Yǝcu mɔŋgwɔ iyici ṯalaamiiza ŋwaara naana.
1 Nǝrṯoroŋw niti ninaani @iiḏ wǝthi Fis-ha kinnǝni mac. Nǝ Yǝcu elŋe ethaarɔŋw saa@ kwɔmǝ iilicǝ ŋunduŋw kwǝthi-gi ɔrlacci ṯurmunǝ kɔthɔ ŋwɔdoŋw etheele naanɔ-gwɔ Papa. Nǝṯi-ŋgwɔ amɽi lizi luuŋwun nyaamin tatap kila linaanɔ ki-ṯurmun-nɔ ṯamɽa-thi ṯir min-min.
2 Nǝ ki-lɔɔmǝr-la-ṯǝ lǝthi @asha, nǝ Shiiṯaan kettice Yahuuthǝ Is-khar-yɔɔṯii-ŋwɔ kwir tɔr tǝthi Sim@aan ŋiɽaŋali ki-ṯɔgwor-na ethi bɔɔŋwɔthi Yǝcu-ŋw. 3 Yǝcu tǝ nɔŋw elŋe ethaarɔŋw kwɔgittica Papa kwomne tatap ki-rii-na, nǝ nɔŋw ruuthǝ naanɔ-gwɔ Allah, nǝ kwinḏi ethaaɽitha naanɔ-gwɔ Allah tok. 4 Nɔŋw diiɽi ki @asha-la, nɔŋw allaṯha kwɔɔvana-lɔ kwuuŋwun, e-ta nɔŋw kǝkkininǝ bishkiir-gi. 5 Nɔŋw balsi ŋaaw ki-libriig-nǝ, mindaŋ nɔŋwaari ibṯǝḏi ethi iyici ṯalaamiiza ŋwaara naana ŋweeŋen, e-ta nɔŋwsi firṯici naana bishkiir-gi ŋgwa kwɔkǝkkinǝŋw-ŋginǝ. 6 Mɔŋw iila naanɔ-gwɔ Sim@aan Bɔṯrɔs; nǝ Bɔṯrɔs ǝccǝŋw, “A kwǝnyii fǝtǝ iyici ŋwaara naana ŋwiinyi Kweeleny-a?” 7 Nǝ Yǝcu ǝŋnici nɔŋwɔccǝŋw, “Ŋǝrrǝ-nyji ŋɔ, ŋiti ŋǝsi elŋe kinnǝni mac, laakin kwaathan-tǝ ǝsi-mǝ elŋe rac.” 8 Nǝ Bɔṯrɔs ǝccǝŋw, “A kwiti kwǝnyii iyici ŋwaara naana ŋwiinyi ḏuṯ.” Nǝ Yǝcu ǝŋnici nɔŋwɔccǝŋw, “A kwende kwǝthi lɔɔɽɔŋi leere duŋgwu-nyii-nǝ mǝŋǝsi ere iyici mac.” 9 Nǝ Sim@aan Bɔṯrɔs ǝccǝŋw, “Kweeleny, ŋwaara dak mac, laakin rii-ŋa riinyi nda-li tok!” 10 Nǝ Yǝcu ǝccǝŋw, “Ŋgwa kwǝṯi ɔni naana, kwiti kwǝṯi naŋni ṯɔya kwokwony mac, illi ŋwaara ŋwuuŋwun dak; kaka nǝni-ŋgwɔ kwɔrɔstɔ tatap min-min, ŋaaŋa lǝni lɔsɔɔɽɔ tatap, illi kwɔtɔpɔt.” 11 Kaka nilŋithi-ŋgwɔ ŋgwa kwinḏi ethi bɔɔŋwɔthi ŋunduŋw; nǝrṯoroŋw mindaŋ nɔŋw-mǝ aarɔŋw, “Ŋaaŋa liti lisɔɔɽɔ tatap mac.”
12 Mɔŋwsi iyici ŋwaara naana ŋweeŋen tǝ, nɔŋw aaɽanni kwɔɔvana naana kwuuŋwun, nɔŋwaaɽi nɔŋw naanalɔ kǝzir wuuŋwun, e-ta nɔŋwsǝccǝŋw, “Ŋa ŋilŋithi-ŋǝsi ŋa ŋǝrricǝ-ŋǝsi-a? 13 Ŋaaŋa lǝṯi-nyii ǝccǝ Mɔ@allim nǝ Kweeleny tok; ŋisaaw rac kaka nɔrɔrny-gwɔ ṯǝŋw, 14 nǝ minyoro Kweeleny kwaalǝ na Mɔ@allim kwaalɔ tok, mindaŋ nǝŋǝsi iyici ŋwaara naana ŋwaalɔ, nǝr-ṯǝ ɔvthanni ṯǝŋw daŋgal-na tok ethi iyathisi ŋwaara-na ŋwaalɔ wɔɽǝ-wɔɽǝny. 15 Nyii-ŋgwɔ kwɔmǝ-ŋǝsi baaŋaci mǝthǝlǝ, mindaŋ mǝsi-ṯǝ ǝrriŋw tok kaka nǝrricǝ-ŋǝsi-gwɔ. 16 Nyii kwǝccǝ-ŋǝsi-mǝ ŋwɔ rerrem, khaḏaam kiṯi kǝṯi ṯamthɔ Sǝyyiḏ-ŋwɔla kwuuŋwun mac; wala ethi ŋgwa kwɔɔsar ṯamthɔ-la ŋgwa kwɔɔsa. 17 Mǝ elŋe kwomne-ŋgwɔ, ǝni lɔrtanni mǝsi ǝrri. 18 Ŋiti ŋandisa-nyji ŋǝni ŋaalɔ tatap mac; lilŋithi-nyji kila lǝlli-nyjinǝ; mindaŋ mǝr rattathi ŋa ŋɔlɔɔthɔna kiṯaab-na kirllinǝlɔ tǝr ŋaarɔŋw, ‘Ŋgwa kwiithiny-gi ethneya wiinyi, kwɔmǝ-nyii ɔrllatha naana ṯuwǝn-thi’. 19 Ŋǝŋǝsi andaci ŋɔ ker-kerreny niti nǝrrinǝr-gwɔ kinnǝni mac, mindaŋ mǝr ǝrrini-tǝ ǝmǝ ǝmmini ethaarɔŋw, ‘Nyii kwirṯa ŋgwɔ’. 20 Nyii kwǝccǝ-ŋǝsi-mǝ ŋwɔ rerrem, kweere kwǝmmini kweere nyithak kwǝnyii ɔɔsi tǝ, nɔŋwɔni kwǝmminǝ-nyii; nǝ ŋgwa kwǝnyii ǝmmini ŋwɔni kwǝmminǝ ŋgwa kwɔɔsa-nyii.”
Yǝcu mɔŋwsi andasi ŋǝthi ṯɔbɔɔŋwɔtha ṯuuŋwun.
(Maṯṯa 26:20-25Mɔrgus 14:17-21Luuga 22:21-23)21 Mǝsi Yǝcu ṯimmasi ŋɔ tǝ, nǝ ṯɔgwor kaṯṯɔ kwɔrop, e-ta nɔŋw andisalɔ por-por nɔŋwaarɔŋw, “Nyii kwǝccǝ-ŋǝsi-mǝ ŋwɔ rerrem, ŋgwɔ kwette kwaalɔ kwithnany-gi kwinḏiny ethi bɔɔŋwɔthi.” 22 Nǝ ṯalaamiiz iccathisina milak-milak, luurǝŋnǝ ŋiɽaŋal-ŋi ŋa ŋandisa-ŋwsi ŋǝŋgoro ŋǝthi ǝyǝ. 23 Nǝ kwette ŋgwa kwamɽa Yǝcu kwǝthi ṯalaamiiz ṯuuŋwun, kwɔnaanisa Yǝcu-ŋw keṯṯok. 24 Nǝ Sim@aan Bɔṯrɔs kǝṯṯici nda-la nɔŋwɔccǝŋw, “Uṯicǝṯǝlɔ ŋandisa-ŋwsi ŋǝni ǝyǝ.” 25 Nǝ ṯilmiiz dɔŋgwatha Yǝcu-ŋw naana keṯṯok, nɔŋw uṯicǝlɔ nɔŋwɔccǝŋw, “Kweeleny ǝyǝ kwɔrɔ?” 26 Nǝ Yǝcu ǝŋnici nɔŋwɔccǝŋw, “Ŋgwa kwǝnyii rǝttici rǝghiivǝ mindaŋ mǝnyji inḏǝthǝ kwundǝr-ṯǝ ŋgwǝ tɔc.” Mɔŋw ratti rǝghiivǝ-tǝ nɔŋwsi inḏǝthǝ Yǝhuuthǝ-ŋw kwir tɔr tǝthi Sim@aan Is-khar-yɔɔṯii. 27 Mɔŋw aavi rǝghiivǝ tǝ, nǝgwɔ Shiiṯaan ǝnḏinǝ tɔc, mindaŋ nǝ Yǝcu ǝccǝŋw, “Ŋa ŋinaŋna-ŋǝsi ethisi ǝrri-tǝ laazim ǝsi ǝrri fittak!” 28 Nɔŋweere kweere mac kwɔnaanica ṯerbeezǝ-lɔ kinaŋw kwilŋithisi ethaarɔŋw kwotho kwandica Yǝcu kaka-ṯǝŋw. 29 Nǝr kittatha lɔkwɔ ethaarɔŋw kaka nappa-gwɔ Yahuuthǝ kiisǝ kǝthi gwuruush, kwandicaŋw etheele ethi liṯṯa kwomne kweere kwǝthi @iiḏ, ya ethi inḏǝthǝ lɔwaaya kwomne kweere. 30 Mǝ Yahuuthǝ aavi rǝghiivǝ, nɔŋw ruuthǝnni tɔc, nɔŋweele. Nǝ lɔɔmɔr-tǝ limoro kilkǝlu.
Waamir wiyaŋ.
31 Mǝ Yǝhuuthǝ ruu mindaŋ mɔŋweele, nǝ Yǝcu aarɔŋw, “Tɔr tǝthi Kwizigwunǝŋ tiniini-nǝ kirem, mindaŋ a Allah niini-nǝ ŋundu-ŋgi. 32 Na mǝ Allah niini-nǝ ŋundu-ŋgi tǝ, e-ta a Allah nii ŋunduŋw-nǝ tok, mindaŋ ŋwɔ nii ŋunduŋw-nǝ fittak. 33 Kwelle kwiinyi a kwǝr naani kwokwo kinnǝ cuk domony, ŋaaŋǝ lǝnyii naŋnalɔ; nyii kwɔŋǝsi andaci kirem kaka nandicany-gwɔ Yǝhuudǝ nǝccǝ-nyji-gwɔŋw, ‘Ŋaaŋa liti lǝthi ŋɔma ethiila kǝzir winḏiny-gwɔ etheele mac’. 34 Nyii kwɔŋǝsi inḏǝthǝ waamira wiyaŋ, mindaŋ mamɽathisina wɔɽe-wɔɽeny. 35 Nǝ mamɽathisina wɔɽe-wɔɽeny tǝ, ǝŋǝsi lizi tatap elŋe ethaarɔŋw ŋaaŋa lir ṯalaamiiz ṯiinyi.”
Yǝcu nandisa-ŋgwɔ ŋiɽiiya-ŋi ŋǝthi ṯǝvrinnǝ ṯǝthi Bɔṯrɔs.
(Maṯṯa 26:31-35Mɔrgus 14:27-31Luuga 22:31-34)36 Nǝ Sim@aan Bɔṯrɔs ǝccǝŋw, “Kweeleny a kwinḏ etheele ṯaka?” Nǝ Yǝcu ǝŋnici nɔŋwɔccǝŋw, “Ǝzir wǝny-gwɔ ele a kwiṯi kwiila kinnǝni kire-kirem-ŋgwɔ mac; laakin a kwǝnyii rɔɔma kwaathan-gi rac.” 37 Nǝ Bɔṯrɔs ǝccǝŋw, “Kweeleny aatha kwɔrɔ-pa mindaŋ niŋeere rɔɔma kire-kirem-ŋgwɔ mac? Nyii kwǝmminǝ ethi ai ŋiɽaŋal-ŋi ŋɔɔŋa.” 38 Nǝ Yǝcu ǝŋnici nɔŋwɔccǝŋw, “A kwǝmminǝ rerrem ethi ai ŋiɽaŋal-ŋi ŋiinyi-a? Nyii kwǝccǝŋa-mǝ ŋwɔ rerrem, mǝ kɔthɔgɽi ere ǝrri kinnǝni mac, a kwǝnyii ǝvrinni nyaamin-na ṯoɽol.
aza 13
Yecu muŋw iiza limeḏgen ŋwara
1 ner orɔ ṯaŋwu, iti nani gwu kuruu kinna mac keni ṯiṯamḏa ŋiɽany, iid yi, na Yecu elŋece lomuri luŋwun limila, linḏuŋw li eḏi li orlaci ṯurmuna ŋwudɔŋw eḏele nani gwu Papa; amɽaŋw zi gwu luŋwun leṯinani ki ṯurmun-na, nuŋw naŋni keni eḏi zi baŋaci ṯamɽa ṯuŋwun ṯir minmin. 2 mindaŋ mer inḏiralu keḏneya la, na zeyṯaan ṯimaci yahuuzaŋw kweni izkaryuuṯi, kwir tor teḏi zimaan, ŋiɽaŋali ŋeḏi ŋi bɔŋwḏi. 3 na Yecu elŋece rac eḏaruŋw: Papa kwiri ṯa kwumenyi inḏeḏa kwɔmne tatap ki rii-na rinyi, nuŋw elŋe tɔk eḏaruŋw: nyi kwumila nani gwu Allah, enyi aɽiḏa nanuŋw gwu tɔk. 4 nuŋw diɽi keḏneya la, nuŋw alliḏa yireṯi lu, nuŋw dimi kireti kir fuṯa, nuŋw kəkini. 5 nuŋw balazi ŋaw ki tonyɔ-na, nuŋw iici limeḏgen ŋwara nana ŋweŋen, nuŋw zi firṯizi nana kireṯ gi kikəkinaŋw.
6 mindaŋ muŋw ila nani gwu zimaan buṯruz, na buṯruz eca ŋwu: Kweleny, a kwenyi fa ta iici ŋwara nana tutur a? 7 na Yecu eŋnici, nuŋw eca ŋwu: kwɔmne kwerre nyi, kwiti kwelŋece ŋa kinna mac, na kwɔ fa ta elŋece rac kwaḏan. 8 na buṯruz eca ŋwu: a ti kwenyi iici ŋwara nana aŋwun were ḏuṯ. na Yecu eca ŋwu: ma ŋazi ere iici mac, ere eḏi karḏa nani nyi gwu tɔk mac. 9 na zimaan buṯruz eca ŋwu: Kweleny, eṯinyi iica ŋwara nana ṯuɽuk mac. iicenyi-na rii, nda li-na rac. 10 na Yecu eca ŋwu: ŋgwa kwumɔ uni nana, eṯuŋw naŋni eḏi ii ŋwara nana domony, kaka zuɽuŋw gwu nana curcuɽic. a lizuɽu-na, lakin, a liti lizuɽu-na tatap mac. 11 kaka ilŋiicaŋw gwu ŋgwa kweŋgi bɔŋwḏi rac; ta nuŋw zi ma eca ŋwu: a liti lizuɽu-na tatap mac.
12 muŋw zi iici ŋwara nana tatap, nuŋw dimi yireṯi kwokwony, nuŋw nanalu, nuŋw zi eca ŋwu: a lilŋiica ŋiɽaŋali ŋerrizaŋazi a? 13 a leṯinyece, muallim, na Kweleny tɔk, na ŋizawi, kaka ur nyi gwu ṯa ŋwu. 14 ur nyi ma Kweleny kwalu, muallim kwalu tɔk, iica ŋazi ŋwara nana, eṯi zi ṯa yaḏizina ŋwu tɔk. 15 kaka inḏeḏa ŋazi gwu ŋeḏi zi gwu izazi, eḏizerri kaka errizaŋazi gwu ṯa. 16 nyi kwecaŋazi ma ŋwa rerem; kaḏaam kiti keṯiṯamḏu mac kwizi la ŋgwa kwunannir gi; na ŋgwa kweni kafur, kuzar, eṯuŋw ere ṯamḏu mac ŋgwa la kwuza. 17 mezi elŋece ta, amina mezi erri. 18 na ŋazi ere andaci ŋeḏi tatap daŋgal-na mac; lilŋiicanyji rac kla licanyji-na, lakin eḏi ŋiɽaŋal ŋete ŋuluḏina rataḏi, ŋaruŋw: ŋgwa kwiiḏinanyi gi, kwumenyi diɽeḏa nana eḏerme nyuŋwu lara li. 19 nyi ŋgwu kwandicaŋazi ŋiɽaŋali ŋu kirem, iti roḏur gwu kinna mac, mindaŋ mer enḏa ta, er nyi emni eḏari, kwunderṯa ŋgwu. 20 nyi kwecaŋazi ma ŋwa rerem: muŋw enji kwere kiloɽu-na kwuzanyi, nyi kwiri ṯa kwenjaŋw; na kwenji nyuŋwu, ŋworɔ kwenji ŋgwa kwuza nyuŋwu.
Yecu muŋw zi ilŋiiḏini ŋgwa kwinḏi eḏi bɔŋwḏi
21 mezi Yecu andazi ŋu, nuŋw dii ṯugwori-na, nuŋw zi ruwenizelu, nuŋw zi eca ŋwu: nyi kwecaŋazi ma ŋwa rerem, kwenyi bɔŋwḏi kwete daŋgal-na. 22 na limeḏgen icaḏizina, kaka arir gwu: ŋeni ṯi eya, ŋaruŋw ŋi? 23 nuŋw keni inḏiraḏa Yecuŋw kwurdum la kwete kweḏi limeḏgen, kwamɽa Yecu. 24 na gi ṯa zimaan buṯruz andaci ŋurugwumi eḏuṯizelu, eḏeca ŋwu: ŋeḏi eya ŋiri, ŋari ŋa ŋi? 25 ṯaŋwu nuŋw inḏiraḏa Yecuŋw, nuŋw eca ŋwu: Kweleny, eya kwiri ṯi? 26 na Yecu eŋnici, nuŋw eca ŋwu: ŋgwa kwenyinḏeḏa eḏneya wɔkwɔ wu, menyi retizi. ta, nuŋw rati, nuŋw inḏeḏa yahuuzaŋw, kwir tor ṯeḏi zimaan izkaryuuṯi. 27 muŋw afi eḏneya wa, na zeyṯaan enḏiḏa tuc. na Yecu eca ŋwu: ŋinḏi ŋa zi eḏi zi erri, erre zi fitak. 28 nuŋw zi ere elŋece kwere nda mac kwunanir li eḏari, ŋiri ŋwu, ŋandizaŋw zi. 29 arir gwu lɔkwɔ, Yecu kweca yahuuzaŋw kezni, inḏi liṯa kwɔmne kwere kwunaŋnar kweḏi iid, kaka apaŋw gwu jizlana keḏi kwuruuza-na; ya nuŋw eca, kezni, inḏeḏa luwaya kwɔmne kwere. 30 nuŋw afi eḏneya, nuŋw ruḏeni tuc. na kilikelu kwiri.
amr wiaŋ weḏi amiḏina
31 ma yahuuza ru, nezi Yecu eca ŋwu: Tor teḏi kwizigwunaŋ timɔ niini-na kire-kirem ŋgwu, na Allah wumɔ niini-na ŋiɽaŋal ŋi ŋuŋun tɔk. 32 ma Allah eni wumɔ niini-na ŋiɽaŋal ŋi ŋuŋun ta, a Allah nii Yecuŋw-na tɔk ŋundu ŋgi; ŋwu nii ŋunduŋwu-na tuc. 33 kwelle kwinyi, a kwer nani kinna kwɔkwɔ, mindaŋ er nyi ece, na kaka andicanyi gwu yahuuḏa ŋwu: ezir wenyi kwele, witi wɔ gwu ila ŋaŋa mac, ŋazi ṯa andaci ŋwu kire-kirem tɔk. 34 nyi kwinḏeḏaŋazi amra wete wiaŋ eḏi amiḏina kaka amɽa ŋazi gwu, a ṯa amiḏina ŋwu. 35 roḏur ŋwu, er ŋazi elŋece tatap rac, er aruŋw: liri limeḏgen, ma gwu amiḏina.
buṯruz mezi Yecu ilŋiiḏini ŋeḏi ṯinyindina ṯuŋwun
36 na zimaan buṯruz eca ŋwu: Kweleny, a kwele ṯaka? na Yecu eŋnici, nuŋw eca ŋwu: ezir wenyi kwele, a ti kwenyi romanalu kire-kirem mac, na a kwenyi fa ta roma rac kwaḏan gi. 37 na buṯruz eca ŋwu: Kweleny, aḏa pa kwɔ ŋa ere romiza kire-kirem ŋgwu? nyi kwɔ ŋa ṯiŋaci rɔgwɽɔ lu rinyi. 38 na Yecu eŋnici, nuŋw eca ŋwu: a kwenyi fa ta ṯiŋaci rɔgwɽɔ lu a? nyi kwecaŋa ma ŋwa rerem, iti orru gwu kuḏugwɽi kinna mac, a kwenyi nyindini nyamin-na ṯɔɽɔl.