Ŋiɽany ŋǝthi Li@aazar.
1 Nǝ kwɔr naani kwette kwuumǝ kwǝni Li@aazar kwɔnannɔ Beiṯ-@aniya kwir lilli lǝthi Mǝryǝm-ŋǝ eŋgen-gi kwir kwaaw kwǝni Martha. 2 Nǝ Mǝryǝm oro kwɔɔrathi Kweelenyi, mindaŋ nɔŋw firṯici ŋwaara naana ŋwuuŋwun ǝwɽu-yi wuuŋwun, kwirir Li@aazar-gi ŋgwa kwuumǝ ŋiyaŋga. 3 E-ta nǝ laaw kila lir ŋiyaŋga ɔɔsɔthi naanɔ-gwɔ Yǝcu nǝrǝccǝŋw, “Kweeleny, ŋgwa kwamɽa-ŋa ŋgwana kwuumǝ.” 4 Laakin mǝ Yǝcu neŋne-tǝ nɔŋwaarɔŋw, “Kimǝṯ-ŋgɔ kǝthi ŋiɽany kiti kir mac; laakin nɔŋworo kǝthi-gi nii Allah-na, taŋw a Tɔr tǝthi Allah niini-nǝ sǝbǝb-ŋi ṯǝ ŋgwɔ.”
5 Ǝṯi Yǝcu amɽi Martha-ŋwɔsi eŋgen-gi kwir kwaaw nǝ Li@aazar tok. 6 Nǝ mɔŋw neŋne ethaarɔŋw Li@aazar ŋgwana kwuumǝ, nɔŋw-tǝ naani kinnǝni karaṯ ŋwaamin ŋwuɽǝn kǝzir wa wɔnaanɔ-ŋgwɔ. 7 Kwaathan-tǝ nɔŋwɔccǝ ṯalaamiiza-ŋw, “Ǝreele ǝri aaɽitha Yaauuḏiiyyǝ kwokwony.” 8 Nǝ ṯalaamiiz ǝccǝŋw, “Yaa Mɔ@allim naa Yahuuḏ yinaŋna-ŋa ethi acca yall-yi aŋna keṯe-keṯṯok, e-ta ǝfǝtǝ aaɽi kwokwony ṯirṯirǝ?” 9 Nǝsi Yǝcu ǝŋnici nɔŋwsǝccǝŋw, “Laamin lɔtɔpɔt liti lǝṯi ǝthi saa@ wrii-kwuɽǝn mac-a? Mɔŋw irǝrǝlɔ kweere kaaŋwɔn-na, ǝṯɔŋweere ṯɔgdanni mac, kaka ǝṯɔŋgweese fɔɔri kwǝthi ṯurmun kɔthɔ. 10 Laakin mɔŋw irǝrǝlɔ kweere kilkǝlu-tǝ, ǝṯɔŋw ṯɔgdanni, kaka niti ninaani-gwɔ fɔɔri mac.” 11 Mǝsi Yǝcu andasi ŋɔ e-ta nɔŋwsi kiɽǝcci ŋiɽaŋali nɔŋwsǝccǝŋw, “Mǝthigǝri kwǝri kwǝni Li@aazar ŋgwana kwuumǝ kwinḏirɔ, laakin nyii kweele nyii kiɽiṯǝ ŋunduŋw.” 12 Nǝ ṯalaamiiz ǝccǝŋw, “Kweeleny mɔŋwɔni kwinḏirɔ ŋwɔ saawi.” 13 Nǝ Yǝcu-tǝ nɔŋwɔni kwandisasi ŋǝthi ŋiɽany ŋǝthi Li@aazar, laakin ŋundu-ŋǝ tǝ nǝraarɔŋw ŋandisa-ŋwsi ŋǝthi igaṯṯa wǝŋ ṯǝthi ŋwaarɔ. 14 E-ta nǝsi Yǝcu andicalɔ por-pɔr nṯɔŋwsǝccǝŋw, “Li@aazar kwɔmǝ ai; 15 nǝ sǝbǝb-ŋi kwaalɔ-ta, ninyaamina kaka niti ninaaniny kinanaŋw mac. Mindaŋ mǝ ǝmmini. Laakin ǝreele naanɔ-ŋgwɔ.” 16 Ŋwɔṯaŋw nǝ Ṯɔɔma kwǝṯir ǝccǝ Tɔɔŋwɔr ǝccǝ limethgen lir ṯalaamiiz-ŋwɔ, “Ǝrli-mǝ ele nyiiŋǝ tok ǝrli ayithathi!”
Yǝcu kwir ṯidiiɽǝ nǝ ŋimiitha.
17 Mǝ Yǝcu ɔppathi, nɔŋw kaṯṯasi Li@aazar-ŋwɔ kwɔmǝ naani ki-thimaamɔ-na ŋwaamin kwaɽiŋan. 18 Nǝ Beiṯ-@aniya tǝ, nɔŋw nanyji Urshaliim-ŋwɔlɔ keṯṯok kwir ŋaajara miilǝ kwuɽǝn, 19 nǝ Yahuuḏ yittǝzir iila kinaŋw naanɔ-gwɔ Martha-ŋǝ Mǝryǝm-gi ethisi kandisalɔ ŋiɽaŋal-ŋi ŋǝthi eŋgen kweeŋen. 20 Mǝ Martha neŋne ethaarɔŋw Yǝcu ŋgwa kwinḏi, nɔŋweele nǝr-gi kadritha kithaay, Mǝryǝm-tǝ nɔŋw-tǝ kinnǝni naani kiininy dɔɔnɔ. 21 Nǝ Martha ǝccǝ Yǝcu-ŋw, “Kweeleny, ǝŋgoro kwɔnaanɔ kɔnɔŋw ǝngi ǝŋgǝri ere ai ḏuṯ. 22 Nǝnyii elŋece rac ethaarɔŋw kwomne kweere nyithak kwǝgi uṯici Allah-lɔ kire-kirem, ǝŋǝ tǝ Allah inḏǝthǝ.” 23 Nǝ Yǝcu ǝccǝŋw, “Aŋgalɔ kwudiiɽi rac kwokwony.” 24 Nǝ Martha ǝccǝŋw, “Nyii kwilŋithi rac ethaarɔŋw kwɔdiiɽǝ kwokwony ki-laamin-la lǝthi kwaathan-ŋwɔ.” 25 Nǝ Yǝcu ǝccǝŋw, “Nyii kwirpa ṯidiiɽǝ nǝ ŋimiitha kweere nyithak kwǝnyii ǝmminici, mɔŋw kinnǝni ai, ŋwɔ-tǝ miithi, 26 nǝ kweere kwɔnaanɔ kwɔmiithɔ, ŋweere ai ḏuṯ. Ŋǝmminǝ-ŋǝsi ŋɔ-a?” 27 Nɔŋwɔccǝŋw, “Aw, Kweeleny, myii kwǝmminǝ ethaarɔŋw a kwir Kwɔrɔstɔ kwir Tɔr tǝthi Allah, tinḏi ethiila ki-ṯurmun-nǝ.”
Yǝcu mcŋgwc aari.
28 Mɔŋwsi andasi ŋɔ tǝ nɔŋweele nɔŋw ɔrnɔṯa eŋgen kwǝni Mǝryǝm-ŋwɔ nyettec, nɔŋwɔccǝŋw, “Mɔ@allim ŋgwɔ kɔnɔŋw, nǝ ŋgwalɔ kwuṯucǝŋǝ-lɔ.” 29 Mɔŋwsi neŋne ŋɔ tǝ, nɔŋw diiɽǝlɔ fittak nɔŋweele naanɔ-ŋgwɔ. 30 Yǝcu-tǝ nɔŋw ere ɔppatha ki-lilli-na kinnǝni mac, laakin nɔŋw-tǝ naani kinnǝni kǝzir wa wɔkadirithir-gwɔ Martha-gi. 31 Mǝ Yahuuḏ kiya yinaanɔ kiininy dɔɔnɔ yikandisalɔ ese Mǝryǝm-ŋwɔ kwɔmǝ diiɽi fittak nɔŋw ruu par, nǝr kwaathitha ligittathɔ ethaarɔŋw kwinḏi etheele ki-thimaamɔ ethi-ŋwɔ aara kinanaŋw. 32 Mǝ Mǝryǝm ɔppathi kǝzir wɔnaanɔ-gwɔ Yǝcu mindaŋ mɔŋweese ŋuŋduŋw, nɔŋw iidi ŋwɔɽǝlle-na ŋwuuŋwun mindaŋ nɔŋwɔccǝŋw, “Kweeleny, ǝŋgoro kwɔnaanɔ kɔnɔŋw ǝŋgi ǝŋgǝri ere ai ḏuṯ.” 33 Mǝ Yǝcu ese ŋunduŋw kwɔɔrɔ nǝ Yahuuḏ tok yinḏir-yi yaarɔ, nɔŋw pinni bɔlɔr mindaŋ nǝ ṯɔgwor kaṯṯɔ kwɔrop. 34 Nɔŋwsǝccǝŋw, “Ŋgwala kwɔgitta-ŋa ṯaka?” Nǝr ǝccǝŋw, “Kweeleny ilamba ese.” 35 Nǝ Yǝcu aari. 36 Nǝ Yahuuḏ aarɔŋw, “Iisar-ṯi kwamɽaŋw-mana gaa!” 37 Laakin nǝ lokwo lithaathɔ aarɔŋw, “Naa kwɔr-ŋgwɔ kwǝthi-pǝ ŋɔma ethi ǝllici kwunduŋǝ yǝy-nǝ. E-ta ǝŋgwɔŋweere ǝthi ŋɔma ethi kilǝthi Li@aazar ŋwɔ ŋiɽany naana mac-a?”
Li@aazar kwɔmǝ miithi.
38 Nǝ Yǝcu pinni bɔlɔr kwokwony, mindaŋ nɔŋweele ki-thimaamɔ ṯir kibaŋ ṯilǝŋthinnǝ kall-gi. 39 Nǝsi Yǝcu ǝccǝŋw, “Dimmǝr kaali kithaay.” Nǝ Martha kwir eŋgen kwǝthi kwaayɔ-ŋa ǝccǝŋw, “Kweeleny, kwɔmǝ ŋarna uwi kirem, kaka mɔŋgwɔ ǝthi ŋwaamin kwaɽiŋan ŋwaayɔŋ-ŋi.” 40 Nǝ Yǝcu ǝccǝŋw, “Nyiiti kwandica-ŋa mac niŋǝ ǝccǝŋw ǝŋgi ǝmmini ǝŋgi ese ŋinithi ŋǝthi Allah-a?” 41 E-ta nǝr dimmi kiɽibini kithaay. Mindaŋ na Yǝcu dimmi yǝy nɔŋw baaŋala mindaŋ nɔŋwaarɔŋw, “Nyii kwǝccǝ-ŋǝ shukran Papa, kaka nǝṯiny-gwɔ niŋnaci. 42 Nyii kwilŋithi rac kaka nǝṯiny-gwɔ niŋnaci nyaamin tatap, laakin ŋandica-ŋǝsi ŋɔ sǝbǝb-gi kwǝthi lizi kɔlɔ lirlɔ kɔnɔŋw, mindaŋ mǝr ǝmmini ethaarǝŋw ŋa kwir kwɔɔsa-nyii.” 43 Mɔŋw andasi ŋiɽaŋali ŋɔ tǝ, nɔŋw ɔvɔna ŋɔmmaŋi nɔŋwaarɔŋw, “Li@aazar ruuthǝ par!” 44 Nɔŋw ruuthǝ par kwippǝnnǝ yirethi yǝthi kǝfǝn rii naana nǝ ŋwaara tok, nǝ kireth-gi kippǝnnǝ ki-yǝy-nǝ tok. Nǝsi Yǝcu ǝccǝŋw, “Kǝdithir a duŋgwǝci ŋweele.”
Ŋejmeth ŋǝthi-ŋi ɽeenye Yǝcu-ŋw.
(Maṯṯa 26:1-5Mɔrgus 14:1-2Luuga 22:1-2)45 Nǝ Yahuuḏ iila yittǝzir yinḏi ethi raaŋatha Mǝryǝm-ŋwɔ mindaŋ mǝrseese ŋa ŋǝrrǝsi Yǝcu, e-ta nǝr ǝmminici ŋunduŋw. 46 Laakin nǝreele lokwo deŋgen-na nǝr andaci Lifirriisiiyyiina kwomne-ŋgwa kwǝrrǝ Yǝcu. 47 E-ta nǝ rɔ-asa rǝthi kahana-ŋǝ Lifirriisiiyyiin-li aaɽasi mǝjlǝsǝ dɔŋw nǝrsi ǝccǝŋw, “Aatha kwɔrǝrri? Kaka mǝgwɔ kwɔr-ŋgwɔ ǝrri ŋilima ŋuuru! 48 Mǝr duŋgwǝci ethi-tǝ ele dɔṯṯɔk ŋwɔ, a lizi tatap ǝmminici, mindaŋ a Rɔɔmaan iila ǝri kiirasi Heikala-lɔ nǝ bǝlǝḏǝ kwǝri tok.” 49 Laakin nǝsi kwette kweeŋen ǝccǝŋw, kwǝni Gayaafa kwir Rǝ-iis Rɔppa rǝthi kahana kithlǝyu-ṯǝ ŋga, “Ŋaaŋa liti lilŋithi kwomne kweere ḏuṯ. 50 Ŋaaŋa liti lilŋithi mac ethaarɔŋw, ŋɔvthanna ethi kwizi kwette ai ki-lɔɔbi lǝthi lizi mindaŋ mǝ bǝlǝḏ tatap ere kiirathalɔ mac-a?” 51 Nɔŋweere ǝni kwandisa ŋiɽaŋali ŋɔ ṯɔgwor-thi ṯuuŋwun mac, laakin kaka nɔrɔ-ŋgwɔ Rǝ-iis Rɔppa rǝthi kahana kithlǝyu ŋga, nɔŋw-ma andasi ŋipiya-ŋi eṯhi Yǝcu ai ki-lǝǝbi laṯhi balaḏ ṯaṯap, 52 na nǝreere oro ŋǝthi bǝlǝḏ dak mac, laakin ethi aaɽasi nyɔɔrɔ nyǝthi Allah dɔŋw lɔtɔpɔt tatap kinya nyifaathalɔ. 53 Min ki-laamin-la ṯǝ kila, nǝr kette ṯǝrṯiibǝlɔ ṯǝniŋw kwǝr ɽeenye aŋgwɔrɔ. 54 Nǝ Yǝcu ere elelɔ kwokwony por-por mac ki Yahuuḏ-nǝ, laakin nɔŋweele kithaay kinaŋw mindaŋ nɔŋweele kǝzir wɔnanyja saharaa-lɔ keṯṯok ki-mǝḏiinǝ-nǝ kwette kwǝni Afraayiim nǝr-gwɔ naani ṯalaamiiz-thi. 55 Mǝ lɔɔmɔr lǝthi @iiḏ wǝthi Fis-ha aadithi keṯṯok, nǝr-iila littǝzir ǝzir naana ter-ter nǝr ṯaaŋi Urshaliim kerreny ethi-gwɔ suuɽunni. 56 Nǝr naŋiŋini Yǝcu-ŋw-lc mindaŋ mǝr raayitha ki Heikal-na, nǝr ɔṯalɔ deŋgen-na nǝraarcŋw, “Fikir kwaalɔ kwǝni ǝyǝ? Kwiila fǝtǝ rac ki-@iiḏ-nǝ alla bǝri?” 57 Nǝ rɔ-asa rǝṯhi kahana-ŋǝ Lifirriisiiyyiin-li alla waamira wǝni-ŋwɔ, mǝ kwizi kweere elŋece ǝzir wɔnaanɔ-ŋgwɔ, laazim kwǝnyji andaci mindaŋ mǝnyii ǝthi ŋɔma etheele ethi mithǝ.
aza 11
ṯidiɽa ṯeḏi liazar kwumiiḏu
1 nuŋw umi kwete kweni liazar kweḏi beyṯanyaŋw, kayin weḏi maryam-ŋa eŋgen gi kweni marṯa. 2 maryam ŋgwu kwiri kworaḏi Kwelenyi ŋila ŋi, nuŋw firṯizi ŋwara nana owɽu yi, kweḏi eŋgen kweni liazar kwurna. 3 na ṯa lieŋgen lir law uziḏizi nani gwu Yecu, ner eca ŋwu: Kweleny, ŋgwa kwamɽa ŋa, ŋgwana ma kwume. 4 ma Yecu neŋne, nuŋw ari: kimeṯ ŋgu keḏi ŋiɽany kiti kiri mac; keḏi ŋiniṯ ŋeḏi Allah kiri, er gi nii Toru-na teḏi Allah tɔk.
5 na Yecu amɽi marṯaŋwuzi eŋgen gi kwir kwaw, na liazarŋw tɔk. 6 muŋw zi ṯa neŋne ŋeni kimeṯ kuŋun, nuŋw ta nani kinna ŋwamin ŋwuɽen ṯirṯir kezir wunanuŋw gwu. 7 na kwaḏan kwɔkwɔ nuŋw eca limeḏgen ŋwu: erele kezir weni yahuḏiiya kwokwony. 8 na limeḏgen eca ŋwu: rabbi, yahuuḏ yinaŋna ŋa eḏaci yal yi kerreny, na a fa ta ele kwokwony ṯirṯir a? 9 nezi Yecu eŋnici, nuŋw zi eca ŋwu: zaa kwiti kweṯorɔ wri-kwuɽen ki lamin lutuput manya? ma kwor kwere irere lu kaŋwun-na, etuŋw ere ṯugwudani mac, kaka izaŋw gwu fori kweḏi ṯurmun kḏu; 10 ma ṯa kwor irere lu kilikelu, eṯuŋw ṯugwudani, kaka iti nani gwu fori duŋgwun-na mac. 11 nuŋw zi andaci ŋu ta, nuŋw zi ma eca ŋwu: meḏgeri kweni liazar ŋgwana kwuminḏiri ŋwaru; nyi kwele, nyi kiɽṯa. 12 na limeḏgen eca ŋwu: Kweleny, muŋw inḏiri ŋwaru, ŋwu zey. 13 nezi ṯa Yecu andaci ŋundu ŋeḏi ŋiɽany ŋeḏi liazar. ner ta ari, ŋandizaŋwzi ŋeḏi ŋwaru ŋweṯi zi lizi inḏiri. 14 ta nezi Yecu eca ŋwu mamaŋ: liazar kwumɔ ma ay. 15 nenyi amina keni daŋgal-na, kaka iti nani nyi gwu kinanɔŋw mac, mindaŋ a gwu ma emni. na er ṯa ele nanuŋw gwu. 16 ṯaŋwu na tuma, kwecer tuŋwur, eca limeḏgen ŋwu: er li ma ele tɔk, er li ay.
17 ta na Yecu ele, nuŋw kaṯazi kwumɔnani ki ṯimamu-na ŋwamin kwaɽŋan. 18 beyṯanya kwunani urzaliimŋw kworɔ ketok, kwiti kwir zaa mac. 19 na leḏi yahuuḏ luru limele nani gwu marta-ŋa maryam gi, eḏi zi kandizalu, ronyinizar gwu eŋgen. 20 na marṯa, muŋw neŋne mer eca: Yecu ŋgwana kwinḏi, nuŋw ruḏeni tuc eḏi gi kadirḏa; maryam ta nuŋw ta nani duənu pet. 21 na matta eca Yecuŋw ŋwu: aḏri, Kweleny, eŋgi kinna nani kunuŋ, eŋgi eŋgeri ere ay mac. 22 na kire-kirem ŋgwu kinna ŋilŋiicanyji rac, nenyi ari, kwɔmne kwere nyiḏak kwunaŋniḏaŋa Allah, a ŋa ta Allah inḏeḏa ŋaŋwu. 23 na Yecu eca ŋwu: aŋgalu kwudiɽi rac. 24 na matta eca ŋwu: ŋilŋiicanyji rac, kwudiɽi ki tidiɽa-na teḏi lamin kla leḏi kwaḏanŋw. 25 na Yecu eca ŋwu: nyi kwiri tidiɽa, na ŋimiiḏa tɔk. muŋw emnizi nyuŋwu kwere muŋw alliḏa nyuŋwu tugwori nana, muŋw kinna ay, ŋwu miiḏi: 26 na kwete nyiḏak kwumiiḏi, muŋw eḏi ṯəmna eḏalliḏa nyuŋwu ṯugwori nana, ŋwere endi dip ki ŋiɽany-na mac. ŋemnaŋazi ŋu a? 27 nuŋw eca ŋwu: epa Kweleny, ŋimenyjemni eḏari, a kwiri Kwruztu, kwir Tor teḏi Allah, kwarir gi ŋwu, kweŋgila ki ṯurmun-na.
28 muŋw ṯa aru ŋwu, nuŋw ele ki ṯay, nuŋw ornuti eŋgen kweni maryam, nuŋw andaci nyetec, nuŋw eca ŋwu: muallim ŋgwana, kwornuṯiŋa. 29 muŋw zi neŋne, nuŋw diɽeni tuc, nuŋw ele nanuŋw gwu. 30 na Yecu ere upaḏi kinna duənuŋw mac, nuŋw ta nani kezir wukadirḏir gwu matta gi. 31 ṯaŋwu na yahuuḏ yinanir yi duənu, yikandizazi lu, mer eze maryamŋw kwumɔ diɽeni fitak, kwumɔ ru par, ner kwaḏiḏa, arir gwu ŋwu: kwele ki ṯimamu eḏi gwu ara. 32 ma maryam upaḏi kezir wunani gwu Yecu, muŋw eze, nuŋw ideḏa ŋwuɽele-na, nuŋw eca ŋwu: aḏri, Kweleny, eŋgi kinna nani kunuŋ eŋgi eŋgeri ere ay mac. 33 ma Yecu eze maryamŋw kwaru, na yahuuḏ yinḏir yi yaru tɔk, nuŋw pini bulur ki rɔgwɽɔ-na, nuŋw apiri ṯugwori beṯen, 34 nuŋw eca ŋwu: kwukeṯaŋa ṯaka? ner eca ŋwu: Kweleny, izaṯi, erele, iza. 35 Yecu ta kwaraḏina. 36 ta na yahuuḏ ari: aḏri. kwamɽaŋw ma na ga. 37 ner ta ari lɔkwɔ leŋen: kwor ŋgwu, kwellice lunduŋa yey-na, na aḏa kwiiḏi eḏi kileḏi kworu ŋgwu, eŋguŋw ere ay mac?
38 na Yecu pini ki rɔgwɽɔ-na kwokwony, nuŋw ele nani gwu ṯimamu tir kibaŋ, ṯaɽna kiɽbini kworɔ. 39 nezi Yecu eca ŋwu: dimer kiɽbini kitay. na matta kwir eŋgen kweḏi ŋgwa kwayyu eca ŋwu: Kweleny, kwumɔ wuwi kire-kirem kaka muŋw gwu nani ŋwamin kwaɽŋan. 40 na Yecu eca ŋwu: nyi kwiti kwandicaŋa manya, ma eḏi ṯəmna ta, a kweze ŋiniṯi ŋeḏi Allah? 41 ṯaŋwu ner dimi kiɽbini kiṯay. na Yecu baŋḏala, nuŋw aru ŋwu: Papa, nyi kwecaŋa zukran, kaka menyi gwu niŋnaci. 42 ŋilŋiiḏinyji rac, a kweṯinyi niŋnaci dɔk. nenyi ṯa aru ŋwu, kaka rillazanyi gwu lizi lu klu luru ṯa, er zi ma emni, er aru ŋwu: kwunderṯa kwuza. 43 andizaŋw ŋwu, nuŋw ofna ŋuma ŋi, nuŋw ari: liazar, ruḏe. 44 na ŋgwa kwayyu ruḏa, kwufiɽkarna nana, rii tɔk, ŋwara tɔk, kireṯ gi keḏi ŋiɽany; kwukəkina ki yeyna tɔk minḏiil gi. nezi Yecu eca ŋwu: kediḏir zi, efrici ŋwele.
ŋejmeṯ ŋeḏi leleny leḏi yiziiz eḏeɽenye Yecuŋw
45 ṯaŋwu, na yahuuḏ yuru yimer ila maryam ŋali, emnizi Yecuŋw, ner alliḏa ŋunduŋwu rugwori nana mer eze kwɔmne kwumɔŋwerri. 46 lakin ner anda lɔkwɔ kiṯay, ner ele nani gwu lifarzi, ner zi andaci ŋerrezi Yecu. 47 ŋwu ṯaŋwu, nezi leleny leḏi yiziiz, lifarzi li, razi lɔkwɔ duŋw eḏi kete majliza, ner aru ŋwu: a kwirir ṯi ari ḏa ma gwu kwor ŋgwu erri ŋilima ŋuru? 48 mer ṯa efrinji, a lizi alliḏa ŋunduŋwu rugwori nana tatap, mindaŋ er ila leḏi ruumiyaŋw ernyji agḏa ezir weri ŋeleny ŋi. 49 nuŋw zi andaci kwete kweŋen, kweni gayaafa, kwir kweleny kweḏi yiziiz kiḏleyu ŋga, nuŋw zi eca ŋwu: a lende lilŋiica ŋiɽaŋali ŋere ezir, 50 ya eḏi ŋi ari: ŋizawi deŋgeri eḏi kwor kwete ay ki lobi leḏi lizi, mindaŋ er ma ere kiraḏa lu tatap mac. 51 nuŋw zi ere andazi ŋu ŋuma ŋi ŋuŋun mac; lakin urŋw gwu kweleny kweḏi yiziiz kiḏleyu ŋga ta, nuŋw zi andazi ŋiɽya ŋi ŋengi ŋi Yecu eyzi lizi kla. 52 ner ere orɔ ŋeḏi lizi kla cukcuk mac; lakin leŋguŋw zi razi duŋw lir nyor nyeḏi Allah nyifaḏlu tɔk, mindaŋ eḏorɔ-na lutuput. 53 ŋwu ṯa, ki lamin ṯa kla, ner iciḏizi la eḏi naŋni ṯay ṯeḏi ṯi eɽenye ŋunduŋwu. 54 na ṯa Yecu ere ele lu pɔrpɔr ki yahuuḏ-na kwokwony mac; nuŋw ele kezir wete wunani kwuḏer lu, kayin weni afrayiim, ner gwu nani limeḏgen li.
55 na iid weḏi yahuuḏ adiḏi, weni ṯiṯamḏa ŋiɽany, ner diɽi kinaŋw luru, ner ṯaŋi urzaliim eḏi gwu daɽmani, iti kitar gwu iida kinna mac weni ṯiṯamḏa ŋiɽany. 56 ner naŋni Yecuŋw, ner andindazina, rillir gwu ki heykal-na, ner ari: a lari ḏa? kwɔ fa ta ila ki iid-na? 57 na leleny leḏi yiziiz alla amra lifarzi li, weni ŋwu: ma kwizi kwere elŋece ŋunduŋwu ezir eḏuŋw bɔŋwḏi, ta er ma miḏa.