1 Ŋwɔṯaŋw, nǝ wa@ḏ wǝthi Allah wuɽucǝŋw nyuŋwsi ethǝnḏi kǝzir wǝthi ṯigaṯṯa wǝŋ, wɔta wɔnannathɔ kinnǝ, ṯaŋw ǝri aŋratha, mindaŋ mɔŋweere kaṯṯanni kweere kwaalɔ mac, kwɔbǝriyǝnni ethǝnḏi kǝzir wǝthi ṯigiṯṯa wǝŋ. 2 Kaka mǝr-gwɔ neŋne ŋiɽaŋali ŋisaaw, kaka-ṯǝ kinaŋw niŋnarsi-gwɔ ŋundu-ŋǝ tok. Nǝ a-niŋnar-va kinnǝni ŋiɽaŋali tok, laakin nǝreere ǝthici ŋunduŋwsi faayitha-na tok mac, kaka a-niŋnarsi-gwɔ mindaŋ nǝrseere mithǝ ṯǝmminǝ-thi mac. 3 A kwǝri ǝnḏi kǝzir wǝthi ṯigaṯṯa wǝŋ kaka nǝmminǝr-gwɔ. Kaka naarɔ-ŋgwɔŋw:
“Kaka naariny haalifa ŋarriny-ŋi ninyaarɔŋw,
‘Ǝreere ǝnḏi kǝzir wiinyi wǝthi ṯigaṯṯa wǝŋ ḏuṯ’.”
Nandisa-ŋwsi-va ŋɔ kinnǝni tok, laakin rothɽor ŋuuŋun, nǝrṯǝni ŋimǝ ǝrrini kerreny tuk, nigittina-gwɔ ṯɔgwagizalɔ kwon-kwon ṯǝthi ṯurmun. 4 Kaka nandisa-ŋgwɔ kǝzir wette Kiṯaab-na ŋǝthi laamin lir dɔvokwɔɽony nɔŋwaarɔŋw:
“Nǝ Allah kaṯṯɔ wǝŋ ki-laamin-la lir dɔvokwɔɽony
ki-ŋothɽor-na ŋuuŋun tatap.”
5 Nǝ kǝzir-ṯǝ wa wette-wette nɔŋwaarɔŋw:
“Liti lǝnḏi kǝzir wiinyi wǝthi ṯigaṯṯa wǝŋ ḏuṯ.”
6 Kila limǝ neŋne kerreny Inyjiiiǝ nǝr ɔblaṯi ethi kaṯṯasi ṯigaṯṯa wǝŋ ṯuuŋwun, kaka nuuɽur-gwu yǝninǝ. Laakin nǝr naani lithaathɔ lǝrsi duŋgwǝci ethǝnḏi. 7 Ŋǝni rerrem ethaarɔŋw, Allah wɔmǝ alla laamin lette laarɔŋw-liŋw, “Aŋwɔnɔ.” Nǝ kwaathan mǝ yithlǝ ṯamthɔ yittǝzir tǝ, nɔŋw-li andasi kwokwony Ḏaawḏ-ŋgi, ŋa ŋimǝ andanni Kiṯaab-na kerreny tuk ŋaarɔŋw:
“Mǝ neŋne ṯogɽo ṯuuŋwun aŋwɔnɔ tǝ, ere ɔnḏi rɔgwori
mac.
8 Ǝŋgi Yashuu@ ǝnyji lizi kǝzir wǝthi ṯigaṯṯa wǝŋ wa wǝccǝsi-yi Allah wa@ḏa, ŋwɔṯaŋw ǝŋgi Allah ere andasi kwokwony kwaathan ŋiɽaŋali ŋǝthi laamin lir ter mac. 9 Ŋwɔṯaŋw nǝtǝ ǝzir wǝthi-gwɔ kaṯṯɔ wǝŋ wǝthi lizi lǝthi Allah naani kinnǝni, kaka ṯigaṯṯa wǝŋ ṯǝthi laamin lǝni Sǝbiṯ 10 Mɔŋw ǝnḏi kweere ki-ṯigaṯṯana wǝŋ ṯǝthi Allah ṯaarɔŋw-thi wa@ḏa, e-ta ŋwɔni kwɔgaṯṯɔ wǝŋ ki-ŋothɽor-na ŋuuŋun, kaka-ṯǝ nigǝṯṯi-gwɔ Allah wǝŋ ki-ŋothɽor-na ŋuuŋun.
11 Ŋwɔṯaŋw, ŋir kǝniny ǝri kwɔrmɔṯanni ethǝnḏi ki-ṯigaṯṯa-na wǝŋ kitha, mindaŋ mɔŋweere kweere mac dǝŋgǝrnǝ kwɔmǝ bǝriyǝnni, ŋiɽaŋal-ŋi-ṯǝ ŋa ŋǝthi ŋɔdɔrllathɔ ŋette-ŋette. 12 Kaka nǝni-gwɔ ŋiɽaŋal ŋǝthi Allah ŋimiitha ŋǝṯi akkɔ ŋothɽor ŋiiranna beṯṯen ethi kaalala-la kiiranna raay riɽǝndǝk, ǝṯir uɽǝthǝ rogɽo-ŋwɔsi-na ṯigɽim-thi, na ǝzir wa wiithithǝ-gwɔ ŋwiiya mindaŋ rujjǝŋi mindaŋ, nǝ ǝṯir ǝccǝ sɔrɔɔma haakima, nǝ ǝfkǝrǝ wǝthi rɔgwor rǝthi lizi tok. 13 Kwomne kwiti kweere mac, kwǝṯi luccuni kiyǝnǝ yǝthi Allah; laakin nɔŋwɔni kwurwǝnnǝlɔ ndendeṯ, nɔŋw naanalɔ por-por kiyǝnǝ yǝthi ŋgwa kwinḏir ethi rilli kiyǝnǝ yuuŋwun, ŋgwa kwinḏi ethi iisacci nyuŋwsi ŋothɽor ŋǝri.
Yǝcu kwuthǝmthi Rǝ-iisǝ-lǝ Rɔppa rǝthi kahana.
14 Ŋwɔṯaŋw, ǝri mithǝ ṯǝmminǝ kitha tetter ṯǝthir. Kaka nǝthir-gwɔ Rǝ-iisǝ Rɔppa rǝthi kahana, rithǝmthi-lǝ rimeele nǝr rilli kiyǝnǝ yǝthi Allah, imba, Yǝcu-ṯǝ ŋgwa kwɔrɔ Tɔr tǝthi Allah. 15 Rǝ-iis rǝri Rɔppa rǝthi kahana riti rir kaka kwette kwiti kwǝṯi ṯɔgwor yatha ŋiɽaŋal-ŋi ŋǝthi ṯajla ṯǝri mac. Laakin a kwǝthir kǝniny Rǝ-iisǝ Rɔppa rǝthi kahana rɔmɔmmɔrsi ŋiɽaŋal-ŋi tatap kaka nyuŋwsi, laakin nɔŋwseere akki ŋeere pir mac. 16 Ŋwɔṯaŋw, ǝri bonye, mindaŋ ǝri dɔŋgwatha kwɔrsiya naana keṯṯok kwǝthi Allah kǝzir wǝthi ne@ma. Mindaŋ mǝraavi ŋimɽiyǝ kinanaŋw, nǝ ǝri kaṯṯasi ne@ma ethi mǝcci nyuŋwsi ki-lɔɔmɔr-la kila lǝṯir-li naŋni ṯimǝccǝ.
aza 4
Yecu kwiri Kiziiz kiṯemḏelu kiṯemḏi haruunŋw la
1 ŋwu ṯaŋwu, nani gwu kinna ṯikitaḏa eḏenḏi kezir wuŋwun weḏi gwu kaṯu wəŋ, er ṯenye eḏi kwere daŋgal-na ulezi ṯay eḏenḏi. 2 kaka mer nyji gwu ireci ŋiɽaŋali ŋizaw deŋgeri-na kaka ṯa irecerzi ŋunduŋwuzi. lakin na ŋiɽaŋal ŋimerzi neŋne ere eḏiḏa fayḏa kwere deŋgen-na mac, kaka iti inḏacarzi gwu təmna-na mac nanir gwu limezi neŋne. 3 a kwirir pa limenyjemni, lenḏi kezir wa wir wuŋwun weḏi gwu kaṯu wəŋ, aruŋw yi gwu ŋwu:
kaka ṯemzinyi gwu ŋirŋaza ŋi ŋinyi,
er ere enḏi kezir winyi eḏi gwu kaṯu wəŋ ḏuṯ.
nuŋw ratazi ŋɔḏɽor ŋuŋun kinna kwizatuk ki lomur likitina li ṯurmun. 4 kaka luḏinar gwu kezir wete ŋeḏi lamin leni dufɔkwɽeny, ŋaruŋw: na Allah kaṯu wəŋ ki lamin leni dufɔkwɽeny ki ŋɔḏɽor-na ŋuŋun tatap. 5 na kwokwony kezir wa nuŋw aruŋw, er ere enḏi kezir winyi dut weḏi gwu kaṯu wəŋ. 6 ŋwu ṯaŋwu, naŋnaŋw gwu kinna lere eḏi gwu enḏina lɔkwɔ, na kla limɔneŋne ŋiɽaŋali ŋizaw kerreny, ner kiraḏi eḏenḏi kaka enir gwu liira ṯəmna, 7 nuŋw alla lomuri lir ter, leni aŋwunu, nuŋw ari dauḏ ŋgi kwaḏan gi tuk, ki ŋiɽaŋal-na ŋandina kerreny, ŋeni ŋwu:
aŋwunu, ma neŋne ṯɔgwɽɔ ṯuŋwun,
eṯere ferle rugwori mac.
8 na eŋgi zi kwor kweni yazuwa inḏeḏa ezir weḏi gwu kaṯu wəŋ, eŋgi zi Allah ere andazi mac kwaḏan gi ŋeḏi lamin lir ter, 9 ŋwu ṯa, na ezir weḏi gwu kaṯu wəŋ nanji kinna lizi lu ledi Allah, wir kaka zabiṯ kwirlinelu ter. 10 na kwere nyiḏak kwenḏi kezir weḏi gwu kaṯu wəŋ weḏi Allah, eṯuŋw ala ŋɔḏɽor ŋuŋun rii ŋundu tɔk, kaka ṯa alaḏizi gwu Allah ŋuŋun rii.
11 ṯaŋwu er kwurmɔṯani kwurɔ-kwurɔp eḏenḏi kezir wa weḏi gwu kaṯu wəŋ, mindaŋ ŋwere iidi kiṯay la kwere mac kaka iti eḏuŋw gwu ṯəmna mac, ŋir kaka ṯa ŋa. 12 kaka eni gwu ŋiɽaŋal ŋeḏi Allah ŋimiiḏu, na ŋeḏi ŋuma tɔk ŋirana eḏi kalala la kere keḏi ray riɽen tɔk, ŋeṯiṯugwi eḏuɽeḏa rɔgwɽɔ-na na ṯigɽima-na tɔk, na kezir-na wiḏiḏu gwu ŋwia, na rujaŋ-na tɔk, na ŋeṯiṯecici ṯortunana, na ṯireca yey lu ṯeḏi ṯugwor. 13 na kwɔmne ere kwere mac kwudaɽmina kweḏi ŋuma eḏi lucineḏa ŋunduŋwu ki yey-na. eṯi ŋiɽaŋal tatap nanalu pɔrpɔr ki yey-na yeḏi ŋgwa kweṯi zi eḏi tatap ŋeni ŋeri.
14 ṯaŋwu, eḏir gwu nyiŋa Kiziiza kir kweleny kiṯemḏelu purpur, kimɔṯamdu lere li-na, kinderṯa keni Yecu, kwir Tor teḏi Allah, er miḏa ḏiin ṯeri teter. 15 kaka iti eḏir gwu mac Kiziiza kir kweleny kiti keḏi ŋuma mac eḏi ṯugwor yaḏa deŋgeri-na ki ṯajila-na ṯeri; lakin na kete kimer mummi ṯumɔmma ṯi tatap, kaka eṯir gwu mummi nyuŋwuzi, na ŋundu ṯa nuŋw zi ere erri ŋiki ḏuṯ. 16 mindaŋ er bonye eḏi duŋgwaḏa kwurzi nana kwedi ŋeleny, kwir ezir weḏi ṯimeca ṯeḏi ŋimɽi, er ma afi ŋimɽya ŋeḏi Allah, na er ma kaṯazi ṯimeca ṯeḏi ŋimɽi eḏi meci nyuŋwuzi ki lomur leṯir li naŋni.