manya, eṯinyi gwu nanni eḏi Papa-na eṯuŋw, gwu nanni duŋgwinyi-na tɔk? ŋiɽaŋal ŋeṯiŋazandaci, eṯinyji ere andazi zulṯa gi kwinyi mac, na Papa, kweṯinyi gwu nanni-na, orɔ kweṯerri ŋɔḏɽor ŋuŋun. 11 emnicer nyi, eṯi nyi gwu nanni eḏi Papa-na, na eṯi Papa nanni duŋgwinyi-na. mezi ere emni ŋu mac, e nyi ta emni ŋiɽaŋal ŋi ŋeṯinyjerri.
12 nyi kwecaŋazi ma ŋwa rerem, ŋgwa kweḏi ṯəmna duŋgwinyi-na, kwunde kwiri kwezerri ŋir ga ŋeṯinyjerri. ŋwuzi ṯemzelu tɔk, kaka inḏi nyi gwu eḏele nani gwu Papa; 13 na kwɔmne kwere kwu gi uṯalu yiriny yi yinyi, nyi ta erri, eḏi Papa niina-na ŋiɽaŋal ŋi ŋeḏi Tiɽŋeyin. 14 mer nyi uṯizelu ŋaŋa kwɔmne gi kwere yiriny yi yinyi, nyi ta erri.
ṯikitaḏa ṯeḏi Ṯigɽim ṯirlinelu ter
15 mer nyi amɽi ta, er nyi miḏici amra winyi. 16 nyi kwara Papaŋw ŋwal ŋwere, mindaŋ kwɔ ŋazi inḏeḏa Kwumeca kwuḏaḏu eḏi ma dirnaṯi daŋgal-na, ŋwu gwu nanniḏa dɔk; 17 kwir keni Ṯigɽim ṯeḏi ŋirlalu, titi ṯeḏi kla leḏi ṯurmun ŋuma eḏafi mac, kaka iti izar gwu mac, ṯimḏir gwu tɔk. ṯilŋiidi ŋaŋa, kaka muŋw gwu nanni ŋaŋa li, ŋwu nanni daŋgal-na tɔk. 18 nyiti kwɔŋazi ṯay lu ŋeḏela mac; nyi kwaɽa nani ŋa gwu. 19 kwɔkwɔk, enyi ṯurmun ere eze kwokwony mac, lakin ŋaŋa, a lenyi eze; kaka miiḏinyi gwu, a miiḏi ŋaŋa tɔk. 20 ki lamin ṯa kla, er nyi elŋece, ari, kweṯinanni eḏi Papa-na kwuŋwun, na eṯir gwu nanni-na, nyiŋa, na eṯuŋw nanni deŋgeri-na tɔk. 21 kwere kweḏi amra winyi, mindaŋ muŋw miḏa tɔk, kwunderṯa kweṯinyamɽi; na kweṯinyamɽi, a Papa kwinyi amɽi tɔk; mindaŋ enyamɽi ŋunduŋwu, enyi ruweci ŋunduŋwu rɔgwɽɔ lu rinyi tɔk. 22 na yahuuza, kwiti kweni izkaryuuti mac, eca ŋwu: Kweleny, aḏa kwiri mindaŋ enyji ruwenicelu, nezi ere ruwenici leḏi ṯurmun lu mac? 23 na Yecu eŋnici, nuŋw eca ŋwu: kwere nyiḏak kweṯamɽi nyuŋwu, kwenyi miḏici ŋiɽaŋali, a Papa kwinyi amɽi; nyi kwele nden tɔk nanuŋw gwu, eḏi nanni nanuŋw gwu. 24 kwiti kweṯamɽi nyuŋwu mac, kwunde kwiri kwiti kweṯinyi miḏici ŋiɽaŋali mac; na ŋiɽaŋal ŋiniŋnaŋazi, ŋinyi ŋiti ŋiri mac; ŋeḏi Papa ŋiri kwuzanyi.
25 ŋimɔŋazi andaci ŋu, nani nyi kinna ŋaŋa li. 26 na ṯa ŋgwa kweni Kwumeca, kwir Ṯigɽim tirlinelu ter, kwɔŋazi Papa uziza yiriny yi yinyi, kwunde kwiri kwɔŋazi ilŋiiḏini ŋiɽaŋali tatap, kwɔŋazi ṯiŋayini tɔk ŋimɔŋazi andaci. 27 nyi kwɔŋazi ṯaci ŋiɽena lu; mba, ŋinyi ŋiri ṯa ŋeŋazi ṯaci lu. ner ere orɔ kaka ŋeṯiŋazi ṯurmun inḏeḏa mac, ŋa ŋinḏeḏaŋazi. eṯere pini rugwor-na mac; eṯizi ere efrici eḏi ṯenye tɔk mac. 28 ŋiniŋnacar nyji rac, eca ŋazi ŋi: nyi ŋgwu ma pa kwele, enyi ma aɽiḏa kwokwony nani ŋa gwu; eŋgir nyi amɽi, eŋgi nyeŋlena inḏinyi gwu eḏele nani gwu Papa, kaka ṯemḏinyi gwu Papa kwinyi. 29 ŋimɔŋazi andaci kinna iti roḏur gwu ŋwu mac, mindaŋ mer ṯa orɔ ŋwu, ta a ma eḏi ṯəmna. 30 ŋiti ŋenyji andazi ŋuru kinna ŋaŋa li mac, kaka inḏi gwu kweleny kweḏi ṯurmun kḏu eḏila, na kwiti kweḏi karḏa kere nani nyi gwu mac, 31 mindaŋ er nyi ṯa elŋece ṯurmuna nana tatap, er ari: kwamɽa Ṯernyin, na kaka inḏeḏa gwu Ṯernyin amra, ŋwu zi ṯa erri ŋwu. diɽiɽ, erele.