Ǝṯi aaɽathɔ ki-ŋɔwaay-na kwokwony mac.
1 Kwɔrɔstɔ kwɔmǝ-nyji kǝdu ethoro hɔrr! Ŋwɔṯaŋw ǝnyji ŋwaara-lɔ tetter, e-ta a ere ǝmmini ethoro lɔwaay kwokwony mac.
2 Ŋwɔṯaŋw ninyoro nyii kwǝni Bɔolɔs kwǝccǝ-ŋǝsi ŋwɔ; mǝ ǝmmini ethi uɽunni tǝ, a Kwɔrɔstɔ ere ǝthi faayitha daŋgal-na ḏuṯ 3 Kwǝnyii iirǝci kweere nyithak kwokwony kwǝmmini rogɽo-ri ruuŋwun ethi uɽunni, kaka ninḏi-ŋgwɔ ethi kǝkkini, nǝ ethisi mithǝ ŋǝthi Sherii@a tok tatap. 4 Na nǝr naani lokwo daŋgal-na lǝṯi naŋni ethi suuɽunni Sherii@a-gi, lǝni linḏi ethi uɽǝnninǝ Kwɔrɔstɔ-ŋǝli, nǝ ǝri rucci ne@ma-na tuk kwǝthi Allah. 5 Nǝ ŋǝni nyiiŋǝ tǝ, ǝṯi-nyii kittatha naanɔ-gwɔ Allah ethi ruusi nyuŋwsi lirllalɔ ṯǝmminǝ-thi nǝ ŋɔma-ŋi ŋǝthi Ṯigɽim. 6 Ŋwɔṯaŋw mǝr naani ethi Kwɔrɔstɔ-na kwǝni Yǝcu tǝ, ǝṯi ṯuuɽunnǝ ṯinaanɔ alla ṯiti ṯinaanɔ mac, ere oro ŋiɽaŋal ŋeere mac, laakin ŋa ŋir mɔhim nǝ ṯǝmminǝ oro ṯǝṯi akkɔ ŋothɽor ṯamɽa-thi.
7 Ŋaaŋa laami-pa eleŋw rac ŋǝmmǝŋ! E-ta ǝyǝ kwɔrɔ kwɔmǝ-ŋǝsi ṯiinyini ethisi ere iinyici naana ŋa ŋir rerrem mac? 8 Ṯiinyini ŋgwɔ kwiti kwinḏi naanɔ-gwɔ ŋgwa kwɔrnɔṯɔ-ŋǝsi mac. 9 Khamiirǝ kɔkɔɔɔc kǝṯi-pǝ uli yiilǝ tatap. 10 Nyii kwɔgittathi-ŋǝsi-gwɔ ki-ṯɔgwor-na ethi Kweeleny-na etheere ǝthi fikirǝ kweere kwir ter mac, illi kwiinyi ṯɔɽɔk. Nǝ ŋgwa kwǝṯi-ŋǝsi urrǝthǝ-nǝ, mɔŋw kinnǝni oro tok kaka aatha kweere, ŋwɔtǝ kaṯṯasi hɔkwɔma wuuŋwun rac.
11 Liyǝŋgǝri, ǝŋgi-nyii andaci lizi ethi unduni ŋwɔthrɔnya tǝ, na aatha kwɔrɔ kwǝṯinyii-gi lizi ǝwɽici yǝy-lɔ mindaŋ nɔrɔthɔ kirem kimaara? Nǝ ǝŋgiroroŋw tǝ, ǝŋgi ṯǝbshiir ṯiinyi ṯǝthi ŋwuuɽi ŋwɔɽɔmɔthalɔ ŋwɔthi Kwɔrɔstɔ, ere ǝnyji ṯurvǝ ṯeere mac. 12 Nyii kwamɽa beṯṯen etheese lizi kila lǝṯi-ŋǝsi ruunyuni, ethi illatha keereny-gi dɔṯṯɔk mindaŋ ǝŋgir ippǝnni ŋwuurǝ ŋweeŋen tok!
13 Laakin ŋaaŋa tǝ liyǝŋgǝri, lɔrnaca-ŋǝsi-pa hɔrriiyya. Laakin ǝṯi duŋgwǝcǝ hɔrriiyya waalɔ ethi kǝkki ŋaaŋwɔsi sɔɔrɔm-gi kwǝthi yaŋna yaalɔ mac. Laakin ǝṯi kǝniny mǝccǝthisi-nǝ wɔɽe-wɔɽeny ṯamɽa-thi. 14 Kaka nirattathi-gwɔ Sherii@a tatap ki-ŋiɽaŋal ŋɔtɔpɔt ŋǝniŋw, “Ǝṯi amɽi jaara kwɔɔŋa, kaka nǝṯi-gwɔ amɽi rogɽo rɔɔŋwa.” 15 Laakin mǝ yathisi-na wɔɽe-wɔɽeny nyǝgǝp-nyǝgǝp tǝ, iisar-mba aŋratha etheere irnathisi-na mac.
Ṯigɽim ṯǝthi Allah-ŋǝ aŋna-yi.
16 Nyii kwǝccǝ-ŋǝsi-mǝ ŋwɔ, ethi-ŋǝsi Ṯigɽim iili ki-ŋethre-na ŋaalɔ, mindaŋ mǝseere ǝrri ŋǝthi sɔɔrɔm kwǝthi aŋna mac. 17 Kaka nǝṯi-gwɔ sɔɔrɔm kwǝthi aŋna oro ṯuwǝn ŋiɽaŋal-ŋi ŋa ŋǝṯisi Ṯigɽim naŋni, nǝ sɔɔrɔm kwǝthi Ṯigɽim ǝṯɔŋworo ṯuwǝn ŋiɽaŋal-ŋi ŋa ŋǝṯisi aŋna naŋni. Ŋiɽaŋal ŋɔ ŋir ŋiɽǝn, ŋǝṯi rɔɔthathisi-na ṯuwǝn, ǝṯir-ŋǝsi-mǝ ṯiinyini ethisi ǝrri ŋa ŋǝṯisi naŋni ethisi ǝrri. 18 Laakin mǝŋǝsi Ṯigɽim mɔlotto tǝ, neere kǝkkini Sherii@a-gi mac.
19 Nǝ ŋothɽor ŋǝthi aŋna oro ŋɔ ŋilŋithina-lɔ por-por ŋir-ŋiijin, ŋǝrṯǝmbǝl, ŋisǝrmuuṯ, 20 ṯɔgwɔccalɔ ṯǝthi riiɽu, ŋozŋor, ŋuwǝzǝ, ŋǝryǝ, kee ŋiɽany, urǝzi ṯɔgwori, ṯamɽa ṯǝthi rogɽo, ṯundǝnnǝnǝ, ṯɔɽɔmaṯṯa dɔŋw ki-ŋǝluŋw-nǝ, 21 ŋurumthu, urlǝli, athvayini nǝ ŋithaathɔ ŋir kaka ṯǝ ŋɔ ŋǝṯirsi ǝrri. Nyii kwɔŋǝsi ulici, kaka-ṯǝ kinaŋw nuulɔcǝ-ŋǝsi-gwɔ kerreny, kila lǝṯisi ǝrri ŋɔrtɔŋw, ereere aavi ŋɔɔrɔ ŋǝthi ŋeeleny ŋǝthi Allah ḏuṯ 22 Laakin nǝ ŋwɔɔla ŋwɔthi Ṯigɽim oro ŋwɔ: ṯamɽa, ṯinyiŋlana, ŋiiɽǝnnǝ, ṯindinyanna naana, ŋimɽi, ŋisanna, ŋirllalɔ, 23 ṯǝjlinnǝ ki-rogɽo nǝ mithǝ ṯɔgwori. Ŋwɔṯaŋw nǝ Sherii@a ere naani kweere kwir ter mac kwir ḏiḏ ŋiɽaŋal ŋɔ. 24 Kila lɔrɔ lǝthi Kwɔrɔstɔ kwǝni Yǝcu, nǝrǝni limǝ ɽeenye yaŋna yeeŋen kadɔwa-gi nǝ sɔɔrɔm-gi tok kwuuŋwun, ki-ŋwuuɽi-lǝ ŋwɔɽɔmɔthalɔ.
25 Mǝr miithi Ṯigɽim-thi tǝ, ǝri irǝri tok Ṯigɽim-thi. 26 Laazim ereere piŋi rogɽo rǝri mac, ya etheere urrǝthinǝ wɔɽe-wɔɽeny mac, ya etheere kiyathisi ŋiɽany keereny mac.
aza 5
1 Kwruztu kwumenyji kedi eḏorɔ lizi lir hurr; ṯaŋwu, enjer ŋwara lu teter, ta ere emni eḏi kəkini ki ŋuway-na kwokwony mac.
lazim eḏalla Kwruztuŋw, ya kuruu
2 ta na nyi kweni buuluz, nyi kwecaŋazi ma ŋwa, ma emni eḏuɽuni ta, a Kwruztu ere ofḏani daŋgal-na mac. 3 ŋenyji ŋi ireci kwokwony, lere nyiḏak lemni eḏuɽuni, lazim eḏuŋw inyici kuruu nana tatap. 4 ma alliḏa kuruu rugwori nana eḏi ruzi ŋaŋwuzi lofḏana ta, a limuɽuḏenelu nani gwu Kwruztu, na nani gwu ṯimeca ṯuŋwun ṯeḏi ŋimɽi. 5 ṯəkiza ṯeri kizen eḏafi ṯofḏana ṯəmna ṯi, ṯeṯir nanjelu cugwɔ-cugwɔp, ner orɔ ŋɔḏɽor ŋeḏi Ṯigɽim ṯirlinelu ter. 6 kaka ma nani eḏi Kwruztu-na kweni Yecu ta, eṯi ṯuɽuna ere eni ŋiɽaŋal ŋere mac, ya eḏere uɽuni tɔk mac, lakin ṯəmna ṯiri ṯeṯi ruwezi ṯamɽa lu. 7 a limɔ duŋgwuŋgwaḏa ŋamaŋ, na eya kwiri kwuṯinyineŋazi mindaŋ eḏi zi ere inyici nana ŋirlalu mac? 8 ŋiɽaŋal ŋu ŋimurli ŋaŋwuzi, ŋiti ŋimila nani gwu Allah mac, wornuṯiŋazi. 9 nyuruŋwa nyɔkwɽeny nyeṯi ṯugwuli yila tatap. 10 nyi ŋgwu kwukitaŋazi ki ṯugwor-na eḏi Kweleny-na eḏaruŋw, a liti lirece ŋiɽaŋali ŋir ter yey lu mac, illi ŋinyi; na ŋgwa kweṯurreḏa ŋaŋwuzi-na ŋwafi hukma wuŋwun rac, muŋw kinna orɔ kaka aḏa. 11 lakin lieŋgeri, nyi kweṯandaci lizi eḏuɽuni a? beri ma! mer ta orɔ ŋu, er nyi ŋi ere owɽi yey kinna mac. eŋginyji andaci eḏuɽuni, eŋgir ere ermiḏeḏa ṯaliima nana teḏi ŋwuɽi ŋwuɽmɔḏalu mac. 12 nyi kwaru ŋwu ŋeḏi kla letiŋazi urreḏa-na, ŋofḏana deŋgen eḏuɽudeḏa yaŋna lu yeŋen tuc!
eṯefrinji ṯamɽa ṯalu eḏorɔ kweleny kweḏi hurriya walu
13 lieŋgeri linyi, ner ŋazi ornuṯi eḏi kedini; lakin eṯere efrinji hurriya walu eḏi bii ŋaŋwuzi kaduwa gi keḏi yaŋna yalu mac. eṯi meciḏizi-na ṯamɽa ṯi wuɽe-wuɽeny. 14 kaka eṯi gwu kuruu tatap rataḏi dap ki ŋiɽaŋal-na ŋutuput ŋir ŋu: eṯizamɽi liḏaḏu kaka eṯi gwu amɽi rɔgwɽɔ rɔŋwa. 15 lakin, ma yaḏiḏizina mindaŋ mezere ala rii mac, aŋraḏir mindaŋ mezi ere iri kitay daŋgal-na wuɽe-wuɽeny mac eḏernine.
ṯimulḏa ṯeḏi Ṯigɽim yirlinelu ter
16 lakin nyi kwecaŋazi ma ŋwa, eṯi dirnaṯi eḏi Ṯigɽim-na mindaŋ eḏi zi ere erri ŋir zurum kweḏi rɔgwɽɔ ruɽun mac. 17 kaka ur gwu zurum kweḏi rɔgwɽɔ ruɽun tuwən Ṯigɽim ṯi, na zurum kweḏi Ṯigɽim orɔ ṯuwən rɔgwɽɔ ri ruɽun; kaka eṯir gwu multaḏiza ki riny ki riny eḏi ṯinyini ŋaŋwuzi eḏizerri kaka ŋinaŋnazi rugwor ralu eḏizerri. 18 lakin ma mulɔḏine Ṯigɽim ṯi, a liti linani ki rii-na reḏi kuruu mac. 19 na ŋɔḏɽor ŋeḏi rɔgwɽɔ ruɽun ŋilŋiiḏina derder ŋiri ŋijin tɔk, ŋerṯambal, ŋizarmuṯ, 20 ṯikwocalu teḏi libayil, ŋɔzŋor, ŋuweza, ŋerya, ke ŋiɽany, urezi tugwori, ṯamɽa ṯeḏi rɔgwɽɔ, ṯundenena, ṯoɽmaṯa duŋw ki ŋiɽaŋal-na ŋir ŋəluŋ, 21 ŋurmuḏu, na ṯurlela, na ṯaḏifayina, na ŋiḏaḏu ŋir kaka ṯaŋwu. nyi kwirecaŋazi kaka irecaŋazi gwu kerreny, kla leṯizerri ŋwu, er ere afi ŋoru ŋeḏi ŋeleny ŋeḏi Allah mac. 22 lakin na nyor nyeḏi Ṯigɽim ṯirlinelu ter eni ṯamɽa, ṯinyiŋlana, ŋiɽena, ṯindinyana nana ṯeḏi ṯurfa, ṯimeca ṯi, ŋizana ŋi, ŋirlalu tɔk, 23 ṯejilina ki rɔgwɽɔ, na ŋuma eḏi ŋi miḏa ṯugwori; na kuruu ere nani mac keḏi ŋiɽaŋali ŋir kaka ŋu. 24 na kla lir leḏi Kwruztu kweni Yecu, linderṯa limɔ ṯigreḏa rɔgwɽɔ ruɽun ki ŋwuɽi la ŋwuɽmɔḏalu kaduwa gi keŋen, zurum gi tɔk.
25 mer miiḏi Ṯigɽim ṯi, er ma dirnaṯi tɔk eḏi Ṯigɽim-na. 26 er ma ere amɽi rɔgwɽɔ reri beten mac, er ere apiraḏizi ŋarriny-na wuɽe-wuɽeny mac, er ere kiyaḏizi ŋiɽany wuɽe-wuɽeny tɔk mac.