Tɔgwɔccalɔ ṯǝthi kwurǝyu-luŋw nǝ ṯǝthi ki-leere-nɔŋw.
1 Wa@ḏ wǝthi kerreny-ŋwɔ nɔŋwɔthi gaanuunǝ-nǝ kǝthi ṯɔgwɔccalɔ, nǝ Ǝzir Wirllinǝlɔ ter wǝthi ṯɔgwɔccalɔ tok. 2 Nǝr daɽimatha khemeya, nǝ kǝzir wǝthi parŋgala-ŋgi nǝr ǝnyjici yiriny yǝni Ǝzir Wirllinǝlɔ ter Wuthǝmthi-lǝ. Nǝ kǝzir wɔ nǝ manaara naani, nǝ ṯerbeeza naani ṯǝthi rǝghiiv rǝṯirsi rillici Allah-lɔ. 3 Nǝ kiininy kaanaŋgi siṯaara ṯɔɔɽɔthala, nǝ ǝzir naani wǝṯir ǝccǝ Ǝzir Wirllinǝlɔ ter Wuthǝmthi-lǝ Beṯṯen. 4 Nǝ kinaŋw nǝ-gwɔ nwǝthgwun ŋwir ḏahab naani ŋwɔṯir-gwɔ ruuɽǝsi kwɔthɽɔla-la, nǝgwɔ Sonḏuug naani tok kwǝthi Wa@ḏ kwɔmaanathir ḏahaba naana, kwɔnaanɔ-gwɔ ṯii-nǝ tir ḏahav ṯǝthi mann-na, nǝ ṯɔɔ naani kinaŋw tok ṯǝthi Haaruun, kitha ṯimǝ ruu yǝni yiglǝ, nǝ yall yiɽǝn yɔlɔɔthɔna kuruu naana kǝthi wa@ḏ. 5 Nǝ ki-Sonḏuug-lǝ kindala nǝ ṯimthaal ṯiɽǝn naani ṯir kaka limeleka lǝthi ŋinith, ṯɔkwuɽubǝthi ǝzir-lɔ wa yɔvɔɔ-yi wǝṯi-gwɔ ŋikiya fivrinni kithaay. Laakin kire-kirem-ŋgwɔ tǝ, nǝ lɔɔmɔr ere oro kɔlɔ mac lǝthi-li dugɽǝsi ŋiɽaŋali-na.
6 Niizaam kwundǝr-ṯǝ ŋgwɔ kwinḏi kwǝrrinǝ-gi ŋiɽaŋal. Ǝṯi kahana ele ǝṯɔŋw ǝnḏi ŋwaamin tatap kheme-na kǝthi parŋgala-ŋw ethi ǝrri ŋothɽor ŋeeŋen, 7 laakin kiininy kaanaŋgi tǝ, ǝṯi-gwɔ Rǝ-iis Rɔppa rǝthi kahana ǝnḏi ŋundu dak, laamin lɔtɔpɔt kithlǝyu min-min. Ǝṯɔŋw ǝnḏi ŋin-ŋi ethisi rillicǝ Allah-lɔ ki-lɔɔbi luuŋwun nǝ ki-lɔobi lǝthi ŋikiya ŋǝthi lizi, ŋa ŋǝṯirsi ǝrri ŋiti ŋilŋicarsi ethaarɔŋw ŋǝrrǝ-nyji mac. 8 Nǝrṯoro ŋɔ mindaŋ nǝ Ṯigɽim Ṯirllinǝlɔ ter andisa-lɔ por-por naarɔ-ŋgwɔŋw, ṯaay ṯinḏi etheele Kǝzir Wirllinǝlɔ ter Wuthǝmthi-lǝ Beṯṯen ṯǝni ṯilǝŋthinnǝ kaka ninaanɔ-gwɔ tǝ kheme kǝthi parŋgala-ŋw ki-rillɔ kinnǝni. 9 Suurǝ kwir-ṯa ŋgwɔ kwandica-nyji ŋiɽaŋali ŋǝthi lɔɔmɔr kɔlɔ. Ŋǝniŋwɔ, haḏaaya wa wǝṯir rillici Allah-lɔ nǝ kwomne kwǝthi kiraama tok kwǝṯir rillici Allah-lɔ, kwiti kwǝthi ŋɔma mac ethi ruusi ṯɔgwori ṯɔsɔɔɽɔ ṯir min-min, ṯǝthi ŋgwa kwǝṯi kwogwɔccelɔ, 10 kaka nǝṯirsi-gwɔ ǝrri ŋa dak ŋǝthi ethne-ŋa ṯiithǝ-thi nǝ kuruu kittǝzir kǝthi ṯusuuɽunnǝ. Nǝ kwomne ŋgwɔ tatap oro gawaaniin kǝthi parŋgala-ŋw kinḏi ethi ǝrrinǝthǝ mindaŋ mǝ lɔɔmɔr iila linḏi-li Allah ethi kette niizaama kwiyaŋ.
11 Laakin Kwɔrɔstɔ tǝ, kwɔmǝ-pǝ iila kwir Rǝ-iis Rɔppa rǝthi kahana rǝthi kwomne kwisaaw kwɔnaanɔ kɔnɔŋw kerreny tuk. Nǝ kheme ŋga kakkɔ-ŋgɔ ŋothɽor-na kithǝmthi-lǝ kir min-min; kiti kidaɽiminna kwizigwunǝŋ-ŋgi mac, ŋǝniŋw kiti kir kǝthi ṯurmun kithɔ mac. 12 Mǝ Kwɔrɔstɔ ele mɔŋw ruu Kheme-gina, nɔŋwɔnḏi taamin tɔtɔpɔt dak toc Kǝzir Wirllinǝlɔ ter Wuthǝmthi-lǝ Beṯṯen, nɔŋweere dimmǝnni ŋiinǝ ŋǝthi nyoo-ŋa nyithri-nyi mac, ethisi rillici Allah-lɔ kaka kiraama, laakin nɔŋw dimmǝ ŋiinǝ ŋǝthi rogɽo ruuŋwun mindaŋ nɔŋwɔvicǝ nyuŋwsi ŋiglǝthǝ ŋǝṯi nannitha dok-dok. 13 Ǝṯi ŋin ŋǝthi nyoo-ŋa nyithri-nyi nǝ yaarɔ yǝthi tɔmɽɔ tǝṯir dɔnni, ǝṯir-yi recce lizi ligii, mindaŋ ǝṯisi kwomne ŋgwɔ suuɽi ethisi rillici yaŋna-lɔ yeeŋen ter. 14 Kaka nɔrɔ-gwɔ ŋiɽaŋal ŋɔ rerrem, e-ta ǝrmǝ rotto ṯatha ŋa ŋǝrrǝsi ŋin ŋǝthi Kwɔrɔstɔ! Kaka ninḏatha-ŋgwɔ Allah rogɽo ruuŋwun kaka kiraama kir min-min Ṯigɽim-thi ṯǝṯi nannitha dok-dok. Ŋin ŋuuŋun ŋǝthi ŋɔma ethi suuɽuci nyuŋwsi rɔgwor-na rǝri ki-ŋothɽor-na ŋiti ŋǝthi faayitha mac, mindaŋ mǝr ǝkkici Allah wɔmiithɔ ŋothɽor.
15 Ŋwɔṯaŋw nǝ Kwɔrɔstɔ oro kwuɽuthu wa@ḏa wɔ wiyaŋ, mindaŋ mǝ kila limǝsi Allah ɔrnɔṯi, ǝri aavi barka kwǝṯi nannatha dok-dok kwǝccǝsi-gi Allah wa@ḏa. Kaka nayɔ-ŋgwɔ ethi fivri ŋikiyaŋi kithaay ŋǝrrǝsi lizi ki-ŋwaamin-la ŋwɔthi wa@ḏ wǝthi kerreny-ŋwɔ. 16 Nǝ mɔŋw lo kweere ŋiɽaŋali ŋǝthi ṯiganna ṯǝthi ŋɔr ŋuuŋun kwaathan-gi, ŋwɔṯaŋw ǝreere rattathi kworo mac illi mɔŋw ai. 17 Kaka niti nǝṯi-gwɔ ŋiɽaŋal ŋɔ ŋuluuthusi kwizi ere ǝthi faayithana mac mǝtǝ kwizi ŋgwa naani kinnǝ kwɔmiithɔ; laakin ǝṯir ǝrrini mǝ ŋiɽany ṯamthɔ rac. 18 Ŋindǝr-ṯǝ ŋɔ mindaŋ nǝ wa@ḏ wǝthi kerreny ŋwɔ ǝrrini ŋin-ŋi. 19 Na mǝ Muusǝ ɔrtuci lizi waamira tatap wǝthi Sherii@a, e-ta nɔŋw dimmi ŋiinǝ ŋǝthi nyithri-ŋǝ nyoo-nyi, nɔŋwsi ɔrṯasina ŋaaw-ŋi, mindaŋ nɔŋw-ŋi ree Kiṯaabi kǝthi Sherii@a, nǝ lizi tatap tok kibornone-gi nǝ yaala-yi yɔɔri tok. 20 Nɔŋwaarɔŋw, “Ŋin ŋirṯa ŋɔ ŋǝthi wa@ḏ ŋǝllicǝ-ŋǝsi-ŋi Allah waamira ethi niŋnithi.” 21 Nǝ ṯaay-thi ṯǝ kɔthɔ ṯette-ṯette, nǝ Muusǝ ree Kheme kǝthi Wa@ḏ ŋin-ŋi, nǝ kwomne naana tatap ŋgwa kwǝthi ṯɔgwɔccalɔ. 22 Imba kaka-ṯǝ niizaam-gi kwǝthi Sherii@a, ǝṯi kwomne ere kweere mac kwǝṯi suuɽunni kwiira ŋiinǝ-na, na mǝ ŋin ere irǝthǝlɔ mac tǝ, a ŋikiya ere fivrinni tok ḏuṯ.
Kiraama kǝthi Kwɔrɔstɔ kǝṯi dimmi ŋikiyaŋi kithaay.
23 Kwomne ŋgwa kwǝṯi aaɽanni kwomne kwǝthi ki-leere-naŋw, kwǝṯi-ṯǝ suuɽunniŋw niizaam-gi ṯǝ ŋgwɔ. Laakin kwomne kwǝthi ki-leere-naŋw, kwǝṯi naŋni kiraama kithǝmthilǝ beṯṯen. 24 Kaka niti nǝnḏi-gwɔ Kwɔrɔstɔ kinnǝni mac kǝzir wirllinǝlɔ ter witi wɔdaɽiminna rii-ri mac, wir suurǝ domony kwǝthi wa wir rerrem. Laakin nɔŋw ele kǝniny ki-leere-na tittir, kǝzir wǝri-ŋgwɔ nanni ǝṯɔ-ŋgwɔ tuurǝcci Allah-lɔ ki-lɔɔbi lǝri. 25 Laakin nǝ Kwɔrɔstɔ ere ǝnḏi ethi rillici Allah rogɽo-lɔ ruuŋwun nyaamin-na nyittǝzir mac, kaka nǝṯi-gwɔ Rǝ-iis Rɔppa rǝthi kahana ǝnḏi Kǝzir Wirllinǝlɔ ter Wuthǝmthi-lǝ Beṯṯen yithlǝyu tatap ŋin-ŋi ŋǝthi haywaan. 26 Ǝŋgireere oroŋw mac tǝ, ǝŋgiŋw rǝrinni nyaamin nyuuru kinaŋw tuk nigittina-gwɔ ṯurmun-lɔ kwon-kwon. Laakin kwɔmǝ ruwǝnnǝlɔ kirem taamin tɔtɔpɔt ki-ŋwɔɔmɔr-la ŋwɔmǝ ṯimaayini kworo ethi iiri ŋikiyaŋi kithaay kaka mɔŋgwɔ rillici Allah rogɽo-lɔ ruuŋwun rǝni kiraama. 27 Kaka nɔrɔr-gwɔ-ṯǝŋw ethi lizi ai taamin tɔtɔpɔt, nǝ kwaathan tǝ ǝṯi hɔkwɔm naani. 28 Ŋwɔṯaŋw nǝ Kwɔrɔstɔ ǝni kwɔmǝr rillici Allah-lɔ taamin tɔtɔpɔt ethi iiri ŋikiyaŋi kithaay ŋǝthi lizi luuru. E-ta ŋgwa kwinḏi ethi ruwǝnnǝlɔ kwokwony, kwiti kwiilicǝ ŋikiyaiŋi kwokwony mac, laakin ethisi kilǝthi kila lǝkkicǝ ŋunduŋw kizǝn beṯṯen.
aza 9
ezir wirlinelu ter weḏi kerrenyŋw wiri zura kweḏi wa wir wiaŋ
1 na tikitaḏiza tiŋna eḏi nizama keni kweḏi ṯikwocalu ṯeḏi Allah, na ezir wuŋwun wirlinelu ter wiri weḏi ṯurmun kḏu. 2 kaka kitina gwu kheyma kuɽena-na kiɽen, na ŋga kinani kwaḏan gi nuŋweḏi kwɔmne-na kweṯir gi allazi lɔmba la, na ṯarbeza, na eḏneya wirlinelu ter; nuŋw eni ezir wirlinelu ter. 3 na kireṯ ṯoɽu ṯi la nuŋw nani kiḏaḏu, keṯir eca ezir wirlinelu ter wuṯemḏi, 4 weḏi ŋweḏgwuna ŋwir ḏahab ŋweṯir gwu ruɽi kwuḏɽula la, na zanḏuk kweṯi ṯinayinici lizi ṯikitaḏiza ṯeḏi Allah, kwenjer dahaba nana tatap, kweḏi tii-na tir ḏahab teḏi manna-na, na tumor-na teḏi haruun kra timɔ riɽi ufɽinya tamin tete, na yali-na yiɽen yeḏi ṯikitaḏiza. 5 na gwu kwɔmne kwudaɽmina ḏahab ṯi eḏaɽani limaleyka nden nani la, kwir laŋɽa leḏi ŋiniṯ ŋeti kwuɽbeḏa ezir lu wa, weṯi gwu Allah-na amiḏina lizi li. ŋeḏi kwɔmne ŋgwu ŋiti ŋer ŋi andazi ŋere ŋere kire-kirem ŋgwu mac.
6 ŋiɽaŋal ŋi ŋeḏi nizam ŋgwu, eti yiziiz enḏi ŋwamin tatap kheyma-na kinani kwaḏan gi, eṯir gwu əkizi Allah ŋɔḏɽor; 7 lakin ŋga kiḏaḏu eti gwu kiziiz kir kweleny enḏi-na dak lamin lutuput tuɽuk kiḏleyu minmin, na eṯuŋw ere enḏi mac kwiira ŋina ŋetuŋw zi kete ŋeḏi rɔgwɽɔ ruŋwun, na ŋeḏi kla limaki tay pir. 8 ŋiɽaŋal ŋi ŋu, eṯi zi Ṯigɽim ṯirlinelu ter ilŋiiḏini eḏaruŋw, tay ṯeḏi ezir wirlinelu ter wuṯemḏi rerec titi ṯimɔkiṯini kinna mac, nani gwu ta kinna kheyma ŋga kinani par ŋgi la. 9 nizam ŋgwu nuŋw orɔ kaka zura kweḏi ŋwomur ŋweḏi kiremŋw. ki lomur ta kla, eṯir inḏeḏa haḏiya na karama kitezir, lakin ner ere eḏi ŋuma mac eḏinḏeḏa ŋgwa kweṯi kwocelu ṯugwori ṯuzuɽu-na. 10 eṯir orɔ dak ŋeḏi eḏne, na ṯiiḏa, na eḏuni rii mindaŋ, —tatap ner orɔ ŋeḏi aŋna domony, mindaŋ ma lomur ila leḏi ŋiɽaŋali ŋiṯemḏi.
ŋuma ŋeḏi Karama keni Kwruztu eḏi zuɽi lizi rugwori
11 lakin ma Kwruztu ruwene lu eḏorɔ Kiziiz kir kweleny kweḏi kwɔmne kwizaw kwinḏi eḏila, nuŋwendi kheyma gi-na kiṯemḏelu kir minmin (kiti kidaɽmina rii ri mac, nuŋw ere orɔ keḏi ṯurmun kḏu tɔk mac), 12 nuŋw enḏi tamin tutuput ṯuɽuk kezir wirlinelu ter wuṯemḏi rerec, kwiti kwapi-na ŋina ŋeḏi yiɽu na ŋeḏi nyiḏri mac, lakin ŋin ŋi ŋuŋun, nuŋw ŋi ṯa alla nyuŋwuzi ki ŋuway-na ŋeḏi ŋikya eḏinḏeḏa nyuŋwuzi hurriya winḏi eḏi nanniḏa dɔk.
13 na ma ŋin ŋeḏi yiɽu-ŋa nyiḏri nyi, na yaru yeḏi tumɽu kya yeṯir yi rece kla limaki ṯay pir, mer eḏi ŋuma eḏi ruzi yaŋna yuzuɽu-na, eḏi zi irlelu ter, 14 a ŋin ŋeḏi Kwruztu er ere eni ŋimɔtamḏalu purpur manya, ŋenyji zuɽici rugwori-na reri, mindaŋ mer duŋgweci ŋɔḏɽor ŋiti ŋeḏi ŋimiiḏa-na mac, eḏəkizi Allah weṯimiiḏi ŋɔḏɽor. Kwruztu kwunderṯa ŋgwu kwinḏeḏa Allah rɔgwɽɔ ruŋwun ruzuɽu-na cucuɽic ṯigɽim ṯi ṯuŋwun tetinanniḏa dɔk, eḏorɔ karama keri.
15 ŋwu ṯaŋwu, nuŋw orɔ kwete kwir ṯəmiḏana ṯeḏi ṯikitaḏiza ṯete ṯiaŋ, mindaŋ mer afi, kla ornuṯuŋw zi, ŋoru ŋinḏi eḏi nanniḏa dɔk ŋikitaḏuŋw zi ŋi, kaka ayŋw gwu kwete eḏi zi alla ki ŋikya-na ŋerrerzi kerreny, miḏir gwu ṯikitaḏiza ṯeḏi kerrenyŋw. 16 muŋw lɔ kwere ŋiɽaŋali ŋeḏi ṯikanna ṯeḏi ŋor ŋuŋwun, ner ere eḏi fayḏa mac, illi muŋw ay. 17 kaka eṯi gwu ṯikitaḏiza kḏu eḏi fayḏa dak ma ŋgwa kwuluḏi ay, kaka eṯuŋw gwu ere eḏi fayḏa ḏuṯ ma ŋgwa kwuluḏi nani kwumiiḏu kinna. 18 ṯaŋwu na ṯikitaḏiza ṯeḏi kerrenyŋw ere eḏi fayḏa mac ṯiira ŋina. 19 kaka andica gwu muuza lizi tatap amra ndendeṯ weḏi kuruu, nuŋw dimi ŋina ŋeḏi nyiḏri-ŋa yiɽu yi ŋaw ŋi, na yala yori na kwaɽi kwɔkwɽeny, mindaŋ muŋw ŋi ma rece kiṯami keḏi kuruu, na lizi tatap tɔk. 20 nuŋw zi eca ŋwu: ŋin ŋu ŋiri ŋin ŋeḏi ṯikitaḏiza ṯikita ŋwi ŋaŋa li. 21 kaka ṯaŋwu tɔk, nuŋw rece kheyma ŋin ŋi, na kwɔmne ŋgwa tatap kweṯir gi kwoce Allah lu. 22 a kweḏir ŋuma keni eḏaruŋw, kuruu gi eṯi kwɔmne tatap zuɽini ŋin ŋi, na ma ŋin ere irelu mac, a ṯififrina ṯeḏi ŋikya ere nani tɔk mac.
23 ŋwu ṯaŋwu mer eni ŋofḏana eḏi zuɽini ŋa ŋir kaka zura domony kweḏi kwɔmne kweḏi kilerena, karama gi ŋgu, ner eni ŋofḏana eḏi kwɔmne kweḏi kilerena rerec zuɽini karama gi kiṯemḏi ŋgu. 24 na Kwruztu ere enḏi mac kezir wirlinelu ter wudaɽmaḏir rii ri, waɽina domony wa wuṯemḏelu rerec, lakin nuŋw enḏi kilerena ŋundu eḏi ruwene lu kirem ki yey-na yeḏi Allah, eḏi roce nyuŋwuzi. 25 nuŋwere enḏi mac eḏinḏeḏa rɔgwɽɔ ruŋwun eḏorɔ karama ŋwamin rac ŋwamin rac, kaka eṯi gwu kiziiz kir kweleny ki ṯurmun-na enḏi kezir wirlinelu ter yiḏleyu yiḏleyu, ŋin ŋi ŋiti ŋir ŋuŋun mac; 26 eŋgir orɔ ṯaŋwu, eŋgi Kwruztu rerini ŋwamin-na caw caw kinaŋw tuk kitina gwu ṯurmun ṯay ṯi. lakin kwumɔ ruwene lu tamin tutuput dak ki lomur liratizaŋw zi li eḏafrazi ŋikyaŋi ṯay ṯete karama gi kir rɔgwɽɔ ruŋwun. 27 na kaka inḏi gwu lizi eḏay tamin tete, na kwaḏan ta er ma rilli ki yey-na yeḏi hukm, 28 ṯaŋwu a Kwruztu, kwumer ruzi karama tamin tutuput dak eḏufini ŋikyaŋi ŋeḏi luru, inḏi eḏi ruwene lu kwokwony, kwiti kweḏi ŋiɽaŋali ŋere ŋeḏi ŋikya mac, lakin eḏi zi efica kla ŋigileḏa leṯi icazi ŋunduŋwu kiṯay.