Ɔli kwɔɔlɔcǝr-gi lɔrṯɔwa.
1 Niŋnacar-nyii-ṯi kirem ŋaaŋa lir lɔrṯɔ! Aarir ŋwal nǝ aarithana tok, kaka ninḏi-gwɔ ṯurvǝ ethiila daŋgal-na!. 2 Ŋɔrṯɔ ŋaalɔ ŋimǝ yǝthini, nǝ yireth yaalɔ yimǝsi livɽitir yee. 3 Ḏahab-ŋǝ fiḏḏa-gi kwaalɔ kwumǝ yǝthini, nǝ yǝthini ŋgwa kweeŋen kwɔmoro shuhuuḏ kwandisasa-ŋǝsi naana, mindaŋ ŋwɔ yee yaŋna yaalɔ kaka iigǝ. Ki-nyaamin-la kinyɔ nyǝthi kwaathan-ŋwɔ ŋaaŋa limǝ attasi ŋɔrṯɔwa ŋaalɔ dɔŋw. 4 @ɔmmaal wa wǝkkicǝ-ŋǝsi ŋothɽor ki-rrɔny-na, niseere inḏǝthǝ ɔjra weeŋen mac. Niŋnacarsi-ṯi nǝrmithǝthir-nǝ! Ŋwal ŋwɔthi @ɔmmaal wa waaɽica-ŋǝsi ŋgwa dɔŋw kwuununnǝ, ŋwɔmǝ ɔppathi kiyǝnǝ yǝthi Allah wir Kweeleny kwǝthi Ŋɔma. 5 Ŋaaŋa limǝ urǝzi ŋimiitha ŋaalɔ deddep ŋǝthi kwurǝyulu-ŋw kwomne-gi kwisaaw-kwisaaw nǝ ṯaamana tok. Ŋaaŋa limǝ ruulici rogɽo raalɔ laamina lǝthi ṯuɽuthǝ kworo. 6 Nǝ nǝccǝ ŋgwa kwirllalɔ haakima mindaŋ nǝ ɽeenye kwiti kwirrǝcǝ-ŋǝsi kithaay mac.
Mithǝ ṯɔgwori nǝ ṯaara kiyiiriny.
7 Ŋwɔṯaŋw liyǝŋgǝri ǝṯi mithǝ rɔgwori, mindaŋ mǝ Kweeleny aaɽa kimaara. Iisar-ṯi kwizi kwǝṯi aagɔ ŋɔrɔŋ, nǝṯɔ-ŋgwɔ mithǝ ṯɔgwori kwǝkkicǝ wurǝyuŋi kizǝn ethi riiɽi ŋwɔɔla ŋwisaaw. Ǝṯɔŋw mithici kawwa ṯɔŋwori kǝthi ŋwɔrram nǝ kǝthi ṯɔɔɽa. 8 Nǝ ŋaaŋa tok laazim ǝṯi-ṯǝ mithǝ rɔgwori-ŋw tok. A firllasi rɔgwor-la kaka mǝgwɔ Kweeleny aadithi ethiila. 9 Liyǝŋgǝri liinyi, ǝṯeere ǝrmithǝthǝnǝ daŋgal-na mac, mindaŋ mǝrŋǝsi Allah ere ǝccǝ haakima mac. Gaaḏi kimaadithi keṯṯok ǝgwur kworo. 10 Liyǝŋgǝri liinyi, kithaayinar liɽiiya kila landisa yiriny-yi yǝthi Kweeleny. Ǝsi aaɽanni mithǝŋgi rɔgwori, nǝ ṯindinyanna naana ṯǝthi ṯurvǝ tok. 11 Iisarsi-ṯi kila lǝṯi-nyji ruusi lizi laamina, kaka nǝṯir-gwɔ mithǝ rɔgwori, ŋimǝsi neŋne ŋǝthi Ayoub ŋimthiŋw-ŋi ṯɔgwori, na nǝsi elŋe ŋirṯaŋ ŋimǝsi Kweeleny inḏǝthǝ kwaathan-gi. Kaka nuurǝnnǝ-gwɔ Kweeleny ŋimɽiyǝnǝ deddep nǝ ǝṯi ṯɔgwor yee-na tok.
12 Laakin ŋɔ tatap liyǝŋgǝri liinyi, ǝṯeere aari haalifa mac leere-li alla wurǝyu-yi, ya haliifa-yi welle nyithak, laakin ǝṯi kǝni aari “Aw” mǝ naŋni ethaari “Aw”, nǝ “Bǝri” mǝ naŋni ethaari “Bǝri”, mindaŋ meere iila ki-hɔkwɔm-na mac wǝthi Allah.
13 Ŋgwa kweere daŋgal-na kwiithi ṯurvǝ? Ǝthɔŋwaari kiyiiriny. Ŋgwa kweere kwǝṯaamina? Ǝthɔŋw kette rilŋa kwɔrtathɔ. 14 Ŋgwa kweere daŋgal-na kwuumǝ? Ǝthɔŋw ɔrnɔṯa lishiyuukha lǝthi kǝniisǝ ethǝrici kiyiiriny mindaŋ mǝr ɔratha ŋiila-ŋi kindala luuŋwun yiriny-yi yǝthi Kweeleny. 15 Ṯaara kiyiiriny ṯǝmminǝ-thi ṯǝṯi sǝwi kwizi kwuumǝ, mindaŋ mǝ Kweeleny aaɽasi ŋunduŋw ki-ṯimen ṯuuŋwun, e-ta a ŋikiya ŋa ŋǝrrǝ-ŋwsi ǝri fivrinnici kithaay. 16 Ŋwɔṯaŋw, ǝṯi tutuwǝsi ŋikiyaŋi-lɔ ŋaalɔ wɔɽe-wɔɽeny daŋgal-na, ǝṯi aarathisi-na kiyiiriny wɔɽe-wɔɽeny, mindaŋ mǝ sǝwinni. Ṯaara kiyiiriny ṯǝthi kwirllalɔ ṯǝthi ŋɔma ŋɔppa beṯṯen. 17 Iliiyyǝ kwir-pa kwizigwunǝŋ kaka nyuŋwsi. Nɔŋwaari kiyiiriny tig-tig ethi kaaw ere dɔnni mac, ṯaŋw nǝ kaaw ere dɔnni kwurǝyulu mac yithlǝyu ṯoɽol nǝ nus. 18 E-ta nɔŋwaari kiyiiriny kwokwony mindaŋ nǝ leere dɔnna kawwa, mindaŋ nǝ wurǝyu riiɽi ŋwɔɔla kwokwony.
19 Liyǝŋgǝri liinyi, mɔŋw ṯirenyje kweere daŋgal-na ŋiɽaŋali-lɔ ŋir rerrem mindaŋ mǝ kweere ǝɽǝ kwokwony tǝ, 20 ethi-ŋwsi elŋe ethaarɔŋw mɔŋw urlǝ kweere kwikiyaŋ-lɔ ki-ŋikiya-na tǝ, ŋwɔni kwɔmǝ kilǝthi rogɽo rǝthi kwikiya ŋgwa ki-riɽany-na mindaŋ mǝ ŋikiya ŋuuŋun ŋittǝzir fivrinnici kithaay.
aza 5
eyewey kweḏi kla lir lurṯu liti leṯi zi ketize yey mac liḏaḏu
1 ŋaŋa lir lurṯu, niŋnacari nyi ṯi. ariri ŋwal ki, a kete kwola tɔk, kaka inḏi gwu ṯuronyina eḏila daŋgal-na. 2 ŋurtu ŋalu ŋimɔfaḏa lu faṯ-faṯ, na yiret yalu yimɔ zi lifɽitir ye. 3 ḏahab ṯalu fadḏa gi timɔ yeḏini, na ŋiɽaŋal ŋu ŋinderṯa ŋinḏi eḏi ireci ŋaŋwuzi, er orɔ tɔk kaka ŋia ŋinḏi eḏi ye yaŋna yalu kaka igə. a limownici ŋwamin ŋweḏi kwaḏanŋw ŋurṯua. 4 ujra wumɔ yaḏa lizi lunicaŋazi ruruny ralu ta, eṯuŋw ariḏa ŋaŋwuzi nana, na ŋwal ŋweḏi lunu ŋwumenḏi ki yəni-na yeḏi Kweleny kwuṯemḏizi la tatap. 5 a limɔnani ki ṯurmun-na kwɔmne gi kwizaw kwizaw kwir gaali, eḏi gi nii rɔgwɽɔ-na ralu; a limɔ role kaka kwɔmne kwinḏir eḏeɽenye, 6 na kwumɔ eca hakwuma na eɽenye ŋgwa kwofḏana; kwiti kwulakizaŋazi ŋi ŋere mac.
ṯoraca eḏorɔ lizi liɽena
7 ŋwu ṯaŋwu, lieŋgeri linyi, eṯi miḏa rugwori mindaŋ a Kweleny ila. izarṯi, kwor kweḏi ṯuruny kweṯəkici ŋwana kizen ŋwupa ŋiɽaŋali, ŋwumɔŋw zi kwe kureyu-na, na eṯuŋw miḏa tugwori mindaŋ mer kaṯazi kawa kiŋna, na keḏi kwaḏanŋw tɔk. 8 na ŋaŋa tɔk, eṯi miḏa rugwori; eṯi firlazi rugwori la teter kaka inḏi gwu Kweleny eḏila. 9 lieŋgeri, eṯi zi ere ermiḏeḏa nana liḏaḏu daŋgal-na mac, mindaŋ ma ṯa ere inḏa hukma mac. izarṯi, ŋgwa kwinḏi eḏi hakwumi kwurilli kogwur. 10 lieŋgeri linyi, liɽi leṯandazi yiriny yi yeḏi Kweleny, ner orɔ ṯibaŋica ṯeḏi ṯirara ṯindinyana ṯi nana. 11 izarṯi, leṯinyji ruzi lamina kla leṯirli nyeɽe nyeɽe. ŋimɔ zi neŋne rac ŋeḏi ayuub muŋw irli nyeɽe nyeɽe, na aḏa kwumɔ Kweleny erriri ŋunduŋwu kwaḏan gi. kaka eṯi zi gwu ṯugwor ṯeḏi Kweleny yaḏa-na ŋimɽi ŋi.
12 na ŋiṯemḏi ŋiɽaŋali la tatap, lieŋgeri linyi, eṯi ŋi ere ṯemzi rɔgwɽɔ ŋere mac, ŋiɽaŋal ŋi ŋeḏi kilerena, ya ŋeḏi ṯurmun, ya ŋeḏi kwɔmne kwere nyiḏak. ma ari: aw; eḏir eni aw. ma ari: beri; eḏir eni beri. mindaŋ ma ere eḏi iideḏa ki hukma-na mac.
ŋuma ŋeḏi ṯara-na ki yiriny
13 muŋw inḏa kwere ṯurfa eḏuŋw ari ki yiriny, muŋw icini kwere kwamina, eḏuŋw ortaḏa rilŋa ri. 14 muŋw umi kwete daŋgal-na, eḏuŋw ornuṯi lijowiṯi leḏi kaniiza er erici ki yiriny, mindaŋ mer balici ŋila kindala luŋwun, yiriny yi yeḏi Kweleny. 15 na ṯara ki yiriny ṯəmna ṯi ŋwukileḏi kworu ŋgwa kwurna, mindaŋ a Kweleny diɽezi la. muŋw eni kwerra ŋikyaŋi ta, ŋwu zi fifrici tɔk. 16 ŋwu taŋwu, eti tutuwezi ŋikyaŋi lu ŋalu wuɽe-wuɽeny, na eti meceḏizina ṯara ṯi ki yiriny mindaŋ eḏi zawini. ṯara ki yiriny teḏi kwizi kwete kwofḏana kweteḏi ŋuma beṯe-beṯen. 17 iliiya kwiri kwor kaka nyuŋwuzi, nuŋw ari ki yiriny ṯəmna ṯi tir rerem eḏi kaw ere dunni mac, yiḏleyu ṯɔɽɔl na yowa nyirlil. 18 mindaŋ nuŋw ari ki yiriny kwokwony, na lere dunna kawa na ureyu ami riɽuŋw kwɔmne kwuŋwun.
19 lieŋgeri linyi, muŋw orlaci kwere daŋgal-na ŋiɽaŋali ŋwudɔŋw ŋir rerem, mindaŋ ma kwizi kwere əɽa ŋunduŋwu kwokwony ta, 20 eḏuŋw elŋece eḏaruŋw: ŋgwa kwumɔ əp kwete kwiki ṯugwori kwumaki ṯay pir, kwinḏi eḏi kileḏi rɔgwp ruŋwun ŋiɽany kworɔ, ŋwu kwuɽbeḏa ŋikyaŋi lu ŋitezir tɔk.