1 Ŋwɔṯaŋw, ǝri illatha keereny-gi ṯa@liim-thi ṯir min-min, ǝri duŋgwǝcǝ ḏuruusǝ kitha kwaathan-gi ṯir ŋwɔɽa ŋwɔthi ṯa@liim ṯǝthi ŋiɽaŋal ŋǝthi Kwɔrɔstɔ. Ŋende ŋɔvthanna kwokwony ethi kwuuru ṯɔgwagiza ṯǝniŋw; ṯɔrlacca ŋothɽor ŋigii ŋwɔdoŋw, nǝ ŋǝniŋw; ethi ǝmminci Allah; 2 nǝ ŋǝthi ṯa@liim ṯǝthi ma@muuḏiiyya mindaŋ, nǝ ṯigitta rii ki-ŋwɔɽala mindaŋ, nǝ ṯǝthi ṯidiiɽǝ ki-ŋiɽany-na mindaŋ, nǝ ṯǝthi hɔkwɔm wǝṯi nannitha dok-dok tok. 3 Na ǝri kǝniny illatha keereny-gi, kaka nɔrɔr-ṯǝ ŋɔ ŋinḏirsi ethisi ǝrri, mǝnyji Allah ǝmminici. 4 Nǝ kila limǝ ɔrlacci ṯǝmminǝ ṯeeŋen ŋwɔdoŋw, e-ta ǝri-mǝ urlǝ rɔgwor-lɔ reeŋen aŋgwɔrɔ? Lǝni-pǝ linaanɔ kerreny ki-fɔɔri-na kwǝthi Allah; ṯaŋw nǝr nyeŋle haḏiiyyǝ wǝthi ki-leere-naŋw, mindaŋ nǝraavi lɔɔɽɔŋi lǝthi Ṯigɽim Ṯirllinǝlɔ ter; 5 na nǝr elŋe ŋisanna ŋǝthi ŋiɽaŋal ŋǝthi Allah ki-ŋwɔɽa-na ŋweeŋen, nǝ ŋɔma ŋǝthi lɔɔmɔr linḏi tok. 6 Na mǝr ɔrlacci ṯǝmminǝ ṯeeŋen ŋwɔdoŋw tǝ, ŋende ŋinḏi ethoro mǝmkin kwokwony mac ethisi ǝɽǝ mindaŋ ethi urlǝ rɔgwor-lɔ, kaka nǝnir-gwɔ liɽinyithi Tɔɔrɔ tǝthi Allah kwokwony ki-ŋwuuɽi-lǝ, mindaŋ nǝr dimmini ŋunduŋw fǝthiyǝ-lɔ por-por. 7 Allah wǝṯi ǝccǝ wurǝyuŋi baarika wǝṯii ŋaaw ŋǝthi kaaw kǝṯi-gwɔ dɔnnatha-la dok-dok, nǝ wǝṯisi riiɽici ŋwɔɔla ŋwisaaw kila lɔgwɔccarsi. 8 Laakin mɔŋw allisa yuugwiyǝ-ŋwsi karaaw-gi tǝ, ŋweere ǝthi faayitha kweere mac; mindaŋ ŋwɔ nanyji Allah-lɔ ethi ollo, nǝ kwaathan tǝ ŋwuuɽǝsi kithaay.
9 Laakin nandisany-va kinnǝni-ṯǝŋw tok liyǝŋgǝri, nǝnyji-tǝ elŋece rac ŋǝni ŋaalɔ. Nyiiŋǝ lilŋithi rac ethaarɔŋw, ŋaaŋa lǝthi barka kwɔthǝmthi beṯṯen kwǝthi ŋiglǝthǝ ŋaalɔ. 10 Allah witi wir ḏaalim mac, witi winḏi ethi ṯɔɔthina mac ŋothɽor-ŋi ŋa ŋǝrrǝ-ŋǝsi, ya ṯamɽa kitha ṯibaaŋica-ŋa ŋunduŋw ṯimǝccǝ-thi ṯimǝccǝ-ŋǝ-thi kila lirllinǝlɔ ter, nǝ kitha-ta ṯǝni ṯǝrrǝ-ŋǝ. 11 Laakin nyiiŋǝ lǝthi sɔɔrɔma kwɔppa ethi ŋaaŋa tatap aŋranni naana ṯaŋrinna-thi kɔthɔ, mindaŋ mǝ kwomne ŋgwa kwǝkkicǝ-ŋǝ kizǝn rattathi kworo rerrem. 12 Nyiiŋǝ liti linaŋna-ŋǝsi ethoro limoozo mac, laakin oro kaka kila limǝ vmmini, nǝ lǝṯisi indinyanni naana, mindaŋ mǝ aavi ŋgwa kwǝccǝ-ŋǝsi-gi Allah wa@ḏa.
Wa@ḏ wǝthi Allah wǝthi yǝnǝ.
13 Kinaŋw mǝ Allah ǝccǝ Ibraahiim-ŋwɔ wa@ḏa, nɔŋwaari haalifa ki-rogɽo-na ruuŋwun ethisi ǝrri ŋa ŋaarɔŋw-ŋi wa@ḏa. Nǝ kaka niti ninaanɔ-ŋgwɔ kweere mac kwɔthǝmthi ŋunduŋw-la, nɔŋw-ta aari haalifa yiriny-yi yuuŋwun wɔɽe-wɔɽeny. 14 Nɔŋwaarɔŋw:
“Nyii kwɔŋa ǝccǝ wa@ḏa, ethi ǝccǝ ŋaaŋwɔ baarika,
mindaŋ ŋa inḏǝthǝ ŋwɔɔla ŋwuuru.”
15 Nǝsi Ibraahiim indinyanni naana mindaŋ, nɔŋwaavi ŋgwa kwǝccǝ-gi Allah wa@ḏa. 16 Mǝ kwizi aari haalifa tǝ, ǝṯɔŋw aari haalifa yiriny-yi yǝthi ŋgwa kwuthǝmthi ŋunduŋw-lǝ, mindaŋ ǝṯi haliifa rattasi ŋiɽaŋali kworo tatap. 17 Ŋwɔṯaŋw, kaka ninaŋna Allah ethisi baaŋaci kila ŋǝmǝ-ŋǝmmǝŋi wa@ḏa wuuŋwun wuuɽucǝ-ŋwsi, ŋwɔṯaŋw nɔŋweere urlǝ karatha-lɔ kuuŋun mac, nɔŋwaaɽi nɔŋwsi kiɽǝcci haliifa kwokwony, 18 nǝ ŋiɽaŋal ṯǝ ŋɔ ŋir ŋiɽǝn, ǝṯireere aari ghayyira ḏuṯ, nǝ ŋiti ŋǝthi-ŋi Allah ŋɔma ḏuṯ ethi kǝkki ŋǝluŋi. Nyiiŋǝ kila limǝ avratha ŋunduŋw naana ethi kilaaw nǝrnyji ɔkkwazi ethi mithǝ ṯǝkkizǝ kizǝn tetter kitha ṯawicar-nyji. 19 Ṯǝkkizǝ kizǝn kɔthɔ ṯǝthir nyiiŋǝ, ṯir kaka marfa@iinǝ kwisaaw kwɔfirlli tetter, kwǝthi ŋimiitha ŋǝri, nɔŋworo kwɔmǝ ǝnḏi lac-lac kǝzir wirllinǝlɔ ter, mindaŋ nɔŋw ṯamthaci siṯaara-lɔ keereny-gi kwǝthi hǝikal wǝthi ki-leere-naŋw. 20 Ŋwɔṯaŋw Yǝcu kwɔmǝ-nyji iŋnaci keereny-gi nɔŋwɔnḏi kinanaŋw ki-lɔɔbi lǝri, nɔŋgworo Rǝ-iis Rɔppa rǝthi kahana rinannathɔ lur nizaam-gi kwǝthi Mǝlikii-saaḏig.
aza 6
1 ŋwu ṯaŋwu er ma ṯamdaci ŋiɽaŋali la ŋiŋna ŋeḏi ṯaliim ṯeḏi Kwruztu, ŋofḏana er duŋgwuŋgwa eḏi ṯimayina dap, liti linaŋna mac eḏi kwurti ṯugwagiza kwokwony ṯeḏi ṯurla rugwori lu eḏorlaci ŋɔḏɽor ŋwudɔŋw, ŋiti ŋeḏi ŋimiiḏa-na mac, na ṯalliḏa Allah rugwori nana, 2 ṯilŋiiḏina ṯi ṯeḏi ṯizuɽa ŋaw ŋi, na ṯikita rii la, na ṯeḏi ṯidiɽa ṯeḏi kla limay, na ṯeḏi hukm winḏi eḏi nanniḏa dɔk. 3 ki lobi leḏi ŋiɽaŋal ŋu, er duŋgwuŋgwa, menyji Allah emnici. 4 kaka iti eḏir gwu ṯay-na ṯere mac eḏi zi əɽa eḏurla rugwori lu kla limenḏi ki fori-na kerreny, limɔnyeŋle haḏiya weḏi kilerena, limoɽmaṯi Ṯigɽim ṯi tirlinelu ter duŋw, 5 limɔnyeŋle ŋizana ŋeḏi ŋiɽaŋal ŋeḏi Allah, na ŋuma ŋeḏi ŋwomur ŋwinḏi eḏila, 6 mer ta kinna aɽi kiṯay; kaka ṯigreḏir gwu Toru teḏi Allah kwokwony ŋwuɽi la, ŋiɽaŋal ŋi ŋeḏi rɔgwɽɔ reŋen, na eṯir ruzi ŋiɽany ŋuŋun luŋw. 7 na ureyu wumɔ iyeni kawa nana keṯidunnaḏa nyamin nyitezir, na weṯi zi riɽici ŋwola kla leṯaki ŋuruŋ, weṯafa ṯortaḏa nani gwu Allah. 8 lakin muŋw alliḏa yugwia lu tugwup, eṯuŋw ere eḏi fayḏa mac, eṯuŋw nani keṯɔk eḏi kiraḏa lu, ŋwunanje ṯidunnaḏa lu.
9 lakin menyji kinna andazi ŋwu, ŋilŋiicanyji rac, limɽi linyi, eḏaruŋw ŋiɽaŋal ŋalu ŋiṯemḏizi la ŋu, na ŋinḏi eḏafi ŋigileḏa ŋalu. 10 kaka eni gwu Allah wirlalu, witi weṯiṯuḏina mac ŋɔḏɽor ŋi ŋalu, na ŋimɽya tɔk ŋimezi ruwece lu kaka amɽa ŋa gwu ŋunduŋwu, mecaŋazi gwu kla leni lirlinelu ter eḏi Kwruztu-na, kaka eti zi gwu ta kinna erri. 11 nenyorɔ zurum eḏi lere lere daŋgal-na ruwezi ṯaŋrana nana tir kaka kḏu, mindaŋ ma afi ṯikitaḏa tir minmin ṯeḏi ṯəkiza kizen ṯalu ma lamin ila leḏi kwaḏanŋw. 12 ṯaŋwu a ere orɔ limozɔ mac, lakin leṯi zi kwakiḏa kla leṯafi ṯikitaḏa ṯəmna ṯi, ṯindinyana ṯi nana.
ṯikitaḏa ṯeḏi Allah ṯeṯinyji efiza ṯəkiza kizen
13 kaka Allah muŋw gwu inḏeḏa ibrahiimŋw ṯikitaḏa, iti eḏuŋw gwu kwere mac kwuṯemḏi ŋunduŋwu eḏi gi ṯemzi rɔgwɽɔ, nuŋw ṯemzi rɔgwɽɔ ruŋwun ŋundu, 14 nuŋw eca ŋwu:
nyi kwecaŋa ma ŋwa rerem,
nyi kwɔ ŋa ortaḏa beyin, a ŋa kindeci beyin tɔk.
15 ŋwu ṯaŋwu ibrahiim, indinyanaŋw zi gwu nana bɽe-bɽeṯ, nuŋw afi ṯikitaḏa. 16 eti lizigwunaŋ ṯemzi rɔgwɽɔ kwizi gi kwuṯemḏizi la, na ki ṯurreḏa-na ṯeŋen tatap, eṯi ṯiṯemza rɔgwɽɔ orɔ ṯeṯi uɽu ŋiɽaŋali kiṯay. 17 ṯaŋwu, ma Allah naŋni eḏi zi ruwece lu ŋeḏi ṯugwor ṯuŋwun ŋama-ŋamaŋ kla linḏi eḏafi ŋoru ŋeḏi ṯikitaḏa, ŋiti ŋinaŋnaŋw zi gwu eḏi zi orlelu ŋere mac, nuŋw ṯemzi rɔgwɽɔ ŋundu. 18 ŋwu ṯa, ŋiɽaŋal ŋi ŋiɽen ŋiti ŋeṯorle ḏuṯ, ŋiti ŋeḏi ṯay ṯere mac eḏi zi ŋi Allah andazi ŋir ŋəluŋ, nyiŋa kla limafraḏa ŋunduŋwu nana, er ma eḏi ŋuma-na ŋeḏi ṯifirlazala, eḏi miḏa ṯəkiza kizen teter ṯikitizar nyji lu. 19 ŋeḏir zi ŋu ŋeṯi miḏeḏa rɔgwɽɔ lu teter, ŋeṯenḏi ezir nana kidi-kidir ŋir ṯəkiza kizen, ṯeṯenḏi iininy yi-na kezir wirlinelu ter wuṯemḏi, kireṯ ṯoɽu ṯi la. 20 ezir wu wir wumɔ gwu Yecu enḏi-na ŋiɽaŋal ŋi ŋeri, kwumenyji iŋnaci kereny, muŋw gwu orɔ Kiziiz kir kweleny keṯinanniḏa dɔk, keḏi nizama kwir kaka kwedi malkizaaḏik.