Ṯǝmminǝ ṯir min-min.
1 Ṯǝmminǝ ṯindǝr-ṯǝ ṯǝṯi ruusi ṯǝkkizǝ ṯǝri kizǝ rerrem, nǝ ǝṯɔŋw firllasi nyuŋwsi-lǝ ethaarɔŋw, kwomne kwiti kwǝṯi iijini mac, kwundǝr-ṯǝ kwir rerrem. 2 Nǝṯǝ ṯǝmminǝ oro ṯǝvrinyjǝ lizi lǝthi kerreny-ŋwɔ mindaŋ na-li Allah aamina. 3 Nǝ ṯǝmminǝ-thi nǝr elŋe ethaarɔŋw ṯurmun ṯigiṯṯina ŋiɽaŋal-ŋi ŋǝthi Allah, ŋgwa kwiijinǝ kwǝni kwɔdaɽiminna kwomne-gi kwiti kwǝṯi iijini mac.
4 Ṯǝmminǝ-thi nǝ Haabiil keṯṯice Allah kiraama kithǝmthi kiraama-la kǝthi Gaayiin. Nǝ ṯǝmminǝ-thi nɔŋw ǝgini yiriny yisaaw kaka kwizi kwirllalɔ. Kaka nǝmminicǝ-gwɔ Allah haḏaaya wuuŋwun. Nǝ ŋiɽaŋal-ŋi ŋǝthi ṯǝmminǝ ṯuuŋwun nɔŋwtǝni kwandindisa kinnǝni kirem, nǝ ŋundu-tǝ kwɔmǝ ai. 5 Ṯǝmminǝ-thi nǝ Allah dimmǝ Akhnuukh-ŋwɔ mindaŋ nɔŋweere ai mac nǝ nɔŋweere inḏini mac, kaka mǝgwɔ Allah dimmǝ. Nǝ kiṯaab aarɔŋw, niti nidimminǝ Akhnuukh kinnǝni mac, nɔŋwɔni kwǝmǝ Allah-na. 6 Kwiti kweere mac kwǝthi ŋɔma ethi ǝmi Allah-na kwiira ṯǝmminǝ-nǝ. Kaka mǝ kweere nyithak iila naanɔ-gwɔ Allah tǝ, laazim ŋwɔthi ṯǝmminǝ ethaarɔŋw Allah wɔ wɔnaani, nǝ ǝṯɔnwsi inḏǝthǝ ɔjra kila lǝṯi naŋni ŋunduŋw-lɔ. 7 Nǝ ṯǝmminǝ oro ṯuduŋgwǝcǝ Nuuh-ŋwɔ ethi niŋnaci Allah naalɔ-ŋgwɔ kwomne-gi ŋgwa kwinḏi ethiila kwiti kwǝṯi iijini mac. Mindaŋ nɔŋw niŋnithici Allah, e-ta nɔŋw daɽimatha mɔrkǝbǝ kwumǝ kilǝthi ŋunduŋwsi dɔɔnɔ-ŋgana kwuuŋwun. Nǝrṯoroŋw mindaŋ nǝ ṯurmun kettine kaṯṯi, mindaŋ nǝ Nuuh aavi ŋirllalɔ ṯǝmminǝ-thi naanɔ-gwɔ Allah.
8 Nǝ ṯǝmminǝ oro ṯuduŋgwǝcǝ Ibraahiim-ŋwɔ ethi niŋnithici Allah kinaŋw nɔrnɔṯɔŋw ethi ruu etheele ki-bǝlǝḏ kwǝccǝŋw-ŋgi wa@ḏa. Nɔŋw ɔrlacci bǝlǝḏǝ kwuuŋwun ŋwɔdoŋw, nɔŋwteele nyithak kwiti kwilŋica ǝzir mac wiilathɔ-ŋgwɔ. 9 Ṯǝmminǝ-thi nɔŋw nanni kaka kwɔthimthina ki-bǝlǝḏ-nǝ ŋgwa kwǝccǝ-gi Allah ŋunduŋw wa@ḏa. Nɔŋw nanni ki-yeeme-na, kaka-ṯǝ ŋa ŋimǝsi Is-haaŋ-ŋǝ Ya@guub-gi ǝrri, kaka nǝnir-gwɔṯǝ limǝ aavi wa@ḏa wa wette-wette naanɔ-gwɔ Allah. 10 Kaka nǝkkicǝ-gwɔ Ibraahiim mǝḏiinv kizǝn ŋgwa kwugwuurucǝ Allah rɔgwagiza nǝ kwaccaŋw ki-rɔgwagiza-la rǝṯi nannatha dok-dok. 11 Ṯǝmminǝ-thi nǝ Saara ǝthi ŋɔma etheethe niṯamthathɔŋw-va kinnǝni tok keereny ŋimǝyǝŋ-ŋi. Kaka nǝmminǝ-gwɔ Allah ethaarɔŋw winḏi ethi ṯimmasi wa@ḏa kworo wuuŋwun. 12 Nɔŋw elŋe nyɔɔrɔ nyittǝzir naanɔ-gwɔ kwɔr kwɔmǝ ǝdithici ŋiɽany, nyuuru nyir kaka rɔɔrɔm rǝthi leere, nǝ nyittǝzir nyaaɽinna ramla rǝṯi naani bahara kǝni.
13 Nǝ ṯǝmminǝ-thi nǝ lizi kɔlɔ tatap ai. Nǝreere kaṯṯasi kwomne mac ŋgwa kwǝccǝsi-gi Allah wa@ḏa, laakin nǝreese kwomne-ŋgwa kinǝŋgwu tuk mindaŋ nǝr aalanni, na nǝr elŋece rogɽo reeŋen ethaarɔŋw nyiiŋǝ lirta lithimthina liirǝrǝlɔ domony kɔnɔŋw kwurǝyulu. 14 Lizi lǝṯi andindasi-ṯǝŋw, nǝr elŋethine-lɔ por-por linaŋna bǝlǝḏǝ-lɔ kwǝthi rogɽo reeŋen. 15 Ǝŋgir aari fǝkirǝ ŋiɽaŋal-ŋi ŋǝthi wurǝyu wa wumǝr ṯayyalɔ, ǝŋgir-ṯǝ kaṯṯasi ṯaay rac ethaaɽi. 16 Laakin ki-lɔɔbi lǝthisi-li ǝrri ŋɔ tǝ, nǝrǝthi sɔɔrɔma kwǝthi bǝlǝḏ kwɔvthanna kwuthǝmthi kwǝthi ki-leere-naŋw. Ŋwɔṯaŋw nǝ ṯɔrony ere mithǝ Allah mac kaka mǝr-gwɔ ruusi ŋunduŋw Allah weeŋen, kaka mɔŋwsi-gwɔ daɽimaci mǝḏiinǝ kwette.
17 Nǝ ṯǝmminǝ oro ṯuduŋgwǝcǝ, Ibraahiim-ŋwɔ kinaŋw mǝr ṯǝcci, nɔŋw inḏǝṯhǝ Allah Is-haag-ŋwɔ kaka kiraama, nǝ Ibraahiim oro kwette rac kwǝccǝ Allah wa@ḏa, laakin nɔŋw tǝ ǝmmini ethi kette tɔɔrɔ tuuŋwun tɔtɔpɔt ethoro kiraama. 18 Nǝ Allah ǝccǝŋw, “Is-haag-ŋgi a ǝthi ŋwɔɔla ŋwa ŋwɔccǝŋǝ-ŋi wa@ḏa.” 19 Nǝ Ibraahiim ǝmmini elhaarɔŋw Allah wǝthi ŋɔma ethi dindǝ lizi ki-ŋiɽany-na, ŋwɔṯaŋw mindaŋ nɔŋw-mǝ diiɽica Is-haag-ŋwɔ ki-ŋiɽany-na, ŋir mǝthǝl. 20 Ṯǝmminǝ-thi nǝ Is-haag andaci Ya@guub-ŋwɔsi @iisɔ-gi ŋiɽaŋali ŋǝthi barka kwinḏisi ethisi iilicǝ. 21 Nǝ ṯǝmminǝ oro ṯuduŋgwǝcǝ Ya@guub-ŋwɔ kinaŋw naadithi-ŋgwɔ ethi ai, nɔŋwɔccǝ nyɔɔrɔ nyǝthi Yuusuf baarika. Nɔŋw ṯɔgdannila ṯɔɔthi mindaŋ nɔŋw kwocce Allah-lɔ. 22 Nǝ ṯǝmminǝ oro ṯuduŋgwǝcǝ Yuusuf-ŋwɔ kinaŋw mɔŋw aadithi ethi ai, nɔŋw andasi ŋiɽaŋali ŋinḏi-ŋi kwelle kwǝthi Israa-iil ethi ruuthǝ Mɔsir-na, mindaŋ nɔŋwsi ṯayici niizaamalɔ kwǝthi aanatha aŋna wuuŋwun.
23 Nǝ ṯǝmminǝ oro ṯuduŋgwǝcǝ ṯǝrnyin ṯǝthi Muusǝ-ŋǝ lǝnyin-gi ethi lucci ŋunduŋw kinaŋw mɔŋworo yǝwǝ ṯoɽol yilŋithir-yi. Kaka niisar-gwɔ tɔɔrɔ ṯisaaw ŋisanna, mindaŋ nǝreere ṯeenye waamira wǝthi mǝlik mac. 24 Nǝ ṯǝmminǝ oro ṯuduŋgwǝcǝ Muusǝ-ŋw kinaŋw mɔŋw peŋe, nɔŋw derne ethoro tɔr ṯǝthi tɔr tir tiira tǝthi Fir@awn. 25 Nɔŋw ǝmmini ethi inḏa ṯurvǝ lizi-li lǝthi Allah ki-lɔɔbi lǝthi-li nyeŋlena ṯinyiŋla-thina ṯǝthi ŋikiya. 26 Nɔŋw ruusi ṯurvǝ ṯǝthi fǝthiyǝ kwǝni Kwɔrɔstɔ kwɔvthanna beṯṯen ethi ŋɔrṯɔla tatap ŋǝthi Mɔsir-ŋwɔ, kaka niccasa-ŋgwɔ ɔjra kithaay winḏi ethiila. 27 Nǝ ṯǝmminǝ oro ṯuduŋgwǝcǝ Muusǝ-ŋwɔ ethi ṯayya Mɔsir-ŋwɔlɔ kwiti kwithiinya urǝziŋw ṯɔgwori kwǝthi mǝlik mac. Nɔŋwɔni kwɔgwɔrmɔṯanna kaka niisa-ŋgwɔ Allah witi wǝṯi iijini mac, mindaŋ nɔŋw derne ḏuṯ ethaaɽi. 28 Nǝ ṯǝmminǝ oro ṯuduŋgwǝcǝ ŋunduŋw ethi daɽimatha Fis-ha, mindaŋ nɔŋw ree ŋwɔbaaba ŋin-ŋi, mindaŋ nǝ meleka kwǝthi ŋiɽany ere ɽeenye nyɔɔrɔ nyir ŋwɔɽa mac nyǝthi lizi lǝthi Israa-iil.
29 Nǝ ṯǝmminǝ oro ṯuduŋgwǝcǝ lizi lǝthi Israa-iil ethi dappi Bahar El-ahmar-gila kaka ǝṯireele ki-wurǝyu-lǝ wɔnḏɔ, laakin mǝ Mɔsiriyyiin ṯǝcci ethisi ǝrri ŋɔ tok tǝ, nǝsi ŋaaw ǝnyji dip. 30 Nǝ ṯǝmminǝ oro ṯuduŋgwǝcǝ ŋweṯṯeya ŋwɔthi Ariiha-ŋw nǝr irdidi kinaŋw mǝ kwelle kwǝthi Israa-iil rikkanni yaaŋwɔnɔ dɔvokwoɽɔny ǝzir-yi. 31 Nǝ ṯǝmminǝ oro ṯuduŋgwǝcǝ Raahaab-ŋwɔ kwir kwiijin etheere ai mac lizi-li kila lǝṯi uɽi yǝninǝ, kaka naalina-ŋgwɔ lizi kila lɔɔsarsi ŋejmethi.
32 Nyii kwɔtǝ andisasa ŋiɽaŋali ŋɔ keereny dɔṯṯɔk-ga? Laakin lɔɔmɔr lende linḏi ethi naani ethisi andasi ŋǝthi Jiḏ@awn, Baaraag, Shamshuun, Yafṯaah, Ḏaawḏ, nǝ Samwiil-ŋǝ liɽii-li. 33 Ṯǝmminǝ-thi nǝr ṯɔgthi Iibǝlǝḏ-li tatap mindaŋ nǝrsi ṯiinyi. Nǝrsi ǝrri ŋirllalɔ mindaŋ nǝraavi ŋgwa kwǝccǝsi-gi Allah wa@ḏa. Nǝr kwuɽubǝthǝ ruunyu rǝthi lɔsɔndaŋa, 34 nǝr iɽinyatha iigǝŋi wɔppa, nǝr kilatha ŋiɽany ŋǝthi kaalala kiiranna. Nǝr ajli, laakin nǝr-tǝ firllathala. Nǝr ferlle ki-ŋǝryǝ-nǝ tetter mindaŋ nǝr ṯiinyi jesha kwuthimthina. 35 Ṯǝmminǝ-thi nǝ laaw ǝɽinnǝ lizi leeŋen laayɔ mǝrsi-gwɔ diiɽǝ ki-ŋiɽany-na. Lithaathɔ nǝr derne ethi kǝdinnǝ ethoro hɔrr, nǝr inḏa ṯurvǝ, e-ta ethi-mǝ diiɽǝ ŋimiitha-ŋi ŋɔvthanna beṯṯen ethi ŋa-la. 36 Lithaathɔ nǝrsi ǝrrǝlɔŋw nǝrsi inḏǝthǝ jǝlḏǝ, nǝ lithaathɔ nǝrsi kǝkki ŋwɔɔɽɔŋw-ŋi mindaŋ nǝrsi iili ki-sijin-nǝ. 37 Nǝrsi accathalɔ yall-yi, lithaathɔ nǝrsi undǝthǝnǝ dǝk-dǝk. Nǝrsi ɽeenye lithaathɔ yaalala-yi. Nǝr irǝrǝlɔ ŋɔwaaya liŋinna liforwǝ lǝthi yaaŋal-ŋa yiiɽɔ-yi. Nǝrsi bii ṯurvǝ lǝwɽǝrsi yǝy. 38 Nǝsi ṯurmun ere ɔvthannici ḏuṯ! Nǝr irǝrǝlɔ lɔthɔɔthɔ ki-sahraa-na, ki-yaayin-la, nǝr nanni ki-yibaŋ-na nǝ ki-ruu-nǝ tok.
39 Ŋa tatap ŋǝrrǝsi lizi kɔlɔ, nǝr-ŋi ǝgini ṯiiɽǝnǝ ṯeeŋen ṯǝmminǝ-thi! Laakin nǝreere kaṯṯasi ŋgwa mac kwǝccǝsi-gi Allah wa@ḏa, 40 kaka nigittathica-nyji-gwɔ Allah kwomne-gi kwɔvthanna beṯṯen, ŋǝniŋw liti linḏi ethoro min-min mac illi mǝr-li ɔɽɔmaṯṯi nyiiŋǝ dɔŋw tatap.
aza 11
lugul leḏi ṯəmna
1 ṯəmna ṯinderṯa ṯeṯiruzi ṯəkiza ṯeri kizen rerem, na eṯuŋw firlazi nyuŋwuzi eḏaruŋw, kwɔmne kwiti kwijine mac kwunderṯa kwir rerem. 2 ṯəmna ṯi na lizi leḏi kerrenyŋw əmi Allah-na. 3 ṯəmna ṯi a kwilŋiiḏir eḏaruŋw, ṯurmun ṯikitine ŋiɽaŋal ŋi ŋeḏi Allah, ṯaŋwu na kwɔmne kweṯijini ruwene lu kwɔmne gi ŋgwa kwiti kweṯijini mac.
4 ṯəmna ṯi na habiil ketice Allah karama kiṯemḏi ŋga keḏi gayiin, na gi Allah unḏizi ṯofḏana ṯuŋwun ki, kaka ma gwu haḏiya wuŋwun əmi ŋunduŋwu-na. nuŋw ay, lakin eṯuŋw andindaci nyuŋwuzi kineni kire-kirem ŋgwu, kaka eḏuŋw gwu ṯəmna. 5 ṯəmna ṯi, na aknuuk dirnini mindaŋ nuŋw ere inḏa ŋiɽany mac; nuŋw ere inḏini mac, kaka ma gwu Allah dimi. na iti diminaŋw gwu kinna mac, ner ŋi unḏi ki ŋeni ŋwu: kwuməmi Allah-na. 6 ma kwizi ere eḏi ṯəmna mac, ŋwere eḏi ŋuma ḏuṯ eḏəmi Allah-na. kwere kwunaŋna eḏi duŋgwaḏa Allah nana, eḏuŋw emni eḏaruŋw, weṯinanni, na weṯizinḏeḏa kla haḏiya leṯi naŋnini ŋunduŋwu. 7 ṯəmna ṯi na nuuh, ireca gwu Allah kwɔmne gi kwiti kwijine kinna mac, nuŋw ketize ŋiɽaŋali yey mindaŋ nuŋw daɽmaḏa faluuka eḏi gi kileḏi lizi leḏi duənuŋw kwuŋwun; na ṯəmna ṯi ṯuŋwun nuŋw zi ruzi leḏi ṯurmun kaṯi. mindaŋ nuŋw afi ŋoru ŋir ṯofḏana ṯeṯila ṯəmna ṯi.
8 ṯəmna ṯi na ibrahiim enye nana kinaŋw ma Allah ornuṯi eḏi durṯi eḏele kezir wa winḏuŋw gwu eḏafi ŋoru. nuŋw ru, kwiti kwilŋiiḏi ezir winḏuŋw gwu eḏi ilaḏa mac. 9 na ṯəmna ṯi nuŋw orɔ kwete kwuṯimḏina kezir wukitaḏi gwu Allah eḏindeḏa, ner nana kheyma-na izhaag ŋali, na yaguub tɔk, linḏir li eḏafi ŋoru ṯikitaḏa ṯi ṯa ṯete ṯete. 10 kaka əkizaŋw gwu meḏiina kizen, ŋgwa kweḏi rugwagiza, kwowcina na kwudaɽmaḏi Allah. 11 ṯəmna ṯi na zaara afi ŋuma eḏi ŋi elŋe, kwumɔṯamḏu keni yiḏla yi, kaka ruzaŋw gwu ŋgwa kwumɔkitaḏa kwirlalu. 12 ŋwu ṯaŋwu, na kwor kwete kwumadiḏi eḏay ŋimeyaŋ ŋi orɔ papa kweḏi ŋelŋe ŋuru, ner uri kaka rorum reḏi lere, na kaka kufurṯa kimri-na kir ṯije, kiti keḏir ŋuma eḏi iɽeḏa mac.
13 ki ṯəmna-na ner ay klu tatap, iti afir gwu mac kwɔmne kwukitaḏir gwu eḏafi. lakin izar gwu kinanɔŋw tuk rugwor ri-na, ner agani ki rugwor-na tɔk ner zi ruwezelu pɔrpɔr eḏaruŋw: nyiŋa liri liṯimḏina kezir wu, nenyorɔ ki ṯay laŋw ki ṯurmun-na. 14 lizi leṯi zi andindazi ŋwu, eṯirnyji ilŋiiḏini ŋamaŋ eḏaruŋw, leni linaŋna ezir eḏi ruzi duənu kweŋen. 15 eŋgir ṯiŋayini duənuŋw ŋgwana kwuruḏir gwu, eŋgir eḏi ŋuma eḏi gwu aɽiḏa. 16 lakin, urir ṯa ŋwu, eṯir naŋni ezir wiṯemḏi. winder wiri weḏi kilerena, ṯaŋwu na ṯurony ere miḏa Allah mac eḏeni Allah weŋen, kaka muŋw zi gwu daɽmaci meḏiina kwete.
17 ṯəmna ṯi na ibrahiim, ṯecer gwu, kete izhaagŋw ki ŋweḏgwun la kaka karama, na ŋgwa kwumafi ṯikitaḏa emni eḏi ruzi toru tuŋwun tutuput teḏuŋwi karama, 18 timer ri aruŋw: izhaag kwinḏi eḏorɔ kwukwurna kweḏi ŋelŋe ŋɔŋa. 19 kaka ilŋiicaŋw gwu eḏaruŋw, Allah weḏi ŋuma kinna eḏi diɽi lizi ŋiɽany-na; nuŋw afi kwokwony kaka kwete kwumɔdiɽa ki ŋiɽany-na. 20 ṯəmna ṯi na izhaag ortaḏa yaguubŋwuzi izuu gi, nuŋw zi andaci ŋeḏi kwɔmne kwinḏi eḏerrini. 21 ṯəmna ṯi na yaguub, erricaŋwi ŋiɽany, nuŋw ortaḏa nyoru nyere nyere nyeḏi yuzif, nuŋw kwoce Allah lu, kwuniḏelu ṯu ṯi. 22 ṯəmna ṯi na yuzif, muŋw adiḏi eḏay, nuŋw zi andazi ŋeḏi ṯuruweḏe lu ṯeḏi lizi leḏi izrayiil, nuŋw zi inḏeḏa amra weḏi ṯaniḏa ṯeḏi ŋwia ŋwuŋwun.
23 ṯəmna ṯi mer gwu elŋe muuzaŋw, na ṯernyin-ŋa lenyin gi ner luci ŋunduŋwu yowa ṯɔɽɔl, kaka izar gwu toru teni tizaw beṯe-beṯen; ner ere ṯenye mac amra weḏi kweleny kweni firaawun. 24 ṯəmna ṯi na muuza, muŋw orɔ kwor, nuŋw derne eḏeni tor teḏi tira teḏi firaawun, 25 icaŋw gwu-na keni eḏoɽmaṯi lizi li leḏi Allah ki ṯowɽina yey, ki lobi leḏi ṯinyiŋlana teḏi ŋikya, ṯeṯernine fita-fitak. 26 nuŋw ruzi ṯermiḏeḏa nana, ṯimɔŋw ṯi rerini ŋiɽaŋal ŋi ŋeni Kwruztu, kaka ŋurṯu ŋupa eḏi kwɔmne la kwir gaali gaali kwownina mizr, kaka icazaŋw gwu ujra kiṯay winḏi eḏila. 27 ṯəmna ṯi nuŋw ṯayi mizrŋw lu, iti ṯinyaŋw gwu mac ŋirŋaza ŋeḏi firaawun; kwurmɔṯanaŋw gwu kaka izaŋw gwu ŋgwa kwiti kweṯijini mac. 28 ṯəmna ṯi nuŋw kete kuruu ṯayṯi keni ṯiṯamḏa ŋiɽany, nuŋw rece ezir ŋin ŋi, mindaŋ mezi ŋgwa kwinḏi eḏi kirazi nyoru lu nyir ŋwoɽa ere ilica mac.
29 ṯəmna ṯi ner ṯamḏu ṯujuli ṯori kaka ezir wunḏu; na lizi leḏi mizrŋw ṯeci eḏizerri ŋu ṯɔk, nezi ŋaw enji. 30 ṯəmna ṯi na rilaŋgwu reḏi ariihaŋw rir yarṯiny iidi mer zi gwu rikaḏa lu ŋwamin dufɔkwɽeny. 31 ṯəmna ṯi na rahab kwir kwijin ere kiraḏa lu mac lizi li kla liti limemni mac, kaka amuŋw gwu enji lizi kla limer zi uzi eḏi raŋḏa ezir.
32 na aḏa kwiri kwere kwenyi andazi kwuḏaḏu? lomur lenyi iiraci eḏizandazi ŋeḏi jaḏuun, barak tɔk, zamzuun tɔk, yafṯaaw tɔk, ŋeḏi dauḏ tɔk na zamwiil-ŋa liɽi li— 33 na klu, kaka eḏir gwu ṯəmna, ner ilazi ŋelenyi ki ŋuru, ner ari hakwuma lirlalu, ner afi ṯikitaḏa, ner miḏa lizundaŋa runyu, 34 ner iɽinyaḏa igəŋi lu wufuḏu, ner kilaḏa kalala kirana, ner ferle ki ṯajila-na ṯeŋen, ner ferle ki ṯuwən-na, ner tinyi orṯa weḏi ŋeleny ŋiṯimḏina, 35 na law afi lizi leŋen layyu limɔdiɽi ŋiɽany-na, na lɔkwɔ ner zi inḏa ṯurfa tir ŋudur ŋudur, ner derne eḏi kilaḏa ṯurfa, mindaŋ eḏi diɽi eḏenḏi ki ŋimiiḏa-na ŋiṯemḏi. 36 na liḏaḏu ner rerini ṯiruze ṯi luŋw, na lizɔṯ li, ner zi kəki ŋwuɽun ŋi, ner zi kaṯu ki zijin-na. 37 ner zi aci yal yi, ner unda yaŋna-na yeŋen dəkdək, ner zi endinye kalala gi; eṯir irerelu likinna yima yeḏi yaŋal-ŋa yiɽu yi, ner zi ṯuzezi kwɔmne kweŋen tatap kweḏir, eṯir zi inḏini ṯurfa, eṯir zi owɽina yey beṯen. 38 na ki lizi klu na ṯurmun kḏu ere ofḏani mac. eṯir ta irerelu kwuḏer-na domony, ki yayin la tɔk, ki yumbuŋ-na, na ki yibaŋ-na tɔk.
39 na ŋunduŋa klu tatap, əginer gwu ṯiɽinena kaka eḏir gwu ṯəmna, ner ere afi keni ṯikitaḏa tir minmin mac, 40 kaka izacinyji gwu Allah ŋiɽaŋali ŋiṯemḏelu, ŋenuŋw, lizi klu liti liṯimayini dap mac liira nyuŋwuzi.