Yǝcu kwir Rǝ-iis rǝri Rɔppa rǝthi kahana.
1 Ŋiɽaŋal ŋa tatap ŋandisarsi ŋǝniŋw, a kwǝthiri Rǝ-iisǝ Rɔppa rǝthi kahana rette rir kaka-ṯǝŋw, rinaanalɔ ki-thii ṯǝthi mɔni ṯǝthi kwɔrsi kwǝthi ŋinith ŋǝthi Allah ki-leere-na. 2 Ǝṯɔŋw akkɔ ŋothɽor kaka Rǝ-iisǝ Rɔppa rǝthi kahana Kǝzir Wirllinǝlɔ ter, ki kheme-na kir rerrem kidaɽimathi Kweeleny, kiti kidaɽiminna kwizigwunǝŋ-ŋgi mac. 3 Kaka nǝṯir-ŋwɔ alla rǝ-iisǝ-nǝ reere rɔppa rǝthi kahana ethi inḏǝṯṯǝ Allah haḏaaya-ŋwɔsi kiraama-gi; nǝ Rǝ-iis rǝri Rɔppa rǝthi kahana laazim ŋwɔthi tok kwomne kwette kwǝthi inḏǝthǝ Allah. 4 Ǝŋgi-ŋworo kwɔnaanɔ kɔnɔŋw kwurǝyulu, ǝŋgi-ŋweere oro kaahin ḏuṯ, kaka a-naanɔ-gwɔ kahana kǝṯi inḏǝṯṯǝ Allah kwomne kwǝṯi Sherii@a kwǝthi Yahuuḏ naŋni. 5 Nǝ ŋothɽor ŋa ŋǝṯisi kahana akkɔ ŋǝṯi aaɽanni suurǝ kwǝthi Ǝzir Wirllinǝlɔ ter ki-leere-na, ŋirṯa kaka ŋa ŋǝthi Muusǝ. A-naŋna-ŋgwɔ ethi daɽimatha Khemeya kǝthi Wa@ḏ, nǝ Allah ǝccǝŋw, “Aami daɽimathaŋw ŋǝmmǝŋ kaka suurǝ-ŋgwa kwɔbaaŋicar-ŋa kaayin-la.” 6 Nǝ kirem tǝ, nǝr inḏǝthǝ Yǝcu-ŋw ŋothɽor ŋǝthi kahana ŋithǝmthisi ŋeeŋen, kaka-ṯǝ wa@ḏa wa wuɽuthu Yǝcu kelgeny-na kǝthi Allah-ŋǝ lizi-li wa wuthǝmthi-lǝ wǝthi kerreny-ŋwɔ, kaka nǝccinǝ ŋgwɔ ki-wa@ḏ-la wuthǝmthi-la beṯṯen. 7 Ǝŋgi wa@ḏ wa wǝthi kerreny-ŋwɔ ere ǝthi fǝthiyǝ-nǝ mac, ǝŋgi sǝbǝb ere naani kweere kwokwony mac kwǝthi wa@ḏ wir nimrǝ kwuɽǝn.
8 Laakin mǝ Allah kaṯṯasi fǝthiyǝ ki-lizi luuŋwun e-ta nɔŋwaarɔŋw:
“Kweeleny kwaarɔŋwa,
mǝnyii uɽu wa@ḏa wiinyi wiyaŋ lizi-li lǝthi Israa-iil,
nǝ lizi-li lǝthi Yahuuḏiiyyǝ-ŋw.
9 Ŋweere oro kaka wa@ḏa wuɽuthu-nyii lugwurnǝyin-li mac,
ki-laamin-la limǝ-nyji-li mɔlta ṯii-thi ṯiinyi ki-wurǝyu-nǝ
wǝthi Mɔsir-ŋwɔ.
Kaka niti naarir-gwɔ isṯimir ki-wa@ḏ-na wiinyi mac,
minḏaŋ nǝ Kweeleny aarɔŋw, ‘Nyjeere kettice yǝy mac’.”
10 Nǝ Kweeleny aarɔŋw:
“Wa@ḏ wunḏǝr-ṯǝ wɔ winḏi-nyii ethi uɽu lizi-li lǝthi
Israa-iil ki-ŋwaamin-la ŋwinḏi ethiila wǝni-ŋwɔ:
Ǝnyji ǝnyjici Sherii@a kwiinyi ki-ŋwɔɽa-na ŋweeŋen
nǝ ǝnyji lɔcce ki-rɔgwor-na reeŋen,
minḏaŋ nyoro Allah weeŋen, nǝ ŋurduŋǝ-tǝ ǝroro lizi
liinyi.
11 A kweere ere ǝccǝ methgen @allima kwokwony mac,
wala kweere ethi ǝccǝ eŋgen-ŋwɔ, ‘Ilŋithi Kweelenyi’,
kaka ninḏir-gwɔ tatap ethelŋe nyuŋwɔ,
min ŋgwa kwir tǝmǝŋ lahaḏḏɔ kwɔppa ŋɔɔrɔ.
12 Ǝnyji iɽinyaci ŋikiyaŋ-lɔ ŋeeŋen, mindaŋ nyjeere kithaayini kwokwony ŋa ŋeeŋen ŋigii mac.”
13 Nǝ nandisasi Allah ŋǝthi wa@ḏ wiyaŋ, nɔŋwɔni kwɔmǝ ruusi wa wɔɔɽɔn wǝthi kerreny-ŋwɔ; nǝ kwomne kweere nyithak kwǝṯoro kwɔɔɽɔn nǝ kwɔmǝ emre tok, ǝṯɔŋw irṯathalɔ fita-fittak.
aza 8
ŋiziiz ŋeḏi Kwruztu ŋiṯemdi ŋiziiza la ŋeḏi yahuuḏ
1 na ŋiɽaŋal ŋu ŋir nda ŋenuŋw: a kweḏir Kiziiza kir kweleny kir ṯa kaka ŋgu, kimɔ nanalu ki ṯii ṯeḏi mini ṯeḏi kwurzi kweḏi ŋiniṯ kilerena, 2 kir Kiziiz kezir wa wirlinelu ter rerec, wir kheyma kir rerem, ŋga kikita Kweleny, na kwizigwunaŋ ere orɔ kwukita mac. 3 eṯir zi alla lir yiziiz yir leleny yere yere eḏefica haḏiya, na eḏi ketice karama; ṯaŋwu ner ofḏani eḏi Kiziiz ŋgu tɔk eḏi kwɔmne kwere eḏefica Allah. 4 eŋguŋw nani ki ṯurmun-na, eŋguŋw ere orɔ kiziiz mac, kaka nani gwu yiziiz yeṯefica Allah haḏiya ŋiɽaŋal ŋi ŋeḏi kuruu. 5 eṯir zi əkizi ŋɔḏɽor ŋa ŋaɽina zi zura gi kweḏi ezir wirlinelu ter rerec weḏi kilerena; kaka andica gwu Allah muuzaŋw, kinaŋw muŋw naŋni eḏi daɽmaḏa kheyma, ŋaruŋw: iza a daɽmaḏa kwɔmne tatap kaka nizama dap ŋgwa kwubaŋicar ŋa kayin la. 6 lakin ta Yecu kwumafi ŋɔḏɽor ŋiṯemḏizi la ŋa ŋeḏi kerrenyŋw, kaka urŋw gwu ṯəmiḏana ki lizi-na Allah yi ṯeḏi tikitaḏiza ṯiṯemḏelu purpur.
7 eŋgi tikitaḏiza kḏa tiŋna orɔ minmin, eŋgir ere naŋni tete kwokwony mac. 8 lakin nezi Allah eca ŋwu, ermicaŋw zi:
ŋwomur ŋwa ŋwinḏi, ŋwari ŋi Kweleny ŋwu:
ŋwenyi ŋi tatazi tikitaḏiza ṯiaŋ gabiila gi keḏi izrayiil
na gabiila gi keḏi yahuuḏa;
9 titi tinḏi eḏorɔ kaka tikitaḏiza kḏa limenyi daɽmaḏa papaŋali leŋen mac,
ki lomur kla limenyi li miḏa ŋunduŋwuzi rii
eḏi zi ruwa kezir weḏi mizrŋw;
kaka iti nannaḏir gwu ki rikitaḏiza-na tinyi mac,
ŋwu ta nenyji elici rii-na, ŋinderta ŋandizazi Kweleny.
10 tikitaḏiza ṯinderṯa kḏu ṯenyi kete gabiila gi keḏi izrayiil
ma ŋwamin ŋwa ila, ari gwu Kweleny ŋwu:
nyi kwukete kuruu kinyi ki ŋaɽiny-na ŋeŋen,
enyi loce rugwori nana reŋen,
mindaŋ enyorɔ Allah weŋen,
ŋunduŋa ta, er orɔ lizi linyi.
11 mindaŋ ŋwere ilŋiiḏini kwere ŋgwa kweḏi yəni lu,
ya ŋgwa kwir eŋgen kwaruŋw: ilŋiiḏi Kwelenyi,
kaka inḏir gwu tatap eḏelŋe nyuŋwu,
lɔkwɽeny na lupa tɔk.
12 kaka inḏinyji gwu eḏi zi baŋaci ŋimɽya kla leni liki rugwori,
mindaŋ enyjere kiḏayinici ŋikyaŋi ŋeŋen kwokwony mac.
13 muŋw zi andazi ŋeḏi tikitaḏiza tiaŋ, nuŋw ruzi tiŋna kaka kwɔmne kwiti kweḏi fayḏa mac. na ŋgwa kwiti kweḏi fayḏa mac, kwumorɔ kwuɽun tɔk, kwumadiḏi eḏernine.